Jeremiya
49 Ka vaAmoni,+ Jehovha i ngalo:
“Kasi Izrayeli o kala a nga hi na vana?
A nga na mugi wa tshomba ke?
Hikuyini Malkamu+ a tekileko a tshomba ya Gadhi?+
Kona hikuyini a vanhu vakwe va hanyako madhoropeni ya Izrayeli?”
2 “‘Hikwalaho, a masiku mata’, ku wula Jehovha,
‘Laha ndzi to zwatisa a citlharihiso ca yimpi* yo vhukela Rabha+ wa vaAmoni.+
I ta maha tinhulu ta marumbi,
A zvidhoropana zvakwe zvi ta hisiwa hi ndzilo.’
‘Izrayeli i ta phanga lava va nga mu phanga’,+ ku wula Jehovha.
3 ‘Rila wena Hexbhoni, hakuva Ayi i lovisilwe!
Banani tihuwa, n’wina zvidhoropana zva Rabha.
Bohani tisakwa.
Rilani mu tsutsuma-tsutsuma lomu marangeni ya maribye,*
Hakuva Malkamu i taya wukhumbini,
Zvin’we ni vapristi vakwe ni tihosana takwe.+
4 Hikuyini u ti kulisako hi mikova,
Hi tivala ti khulungako mati, wena nhanyana wo kala kutsumbeka,
U tsumbako a titshomba ta wena,
U tlhela uku: “Himani a tota a talwa na mina?”’”
5 “‘Ndza ku nehela a nchumu wo tshisa’, ku wula a Hosi ya Hombe, Jehovha wa mabutho.
‘Wu tata hi ka vontlhe va ku randzeleko.
U ta hangalaswa matlhelweni wontlhe,
I hava a to hlengeleta lava va tsutsumako.’”
6 “‘Kanilezvi hi ndzhako ka cikhati, ndzi ta hlengeleta a tikhumbi ta vaAmoni’, ku wula Jehovha.”
7 Ka Edhomi, Jehovha wa mabutho i ngalo:
“A ka ha hi na wutlhari le Temane?+
A wusungukati ga ginene ga lava va nga ni kupimisisa gi no fuva ke?
A wutlhari gabye gi no bola ke?
8 Fularelani mu tsutsuma!
Fambani mu ya fihlala lomu kueteni, n’wina vahanyi va Dhedhani!+
Hakuva ndzi ta mu nehela khombo Esawu
Laha ci to chikela a cikhati leci ndzi to mu tsayisa hi cona.
9 Loku a vakhayi va mauvha a vota ka wena,
Va wa nga ta siya yokari kasi ma kutsuliwa ke?
Loku a makhamba a mo nghena ni wusiku,
Ma wa nga ta wonhetela ntsena lezvi ma zvi lavako ke?+
10 Kanilezvi ndzi ta phanga Esawu a salisa zvezvi.
Ndzi ta funungula a matshamu yakwe ya ku fihlala kona,
Kasi a nga ha fihlali.
A vana vakwe, ni vamakabye vakwe, ni vaakelani vakwe, vontlhe va ta lovisiwa,+
A nga ta hava kona kambe.+
12 Hakuva Jehovha i ngalo: “Loku ku hi ku lava va nga kala ku konelwa a kunwa a kopo va fanele kunwa, wena hi wena u to tsikiwa u nga tsayisiwi ke? U nga ta tsikiwa u nga tsayisiwi hakuva u tanwa futsi.”+
13 “Hakuva ndzi hlambanyile hi wutsumbu ga mina”, ku wula Jehovha, “lezvaku Bhozra i tava nchumu wo tshisa,+ ni cihlekiso, ni rumbi, ni ciruko; wontlhe a madhoropa yakwe ma tava marumbi kala kupindzuka.”+
14 Ndzi zwile mahungu ma tako hi ka Jehovha,
A cirun’wa ci rumilwe cikari ka matiko ci yaku:
“Tsombanani mu mu vhukela;
Ti longiseleni kulwa.”+
15 “Hakuva ndzi ku mahile wamutsongwani cikari ka matiko,
Ni wa ku chepetiwa cikari ka vanhu.+
16 A kuchavisa ka wena
Ni matshandza ya mbilu ya wena zvi ku kanganyisile,
Wena loyi u tshamako lomu mikovotlweni ya maribye,
U tshamako citsungeni co tlakuka nguvhu.
Hambu loku u aka a cisaka ca wena le hehla a ku khwatsi u gama,
Ndzi ta ku chisa ni kwaseyo”, ku wula Jehovha.
17 “Edhomi i tava nchumu wo tshisa.+ Ni wihi a to hundza hi kona i ta hlamala, aba noti hi kota ya wontlhe makhombo lawa ma mu weleko. 18 A ku khwatsi hi kuhahlulwa ka Sodhoma ni Gomora ni madhoropa ya laha kusuhani nawo”,+ ku wula Jehovha, “a ku na munhu a to tshama kona ne hambu ku aka kona.+
19 “Ku tata a munhu a ta vhukela a wuriselo go rula, a ku khwatsi i nghala+ yi humako khwatini go tlhuma ga Jordhani, kanilezvi hi cikhatanyana ndzi ta mu* maha a mu* tsutsuma. Ndzi ta yimisa loyi a hlawulilweko lezvaku a mu fumela. Hakuva himani a fanako na mina, niku himani a nga phikizanako na mina? Himani murisi a nga yimako mahlweni ka mina?+ 20 Hikwalaho, n’wina vanhu, zwanani a kungo* ga Jehovha hi Edhomi ni lezvi a alakanyelako ku maha a vahanyi va Temane:+
Hakunene a tiyivhana ta ntlhambi ti ta roroviselwa tiya kule.
