Tihosi ta wumbiri

17 Hi lembe ga wu 12 ga Ahaza, a hosi ya Judha, Hoxeya,+ a n’wana wa Ela, i no maha hosi ya Izrayeli le Samariya niku i no fuma 9 wa malembe. 2 I no simama ku maha zvakubiha mahlweni ka Jehovha, ntsena lezvaku a nga chikelangi ka tihosi ta Izrayeli leti ti nga rangile ti fuma mahlweni kakwe. 3 Xalmanesera, a hosi ya Asiriya, i no kandziha a ya mu vhukela.+ Hoxeya i no maha nandza gakwe, a sangula ku humesa ndzuvo* kakwe.+ 4 Kanilezvi a hosi ya Asiriya yi no tiva lezvaku Hoxeya i mu xuxele cikungo hakuva i wa rumele zvirun’wa ka So, a hosi ya Gibhite,+ niku i wa nga ha yisi a ndzuvo ka hosi ya Asiriya a ku khwatsi hi malembe ma hundzileko. Hikwalaho, a hosi ya Asiriya yi no mu vhalela paxweni na a bohelelwe.

5 A hosi ya Asiriya yi no dhumela a tiko gontlhe. Yi no chikela Samariya yi gi randzela hi malembe manharu. 6 Hi lembe ga wu 9 ga Hoxeya, a hosi ya Asiriya yi no dhumela Samariya yi gi teka.+ Makunu yi no khoma a vanhu va ka Izrayeli yi va yisa wukhumbini+ le Asiriya, yi ya va akisa le Hala ni le Habhora, congweni wa Gozani,+ ni lomu madhoropeni ya vaMedhi.+

7 Lezvo zvi mahekile hi lezvi a vanhu va ka Izrayeli va nga wonhele Jehovha, a Nungungulu wabye, loyi a nga va humesile tikweni ga Gibhite a va tlhatlhisa ka Faro, a hosi ya Gibhite.+ Vona va no khozela* vanungungulu van’wani,+ 8 va landzela mikhuwo ya matiko lawa Jehovha a nga ma hlongola mahlweni ka vaIzrayeli, va tlhela va landzela a mikhuwo leyi yi nga yimisilwe hi tihosi ta Izrayeli.

9 A vaIzrayeli va wa landzela a zvilo zvi nga lulamangiko mahlweni ka Jehovha, a Nungungulu wabye. Va no simama ku aka matshamu yo tlakuka madhoropeni yabye wontlhe,+ kusukela lomu likhokholeni* la varindzeli kala dhoropeni gi vhikelweko khwatsi.* 10 Va no simama ku ti yimisela mapilari yo basa* ni tisinya to basa*+ lomu ka zvitsunga zvontlhe ni lahasi ka tisinya tontlhe to tlhuma;+ 11 va wa tuvikisa a musi wa muphahlo ka matshamu wontlhe yo tlakuka a ku fana ni matiko lawa Jehovha a nga ma hlongola mahlweni kabye maya wukhumbini.+ Va no simama ku maha zvakubiha kasi va zangarisa Jehovha.

12 Va no simama ku tirela zvifananiso zvo nyenyeza,*+ lezvi Jehovha a nga va byelile hi zvona, aku: “Mu nga mahi lezvo!”+ 13 Jehovha i no simama ku tlharihisa Izrayeli na Judha hi ku tirisa a vaphrofeti vakwe vontlhe ni vawoni vontlhe,+ aku: “Hundzulukani tindleleni ta n’wina ta kubiha!+ Hlayisani a zvileletelo zva mina ni milayo ya mina hi kuya hi nayo wontlhe lowu ndzi nga leletela a vakokwani va n’wina ndzi tlhela ndzi mu tivisa hi nomu wa malandza ya mina, a vaphrofeti.” 14 Kanilezvi a va ingisangi. Va no simama ku nonohisa a tinhamu tabye a ku khwatsi hi vakokwani vabye lava va nga kala ku kholwa ka Jehovha, a Nungungulu wabye.+ 15 Va no simama ku ala milayo yakwe ni civhumelwano cakwe+ leci a ci mahileko ni vakokwani vabye ni zvikhumbuxeto zvakwe lezvi a nga va tlharihisa hi zvona.+ Va no khozela a zvifananiso zvi nga vhuniko nchumu+ va ti chipisa ha voce,+ va pimanyisa a matiko lawa ma nga hi matlhelweni yabye lawa Jehovha a nga va leletele lezvaku va nga ma pimanyisi.+

16 Va tsikile a zvileletelo zvontlhe zva Jehovha, a Nungungulu wabye, va maha zvifananiso zva simbi* zva marole mambiri+ ni sinya yo basa,*+ va khizamela a butho gontlhe ga matilo+ va tlhela va tirela Bhaali.+ 17 Va no hundzisa ni vafana vabye ni vanhanyana vabye hi lomu ndzilweni,+ va vhumba,+ va tirisa masalamuso, va simama ku ti tsitsiritela a* ku maha zvakubiha mahlweni ka Jehovha, kasi ku mu zangarisa.

18 Hikwalaho, Jehovha i no mu zangarela nguvhu Izrayeli, a mu susa mahlweni kakwe.+ A nga siyangi munhu ahandle ka lixaka la ka Judha basi.

