Kronekele wa wumbiri
10 Rehobhowamu i noya Xekemi,+ hakuva a vaIzrayeli vontlhe va wa yile le Xekemi kasi va ya mu maha hosi.+ 2 Zvalezvi Jerobhowamu,+ a n’wana wa Nebhate, a ngazwa a mhaka leyo, i no wuya hi Gibhite (Jerobhowamu i wa ha hi Gibhite hakuva i wa tsutsumile hi kota ya hosi Solomoni).+ 3 Makunu va no mu vitanisa, niku Jerobhowamu ni bandla gontlhe ga ka Izrayeli va nota ka Rehobhowamu, va taku: 4 “A papayi wa wena i hi rwexile a kanga wo bindza.+ Kanilezvi loku wena u vevukisa a ntiro wo bindza wa papayi wa wena ni ku vevukisa a kanga wo bindza lowu a hi rwexileko, hi ta ku tirela.”
5 Hi kota ya lezvo, i te ngalo kabye: “Wuyani ka mina andzhako ka masiku manharu.” Hikwalaho, a vanhu va no famba.+ 6 Hi kulandzela, hosi Rehobhowamu i no wutisa a vavanuna va kulileko* lava va nga tirele a papayi wakwe Solomoni na a ha hanya, aku: “Wusungukati muni mu ndzi nyikako kasi ku hlamula a vanhu lava?” 7 Va no mu hlamula, vaku: “Loku u maha wa munene ka vanhu lava, u va xalalisa ni ku va nyika hlamulo wa wunene, va tava malandza ya wena contlhe cikhati.”
8 Hambulezvo, i no tsika a wusungukati legi a vavanuna va kulileko* va nga mu nyika a ya wutisa a majaha lawa ma kulileko naye lawa makunu ma nga hi malandza yakwe.+ 9 I no ma wutisa, aku: “Wusungukati muni mu ndzi nyikako? Hi ta va hlamulisa kuyini a vanhu lava va nga ndzi byela ku: ‘Vevukisa a kanga lowu a papayi wa wena a hi rwexileko’?” 10 A majaha lawa ma nga kulile zvin’we naye ma te ngalo kakwe: “A vanhu lava va nga ku byela ku: ‘A papayi wa wena i hi rwexile a kanga wo bindza, kanilezvi wena u fanele ku wu vevukisa’, va byele lezvi: ‘A citihwana ca mina ci tava co dziva a ku hundza ciwunu ca papayi wa mina. 11 A papayi wa mina i mu rwexile a kanga wo bindza, kanilezvi mina ndzi ta wu engetela ku bindza. A papayi wa mina i mu tsayisile hi misephu, kanilezvi mina ndzi ta mu tsayisa hi misephu yi nga ni zvisimbana zvo tlhava.’”
12 Jerobhowamu ni vanhu vontlhe va no tlhela ka Rehobhowamu hi siku ga wunharu, kota lezvi a hosi yi nga wulile ku: “Wuyani ka mina hi siku ga wunharu.”+ 13 Kanilezvi a hosi yi no va hlamula hi tihanyi. Hi ndlela leyo, hosi Rehobhowamu i no tsika a wusungukati ga vavanuna va kulileko.* 14 I no wulawula navo hi ku landza a wusungukati ga majaha, aku: “Ndzi ta bindzisa a kanga wa n’wina, ina, ndzi ta wu engetela ku bindza. A papayi wa mina i mu tsayisile hi misephu, kanilezvi mina ndzi ta mu tsayisa hi misephu yi nga ni zvisimbana zvo tlhava.” 15 Hikwalaho, a hosi a yi ingisangi a vanhu, hakuva lezvi zvi nga kari zvi maheka zvi wa vangiwa hi Nungungulu wa lisine,+ kasi ku tatiseka lezvi Jehovha a nga zvi wulile ka Jerobhowamu, a n’wana wa Nebhate, hi nomu wa Ahija,+ a muXiloni.
16 Kota lezvi a hosi yi nga ala ku ingisa vaIzrayeli, a vanhu va no hlamula hosi, vaku: “Ciavelo muni hi nga naco na Dhavhidha? Hina a hi na tshomba ka n’wana wa Jese. Wena Izrayeli, a mun’we ni mun’wani i waye ka vanungungulu vakwe! Makunu wena Dhavhidha, ti hlayisele a yindlu ya wena.”+ Zvalezvo vontlhe a vaIzrayeli va no tlhela mitini* yabye.+
17 Kanilezvi Rehobhowamu i no simama ku fumela a vaIzrayeli lava va nga hanya madhoropeni ya ka Judha.+
18 Hi kulandzela, hosi Rehobhowamu i no rumela Hadhoramu,+ loyi a nga wonelela lava va nga khomilwe kasi ku ta maha ntiro wa cikurumeta, kanilezvi a vaIzrayeli va no mu gandla hi maribye kala afa. Hosi Rehobhowamu i no nghena kareteni yakwe a tsutsuma aya Jerusalema.+ 19 Ni vaIzrayeli va no hluwukela a yindlu ya Dhavhidha kala nyamutlha lezvi.