Kronekele wo sangula

13 Dhavhidha i no bhulisana ni varangeli va mitlawa ya 1000 wa vanhu ni ya 100 wa vanhu, ni varangeli vontlhe.+ 2 Dhavhidha i no byela hlengeletano yontlhe ya ka Izrayeli, aku: “Loku mu zvi wona na zvi hi zvinene ni loku zvi amukeleka ka Jehovha, a Nungungulu wa hina, a hi rumeleni gezu ka vamakabye va hina lava va seleko matikweni wontlhe ya Izrayeli, ni ka vapristi ni vaLevhi lomu madhoropeni yabye+ ma nga ni wuriselo, kasi va ta ti patsa na hina 3 hi neha a Arke*+ ga Nungungulu wa hina.” Hakuva masikwini ya Sawule va wa nga gi hlayisi.+ 4 A hlengeletano yontlhe yi no zwanana ku maha lezvo, hakuva a vanhu vontlhe va wa zvi wona na zvi hi zvinene. 5 Hikwalaho, Dhavhidha i no tlhanganisa a vaIzrayeli vontlhe, kusukela congweni* wa Gibhite kala Lebho-Hamate,*+ kasi va neha a Arke ga Nungungulu wa lisine hi Kiriyat-Jeyarime.+

6 Dhavhidha ni vaIzrayeli vontlhe va no kandziha vaya Bhaala,+ a Kiriyat-Jeyarime wa Judha, kasi va ya teka a Arke ga Nungungulu wa lisine, Jehovha, loyi a tshamileko citshan’wini ca wuhosi hehla* ka makerubhima,+ a Arke legi a vanhu va khongelako vitweni gakwe ka gona. 7 Hambulezvo, va no pakela a Arke ga Nungungulu wa lisine lomu ka kareta ya yiswa+ va wuya nago hi le mutini wa Abhinadhabha. Uza na Ahiyo hi vona va nga kari va fambisa kareta.+ 8 Dhavhidha ni vaIzrayeli vontlhe va wa kulungela mahlweni ka Nungungulu hi ntamu wabye wontlhe, na va yimbelela tisimu ni kuba zvitende, ni zvin’wani zvichaya-chaya zva tingoti, ni mitandanda,+ ni tingomana,+ ni mimpundzu.+ 9 Kanilezvi laha va nga chikela le Kidhoni ka wutshamu go hulela kona timbewu, Uza i no nawuluta canja gakwe a khoma a Arke hakuva kutsongwani a tihomu ti wa lava ku gi wisa. 10 Hi kota ya lezvo, a zanga ya Jehovha yi no vhindlukela Uza, a mu daya hi lezvi a nga nawuluta canja gakwe a khoma a Arke.+ I no fela kwalaho, mahlweni ka Nungungulu.+ 11 Kanilezvi Dhavhidha i no zangara* hi lezvi a zanga ya Jehovha yi nga vhindlukele Uza; a wutshamu lego gi vitaniwa ku Perezi-Uza* kala ni nyamutlha lezvi.

12 Hikwalaho, ka siku lego, Dhavhidha i no chava Nungungulu wa lisine, aku: “Ndzi ta gi nehisa kuyini a Arke ga Nungungulu wa lisine dhoropeni ga mina ke?”+ 13 Dhavhidha a nga nehangi a Arke le Dhoropeni ga Dhavhidha lomu a nga tshama kona, kanilezvi i no laya lezvaku gi yisiwa mutini wa Obhed-Edhomi, a muGati. 14 A Arke ga Nungungulu wa lisine gi no tshama ni ngango wa Obhed-Edhomi. Gi tshamile mutini wakwe a tihweti tinharu niku Jehovha i no simama ku katekisa a ngango wa Obhed-Edhomi ni zvontlhe lezvi a nga hi nazvo.+