GENESISI

1 A kusanguleni, Nungungulu i no vanga matilo ni misava.+

2 A misava yi wa nga hi na ciwumbeko niku yi wa nga hi na nchumu; ku wa hi ni munyama hehla ka mati yo eta,+ niku a moya* wa Nungungulu+ wu wa fambafamba hehla ka mati.+

3 Nungungulu aku: “A kuve ni kuwonekela.” A kuwonekela+ ku seva kona. 4 Andzhako ka lezvo, Nungungulu i no wona lezvaku a kuwonekela ku sasekile; Nungungulu i no sangula ku hambanisa a kuwonekela ni munyama. 5 Nungungulu i no chula a kuwonekela aku i Mumu, a munyama a wu chula ku Wusiku.+ Gi no phuma gi gumesa gica, kuva siku go sangula.

6 Nungungulu aku: “A kuve ni pfhuka+ cikari ka mati, kuva ni kuavanyeka cikari ka mati ni mati.”+ 7 Andzhako ka lezvo, Nungungulu i no vanga pfhuka a hambanisa a mati ya lahasi ka pfhuka ni mati ya le hehla ka pfhuka.+ Zvi no mahisa zvezvo. 8 Nungungulu i no chula a pfhuka aku i Tilo. Gi no phuma gi gumesa gica, kuva siku ga wumbiri.

9 Nungungulu aku: “A mati lawa ma nga lahasi ka matilo ma wa hlengeletane ka wutshamu gin’we, kuva ni wutshamu go woma.”+ Zvi no mahisa zvezvo. 10 Nungungulu i no chula a wutshamu go woma aku Misava,+ kanilezvi a mati ma hlengeleteneko i no ma chula ku Mabimbi.+ Nungungulu i no wona lezvaku zvi sasekile.+ 11 Nungungulu aku: “A misava yi wa milise byanyi, ni tisinya ti humesako mbewu, ni tisinya ta mihandzu hi tixaka ta tona; ti wa pswale mihandzu ti tlhela ti humesa mbewu laha misaveni.” Zvi no mahisa zvezvo. 12 A misava yi no sangula ku milisa byanyi, ni tisinya ti humesako mbewu,+ ni tisinya ti pswalako a mihandzu ni ku humesa mbewu, hi tixaka ta tona. Nungungulu i no wona lezvaku zvi sasekile. 13 Gi no phuma gi gumesa gica, kuva siku ga wunharu.

14 Nungungulu aku: “A kuve ni zviwoningo+ laha pfhukeni wa matilo kasi zvi hambanisa a mumu ni wusiku;+ zvi ta komba* tinguva, ni masiku, ni malembe.+ 15 Zvi ta woningela misava na zvi hi le pfhukeni wa matilo.” Zvi no mahisa zvezvo. 16 Nungungulu i no maha a zviwoningo zvimbiri zva hombe: A ciwoningo leci ca hombe kasi ci fumela hlikanhi,+ leci ca citsongwani ci fumela wusiku; i no maha ni tinyeleti.+ 17 Hikwalaho, Nungungulu i no zvi yimisa le pfhukeni wa matilo kasi zvi woningela misava 18 ni ku fumela a mumu ni wusiku zvi tlhela zvi hambanisa a kuwonekela ni munyama.+ Nungungulu i no wona lezvaku zvi sasekile. 19 Gi no phuma gi gumesa gica, kuva siku ga wumune.

20 Nungungulu aku: “A mati a mave ni zvivangwa* zvo tala zvi hanyako; a zvivangwa zvi hahako zvi wa purume hehla ka misava, laha pfhukeni wa matilo.”*+ 21 Nungungulu i no vanga a zvivangwa zva hombe zva lomu bimbini, ni zvontlhe zvivangwa zvi hanyako lomu matini zvi fambako hi mitlawa, hi tixaka ta zvona, ni zvontlhe a zvivangwa zvi hanyako zvi nga ni tipapa, hi tixaka ta zvona. Nungungulu i no wona lezvaku zvi sasekile. 22 Nungungulu i no zvi katekisa, aku: “Pswalani, mu andza, mu tata a mati ya bimbi,+ ni zvivangwa lezvi zvi hahako zvi wa andze laha misaveni.” 23 Gi no phuma gi gumesa gica, kuva siku ga wuntlhanu.

24 Nungungulu aku: “A misava yi wa humese a zvivangwa zvi hanyako, hi tixaka ta zvona: A zvifuyo, ni zvikokakoka,* ni zvihari zva khwati, hi tixaka ta zvona.”+ Zvi no mahisa zvezvo. 25 Nungungulu i no vanga zvihari zva laha misaveni, hi tixaka ta zvona; ni zvifuyo, hi tixaka ta zvona; ni zvikokakoka zvontlhe zva laha misaveni, hi tixaka ta zvona. Nungungulu i no wona lezvaku zvi sasekile.

26 Nungungulu aku: “A hi+ mahe munhu hi mufananiso wa hina,+ a fana na hina.+ Vona va ta fumela a tinjhanjhi ta lomu bimbini, ni zvivangwa zvi hahako zva matilo, ni zvifuyo, ni misava yontlhe, ni zvontlhe zvikokakoka lezvi zvi fambako laha misaveni.”+ 27 Nungungulu i no vanga munhu hi mufananiso wakwe, a mu vanga a fana naye; i no vanga wanuna ni wasati.+ 28 Nungungulu i no va katekisa ni ku va byela, aku: “Pswalani, mu andza, mu tata misava+ mu yi fumela,+ mu tlhela mu fumela+ tinjhanjhi ta lomu bimbini, ni zvivangwa zvi hahako zva matilo, ni zvontlhe zvivangwa zvi hanyako lezvi zvi fambako laha misaveni.”

29 Nungungulu aku: “Ndza mu nyika tontlhe a tisinya leti ti humesako mbewu, ti nga misaveni yontlhe, ni tisinya tontlhe ti pswalako mihandzu yi nga ni mbewu. A zvive zvakuga zva n’wina.+ 30 A zvihari zvontlhe zva laha misaveni, ni zvontlhe zvivangwa zvi hahako zva matilo, ni zvontlhe lezvi zvi fambako laha misaveni lezvi zvi nga ni wutomi,* ndza zvi nyika tisinya tontlhe to nyuka kota zvakuga.”+ Zvi no mahisa zvezvo.

31 Andzhako ka lezvo, Nungungulu i no wona lezvaku zvontlhe lezvi a nga zvi vangile zvi wa sasekile nguvhu.+ Gi no phuma gi gumesa gica, kuva siku ga wu 6.

2 Hi ndlela leyo, a matilo ni misava ni zvontlhe zvi nga ka zvona* zvi no mbhela ku vangiwa.+ 2 Hi siku ga wu 7, Nungungulu i wa mbhetile a ntiro lowu a nga kari a wu maha; i no sangula ku humula hi siku ga wu 7 ka mitiro yakwe yontlhe leyi a nga kari a yi maha.+ 3 Nungungulu i no katekisa a siku ga wu 7, a gi yimisa kota siku go basa, hakuva ka siku legi, Nungungulu i kari a humula ka mitiro yakwe yontlhe ya ku vanga. Nungungulu i wa vangile zvontlhe lezvi a nga mahile makungo ya ku zvi vanga.

4 Lawa matimu ya kuvangiwa ka matilo ni misava, a cikhati leci zvi nga vangiwa hi cona, ka siku legi Jehovha* Nungungulu a nga maha misava ni tilo.+

5 Ku wa nga se mila byanyi laha misaveni, ne hambu a tisinya ta khwati ti wa nga se sangula ku mila, hakuva Jehovha Nungungulu i wa nga se nisa vhula laha misaveni niku ku wa nga hi na munhu wa ku rima misava. 6 Kanilezvi ku wa huma hunguva laha misaveni yi tsakamisa misava yontlhe.

7 Hi kulandzela, Jehovha Nungungulu i no wumba munhu hi ntshuri+ wa misava, a mu pupuxela a moya wa wutomi+ tinhovhini takwe, ni munhu i nova civangwa* ci hanyako.+ 8 Ahandle ka lezvo, Jehovha Nungungulu i no byala a jardhim lomu Edheni,+ hi le mutsuwuka-gambo; i no veka kona a munhu loyi a nga mu mahile.+ 9 Jehovha Nungungulu i no milisa laha misaveni a tisinya tontlhe to saseka na ti hi tinene kasi ku giwa, a ku patsa ni sinya ya wutomi+ laha cikari ka jardhim, ni sinya ya ku tiva zvazvinene ni zvakubiha.+

10 Ku wa hi ni congo wu nga khulunga wu huma hi lomu Edheni kasi wu tsakamisa a jardhim; hi laho, wu no pandza ku huma a mune wa micongo.* 11 A vito ga congo wo sangula i Pixoni, lowu wu rendzelekako a tiko gontlhe ga Havhila, lomu ku nga ni ouro. 12 A ouro ya tiko lego yi nene. Kwaseyo ku na ni hlakati ya bhedhelio ni ribye ga onikisi. 13 A vito ga congo wa wumbiri i Gihoni, lowu wu rendzelekako a tiko gontlhe ga Kuxe. 14 A vito ga congo wa wunharu i Hidhekeli,*+ lowu wu khulungako wuya mutsuwuka-gambo wa Asiriya.+ A congo wa wumune i Eufrate.+

15 Jehovha Nungungulu i no teka munhu a mu veka lomu jardhim ya Edheni kasi a yi rima ni ku yi hlayisa.+ 16 Ahandle ka lezvo, Jehovha Nungungulu i no laya munhu, aku: “U ngaga a mihandzu ya tisinya tontlhe ta lomu jardhim hi kutlhatlheka.+ 17 Kanilezvi a mihandzu ya sinya ya ku tiva zvazvinene ni zvakubiha u ngagi, hakuva a siku legi u toga hakunene u tafa.”+

18 Hi kulandzela, Jehovha Nungungulu i te ngalo: “A zvi saseki ku a wanuna a tshama yece; ndzi ta mu mahela a muvhuneteli wo kota yena.”+ 19 Jehovha Nungungulu i wa mahile a zvihari zvontlhe zva khwati ni zvontlhe zvivangwa zvi hahako zva matilo hi ntshuri wa misava; i no zvi yisa ka munhu kasi a wona ku a cin’we ni cin’wani i ta ci vitanisa kuyini. Lezvi a munhu a nga ci vitanisa zvona a civangwa* cin’we ni cin’wani ci hanyako, galego gi wa maha a vito ga cona.+ 20 Makunu a munhu i no zvi chula mavito a zvifuyo zvontlhe, ni zvontlhe zvivangwa zvi hahako zva matilo, ni zvihari zvontlhe zva khwati, kanilezvi a munhu i wa nga se mahelwa a muvhuni wo kota yena. 21 Hikwalaho, Jehovha Nungungulu i no etlelisa wanuna a wurongo ga tshongotshongo; na a etlele, i no susa lin’we la timbambu takwe a gumesa a tlhelisa nyama wutshan’wini ga yona. 22 Jehovha Nungungulu i no maha wasati hi limbambu leli a nga li susile ka wanuna a gumesa a mu tisa ka wanuna.+

24 Hi cigelo leco, a wanuna i ta siya papayi wakwe ni mamani wakwe a namarela ka* sati wakwe, vona va tava nyama yin’we.+ 25 Hi wumbiri gabye, a wanuna ni sati wakwe, va no simama na va hi zvimbyiri,+ hambulezvo va wa nga dhani.

3 A nyoka+ yi wa hi yona yo tlhariha* nguvhu a ku hundza zvontlhe a zvihari zva khwati lezvi Jehovha Nungungulu a nga zvi vangile. Hikwalaho, yi te ngalo ka wasati: “Hakunene Nungungulu i wulile lezvaku mu ngagi a mihandzu ya tisinya tontlhe ti nga lomu jardhim ke?”+ 2 Zvalezvo a wasati i te ngalo ka nyoka: “Hi ngaga a mihandzu ya tisinya ti nga lomu jardhim.+ 3 Kanilezvi xungetano hi handzu wa sinya leyi yi nga laha cikari ka jardhim,+ Nungungulu i te: ‘Mu ngagi ne hambu ku wu henya, hakuva loku mu maha lezvo mu tafa.’” 4 A nyoka yiku ngalo ka wasati: “Mu nga tafa futsi.+ 5 Hi lezvaku Nungungulu wa zvi tiva ku ka siku galegi mu toga, a mahlo ya n’wina ma ta vhululeka mu fana na Nungungulu, mu tiva zvazvinene ni zvakubiha.”+

6 Hi kota ya lezvo, a wasati i no wona lezvaku a sinya yi wa sasekile a kuva yi giwa ni lezvaku ya koka mahlo, ina, a sinya yi wa tsakisa a ku yi cuwuka. Hikwalaho, i no khaya a handzu wa kona, a sangula kuga.+ Andzhako ka lezvo, i no nyika ni nuna wakwe a cikhati leci va nga hi zvin’we, yenawu a sangula kuga.+ 7 Zvalezvo a mahlo ya vona vambiri ma no vhululeka va pola lezvaku a va bohangi nchumu. Hikwalaho, va no runga matluka ya nkuwu va fenengeta a wumbyiri gabye.*+

8 Hi ndzhako ka cikhati, va nozwa a gezu ga Jehovha Nungungulu na a fambafamba lomu jardhim hi cikhati leci ku bako a zvimoyana zva kutitimela.* A wanuna ni sati wakwe va no fihlala a nghohe ya Jehovha Nungungulu lomu cikari ka tisinya ta jardhim. 9 Jehovha Nungungulu i no vitana wanuna hi kuphindaphinda, aku: “Kasi u kwihi?” 10 Hi kugumesa, i no hlamula, aku: “Ndzi zwile a gezu ga wena lomu jardhim kanilezvi ndzi no chava hakuva ndzi wa hi cimbyiri, hikwalaho, ndzi no fihlala.” 11 Nungungulu aku: “Himani a nga ku byela ku u cimbyiri?+ U noga a handzu wa sinya leyi ndzi ngaku u ngagi ke?”+ 12 A wanuna aku: “A wasati loyi u nga ndzi nyika kasi ava zvin’we na mina hi yena a nga ndzi nyika handzu wa sinya, hikwalaho ndzi noga.” 13 Makunu Jehovha Nungungulu i no wutisa wasati, aku: “U zvi mahele yini lezvi ke?” A wasati a hlamula, aku: “I nyoka yi nga ndzi kalavela ndziga.”+

14 Hi kulandzela, Jehovha Nungungulu i no byela a nyoka,+ aku: “Kota lezvi u mahileko lezvi, u rukatelwe cikari ka zvifuyo zvontlhe ni cikari ka zvihari zvontlhe zva khwati. U ta famba hi khwiri, uga ntshuri masiku wontlhe ya kuhanya ka wena. 15 Ndzi ta veka wulala*+ cikari ka wena+ ni wasati,+ ni cikari ka pswalo* wa wena+ ni pswalo* wa wasati.+ Yena i ta ku gandla* hloko,+ wena u ta mu luma cirendze.”+

16 Ka wasati aku ngalo: “Ndzi ta ku engetelela a kubayisa laha u to xura nyimba; u ta pswala vana hi kubayisa niku u ta zvi xuva nguvhu a ku tshama ni nuna wa wena, na yena i ta ku fumela.”

17 Ka Adhamu* aku ngalo: “Kota lezvi u nga ingisa a gezu ga sati wa wena, uga a handzu wa sinya leyi ndzi nga ku layile,+ ndziku: ‘U ngagi’, a misava yi rukatelwe hi kota ya wena.+ U taga mihandzu ya kona hi kubayisa wontlhe masiku ya kuhanya ka wena.+ 18 A misava yi ta ku milisela a mimizwa ni mahlehlo niku u taga zvimilwa zva lomu khwatini. 19 U taga zvakuga hi nyuko wa nghohe ya wena kala u tlhelela misaveni, hakuva u humesilwe ka yona.+ Wena u ntshuri, u ta tlhelela ntshurini.”+

20 Andzhako ka lezvo, Adhamu i no chula a sati wakwe aku hi Evha,* hakuva i wa tava mamani wa vontlhe lava va hanyako.+ 21 Jehovha Nungungulu i no maha a tinguwo to leha hi bhebhe, a mahela Adhamu ni sati wakwe, kasi a va bohisa.+ 22 Hi kulandzela, Jehovha Nungungulu i te ngalo: “Makunu a munhu wa fana na hina, wa tiva zvazvinene ni zvakubiha.+ Kasi a nga nawuluti a canja gakwe a khaya kambe ni handzu wa sinya ya wutomi+ aga a hanya kala kupindzuka, . . .” 23 Jehovha Nungungulu i no mu hlongola lomu jardhim ya Edheni+ kasi a ya rima misava leyi a nga humesilwe ka yona.+ 24 Hikwalaho, i no hlongola wanuna a gumesa a veka a makerubhima+ hi le mutsuwuka-gambo wa jardhim ya Edheni ni cipadha ci vhurako ci nga tshama hi ku ndziwilikela, kasi ku wonelela a ndlela ya kuya sinyeni ya wutomi.

4 Makunu Adhamu i no hlengela masango ni sati wakwe Evha, Evha a xura nyimba.+ A cikhati leci Evha a nga pswala Kana,+ i te ngalo: “Ndzi pswalile mufana hi ku vhuniwa hi Jehovha.” 2 Hi kufamba ka cikhati, Evha i no pswala Abheli,+ a makabye wa Kana.

Abheli i nova murisi wa mitlhambi, kanilezvi Kana i nova murimi wa misava. 3 Hi ndzhako ka cikhati, Kana i no neha mihandzu yo kari ya misava kota munyikelo ka Jehovha. 4 Abheli i no neha a zvifuyo zvo kari zva matewula zva ntlhambi wakwe,+ zvin’we ni mafura ya zvona. Jehovha i no xalaliswa hi Abheli ni munyikelo wakwe,+ 5 kanilezvi a nga xalaliswangi ne ni kutsongwani hi Kana ni munyikelo wakwe. Hikwalaho, Kana i no vhindluka hi zanga, a tsuva. 6 Jehovha i no wutisa Kana, aku: “Hikuyini u zangarileko nguvhu u tlhela u tsuva? 7 Loku u cica u maha zvazvinene, u nga ta tlhela u tlakuswa* ke? Kanilezvi loku u nga cici u maha zvazvinene, a ciwonho ca xiyelela laha nyangweni niku ci xuva ku ku fumela; u ta zvi kota ku ci hlula ke?”

