Ezekiyeli
30 A mhaka ya Jehovha yi nota kambe ka mina, yi taku: 2 “N’wana wa munhu, phrofeta, uku: ‘Jehovha, a Hosi ya Hombe, i ngalo:
“Banani tinyandha, muku: ‘Yowe, a siku ga chikela!’
3 Hakuva a siku gi laha kusuhani, ina, a siku ga Jehovha gi laha kusuhani.+
Gi tava siku ga marefu,+ a cikhati ci yimiselweko matiko.+
4 A cipadha ci tata hehla ka Gibhite, na Etiopia i ta khon’wa hi kuchava laha lava va delweko va to mbambamela Gibhite,
Ni laha ku to wungiwa tshomba yakwe ku tlhela ku khungumulwa zviseketelo zvakwe.+
5 Etiopia,+ na Puti,+ na Ludhi, ni vontlhe a vanhu va patseneko,*
Na Kubhe zvin’we ni vana va tiko ga civhumelwano,*
Vontlhe va ta dawa hi cipadha.”’
6 Jehovha i ngalo:
‘A vaseketeli va Gibhite vonawu va ta dawa,
Ni ntamu wakwe wa matshandza wu ta tsongahatiwa.’+
“‘Kusukela Migdhole+ kala Sevhene,+ va ta mbambamela hi cipadha tikweni lego’, ku wula Jehovha, a Hosi ya Hombe. 7 ‘Ma ta mahiwa marumbi a ku hundza matiko wontlhe, ni madhoropa ya wona ma ta hahlulwa a ku hundza madhoropa wontlhe.+ 8 Va ta zvi tiva lezvaku hi mina Jehovha laha ndzi to lumekela ndzilo Gibhite ni laha vontlhe lava va mu vhunetelako va to siliwa. 9 Ka siku lego, ndzi ta rumela zvirun’wa hi zvitimela* zvi ya rurumelisa Etiopia loyi a ti tsumbako; va ta khon’wa hi kuchava ka siku legi gi tako hehla ka Gibhite, hakuva hakunene gi tata.’
10 “Jehovha, a Hosi ya Hombe, i ngalo: ‘Ndzi ta lovisa a zvitshungu zva Gibhite zvi ku bhi hi canja ga Nebhukadnezare,* a hosi ya Bhabhuloni.+ 11 Yena ni mabutho yakwe, gi nga tiko ga xapi a ku hundza wontlhe,+ va ta tisiwa kasi ku ta lovisa tiko. Va ta hlomula zvipadha zvabye va vhukela Gibhite va tata tiko hi lava va delweko.+ 12 Ndzi ta cica minonga ya Nilo+ yiva misava yo woma, ndzi xavisa tiko canjeni ga vanhu vo biha. Ndzi ta hahlula tiko ni zvontlhe zvi nga ka gona hi mandla ya vamatiko.+ Hi mina, Jehovha ha ndzoce ndzi nga wula.’
13 “Jehovha, a Hosi ya Hombe, i ngalo: ‘Ndzi ta lovisa ni zvifananiso zva manyala,* ndzi fuvisa ni vanungungulu va Nofe*+ va nga vhuniko nchumu. Ku nga ta hava ni hosana yi humako tikweni ga Gibhite; ndzi ta chela hlenekera tikweni ga Gibhite.+ 14 Ndzi ta hahlula Patrosi,+ ndzi lumekela ndzilo Zowane ndzi tlhela ndzi lamula No.*+ 15 Ndzi ta chulula zanga ya mina hehla ka Sini, a khokhola ga Gibhite, ndzi tlhela ndzi lovisa a vanhu va le No. 16 Ndzi ta lumekela ndzilo Gibhite; Sini i ta khon’wa hi kuchava, No a avanyeka, na Nofe* a dhumelwa ni mumu wa ku jaja! 17 A vaswa va le Oni* ni va le Pibhesete va ta dawa hi cipadha, niku a vahanyi va lomu madhoropeni va taya wukhumbini. 18 Le Tehafnehesi ku ta phuma na gi hi mumu laha ndzi to tshova a kanga wa Gibhite seyo.+ A ntamu wakwe wa matshandza wu ta mbhela;+ i ta khubhunyetwa hi marefu, niku a vahanyi va zvidhoropana zvakwe va taya wukhumbini.+ 19 Ndzi ta lamula Gibhite niku va ta zvi tiva lezvaku hi mina Jehovha.’”
20 Hi lembe ga wu 11, ka hweti yo sangula, hi siku ga wu 7 ga hweti, a mhaka ya Jehovha yi nota ka mina, yi taku: 21 “N’wana wa munhu, ndzi tshovile a woko ga Faro, a hosi ya Gibhite; gi nga ta bohelelwa kasi gi hola ne ku bhandichiwa kasi giva ni ntamu laha ka kuza gi zvi kota ku khoma cipadha.”
22 “Hikwalaho, Jehovha, a Hosi ya Hombe, i ngalo: ‘Ndza vhukela Faro, a hosi ya Gibhite+ niku ndzi ta tshova mawoko yakwe, legi go tiya ni legi go tshoveka,+ ndzi wisa cipadha hi canjeni gakwe.+ 23 Hi kulandzela, ndzi ta hangalasa vaGibhite cikari ka mifumo ndzi tlhela ndzi va xwanya cikari ka matiko.+ 24 Ndzi ta tiyisa a mawoko* ya hosi ya Bhabhuloni,+ ndzi veka cipadha ca mina canjeni ga yona.+ Ndzi ta tshova mawoko ya Faro niku i ta keta hi gezu ga hombe mahlweni kakwe* a ku fana ni munhu loyi a bayiselweko ku dawa. 25 Ndzi ta tiyisa a mawoko ya hosi ya Bhabhuloni, kanilezvi a mawoko ya Faro ma tawa; va ta zvi tiva lezvaku hi mina Jehovha a cikhati leci ndzi to veka cipadha ca mina canjeni ga hosi ya Bhabhuloni, yona yi ci tirisa kasi ku dhumela tiko ga Gibhite.+ 26 Ndzi ta hangalasa vaGibhite cikari ka mifumo ndzi tlhela ndzi va xwanya cikari ka matiko.+ Va ta zvi tiva lezvaku hi mina Jehovha.’”