Lisimu
BHUKU GA WUMBIRI
(Tisimu 42-72)
Ka muchuli. Maxili* ya vana va Kora.+
42 A ku fana ni hlangu yi xuvako a micongo ya mati,
Mina ndzi* xuva wena Nungungulu.
2 Ndzi* na ni tora hi Nungungulu, a Nungungulu a hanyako.+
Hi rini ndzi tota ndzi ta woneka mahlweni ka Nungungulu ke?+
3 A mihloti ya mina kuga ka mina mumu ni wusiku;
Gontlhe siku, a vanhu va ndzi poyila, vaku: “I kwihi a Nungungulu wa wena?”+
4 Ndza alakanya a zvilo lezvi, ndzi chulula a muhefemulo* wa mina,
Hakuva ndzi wa famba ni citshungu,
Ndzi famba hi kunonoka mahlweni kabye kala ndlwini ya Nungungulu,
Na ku biwa mikulungwani ya kutsaka ni kubonga
Ya citshungu ci mahako mubuzo.+
5 Hikuyini ndzi* karatekileko?+
Hikuyini ku nga ni gujeguje leyi ndzeni ka mina?+
Rindzela Nungungulu,
Hakuva ndza ha ta mu dhumisa kota Muhanyisi wa mina wa Hombe.+
6 Nungungulu wa mina, ndza* karateka.+
Hikwalaho, ndza ku alakanya,+
Na ndzi hi tikweni ga Jordhani ni le madembeleni ya Hermoni,
Citsungeni ca Mizare.*
7 A mati yo eta ma vitana a mati yo eta
Hi guwa ga mati ya wena ma chikako hi le zvitsungeni.
Wontlhe a mavingo* ya wena ma vhindlukileko ma ndzi khubhunyetile.+
8 Ni hlikanhi, Jehovha i ta ndzi kombisa lirandzo lakwe li nga mbheliko;
Ni wusiku, a lisimu lakwe li tava na mina — a mukhongelo ka Nungungulu wa wutomi ga mina.+
9 Ndzi ta byela Nungungulu, a ribye ga mina, ndziku:
“Hikuyini u ndzi riveleko?+
Ndzi wa ta fambela yini na ndzi bayisekile hi kota ya ku xanisiwa hi nala wa mina ke?”+
10 A valala va mina va no ndzi rukatela hi livengo la hombe;*
Gontlhe siku va ndzi poyila, vaku: “I kwihi a Nungungulu wa wena?”+
11 Hikuyini ndzi* karatekileko?
Hikuyini ku nga ni gujeguje leyi ndzeni ka mina ke?+
Rindzela Nungungulu,
Hakuva ndza ha ta mu dhumisa kota Muhanyisi wa mina wa Hombe ni Nungungulu wa mina.+