8 Andzhako ka lezvo, Kana i no byela makabye wakwe Abheli, aku: “A hi fambe masin’wini.” A cikhati leci va nga hi masin’wini, Kana i no jikela makabye wakwe Abheli, a mu daya.+ 9 Hi ndzhako ka cikhati, Jehovha i no wutisa Kana, aku: “I kwihi makabye wa wena Abheli?” Kana aku: “A ndzi zvi tivi. Ndzova mugadhi wa makabye wa mina ke?” 10 Nungungulu aku: “Zvini u mahileko? Zwana lezvi! A nkhata wa makabye wa wena wa rila ka mina hi misaveni.+ 11 Makunu u rukatelwe u tlhela u hlongoliwa laha misaveni leyi yi ahlamulileko a nomu wa yona kasi yi amukela a nkhata wa makabye wa wena hi canjeni ga wena.+ 12 Loku u rima misava yi nga ta ku humesela a mihandzu* ya yona. U tava mupepetseki ni mufambafambi laha misaveni.” 13 Hi kota ya lezvo, Kana i no byela Jehovha, aku: “A tsayiselelo wa cigoho ca mina wa bindza a ku hundza a ntamu wa mina. 14 Nyamutlha wo ndzi hlongola laha misaveni;* ndzi ta fihlala a nghohe ya wena. Ndzi tava mupepetseki ni mufambafambi laha misaveni niku ni wihi loyi a to ndzi kuma i ta ndzi daya.” 15 Makunu Jehovha aku ngalo kakwe: “Hi cigelo leco, ni wihi loyi a to daya Kana i ta tsayiswa 7 wa makhati.”

Hikwalaho, Jehovha i no vekela* cikombiso ka Kana kasi a nga dawi hi munhu. 16 Hi kulandzela, Kana i no suka mahlweni ka Jehovha a ya aka tikweni ga Wukhumbi,* hi le mutsuwuka-gambo wa Edheni.+

17 Andzhako ka lezvo, Kana i no hlengela masango ni sati wakwe,+ a sati wakwe a xura nyimba a pswala Enoki. Kana i no sangula ku aka dhoropa a gi chula ku Enoki, gi nga vito ga n’wana wakwe. 18 Hi kufamba ka cikhati, Enoki i nova papayi wa Iradhe. Iradhe i nova papayi wa Mehujayeli, Mehujayeli ava papayi wa Metuxayeli, na Metuxayeli ava papayi wa Lameke.

19 Lameke i no teka vasati vambiri. A vito ga loyi wo sangula hi Adha, a wa wumbiri hi Zila. 20 Adha i no pswala Jabhale. Hi yena a nyapandze wa lava va hanyako lomu matendeni na va hi ni mitlhambi. 21 A vito ga makabye wakwe ku wa hi Jubhale. Hi yena a nyapandze wa vontlhe lava va chayako zvitende ni zvitoliya. 22 Zila yenawu i no pswala Tubhal-Kayini, loyi a nga hi mubethi wa tixaka tontlhe ta zvilo zva kobre ni zva simbi. A makabye wa cisati wa Tubhal-Kayini ku wa hi Naama. 23 Lameke i no tsamba magezu lawa, a byela vasati vakwe, Adha na Zila, aku:

25 Adhamu i no tlhela a hlengela masango ni sati wakwe Evha, Evha a xura nyimba a pswala mufana. Evha i no mu chula ku hi Sete,*+ hakuva i waku: “Nungungulu i ndzi yimisele n’wana* mun’wani wa ku vhaleta Abheli, hakuva Kana i mu dele.”+ 26 Sete yenawu i no pswalelwa mufana, a mu chula ku hi Enoxi.+ Ka cikhati leco, a vanhu va no sangula ku vitana a vito ga Jehovha.

5 Legi i bhuku ga matimu ya Adhamu. Ka siku legi Nungungulu a nga vanga Adhamu, i no mu maha a fana na Nungungulu.+ 2 I no vanga wanuna ni wasati.+ Ka siku legi va nga vangiwa,+ i no va katekisa, a va chula ku vanhu.*

3 Adhamu i no hanya 130 wa malembe. Andzhako ka lezvo, i no pswala mufana wo fana naye, ava mufananiso wakwe, a mu chula ku hi Sete.+ 4 Andzhako ka ku pswala Sete, Adhamu i no hanya 800 wa malembe. I nova papayi wa vafana ni vanhanyana. 5 Makunu a masiku wontlhe ya kuhanya ka Adhamu ma nova 930 wa malembe, a gumesa afa.+

6 Sete i no hanya 105 wa malembe, ava papayi wa Enoxi.+ 7 Andzhako ka ku pswala Enoxi, Sete i no hanya 807 wa malembe. I nova papayi wa vafana ni vanhanyana. 8 Makunu a masiku wontlhe ya kuhanya ka Sete ma nova 912 wa malembe, a gumesa afa.

9 Enoxi i no hanya 90 wa malembe, ava papayi wa Kenani. 10 Andzhako ka ku pswala Kenani, Enoxi i no hanya 815 wa malembe. I nova papayi wa vafana ni vanhanyana. 11 Makunu a masiku wontlhe ya kuhanya ka Enoxi ma nova 905 wa malembe, a gumesa afa.

12 Kenani i no hanya 70 wa malembe, ava papayi wa Mahalaleli.+ 13 Andzhako ka ku pswala Mahalaleli, Kenani i no hanya 840 wa malembe. I nova papayi wa vafana ni vanhanyana. 14 Makunu a masiku wontlhe ya kuhanya ka Kenani ma nova 910 wa malembe, a gumesa afa.

15 Mahalaleli i no hanya 65 wa malembe, ava papayi wa Jaredhe.+ 16 Andzhako ka ku pswala Jaredhe, Mahalaleli i no hanya 830 wa malembe. I nova papayi wa vafana ni vanhanyana. 17 Makunu a masiku wontlhe ya kuhanya ka Mahalaleli ma nova 895 wa malembe, a gumesa afa.

18 Jaredhe i no hanya 162 wa malembe, ava papayi wa Enoki.+ 19 Andzhako ka ku pswala Enoki, Jaredhe i no hanya 800 wa malembe. I nova papayi wa vafana ni vanhanyana. 20 Makunu a masiku wontlhe ya kuhanya ka Jaredhe ma nova 962 wa malembe, a gumesa afa.

21 Enoki i no hanya 65 wa malembe, ava papayi wa Metusela.+ 22 Andzhako ka ku pswala Metusela, Enoki i no simama ku famba na Nungungulu wa lisine* hi 300 wa malembe. I nova papayi wa vafana ni vanhanyana. 23 Makunu a masiku wontlhe ya kuhanya ka Enoki ma nova 365 wa malembe. 24 Enoki i no simama ku famba na Nungungulu wa lisine.+ Andzhako ka lezvo, i no n’walala, hakuva Nungungulu i no mu teka.+

25 Metusela i no hanya 187 wa malembe, ava papayi wa Lameke.+ 26 Andzhako ka ku pswala Lameke, Metusela i no hanya 782 wa malembe. I nova papayi wa vafana ni vanhanyana. 27 Makunu a masiku wontlhe ya kuhanya ka Metusela ma nova 969 wa malembe, a gumesa afa.

28 Lameke i no hanya 182 wa malembe, a pswala mufana. 29 I no mu chula ku hi Nowa,*+ aku: “Loyi i ta hi chavelela, a hi humuta mitirweni ya hina ni ka mitiro yo bindza ya mandla ya hina yi vangiwako hi misava leyi Jehovha a yi rukateleko.”+ 30 Andzhako ka ku pswala Nowa, Lameke i no hanya 595 wa malembe. I nova papayi wa vafana ni vanhanyana. 31 Makunu a masiku wontlhe ya kuhanya ka Lameke ma nova 777 wa malembe, a gumesa afa.

32 Andzhako ka loku Nowa a tlhanganisile 500 wa malembe, i nova papayi wa Xemi,+ na Hamu+ na Jafete.+

6 Makunu laha a vanhu va nga sangula ku talelana laha misaveni va tlhela va pswala a vanhanyana, 2 a vana va Nungungulu wa lisine*+ va no sangula ku wona lezvaku a vanhanyana va vanhu va sasekile. Hikwalaho, va no teka vontlhe lava va nga va hlawula va maha vasati vabye. 3 Jehovha aku: “A moya wa mina wu nga ta timisela munhu kala kupindzuka,+ hakuva yena i nyama ntsena.* Hikwalaho, a masiku yakwe ma tava* 120 wa malembe.”+

4 Masikwini lawo ni ndzhako ka wona, ku wa hi ni vaNefelime* laha misaveni. Ka cikhati leco, a vana va Nungungulu wa lisine va no simama ku hlengela masango ni vanhanyana va vanhu, niku vona va no va pswalela vana. A vana lavo va wa hi tinhenha ta ntamu ta kaleloko, a vavanuna va nduma.

5 Hi kota ya lezvo, Jehovha i no wona lezvaku a kubiha ka munhu ku wa hi ka hombe laha misaveni ni lezvaku wontlhe a maalakanyo ya mbilu yakwe ma wa bihile contlhe cikhati.+ 6 Jehovha i no ti laya hi lezvi a vangileko vanhu laha misaveni, a bayiseka mbilwini yakwe.+ 7 Hikwalaho, Jehovha i te ngalo: “Ndzi ta lovisa vanhu lava ndzi va vangileko laha misaveni — a vanhu zvin’we ni zvifuyo, ni zvikokakoka* ni zvivangwa zvi hahako zva matilo — hakuva ndza ti laya hi kuva ndzi zvi vangile.” 8 Kanilezvi Nowa i no kuma thomo mahlweni ka Jehovha.

9 Lawa matimu ya Nowa:

Nowa i wa hi wanuna wo lulama.+ I wa nga hi na nandzu cikari ka vanhu va cikhatini cakwe.* Nowa i no famba na Nungungulu wa lisine.+ 10 Hi kufamba ka cikhati, Nowa i nova papayi wa vafana vanharu: Xemi, na Hamu na Jafete.+ 11 Kanilezvi a misava yi wa wonhekile mahlweni ka Nungungulu wa lisine niku yi wa tele hi tihanyi. 12 Ina, Nungungulu i no cuwuka misava a wona lezvaku yi wonhekile;+ a vanhu* vontlhe va wa wonhile a tindlela tabye laha misaveni.+

13 Andzhako ka lezvo, Nungungulu i no byela Nowa, aku: “Ndzi bohile ku lovisa nyama yontlhe, hakuva a misava yi tele hi tihanyi hi kota yabye; hikwalaho, ndzi ta va lovisa zvin’we ni misava.+ 14 Ti akele taru* hi mapulango ya sinya ya goferi.+ U ta maha tikwartu lomu tarwini u gi bhama hi likatarawu,*+ lomu ndzeni ni lahandle. 15 Gi akise lezvi: A taru gi fanele kuva ni 300 wa mikono* a kuleha, ni 50 wa mikono a kuanama, ni 30 wa mikono a kutlakuka. 16 U ta maha janela ga nkono wun’we a kusukela hehla kasi ku wonekela* lomu tarwini. U ta maha nyangwa ya taru hi laha tlhelweni ga gona.+ U ta gi maha na gi hi ni yindlu ya lahasi, ni andari yo sangula, ni andari ya wumbiri.

17 “Mina ndzi ta neha a vhula ya ndambi+ hehla ka misava kasi yi ta lovisa a nyama yontlhe yi nga lahasi ka matilo leyi yi nga ni moya wa wutomi. Zvontlhe zvi nga laha misaveni zvi ta lova.+ 18 Ndza maha civhumelwano na wena; u ta nghena lomu tarwini ni vana va wena, ni sati wa wena, ni vasati va vana va wena.+ 19 Niku ka tixaka tontlhe ta zvivangwa zvi hanyako,+ u ta nghenisa zvimbiri-zvimbiri lomu tarwini, matsune ni kati,+ kasi zvi pona zvin’we na wena; 20 ka zvivangwa zvi hahako hi tixaka ta zvona, ni ka zvifuyo hi tixaka ta zvona, ni ka zvikokakoka zvontlhe zva laha misaveni hi tixaka ta zvona, u ta teka zvimbiri-zvimbiri kasi zvi pona.+ 21 U fanele ku hlengeletela a tixaka tontlhe ta zvakuga+ u nghena nazvo lomu tarwini kasi zviva zvakuga zva wena ni zva zvihari.”

22 Nowa i no maha zvontlhe lezvi Nungungulu a nga mu leletele. I no zvi mahisa zvalezvo.+

7 Andzhako ka lezvo, Jehovha i no byela Nowa, aku: “Nghena lomu tarwini ni wontlhe ngango wa wena, hakuva cikari ka cizukulwana leci hi wena wece ndzi ku wonileko na u lulamile mahlweni ka mina.+ 2 Ka tixaka tontlhe ta zvihari zvo hlazveka, u ta teka 7*+ u nghena nazvo lomu tarwini, a matsune ni kati; kanilezvi ka zvihari zvontlhe zvi nga hlazvekangiko, teka zvimbiri basi, a matsune ni kati; 3 ni ka zvivangwa zvi hahako zva tilo u ta teka 7,* a matsune ni kati, kasi a mbewu ya kona yi fela ku pona misaveni yontlhe.+ 4 Hakuva andzhako ka 7 wa masiku, ndzi ta nisa a vhula+ laha misaveni a 40 wa masiku ni 40 wa wusiku,+ ndzi lovisa zvontlhe zvi hanyako laha misaveni lezvi ndzi zvi vangileko.”+ 5 Makunu Nowa i no maha zvontlhe lezvi Jehovha a nga mu leletele.

6 Nowa i wa hi ni 600 wa malembe a cikhati leci a vhula ya ndambi yi ngana laha misaveni.+ 7 Hikwalaho, Nowa ni vafana vakwe, ni sati wakwe, ni vasati va vafana vakwe va no nghena lomu tarwini a vhula ya ndambi na yi nga se sangula kuna.+ 8 A zvihari zvontlhe zvo hlazveka, ni zvihari zvontlhe zvi nga hlazvekangiko, ni zvivangwa zvi hahako, ni zvontlhe lezvi zvi fambafambako laha misaveni+ 9 zvi noya ka Nowa lomu tarwini hi zvimbiri-zvimbiri, a matsune ni kati, kota lezvi Nungungulu a nga leletele Nowa. 10 Andzhako ka 7 wa masiku, a vhula ya ndambi yi no sangula kuna laha misaveni.

11 Hi lembe ga wu 600 ga kuhanya ka Nowa, ka hweti ya wumbiri, hi siku ga wu 17 ga hweti, a zvibuka zvontlhe zva mati yo eta zvi no phuxuka, a tinyangwa ta mati ya tilo ti vhululeka.+ 12 A vhula yi nona laha misaveni a 40 wa masiku ni 40 wa wusiku. 13 Ka siku galego, Nowa i no nghena lomu tarwini ni vafana vakwe — Xemi, na Hamu na Jafete+ — ni sati wakwe ni vasati vanharu va vafana vakwe.+ 14 Va no nghena lomu tarwini ni zvontlhe zvihari zva khwati hi tixaka ta zvona, ni zvontlhe zvifuyo hi tixaka ta zvona, ni zvikokakoka* zvontlhe zva laha misaveni hi tixaka ta zvona, ni zvivangwa zvi hahako hi tixaka ta zvona, ni zvontlhe zvinyanyani, ni zvontlhe zvivangwa zva tipapa. 15 Zvi no simama kuya ka Nowa lomu tarwini hi zvimbiri-zvimbiri, tontlhe tixaka ta zvihari lezvi zvi nga ni moya wa wutomi. 16 Hikwalaho, ku no nghena a zvihari zva tixaka tontlhe, a matsune ni kati, kota lezvi Nungungulu a nga mu leletele. Andzhako ka lezvo, Jehovha i no vhala livati.

17 A ndambi yi no simama hi 40 wa masiku laha misaveni, niku a mati ma no simama ku tala ma sangula ku tlakula taru gi deluka. 18 A mati ma no tala laha misaveni ma simama ku kukumuka nguvhu hehla ka yona, kanilezvi a taru gi wo deluka hehla ka mati. 19 A mati ma no tala nguvhu laha misaveni laha ka kuza a zvitsunga zvontlhe zvo leha zvi nga lahasi ka tilo zvi khubhunyetwa.+ 20 Ma no tlakuka ma hundza zvitsunga hi 15 wa mikono.*

21 Hikwalaho, zvontlhe a zvivangwa zvi hanyako* lezvi zvi nga fambafamba laha misaveni zvi no lova+ — a zvivangwa zvi hahako, ni zvifuyo, ni zvihari zva khwati, ni zvivangwa zvi makanyako laha misaveni, ni vanhu vontlhe.+ 22 Zvontlhe lezvi zvi nga hi ka misava yo woma, lezvi zvi nga hi ni moya wa wutomi tinhovhini ta zvona, zvi nofa.+ 23 Hikwalaho, Nungungulu i no lovisa zvontlhe lezvi zvi nga hanya laha misaveni, a ku patsa ni vanhu, ni zvihari, ni zvikokakoka, ni zvivangwa zvi hahako zva tilo. Zvontlhe zvi no loviswa laha misaveni.+ Ntsena Nowa ni lava a nga hi navo lomu tarwini hi vona va nga pona.+ 24 A mati ma no simama na ma tele laha misaveni hi 150 wa masiku.+

8 Kanilezvi Nungungulu i no alakanya Nowa, ni zvontlhe zvihari zva khwati, ni zvifuyo lezvi a nga hi nazvo lomu tarwini.+ Nungungulu i no maha lezvaku kuba moya hehla ka misava, a mati ma sangula ku bohla. 2 A zvibuka zva mati yo eta ni tinyangwa ta mati ya tilo zvi no vhaliwa; hikwalaho, a vhula yi no nyima kuna.+ 3 A mati ma no sangula ku bohla laha misaveni hi kutsongwani-kutsongwani. Kumbheleni ka 150 wa masiku, a mati ma wa bohlile. 4 Hi hweti ya wu 7, ka siku ga wu 17 ga hweti, a taru gi noya gi ya nyima zvitsungeni zva Ararate. 5 A mati ma no simama ku bohla kala ka hweti ya wu 10. Hi hweti ya wu 10, hi siku go sangula ga hweti, le hehla ka zvitsunga ku no sangula ku woneka.+

6 Hikwalaho, kumbheleni ka 40 wa masiku, Nowa i no vhulula a janela+ legi a nga gi mahile laha ka taru 7 a humesa cikunguwa. A cikunguwa ci no simama ku haha le handle, ci famba na ci wuya kala a mati mapswha laha misaveni.

