Mika

3 Ndzi te: “Hi nga zwani, n’wina tihosana ta ka Jakobe,

Na n’wina vafumeli va yindlu ya ka Izrayeli.+

 2 Kanilezvi ma venga zvazvinene,+ mu randza zvakubiha;+

Mu yewula a hlonge ya vanhu va mina, mu susa nyama lomu ka marambu yabye.+

 3 Mu tlhela muga a nyama ya vanhu va mina,+

Mu rundzuwula a hlonge yabye,

Mu tshova marambu yabye mu ma fayetela,+

A ku khwatsi hi lezvi zvi bhikiwako lomu bhoteni, a ku khwatsi i nyama lomu mbiteni.

 4 Ka cikhati leco, va ta rila ka Jehovha va kombela ku vhuniwa,

Kanilezvi a nga ta va hlamula.

Ka cikhati leco, i ta va fihlela a nghohe yakwe,+

Hi kota ya mitiro yabye yo biha.+

 5 Jehovha i wula lezvi ka vaphrofeti lava va pengisako a vanhu va mina,+

Lava va huwelelako ‘kurula’+ a cikhati va lumako* hi matino yabye,+

Kanilezvi va mu vhuxela yimpi loyi a nga cheliko nchumu minon’wini yabye:

 6 ‘Mu tava ni wusiku;+ ku nga tava ni muwoniso;+

Ku tava ni munyama basi ka n’wina, ku nga tava ni kuvhumba.

A gambo gi ta pela ka vaphrofeti,

Ni hlikanhi wu ta cica wuva munyama kabye.+

 7 A vawoni va miwoniso va ta wisiwa tingana,+

Ni vavhumbi va ta khunguvanyeka.

Vontlhe va ta ti vhala minomu,*

Hakuva ku nga tava ni hlamulo wu tako hi ka Nungungulu.’”

 8 Kanilezvi mina ndzi tele hi ntamu hi kota ya moya wa Jehovha,

Ni kululama ni kutiya,

Kasi ndzi byela Jakobe a wuhluwuki gakwe, na Izrayeli a ciwonho cakwe.

 9 Hi nga zwani lezvi, n’wina tihosana ta yindlu ya ka Jakobe,

Na n’wina vafumeli va yindlu ya ka Izrayeli,+

N’wina mu vengako kululama mu tlhela mu gombonyekisa zvontlhe zvi lulamileko,+

10 N’wina mu akako Ziyoni hi ku halata nkhata, ni Jerusalema hi kungalulami.+

11 A varangeli* va kona va lamula hi kuxavelelwa,+

A vapristi va kona va gondzisa hi ku fela mali,+

Ni vaphrofeti va kona va vhumba kasi va kuma mali.*+

12 Hikwalaho, hi kota ya n’wina,

Ziyoni i ta rimiwa a ku khwatsi i simu;

Jerusalema i ta maha tinhulu ta maribye,+

Ni citsunga ca Yindlu* ci ta ku khwatsi matshamu ma tlakukileko lomu khwatini.+