Tihosi ta wumbiri
4 Makunu a mun’we wa vasati va vana va vaphrofeti+ i no rilela Elixa, aku: “A nuna wa mina, a nandza ga wena, i file, niku wena wa zvi tiva khwatsi ku a nandza ga wena contlhe cikhati gi wa chava Jehovha.+ Lezvi ku tile munhu a nga mu dhevha kasi a ta teka vana va mina va vambiri a ya va maha tikhumbi.” 2 Makunu Elixa i te ngalo kakwe: “U lava ku ndzi ku mahela yini? Ndzi byele lezvi u nga nazvo lomu ndlwini.” A wasati i no hlamula, aku: “A nandza ga wena a gi na nchumu lomu ndlwini, gova ni fuko ya mafura basi.”+ 3 Elixa aku: “Famba ka vontlhe a vaakelani va wena u ya lomba a zvibya zva phanga, u nga lombi zvi tsongwani. 4 Andzhako ka lezvo, nghena lomu ndlwini, wena ni vana va wena, u vhala livati. Tata a zvibya zvontlhe lezvo hi mafura; lezvi zvi talileko zvi veke hi tlhelo.” 5 Hikwalaho, a wasati i no suka kakwe.
Laha yena ni vana vakwe va nga nghena lomu ndlwini a vhala livati, a vana vakwe va no mu nyiketela zvibya, yena a simama ku chululela mafura.+ 6 A cikhati leci a zvibya zvi nga tala, i no byela a mun’we va vana vakwe, aku: “Ndzi nyikete cibya cin’wani.”+ Kanilezvi a n’wana wakwe i no mu hlamula, aku: “A ka hi na cibya cin’wani.” Zvalezvo a mafura ma no nyima.+ 7 Makunu a wasati i noya ka munhu wa Nungungulu wa lisine a ya mu hlawutela. Yena aku: “Famba u ya xavisa mafura u hakhela mangava ya wena; wena ni vana va wena mu ta hanya hi lawa ma to sala.”
8 Ka siku go kari Elixa i noya Xunemu,+ laha ku nga hi ni wasati wa nduma. A wasati loye i no mu kurumeta ku tshama laho aga.+ Khati ni khati a nga hundza hi laho, i wa nyima aga. 9 Hikwalaho, a wasati loye i no byela nuna wakwe, aku: “Ndza zvi tiva ku a munhu loyi a talako ku hundza hi laha munhu a basileko wa Nungungulu. 10 A hi mahe kwartu ya yitsongwani le hehla ka yindlu,+ hi mu vekela a mubhedhi, ni meza, ni citulo, ni nenge wa kandiya kasi ku khati ni khati a to hundza hi laha ka hina a tshama lomo.”+
11 Ka siku go kari, i no chikela laho, aya kwartwini ya le hehla ka yindlu a ya etlela kona. 12 Elixa i no byela Gehazi,+ a nandza gakwe, aku: “Ndzi vitanele a wasati loyi wa muXuname.”+ Hikwalaho, Gehazi i no mu vitana a ta yima mahlweni kakwe. 13 Elixa i no byela Gehazi, aku: “Mu byele, uku: ‘U ti karatile u maha zvontlhe lezvi hi kota ya hina.+ U lava ku ndzi ku mahela yini?+ Ndzi ku wulawulela ka hosi+ kutani ka murangeli wa butho ke?’” Kanilezvi a wasati i no hlamula, aku: “A zvi laveki; mina ndzi hanya kuruleni ni va ka hina.” 14 Hikwalaho, Elixa i no wutisa aku: “Makunu a nga mahelwa yini a wasati loyi?” Gehazi aku: “A wasati loyi a nga na n’wana+ niku a nuna wakwe i khosahele.” 15 Zvalezvo, Elixa i te ngalo: “Mu vitane.” Hikwalaho, Gehazi i no mu vitana a ta yima laha nyangweni. 16 Elixa aku: “A lembe gi tako, hi cikhati caleci, u tava u wukarele n’wana.”+ Kanilezvi a wasati i te ngalo: “Ahihi, hosi yanga, munhu wa Nungungulu wa lisine, u nga hembeli a nandza ga wena.”
17 Kanilezvi, a wasati i no xura nyimba, a pswala n’wana wa mufana, hi cikhati caleco, ka lembe gi nga landzela, a ku khwatsi hi lezvi Elixa a nga mu byelile. 18 A n’wanana i no kula; ka siku go kari, i no landza a papayi wakwe loyi a nga hi zvin’we ni vatshoveli. 19 I no byela papayi wakwe, aku: “A hloko ya mina, a hloko ya minoo!” A papayi wakwe i no byela nandza, aku: “Mu teke u famba naye ka mamani wakwe.” 20 Hikwalaho, gi no mu tlakula gi tlhela naye ka mamani wakwe. A n’wanana i no wukarelwa hi mamani wakwe kala ni hlikanhi, a gumesa afa.+ 21 A wasati i no kandziha a ya mu lata laha mubhedhini wa munhu wa Nungungulu wa lisine,+ a huma handle a vhala livati. 22 I no vitana nuna wakwe, aku: “Ndzi rumelele a nandza gin’we ni mbongola yin’we, u ndzi tsika ndzi hatla ndzi famba ka munhu wa Nungungulu wa lisine, ndzi ta wuya.” 23 Kanilezvi a nuna wakwe i te ngalo: “Hikuyini u lavako ku ya mu wona nyamutlha? A hi hweti yiswa+ ne a hi sabhadho.” Kanilezvi yena i te ngalo: “U nga karateki.” 24 Hikwalaho, a wasati i no gabhatsela mbongola a byela nandza gakwe, aku: “Famba hi kuhatlisa. U nga nonoki hi kota ya mina ntsena loku ndzi ku byela.”
