Ezekiyeli
13 A mhaka ya Jehovha yi nota kambe ka mina, yi taku: 2 “N’wana wa munhu, phrofeta xungetano hi vaphrofeti va Izrayeli,+ u byela lava va tsambako a zviphrofeto zva vona venyi,*+ uku: ‘Zwanani a mhaka ya Jehovha. 3 Jehovha, a Hosi ya Hombe, i ngalo: “Khombo ka vaphrofeti va zvipumbu, lava va landzelako zva tihloko tabye* na va nga wonangi nchumu!+ 4 O Izrayeli, a vaphrofeti va wena va fana ni tinghowo* cikari ka marumbi. 5 Mu nga taya ka tifa ta mimuro ya maribye mu ya yi aketa na mu yi aketela a yindlu ya ka Izrayeli+ kasi Izrayeli a yima a tiya kulweni sikwini ga Jehovha.”+ 6 “Va wona a miwoniso yo hemba, va phrofeta mawunwa; ve ngalo: ‘A mhaka ya Jehovha hi leyi’, kuveni Jehovha a nga va rumangi, va tlhela va rindzela ku a mhaka yabye yi tatiseka.+ 7 A hi miwoniso yo hemba leyi mu yi wonako? Kona a hi mawunwa lezvi mu phrofetako, muku: ‘A mhaka ya Jehovha hi leyi’, na ndzi nga wulangi nchumu ke?”’
8 “‘Hikwalaho, Jehovha, a Hosi ya Hombe, i ngalo: “‘Kota lezvi mu wulawulako mawunwa ni lezvi a miwoniso ya n’wina yi nga mawunwa, ndza mu vhukela’, ku wula Jehovha, a Hosi ya Hombe.”+ 9 A canja ga mina ga vhukela a vaphrofeti lava va wonako a miwoniso yo hemba va tlhela va phrofeta mawunwa.+ Va nga tava hubyeni ya masungukati ya vanhu va mina, ne va nga ta tsaliwa bhukwini ga yindlu ya ka Izrayeli, ne hambu ku wuya tikweni ga ka Izrayeli. Mu ta zvi tiva lezvaku hi mina Jehovha, a Hosi ya Hombe.+ 10 Zvontlhe lezvi zvi ta maheka hi kota ya lezvi va nga hambukisa a vanhu va mina hi ku wula lezvi: “Ku rulile!” kuveni a ku na kurula.+ Loku a wokari a aka khurisi go kala ku tiya vona va gi penda hi mhemba.’*+
11 “Byela lava va pendako a khurisi hi mhemba lezvaku gi tawa. Ku tana vhula ya hombe, kuwa maralala ku tlhela kuba cingulo ca ntamu ci gi khungumula.+ 12 A cikhati leci a khurisi gi towa, a vanhu va ta mu wutisa, vaku: ‘A kupenda ka n’wina hi mhemba ku vhunile yini ke?’+
13 “Hikwalaho, Jehovha, a Hosi ya Hombe, i ngalo: ‘Khulweni ga mina, ndzi ta tsikeleta a zvingulo zva ntamu, ndzi rumela a vhula ya hombe zangeni ya mina ndzi tlhela ndzi nisa maralala khulweni ga mina gi hahlulako. 14 Ndzi ta khungumula a khurisi legi mu pendileko hi mhemba ndzi gi wisa lahasi, ni ciseketelo ca gona ci ta sala kubaseni. A cikhati leci a dhoropa gi towa, mu ta lova zvin’we nago; mu ta zvi tiva lezvaku hi mina Jehovha.’
15 “‘A cikhati leci ndzi to tsikeleta a khulo ga mina gontlhe hehla ka khurisi ni hehla ka lava va gi pendileko hi mhemba, ndzi ta mu byela ndziku: “A khurisi a ga ha hi kona, ni lava va nga gi penda hi mhemba vonawu a va ha hi kona.+ 16 A vaphrofeti va Izrayeli a va ha hi kona, lava va nga phrofeta ka Jerusalema ni ku wona a miwoniso ya kurula ha yena kuveni a ku na kurula”’,+ ku wula Jehovha, a Hosi ya Hombe.
17 “Wena n’wana wa munhu, hundzuluka u cuwuka a vanhanyana va vanhu va wena lava va tsambako a zviphrofeto zva vona venyi, u phrofeta xungetano hi vona. 18 Va byele, uku: ‘Jehovha, a Hosi ya Hombe, i ngalo: “Khombo ka vavasati lava va rungako miceka ya mawoko* wontlhe ni ku maha tivhewu* ta tihloko ta tipimo tontlhe kasi ku hlota a wutomi* ga vanhu! Mu alakanya ku mu nga hlota a wutomi* ga vanhu va mina, hambulezvo mu ponisa a wutomi* ga n’wina ke? 19 Ma ndzi nyenyezisa cikari ka vanhu va mina hi ku fela macanja ya sevhadha ni matlhatlha ya tipawa,+ mu daya lava* va nga faneliko kufa mu ponisa lava* va nga faneliko ku hanya, mu maha lezvo hi ku hembela a vanhu va mina lava va ingiselako a mawunwa ya n’wina.”’+
20 “Hikwalaho, Jehovha, a Hosi ya Hombe, i ngalo: ‘N’wina vavasati, ndza vhukela a miceka ya n’wina leyi mu hlotako hi yona vanhu* a ku khwatsi vova zvinyanyani; ndzi ta yi wutla mawokweni ya n’wina ndzi tlhatlhisa lava mu va hlotako a ku khwatsi hi loku va hi zvinyanyani. 21 Ndzi ta wutla a tivhewu ta n’wina ndzi tlhatlhisa a vanhu va mina mandleni ya n’wina. Va nga ta ha tshuka vava nchumu wa kuva mu wu hlota; mu ta zvi tiva lezvaku hi mina Jehovha.+ 22 Hakuva mu rerile a wakululama hi mawunwa ya n’wina+ na ndzi nga mu vangelangi hlomulo,* mu tiyisa a mandla ya wakubiha+ kasi a nga hundzuluki ndleleni yakwe ya kubiha a simama ku hanya.+ 23 Hikwalaho, n’wina vavasati, mu nga ta ha wona a miwoniso ya mawunwa ne mu nga ta ha vhumba.+ Ndzi ta tlhatlhisa a vanhu va mina canjeni ga n’wina; mu ta zvi tiva lezvaku hi mina Jehovha.’”