Isaya

39 Ka cikhati leco, a hosi ya Bhabhuloni, Merodhake-Bhaladhani, a n’wana wa Bhaladhani, i no rumela a mapapilo ni cinyikiwo ka Hezekiya,+ hakuva i wa zwile lezvaku i wa babyile a gumesa a hanya.+ 2 Hezekiya i no va amukela hi kutsaka* a va komba a yindlu yakwe ya titshomba+ — a prata, ni ouro, ni mafura ya bhalsamu, ni man’wani mafura ya lisima, ni matlhari yakwe wontlhe, ni zvontlhe lezvi zvi nga hi lomu ka matshamu yakwe yo veketela kona titshomba. A ku na nchumu lomu ndlwini* yakwe ni lomu mufun’weni wakwe wontlhe lowu Hezekiya a nga kala ku va komba.

3 Andzhako ka lezvo, muphrofeti Isaya i nota ka hosi Hezekiya a ta mu wutisa, aku: “Zvini lezvi a vavanuna lava va nga wula? Kona vata hi kwihi?” Hezekiya aku: “Vata hi tikweni ga le kule, hi Bhabhuloni.”+ 4 Hi kulandzela, Isaya i no wutisa, aku: “Zvini va nga zvi wona lomu ndlwini* ya wena?” Hezekiya a hlamula, aku: “Va wonile zvontlhe lezvi zvi nga lomu ndlwini* ya mina. Ci hava ndzi nga kala ku va komba ci nga lomu tshombeni ya mina.”

5 Makunu Isaya i no byela Hezekiya, aku: “Zwana a gezu ga Jehovha wa mabutho: 6 ‘Mata masiku, laha zvontlhe zvi nga ndlwini* ya wena ni zvontlhe lezvi a vakokwani va wena va zvi hlengeleteleko kala nyamutlha zvi to tekiwa zvi yisiwa Bhabhuloni. Ci hava ci to sala’,+ ku wula Jehovha.+ 7 ‘Ka vana u to pswala, a vokari va ta tekiwa va ya maha tihosana lomu ndlwini ya wuhosi ya hosi ya Bhabhuloni.’”+

8 Makunu Hezekiya i no byela Isaya, aku: “A mhaka ya Jehovha leyi u nga wula yi nene.” A tlhela aku: “Hakuva ku tava ni kurula ni kutshamiseka* masikwini wontlhe ya kuhanya ka mina.”+