Jeremiya

28 Hi lembe galego, kusanguleni ka kufuma ka Zedhekiya,+ a hosi ya Judha, hi lembe ga wumune, hi hweti ya wutlhanu, muphrofeti Hananiya, a n’wana wa Azuri, wa le Gibheyoni,+ i no ndzi byela lomu ndlwini ya Jehovha, mahlweni ka vapristi ni vanhu vontlhe, aku: 2 “Jehovha wa mabutho, a Nungungulu wa Izrayeli, i ngalo: ‘Ndzi ta tshova a kanga wa hosi ya Bhabhuloni.+ 3 Ndzeni ka malembe mambiri, ndzi ta wuyisa a zvibya zvontlhe zva yindlu ya Jehovha ka wutshamu legi, lezvi Nebhukadnezare, a hosi ya Bhabhuloni, a zvi tekileko ka wutshamu legi a zvi yisa Bhabhuloni.’”+ 4 “‘Ndzi ta tlhela ndzi wuyisa Jekoniya,+ a n’wana wa Jehoyakimu,+ a hosi ya Judha, wutshan’wini legi, ni vontlhe a vanhu va ka Judha lava va yileko wukhumbini le Bhabhuloni’,+ ku wula Jehovha, ‘hakuva ndzi ta tshova a kanga wa hosi ya Bhabhuloni.’”

5 Muphrofeti Jeremiya i no wulawula na muphrofeti Hananiya mahlweni ka vapristi ni ka vontlhe vanhu lava va nga yimile lomu ndlwini ya Jehovha. 6 Muphrofeti Jeremiya i te ngalo: “Amen!* Jehovha i wa mahe zvalezvo. Jehovha i wa tatise a magezu ya wena lawa u ma phrofetileko, a wuyisa wutshan’wini legi, hi le Bhabhuloni, a zvibya zva yindlu ya Jehovha ni vanhu vontlhe va nga wukhumbini! 7 Kanilezvi, zwana a mhaka leyi ndzi wulako tindleveni ta wena ni tindleveni ta vanhu vontlhe. 8 A vaphrofeti lava va vileko kona kaleloko, lava va rangeleko mina na wena, va wa phrofetela matiko yo tala ni mifumo ya hombe lezvaku ku tata yimpi, ni khombo, ni ntungu.* 9 Loku a muphrofeti a phrofeta kurula, a mhaka ya muphrofeti loye yi tatiseka, makunu zvi ta tiveka lezvaku hi Jehovha loyi hakunene a rumeleko muphrofeti loye.”

10 Zvalezvo muphrofeti Hananiya i no teka a kanga lowu wu nga hi nhan’wini ya muphrofeti Jeremiya a wu tshova.+ 11 Hananiya i no wula lezvi mahlweni ka vanhu: “Jehovha i ngalo: ‘Ndzeni ka malembe mambiri, ndzi ta wu tshovisa lezvi a kanga wa Nebhukadnezare, a hosi ya Bhabhuloni, lowu wu nga nhan’wini ya matiko wontlhe.’”+ Muphrofeti Jeremiya i no khoma ndlela a ti fambela.

12 Andzhako ka loku muphrofeti Hananiya a tshovile kanga lowu wu nga hi nhan’wini ya muphrofeti Jeremiya, a mhaka ya Jehovha yi nota ka Jeremiya, yi taku: 13 “Famba u ya byela Hananiya, uku: ‘Jehovha i ngalo: “Wena u tshovile a kanga wa sinya,+ kanilezvi u ta wu vhaleta hi kanga wa simbi.” 14 Hakuva Jehovha wa mabutho, a Nungungulu wa Izrayeli, i ngalo: “Ndzi ta veka a kanga wa simbi nhan’wini ya wontlhe matiko lawa, kasi ma tirela Nebhukadnezare, a hosi ya Bhabhuloni, ina, ma ta mu tirela.+ Hambu a zvihari zva khwati ndzi ta zvi nyikela kakwe.”’”+

15 Muphrofeti Jeremiya i no byela muphrofeti Hananiya,+ aku: “Hi ngazwa lezvi, wena Hananiya! Jehovha a nga ku rumangi, kanilezvi wena u mahile a vanhu lava va tsumba mawunwa.+ 16 Hikwalaho, Jehovha i ngalo: ‘Ndza ku susa laha misaveni. U tafa lembe galegi hakuva u kucetele vanhu lezvaku va vhukela Jehovha.’”+

17 Hikwalaho, hi lembe galego, hi hweti ya wu 7, muphrofeti Hananiya i nofa.