8 Hi ndzhako ka cikhati, i no humesa cipomba kasi a wona lezvaku a mati ma bohlile laha misaveni ke. 9 A cipomba a ci kumangi ko khapama kona, hikwalaho, ci no wuya kakwe lomu tarwini hakuva a mati ma wa ha fenengetile a misava yontlhe.+ Nowa i no nawuluta canja gakwe a nghenisa a cipomba lomu tarwini. 10 I no rindzela ku hundza man’wani 7 wa masiku, a humesa kambe a cipomba hi lomu tarwini. 11 A cikhati leci a cipomba ci nga wuya kakwe, a gambo na giya kupeleni, Nowa i no wona lezvaku ci wa lumile a tluka ga olivha ga ha hi ku khayiwako. Hikwalaho, Nowa i no zvi tiva lezvaku a mati ma bohlile laha misaveni.+ 12 I no rindzela kambe ku hundza man’wani 7 wa masiku. Andzhako ka lezvo, i no humesa a cipomba kanilezvi a ca ha wuyangi kambe kakwe.

13 Makunu hi lembe ga wu 601,+ hi hweti yo sangula, ka siku go sangula ga hweti, a mati ma wa pswhile laha misaveni. Nowa i no gwawula le hehla ka taru a cuwuka a wona lezvaku a misava yi wa kari yi woma. 14 Hi hweti ya wumbiri, hi siku ga wu 27 ga hweti, a misava yi wa womile.

15 Nungungulu i no byela Nowa, aku: 16 “Huma lomu tarwini, ni sati wa wena, ni vafana va wena, ni vasati va vafana va wena.+ 17 Huma ni zvivangwa zvontlhe zvi hanyako zva nyama ya tixaka tontlhe+ — a zvivangwa zvi hahako, ni zvihari, ni zvikokakoka* zvontlhe zva laha misaveni — kasi zvi pswalelana laha misaveni zvi andza zvi tlhela zvi tala laha misaveni.”+

18 Hikwalaho, Nowa i no huma ni sati wakwe, ni vafana vakwe+ ni vasati va vafana vakwe. 19 A zvivangwa zvontlhe zvi hanyako, ni zvikokakoka zvontlhe, ni zvivangwa zvontlhe lezvi zvi hahako, ni zvontlhe lezvi zvi fambako laha misaveni, zvi no huma lomu tarwini hi mingango ya zvona.+ 20 Andzhako ka lezvo, Nowa i no mu akela alati+ Jehovha a gumesa a pambula zvokari cikari ka zvihari zvontlhe zvi hlazvekileko ni ka zvivangwa zvontlhe zvo haha zvi hlazvekileko,+ a nyikela hi zvona a minyikelo ya kuhiswa laha alatini.+ 21 Jehovha i no sangula kuzwa masema yo nuhela. Hikwalaho, Jehovha i no ti byela lezvi mbilwini yakwe: “Ndzi nga ta ha tshuka ndzi rukatela* misava+ hi kota ya munhu, hakuva a maalakanyo ya mbilu yakwe ma bihile kusukela wun’wananeni gakwe;+ ne ndzi nga ta ha tshuka ndzi lovisa a zvilo zvontlhe zvi hanyako a ku fana ni lezvi ndzi zvi mahileko.+ 22 Kusukela lezvi, laha misaveni ku nga ta tshuka ku nyimiwa kubyala ni kutshovela, a kutitimela ni kuhisa, a cimumu ni cirami, a mumu ni wusiku.”+

9 Nungungulu i no katekisa Nowa ni vana vakwe, aku: “Pswalani, mu andza, mu tata misava.+ 2 A zvivangwa zvontlhe zvi hanyako zva laha misaveni, ni zvivangwa zvontlhe zvi hahako zva matilo, zvontlhe lezvi zvi fambako laha misaveni, ni tinjhanjhi tontlhe ta bimbi zvi ta simama ku mu chava, zvi rurumela mahlweni ka n’wina. Makunu zvi le mandleni ya n’wina.*+ 3 A zvihari zvontlhe zvi hanyako, lezvi zvi fambako, a zvive zvakuga zva n’wina.+ A ku fana ni lezvi ndzi mu nyikileko a tisinya tontlhe to nyuka, zvontlhe ndza zvi nyikela ka n’wina.+ 4 Ntsena a nyama ni wutomi* ga yona, wu nga nkhata wa yona,+ mu ngagi.+ 5 Ahandle ka lezvo, ndzi ta londza lezvaku a nkhata wa wutomi ga n’wina* wu rihiwa. Ndzi ta wu rihisa ni ka cihi civangwa ci hanyako niku ndzi ta rihisa a mun’we ni mun’wani hi kota ya wutomi ga makabye wakwe.+ 6 Ni wihi loyi a halatako a nkhata wa munhu, a nkhata wa yenawu wu ta halatwa hi munhu,+ hakuva Nungungulu i mahile munhu hi mufananiso wakwe.+ 7 N’wina pswalani, mu andza, mu tala nguvhu laha misaveni, mu endzeleka.”+

8 Andzhako ka lezvo, Nungungulu i no byela Nowa ni vana vakwe lava a nga hi navo, aku: 9 “Makunu ndza yimisa a civhumelwano ca mina zvin’we na n’wina+ ni pswalo wa n’wina andzhako ka n’wina, 10 ni zvivangwa* zvontlhe zvi hanyako lezvi zvi nga na n’wina — a zvinyanyani, ni zvihari ni zvontlhe zvivangwa zvi hanyako zva laha misaveni lezvi zvi nga na n’wina, ku nga zvontlhe lezvi zvi nga huma hi lomu tarwini — zvontlhe zvivangwa zvi hanyako laha misaveni.+ 11 Ina, ndza yimisa a civhumelwano ca mina zvin’we na n’wina, caku: Ku nga ta ha tshuka ku lovisiwa a nyama yontlhe* hi mati ya ndambi niku a ndambi yi nga ta ha tshuka yi lovisa misava.”+

12 Nungungulu i no engeta, aku: “A cikombiso ca civhumelwano leci ndzi mahako na n’wina, ni zvivangwa* zvontlhe zvi hanyako lezvi zvi nga na n’wina, ka zvizukulwana zvontlhe zva ha tako, hi leci: 13 Ndza veka a wura ga mina ga nyazimi laha ka refu; gi tava cikombiso ca civhumelwano cikari ka mina ni misava. 14 Ni ka cihi cikhati ndzi to neha refu hehla ka misava, ku ta woneka a wura ga nyazimi le refini. 15 Hakunene ndzi ta alakanya a civhumelwano ca mina leci ndzi mahileko na n’wina ni zvivangwa* zvontlhe zvi hanyako zva tixaka tontlhe; a mati ma nga ta ha tshuka ma maha ndambi ya ku lovisa nyama yontlhe.+ 16 Ku ta woneka a wura ga nyazimi le refini; hakunene ndzi ta gi wona ndzi alakanya a civhumelwano ca kala kupindzuka cikari ka Nungungulu ni zvivangwa* zva tixaka tontlhe lezvi zvi hanyako laha misaveni.”

17 Nungungulu i no phinda ka Nowa, aku: “Leci cikombiso ca civhumelwano leci ndzi mahako ni nyama yontlhe ya laha misaveni.”+

18 A vafana va Nowa lava va nga huma hi lomu tarwini hi Xemi, na Hamu na Jafete.+ Hi kufamba ka cikhati, Hamu i nova papayi wa Khanani.+ 19 Lava va vanharu va wa hi vafana va Nowa. A vanhu vontlhe lava va hangalakileko laha misaveni va huma hi ka vona.+

20 Makunu Nowa i no sangula ku rima, a byala mivhina.* 21 A cikhati leci a nganwa vhinyo, i no popiwa zvonake a etlela lomu tendeni gakwe na a hi cimbyiri. 22 Hamu, a papayi wa Khanani, i no wona a wumbyiri ga papayi wakwe a ya byela a vamakabye vakwe va vambiri va nga hi le handle. 23 Hikwalaho, Xemi na Jafete va no teka nguwo va yi tlhateka makatleni yabye va famba hi nyacindzhakwani. Hi ndlela leyo, va no fenengeta a wumbyiri ga papayi wabye, a tinghohe tabye na ti cuwukile tlhelweni; hikwalaho, a va wonangi a wumbyiri ga papayi wabye.

I wave khumbi leyi ya yitsongwani nguvhu ya vamakabye vakwe.”+

26 I no engeta aku:

Khanani i wa mahe khumbi yakwe kambe.”

28 Nowa i no simama ku hanya 350 wa malembe andzhako ka ndambi.+ 29 Hikwalaho, a masiku wontlhe ya Nowa mave 950 wa malembe, a gumesa afa.

10 Lawa matimu ya vana va Nowa: Xemi,+ na Hamu na Jafete.

Va no pswalelwa vana andzhako ka ndambi.+ 2 A vana va Jafete kuve Gomere,+ na Magoge,+ na Madhayi, na Javhani, na Tubhale,+ na Mexeke,+ na Tirase.+

3 A vana va Gomere kuve Axkenaze,+ na Rifate, na Togarma.+

4 A vana va Javhani kuve Elixa,+ na Tarxixi,+ na Kitime,+ na Dhodhanime.

5 A vaaki va lomu zvihlaleni* lava va hangalakileko lomu zvipandzeni zvabye, hi tirimi tabye, ni mingango yabye, ni matiko yabye, va huma hi ka vona.

6 A vana va Hamu kuve Kuxe, na Mizrayime,+ na Puti,+ na Khanani.+

7 A vana va Kuxe kuve Sebha,+ na Havhila, na Sabhita, na Raama,+ na Sabhiteka.

A vana va Raama hi Xebha na Dhedhani.

8 Kuxe i nova papayi wa Nimrodhe. Nimrodhe ive wo sangula kuva wa ntamu laha misaveni. 9 I nova muhloti wa ntamu a lwako na Jehovha. Hikwalaho, ku na ni vingu, gaku: “A ku fana na Nimrodhe, a muhloti wa ntamu a lwako na Jehovha.” 10 A madhoropa yo sangula ya mufumo wakwe kuve Bhabheli,+ ni Ereke,+ ni Akadhe, ni Kalne, tikweni ga Xinari.+ 11 I no suka tikweni lego aya Asiriya,+ a ya aka dhoropa ga Ninivha,+ ni Rehobhote-Ire, ni Kala, 12 ni Reseni, legi gi nga dhoropa ga hombe gi nga hi cikari ka Ninivha ni Kala.

13 Mizrayime i nova papayi wa Ludhime,+ na Anamime, na Lehabhime, na Naftuhime,+ 14 na Patrusime,+ na Kasluhime (loyi a vaFilistiya+ va humako hi ka yena), na Kaftorime.+

15 Khanani i nova papayi wa Sidhoni,+ a matewula yakwe, na Heti,+ 16 ni wa vaJebhusi, + ni vaAmori, + ni vaGirgaxi, 17 ni vaHivhi, + ni vaAraki, ni vaSini, 18 ni vaArvhadhe,+ ni vaZemare, ni vaHamate.+ Hi kufamba ka cikhati, a mingango ya vaKhanani yi no hangalaka. 19 Hikwalaho, a mimbhingano ya vaKhanani yi wa sukela Sidhoni kala Gerari,+ kusuhani ni Gaza,+ yi famba kala Sodhoma, ni Gomora,+ ni Adma, ni Zebhoyime,+ kusuhani ni Laxa. 20 Lava vave vana va Hamu hi mingango yabye, ni tirimi tabye, ni zvipandze zvabye ni matiko yabye.

21 Xemi yenawu, a kokwani wa vontlhe a vana va Ebheri+ tlhelo makabye wa Jafete, a nhondzo,* i no pswalelwa vana. 22 A vana va Xemi kuve Elami,+ na Asure,+ na Arpaxadhe,+ na Ludhi, na Aramu.+

23 A vana va Aramu kuve Uza, na Hule, na Getere, na Maxe.

24 Arpaxadhe i nova papayi wa Xela;+ Xela ava papayi wa Ebheri.

25 Ebheri i no pswalelwa vana vambiri. A vito ga mun’we i wa hi Pelegi,*+ hakuva cikhatini ca kuhanya kakwe, a misava* yi no avanyiswa. A vito ga makabye wakwe i wa hi Joktani.+

26 Joktani i nova papayi wa Almodhadhe, na Xelefe, na Hazarmavheti, na Jera,+ 27 na Hadhoramu, na Uzale, na Dhikla, 28 na Obhale, na Abhimayeli, na Xebha, 29 na Ofira,+ na Havhila, na Jobhabhe; vontlhe lava vave vana va Joktani.

30 A wutshamu legi va nga hanya ka gona gi wa sukela Mexa kala Sefare, mutsuwuka-gambo wa tiko ga zvitsunga.

31 Lava vave vana va Xemi hi mingango yabye, ni tirimi tabye, ni zvipandze zvabye ni matiko yabye.+

32 Leyi yive mingango ya vana va Nowa. A mingango leyi yi xaxametilwe hi tixaka tabye ni matiko yabye. A matiko wontlhe ma no hangalaka laha misaveni na ma sukela ka mingango leyi andzhako ka ndambi.+

11 Cikhatini leco, a misava yontlhe yi wa hi ni lirimi lin’we niku yi wa tirisa magezu man’we. 2 Laha va ngaya mutsuwuka-gambo, va no kuma nkova tikweni ga Xinari+ va se tshama kwalaho. 3 Va no bhula, vaku: “A hi beni zvitini hi zvi hisa hi ndzilo.” Hikwalaho, va no tirisa zvitini wutshan’wini ga maribye ni bhitume kota argamasa. 4 Hi kulandzela va te: “A hi ti akeleni dhoropa ni likhokhola* leli a cixungwa ca lona ci chikelako tilweni, kasi a vito ga hina giva ni nduma, hi nga hangalaki misaveni yontlhe.”+

5 Andzhako ka lezvo, Jehovha i no relela kasi a ta wona a dhoropa ni likhokhola* leli a vana va vanhu va nga kari va aka. 6 Makunu Jehovha, aku: “A vanhu lava van’we niku va na ni lirimi lin’we.+ Hi nga wona* lezvi va sangulileko ku maha! Phela ci hava va to ci alakanyela ku maha ci to va tsandza. 7 A hi+ relele* hi ya hakasa a lirimi labye kasi a mun’we ni mun’wani wabye a nga zwisisi a lirimi la mun’wani.” 8 Hikwalaho, Jehovha i no va hangalasa misaveni yontlhe+ niku hi kutsongwani-kutsongwani va no tsika ku aka a dhoropa. 9 Hi caleco ci mahileko ku gi vitaniwa ku i Bhabheli,*+ hakuva hi kwalaho Jehovha a nga hakasa a lirimi la misava yontlhe. Jehovha i no va susa laho a va hangalasa misaveni yontlhe.

10 A matimu ya Xemi+ hi lawa:

Xemi i wa hi ni 100 wa malembe a cikhati leci a ngava papayi wa Arpaxadhe,+ na ku hundzile malembe mambiri andzhako ka ndambi. 11 Andzhako ka ku pswala Arpaxadhe, Xemi i no hanya 500 wa malembe. I nova papayi wa vafana ni vanhanyana.+

12 Arpaxadhe i no hanya 35 wa malembe a gumesa ava papayi wa Xela.+ 13 Andzhako ka ku pswala Xela, Arpaxadhe i no hanya 403 wa malembe. I nova papayi wa vafana ni vanhanyana.

14 Xela i no hanya 30 wa malembe a gumesa ava papayi wa Ebheri.+ 15 Andzhako ka ku pswala Ebheri, Xela i no hanya 403 wa malembe. I nova papayi wa vafana ni vanhanyana.

16 Ebheri i no hanya 34 wa malembe a gumesa ava papayi wa Pelegi.+ 17 Andzhako ka ku pswala Pelegi, Ebheri i no hanya 430 wa malembe. I nova papayi wa vafana ni vanhanyana.

18 Pelegi i no hanya 30 wa malembe a gumesa ava papayi wa Rewu.+ 19 Andzhako ka ku pswala Rewu, Pelegi i no hanya 209 wa malembe. I nova papayi wa vafana ni vanhanyana.

20 Rewu i no hanya 32 wa malembe a gumesa ava papayi wa Seruge. 21 Andzhako ka ku pswala Seruge, Rewu i no hanya 207 wa malembe. I nova papayi wa vafana ni vanhanyana.

22 Seruge i no hanya 30 wa malembe a gumesa ava papayi wa Nahori. 23 Andzhako ka ku pswala Nahori, Seruge i no hanya 200 wa malembe. I nova papayi wa vafana ni vanhanyana.

24 Nahori i no hanya 29 wa malembe a gumesa ava papayi wa Tera.+ 25 Andzhako ka ku pswala Tera, Nahori i no hanya 119 wa malembe. I nova papayi wa vafana ni vanhanyana.

