Papilo go sangula ka Va Le Korinte

2 Hikwalaho, a cikhati leci ndzi ngata ka n’wina, vamakabye, a ndzi kanelangi ka n’wina a cihundla co basa+ ca Nungungulu hi magezu kutani wutlhari go karata+ ku gi zwisisa. 2 Hakuva ndzi no boha a ku nga tivi nchumu cikari ka n’wina ahandle ka Jesu Kristu, loyi a nga dawa mhandzeni.+ 3 Ndzi tile ka n’wina na ndzi hi ni gome, ni kuchava ni kururumela ka hombe; 4 niku a kuwulawula ka mina ni lezvi ndzi ga kanela zvi wa nga hi magezu ya wutlhari ya ku fela ku kholwisa vanhu, kanilezvi kuve kukombekiswa ka moya ni ntamu,+ 5 kasi a kukholwa ka n’wina ku nga seketelwi ka wutlhari ga vanhu, kanilezvi ka ntamu wa Nungungulu.

6 Makunu hi wulawula hi wutlhari cikari ka lava va buvhileko,+ kanilezvi a hi wulawuli hi wutlhari ga tiko legi,* ne hambu ga vafumeli va tiko legi, lava va to lovisiwa.+ 7 Kanilezvi hi wulawula hi wutlhari ga Nungungulu gi nga ka cihundla co basa,+ a wutlhari gi fihlilweko, legi Nungungulu a rangileko a gi mahela makungo a tinguva na ti nga seva kona lezvaku giva wudzundzo ga hina. 8 Hi gona a wutlhari legi a tihosi ta tiko legi* ti nga kala ku gi tiva,+ hakuva loku ti wa gi tivile na ti nga dayangi* a Hosi yo ngangamela. 9 Kanilezvi a ku khwatsi hi lezvi zvi tsalilweko: “A tihlo a gi zvi wonangi, ni ndleve a yi zvi zwangi, ne a zvi nghenangi mbilwini ya munhu a zvilo lezvi Nungungulu a longiseleleko lava va mu randzako.”+ 10 Hakuva Nungungulu i zvi wonekelisile ka hina+ hi moya wakwe,+ hakuva a moya wu hlola zvilo zvontlhe, hambu a zvilo zvi etileko zva Nungungulu.+

11 Hakuva himani cikari ka vanhu a tivako zva munhu ahandle ka moya wa munhu lowu wu nga ndzeni kakwe ke? Hizvalezvo kambe, i hava a tivako zvilo zva Nungungulu ahandle ka moya wa Nungungulu. 12 Makunu hina a hi amukelangi a moya wa tiko, kanilezvi hi amukele a moya lowu wu tako hi ka Nungungulu,+ kasi hi fela ku tiva zvilo lezvi Nungungulu a hi nyikileko. 13 Hi wulawula kambe hi zvilo lezvi, na ku nga hi hi magezu ma gondzisiwako hi wutlhari ga vanhu,+ kanilezvi hi magezu ma gondzisiwako hi moya,+ a cikhati leci hi tlhamuselako a timhaka ta moya hi magezu ya moya.

14 Kanilezvi a munhu wa nyama a nga vhumeli* a zvilo zva moya wa Nungungulu, hakuva ka yena wupumbu; a nge zvi koti ku zvi tiva hakuva zvi hloliwa hi ka moya. 15 Hambulezvo, a munhu wa moya i hlola zvilo zvontlhe,+ kanilezvi yena wutsumbu a nga hloliwi hi munhu. 16 Hakuva “himani a ku tivileko a kupima ka Jehovha* kasi a fela ku mu gondzisa ke”?+ Kanilezvi hina hi na ni kupima ka Kristu.+