Kronekele wa wumbiri

11 Laha Rehobhowamu a nga chikela Jerusalema, i no tekela ku hlengeleta a yindlu ya ka Judha ni ya ka Bhenjamini,+ 180 000 wa masochwa ma gondzisilweko kulwa,* kasi va yalwa ni va ka Izrayeli lezvaku va tlhelisela a mufumo ka Rehobhowamu.+ 2 Makunu a mhaka ya Jehovha yi nota ka Xemaya,+ a munhu wa Nungungulu wa lisine, yi taku: 3 “Byela Rehobhowamu, a n’wana wa Solomoni, a hosi ya Judha, ni vontlhe a vaIzrayeli va nga tikweni ga ka Judha ni ga ka Bhenjamini, uku: 4 ‘Jehovha i ngalo: “Mu nga kandzihi mu yalwa ni vamakabye va n’wina. A mun’we ni mun’wani i wa tlhele kaya kakwe hakuva hi mina ndzi nga zvi mahisa.”’”+ Hikwalaho, va no ingisa a mhaka ya Jehovha, va tlhela. A va ha yangi va yalwa na Jerobhowamu.

5 Rehobhowamu i no tshama Jerusalema niku i no aka a madhoropa ma vhikelweko khwatsi le Judha. 6 I no aka* Bhetlehema,+ na Etame, na Tekowa,+ 7 na Bhet-Zura, na Soko,+ na Adhulamu,+ 8 na Gati,+ na Marexa,+ na Zife, 9 na Adhorayime, na Lakixe,+ na Azeka,+ 10 na Zora, na Ayijaloni,+ na Hebroni,+ ma nga madhoropa ma vhikelweko khwatsi ma nga hi tikweni ga ka Judha ni ga ka Bhenjamini. 11 A ku tsika lezvo, i no tiyisa a matshamu ma vhikelweko khwatsi a tlhela a veka vakomandante ka wona, a ma nyika zvakuga, ni mafura, ni vhinyo, 12 ni ku hlomisa a madhoropa lawo wontlhe hi zvitlhangu zva hombe ni matlhari; i no ma tiyisa nguvhu. Judha na Bhenjamini va no simama kuva vakwe.

13 A vapristi ni vaLevhi lava va nga hi tikweni gontlhe ga Izrayeli va no yima naye, va huma hi matshan’wini yabye wontlhe. 14 A vaLevhi va no tsika a wuriselo gabye ni tshomba yabye+ vaya Judha ni Jerusalema, hakuva Jerobhowamu ni vana vakwe va wa va tsikisile ku tira kota vapristi va Jehovha.+ 15 Jerobhowamu i no ti yimisela a vapristi vakwe va matshamu ma tlakukileko,+ ni va madhimoni yo fana ni timbuti*+ ni va marole lawa a nga mahile.+ 16 Ni vanhu vontlhe va tixaka ta ka Izrayeli lava va nga hi ni mbilu yi longileko a ku hlota Jehovha, a Nungungulu wa Izrayeli, va no va landza vaya Jerusalema kasi va ya mu mahela miphahlo Jehovha, a Nungungulu wa vakokwani vabye.+ 17 Hi malembe manharu, va no tiyisa a wuhosi ga Judha ni ku seketela Rehobhowamu, a n’wana wa Solomoni, hakuva va no famba hi ndlela ya Dhavhidha ni ya Solomoni ndzeni ka malembe manharu.

18 Hi kulandzela, Rehobhowamu i no teka Mahalate, a nhanyana wa Jerimote, a n’wana wa Dhavhidha, a maha sati wakwe; a mamani wa Mahalate hi Abhihayili, a nhanyana wa Eliyabhe, a n’wana wa Jese.+ 19 Hi kufamba ka cikhati, i no mu pswalela a vana va vafana: Jewuxa, na Xemariya, na Zahama. 20 Andzhako kakwe, i no chadha na Maaka, a zukulu wa Absalome.+ Hi kufamba ka cikhati, Maaka i no mu pswalela Abhija,+ na Atayi, na Ziza, na Xelomite. 21 Rehobhowamu i wa randza nguvhu Maaka, a zukulu wa Absalome, a ku hundza vontlhe a vasati vakwe lava van’wani ni vasati vakwe va vatsongwani,*+ hakuva i wa tekile a 18 wa vasati ni 60 wa vasati lava va vatsongwani, niku i nova papayi wa 28 wa vafana ni 60 wa vanhanyana. 22 Hikwalaho, Rehobhowamu i no yimisa Abhija, a n’wana wa Maaka, kota hloko tlhelo murangeli wa vamakabye vakwe, hakuva i wa xuva ku mu maha hosi. 23 Hambulezvo, i no kombisa kuzwisisa, a rumela* a vokari va vana vakwe ka matshamu wontlhe ya tiko ga ka Judha ni ga ka Bhenjamini, ka madhoropa wontlhe ma vhikelweko khwatsi,+ a tlhela a va nyika zvilo zvo tala ni ku va lavela vasati vo tala.