26 Tera i no hanya 70 wa malembe, andzhako ka lezvo i nova papayi wa Abrama,+ na Nahori,+ na Harani.

27 A matimu ya Tera hi lawa:

Tera i nova papayi wa Abrama, na Nahori, na Harani; Harani i nova papayi wa Loti.+ 28 Harani i nofa tikweni gakwe ga mabeleko, le Ure+ wa vaKaldheya,+ a papayi wakwe Tera na a ha hanya. 29 Abrama na Nahori va no teka vasati. A vito ga sati wa Abrama ku wa hi Sarayi;+ ni vito ga sati wa Nahori ku wa hi Milka,+ a nhanyana wa Harani, a papayi wa Milka na Iska. 30 Sarayi i wa hi ngon’wa;+ i wa nga hi na n’wana.

31 Tera i no teka Abrama, a n’wana wakwe, na Loti, a zukulu wakwe,+ a n’wana wa Harani, na Sarayi, a katamwane wakwe, a sati wa Abrama, a n’wana wakwe, a huma navo lomu Ure wa vaKaldheya vaya tikweni ga Khanani.+ Hi kufamba ka cikhati, va no chikela Harani+ va tshama kona. 32 A masiku ya kuhanya ka Tera ma nova 205 wa malembe. Andzhako ka lezvo, Tera i nofa le Harani.

12 Jehovha i no byela Abrama, aku: “Suka tikweni ga wena, u siya a maxaka ya wena ni yindlu ya papayi wa wena, uya ka tiko legi ndzi to ku komba.+ 2 Ndzi ta ku maha tiko ga hombe, ndzi ku katekisa ndzi tlhela ndzi kulisa a vito ga wena niku u tava cikatekiso.+ 3 Ndzi ta katekisa lava va ku katekisako, ndzi ruka loyi a ku xuvelako zvakubiha.+ A mingango yontlhe ya laha misaveni hakunene yi ta katekisiwa hi laha ka wena.”+

4 Hikwalaho, Abrama i no suka kota lezvi Jehovha a nga mu byelile; Loti i no famba naye. Abrama i wa hi ni 75 wa malembe a cikhati leci a nga suka Harani.+ 5 Abrama i no teka sati wakwe Sarayi,+ na Loti, a n’wana wa makabye wakwe wa cinuna,+ ni tontlhe a titshomba leti va nga hlengeletele,+ ni malandza lawa va nga ma kumile le Harani, vaya tikweni ga Khanani.+ Laha va nga chikela tikweni ga Khanani, 6 Abrama i no tsemakanya tiko gontlhe a chikela Xekemi,+ kusuhani ni tisinya ta hombe ta More.+ Ka cikhati leco, a vaKhanani va wa hi lomu tikweni. 7 Makunu Jehovha i no woneka ka Abrama, aku: “A pswalo* wa wena+ ndzi ta wu nyika a tiko legi.”+ Hikwalaho, Abrama i no mu akela alati Jehovha, loyi a nga wonekile kakwe ka wutshamu lego. 8 Andzhako ka lezvo, i no suka laho aya tikweni ga zvitsunga le mutsuwuka-gambo wa Bheteli+ a ya gwimba a tenda gakwe, a Bheteli na gi hi tlhelweni ga mupela-gambo, ni Ayi+ hi tlhelo ga mutsuwuka-gambo. Kwalaho i no mu akela alati Jehovha,+ a sangula ku khongela vitweni ga Jehovha.+ 9 Abrama i no simama ni liendzo lakwe a kongoma Negebhe,+ a suka hi ka wutshamu gin’we aya ka gin’wani.

10 Ku nova ni ndlala lomu tikweni, hikwalaho, Abrama i no relela a kongoma Gibhite kasi a ya tshama kona zva cikhatanyana,*+ hakuva a ndlala yi wa hi ya hombe lomu tikweni.+ 11 Laha a nga hi kusuhani ni ku nghena Gibhite, i no byela a sati wakwe, Sarayi, aku: “Wa wona, ndza zvi tiva lezvaku u wasati wo saseka nguvhu.+ 12 Hikwalaho, laha a vaGibhite va to ku wona, va taku: ‘Loyi i sati wakwe.’ Makunu va ta ndzi daya va tsika wena u hanya. 13 Ndzi kombela u va byela ku u makabye wa mina kasi zvi ndzi fambela khwatsi hi kota ya wena, a wutomi ga mina gi fela ku pona.”*+

14 Zvalezvi Abrama a nga nghena Gibhite, a vaGibhite va no wona lezvaku a wasati i wa sasekile nguvhu. 15 A tihosana ta Faro tonawu ti no mu wona, ti sangula ku mu babaza mahlweni ka Faro laha ka kuza va mu teka va mu yisa ndlwini ya Faro. 16 Faro i no mu khoma khwatsi Abrama hi kota ya Sarayi, niku Abrama i nova ni tiyivhu, ni tihomu, ni timbongola ta vamatsune ni ta mikati, ni malandza ya cinuna ni ya cisati, ni makameli.+ 17 Makunu Jehovha i noba Faro ni ngango wakwe hi makhombo yo tshisa hi kota ya Sarayi, a sati wa Abrama.+ 18 Hikwalaho, Faro i no vitana Abrama a ta mu wutisa, aku: “Hikuyini u nga ndzi mahela lezvi? Hikuyini u nga kala ku ndzi byela ku i sati wa wena? 19 Hikuyini u ngaku: ‘Makabye wa mina?’+ Kutsongwani ndzi wa lava ku mu teka ava sati wa mina. Hi loyi a sati wa wena. Mu teke u famba!” 20 Hikwalaho, Faro i no laya a vavanuna vakwe xungetano hi Abrama, niku vona va no mu hlongola ni sati wakwe a famba ni zvontlhe lezvi a nga hi nazvo.+

13 Andzhako ka lezvo, Abrama i no suka Gibhite a kandziha aya Negebhe,+ yena, ni sati wakwe, ni zvontlhe lezvi a nga hi nazvo, zvin’we na Loti. 2 Abrama i wa ganyile nguvhu hi mitlhambi, ni prata, ni ouro.+ 3 Laha a nga kari a endza, kusukela Negebhe aya Bheteli, i wa suka hi ka wutshamu gin’we aya ka gin’wani kala a ya chikela wutshan’wini legi a tenda gakwe gi nga hi ka gona kusanguleni, cikari ka Bheteli ni Ayi,+ 4 laha a nga akile kona alati kusanguleni. Abrama i no khongela vitweni ga Jehovha kwalaho.

5 Makunu Loti, loyi a nga kari a endza na Abrama, yenawu i wa hi ni tiyivhu, ni tihomu, ni matenda. 6 Hikwalaho, a tiko gi wa nga ha eneli kasi vontlhe va tshama zvin’we ka wutshamu gin’we. A titshomba tabye ti wa tele nguvhu laha ka ku zvi nga ha koteki a ku va hanya zvin’we. 7 Hi cigelo leco, a varisi va mitlhambi ya Abrama va no holova ni varisi va mitlhambi ya Loti. (Ka cikhati leco, a vaKhanani ni vaPerezi va wa hanya ka tiko lego.)+ 8 Hikwalaho, Abrama i no byela Loti,+ aku: “Ndzi kombela lezvaku ku ngavi ni tiholova cikari ka mina na wena ni cikari ka varisi va mina ni varisi va wena, hakuva hi vakamakabye. 9 A tiko gontlhe a gi le mahlweni ka wena ke? Ndzi kombela lezvaku u tsawukana na mina. Loku wena uya cibhabheni, mina ndzi taya cineneni; kanilezvi loku uya cineneni, mina ndzi taya cibhabheni.” 10 Hikwalaho, Loti i no tlakusa mahlo a wona lezvaku a dhistrito yontlhe ya Jordhani+ kala le Zoware+ yi wa hi wutshamu gi nga hi ni mati (Jehovha na nga se lovisa a Sodhoma ni Gomora), a ku fana ni jardhim ya Jehovha+ ni ku fana ni tiko ga Gibhite. 11 Makunu Loti i no hlawula a dhistrito yontlhe ya Jordhani, a rura aya mutsuwuka-gambo. Hikwalaho, va no tsawukana. 12 Abrama i no hanya tikweni ga Khanani, kanilezvi Loti i no hanya cikari ka madhoropa ya dhistrito.+ Hi kugumesa, i noya a ya gwimba a tenda gakwe kusuhani ni Sodhoma. 13 Makunu a vanhu va le Sodhoma va wa bihile niku va wa hi vawonhi va hombe mahlweni ka Jehovha.+

14 Andzhako ka loku Loti a hambene na Abrama, Jehovha i no byela Abrama, aku: “Tlakusa a mahlo ya wena, na u hi kwalaho u nga kona, u cuwuka le n’walungu,* ni le dzongeni,* ni le mutsuwuka-gambo, ni le mupela-gambo, 15 hakuva a tiko gontlhe legi u gi wonako ndzi ta nyika wena ni pswalo* wa wena kota tshomba ya kala kupindzuka.+ 16 Ndzi ta maha a pswalo* wa wena wu fana ni tindzhohwana ta ntshuri wa misava laha ka ku loku a hi kona wa ku a nga hlaya a tindzhohwana ta ntshuri wa misava, makunu a pswalo* wa wena wu nga hlayiwa.+ 17 Suka u famba, u landza a kuleha ni kuanama ka tiko hakuva ndzi ta ku nyika gona.” 18 Hikwalaho, Abrama i no simama ku hanya lomu matendeni. Hi kufamba ka cikhati, i noya a ya tshama cikari ka tisinya ta hombe ta Mamre,+ leti ti nga le Hebroni;+ kwalaho i no mu akela alati Jehovha.+

14 Masikwini ya Amrafeli, a hosi ya le Xinari,+ na Ariyoki, a hosi ya le Elasare, na Kedhorlawomeri,+ a hosi ya le Elami,+ na Tidhale, a hosi ya le Goyime, 2 a tihosi leti ti noya ti yalwa na Bhera, a hosi ya Sodhoma,+ na Bhirxa, a hosi ya Gomora,+ na Xinabhi, a hosi ya le Adma, na Xemebhere, a hosi ya le Zebhoyime,+ ni hosi ya le Bhela, ku nga le Zoware. 3 Tontlhe ti no tlhanganisa a masochwa ya tona Nkoveni wa Sidhime,+ ku nga le Bimbini ga Munyu.*+

4 Ti wa tirele Kedhorlawomeri a 12 wa malembe, kanilezvi ti no mu hluwukela hi lembe ga wu 13. 5 Hikwalaho, hi lembe ga wu 14, Kedhorlawomeri ni tihosi leti ti nga hi naye, va noya va ya hlasela a vaRefayime, le Axterote-Karnayime, ni vaZuzima, le Hamu, ni vaEmima,+ le Xavhe-Kiriyatayime, 6 ni vaHori,+ le citsungeni cabye ca Seyire+ kala le El-Parani, a nga le ciwuleni. 7 Andzhako ka lezvo, va no tlhela, va gumesa va chikela En-Mixpate, ku nga le Kadhexe,+ va hlasela a cipandze contlhe ca vaAmaleki+ zvin’we ni vaAmori+ lava va nga hanya Hazazon-Tamari.+

8 Ka cikhati leco, a hosi ya Sodhoma yi no famba zvin’we ni hosi ya Gomora, ni hosi ya le Adma, ni hosi ya le Zebhoyime, ni hosi ya le Bhela, ku nga le Zoware, va ya fola kasi kulwa navo le Nkoveni wa Sidhime; 9 va nolwa na Kedhorlawomeri, a hosi ya le Elami, na Tidhale, a hosi ya le Goyime, na Amrafeli, a hosi ya le Xinari, na Ariyoki, a hosi ya le Elasare+ — ti nga mune wa tihosi ti ngalwa ni ntlhanu. 10 A Nkova wa Sidhime wu wa hi ni zvikhele zvo tala zva bhitume. A tihosi ta Sodhoma ni Gomora ti no zama ku tsutsuma kanilezvi ti no wela lomo niku lava va nga sele va no tsutsuma vaya tikweni ga zvitsunga. 11 Lava va nga hlula va no teka a titshomba tontlhe ta Sodhoma ni ta Gomora ni zvakuga zvontlhe va ti fambela.+ 12 Va no khoma na Loti, a n’wana wa makabye wa cinuna wa Abrama, loyi a nga tshama le Sodhoma,+ va teka ni titshomba takwe va famba.

13 Andzhako ka lezvo, a wanuna wo kari a nga hulukile i noya a ya hlawutela Abrama, a muHebheru. Ka cikhati leco, Abrama i wa tshama* cikari ka tisinya ta hombe ta Mamre, a muAmori,+ a makabye wa Exkole na Aneri.+ A vavanuna lava va wa mahile civhumelwano na Abrama ca ku va ta vhunana. 14 Hikwalaho, Abrama i nozwa lezvaku a xaka* gakwe+ gi khomilwe. Hi cigelo leco, Abrama i no hlomisa a vavanuna vakwe va gondzisilweko kulwa yimpi, a 318 wa malandza ma pswalilweko laha mutini wakwe, va va landza kala le Dhani.+ 15 Cikari ka wusiku, Abrama i no avanyisa a masochwa yakwe; yena ni malandza yakwe va no va dhumela va va hlula. I no va hlongolisela kala le Hobha, loyi a nga le n’walungu wa Dhamasku. 16 I no tlhatlhisa tontlhe a titshomba, a tlhatlhisa na Loti, a xaka gakwe, ni titshomba takwe, ni vavasati, ni vanhu lava van’wani.

17 Andzhako ka loku Abrama a wuyile hi le ka ku hlula Kedhorlawomeri ni tihosi leti ti nga hi naye, a hosi ya Sodhoma yi no huma yi ya kumana naye le Nkoveni wa Xavhe, wu nga Nkova wa Hosi.+ 18 Melkizedheki,+ a hosi ya Salema,+ i no famba ni tipawa ni vhinyo. I wa hi mupristi wa Nungungulu Loyi a Tlakukileko ku Hundza Vontlhe.+

19 Hi kulandzela, i no mu katekisa, aku:

Abrama i no mu nyika a zvawukhume ka zvontlhe.+

21 Andzhako ka lezvo, a hosi ya Sodhoma yi no byela Abrama, yiku: “Ndzi nyike a vanhu kanilezvi a titshomba teka tiva ta wena.” 22 Abrama a byela a hosi ya Sodhoma, aku: “Ndza tlakusa canja ga mina ndzi hlambanya ka Jehovha, a Nungungulu Loyi a Tlakukileko ku Hundza Vontlhe, a Mumahi wa tilo ni misava, 23 lezvaku ndzi nga ta teka nchumu ka zvilo zva wena, kusukela ka lihindza kala ka lingoti la sandalia, kasi u nga wuli, uku: ‘Ndzi ganyisile Abrama.’ 24 Ndzi nga ta teka nchumu ahandle ka lezvi zvi sinako zvi gilwe hi majaha. A vavanuna lava va fambileko na mina — Aneri, na Exkole, na Mamre+ — va wa teke a ciavelo cabye.”

15 Andzhako ka lezvo, a mhaka ya Jehovha yi nota ka Abrama hi muwoniso, yi taku: “U nga chavi,+ Abrama. Ndzi citlhangu ca wena.+ A nchachazelo wa wena wu tava wa hombe nguvhu.”+ 2 Abrama i te ngalo: “Jehovha, Hosi ya Hombe, u ta ndzi nyika yini lezvi ku nga ku a ndzi na n’wana niku loyi a toga a tshomba ya yindlu ya mina hi Eliyezeri,+ a wanuna wa le Dhamasku ke?” 3 Abrama i no engeta, aku: “A wu ndzi nyikangi pswalo;*+ a nandza* ga ngango wa mina hi gona gi tova mugi wa tshomba ya mina.” 4 Kanilezvi Jehovha i no mu hlamula, aku: “A wanuna loyi a hi yena a tova mugi wa tshomba ya wena, kanilezvi a n’wana wa wena wutsumbu hi yena a tova mugi wa tshomba.”+

5 Nungungulu i no humesa Abrama lahandle, aku: “Cuwuka le matilweni, u hlayela tinyeleti loku ku hi ku u ta zvi kota a ku ti hlaya.” Andzhako ka lezvo, aku ngalo kakwe: “A pswalo* wa wena wu ta tshamisa zvezvi.”+ 6 I no kholwa ka Jehovha,+ niku Yena i no mu hlayela a kukholwa loko kota kululama.*+ 7 I no engeta, aku: “Hi mina Jehovha loyi a ku humesileko le Ure wa vaKaldheya kasi ndzi ta ku nyika a tiko legi giva tshomba ya wena.”+ 8 Abrama aku: “Jehovha, Hosi ya Hombe, ndzi ta zvi tivisa kuyini a ku ndzi ta gi teka giva tshomba ya mina?” 9 Yena a mu hlamula, aku: “Teka a role ga kati ga malembe manharu, ni mbuti ya kati ya malembe manharu, ni yivhu ya matsune ya malembe manharu, ni tuva, ni vhinyani ga cipomba.” 10 Hikwalaho, i no teka a zvihari lezvo zvontlhe a zvi pandza hi laha cikari a zvi veka zvi cuwukana, kanilezvi a zvinyanyani a nga zvi pandzangi. 11 Ku no sangula ku relela zvinyanyani zvi hanyako hi nyama zvita laha ka zvirumbi zva zvihari, kanilezvi Abrama i no simama ku zvi swukuta.

