Zakariya
11 “Vhulula tivati ta wena, wena Lebhanoni,
Kasi a ndzilo wu hisa a misedhare ya wena.
2 Bana huwa wena Junipero, hakuva a sedhare wu wile;
A tisinya ta hombe ti lovisilwe!
Banani huwa, n’wina mitule ya Bhaxani,
Hakuva a khwati go tlhuma gi hahlulilwe!
3 Hi nga zwani a huwa ya varisi!
Hakuva a wukulu gabye gi fuvisilwe.
Hi nga zwani a kubhonga ka zvinghalana!*
Hakuva a makhwati yo tlhuma matlhelweni ya Jordhani ma hahlulilwe.
4 “Jehovha, a Nungungulu wa mina, i ngalo: ‘Risa a ntlhambi wa tiyivhu leti ti yimiselweko ku hihiritwa,+ 5 leti a vaxavi va tona va ti hihiritako+ va nga kumi nandzu. Lava va ti xavisako+ ve ngalo: “I wa dhumisiwe Jehovha, hakuva ndzi ta ganya.” Ni varisi va tona a va ti zweli wusiwana.’+
6 “‘Hakuva ndzi nga ta ha va zwela wusiwana a vahanyi va tiko’, ku wula Jehovha. ‘Hikwalaho, ndzi ta nyikela a mun’we ni mun’wani mandleni ya muakelani wakwe ni mandleni ya hosi yakwe. Va ta fayetela tiko; mina ndzi nga ta va tlhatlhisa mandleni yabye.’”
7 Ndzi no sangula ku risa ntlhambi wa tiyivhu leti ti yimiselweko ku hihiritwa+ kasi ku vhuna n’wina ntlhambi wu xanisekako. Hikwalaho, ndzi no teka a tinhonga timbiri, a yin’we ndzi yi chula ku hi Wunene,* a yin’wani ndziku hi Kuzwanana,+ ndzi sangula ku risa a ntlhambi. 8 Hi hweti yin’we, ndzi hlongolile varisi vanharu hakuva ndzi* wa karele hi vona niku vonawu* va wa ndzi nyenya. 9 Ndzi te: “Ndzi nga ta ha simama ku mu risa. Leyi yi fako a yife, ni leyi yi lovako a yi love. Leti ti seleko, a yin’we ni yin’wani yi wage a nyama ya yin’wani.” 10 Hikwalaho, ndzi no teka nhonga ya mina leyi ya ku hi Wunene*+ ndzi yi tsemelela, ndzi tshova civhumelwano ca mina leci ndzi nga mahile ni matiko wontlhe. 11 Makunu, hi siku lego ci no tshoviwa; a tiyivhu ti xanisekileko ta ntlhambi leti ti nga kari ti ndzi cuwukela, ti no zvi tiva lezvaku leyo yi wa hi mhaka ya Jehovha.
12 Ndzi no va byela, ndziku: “Loku mu zvi wona na zvi hi zvi nene, ndzi nyikeni muholo wa mina; kanilezvi loku zvi nga hi tano, mu nga ndzi nyiki.” Va no ndzi hakhela* muholo wa mina wa 30 wa zvingerengere zva prata.+
13 Jehovha i no ndzi byela lezvi: “Wu hoxele lomu kaxeni ga minyikelo — a ntsengo wa hombe lowu va nga wu wona na wu ndzi ringana.”+ Hikwalaho, ndzi no teka 30 wa zvingerengere zva prata ndzi zvi hoxela lomu kaxeni ga minyikelo, lomu ndlwini ya Jehovha.+
14 Hi kulandzela ndzi no tshova nhonga ya mina leyi ya wumbiri yaku hi Kuzwanana,+ ndzi tsema wuxaka cikari ka Judha na Izrayeli.+
15 Jehovha i no ndzi byela, aku: “Makunu teka a zvibya zva murisi a nga vhuniko nchumu.+ 16 Hakuva ndzi ta tsika a murisi a humelela lomu tikweni. A nga ta hlayisa tiyivhu leti ti lovako;+ a nga ta lavetela leyi ya yitsongwani ne ku hanyisa leyi yi bayisilweko+ hambu ku gisa leti ti tiyileko. Kanilezvi i taga nyama ya leti to kuluka+ a tlhela a pswhumula a zvinyondzwani zva tiyivhu.+
17 Khombo ka murisi wa mina a nga vhuniko nchumu,+ loyi a tsikako ntlhambi!+
A cipadha ci taba woko gakwe ni tihlo gakwe ga cinene.
A woko gakwe gontlhe gi ta woma,
Niku a tihlo gakwe ga cinene gi tafa.”