Lisimu
Lisimu la cirilo la Dhavhidha leli a nga yimbelela ka Jehovha xungetano hi magezu ya Kuxe, a muBhenjamini.
7 O Jehovha, Nungungulu wa mina, ndzi tsutsumele ka wena.+
Ndzi ponise ka vontlhe lava va ndzi xanisako, u ndzi tlhatlhisa.+
2 Hakuva va nga ndzi pfhemulela* a ku khwatsi hi lezvi a nghala yi mahako,+
Va ndzi khoma, ndzi nga kumi wa ku ndzi tlhatlhisa.
3 O Jehovha, Nungungulu wa mina, loku ndzi hi ni nandzu,
Ni loku ndzi mahile kubiha;
4 Loku ndzi wonhele a munhu a nga ndzi mahela wunene,+
Kutani loku ndzi phangile a nala wa mina mahala,*
5 Loku zvi tshamisile lezvo, tsika a nala a ndzi hlongolisela a ndzi kuma;*
I wa kandzihetele a wutomi ga mina lahasi
A tlhela a lovisa a wudzundzo ga mina ntshurini. (Sela)
6 Vhuka zangeni ya wena, O Jehovha;
Suka u yima, u vhukela a kuleva ka valala va mina;+
Vhuka u ndzi vhuna, u laya lezvaku ku mahiwa kululama.+
7 Ngha a matiko ma ku randzela;
Niku u talwa nawo na u hi le hehla.
8 Jehovha i ta lamula matiko.+
O Jehovha, ndzi lamule hi kuya hi kululama ka mina,
Ni kutsumbeka ka mina.+
9 Fuvisa a mitiro yo biha ya vakubiha.
Kanilezvi tiyisa lava va lulamileko,+
Hakuva wena u Nungungulu a lulamileko,+ loyi a hlolako timbilu+ ni maalakanyo ma etileko.*+
10 Nungungulu citlhangu ca mina,+ a Muhanyisi wa lava va timbilu ti lulamileko.+
12 Loku a munhu a nga ti soli,+ Nungungulu i lota a cipadha cakwe;+
I kondla a wura gakwe, gi tshama na gi longile.+
13 I longisela a matlhari yakwe ma dayako,
A longisela a mipaxa yakwe yi vhurako.+
14 Hi nga wonani munhu a xurileko nyimba ya zvilo zva kubiha;
I xura nyimba ya zvikarato, a pswala mawunwa.+
15 I kelile a nkele, a wu etisa,
Kanilezvi i wela ka nkele walowu a wu kelileko.+