Ezekiyeli
32 Hi lembe ga wu 12, ka hweti ya wu 12, hi siku go sangula ga hweti, a mhaka ya Jehovha yi nota kambe ka mina, yi taku: 2 “N’wana wa munhu, yimbelela a lisimu la cirilo xungetano hi Faro, a hosi ya Gibhite, uku kakwe:
‘U wa fana ni cinghalana ca ntamu* ca matiko,
Kanilezvi u no miyetiwa.
U wa fana ni cingondzomu ca lomu bimbini,+ na u hlambela micongweni ya wena,
U vhindlusa mati hi mikondzo ya wena u tlhela u chakisa micongo.’
3 Jehovha, a Hosi ya Hombe, i ngalo:
‘Hi ku tirisa a hlengeletano ya matiko yo tala, ndzi ta hoxela a likoka la mina hehla ka wena,
Ma ta ku phasa likokeni la mina.
4 Ndzi ta ku tsika misaveni yo woma;
Ndzi ta ku hoxa laha libalangeni.
Ndzi ta maha lezvaku a zvinyanyani zvontlhe zva tilo zvi khapama hehla ka wena,
Ndzi xurisa a zvihari zva khwati zva misava yontlhe hi nyama ya wena.+
5 Ndzi ta hoxa a nyama ya wena zvitsungeni
Ndzi tata mikova hi matlhatlha ya wena.+
6 Ndzi ta khulungelisa misava kala zvitsungeni hi nkhata lowu wu jombako ka wena,
Wu ta tata micongo.’*
7 ‘Laha u to timiwa, ndzi ta khubhunyeta matilo ndzi tlhela ndzi pfhupelisa a tinyeleti ta wona.
Ndzi ta fenengeta gambo hi marefu,
Ni hweti yi nga ta ha humesa a kuwonekela ka yona.+
8 Ndzi ta pfhupelisa a zviwoningo zvontlhe zva matilo hi kota ya wena,
Ndzi tlhela ndzi fenengeta a tiko ga wena hi munyama’, ku wula Jehovha, a Hosi ya Hombe.
9 ‘Ndzi ta vanga hlomulo timbilwini ta matiko yo tala laha ndzi to yisa lava va khomilweko ka wena ka man’wani matiko,
Ka matiko u nga ma tiviko.+
10 Ndzi ta maha matiko yo tala ma hlamala nguvhu,
Ni tihosi ta wona ti ta rurumela hi kuchava hi kota ya wena, laha ndzi to khoma a cipadha ca mina mahlweni kabye.
Va ta rurumela yi nga chayi, a mun’we ni mun’wani na a rurumelela a wutomi gakwe,
A sikwini ga kuwa ka wena.’
11 Hakuva Jehovha, a Hosi ya Hombe, i ngalo:
‘A cipadha ca hosi ya Bhabhuloni ci tata hehla ka wena.+
12 Ndzi ta wisa a zvitshungu zva wena hi zvipadha zva masochwa ya tinhenha,
Wontlhe lawa ya xapi nguvhu cikari ka matiko.+
Ma ta tsongahata a matshandza ya Gibhite ma tlhela ma hihirita a zvitshungu zvakwe zvontlhe.+
13 Ndzi ta lovisa a zvifuyo zvakwe zvontlhe lezvi zvi nga mbhirini ya mati yakwe yo tala;+
A ku na nkondzo wa munhu ne cinyondzwani ca cifuyo ci to ma vhindlusa kambe.’+
14 ‘Ka cikhati leco, ndzi ta basisa a mati yabye,
Niku ndzi ta khulungisa a micongo yabye a ku khwatsi mafura’, ku wula Jehovha, a Hosi ya Hombe.
15 ‘Laha Gibhite ndzi to mu maha ciwula ci hahlulilweko, a tiko gi tekelweko zvontlhe zvi nga gi tatile,+
Laha ndzi to hihirita vontlhe a vaaki va gona,
Va ta zvi tiva lezvaku hi mina Jehovha.+
16 Leli lisimu la cirilo, niku a vanhu hakunene va ta li yimbelela;
A vanhanyana va matiko va ta li yimbelela.
Va ta li yimbelelela Gibhite ni zvitshungu zvakwe zvontlhe’, ku wula Jehovha, a Hosi ya Hombe.”
