Papilo go sangula ka Va Le Korinte

4 A vanhu va fanele ku hi wona kota zvitiri zva Kristu ni malandza ya zvihundla zvo basa zva Nungungulu.+ 2 Mhakeni leyi, leci ci lavekako ka malandza hi lezvaku ma tsumbeka. 3 A ndzi na mhaka loku ndzi hloliwa hi n’wina kutani hi tribhunali ya vanhu. Kunene, hambu mina wutsumbu a ndzi ti hloli. 4 Hakuva a ci kona ndzi alakanyako ku ndzi wonhile. Kanilezvi a ndzi wuli ku ndzi no lulama; loyi a ndzi hlolako hi Jehovha.*+ 5 Hikwalaho, mu nga lamuli+ nchumu na ci nga se chikela cikhati ca kona, kala a Hosi yita. Yi ta humesa a zvilo zvi fihlilweko zva munyama zvita kuwonekeleni, yi tivekisa a mixuvo ya timbilu. Makunu a mun’we ni mun’wani i ta amukela a wudzundzo gakwe hi ka Nungungulu.+

6 Makunu, vamakabye, ndzi tirisile a zvilo lezvi ka mina wutsumbu ni ka Apolosi+ kasi ku mu vhuna, lezvaku mu gondza hi ka hina a nayo lowu waku: “Mu nga mahi zvo hundza lezvi zvi tsalilweko”, kasi mu nga tali hi matshandza,+ muku loyi i chukwana ku hundza gayani. 7 Hakuva himani a ku mahako u hambana ni van’wani? Kona cini u nga naco u nga kala ku amukela?+ Makunu loku ku hi lezvaku u no amukela, hikuyini u ti kukumukisako a ku khwatsi hi loku u nga amukelangi ke?

8 Mo sina mu xure ke? Mo sina mu ganyile? Mu no sangula ku fuma kota tihosi+ na mu nga hi na hina ke? Kunene, ndzi wa xuva ku ngha mu sangulile ku fuma kota tihosi, kasi hinawu hi fela ku fuma na n’wina kota tihosi.+ 9 Hakuva ka mina zvo khwatsi Nungungulu i vekile hina vapostoli hiva vo gumesa ku kombisiwa kota vanhu va konelweko ku dawa,+ hakuva hi mahile cipetakulo ka tiko,+ ni ka tingilozi, ni ka vanhu. 10 Hina hi zvipumbu+ hi kota ya Kristu, kanilezvi n’wina mu tlharihile ka Kristu; hina hi na ni gome kanilezvi n’wina mu na ni ntamu; n’wina ma dzundziwa kanilezvi hina ha chepetiwa. 11 Kala ka cikhati leci, ha hi ni ndlala,+ ni tora,+ ni wuna,* niku ha biwa,*+ a hi na ko tshama kona, 12 niku ha ti tsitsirita, hi tira hi mandla ya hina.+ Loku va hi ruka, ha va katekisa;+ loku va hi xanisa, ha timisela hi lihlazva-mbilu;+ 13 loku va hi rukatela, hi va hlamula hi kurula;*+ kala lezvi hi mahile ku khwatsi hi chaka ga tiko ni manyelo* ya zvilo zvontlhe.

14 Ndzi mu tsalela a timhaka leti, na ndzi nga feli ku mu dhanisa, kanilezvi kasi ku mu gondzisa kota vana va mina va randzekako. 15 Hakuva hambu loku mu hi ni 10 000 wa vagondzisi ka Kristu, a mu na vapapayi vo tala; hakuva hi mina ndzi nga papayi wa n’wina ka Kristu Jesu hi kota ya mahungu ya manene.+ 16 Hikwalaho, ndza mu khongotela lezvaku mu ndzi pimanyisa.+ 17 Hi kota ya lezvo, ndza mu rumelela Timote, a n’wana wa mina ndzi mu randzako ni wo tsumbeka Hosini. I ta mu alakanyisa lezvi ndzi mahisako zvona zvilo* ka Kristu Jesu,+ kota lezvi ndzi gondzisako kontlhe, mabandleni wontlhe.

18 A vokari va tele hi matshandza, a ku khwatsi ndzi nga ta hata ka n’wina. 19 Kanilezvi ndzi tata ka n’wina zvezvi, loku Jehovha* a zvi randza, na ndzi nga teli ku ta tiva lezvi va wulawulako lava va teleko hi matshandza, kanilezvi a ku ta tiva a ntamu wabye. 20 Hakuva a Mufumo wa Nungungulu a hi kuwulawula, kanilezvi i ntamu. 21 Mu langa yini? Ndzi mu tela ni nhonga+ kutani ndzita hi lirandzo ni moya wa kurula ke?