Kronekele wa wumbiri

25 Amaziya i wa hi ni 25 wa malembe a cikhati leci a nga maha hosi, niku i no fuma a 29 wa malembe Jerusalema. A vito ga mamani wakwe ku wa hi Jehoyadhani, wa le Jerusalema.+ 2 I no simama ku maha zvakululama mahlweni ka Jehovha, kanilezvi i wa nga zvi mahi hi mbilu yakwe yontlhe. 3 Zvalezvi a nga tiyisa a wuhosi gakwe, i no daya a malandza yakwe lawa ma nga dele a papayi wakwe, loyi a nga hi hosi.+ 4 Kanilezvi a nga dayangi a vana vabye hakuva i no landzela lezvi zvi tsalilweko Nayweni, bhukwini ga Mosi, laha Jehovha a nga laya, aku: “A vapapayi a va faneli kufa hi kota ya vana vabye, ni vana a va faneli kufa hi kota ya vapapayi vabye, kanilezvi a mun’we ni mun’wani i tafa hi kota ya ciwonho cakwe.”+

5 Amaziya i no tsombanisa a va ka Judha a va yimisa hi tiyindlu ta vapapayi, hi kuya hi varangeli va mitlawa ya 1000 wa vanhu ni ya 100 wa vanhu, a va yimisela vaJudha vontlhe ni va ka Bhenjamini.+ I no tsalela lava va 20 wa malembe kuya hehla,+ a kuma lezvaku ku wa hi ni 300 000 wa masochwa ma gondzisilweko kulwa,* ma zvi kotako a ku tirisa tlhari ni citlhangu ca hombe. 6 Ahandle ka lezvo, i no thola a 100 000 wa masochwa ya tinhenha le Izrayeli hi 100 wa titalenta* ta prata. 7 Kanilezvi Amaziya i no yelwa hi munhu wa Nungungulu wa lisine, a yaku: “Hosi, u nga tsiki a butho ga Izrayeli gi famba na wena, hakuva Jehovha a nga zvin’we ni vaIzrayeli,+ a nga zvin’we ne ni mun’we wa va ka Efrayime. 8 Kanilezvi famba wece, maha zvezvo, u tiya hlanha yimpini. Loku u nga mahi lezvo, a Nungungulu wa lisine i ta ku wisa mahlweni ka nala, hakuva Nungungulu i na ni ntamu wa ku vhuna+ ni wa ku wisa.” 9 Hi kota ya lezvo, Amaziya i no wutisa a munhu wa Nungungulu wa lisine, aku: “Ahati a titalenta* ta mina ta 100 leti ndzi nga nyika a masochwa ya vaIzrayeli ke?” A munhu wa Nungungulu wa lisine i no hlamula, aku: “Jehovha a nga ku nyika zvotala nguvhu a ku hundza lezvo.”+ 10 Hikwalaho, Amaziya i no tlhatlha a masochwa lawa ma nga tile kakwe na ma sukela ka va ka Efrayime, a ma tlhelisa wutshan’wini gabye. Kanilezvi ma no va zangarela nguvhu a vaJudha, hikwalaho ma no tlhela mitini yabye na ma vhura hi zanga.

11 Hi kulandzela, Amaziya i no tiya hlanha a rangela a masochwa yakwe vaya nkoveni wa Munyu+ a ya daya a 10 000 wa vavanuna va Seyire.+ 12 Ni vavanuna va ka Judha va no khoma a 10 000 wa vavanuna na ha ha hanya. Hikwalaho, va no kandziha navo madembeleni ya ribye ga hombe va ya va hoxela lahasi vawa va pswhandlekela. 13 Kanilezvi a ntlawa wa masochwa lawa Amaziya a nga ma tlhelisile, lawa ma nga lava ku famba naye yimpini,+ ma wa kari ma hlasela a madhoropa ya Judha kusukela Samariya+ kala Bhet-Horoni.+ Ma no daya a 3000 wa vanhu ma tlhela ma phanga zvilo zvo tala.