17 Makunu hi lembe ga wu 12, hi siku ga wu 15 ga hweti, a mhaka ya Jehovha yi nota ka mina, yi taku: 18 “N’wana wa munhu, rilela a zvitshungu zva Gibhite u tlhela u mu rumela hasi kueteni ka misava, yena ni vanhanyana va matiko ya ntamu, zvin’we ni lava va relelako nkeleni.*
19 “‘U pala mani hi kusaseka? Relela uya hasi, u ya etlela ni lava va nga mahiwangiko wukwera!’*
20 “‘Va tawa cikari ka lava va delweko hi cipadha.+ I nyikelwe ka cipadha; mu roroviseni zvin’we ni zvontlhe a zvitshungu zvakwe.
21 “‘A tinhenha leti ta ntamu ka tontlhe ti ta wulawula kakwe ni ka lava va mu vhunetelako na ti hi kueteni ka Cilahla.* Hakunene va ta relela hasi va ya etlela a ku khwatsi hi lava va nga mahiwangiko wukwera,* va delweko hi cipadha. 22 Asiriya i lomo ni hlengeletano yakwe yontlhe. A zvilahla zvabye zvi matlhelweni yakwe wontlhe, vontlhe va delwe hi cipadha.+ 23 A zvilahla zvakwe zvi kueteni ka nkele,* ni hlengeletano yakwe yi matlhelweni wontlhe ya cilahla cakwe. Vontlhe va delwe hi cipadha, hi kota ya lezvi va vangileko kuchava tikweni ga vahanyako.
24 “‘Elami+ i lomo zvin’we ni zvontlhe a zvitshungu zvakwe matlhelweni ya cilahla cakwe, vontlhe va delwe hi cipadha. Va relele kueteni ka misava na va nga mahiwangi wukwera,* lava va nga vanga kuchava tikweni ga vahanyako. Makunu va ta rwala a tingana tabye zvin’we ni lava va relelako nkeleni.* 25 Va mu andlalele mubhedhi cikari ka lava va delweko, zvin’we ni zvontlhe a zvitshungu zvakwe matlhelweni ya zvilahla zvakwe. Vontlhe a va mahiwangi wukwera,* va delwe hi cipadha, hakuva va wa vanga kuchava tikweni ga vahanyako. Va ta rwala tingana tabye zvin’we ni lava va relelako nkeleni.* I vekilwe cikari ka lava va delweko.
26 “‘Hi kwalomo ku nga na Mexeke na Tubhale+ ni zvitshungu zvabye zvontlhe. A zvilahla zvabye* zvi matlhelweni yakwe wontlhe. Vontlhe a va mahiwangi wukwera,* va tlhavilwe hi cipadha, hakuva va wa vanga kuchava tikweni ga vahanyako. 27 Xana va nga ta etlela zvin’we ni tinhenha ta ntamu ti nga mahiwangiko wukwera* leti ti delweko, leti ti releleko Cilahleni* ni matlhari ya tona ya yimpi ke? Va ta veka a zvipadha zvabye lahasi ka tihloko* tabye, ni zviwonho zvabye zvi ta tlhatekiwa hehla ka marambu yabye, hakuva a tinhenha leti ta ntamu ti wa vanga kuchava tikweni ga vahanyako. 28 Kanilezvi wena, u ta siliwa cikari ka lava va nga mahiwangiko wukwera,* u etlela zvin’we ni lava va delweko hi cipadha.
29 “‘Edhomi+ i kwalomo, zvin’we ni tihosi takwe ni tontlhe a tihosana takwe. Hambu lezvi va nga hi ni ntamu, va latilwe cikari ka lava va delweko hi cipadha. Vonawu va ta etlela ni lava va nga mahiwangiko wukwera*+ zvin’we ni lava va relelako nkeleni.*
30 “‘Kwalomo ku na ni tihosana* tontlhe ta le n’walungu,* zvin’we ni vaSidhoni vontlhe,+ lava va releleko hi tingana ni lava va delweko, hambu lezvi va nga vanga kuchava hi kota ya wunhenha gabye. Va ta etlela na va nga mahiwangi wukwera* ni lava va delweko hi cipadha, va ta rwala a tingana tabye zvin’we ni lava va relelako nkeleni.*
31 “‘Faro i ta zvi wona zvontlhe lezvi, a chaveleleka ka zvontlhe lezvi zvi humeleleko a zvitshungu zvakwe;+ Faro ni butho gakwe gontlhe va ta dawa hi cipadha’, ku wula Jehovha, a Hosi ya Hombe.
32 “‘Kota lezvi a vangileko kuchava tikweni ga vahanyako, Faro ni zvontlhe a zvitshungu zvakwe va ta latiwa va humula ni lava va nga mahiwangiko wukwera,* zvin’we ni lava va delweko hi cipadha’, ku wula Jehovha, a Hosi ya Hombe.”