12 A cikhati leci a gambo gi ngaya kupeleni, Abrama i no khomiwa hi wurongo ga tshongotshongo niku ku nova ni munyama wa hombe ni wo tshisa. 13 Nungungulu i no byela Abrama, aku: “Tiva lezvaku a pswalo* wa wena wu tava valuveli tikweni gi nga hiko gabye niku a vanhu va seyo va ta va maha tikhumbi va tlhela va va xanisa a 400 wa malembe.+ 14 Mina ndzi ta lamula a tiko legi va to gi tirela+ niku andzhako ka lezvo, va ta huma ni titshomba to tala.+ 15 Kanilezvi wena u taya ka vakokwani va wena hi kurula; u lahliwa na u khosahele nguvhu.+ 16 Hambulezvo, va ta wuya laha+ ka cizukulwana ca wumune, hakuva a cikhati ca ku a vaAmori va tsayisiwa hi kota ya cigoho cabye a ci se chikela.”+

17 Laha gi nga pelile, na ku phumile nguvhu, ku no woneka a ndzhimbo* wu nga tuvika musi, ku hundza a cihlahle ca ndzilo hi laha cikari ka zvipandze zva nyama ya zvihari. 18 Ka siku lego, Jehovha i no maha a civhumelwano na Abrama,+ aku: “A pswalo* wa wena ndzi ta wu nyika a tiko legi,+ kusukela congweni wa Gibhite kala le congweni wa hombe, ku nga congo wa Eufrate:+ 19 a tiko ga vaKeni,+ ni ga vaKenazi, ni ga vaKadhemoni, 20 ni ga vaHiti,+ ni ga vaPerezi,+ ni ga vaRefayime,+ 21 ni ga vaAmori, ni ga vaKhanani, ni ga vaGirgaxi ni ga vaJebhusi.”+

16 Sarayi, a sati wa Abrama, i wa nga mu pswalelangi vana,+ kanilezvi i wa hi ni nandza ga muGibhite ga ku hi Hagari.+ 2 Hikwalaho, Sarayi i no byela Abrama, aku: “Jehovha i ndzi vhalile marumbu kasi ndzi nga pswali vana. Ndzi kombela ku u hlengela masango ni nandza ga mina. Kuzvilava ndzi nga kuma vana hi laha kakwe.”+ Hikwalaho, Abrama i no ingisa lezvi Sarayi a nga wula. 3 Andzhako ka loku Abrama a hanyile a 10 wa malembe tikweni ga Khanani, Sarayi, a sati wakwe, i no teka Hagari, a nandza gakwe ga muGibhite, a mu nyikela ka nuna wakwe, Abrama, ava sati wakwe. 4 Hikwalaho, Abrama i no hlengela masango na Hagari, Hagari a xura nyimba. A cikhati leci Hagari a nga pola lezvaku i na ni nyimba, i no sangula ku chepeta a n’winyi wakwe wa cisati.

5 Hikwalaho, Sarayi i no byela Abrama, aku: “Ndzi xanisiwa hi kota ya wena. Hi mina ndzi nga veka a nandza ga mina cifuveni ca wena, kanilezvi laha gi nga pola lezvaku gi xurile nyimba, gi no sangula ku ndzi chepeta. Jehovha i wa lamule cikari ka mina na wena.” 6 Makunu Abrama i no byela Sarayi, aku: “A nandza ga wena gi mandleni ya wena. Mu mahe ni cihi u ci wonako na ci hi cinene.” Hi kulandzela, Sarayi i no mu gisa mbhinyeto Hagari, Hagari a se mu tsutsuma.

7 Hi ndzhako ka cikhati, a ngilozi ya Jehovha yi no kuma Hagari laha cibukeni ca mati lomu ciwuleni, ku nga cibuka leci ci nga ndleleni ya kuya Xure.+ 8 Yiku kakwe: “Hagari, nandza ga Sarayi, uta hi kwihi, kona uya kwihi?” Hagari aku: “Ndzo tsutsuma a n’winyi wa mina, Sarayi.” 9 Hi kulandzela, a ngilozi ya Jehovha yi te ngalo kakwe: “Tlhela ka n’winyi wa wena u ya ti koramisa mahlweni kakwe.” 10 A ngilozi ya Jehovha yi no tlhela yiku: “Ndzi ta andzisa nguvhu a pswalo* wa wena wu tala nguvhu laha ka ku zvi nga koteki a ku wu hlaya.”+ 11 A ngilozi ya Jehovha yi no engeta, yiku: “U xurile nyimba niku u ta pswala n’wana wa mufana. Mu chule a ku hi Ixmayeli,* hakuva Jehovha i zwile a hlomulo wa wena. 12 I tava mbongola ya khwati.* A canja gakwe gi ta vhukela vontlhe; ni canja ga vontlhe gi ta mu vhukela. I ta hanya mahlweni ka vontlhe a vamakabye vakwe.”*

13 Hi kulandzela, Hagari i no khongela vitweni ga Jehovha, loyi a nga kari a wulawula naye, aku: “Wena u Nungungulu a wonako”,+ hakuva Hagari i waku: “A ku hakunene ndzi mu wonile laha loyi a ndzi wonako ke?” 14 Hi cigelo leco, a hlowo leyo yi no chuliwa ku Bheera-Lahayi-Royi.* (Yi cikari ka Kadhexe ni Bheredhi.) 15 Makunu Hagari i no mu pswalela mufana Abrama; Abrama i no chula a n’wana wakwe, loyi a nga pswalelwa hi Hagari, aku hi Ixmayeli.+ 16 Abrama i wa hi ni 86 wa malembe a cikhati leci Hagari a nga mu pswalela Ixmayeli.

17 Laha Abrama a nga hi ni 99 wa malembe, Jehovha i no woneka ka Abrama, aku kakwe: “Hi mina Nungungulu wa Ntamu Wontlhe. Famba mahlweni ka mina hi kutsumbeka. 2 Ndzi ta yimisa civhumelwano ca mina cikari ka mina na wena+ ndzi tlhela ndzi ku andzisa nguvhu, a nguvhu futsi.”+

3 Hi kota ya lezvo, Abrama i nowa hi nghohe yakwe, niku Nungungulu i no simama ku wulawula naye, aku: 4 “Ndza maha civhumelwano ca mina na wena.+ Hakunene u tava papayi wa matiko yo tala.+ 5 A vito ga wena gi nga ta hava Abrama,* kanilezvi gi tava Abrahama,* hakuva ndzi ta ku maha a papayi wa matiko yo tala. 6 Ndzi ta andzisa nguvhu a pswalo wa wena, ndzi ku maha uva matiko; ni tihosi ti ta huma hi ka wena.+

7 “Ndzi ta hlayisa a civhumelwano ca mina cikari ka mina na wena+ ni pswalo* wa wena andzhako ka wena ka zvontlhe zvizukulwana zva wona, ci nga civhumelwano ca pindzukelwa, kasi ndziva Nungungulu ka wena ni ka pswalo* wa wena andzhako ka wena. 8 Wena ni pswalo* wa wena, andzhako ka wena, ndzi ta mu nyika a tiko legi u hanyileko ka gona kota muluveli+ — a tiko gontlhe ga Khanani — kasi giva tshomba ya n’wina kala kupindzuka niku ndzi tava Nungungulu wabye.”+

9 Nungungulu i no engeta a byela Abrahama, aku: “Wena hlayisa a civhumelwano ca mina, wena ni pswalo* wa wena andzhako ka wena zvizukulwaneni zvontlhe zva wona. 10 Leci civhumelwano ca mina cikari ka mina na n’wina, leci wena ni pswalo* wa wena andzhako ka wena mu to ci hlayisa: Vontlhe a vavanuna va nga cikari ka n’wina va fanele ku mahiwa wukwera.*+ 11 A vavanuna va fanele ku tsemiwa a bhebhe ga le magumo ka zviro zvabye zva wubeleki. Leco ci tava cikombiso ca civhumelwano cikari ka mina na n’wina.+ 12 Zvizukulwaneni zva n’wina zvontlhe, a vavanuna vontlhe va 8 wa masiku va nga cikari ka n’wina va fanele ku mahiwa a wukwera,*+ loyi wa ku pswaliwa laha mutini ni loyi a nga hiko wa pswalo* wa n’wina, loyi a xavilweko hi mali ka muluveli. 13 Vontlhe a vavanuna lava va pswaliwako laha mutini wa wena ni vontlhe a vavanuna lava va xavilweko hi mali ya wena va fanele ku mahiwa wukwera.*+ A civhumelwano ca mina nyameni ya n’wina ci fanele kuva civhumelwano ca kala kupindzuka. 14 Loku a wanuna wo kari a nga mahiwangiko wukwera* a nga tsemi a bhebhe ga le magumo ka ciro cakwe ca wubeleki, a munhu loye i fanele ku tsemiwa* cikari ka vanhu vakwe. I tshovile civhumelwano ca mina.”

15 Hi kulandzela, Nungungulu i te ngalo ka Abrahama: “A sati wa wena, Sarayi,*+ u nga ha mu vitani ku Sarayi, hakuva a vito gakwe gi tava Sara.* 16 Ndzi ta mu katekisa ndzi tlhela ndzi ku nyika n’wana wa mufana ha yena;+ ndzi ta mu katekisa niku i tava matiko; a tihosi ta matiko ti ta huma hi ka yena.” 17 Laha a ngazwa lezvo, Abrahama i nowa hi nghohe yakwe a sangula ku hleka, a ti byela lezvi mbilwini yakwe:+ “A wanuna wa 100 wa malembe i ta pswalelwa n’wana ke? Kona Sara, a wasati wa 90 wa malembe, i ta pswala n’wana?”+

18 Hikwalaho, Abrahama i no byela a Nungungulu wa lisine, aku: “Mayiwako loku Ixmayeli i wo kuma thomo mahlweni ka wena!”+ 19 Laha a ngazwa lezvo, Nungungulu i te ngalo: “Sara, a sati wa wena, i ta ku pswalela mufana; u ta mu chula ku hi Isaka.*+ Ndzi ta yimisa a civhumelwano ca mina na yena kota civhumelwano ca kala kupindzuka ka pswalo* wakwe andzhako kakwe.+ 20 Kanilezvi, xungetano hi Ixmayeli, ndzi zvi zwile lezvi u nga wula. Ndzi ta mu katekisa ndzi mu maha ava ni vana, ndzi tlhela ndzi mu andzisa nguvhu, a nguvhu futsi. Ku ta huma a 12 wa tihosana hi ka yena; ndzi ta mu maha ava tiko ga hombe.+ 21 Kanilezvi ndzi ta yimisa a civhumelwano ca mina na Isaka,+ loyi u to pswalelwa hi Sara hi cikhati caleci, a lembe gi tako.”+

22 Laha Nungungulu a nga mbheta ku wulawula na Abrahama, i no suka kakwe. 23 Hi kulandzela, Abrahama i no teka Ixmayeli, a n’wana wakwe, zvin’we ni vontlhe a vavanuna lava va pswalilweko mutini wakwe, ni vontlhe lava a nga va xavile hi mali, vontlhe a vavanuna lava va nga hi mutini wa Abrahama, a va tsema a bhebhe ga le magumo ka zviro zvabye zva wubeleki hi siku galego, kota lezvi Nungungulu a nga mu byelile.+ 24 Abrahama i wa hi ni 99 wa malembe a cikhati leci a nga tsemiwa a bhebhe ga le magumo ka ciro cakwe ca wubeleki.+ 25 Ixmayeli, a n’wana wakwe, i wa hi ni 13 wa malembe a cikhati leci a nga tsemiwa a bhebhe ga le magumo ka ciro cakwe ca wubeleki.+ 26 Ka siku galego, Abrahama i no mahiwa wukwera,* zvin’we na Ixmayeli, a n’wana wakwe. 27 Vontlhe a vavanuna va muti wakwe, loyi wa ku pswaliwa laha mutini ni loyi a xavilweko hi mali ka muluveli, vonawu va no mahiwa wukwera* zvin’we naye.

18 Andzhako ka lezvo, Jehovha+ i no woneka ka Abrahama cikari ka tisinya ta hombe ta Mamre+ laha a nga tshamile nyangweni ya tenda hi cikhati ca ku hisa nguvhu ca siku. 2 Abrahama i no tlakusa mahlo a wona vavanuna vanharu na va yimile hi le kulenyana.+ Laha a nga va wona, i no suka laha tendeni hi kutsutsuma a va khinga, a ya korama lahasi, 3 aku: “Jehovha, loku ndzi kumile thomo mahlweni ka wena, ndzi kombela ku u nga hundzi na u nga nyimangi laha ka nandza ga wena. 4 Ndzo kombela, vhumelani ku mu tiselwa mati ma tsongwani kasi ku hlambisa mikondzo ya n’wina;+ andzhako ka lezvo, tshamani lahasi ka sinya. 5 Kota lezvi mu tileko laha ka nandza ga n’wina, khwatsi ndzi mu tisela pawana kasi mu kuma ntamu.* Andzhako ka lezvo, mu nga ti fambela.” Vona vaku: “Zvi lulamile. Maha lezvi u nga wula.”

6 Abrahama i no tsutsuma aya ka Sara lomu tendeni, a yaku: “Hatlisa u teka a tipimo* tinharu ta mapa ma sililweko khwatsi, u vhuva u maha tipawa.” 7 Hi kulandzela, Abrahama i no tsutsuma aya ntlhambini a ya hlawula a cidhunana ca homu co olovana ni ca cinene. I no ci nyikela ka nandza, gona gi hatlisa gi ci longisela. 8 I no teka matega, ni masi, ni cidhunana ca homu leci a nga longisele, a veka zvakuga lezvo mahlweni kabye. Hi kulandzela, i no yima mahlweni kabye lahasi ka sinya a cikhati leci vona va nga kari vaga.+

9 Vona vaku kakwe: “I kwihi Sara,+ a sati wa wena?” A hlamula, aku: “I lomu tendeni.” 10 Hikwalaho, a mun’we wabye i no simama ku wulawula, aku: “Hakunene ndzi ta wuya ka wena a lembe gi tako hi cikhati caleci, niku Sara, a sati wa wena, i ta ngha a hi ni n’wana wa mufana.”+ Sara i wo ingisela na a hi laha nyangweni ya tenda legi gi nga hi le ndzhako ka wanuna loye. 11 Abrahama na Sara va wa khosahele niku va wa hi ni malembe yo tala.+ Sara i wa hundzile ka tanga yo pswala vana.*+ 12 Hikwalaho, Sara i no sangula ku hleka mbilwini yakwe, aku: “Lezvi makunu ndzi kumbileko, a hosi ya mina na yi khosahele, ina ndza ha tava ni litsako lelo ke?”+ 13 Makunu Jehovha i no wutisa Abrahama, aku: “Hikuyini Sara a nga hleka, a tlhela aku: ‘Hakunene ndza ha ta pswala n’wana lezvi ndzi khosaheleko?’ 14 Ci kona ci tsandzako Jehovha+ ke? Ndzi ta wuya ka wena a lembe gi tako hi cikhati caleci ci yimisilweko, niku Sara i ta ngha a hi ni n’wana wa mufana.” 15 Kanilezvi Sara i no kaneta, aku: “E, a ndzi hlekangi mina!” hakuva i wa chava. Yena aku: “U hlekile!”

16 A cikhati leci a vavanuna lavo va nga suka va yima kasi va famba, va no cuwuka hasi va wona Sodhoma.+ Abrahama i no va heleketa kasi ku salisana navo. 17 Jehovha aku: “Abrahama ndzi ta mu fihlela lezvi ndzi lavako ku maha ke?+ 18 Hakunene Abrahama i tava tiko ga hombe ni ga ntamu niku a matiko wontlhe ya laha misaveni ma ta katekisiwa hi laha ka yena.+ 19 Hakuva ndzi mu tivile kasi a laya a vana vakwe ni ngango wakwe, andzhako kakwe, lezvaku va hlayisa a ndlela ya Jehovha hi ku maha zvazvinene ni zvakululama,+ kasi Jehovha a fela ku tatisa lezvi a tsumbisileko xungetano hi Abrahama.”

20 Andzhako ka lezvo, Jehovha i te: “A cirilo xungetano hi Sodhoma ni Gomora ca hombe nguvhu,+ ni ciwonho cabye ca tshisa nguvhu.+ 21 Ndzi ta relela kasi ndzi ya wona ku va maha zvalezvi ndzi zvi zwako ka cirilo leci ci chikeleko ka mina ke. Loku zvi nga hi zvona, ndzi ta zvi tiva.”+

22 Makunu a vavanuna lavo va no suka hi laho va kongoma Sodhoma, kanilezvi Jehovha+ i no sala na Abrahama. 23 Abrahama i no tshinela ka Nungungulu, aku: “Hakunene u ta lovisa a vakululama zvin’we ni vakubiha ke?+ 24 A hi zvi veke laha ka ku lomu dhoropeni ku na ni 50 wa vanhu va kululama. Xana u ta va lovisa, u nga tsetseleli a wutshamu hi kota ya lava va 50 va kululama va nga ka gona ke? 25 A zvive kule na wena a ku maha lezvo, a ku lovisa a munhu wo lulama zvin’we ni wakubiha, laha ka ku a magumo ya munhu wo lulama ma fana ni ya loyi wakubiha!+ A zvive kule na wena.+ A Mulamuli wa misava yontlhe a nga ta maha zvakululama ke?”+ 26 Jehovha aku: “Loku ndzi kuma a 50 wa vanhu va kululama lomu dhoropeni, ndzi ta tsetselela a wutshamu gontlhe hi kota yabye.” 27 Kanilezvi Abrahama i no hlamula kambe, aku: “Ndza kombela, ndzi tsetselele hi lezvi ndzi xinyatako ndzi wulawula na Jehovha, kuveni ndzi ntshuri ni khuma. 28 A hi zvi veke laha ka ku ku kiyela ntlhanu wa vanhu kasi va maha 50 va kululama. Xana u ta lovisa dhoropa gontlhe hi kota ya lava va ntlhanu ke?” Yena aku: “Ndzi nga ta gi lovisa loku ndzi kuma ka gona a 45.”+

29 Abrahama i no tlhela a wulawula naye kambe, aku: “A hi zvi veke laha ka ku i 40 wa vanhu va kumekako.” Yena aku: “Ndzi nga ta gi lovisa hi kota ya lava va 40.” 30 Kanilezvi Abrahama i no simama, aku: “Jehovha, ndzi kombela ku u nga zangari,+ kanilezvi ndzi tsike ndzi simama ku wulawula: A hi zvi veke laha ka ku ko kumeka ka gona a 30 ntsena.” I no hlamula, aku: “Ndzi nga ta gi lovisa loku ndzi kuma ka gona a 30.” 31 Kanilezvi Abrahama i no simama, aku: “Jehovha, ndzi kombela lezvaku u ndzi vhumelela ku ndzi wulawula na wena: A hi zvi veke laha ka ku ko kumeka ka gona a 20 ntsena.” I no hlamula, aku: “Ndzi nga ta gi lovisa hi kota ya lava va 20.” 32 Hi kugumesa, Abrahama i te: “Jehovha, ndzi kombela ku u nga zangari, kanilezvi ndzi tsike ndzi wulawula a khati galegi basi: A hi zvi veke laha ka ku ko kumeka ka gona a 10 ntsena.” I no hlamula, aku: “Ndzi nga ta gi lovisa hi kota ya lava va 10.” 33 Laha Jehovha a nga mbheta ku wulawula na Abrahama, i no suka a ti fambela,+ Abrahama a tlhela tendeni gakwe.