14 Kanilezvi andzhako ka loku Amaziya a wuyile hi ka ku hlasela a vaEdhomi, i no neha a vanungungulu va vanhu va Seyire a ta va yimisa kota vanungungulu vakwe,+ a sangula ku khizama mahlweni kabye ni ku va mahela a miphahlo ya kuhiswa. 15 Hikwalaho, Jehovha i no mu zangarela nguvhu Amaziya, a rumela a muphrofeti a yaku kakwe: “Hikuyini u landzelako a vanungungulu va vanhu, lava va nga kala ku tlhatlhisa a vanhu vabye canjeni ga wena ke?”+ 16 Na a ha wulawula naye, a hosi yi te galo: “Hi no ku yimisa a kuva sungukati ga hosi ke?+ Miyela!+ U lava ku dayelwa yini ke?” A muphrofeti i no miyela, hambulezvo i no engeta, aku: “Ndza zvi tiva lezvaku Nungungulu i bohile ku ku lovisa hi kota ya lezvi u nga maha ni lezvi u nga ala ku ingisa a wusungukati ga mina.”+

17 Andzhako ka loku Amaziya, a hosi ya Judha a bhulile ni masungukati yakwe va zwana, i no rumela mahungu ka Jehowaxi, a n’wana wa Jehoahaza, a n’wana wa Jehu, a hosi ya ka Izrayeli, aku: “Tana hi ta tlhangana hilwa.”*+ 18 Jehowaxi, a hosi ya Izrayeli, i no rumela mahungu ka Amaziya, a hosi ya Judha, aku: “A sinya ya mimizwa ya Lebhanoni yi no rumela mahungu ka sedhare wa Lebhanoni, yiku: ‘Nyikela a nhanyana wa wena ka mufana wa mina kasi ava sati wakwe.’ Kanilezvi a cihari ca khwati ca Lebhanoni ci no hundza hi laho ci kandzihetela a sinya ya mimizwa. 19 Wena u te: ‘Hi nga wona! Ndzi* hlasele Edhomi.’+ Hikwalaho, a mbilu ya wena yi no ti kukumukisa, yi ti lavela wudzundzo. Kanilezvi ti tshamele ndlwini* ya wena. Hikuyini u ti vitaniselako a khombo ni kuwa, u wisa Judha zvin’we na wena ke?”

20 Kanilezvi Amaziya a nga ingisangi,+ hakuva lezvi zvi wata hi ka Nungungulu wa lisine kasi ku va nyikela canjeni ga nala wabye+ hi kota ya lezvi va nga landzele a vanungungulu va vaEdhomi.+ 21 Hikwalaho, Jehowaxi, a hosi ya Izrayeli, i no kandziha. Yena na Amaziya, a hosi ya Judha, va no tlhangana valwa le Bhet-Xemexe+ wa Judha. 22 Judha i no hluliwa hi Izrayeli, hikwalaho a mun’we ni mun’wani wabye i no tsutsuma aya kaya* kakwe. 23 Jehowaxi, a hosi ya Izrayeli, i no khoma Amaziya, a hosi ya Judha, a n’wana wa Jehowaxi, a n’wana wa Jehoahaza,* le Bhet-Xemexe. Andzhako ka lezvo, i no famba naye Jerusalema a ya vhulula muhocho wa 400 wa mikono* laha ka muro wa Jerusalema kusukela Nyangweni ya Efrayime+ kala Nyangweni ya laha Khoneni.+ 24 I no teka ouro yontlhe, ni prata, ni zvibya zvontlhe lezvi zvi nga hi lomu ndlwini ya Nungungulu wa lisine na* Obhed-Edhomi, ni lomu titshombeni ta yindlu* ya hosi,+ a tlhela a khoma vanhu vo kari, a gumesa a tlhela le Samariya.

25 Amaziya,+ a n’wana wa Jehowaxi, a hosi ya Judha, i no sala a hanya a 15 wa malembe andzhako ka kufa ka Jehowaxi,+ a n’wana wa Jehoahaza, a hosi ya ka Izrayeli.+ 26 A man’wani matimu ya Amaziya, kusukela kusanguleni kala magumo, ma tsalilwe Bhukwini ga Tihosi ta ka Judha ni ta ka Izrayeli. 27 Kusukela ka cikhati leci Amaziya a nga fularela Jehovha, va no mu xuxela cikungo+ le Jerusalema. I no tsutsuma aya Lakixe, kanilezvi va no rumela vavanuna va mu landza kwale Lakixe va ya mu daya kwaseyo. 28 Hikwalaho, va no mu rwala hi mahaxi va tlhela naye va ya mu lahla zvin’we ni vakokwani vakwe dhoropeni ga Judha.