Mitsengo

35 Jehovha i no engeta a wulawula na Mosi tivaleni ta Mowabhi, kusuhani ni Jordhani+ ni Jeriko, aku: 2 “Byela vaIzrayeli lezvaku ka tshomba leyi yi tova yabye, va wa pambule madhoropa yo kari va nyika vaLevhi kasi va hanya ka wona+ niku va wa va nyike a wuriselo ga lomu matlhelweni ya madhoropa lawo.+ 3 Vona va ta tshama lomu madhoropeni niku a wuriselo gabye gi tava ga zvifuyo zvabye, ni titshomba tabye, ni zvontlhe a zvihari zvabye lezvi zvin’wani. 4 A wuriselo ga madhoropa lawa mu to nyika vaLevhi gi tava 1000 wa mikono* kusukela laha ka muro matlhelweni wontlhe ya dhoropa. 5 Le handle ka dhoropa mu ta pima a 2000 wa mikono hi tlhelo ga le mutsuwuka-gambo, ni 2000 wa mikono hi tlhelo ga le dzongeni,* ni 2000 wa mikono hi tlhelo ga le mupela-gambo, ni 2000 wa mikono hi tlhelo ga le n’walungu.* A dhoropa gi tava laha cikari. Lego gi tava wuriselo ga madhoropa yabye.

6 “A madhoropa lawa mu to nyika vaLevhi ma tava 6 wa madhoropa ya wuchavelo,+ kasi a mudayi a tsutsumela ka wona,+ a ku tsika lawa man’wani ya 42. 7 A vaLevhi mu ta va nyika 48 wa madhoropa zvin’we ni wuriselo ga wona.+ 8 A madhoropa lawa mu to va nyika ma ta huma hi lomu tshombeni ya vaIzrayeli.+ Ka mitlawa leyi ya hombe mu ta teka madhoropa yo tala, ka mitlawa leyi ya yitsongwani mu ta teka ma tsongwani.+ A ntlawa wun’we ni wun’wani wu ta nyika vaLevhi a madhoropa yo kari hi kuya hi tshomba leyi wu to amukela.”

9 Jehovha i no engeta a wulawula na Mosi, aku: 10 “Byela vaIzrayeli, uku: ‘Mu ta tlhatuka Jordhani muya tikweni ga Khanani.+ 11 Mu ta ti hlawulela a madhoropa ma nga ka wutshamu go maheka kasi mava madhoropa ya wuchavelo, laha a to tsutsumela kona loyi a dayako munhu* hi kuphazama.+ 12 A madhoropa lawo ma tava wuchavelo ga n’wina ka muphoteli wa nkhata,+ kasi a mudayi a nga dawi kala a yima mahlweni ka hlengeletano a lamuliwa.+ 13 A 6 wa madhoropa lawa mu to ma nyikela kasi mava wuchavelo ma ta tirela lezvo. 14 Mu ta hlawula a madhoropa manharu ka tlhelo legi ga Jordhani+ ni man’wani ya manharu le tikweni ga Khanani+ kasi mava madhoropa ya wuchavelo. 15 A madhoropa lawo ya 6 ma tava wuchavelo ka vaIzrayeli, ni ka muluveli,+ ni ka muhlavha a nga cikari kabye kasi loyi a dayako munhu* hi kuphazama a tsutsumela kona.+

16 “‘Kanilezvi loku a mu bile hi nchumu wa simbi afa, a munhu loye mudayi. A mudayi i fanele ku dawa futsi.+ 17 Loku a mu bile hi ribye gi ringanako ku daya munhu afa, a munhu loye mudayi. A mudayi i fanele ku dawa futsi. 18 Loku a mu bile hi nchumu wa sinya wu ringanako ku daya munhu afa, a munhu loye mudayi. A mudayi i fanele ku dawa futsi.

19 “‘A muphoteli wa nkhata hi yena a to daya a mudayi. Loku a mu kuma i ta mu daya. 20 Loku a munhu a file hi kota ya lezvi a wokari a nga mu nikinya hi ku mu venga kutani hi kota ya lezvi a nga mu hoxela nchumu na a hi ni makungo yo biha,*+ 21 kutani a no muba hi mandla hi kota ya ku mu venga, a gumesa afa, a munhu loyi a mu bileko i fanele ku dawa futsi. A munhu loye mudayi. A muphoteli wa nkhata i ta daya a mudayi loku a mu kuma.

22 “‘Kanilezvi loku a mu nikinyile hi kuphazama na a nga mu vengi kutani a mu hoxele nchumu na a nga hi na makungo yo biha hi yena,*+ 23 kutani loku a mu wisele ribye na a nga mu woni, lezvo na a nga hi nala wakwe kutani na a nga lavi ku mu bayisa, a munhu loye afa, 24 a hlengeletano yi ta lamula cikari ka loyi a bileko munhu ni muphoteli wa nkhata hi ku landza a zvileletelo lezvi zva kulamula.+ 25 A hlengeletano yi ta ponisa a mudayi canjeni ga muphoteli wa nkhata, yi mu tlhelisa dhoropeni ga wuchavelo legi a nga tsutsumela ka gona. A mudayi i ta tshama ka gona kala kufa a mupristi wa hombe loyi a totilweko hi mafura ma basileko.+

26 “‘Kanilezvi loku a mudayi a tlula mbhingano wa dhoropa ga wuchavelo legi a nga tsutsumela ka gona, 27 a muphoteli wa nkhata a mu kuma le handle ka mbhingano wa dhoropa ga wuchavelo a mu daya, a nga tava ni nandzu wa nkhata. 28 Hakuva i fanele ku tshama dhoropeni ga wuchavelo kala kufa a mupristi wa hombe. Kanilezvi andzhako ka kufa ka mupristi wa hombe, a mudayi a nga tlhela tshombeni yakwe.+ 29 A zvilo lezvi zvi ta tira ka n’wina kota cileletelo ca kulamula zvizukulwaneni zva n’wina zvontlhe, kontlhe lomu mu to tshama kona.

30 “‘Ni wihi loyi a dayako munhu* i fanele ku dawa kota mudayi,+ na zvi tiyiswa hi nomu wa vakustumunyu;+ kanilezvi i hava a to dawa na zvi tiyiswa hi wukustumunyu ga munhu mun’we. 31 Mu nga vhumeli a hakhelo ya ku tlhatlhisa a wutomi* ga mudayi loyi a faneleko ku dawa, hakuva i fanele ku dawa futsi.+ 32 Mu nga vhumeli a hakhelo ya ku tlhatlhisa loyi a tsutsumeleko dhoropeni ga wuchavelo, mu mu tsika a tlhela aya tshama tikweni gakwe na ku nga sefa a mupristi wa hombe.

33 “‘Mu nga nyenyezisi a tiko legi mu to tshama ka gona, hakuva a nkhata wa nyenyezisa a tiko.+ A ku na muphahlo wa ku kombela ku tsetselelwa zviwonho wa nkhata wu halatilweko misaveni ahandle ka nkhata wa loyi a wu halatileko.+ 34 Mu nga nyenyezisi a tiko legi mu hanyako ka gona, ku nga tiko legi ndzi hanyako ka gona, hakuva mina Jehovha, ndzi tshama cikari ka vanhu va ka Izrayeli.’”+