Joba

 2 “Hi caleco ci mahako ku a maalakanyo ya mina ma karatekileko ma ndzi kuca ku hlamula,

Hakuva ndzo vila laha ndzi nga kona.

 3 A kukawuka loku ndzi ku zwileko ciruko ka mina;

A kuzwisisa ka mina* ku ndzi susumeta ku hlamula.

 4 A ndzi kanakani lezvaku wa zvi tiva lezvi,

Hakuva zvi tshamisile lezvo cima munhu* a vekiwa laha misaveni,+

 5 Lezvaku a mikulungwani ya kutsaka ya wakubiha a yi tsuwukelwi hi gambo

Ni litsako la loyi a nga kholwiko ka Nungungulu* la cikhatana.+

 6 Hambu lezvi a wukulu gakwe gi tlakukako kala tilweni

Ni lezvi a hloko yakwe yi dhungako marefu,

 7 I ta lova kala kupindzuka a ku khwatsi macimba yakwe;

Lava va nga tolovela ku mu wona va taku: ‘Kasi i kwihi?’

 8 I ta nyamalala a ku khwatsi i noro niku va nga ta ha mu kuma;

I ta hlongolwa a ku khwatsi muwoniso wa wusiku.

 9 A mahlo lawa ma mu wonileko ma nga ta ha mu wona kambe,

Ni wutshamu gakwe gi nga ta ha mu wona.+

10 A vana vakwe va ta hlota thomo ka zvisiwana,

Ni mandla yakwe ma ta tlhelisa a tshomba yakwe.+

11 A marambu yakwe ma wa tele hi ntamu wa wuswa,

Kanilezvi wu* ta etlela zvin’we naye ntshurini.

12 Loku a zvakubiha zvi tsombela non’wini wakwe,

Ni loku a zvi fihla lahasi ka lirimi lakwe,

13 Loku a zvi munyunga a nga zvi tsiki

Kanilezvi a simama ku zvi fundza non’wini wakwe,

14 A zvakuga zvakwe zvi ta dzunga khwirini gakwe;

Zvi ta ku khwatsi i vhenene* ya maphiri ndzeni kakwe.

15 I mitile kuganya, kanilezvi i ta ku hlata;

Nungungulu i ta ku humesa khwirini gakwe.

16 I ta pswonga a wuxungu ga tivhuwumati;

I ta dawa hi matino* ya phiri.

17 A nga ta tshuka a wona a micongo ya mati,

Yi nga micongo ya wulombe ni ya matega.

18 I ta tlhelisa a titshomba takwe na a nga zangi a tiga;*

A nga ta ti buza hi kuganya loku a ku kumileko hi ka mabhindzu yakwe.+

19 I fayile cisiwana a tlhela a ci tsika;

I wutlile a yindlu leyi ku nga hiko yena a nga aka.

20 Kanilezvi a nga tava ni kurula ndzeni kakwe;

A tshomba yakwe yi nga ta mu ponisa.

21 A nga siyelwangi nchumu kasi a wu khadamula;

Hi cigelo leco, a kuvhuvhuma kakwe ku nga ta pindzuka.

22 A cikhati leci a kuganya kakwe ku to chikela madembeleni, a kukarateka ku ta mu hlula;

A wusiwana gi tata kakwe hi ntamu wontlhe.

23 Laha a to ngha a xurisa khwiri gakwe,

Nungungulu* i ta rumela zanga yakwe yi vhurako hehla kakwe;

I ta yi nisa hehla kakwe yi relela kala marumbwini yakwe.

24 Laha a to ngha a tsutsuma a matlhari ya simbi,

A mipaxa yi phandilweko hi wura ga kobre yi ta mu fula yi phondla.

25 I hlomula paxa hi hlanheni wakwe;

A humesa tlhari go phatima hi nyongweni yakwe,

A khon’wa hi kuchava.+

26 A munyama wa ku dema wu rindzela a titshomba takwe;

A ndzilo wu nga buvhetiwangiko hi munhu wu ta mu lovisa;

A khombo gi rindzela ni wihi a to pona tendeni gakwe.

27 A tilo gi ta funungula a cigoho cakwe;

A misava yi ta suka yi yima yi mu vhukela.

28 A ndambi yi ta kukuleta yindlu yakwe;

Yi tava mati ma kukuletako sikwini ga zanga ya Nungungulu.*

29 Leci hi cona ciavelo ca wakubiha ci tako hi ka Nungungulu,

A tshomba leyi Nungungulu a mu vekeleko yona.”