25 A wasati i no suka aya ka munhu wa Nungungulu wa lisine, Citsungeni ca Karmeli. Zvalezvi a munhu wa Nungungulu wa lisine a nga mu wona na a hata hi le kule, i no byela Gehazi, a nandza gakwe, aku: “Hi nga wona a wasati wa muXuname! Hi gayani. 26 Tsutsuma u mu khinga, u mu wutisa ku: ‘Wa vhuka khwatsi ke? A nuna wa wena ke? Ahati a n’wana wa wena ke?’” A wasati i no hlamula, aku: “Vontlhe va vhuka khwatsi.” 27 Laha a nga chikela citsungeni, ka munhu wa Nungungulu wa lisine, i no tekela ku khoma mikondzo yakwe.+ Gehazi i no tshinela laha kusuhani kakwe kasi a mu namuruta, kanilezvi a munhu wa Nungungulu wa lisine i te ngalo: “Mu tsike, hakuva i karatekile nguvhu* niku Jehovha i ndzi fihlele mhaka leyi, a nga ndzi byelangi.” 28 A wasati i te ngalo: “Hosi yanga, ndzi tshukile ndzi ku kombela n’wana ke? A ndzi ku byelangi, ndziku: ‘U nga ndzi tsumbisi zvilo zva mawunwa ke’?”+
29 Elixa i no tekela ku byela Gehazi, aku: “Boha tinguwo ta wena laha ciwunwini ca wena,+ u teka nhonga ya mina u famba. Loku u kumana ni munhu, u nga mu losi, niku loku a munhu a ku losa, u nga hlamuli. Famba u ya tlhateka nhonga ya mina laha nghoheni ya cifanyana.” 30 A mamani wa n’wana i te ngalo: “A ku khwatsi hi lezvi Jehovha a hanyako ni lezvi wena u* hanyako, ndzi nga ta ku tsika.”+ Hikwalaho, Elixa i no suka a famba naye. 31 Gehazi i no ranga mahlweni kabye a ya tlhateka nhonga nghoheni ya cifanyana, kanilezvi a ku zwalangi gezu ne kutihenya.+ Gehazi i no tlhela ka Elixa, a ya mu byela, aku: “A cifanyana a ci vhukangi.”
32 A cikhati leci Elixa a nga nghena lomu ndlwini, i no kuma cifanyana na ci file, na ci latilwe laha mubhedhini wakwe.+ 33 I no nghena a vhala livati. Ku wa hi vona voce va vambiri va nga hi lomu kwartwini. Makunu Elixa i no sangula ku khongela ka Jehovha.+ 34 Andzhako ka lezvo, i no noma laha mubhedhini, a ti lata hehla ka cifanyana. I no vekela nomu wakwe hehla ka lowu wa cona, ni matihlo yakwe hehla ka lawa ya cona, ni mandla yakwe hehla ka lawa ya cona, a simama na a ti gwimbile hehla ka cona; ni miri wa cifanyana wu no sangula ku kufumela.+ 35 Elixa i no suka a fambafamba lomu ndlwini, aya seno ni seno, a gumesa a noma laha mubhedhini a ti lata kambe hehla ka cifanyana. A cifanyana ci no wetshemula 7 wa makhati ci gumesa ci vhula matihlo.+ 36 Makunu Elixa i no vitana Gehazi, aku: “Vitana a wasati wa muXuname.” Hikwalaho, Gehazi i no mu vitana ata ka Elixa. Elixa aku: “Teka n’wana wa wena.”+ 37 A wasati i no nghena, awa mikondzweni yakwe, a khizama lahasi mahlweni kakwe, a gumesa a teka n’wana wakwe a huma.
38 A cikhati leci Elixa a nga tlhela Gilgali, lomu tikweni ku wa hi ni ndlala.+ A vana va vaphrofeti+ va wa tshamile mahlweni kakwe. Elixa i no byela nandza gakwe,+ aku: “Teka bhota ga hombe u va bhikela zvakuga a vana va vaphrofeti.” 39 A mun’we wabye i no huma aya masin’wini kasi a ya khaya matsawu, a se ya kuma a vhina* wa khwati a khaya a mihandzu ya kona a tata nguwo yakwe. I no wuya a ta yi tsemelela a chela lomu bhoteni na a nga zvi tivi ku zvini. 40 Hi ndzhako ka cikhati, va no phamela vanhu kasi vaga, kanilezvi zvalezvi va nga sangula kuga zvakuga lezvo, va noba huwa, vaku: “Munhu wa Nungungulu wa lisine, ku na ni kufa lomu bhoteni!” A va zvi kotangi kuga. 41 Elixa aku: “Ndzi neheleni mapanyana.” I no ma chela lomu bhoteni, aku: “Phamelani vanhu.” Ku wa nga ha hi na mhango lomu bhoteni.+
42 Ku nota munhu hi le Bhaali-Xalixa+ ni 20 wa tipawa ta sevhadha+ to mahiwa hi mihandzu yo sangula ni cikhwama ca timbewu ta tiswa+ kasi a ta nyika a munhu wa Nungungulu wa lisine. Elixa aku: “Nyika vanhu vaga.” 43 Kanilezvi a nandza gakwe gi te ngalo: “Ndzi ta zvi avelisa kuyini ka 100 wa vanhu?”+ Elixa aku: “Nyika vanhu vaga, hakuva Jehovha i ngalo: ‘Va taga zvi tlhela zvi sala.’”+ 44 Makunu i no zvi veka mahlweni ka vanhu, vaga zvi tlhela zvi sala,+ kota lezvi Jehovha a nga wulile.