19 A tingilozi leti ta timbiri ti no chikela Sodhoma na gi phumile, na Loti i wa tshamile nyangweni ya Sodhoma. A cikhati leci Loti a nga ti wona, i no suka a ti khinga a ya khizama, a korama lahasi hi nghohe.+ 2 I te ngalo: “Ndza kombela, tihosi ta mina, hambukani, ndzo kombela, mu nghena mutini wa nandza ga n’wina mu hlambisiwa mikondzo mu tlhela mu etlela kona. Andzhako ka lezvo, mu ta vhuka ni mixo mu khoma ndlela ya n’wina mu famba.” Va no hlamula, vaku: “Ahihi, hi ta tshama laha prasa* a wusiku legi.” 3 Kanilezvi i no va kurumeta nguvhu vaza va famba naye mutini wakwe. Hi kulandzela, i no va mahela mubuzo, a woca tipawa to kala comelo vaga.

4 Na va nga seya kuetleleni, a vavanuna va lomu dhoropeni — a vavanuna vontlhe va Sodhoma, kusukela ka jaha kala ka wahombe — va noya va ya randzela a yindlu kota citshungu ca ku maha vhilinganya. 5 Va no simama ku vitana Loti, vaku: “Va kwihi a vavanuna lava va tileko ka wena a wusiku legi? Va humese vata seno ka hina kasi hi ta hlengela navo masango.”+

6 Loti i no huma aya ka vona laha nyangweni a gumesa a vhala livati. 7 I te ngalo: “Vamakabye va mina, ndzo kombela, mu nga mahi zvakubiha. 8 Laha ndzi na ni vanhanyana vambiri va ku a va se tshuka va hlengela masango ni wanuna. Ndzi tsikeni ndzi va humesa kasi mu ta va maha ni cihi mu to ci wona na ci hi cinene ka n’wina. Kanilezvi a vavanuna lava mu nga va mahi nchumu, hakuva va tile lahasi ka ndzhuti wa yindlu ya mina.”+ 9 Laha va ngazwa lezvo, va te: “Suka laha!” Va engeta, vaku: “A muluveli loyi wo kala maxaka i tile a ta tshama laha, lezvi i tlhela a xinyata a hi lamula! Zvezvi hi lava ku ku maha zvo tshisa nguvhu a ku hundza vona.” Va no randzela* Loti, va tshinela kasi ku pandza livati. 10 Hikwalaho, a vavanuna lava va vambiri va no nawuluta a mandla yabye va khoma Loti va mu nghenisa lomu ndlwini, lomu va nga hi kona, va gumesa va vhala livati. 11 Kanilezvi va noba a vavanuna lava va nga hi laha nyangweni ya yindlu hi wukhumu — kusukela ka loyi wa mutsongwani kala ka loyi wahombe — laha ka kuza va lavetela a nyangwa ya yindlu va karala.

12 Andzhako ka lezvo, va no wutisa Loti, vaku: “U na ni man’wani maxaka lomu ke? A vamwane, ni vafana va wena, ni vanhanyana va wena, ni vontlhe a vanhu va wena va nga lomu dhoropeni, va humese ka wutshamu legi! 13 Hi lava ku lovisa a wutshamu legi, hakuva a cirilo leci ci zwalako xungetano hi vanhu lava hakunene ci kulile nguvhu mahlweni ka Jehovha.+ Hikwalaho, Jehovha i hi rumele ku ta lovisa a dhoropa.” 14 Makunu Loti i no huma a ya wulawula ni vamwane vakwe, lava va nga lava ku chadha ni vanhanyana vakwe, aku: “Sukani! Humani ka wutshamu legi, hakuva Jehovha i ta lovisa a dhoropa!” Kanilezvi ka vamwane vakwe, zvi wa wonekisa ku khwatsi o hlakana.+

15 Laha gi ngaya kuceni, a tingilozi ti no jaha Loti, tiku: “Hatlisa u suka! Teka a sati wa wena ni vanhanyana va wena va vambiri lava u nga navo laha, kasi u nga lovisiwi hi kota ya zvigoho zva dhoropa!”+ 16 Laha a nga simama ku maha mihoni, a vavanuna lavo va no mu khoma hi woko, va khoma ni ga sati wakwe, ni ya vanhanyana vakwe va vambiri, va va humesa va ya va tsika le handle ka dhoropa,+ hakuva Jehovha i wa hi ni tipswalo ka yena.+ 17 Zvalezvi va nga va humesa handle ka dhoropa, a mun’we wabye i te: “Tsutsuma u ponisa a wutomi* ga wena! U nga cuwuki ndzhako+ ne u nga nyimi ni ka gihi wutshamu ka dhistrito leyi!+ Tsutsuma uya tikweni ga zvitsunga kasi u nga lovisiwi!”

18 Kanilezvi Loti i te ngalo kabye: “Ahihi Jehovha! Ndzi kombela ku u nga ndzi yisi seyo! 19 A nandza ga wena gi kumile thomo mahlweni ka wena niku u ndzi kombile wunene ga hombe* hi ku ndzi ponisa,*+ kanilezvi a ndzi nge zvi koti a ku tsutsuma ndziya tikweni ga zvitsunga, hakuva ndza chava ku a khombo gi ndzi kuma, ndzifa.+ 20 A cidhoropana leci ci laha kusuhani, ndzi nga tsutsumela ka cona; wutshamu ga gitsongwani ntsena. Ndzi nga tsutsumela ka gona? Wutshamu ga gitsongwani ntsena. Loku ndziya seyo ndzi ta pona.”* 21 Yena aku kakwe: “Zvi lulamile, ndzi ta chela kota kambe hi wena+ hi ku nga lovisi a cidhoropana leci u wulawulako hi cona.+ 22 Hatlisa! Tsutsuma uya ka cona hakuva a ndzi nge mahi nchumu kala u chikela seyo!”+ Hi cigelo leco, i no chula a cidhoropana leco aku i Zoware.*+

23 A cikhati leci Loti a nga chikela Zoware, a gambo gi wa tsuwukile. 24 Makunu Jehovha i no nisa solufa* ni ndzilo hehla ka Sodhoma ni Gomora — zvi nota hi ka Jehovha, hi le matilweni.+ 25 Hikwalaho, i no lovisa a madhoropa lawo, ina, a dhistrito yontlhe, a ku patsa ni vontlhe lava va nga akile lomu madhoropeni, ni tisinya ta tiko.+ 26 Kanilezvi a sati wa Loti, loyi a nga hi le ndzhako kakwe, i no sangula ku cuwuka ndzhako, a se maha ruka ga munyu.+

27 Abrahama i no vindzuka ni mixo aya ka wutshamu legi a nga yimile ka gona mahlweni ka Jehovha.+ 28 Laha a nga cuwuka le ndzhelelweni, hi tlhelo ga Sodhoma ni Gomora, ni dhistrito yontlhe, i no wona nchumu wo hlamalisa. Ku wa hi ni musi wo phuma wu nga tuvika na wu sukela lomu tikweni, wo fana ni musi wo phuma wa ndzhimbo!*+ 29 Hikwalaho, a cikhati leci Nungungulu a nga lovisa a madhoropa ya dhistrito, i no alakanya Abrahama hi ku humesa Loti madhoropeni lawa a nga ma lovisa, ma nga madhoropa lawa Loti a nga tshamile ka wona.+

30 Hi kufamba ka cikhati, Loti i no suka Zoware ni vanhanyana vakwe va vambiri a kandziha a ya tshama tikweni ga zvitsunga,+ hakuva i wa chava a ku hanya Zoware.+ Hikwalaho, i no hanya lomu mhakweni ni vanhanyana vakwe va vambiri. 31 Loyi wa matewula i no byela loyi wa ndzisana, aku: “A papayi wa hina i khosahele niku a ku na wanuna lomu tikweni legi wa ku i ta hlengela masango na hina kota mukhuwo wa misava yontlhe. 32 A hi mu nyike vhinyo papayi anwa hi gumesa hi etlela naye kasi a pswalo wa papayi wa hina wu nga fuvi.”

33 Hikwalaho, ka wusiku lego, va no mu nyiketela vhinyo a papayi wabye anwa. Andzhako ka lezvo, loyi wa matewula i no nghena a etlela ni papayi wakwe, kanilezvi a papayi wakwe a nga mu zwangi ne a cikhati a ngata a ta etlela ne a cikhati a nga vhuka. 34 Ka siku gi nga landzela, loyi wa matewula i no byela loyi wa ndzisana, aku: “Ndzi etlele na papayi a matolo. A hi mu nyike vhinyo anwa a wusiku legi kambe. Andzhako ka lezvo, u ta nghena u etlela naye kasi a pswalo wa papayi wa hina wu nga fuvi.” 35 Hikwalaho, ka wusiku lego kambe va no mu nyika vhinyo a papayi wabye hi kuphindaphinda anwa. Andzhako ka lezvo, loyi wa ndzisana i no nghena a etlela ni papayi wakwe, kanilezvi a papayi wakwe a nga mu zwangi ne a cikhati a ngata a ta etlela ne a cikhati a nga vhuka. 36 A vanhanyana va Loti va vambiri va no xurisiwa tinyimba hi papayi wabye. 37 Loyi wa matewula i no pswala n’wana wa mufana a mu chula ku hi Mowabhi.+ Hi yena a papayi wa vaMowabhi lava va nga kona nyamutlha.+ 38 Loyi wa ndzisana yenawu i no pswala mufana a mu chula ku hi Bhen-Ami. Hi yena a papayi wa vaAmoni+ lava va nga kona nyamutlha.

20 Makunu Abrahama i no rura laho+ aya tikweni ga Negebhe a ya tshama cikari ka Kadhexe+ ni Xure.+ A cikhati leci a nga tshama* le Gerari,+ 2 Abrahama i no phinda lezvi a nga wulile xungetano hi sati wakwe, Sara, aku: “Loyi makabye wa mina.”+ Hikwalaho, Abhimeleki, a hosi ya le Gerari, i no ruma vanhu vaya ka Sara va ya mu teka.+ 3 Andzhako ka lezvo, Nungungulu i nota ka Abhimeleki hi noro ni wusiku, a taku kakwe: “U file hi kota ya wasati loyi u nga mu teka,+ hakuva i chadhile, i lumba wanuna mun’wani.”+ 4 Hambulezvo, Abhimeleki i wa nga se mu tshinelela.* Hikwalaho i te: “Jehovha, u lava ku lovisa a tiko go kala nandzu* ke? 5 Kasi a nga no ndzi byela ku ‘makabye wa mina’? Kona yenawu wasati a nga wulangi ku ‘makabye wa mina’ ke? Ndzi zvi mahile hi mbilu yi basileko ni mandla yo kala nandzu.” 6 Makunu a Nungungulu wa lisine i no byela Abhimeleki hi noro, aku: “Ndza zvi tiva ku u zvi mahile hi mbilu yi basileko, hikwalaho, a ndzi ku tsikangi u ndzi wonhela ne a ndzi ku vhumelelangi a ku u mu henya. 7 Makunu tlhelisa a sati wa vambe, hakuva a nuna wakwe muphrofeti+ niku i ta ku kombelela+ kasi u simama ku hanya. Kanilezvi loku u nga mu tlhelisi, zvi tive lezvaku u tafa futsi, wena ni vontlhe a vanhu va wena.”

8 Abhimeleki i no vindzuka ni mixo a vitana wontlhe a malandza yakwe a ta ma hlawutela a zvilo lezvi zvontlhe, ma se chava nguvhu. 9 Makunu Abhimeleki i no vitana Abrahama, aku kakwe: “Zvini u hi maheleko? Ndzi no ku wonhela yini a kuza u lava ku neha a ciwonho leci ca hombe hehla ka mina ni mufumo wa mina ke? Lezvi u nga ndzi mahela a zvi lulamangi.” 10 Abhimeleki i no engeta a wutisa Abrahama, aku: “U mahile lezvi na u fela yini?”+ 11 Abrahama aku: “Hakuva ndzi waku: ‘A vanhu va wutshamu legi a va mu chavi Nungungulu niku va ta ndzi daya hi ku fela a sati wa mina.’+ 12 Kanilezvi laha ka ku makabye wa mina, lelo lisine; i nhanyana wa papayi wa mina, hi no hambana hi vamamani; yena i nova sati wa mina.+ 13 Makunu a cikhati leci Nungungulu a nga ndzi laya lezvaku ndzi suka mutini wa papayi wa mina,+ ndziva mufambafambi, ndzi no mu byela ndziku: ‘Komba ku u na ni lirandzo li nga mbheliko hi mina hi ku maha lezvi: Ni kwihi lomu hi toya kona, va byele uku: “Makabye wa mina.”’”+

14 Andzhako ka lezvo, Abhimeleki i no teka tiyivhu, ni tihomu, ni malandza ya cinuna ni ya cisati a nyika Abrahama; i no tlhelisa na Sara, a sati wakwe. 15 Abhimeleki i no tlhela aku: “A tiko ga mina gi le mahlweni ka wena. Tshama ni kwihi ku ku tsakisako.” 16 Kanilezvi ka Sara i te ngalo: “Ndza mu nyika a 1000 wa zvingerengere zva prata a makabye wa wena.+ Leci cikombiso ka vontlhe lava va nga na wena ni ka vontlhe lava van’wani ca ku a wu na nandzu niku u tlhatlhekile ka ciruko.” 17 Abrahama i no sangula ku khongela, a khongotela Nungungulu wa lisine; Nungungulu i no hanyisa Abhimeleki, ni sati wakwe, ni tikhumbi takwe ta cisati, va vhuxetela ku pswala vana, 18 hakuva Jehovha i wa vhalile marumbu ya vontlhe a vavasati va yindlu ya Abhimeleki hi kota ya Sara, a sati wa Abrahama.+

21 Jehovha i no alakanya Sara kota lezvi a nga sina a wulile, niku Jehovha i no mahela Sara lezvi a nga tsumbisile.+ 2 Hikwalaho, Sara i no xura nyimba+ a mu pswalela a n’wana wa mufana Abrahama wukhosaneni gakwe, hi cikhati ci yimisilweko, leci Nungungulu a nga mu tsumbisile.+ 3 Abrahama i no chula a n’wana wakwe, loyi a nga pswalelwe hi Sara, aku hi Isaka.+ 4 Abrahama i no mu maha wukwera* a n’wana wakwe Isaka laha a nga hi ni 8 wa masiku, kota lezvi Nungungulu a nga mu leletele.+ 5 Abrahama i wa hi ni 100 wa malembe a cikhati leci a nga pswalelwa Isaka, a n’wana wakwe. 6 Makunu Sara i te ngalo: “Nungungulu i ndzi nehele mahleko; vontlhe lava va to zvizwa va ta hleka na mina.”* 7 A engeta aku: “Himani a nga wa ta wula ka Abrahama, aku: ‘Hakunene Sara i ta an’wisa vana’ ke? Hambulezvo, ndzi mu pswalele a n’wana wa mufana wukhosaneni gakwe.”

8 A n’wanana i no kula, a lumuliwa. Abrahama i no longisela a mubuzo wa hombe ka siku legi Isaka a nga lumuliwa hi gona. 9 Kanilezvi Sara i wa tshamela ku wona lezvaku a n’wana wa Hagari,+ a muGibhite, loyi a nga pswalele Abrahama, i wa chepeta Isaka.+ 10 Hikwalaho, i no byela Abrahama, aku: “Hlongola a khumbi leyi ya cisati ni n’wana wa yona, hakuva a n’wana wa khumbi leyi a nga tava mugi wa tshomba zvin’we ni n’wana wa mina Isaka!”+ 11 Kanilezvi lezvi Sara a nga wula xungetano hi Ixmayeli zvi no mu swira nguvhu Abrahama.+ 12 Hi kulandzela, Nungungulu i no byela Abrahama, aku: “U nga swireki hi kota ya lezvi Sara a ku byelako xungetano hi mufana ni khumbi ya wena ya cisati. Ingisa lezvi a wulako,* hakuva leci ci to wuliwa ku i pswalo* wa wena ci ta huma hi ka Isaka.+ 13 Xungetano hi n’wana wa khumbi leyi ya cisati,+ yenawu ndzi ta mu maha ava tiko,+ hakuva i pswalo* wa wena.”

14 Hikwalaho, Abrahama i no vindzuka ni mixo a teka zvakuga* ni nghotso ya mati a nyika Hagari. I no zvi tlhateka katleni ga Hagari a mu hlongola zvin’we ni mufana.+ Hagari i no suka a pepetseka lomu ciwuleni ca Bherexebha.+ 15 Hi kugumesa, a mati ma no mbhela lomu ka nghotso, a se veka a mufana lahasi ka khuhu. 16 I no tsawukana naye hi pfhukana wa ku phanda paxa a ya tshama yece, hakuva i waku: “A ndzi lavi ku cuwukela a mufana wa mina na afa.” Hikwalaho, Hagari i noya a ya tshama hi le kule, a sangula kuba huwa ni ku rila.