19 Hambu Judha a nga hlayisangi a zvileletelo zva Jehovha, a Nungungulu wabye.+ Yenawu i no landzela a mikhuwo leyi Izrayeli a nga yi landzela.+ 20 Jehovha i no tsukula a pswalo wontlhe wa Izrayeli, a va xanisa a tlhela a va nyikela canjeni ga vaphangi kala a va hlongola mahlweni kakwe. 21 I no wutla Izrayeli ka yindlu ya Dhavhidha; va no yimisa Jerobhowamu, a n’wana wa Nebhate, lezvaku ava hosi.+ Kanilezvi Jerobhowamu i no hambukisa Izrayeli a nga landzeli Jehovha, a va wonhisa hi ciwonho ca hombe. 22 A vanhu va ka Izrayeli va no simama ku famba zviwonhweni zvontlhe lezvi Jerobhowamu a nga zvi mahile.+ A va zvi tsikangi 23 kala Jehovha a susa Izrayeli mahlweni kakwe, a ku khwatsi hi lezvi a wulileko hi nomu wa malandza yakwe wontlhe, a vaphrofeti.+ Hikwalaho, a va ka Izrayeli va no khomiwa tikweni gabye va yisiwa wukhumbini le Asiriya,+ lomu va tshamileko kona kala ni nyamutlha.

24 Makunu a hosi ya Asiriya yi no neha vanhu hi le Bhabhuloni, ni le Kuta, ni le Avha, ni le Hamate, ni le Sefarvhayime,+ yi ta va akisa lomu madhoropeni ya Samariya va vhaleta a vaIzrayeli. Va no teka Samariya va hanya lomu madhoropeni ya kona. 25 A cikhati leci va nga sangula ku hanya seyo, va wa nga chavi* Jehovha. Hikwalaho, Jehovha i no rumela tinghala cikari kabye,+ ti ya daya vokari cikari ka vanhu. 26 A hosi ya Asiriya yi no byeliwa lezvi: “A matiko lawa u ma khomileko u ma yisa wukhumbini u ya ma akisa madhoropeni ya Samariya a ma gi tivi a wukhongeli* ga Nungungulu wa tiko lego. Hikwalaho, i tshama hi ku va rumelela tinghala ti ya va daya hakuva i hava cikari kabye a gi tivako a wukhongeli ga Nungungulu wa tiko lego.”

27 A hosi ya Asiriya yi no leletela, yiku: “Tlhelisani a mupristi mun’we cikari ka lava mu va khomileko leyo vaya wukhumbini kasi a ya hanya kona, a va gondzisa a wukhongeli ga Nungungulu wa tiko.” 28 Hikwalaho, a mun’we wa vapristi lava va nga khomilwe Samariya vaya wukhumbini, i no tlhela a ya hanya Bheteli,+ a sangula ku va gondzisa lezvi va nga fanele ku mu chavisa* zvona Jehovha.+

29 Kanilezvi a tiko ni tiko gi no ti mahela a nungungulu* wa gona, gi mu veka lomu tindlwini ta ku khozela kona ti nga hi matshan’wini yo tlakuka leti a vaSamariya va nga ti mahile; a tiko ni tiko gi no maha zvalezvo madhoropeni yabye lomu va nga hanya kona. 30 Hikwalaho, a vanhu va Bhabhuloni va no maha Sukote-Bhenote, a vanhu va le Kuta va maha Nergale, a vanhu va le Hamate+ va maha Axima, 31 a vaAvha va maha Nibhaza na Tartaka. A vaSefarvhayime va wa hisa a vana vabye laha ndzilweni va hisela Adrameleki na Anameleki, a vanungungulu va Sefarvhayime.+ 32 Hambu lezvi va nga chava Jehovha, va no yimisa a vapristi va matshamu yo tlakuka lava va nga va hlawula cikari ka citshungu. Va no va tirela lomu tindlwini ta ku khozela kona ta matshamu yo tlakuka.+ 33 Va wa chava Jehovha kanilezvi va wa khozela a vanungungulu vabye hi kuya hi wukhongeli* ga matiko lawa va ngata hi ka wona.+

34 Kala ni nyamutlha va ha landzela a wukhongeli* gabye ga kale. I hava cikari kabye a khozelako* Jehovha, ne munhu a landzelako a milayo yakwe, ni kulamula kakwe, ni Nayo, ni cileletelo leci Jehovha a nyikileko a vana va Jakobe, loyi a nga cica a vito gakwe a mu chula ku hi Izrayeli.+ 35 A cikhati leci Jehovha a nga maha civhumelwano navo,+ i no va laya, aku: “Mu nga chavi van’wani vanungungulu, mu nga va khizameli ne hambu ku va tirela kutani ku va mahela miphahlo.+ 36 Kanilezvi Jehovha loyi a mu humesileko tikweni ga Gibhite hi ntamu wa hombe ni woko gi nawulutilweko+ hi yena mu faneleko ku mu chava,+ mu mu khizamela, mu tlhela mu mu mahela miphahlo. 37 Contlhe cikhati landzelani khwatsi a milayo, ni kulamula, ni Nayo, ni cileletelo leci a mu tsaleleko;+ mu nga chavi van’wani vanungungulu. 38 Mu nga rivali a civhumelwano leci ndzi ci mahileko na n’wina,+ niku mu nga chavi van’wani vanungungulu. 39 Kanilezvi hi Jehovha, a Nungungulu wa n’wina, loyi mu faneleko ku mu chava hakuva hi yena a to mu tlhatlhisa canjeni ga vontlhe a valala va n’wina.”

40 Kanilezvi a va ingisangi; va no landzela a wukhongeli* gabye ga kale.+ 41 A matiko lawo ma wa chava Jehovha,+ kanilezvi ma wa tirela ni zvifananiso zvabye zvi kehlilweko. A vana vabye ni vazukulu vabye va ha maha zvalezvi a vakokwani vabye va nga maha kala ni nyamutlha lezvi.