Kronekele wa wumbiri

16 Hi lembe ga wu 36 ga kufuma ka Asa, Bhaaxa,+ a hosi ya Izrayeli, i no kandziha a ya vhukela Judha a sangula ku aka* Rama+ kasi ku ngavi ni munhu a humako kutani ku nghena ka Asa, a hosi ya Judha.+ 2 Hi kota ya lezvo, Asa i no teka a prata ni ouro lomu tshombeni ya yindlu ya Jehovha+ ni lomu tshombeni ya yindlu* ya hosi a yi rumela ka Bhen-Hadhadhe, a hosi ya Siriya,+ loyi a nga tshama Dhamasku, aku: 3 “Ku na ni civhumelwano cikari ka mina na wena ni cikari ka papayi wa mina ni papayi wa wena. Ndza ku rumelela a prata ni ouro. Tshova a civhumelwano ca wena na Bhaaxa, a hosi ya Izrayeli, kasi a suka ka mina.”

4 Bhen-Hadhadhe i no ingisa hosi Asa, a rumela a varangeli va mabutho yakwe kasi va ya vhukela a madhoropa ya Izrayeli. Va no hahlula Ijoni,+ na Dhani,+ na Abhel-Mayime, ni wontlhe matshala ya madhoropa ya Naftali.+ 5 Laha Bhaaxa a ngazwa lezvo, i no tekela ku nyima ku aka* Rama, a tsika a ntiro wakwe. 6 Hosi Asa i no hlengeleta a vaJudha vontlhe kasi va ya rwala a maribye ni mapulango le Rama,+ lezvi Bhaaxa a nga kari a aka hi zvona.+ I no zvi teka a aka* hi zvona Gebha+ ni Mizpa.+

7 Ka cikhati caleco, ku nota Hanani,+ a muwoni, ka Asa, a hosi ya ka Judha, a taku kakwe: “Lezvi u nga ti seketela ka* hosi ya Siriya u nga ti seketeli ka* Jehovha, a Nungungulu wa wena, a butho ga hosi ya Siriya gi chukulile canjeni ga wena.+ 8 Kasi a vaEtiopia ni vaLibhia va wa nga hi butho ga hombe gi nga hi ni tikareta to tala ni vakhileli va mahaxi ke? Kanilezvi kota lezvi u nga tsumba Jehovha, yena i va nyikele canjeni ga wena.+ 9 Hakuva a mahlo ya Jehovha ma fambafamba misaveni yontlhe+ kasi a kombisa a ntamu wakwe ka lava a mbilu yabye yi mbheleleko kakwe.+ U mahile wupumbu mhakeni leyi. Kusukela lezvi, u ta dhumelwa hi tiyimpi.”+

10 Kanilezvi Asa i no zangarela Hanani, a muwoni, a mu peta paxweni* hakuva i wa mu zangarele nguvhu hi kota ya mhaka leyi. Ka cikhati caleco, Asa, i no sangula ku xanisa van’wani cikari ka vanhu. 11 Makunu a matimu ya Asa, kusukela kusanguleni kala magumo, ma tsalilwe Bhukwini ga Tihosi ta ka Judha ni ta ka Izrayeli.+

12 Hi lembe ga wu 39 ga kufuma kakwe, Asa, i nova ni civavo mikondzweni yakwe, a babya nguvhu. Hambu ka cikhati leci a nga babya, a nga yangi ka Jehovha kanilezvi i noya ka vadhokodhela. 13 Andzhako ka lezvo, Asa i no etlela a humula ni vakokwani vakwe.+ I file hi lembe ga wu 41 ga kufuma kakwe. 14 Hikwalaho, va no mu lahla cilahleni ca hombe leci a nga ti kehlele Dhoropeni ga Dhavhidha.+ Va no mu lata laha mubhedhini lowu wu nga tele hi mafura ya bhalsamu ni perfume yo hlawuleka yi nga mahilwe hi zvilo zva tixakaxaka.+ Ahandle ka lezvo, va no mu dzivelela ndzilo* wa mudhudhumela kulahliweni kakwe.