17 Nungungulu i nozwa a gezu ga mufana,+ niku a ngilozi ya Nungungulu yi no vitana Hagari hi le matilweni, yiku kakwe:+ “Hagari, kasi zvini? U nga chavi hakuva Nungungulu i zwile a gezu ga mufana kwalahaya a nga kona. 18 Suka u vhuxa mufana, u mu khoma hi woko, hakuva ndzi ta mu maha tiko ga hombe.”+ 19 Makunu Nungungulu i no vhulula mahlo ya Hagari, Hagari a wona hlowo ya mati. I noya a ya tata nghotso hi mati a nyika mufana anwa. 20 Nungungulu i wa hi zvin’we ni mufana+ laha a nga kari a kula. A mufana loye i wa tshama ciwuleni niku i nova wa ku tira hi wura. 21 I noya a ya tshama le ciwuleni ca Parani+ niku a mamani wakwe i no mu tekela a sati tikweni ga Gibhite.

22 Ka cikhati leco, Abhimeleki zvin’we na Fikole, a hosana ya masochwa yakwe, va no byela Abrahama, vaku: “Nungungulu i zvin’we na wena ka zvontlhe u mahako.+ 23 Makunu hlambanya ka mina kwalaha hi Nungungulu lezvaku u nga ta ndzi kanganyisa, mina, ni pswalo wa mina, ni vana va mina, ni lezvaku u ta kombisa lirandzo li nga mbheliko ka mina ni ka tiko legi u hanyako ka gona, a lirandzo lo fana ni leli ndzi ku kombisileko.”+ 24 Hikwalaho, Abrahama i te: “Ndza hlambanya.”

25 Hambulezvo, Abrahama i no khala ka Abhimeleki hi kota ya hlowo ya mati leyi a malandza ya Abhimeleki ma nga wutlile hi kani.+ 26 Abhimeleki a hlamula, aku: “A ndzi zvi tivi ku hi mani a nga maha lezvi; u wa nga se ndzi byela nchumu hi mhaka leyi niku kala nyamutlha ndzi wa nga sezwa nchumu xungetano hi yona.” 27 Hi cigelo leco, Abrahama i no teka tiyivhu ni tihomu a nyika Abhimeleki; hi wumbiri gabye va no maha civhumelwano. 28 A cikhati leci Abrahama a nga teka 7 wa tiyivhana ta mikati ta laha ntlhambini a ti veka hi tlhelo, 29 Abhimeleki i no wutisa Abrahama, aku: “A tiyivhana leti ta 7 ta mikati u ti pambulela yini?” 30 Yena aku: “U ta amukela a tiyivhana leti ta 7 ta mikati hi canjeni ga mina kasi tiva wukustumunyu ga lezvaku hi mina ndzi nga kela a hlowo leyi.” 31 Hikwalaho, i no chula a wutshamu lego a ku i Bherexebha,*+ hakuva hi wumbiri gabye va wa hlambanyile kwalaho. 32 Makunu va no maha a civhumelwano+ le Bherexebha. Hi kulandzela, Abhimeleki i no suka na Fikole, a hosana ya masochwa yakwe, va tlhela tikweni ga vaFilistiya.+ 33 Andzhako ka lezvo, Abrahama i no byala a sinya* le Bherexebha; kwalaho i no khongela vitweni ga Jehovha,+ a Nungungulu wa pindzukelwa.+ 34 Abrahama i no tshama tikweni ga vaFilistiya hi cikhati co leha.*+

22 Andzhako ka lezvo, a Nungungulu wa lisine i no ringa Abrahama,+ aku kakwe: “Abrahama!” Yena a hlamula, aku: “Hi mina loyi!” 2 Nungungulu aku: “Teka Isaka,+ a n’wana wa wena wa mun’we, loyi u mu randzako nguvhu,+ uya tikweni ga Moriya+ u ya mu nyikela kona kota munyikelo wa kuhiswa ka cin’we ca zvitsunga lezvi ndzi to ku komba.”

3 Hikwalaho, Abrahama i no vhuka ni mixo nguvhu a gabhatsela mbongola yakwe, a teka ni malandza yakwe ya mambiri zvin’we ni n’wana wakwe Isaka. I no pandza tihunyi ta munyikelo wa kuhiswa, a gumesa a suka aya ka wutshamu legi a Nungungulu wa lisine a nga mu komba. 4 Hi siku ga wunharu, Abrahama i no tlakusa mahlo a wona wutshamu lego hi le kule. 5 Makunu Abrahama i no byela a malandza yakwe, aku: “N’wina salani laha ni mbongola, mina ni mufana ha haya lahaya hi ya khozela, hi ta wuya.”

6 Hikwalaho, Abrahama i no teka a tihunyi ta munyikelo wa kuhiswa a rwexa a n’wana wakwe, Isaka, yena a welela ndzilo ni mukwana,* va famba hi wumbiri gabye. 7 Hi kulandzela, Isaka i no byela Abrahama, a papayi wakwe, aku: “Papayi!” Yena aku: “N’wananga!” Isaka a engeta, aku: “Laha hova ni ndzilo ni tihunyi, makunu yi kwihi a yivhu ya ku maha hi yona a munyikelo wa kuhiswa?” 8 Abrahama a hlamula, aku: “N’wananga, Nungungulu i ta humesa a yivhu ya munyikelo wa kuhiswa.”+ Va no simama ku famba hi wumbiri gabye.

9 Hi kugumesa, va no chikela ka wutshamu legi a Nungungulu wa lisine a nga mu kombile. Abrahama i no aka alati laho, a tlhatekela tihunyi hehla ka gona. I no boha a mandla ni mikondzo ya n’wana wakwe, Isaka, a mu tlhateka laha alatini hi le hehla ka tihunyi.+ 10 Hi kulandzela, Abrahama i no nawuluta a canja gakwe a teka mukwana* kasi a daya n’wana wakwe.+ 11 Kanilezvi a ngilozi ya Jehovha yi no mu vitana na yi hi le tilweni, yiku: “Abrahama, Abrahama!” Yena a hlamula, aku: “Hi mina loyi!” 12 Yona yiku: “U nga bayisi mufana, ne u nga mu mahi nchumu. Makunu ndza zvi tiva lezvaku u na ni cichavo hi Nungungulu, hakuva a wu ndzi alelangi a n’wana wa wena, a n’wana wa wena wa mun’we.”+ 13 Zvalezvo Abrahama i no tlakusa mahlo, a se wona yivhu ya matsune kusuhani kakwe na yi khwekele hi timhondzo lomu ka citshitshi. Hikwalaho, Abrahama i noya a ya teka a yivhu leyo a maha hi yona a munyikelo wa kuhiswa wutshan’wini ga ku maha hi n’wana wakwe. 14 Abrahama i no chula a wutshamu lego aku Jehovha-Jire.* Hi cigelo leco, kala ni nyamutlha ka ha wuliwa ku: “Citsungeni ca Jehovha, zvi ta humeswa.”+

15 A ngilozi ya Jehovha yi no vitana Abrahama hi khati ga wumbiri, na yi hi le tilweni, 16 yiku: “‘Ndza hlambanya ha mina’, ku wula Jehovha,+ ‘ndziku kota lezvi u mahileko lezvi u tlhela u nga ndzi aleli a n’wana wa wena, a n’wana wa wena wa mun’we,+ 17 hakunene ndzi ta ku katekisa niku hakunene ndzi ta andzisa a pswalo* wa wena wu fana ni tinyeleti ta matilo ni ku fana ni tindzhoho ta misava yi nga mbhirini ya bimbi,+ niku a pswalo* wa wena wu ta fumela madhoropa ya valala va wona.+ 18 Kota lezvi u ingisileko a gezu ga mina,+ a matiko wontlhe ya laha misaveni ma ta katekisiwa hi laha ka pswalo* wa wena.’”+

19 Andzhako ka lezvo, Abrahama i no tlhela ka malandza yakwe, va suka zvin’we va tlhela Bherexebha.+ Abrahama i no simama ku tshama Bherexebha.

20 Andzhako ka lezvo, Abrahama i no byeliwa lezvi: “Milka yenawu i mu pswalele vana Nahori, a makabye wa wena:+ 21 Uza, a matewula yakwe; na Bhuzi, a makabye wakwe; na Kemuweli, a papayi wa Aramu; 22 na Kesedhe, na Hazo, na Pildhaxe, na Jidlafe na Bhetuweli.”+ 23 Bhetuweli i nova papayi wa Rebheka.+ Milka i no pswala a vana lava va 8, a pswalela Nahori, a makabye wa Abrahama. 24 A sati wakwe wa mutsongwani,* ku nga Rewuma, yenawu i no mu pswalela vana. A vana vakwe hi Tebha, na Gahamu, na Tahaxi na Maaka.

23 Sara i no hanya 127 wa malembe. Lawa mave malembe ya wutomi ga Sara.+ 2 Sara i nofa le Kiriyat-Arbha,+ ku nga le Hebroni,+ tikweni ga Khanani.+ Abrahama i no bayiseka a tlhela a rila hi kota ya Sara. 3 Hikwalaho, Abrahama i no suka laha ka cirumbi ca sati wakwe, a ya byela a vana va Heti,+ aku: 4 “Mina ndzi muluveli ni muhlavha cikari ka n’wina.+ Ndzi nyikeni wutshamu gi nga cikari ka n’wina kasi giva cilahla, ndzi fela ku mu lahla kona a sati wa mina.”* 5 A vana va Heti va no hlamula Abrahama, vaku: 6 “Hosi yanga, hizwe. Wena u hosana ya Nungungulu* cikari ka hina.+ U nga lahla a mufi wa wena ka cilahla leci u to ci hlawula cikari ka zvilahla zva hina. I hava cikari ka hina a to ala ni cilahla cakwe, a ku betela a ku lahla a sati wa wena.”

7 Hikwalaho, Abrahama i no suka, a korama mahlweni ka vanhu va tiko lego, va nga vana va Heti,+ 8 aku kabye: “Loku mu ndzi vhumelela a ku lahla sati wa mina, ndzi ingiseleni: Kombelani Efroni, a n’wana wa Zohare, 9 lezvaku a ndzi xavisela a mhako ya Makapela, leyi yi mu lumbako, yi nga mbhirini ya simu gakwe. I wa ndzi xavisele na mu zvi wona hi ntsengo wa prata+ wu ringanako kasi ndzi kuma wutshamu ga ku maha cilahla.”+

10 Efroni i wa tshamile cikari ka vana va Heti. Hikwalaho, Efroni, a muHiti, i no hlamula Abrahama na zvi zwiwa hi vana va Heti, ni vontlhe lava va nga nghena hi nyangwa ya dhoropa,+ aku: 11 “Ahihi, hosi yanga, zwana mina! Ndza ku nyika a simu ni mhako leyi yi nga ka gona. Ndzi ku nyika mahlweni ka vana va tiko ga mina. Lahla a mufi wa wena.” 12 Makunu Abrahama i no korama mahlweni ka vanhu va tiko lego, 13 a wulawula na Efroni na a zwiwa hi vanhu va tiko lego, aku: “Ndzi kombela u ndzi ingisela! Ndzi ta ku nyika a mali yontlhe ya prata yi ringanako ku xava simu. Yi amukele hi canjeni ga mina, kasi ndzi mu lahla kona a mufi wa mina.”

14 Efroni i no hlamula Abrahama, aku: 15 “Hosi yanga, zwana mina. A wutshamu legi gi ringana 400 wa maxekeli* ya prata, kanilezvi cini leco cikari ka mina na wena ke? Lahla a mufi wa wena.” 16 Abrahama i no ingisa Efroni, a mu pezela a ntsengo wa prata lowu a nga wu wulile na zvi zwiwa hi vana va Heti, ku nga 400 wa maxekeli* ya prata hi ku pima hi pezo leyi yi tirisiwako hi vaxavisi.+ 17 Hi ndlela leyo, a simu ga Efroni le Makapela, legi gi nga hi mahlweni ka Mamre — a simu, ni mhako leyi yi nga hi ka gona, ni tontlhe a tisinya leti ti nga hi cikari ka mimbhingano ya simu — zvi no tiyisiwa lezvaku i 18 tshomba ya Abrahama yi xavilweko mahlweni ka vana va Heti, ni mahlweni ka vontlhe lava va nghenako hi nyangwa ya dhoropa. 19 Andzhako ka lezvo, Abrahama i no lahla sati wakwe, Sara, lomu mhakweni yi nga sin’wini ga Makapela mahlweni ka Mamre, ku nga le Hebroni, tikweni ga Khanani. 20 Hikwalaho, a vana va Heti va no teka a simu ni mhako leyi yi nga hi ka gona va nyika Abrahama kota tshomba ya ku maha ka yona cilahla.+

24 Makunu Abrahama i wa khosahele na a hi wa kale hi tanga niku Jehovha i wa mu katekisile ka zvontlhe.+ 2 Abrahama i no byela nandza gakwe legi ga hombe ka wontlhe ngangweni wakwe, legi gi nga wonelela zvontlhe lezvi a nga hi nazvo,+ aku: “Vekela a canja ga wena lahasi ka thanga ga mina; 3 ndzi lava ku ku hlambanyisa ha Jehovha, a Nungungulu wa matilo ni Nungungulu wa misava, lezvaku u nga ta mu tekela sati a mufana wa mina ka vanhanyana va vaKhanani, lava ndzi hanyako cikari kabye.+ 4 Kanilezvi yana tikweni ga mina ni maxakeni ya mina+ u ya mu tekela sati a mufana wa mina Isaka.”

5 Kanilezvi a nandza gi no mu wutisa, giku: “Ahati loku a wasati loye a nga vhumeli ku wuya na mina tikweni legi? Ndzi yisa a mufana wa wena ka tiko legi u tako hi ka gona ke?”+ 6 Abrahama a mu hlamula, aku: “Ti wonele ku yisa a n’wana wa mina seyo.+ 7 Jehovha, a Nungungulu wa matilo, loyi a ndzi susileko mutini wa papayi wa mina ni tikweni ga maxaka ya mina,+ loyi a wulawulileko na mina a tlhela a hlambanya ka mina,+ aku: ‘A pswalo* wa wena+ ndzi ta wu nyika a tiko legi’,+ i ta rumela a ngilozi yakwe mahlweni ka wena+ niku hakunene u ta mu tekela sati a mufana wa mina kwaseyo.+ 8 Kanilezvi loku a wasati loye a nga vhumeli ku wuya na wena, u tava u tlhatlhekile ka cihlambanyo leci. Hambulezvo, u nga yisi a n’wana wa mina seyo.” 9 Makunu a nandza gi no vekela a canja ga gona lahasi ka thanga ga Abrahama, a n’winyi wa gona, gi hlambanya kakwe xungetano hi mhaka leyi.+

10 Hikwalaho, a nandza gi no teka 10 wa makameli ya n’winyi wa gona ni tontlhe tixaka ta zvilo zva zvinene ka n’winyi wa gona gi famba. Gi noya Mezopotamia, dhoropeni ga Nahori. 11 A nandza gi no khizamisa a makameli laha hloweni ya mati le handle ka dhoropa. Gi waya kupeleni, hi cikhati leci a vavasati va humako hi cona va yakha mati. 12 A nandza gi no khongela, giku: “Jehovha, Nungungulu wa n’winyi wa mina, Abrahama, ndza ku kombela lezvaku u ndzi vhuna ku ndzi humelela nyamutlha, u tlhela u mu kombisa a lirandzo li nga mbheliko a n’winyi wa mina Abrahama. 13 Ndzi yimile laha hloweni ya mati niku a vanhanyana va vanhu va dhoropa va huma kasi va takha mati. 14 Ku wa maheke lezvaku a nhanyana loyi ndzi to mu byela ku ‘ndzi kombela ku u rula a cifukwana ca wena kasi ndzinwa mati’ a ndzi hlamula aku ‘nwana niku ndzi ta nwisa ni makameli ya wena’, ava yaloye u mu hlawulako a kuva sati wa nandza ga wena Isaka; hi ndlela leyo, ndzi ta zvi tiva lezvaku u mu kombisile a lirandzo li nga mbheliko a n’winyi wa mina.”

15 Na a nga se mbheta ku khongela, ku no chikela Rebheka na a rwele a cifukwana laha katleni gakwe. Rebheka i wa hi nhanyana wa Bhetuweli,+ a n’wana wa Milka,+ a sati wa Nahori,+ a makabye wa Abrahama. 16 A nhanyana loye i wa sasekile nguvhu niku i wa hi nhwana.* I wa nga se hlengela masango ni wanuna. I no relela aya hloweni, a ya tata a cifukwana cakwe hi mati, a gumesa a kandziha a tlhela. 17 Zvalezvo, a nandza gi no tsutsuma gi mu khinga, gi yaku: “Hi nga ndzi nyika a mati ma nga lomu ka cifukwana ca wena ndzinwa kutsongwani.” 18 Yena aku: “Nwana, hosi yanga.” I no tekela ku rula a cifukwana cakwe a khoma hi mandla, a mu nyika mati anwa. 19 Laha a nga mbhetile ku mu nyika mati ya kunwa, i te: “Ndzi ta khela ni makameli ya wena kala ma kolwa.” 20 I no chulula a cifukwana cakwe ca mati lomu cigowolweni, a khiringela a yakha mati le hloweni; i no simama a ku ma khela mati wontlhe a makameli ya wanuna loye. 21 Ka cikhati contlhe leco, a wanuna i wo miyela, a mu cuwukisela na a hlamala, na a ti wutisa ku kani Jehovha i no maha lipfhumba lakwe li humelela ke.