A wutshamu gabye i ta gi maha ciwula hi kota yabye.+
21 A misava yi tsekatsekile hi guwa ga kuwa kabye.
Ku na ni cirilo!
A guwa gi zwele ni le Bimbini go Pswhuka.+
22 A ku khwatsi i gama, i ta kwela a tlhela a relela hi kuhatlisa,+
I ta tshambuluta a tipapa takwe hehla ka Bhozra.+
Ka siku lego, a mbilu ya masochwa ya Edhomi
Yi ta ku khwatsi i mbilu ya wasati a pswalako.”
23 Ka Dhamasku:+
“Hamate+ na Arpadhe va wisilwe tingana,
Hakuva va zwile a mahungu yo biha.
Va nyeka hi kuchava.
Lomu bimbini ku na ni kukarateka ka ku a ku nge ruliswi.
24 Dhamasku i tsemekile hlanha.
I fularele a tsutsuma, kanilezvi i khomilwe hi kuchava.
I khomilwe hi kukarateka ni kubayisa
A ku khwatsi wasati a pswalako.
25 Hikuyini a dhoropa go dzundzeka, a dhoropa ga litsako,
Gi nga kala ku tsikiwa?
26 Hakuva a majaha yakwe ma tawa lomu maprasa* yakwe,
Ni wontlhe a masochwa ma ta lova hi siku lego”, ku wula Jehovha wa mabutho.
27 “Ndzi ta lumekela a muro wa Dhamasku hi ndzilo;
Wu ta hisa a tikhokhola* ti tiyisilweko khwatsi ta Bhen-Hadhadhe.”+
28 Ka Kedhare+ ni mifumo ya Hazori, leyi Nebhukadnezare,* a hosi ya Bhabhuloni, a nga yi lovisa, Jehovha i ngalo:
“Sukani muya Kedhare,
Mu ya lovisa a vana va le Mutsuwuka-gambo.
29 A matenda yabye ni mitlhambi yabye zvi ta tekiwa,
A tinguwo ta matenda yabye ni tontlhe a titshomba tabye.
A makameli yabye ma ta tekiwa;
Va ta va rilela, vaku: ‘Hi randzelwe hi kuchava matlhelweni wontlhe!’”
30 “Tsutsumani muya kule!
Fambani mu ya fihlala lomu kueteni, n’wina vahanyi va Hazori”, ku wula Jehovha.
“Hakuva Nebhukadnezare,* a hosi ya Bhabhuloni, i mu xuxele cikungo,
Niku i mu lukele mano.”
31 “Sukani mu ya vhukela a tiko gi nga kuruleni,
Legi gi tshamisekileko!”, ku wula Jehovha.
“A gi na tivati ne zvikwinyaro; vona va hanya voce.
32 A makameli yabye ma ta phangiwa,
Ni mitlhambi yabye yo tala yi tava muphango.
Ndzi ta va hangalasa ka mimoya yontlhe,*
Lava va tsemako a misisi yabye lomu mareveni,+
Ndzi va nehela a khombo gabye hi matlhelweni wontlhe”, ku wula Jehovha.
33 “Hazori i tava wutshamu ga makhanga,
I tava rumbi ga kala kupindzuka.
A ku na munhu a to tshama kona,
Ne hambu ku aka kona.”
34 Leyi i mhaka ya Jehovha yi ngata ka muphrofeti Jeremiya xungetano hi Elami,+ kusanguleni ka kufuma ka Zedhekiya, a hosi ya Judha,+ yi taku: 35 “Jehovha wa mabutho i ngalo: ‘Ndzi ta tshova a wura ga Elami,+ a cibuka* ca ntamu wabye. 36 Ndzi ta neha ka Elami a mune wa mimoya ya mune wa matlhelo ya matilo. Ndzi ta va hangalasa ka yontlhe mimoya leyi. A ku na tiko legi lava va hangalakileko le Elami va to kala kuya ka gona.’”
37 “Ndzi ta rurumelisa a vaElami mahlweni ka valala vabye ni mahlweni ka lava va hlotako a wutomi* gabye. Ndzi ta va nehela a khombo, a zanga ya mina yi vhurako”, ku wula Jehovha. “Ndzi ta rumela cipadha ci va landza kala ndzi va lovisa va ku bhi.”
38 “Ndzi ta yimisa a citshamu ca mina ca wuhosi le Elami,+ ndzi lovisa a hosi ni tihosana”, ku wula Jehovha.
39 “Kanilezvi masikwini yo gumesa, ndzi ta hlengeleta a vanhu va khomilweko va Elami”, ku wula Jehovha.