Joba
10 “Ndza nyenya wutomi ga mina.+
Ndzi ta phofula zvikhalo zva mina.
Ndzi ta wulawula hlomulweni wa mina.*
2 Ndzi ta byela Nungungulu, ndziku: ‘U nga ndzi koni.
Ndzi byele a ku hikuyini u lwako na mina.
3 Xana wa vhuneka hi ku ndzi xanisa,
U chepeta a ntiro wa mandla ya wena+
Lezvo na u yima ni wusungukati ga vakubiha?
4 Kasi wova ni matihlo ya nyama,
Kutani u wonisa a ku khwatsi hi lezvi a munhu wa ku wafa a wonisako zvona ke?
5 Xana a masiku ya wena mo ringana ni lawa ya vanhu,
Kutani a malembe ya wena mo ringana ni lawa ya vanhu,+
6 Ko kala u hlota a cigoho ca mina
Ni ku simama u lavetela a ciwonho ca mina ke?+
8 A mandla ya wena ma ndzi wumbile ni ku ndzi maha,+
Kanilezvi zvezvi u lava ku ndzi lovisa ndzi ku bhi.
9 Ndzo kombela, alakanya lezvaku u ndzi mahile hi wumba,+
Kanilezvi zvezvi u ndzi tlhelisa ntshurini.+
10 A wu ndzi chululangi a ku khwatsi ndzi masi
U ndzi tiyisa a ku fana ni keijo ke?
11 U ndzi ambexile hlonge ni nyama,
U tlhela u ndzi runga hi marambu ni misiha.+
12 U ndzi nyikile wutomi u tlhela u ndzi kombisa lirandzo li nga mbheliko;
13 Kanilezvi u mahile makungo cihundleni ya ku ndzi maha zvilo lezvi.*
Ndza zvi tiva ku a zvilo lezvi zvita hi ka wena.
14 Loku a ndzo wonha, u wa ta ndzi cuwukisela,+
U wa nga ta ndzi tsetselela cigoho ca mina.
15 Khombo ga mina loku ndzi hi ni nandzu!
Hambu loku ndzi nga hi na nandzu, a ndzi nge tlakusi a hloko ya mina,+
Hakuva ndzi tele hi tingana ni hlomulo.+
16 Loku ndzi tlakusa hloko ya mina, u ndzi hlota a ku khwatsi u nghala+
U tlhela u kombisa ntamu wa wena kasi ku ndzi vhukela.
17 U tisa vakustumunyu vaswa va ku ndzi vhukela
U tlhela u engetela a ku ndzi zangarela,
Laha a zvikarato zvi yaku hi ku landzelana hehla ka mina.
18 Makunu u ndzi humesele yini hi khwirini?+
Ndzi wa fanele ku ngha ndzi file na ndzi nga woniwangi hi munhu.
19 Na zvi te khwatsi a ndzi zangi ndziva kona;
Na ndzi humesilwe hi khwirini ndzi kongoma cilahleni.’