Isaya
63 Himani loyi a tako hi le Edhomi,+
A tako hi le Bhozra+ na a bohile a tinguwo ta mivala yo phatima?*
Himani yaloyi a bohileko a tinguwo to ngangamela,
A fambako ntan’wini wakwe wa hombe?
“Hi mina, loyi ndzi wulawulako hi kululama,
Ndzi nga ni ntamu wa hombe wa kuponisa.”
2 Hikuyini a tinguwo ta wena ti pswhukileko?
Hikuyini a tinguwo ta wena ti nge khwatsi ta lava va kamelako mauvha lomu cigowolweni?+
3 “Ndzi kamele vhinyo ndzoce.
A ku na munhu cikari ka matiko a nga hi na mina.
Ndzi no simama ku va kandzihetela zangeni ya mina,
Ndzi va fayetela khulweni ga mina.+
A tinguwo ta mina ti no tlhambuketelwa nkhata wabye,
Ndzi nyenyezisa a nguwo ya mina yontlhe.
4 Hakuva a siku ga kuphota gi lomu mbilwini ya mina,+
Niku a lembe ga ku tlhatlhisa a vanhu va mina gi chikele.
5 Ndzi no tshama ndzi cuwukela, kanilezvi ku wa nga hi na munhu wa ku ndzi vhuna;
Ndzi no hlamala hakuva ku wa nga hi na munhu wa ku ndzi seketela.
6 Ndzi kandzihetele matiko zangeni ya mina,
Ndzi va maha va popiwa hi khulo ga mina,+
Ndzi halata a nkhata wabye lahasi.”
7 Ndzi ta wulawula hi mitiro ya Jehovha ya lirandzo li nga mbheliko,
A mitiro ya Jehovha yo dzundzeka,
Hi kota ya zvontlhe lezvi Jehovha a hi maheleko,+
Ni zvilo zvo tala zva zvinene lezvi a maheleko a yindlu ya Izrayeli
Hi kuya hi wuxinji gakwe ni lirandzo lakwe la hombe li nga mbheliko.
8 Hakuva i te ngalo: “Hakunene vona vanhu va mina, a vana lava va to kala va nga tsiki kutsumbeka.”+
Hikwalaho, i nova Muhanyisi wabye.+
9 Zvikaratweni zvabye zvontlhe, i no karateka zvin’we navo.+
Ni cirun’wa cakwe* ci no va ponisa.+
Hi kota ya lezvi a nga kari a va randza ni ku va zwela wusiwana, i no va tlhatlhisa;+
I no va tlakula, a va rwala wontlhe a masiku ya kaleloko.+
10 Kanilezvi va no hluwuka+ va bayisisa a moya wakwe wo basa.+
11 Va no alakanya a masiku ya kale,
A masiku ya nandza gakwe Mosi, vaku:
“I kwihi Loyi a nga va humesa le bimbini+ ni varisi va ntlhambi wakwe?+
I kwihi Loyi a nga mu chela a moya Wakwe wo basa?+
12 Loyi a mahileko a woko gakwe go ngangamela gi famba zvin’we ni canja ga cinene ga Mosi,+
Loyi a avanyisileko a mati mahlweni kabye+
Kasi a ti mahela a vito ga kala kupindzuka ke?+
13 I kwihi loyi a nga va tsemakanyisa hi lomu matini ma kwatileko*
Kasi va famba va nga ti gumuli,
A ku fana ni haxi gi fambako laha libalangeni* ke?
14 A ku fana ni ntlhambi loku wu relela nkoveni,
A moya wa Jehovha wu va humutile.”+
15 Cuwuka lahasi na u hi le tilweni u zvi wona
Hi wutshan’wini ga wena gi tlakukileko, go basa ni go ngangamela.*
A wu ndzi kombangi.
16 Hakuva wena u Papayi wa hina,+
Hambu lezvi Abrahama a kalako a nga hi tivi,
Ni lezvi Izrayeli a kalako a nga hi alakanyi,
O Jehovha, wena u Papayi wa hina.
A vito ga wena hi wena Mutlhatlhisi wa hina wa kaleloko.+
17 O Jehovha, hikuyini u hi tsikako hi hambuka* tindleleni ta wena?
Hikuyini u tsikako a timbilu ta hina ti nonoha, kasi hi nga ku chavi?+
Wuya hi kota ya malandza ya wena,
A tixaka ta tshomba ya wena.+
18 A vanhu va wena va basileko va gile a tshomba ya tiko zva cikhatanyana.
A valala va hina va kandzihetele a wutshamu ga wena go basa.+
19 Hi tshamile cikhati co leha na hi ku khwatsi hi vanhu va ku cima a wu se va fumela,
Va ku cima a va se vitaniwa hi vito ga wena.