Kronekele wa wumbiri

23 Hi lembe ga wu 7, Jehoyadha i no tiya hlanha a maha civhumelwano ni varangeli va mitlawa ya 100 wa vanhu,+ va nga lava: Azariya, a n’wana wa Jerohamu; na Ixmayeli, a n’wana wa Jehohanani; na Azariya, a n’wana wa Obhedhi; na Maaseya, a n’wana wa Adhaya; na Elixafate, a n’wana wa Zikri. 2 Andzhako ka lezvo, va no fambafamba tikweni gontlhe ga Judha va tsombanisa vaLevhi+ ka madhoropa wontlhe ya ka Judha ni tihloko ta tiyindlu ta vapapayi ta ka Izrayeli. Laha va nga chikela Jerusalema, 3 a bandla gontlhe gi no maha civhumelwano+ ni hosi ndlwini ya Nungungulu wa lisine; andzhako ka lezvo, Jehoyadha i te ngalo kabye:

“Wonani! A n’wana wa hosi i ta fuma kota lezvi Jehovha a tsumbisileko xungetano hi vana va Dhavhidha.+ 4 Mahani lezvi: A cipandze ca wunharu ca vapristi ni vaLevhi lava va to ngha na va tira+ hi sabhadho va tava vagadhi va tinyangwa;+ 5 a cipandze cin’wani ca wunharu ci ta tira ndlwini* ya hosi;+ a cipandze cin’wani ca wunharu ci tava laha Nyangweni ya Ciseketelo; ni vanhu vontlhe va tava lomu mitsendzeleni* ya yindlu ya Jehovha.+ 6 Mu nga tsiki munhu a nghena lomu ndlwini ya Jehovha, saseka a vapristi lava va to ngha na va tira.+ Vona va nga nghena hakuva i ntlawa wa vanhu vo basa niku a vanhu vontlhe va ta simama a ku maha lezvi Jehovha a zvi lavako kabye. 7 A vaLevhi va fanele ku randzela hosi matlhelweni wontlhe, a mun’we ni mun’wani na a khomile a matlhari yakwe canjeni gakwe. Ni wihi a to nghena lomu ndlwini i ta dawa. Tshamani ni hosi ni kwihi yi toya kona.”*

8 A vaLevhi ni vaJudha vontlhe va no maha zvalezvi mupristi Jehoyadha a nga va leletele. Hikwalaho, a mun’we ni mun’wani i no teka a vavanuna vakwe, lava va nga tira hi sabhadho ni lava va nga kala va nga tiri hi sabhadho,+ hakuva mupristi Jehoyadha i wa nga tlhatlhangi a mitlawa+ mitirweni ya yona. 9 Hi kulandzela, mupristi Jehoyadha i no teka a matlhari, ni zvitlhangu zva zvitsongwani,* ni zvitlhangu zva redhonda lezvi zvi nga hi zva hosi Dhavhidha,+ zvi nga vekilwe lomu ndlwini ya Nungungulu wa lisine,+ a nyika a varangeli va mitlawa ya 100 wa vanhu.+ 10 Andzhako ka lezvo, i no yimisa a vanhu vontlhe, a mun’we ni mun’wani na a khomile a tlhari gakwe, kusukela cineneni ca yindlu kala cibhabheni ca yindlu, kusuhani ni alati ni kusuhani ni yindlu, va randzela hosi. 11 Hi kulandzela, va no humesa a n’wana wa hosi+ va ta mu tlhateka a cidlodlo* ni Kustumunyu,*+ va mu maha hosi. Jehoyadha ni vana vakwe va no mu tota, va gumesa vaku: “Hosi, hanya nguvhu!”+

12 A cikhati leci Ataliya a ngazwa a guwa ga vanhu va nga tsutsuma-tsutsuma na va dhumisa hosi, i no tekela kuya ka vanhu lavo ndlwini ya Jehovha.+ 13 Ataliya i no wona hosi na yi yimile laha kusuhani ni pilari* gi nga hi laha nyangweni. A tihosana+ ni vabi va mimpundzu va wa hi zvin’we ni hosi. A vanhu vontlhe va lomu tikweni va wa kari va tsaka+ vaba mimpundzu; a vayimbeleli lava va nga hi ni zvibya zva ku chaya hi zvona muzka va wa rangela kuyimbeleleni ka tisimu ta kudhumisa. Hi kota ya lezvo, Ataliya i no handzula tinguwo takwe a banguleka, aku: “Cikungo co biha leco! Cikungo co biha leco!” 14 Kanilezvi mupristi Jehoyadha i no ruma a varangeli va mitlawa ya 100 wa vanhu, lava va nga yimisilwe a ku rangela a butho, aku kabye: “Mu humeseni lomu cikari ka vanhu. Ni wihi a to mu landzela mu dayeni hi cipadha!” Hakuva a mupristi i wa te: “Mu nga mu dayeli lomu ndlwini ya Jehovha.” 15 Hikwalaho, va no mu khoma. A cikhati leci va nga chikela Nyangweni ya Mahaxi, le ndlwini ya hosi,* va no tekela ku mu daya kwalaho.

16 Makunu Jehoyadha i no maha civhumelwano cikari kakwe ni vanhu vontlhe zvin’we ni hosi ca lezvaku va wa ta simama kuva vanhu va Jehovha.+ 17 Andzhako ka lezvo, a vanhu vontlhe va noya ndlwini* ya Bhaali va ya yi khungumulela+ va tlhela va fayetela a maalati yakwe ni zvifananiso zvakwe,+ va daya Matani, a mupristi wa Bhaali,+ mahlweni ka maalati. 18 Hi kulandzela, Jehoyadha i no nyikela a ntiro wa ku wonelela a yindlu ya Jehovha ka vapristi ni vaLevhi lava Dhavhidha a nga va yimisile hi mitlawa ndlwini ya Jehovha kasi va mahela Jehovha a miphahlo ya kuhiswa+ hi kuya hi lezvi zvi nga tsalilwe Nayweni wa Mosi+ na va zvi maha hi kutsaka, na va yimbelela kota lezvi Dhavhidha a nga leletele. 19 I no tlhela a yimisa a vagadhi va tinyangwa+ lomu tinyangweni ta yindlu ya Jehovha kasi ku nga ngheni a munhu wa ku hi ndlela yo kari a nga hlazvekangi. 20 Makunu Jehoyadha i no teka a varangeli va mitlawa ya 100 wa vanhu,+ ni tihosana, ni vafumeli va vanhu zvin’we ni vanhu vontlhe va lomu tikweni va heleketa a hosi na va sukela ndlwini ya Jehovha. Va no nghena hi nyangwa ya le hehla vaya ndlwini* ya hosi va ya yi tshamisa citshan’wini ca wuhosi ca mufumo.+ 21 Hikwalaho, a vanhu vontlhe va tiko va no tsaka, a dhoropa giva ni kurula hakuva va wa dele Ataliya hi cipadha.