Tihosi ta wumbiri
11 Makunu, a cikhati leci Ataliya,+ a mamani wa Ahaziya, a nga wona lezvaku a n’wana wakwe i file,+ i no suka a dayela vontlhe va laha lixakeni la wuhosi.*+ 2 Hambulezvo, Jehoxebha, a nhanyana wa hosi Jehoramu, a makabye wa Ahaziya, i no teka Jehowaxi,+ a n’wana wa Ahaziya, a mu yiva cikari ka vana va hosi lava va nga lava ku dawa, a ya mu fihla ni yayi* yakwe lomu kwartwini ya lomu cikari. Va no zvi kota ku fihla Jowaxi a nga kumiwi hi Ataliya, hikwalaho a nga dawangi. 3 I no tshama naye a 6 wa malembe, na a fihlele lomu ndlwini ya Jehovha, Ataliya na a kari a fumela tiko.
4 Hi lembe ga wu 7, Jehoyadha i no vitanisa a varangeli va mitlawa ya 100 wa masochwa ya vaKereti ni vagadhi* va yindlu ya wuhosi+ vata ndlwini ya Jehovha. I no maha civhumelwano navo, a va hlambanyisa ndlwini ya Jehovha, a gumesa a va komba a n’wana wa hosi.+ 5 I no va laya, aku: “Mahani lezvi: A cipandze ca wunharu ca n’wina ci wa tire hi sabhadho, ci wonelela khwatsi a yindlu* ya hosi.+ 6 A cipandze cin’wani ca wunharu ci tava laha Nyangweni ya Ciseketelo. A cipandze cin’wani ca wunharu ci tava nyangweni hi le ndzhako ka vagadhi va yindlu ya wuhosi. Mu ta cicana a ku wonelela a yindlu. 7 A mitlawa ya n’wina ya yimbiri leyi yi nga fanele ku nga tiri hi sabhadho yi ta wonelela khwatsi a yindlu ya Jehovha kasi ku vhikela a hosi. 8 Mu fanele ku randzela hosi matlhelweni wontlhe, a mun’we ni mun’wani na a khomile a matlhari yakwe canjeni gakwe. Ni wihi a to tsemakanya hi lomu cikari ka n’wina i ta dawa. Tshamani ni hosi ni kwihi yi toya kona.*
9 A varangeli va mitlawa ya 100+ wa vanhu va no maha zvalezvi mupristi Jehoyadha a nga va leletele. Hikwalaho, a mun’we ni mun’wani i no teka a vavanuna vakwe, lava va nga tira hi sabhadho ni lava va nga kala va nga tiri hi sabhadho vaya ka mupristi Jehoyadha.+ 10 Hi kulandzela, a mupristi i no teka matlhari ni zvitlhangu zva redhonda lezvi zvi nga hi zva hosi Dhavhidha, zvi nga vekilwe lomu ndlwini ya Jehovha, a nyika a varangeli va mitlawa ya 100 wa vanhu. 11 A vagadhi va yindlu ya wuhosi+ va no yima matshan’wini yabye, a mun’we ni mun’wani na a khomile a matlhari yakwe, kusukela cineneni ca yindlu kala cibhabheni ca yindlu, kusuhani ni alati+ ni kusuhani ni yindlu, va randzela hosi. 12 Makunu Jehoyadha i no humesa a n’wana wa hosi+ a mu tlhateka cidlodlo* ni Kustumunyu,*+ va mu maha hosi va tlhela va mu tota. Va no sangula kuba mandla, vaku: “Hosi, hanya nguvhu!”+
13 A cikhati leci Ataliya a ngazwa a guwa ga vanhu va nga tsutsuma-tsutsuma, i no tekela kuya ka vanhu lavo ndlwini ya Jehovha.+ 14 Ataliya i no wona a hosi na yi yimile laha kusuhani ni pilari kota mukhuwo wa kona.+ A tihosana ni vabi va mimpundzu+ va wa hi zvin’we ni hosi. A vanhu vontlhe va lomu tikweni va wa kari va tsaka vaba mimpundzu. Hi kota ya lezvo, Ataliya i no handzula a tinguwo takwe, a banguleka, aku: “Cikungo co biha leco! Cikungo co biha leco!” 15 Kanilezvi mupristi Jehoyadha i no ruma a varangeli va mitlawa ya 100 wa vanhu+ lava va nga yimisilwe a ku rangela a butho, aku kabye: “Mu humeseni lomu cikari ka vanhu. Ni wihi a to mu landzela mu dayeni hi cipadha! Hakuva a mupristi i wa te: “Mu nga mu dayeli lomu ndlwini ya Jehovha.” 16 Hikwalaho, va no mu khoma. A cikhati leci a nga chikela laha a mahaxi ma nghenako hi kona lomu ndlwini* ya hosi,+ va no mu daya laho.
17 Makunu Jehoyadha i no maha civhumelwano cikari ka Jehovha ni hosi ni vanhu+ lezvaku va wa ta simama kuva vanhu va Jehovha; i no maha civhumelwano kambe cikari ka hosi ni vanhu.+ 18 Andzhako ka lezvo, a vanhu vontlhe va noya ndlwini* ya Bhaali va ya khungumulela a maalati yakwe+ va tlhela va fayetela a zvifananiso zvakwe zvi ku bhi,+ va daya Matani, a mupristi wa Bhaali,+ mahlweni ka maalati.
Hi kulandzela, mupristi Jehoyadha i no yimisa a vawoneleli va yindlu ya Jehovha.+ 19 Ahandle ka lezvo, Jehoyadha i no teka a varangeli va mitlawa ya 100 wa vanhu,+ ni masochwa ya vaKereti, ni vagadhi va yindlu ya wuhosi,+ ni vanhu vontlhe va lomu tikweni kasi va heleketa a hosi kusukela ndlwini ya Jehovha kala ndlwini* ya hosi na va famba hi ndlela ya vagadhi va yindlu ya wuhosi. Makunu yona yi no tshama citshan’wini ca wuhosi ca tihosi.+ 20 Hikwalaho, a vanhu vontlhe va tiko va no tsaka, a dhoropa giva ni kurula hakuva va wa dele Ataliya hi cipadha le ndlwini ya hosi.
21 Jehowaxi+ i wa hi ni 7 wa malembe a cikhati leci a nga maha hosi.+