Kronekele wa wumbiri

21 Hi kugumesa, Jehoxafati i no etlela, a humula ni vakokwani vakwe, niku i no lahliwa ni vakokwani vakwe Dhoropeni ga Dhavhidha; a n’wana wakwe Jehoramu i no maha hosi cikhundleni cakwe.+ 2 A vamakabye vakwe, a vafana va Jehoxafati, kuve Azariya, na Jehiyeli, na Zakariya, na Azariya, na Mikayeli, na Xefatiya; vontlhe lava va wa hi vafana va Jehoxafati, a hosi ya Izrayeli. 3 A papayi wabye i wa va nyikile a prata yo tala, ni ouro yo tala, ni zvilo zva lisima kota zvinyikiwo, zvin’we ni madhoropa ma vhikelweko khwatsi le Judha;+ kanilezvi a mufumo i nyikile Jehoramu,+ hakuva hi yena a nga hi matewula.

4 Laha Jehoramu a nga amukele a mufumo wa papayi wakwe, i no tiyisa a citshamu cakwe hi ku daya a vamakabye vakwe vontlhe+ hi cipadha, zvin’we ni tihosana to kari ta ka Izrayeli. 5 Jehoramu i wa hi ni 32 wa malembe a cikhati leci a nga maha hosi niku i no fuma 8 wa malembe le Jerusalema.+ 6 I no famba ndleleni ya tihosi ta ka Izrayeli+ a ku fana ni lezvi zvi mahilweko hi va yindlu ya Ahabhi, hakuva i wa tekile a nhanyana wa Ahabhi ava sati wakwe.+ I no simama ku maha zvakubiha mahlweni ka Jehovha. 7 Kanilezvi Jehovha a nga zvi lavangi ku lovisa a yindlu ya Dhavhidha hi kota ya civhumelwano leci a nga ci mahile na Dhavhidha,+ hakuva i wa mu tsumbisile a ku mu nyika a kandiya contlhe cikhati, yena ni vana vakwe.+

8 Masikwini ya Jehoramu, Edhomi i no hluwukela Judha,+ a ti yimisela a hosi yakwe.+ 9 Hikwalaho, Jehoramu ni vakomandante vakwe va no famba ni tikareta takwe tontlhe. I no vhuka ni wusiku a hlasela a vaEdhomi lava va nga mu randzele ni vakomandante va tikareta. 10 Kanilezvi Edhomi wa ha simama ku hluwukela Judha kala ni nyamutlha lezvi. Libna+ yenawu i no mu hluwukela ka cikhati caleco, hakuva i wa tsikile Jehovha, a Nungungulu wa vakokwani vakwe.+ 11 Jehoramu i wa ti akele ni matshamu yo tlakuka+ le zvitsungeni zva Judha kasi ku va mahisa wubhayi ga moya a vaaki va Jerusalema a tlhela a hambukisa Judha.

12 Hi kugumesa, i no amukela mahungu ma tsalilweko na mata hi ka muphrofeti Elija,+ yaku: “Jehovha, a Nungungulu wa kokwani wa wena Dhavhidha, i ngalo: ‘Wena a wu fambangi tindleleni ta papayi wa wena Jehoxafati+ hambu tindleleni ta Asa,+ a hosi ya Judha. 13 Kanilezvi u famba hi ndlela ya tihosi ta ka Izrayeli+ niku u maha lezvaku Judha ni vahanyi va Jerusalema va maha wubhayi ga moya+ go fana ni legi ga yindlu ya Ahabhi.+ U zile u daya ni vamakabye va wena,+ a va ngango wa papayi wa wena, lava va nga hi chukwana ku hundza wena. 14 Hikwalaho, Jehovha i ta hlasela a vanhu va wena, ni vana va wena, ni vasati va wena, ni titshomba ta wena tontlhe. 15 Na wena u ta biwa hi mababyi yo tala, a ku patsa ni mababyi ya marumbu ya wena, lawa ma toya ma tshinga siku ni siku kala a marumbu ya wena ma huma lahandle.’”

16 Jehovha i no kucetela+ a vaFilistiya+ ni vaArabhiya+ lava va nga hi kusuhani ni vaEtiopia lezvaku va vhukela Jehoramu. 17 Hikwalaho, va no dhumela Judha, va nghena tikweni hi kani, va teka a titshomba tontlhe leti ti nga hi ndlwini* ya hosi,+ zvin’we ni vana vakwe ni vasati vakwe; i no sala na Jehoahaza* yece,+ a n’wana wakwe loyi wa ndzisana. 18 Andzhako ka zvontlhe lezvi, Jehovha i no muba lomu ka marumbu hi mababyi ma nga chumekiko.+ 19 Andzhako ka cikhati co kari, na ku hundzile malembe mambiri yo tala, a marumbu yakwe ma no huma hi kota ya mababyi yakwe a gumesa afa na a xaniseka nguvhu hi mababyi yakwe. Ni vanhu vakwe a va mu dzivelelangi ndzilo kulahliweni a ku fana ni lezvi va nga dzivelele a vakokwani vakwe.+ 20 I wa hi ni 32 wa malembe a cikhati leci a nga maha hosi, niku i no fuma a 8 wa malembe Jerusalema. I hava a nga rila a cikhati leci a ngafa. Hikwalaho, va no mu lahla Dhoropeni ga Dhavhidha,+ kanilezvi a va mu lahlangi lomu zvilahleni zva tihosi.+