Kronekele wa wumbiri
13 Hi lembe ga wu 18 ga hosi Jerobhowamu, Abhija i no maha hosi ya Judha.+ 2 I no fuma a malembe manharu Jerusalema. A vito ga mamani wakwe ku wa hi Mikaya,+ a nhanyana wa Uriyeli, wa le Gibheya.+ Ku nova ni yimpi cikari ka Abhija na Jerobhowamu.+
3 Hikwalaho, Abhija i noya yimpini ni butho ga 400 000 wa tinhenha ti gondzisilweko kulwa.*+ Jerobhowamu ni 800 000 wa vavanuna va gondzisilweko kulwa,* a masochwa ya tinhenha, va no fola kasi kulwa naye. 4 Makunu Abhija i no yima Citsungeni ca Zemarayime, leci ci nga tikweni ga zvitsunga ga Efrayime, aku: “Wena Jerobhowamu ni vontlhe a vaIzrayeli, ndzi ingiseleni. 5 Mo kala mu nga zvi tivi lezvaku Jehovha, a Nungungulu wa Izrayeli, i nyikile Dhavhidha a mufumo wa Izrayeli kala kupindzuka,+ yena ni vana vakwe,+ hi civhumelwano ca munyu* ke?+ 6 Kanilezvi Jerobhowamu,+ a n’wana wa Nebhate, a nandza ga Solomoni, a n’wana wa Dhavhidha, i no suka a hluwukela a hosi yakwe.+ 7 Ni vavanuna va vanyamijiri, va nga vhuniko nchumu va no hlengeletana kakwe. Va no phikiza Rehobhowamu, a n’wana wa Solomoni, va mu peza hakuva i wa ha hi muswa na a hi ni hlenekera; hikwalaho a nga va tiyelangi.
8 “Makunu mu alakanya lezvaku mu ngava ni ntamu hehla ka mufumo wa Jehovha lowu wu nga mandleni ya vana va Dhavhidha hi lezvi ntsena mu nga citshungu ca hombe ni lezvi mu nga ni marole ya ouro lawa Jerobhowamu a ma mahileko vanungungulu va n’wina.+ 9 A mu hlongolangi a vapristi va Jehovha,+ a vana va Aroni, ni vaLevhi, mu ti yimisela a vapristi va n’wina venyi a ku khwatsi mu vanhu va man’wani matiko ke?+ Ni wihi a ngata ni* cidhunana ca homu ni 7 wa tiyivhu ta vamatsune i wa tava mupristi wa zvilo zvi nga hiko vanungungulu. 10 Kanilezvi hina, Jehovha hi yena a Nungungulu wa hina,+ niku a hi mu tsikangi; a vapristi va hina, a vana va Aroni, va tirela Jehovha na va vhunetelwa hi vaLevhi mitirweni yabye. 11 Va nyikela ka Jehovha a miphahlo ya kuhiswa wontlhe masiku, mixo ni gambo,+ ni libani lo nuhela.+ Ni tipawa ta munyikelo+ ti laha mezeni ya ouro ya yinene, niku va lumeka a tikandiya leti ti nga laha ka nenge wa tikandiya+ wa ouro gambo ni gambo, hakuva hi maha mitiro ya hina mahlweni ka Jehovha, a Nungungulu wa hina, kanilezvi n’wina mu mu tsikile. 12 Makunu ma zvi wona! A Nungungulu wa lisine i na hina a hi rangela, zvin’we ni vapristi vakwe lava va nga ni mimpundzu leyi va bako kasi ku mu tivisa yimpi. N’wina vavanuna va ka Izrayeli, mu ngalwi na Jehovha, a Nungungulu wa vakokwani va n’wina, hakuva mu nga ta humelela.”+
13 Kanilezvi Jerobhowamu i no va juma hi lendzhako. Hikwalaho, a butho ga Jerobhowamu gi nova mahlweni ka vaJudha, lava vo juma na va hi lendzhako kabye. 14 Laha a vavanuna va ka Judha va nga hundzuluka, va no wona lezvaku va wa fanele kulwa yimpi hi phambeni ni ndzhako. Hikwalaho, va no sangula ku rila ka Jehovha,+ a vapristi na vaba mimpundzu yi vhuma nguvhu. 15 A vavanuna va ka Judha va noba huwa ya yimpi, niku laha a vavanuna va ka Judha va ngaba huwa ya yimpi, a Nungungulu wa lisine i no hlula Jerobhowamu ni Izrayeli yentlhe mahlweni ka Abhija ni ka Judha. 16 A vaIzrayeli va no tsutsuma mahlweni ka Judha, niku Nungungulu i no va nyikela mandleni yabye. 17 Abhija ni vanhu vakwe va no chindza murengo; ku no dawa a 500 000 wa vavanuna va gondzisilweko kulwa* va ka Izrayeli. 18 Hi ndlela leyo, a vavanuna va ka Izrayeli va no tsongahatiwa ka cikhati leco, kanilezvi a vavanuna va ka Judha va no hlula hakuva va no ti seketela ka* Jehovha, a Nungungulu wa vakokwani vabye.+ 19 Abhija i no simama ku hlongolisela Jerobhowamu a tlhela a mu tekela madhoropa yakwe: Bheteli+ ni zvidhoropana zva kona, ni Jexana ni zvidhoropana zva kona, na Efroni+ ni zvidhoropana zva kona. 20 Jerobhowamu a nga ha wu kumangi kambe a ntamu wakwe masikwini ya Abhija; andzhako ka lezvo, i no biwa hi Jehovha afa.+
21 Kanilezvi Abhija i nova ni ntamu. Hi kufamba ka cikhati, i no teka a 14 wa vasati,+ niku i nova papayi wa 22 wa vafana ni 16 wa vanhanyana. 22 A man’wani matimu ya Abhija, lezvi a zvi mahileko ni lezvi a zvi wulileko, ma tsalilwe lomu ka timhaka ti tsalilweko hi muphrofeti Idho.+