22 Laha a makameli ma nga mbhetile a kunwa mati, a wanuna i no mu nyika a phera ya ouro ya ku boha laha ka nhovhu yi nga peza a khihlanya ga xekeli;* i no mu nyika ni maniya mambiri ya ouro ma nga peza 10 wa maxekeli, 23 aku: “Ndzi kombela ku u ndzi byela ku u nhanyana wa mani. Le kaya ka papayi wa wena ku na ni wutshamu ga ku hi nga etlela kona a wusiku legi ke?” 24 A hlamula, aku: “Ndzi nhanyana wa Bhetuweli,+ a n’wana wa Milka, loyi a nga pswalela Nahori.”+ 25 A engeta, aku: “Hi na ni hlanga, ni byanyi go tala, ni wutshamu ga ku mu etlela ka gona a wusiku legi.” 26 A wanuna i no korama a khizama mahlweni ka Jehovha, 27 aku: “I wa dhumisiwe Jehovha, a Nungungulu wa n’winyi wa mina, Abrahama, hakuva a nga tsikangi ku kombisa lirandzo li nga mbheliko ni kutsumbeka ka n’winyi wa mina. Jehovha i ndzi kongomisile ndlwini ya vamakabye va n’winyi wa mina.”

28 A nhanyana i no tsutsuma a ya hlawutela a timhaka leti ngangweni wa mamani wakwe. 29 Rebheka i wa hi ni makabye wa cinuna wa ku hi Labani.+ Hikwalaho, Labani i no tsutsuma aya ka wanuna loye a nga hi le handle, le hloweni. 30 A cikhati leci a nga wona a phera ya ku boha laha ka nhovhu ni maniya lawa a makabye wakwe a nga bohile, a tlhela azwa lezvi a makabye wakwe Rebheka a nga wula, zvaku: “A wanuna loye i ndzi byelile lezvi ni lezvi”, i no huma a mu khinga. A wanuna loye i wa ha yimile ni makameli le hloweni. 31 Zvalezvo, Labani i te: “Tana, wena loyi u katekisilweko hi Jehovha. Wa ha yimela yini lahandle? Ndzi longisele yindlu ni wutshamu ga makameli.” 32 A wanuna loye i no nghena laha mutini; i* no ma susa zvigabhatsa a makameli, a ma nyika hlanga ni byanyi a tlhela a mu nyika mati a wanuna loye kasi a hlamba mikondzo zvin’we ni vavanuna lava a nga hi navo. 33 Kanilezvi a cikhati leci va nga mu nyika zvokari zva ku aga, i te: “Ndzi nga taga kala ndzi mu byela leci ci nga ndzi tisa laha.” Labani aku: “Wula!”

34 Hi kulandzela, a wanuna loye i te ngalo: “Mina ndzi nandza ga Abrahama.+ 35 Jehovha i mu katekisile nguvhu a n’winyi wa mina, a mu ganyisa nguvhu hi ku mu nyika tiyivhu ni tihomu, ni prata ni ouro, ni malandza ya cinuna ni ya cisati, ni makameli ni timbongola.+ 36 Ahandle ka lezvo, Sara, a sati wa n’winyi wa mina, i mu pswalele mufana na a khosahele+ niku a n’winyi wa mina i ta nyika a mufana wakwe zvontlhe lezvi a nga nazvo.+ 37 Makunu a n’winyi wa mina i no ndzi hlambanyisa, aku: ‘U nga mu tekeli sati a mufana wa mina ka vanhanyana va vaKhanani, lava ndzi hanyako tikweni gabye.+ 38 Kanilezvi u taya ndlwini ya papayi wa mina ni maxakeni ya mina+ u ya mu tekela a sati a mufana wa mina.’+ 39 Kanilezvi ndzi no wutisa a n’winyi wa mina, ndziku: ‘Ahati loku a wasati loye a nga vhumeli ku wuya na mina ke?’+ 40 I no ndzi hlamula, aku: ‘Jehovha, loyi ndzi fambako mahlweni kakwe,+ i ta rumela a ngilozi yakwe+ u famba nayo niku hakunene i ta ku vhuna lezvaku u humelela lipfhumbeni la wena; u ta mu tekela a sati a mufana wa mina le maxakeni ya mina ni ndlwini ya papayi wa mina.+ 41 U tava u tlhatlhekile ka cihlambanyo ca wena leci u ci mahileko ka mina loku uya maxakeni ya mina, hambu loku va nga ku nyiki a wasati. Lezvo zvi ta ku tlhatlhisa ka cihlambanyo ca wena.’+

42 “Laha ndzi nga chikela hloweni nyamutlha ndzi no khongela, ndziku: ‘Jehovha, Nungungulu wa n’winyi wa mina Abrahama, loku u zvi randza lezvaku a lipfhumba la mina li humelela, 43 ndzi yimile laha hloweni zvezvi. Ku wa maheke lezvaku loku kuta nhanyana+ a takha mati ndzi mu byela ku “hi nga ndzi nyika matana ya kunwa ma nga lomu ka cifukwana ca wena”, 44 yena i wa ndzi hlamule, aku: “Nwana niku ndzi ta nwisa ni makameli ya wena”. A wasati loye i wave yaloye Jehovha a mu hlawulileko kasi ava sati wa mufana wa n’winyi wa mina.’+

45 “Na ndzi nga se mbheta ku khongela hi lomu mbilwini, ku nota Rebheka na a rwele a cifukwana laha katleni gakwe a relela ata hloweni a takha mati. Hi kulandzela, ndzi te ngalo kakwe: ‘Ndzi kombela mati ya kunwa.’+ 46 I no tekela ku rula a cifukwana hi laha katleni gakwe, aku: ‘Nwana+ niku ndzi ta nwisa ni makameli ya wena.’ Makunu ndzi nonwa, a gumesa a nwisa ni makameli. 47 Andzhako ka lezvo, ndzi no mu wutisa, ndziku: ‘U nhanyana wa mani?’ A hlamula, aku: ‘Ndzi nhanyana wa Bhetuweli, a n’wana wa Nahori, loyi a nga pswalelwa hi Milka.’ Hikwalaho, ndzi no mu boha phera laha ka nhovhu ni maniya mawokweni yakwe.+ 48 Makunu ndzi no korama ndzi khizama mahlweni ka Jehovha, ndzi dhumisa Jehovha, a Nungungulu wa n’winyi wa mina, Abrahama,+ loyi a ndzi rangeleko ndleleni ya yinene kasi ku ta teka a nhanyana wa makabye wa n’winyi wa mina, ava sati wa n’wana wakwe. 49 Makunu ndzi byeleni lezvaku ma zvi lava a ku kombisa lirandzo li nga mbheliko ka n’winyi wa mina mu tlhela mu tsumbeka kakwe ke; loku mu nga zvi lavi ndzi byeleni kasi ndzi tiva co maha.”*+

50 Labani na Bhetuweli va no hlamula, vaku: “Lezvi zvita hi ka Jehovha. A hi nge ku byeli ku ina kutani ahihi.* 51 Rebheka hi yaloyi kwalaha mahlweni ka wena. Mu teke u famba naye a ya maha sati wa n’wana wa n’winyi wa wena, kota lezvi Jehovha a wulileko.” 52 Laha a nandza ga Abrahama gi ngazwa a magezu yabye, gi no tekela ku korama lahasi mahlweni ka Jehovha. 53 A nandza gi no sangula ku humesela a zvilo zva prata, ni zva ouro, ni tinguwo, gi nyika Rebheka. Gi no teka zvilo zva lisima gi nyika a makabye wa cinuna wa Rebheka ni mamani wakwe. 54 Andzhako ka lezvo, a nandza ni vavanuna lava gi nga hi navo va noga ni kunwa va gumesa va etlela.

Laha gi nga vhuka ni mixo, a nandza gi te ngalo: “Ndzi tsikeni ndzi tlhela ka n’winyi wa mina.” 55 Makunu a makabye wa cinuna wa Rebheka ni mamani wakwe, va te ngalo: “A nhanyana i wa tshame na hina a 10 wa masiku hi wutsongwani ga kona, hi kona a to famba.” 56 Kanilezvi a nandza gi no va hlamula, giku: “Mu nga ndzi khomeleteli kuveni ma zvi wona lezvaku Jehovha i mahile a lipfhumba la mina li humelela. Ndzi tsikeni ndzi tlhela ndziya ka n’winyi wa mina.” 57 Hikwalaho, va te: “A hi nga vitaneni nhanyana hi ta mu wutisa.” 58 Va no vitana Rebheka va ta mu wutisa, vaku: “U ta famba ni wanuna loyi ke?” Yena a hlamula, aku: “Ndzi longile ku famba naye.”

59 Hikwalaho, va no tsika a makabye wabye Rebheka+ a famba ni yayi* yakwe,+ ni nandza ga Abrahama, ni vavanuna lava gi nga hi navo. 60 Va no katekisa Rebheka, vaku: “Wena makabye wa hina, maha makume ya mazana ma wuyetilweko 10 000 wa makhati; ni pswalo* wa wena wu wa fumele a nyangwa ya lava va wu vengako.”+ 61 Makunu Rebheka ni malandza yakwe ya cisati va no suka va khilela makameli va landzela a wanuna loye. Hikwalaho, a nandza gi no teka Rebheka gi ti fambela.

62 Makunu Isaka i wa tile hi tlhelo ga Bheera-Lahayi-Royi,+ hakuva i wa tshama tikweni ga Negebhe.+ 63 Isaka i wa hi lehandle na a nyimanyima lomu mafusini kasi ku ehleketa,+ na giya kupeleni. Laha a nga tlakusa mahlo i no wona makameli na ma kari mata. 64 Laha Rebheka a nga tlakusa mahlo, i no wona Isaka a se tekela ku chika laha ka kameli. 65 Rebheka i no wutisa nandza, aku: “Himani a wanuna gayani a tako hi lomu mafusini a hi khinga?” A nandza giku: “I n’winyi wa mina.” Makunu Rebheka i no teka vhewu* yakwe kasi a ti fenengeta hi yona. 66 A nandza gi no hlawutela Isaka zvontlhe lezvi gi nga mahile. 67 Andzhako ka lezvo, Isaka i no teka Rebheka a famba naye tendeni ga Sara, a mamani wakwe.+ Hikwalaho, i no teka Rebheka ava sati wakwe; niku Isaka i no mu randza nguvhu,+ a kuma kuchavelelwa andzhako ka ku felwa hi mamani wakwe.+

25 Makunu Abrahama i no tlhela a teka sati; a vito gakwe ku wa hi Ketura. 2 Hi kufamba ka cikhati, Ketura i no mu pswalela Zimrani, na Jokixani, na Medhani, na Midhiyani,+ na Ixibhake, na Xuhi.+

3 Jokixani i nova papayi wa Xebha na Dhedhani.

A vana va Dhedhani ku wa hi Axurime, na Letuxime, na Lewumime.

4 A vana va Midhiyani kuve Efa, na Efera, na Hanoke, na Abhidha, na Eldha.

Vontlhe lava va wa hi vana va Ketura.

5 Hi kufamba ka cikhati, Abrahama i no nyika Isaka zvontlhe lezvi a nga hi nazvo+ 6 kanilezvi Abrahama i no va nyika zvinyikiwo a vana vakwe lava a nga pswalelwa hi vasati vakwe lava va vatsongwani.* Makunu na a ha hanya, i no va yisa mutsuwuka-gambo, kule na Isaka, a n’wana wakwe.+ 7 Abrahama i no hanya 175 wa malembe. 8 Andzhako ka lezvo, Abrahama i no hefemula hi khati go gumesa, afa na a khosahele nguvhu, ina, na a khosahele ni kutsaka hi lezvi a nga hanyile nguvhu, a hlengeletwa ka vanhu vakwe.* 9 A vana vakwe, Isaka na Ixmayeli, va no mu lahla lomu mhakweni ya Makapela, leyi yi nga mahlweni ka Mamre,+ lomu sin’wini ga Efroni, a n’wana wa Zohare, a muHiti, 10 a simu legi Abrahama a nga gi xavile ka vana va Heti. Abrahama i no lahliwa laho zvin’we ni sati wakwe Sara.+ 11 Andzhako ka kufa ka Abrahama, Nungungulu i no simama ku katekisa a n’wana wakwe Isaka.+ Isaka i wa tshama kusuhani ni le Bheera-Lahayi-Royi.+

12 Lawa matimu ya Ixmayeli,+ a n’wana wa Abrahama, loyi Hagari,+ a muGibhite tlhelo nandza ga Sara, a pswaleleko Abrahama.

13 Lawa mavito ya vana va Ixmayeli, va xaxametilweko hi mavito yabye hi kuya hi mingango leyi va humako ka yona: Nebhayote,+ a matewula ya Ixmayeli, ku gamela Kedhare,+ na Adbheyeli, na Mibsamu,+ 14 na Mixma, na Dhuma, na Masa, 15 na Hadhadhe, na Tema, na Jeture, na Nafixe na Kedhema. 16 Lava i vana va Ixmayeli niku lawa mavito yabye hi kuya hi lomu va nga tshamile kona ni lomu va nga govile kona, ti nga 12 wa tihosana hi kuya hi tixaka tabye.+ 17 Ixmayeli i no hanya 137 wa malembe. Andzhako ka lezvo, i no hefemula hi khati go gumesa, a gumesa afa, a hlengeletwa ka vanhu vakwe.* 18 A vana vakwe va wa tshama ka cipandze ci sukelako le Havhila,+ kusuhani ni le Xure+ loyi a nga kusuhani ni Gibhite kala le Asiriya. I wa tshama kusuhani ni vontlhe a vamakabye vakwe.*+

19 Lawa matimu ya Isaka, a n’wana wa Abrahama.+

Abrahama i nova papayi wa Isaka. 20 Isaka i wa hi ni 40 wa malembe a cikhati leci a nga chadha na Rebheka, a nhanyana wa Bhetuweli,+ a muAramu wa le Padhani-Aramu. Rebheka i wa hi makabye wa Labani, a muAramu. 21 Isaka i wa tshama hi ku khongela, a khongotela Jehovha hi kota ya sati wakwe hakuva i wa hi ngon’wa; Jehovha i no hlamula a mukhongelo wakwe niku a sati wakwe Rebheka i no xura nyimba. 22 A vanana lava va nga hi lomu ndzeni kakwe va no sangula kulwa,+ laha ka kuza Rebheka, aku: “Loku zvi tshamisile lezvi, ndza ha hanyela yini?” Hikwalaho, i no wutisa Jehovha. 23 Jehovha i te ngalo kakwe: “Ku na ni matiko mambiri khwirini ga wena+ niku lomu nyimbeni ya wena ku ta huma tixaka timbiri;+ a lin’we li tava ni ntamu a ku hundza leli lin’wani,+ niku loyi wa nhondzo i ta tirela loyi wa ndzisana.”+

24 Laha ku nga chikela cikhati ca ku a pswala, va no wona lezvaku ma wa hi mahahla ma nga hi lomu ka khwiri gakwe. 25 Ku no huma loyi wo sangula na a pswhukile a miri wontlhe a ku khwatsi i nguwo ya woya,+ hikwalaho, va no mu chula ku hi Esawu.*+ 26 Andzhako ka lezvo, ku no huma a makabye wakwe na a khomile a cirendze ca Esawu,+ hikwalaho, i no mu chula ku hi Jakobe.*+ Isaka i wa hi ni 60 wa malembe a cikhati leci Rebheka a nga pswala vana lavo.

27 Laha a vafana va nga kari va kula, Esawu i nova munhu a nga zvi tiva khwatsi ku hlota,+ a wanuna wo randza kuya lomu khwatini; kanilezvi Jakobe i wa hi wanuna wo kala cisolo, loyi a nga hanya lomu matendeni.+ 28 Isaka i wa randza Esawu hakuva i wa mu hlotela nyama kanilezvi Rebheka i wa randza Jakobe.+ 29 Ka khati go kari, Esawu i no wuya hi lomu khwatini na a karele, a ta kuma Jakobe na a bhika muru. 30 Esawu i no byela Jakobe, aku: “Hatlisa u ndzi chelela a muru lowo wo pswhuka, hakuva ndzi karele!”* Hi caleco ci mahileko ku a chuliwa ku hi Edhomi.*+ 31 Jakobe aku: “Ranga hi ku ndzi xavisela a fanelo ya wena ya wutewula!”+ 32 Esawu a engeta, aku: “Phela ndzofa! Makunu yi ndzi vhuna yini a fanelo ya wutewula?” 33 Jakobe a engeta, aku: “Ranga hi ku hlambanya!” Hikwalaho, Esawu i no hlambanya, a xavisa a fanelo yakwe ya wutewula ka Jakobe.+ 34 Hi kulandzela, Jakobe i no nyika Esawu a pawa ni muru wa tinyawa; i noga, anwa, a suka a ti fambela. Hi ndlela leyo, Esawu i no chepeta a fanelo ya wutewula.

26 Ku nova ni yin’wani ndlala lomu tikweni, ahandle ka leyi yi nga rangile yiva kona masikwini ya Abrahama.+ Hikwalaho, Isaka i noya le Gerari ka Abhimeleki, a hosi ya vaFilistiya. 2 Makunu Jehovha i no woneka kakwe, aku: “U nga releli uya Gibhite. Tshama lomu tikweni legi ndzi to ku komba. 3 Tshama kota muluveli tikweni legi,+ ndzi ta simama kuva na wena ndzi ku katekisa, hakuva wontlhe a matiko lawa ndzi ta nyika wena ni pswalo* wa wena+ niku ndzi ta tatisa a cihlambanyo leci ndzi hlambanyileko ka papayi wa wena Abrahama,+ caku: 4 ‘Ndzi ta andzisa a pswalo* wa wena wu fana ni tinyeleti ta matilo+ niku wontlhe a matiko lawa ndzi ta ma nyikela ka pswalo* wa wena.+ A matiko wontlhe ya laha misaveni ma ta katekisiwa hi ka pswalo* wa wena,’+ 5 hakuva Abrahama i ingisile a gezu ga mina, a simama ku hlayisa zvontlhe lezvi ndzi mu layileko, zvi nga zvileletelo zva mina ni milayo ya mina.”+ 6 Hikwalaho, Isaka i no simama ku tshama le Gerari.+

7 A cikhati leci a vavanuna va tiko lego va nga mu wutisa xungetano hi sati wakwe, i waku: “Makabye wa mina.”+ I wa chava ku wula ku “i sati wa mina”, hakuva i waku: “A vavanuna va wutshamu legi va nga ndzi daya hi ku fela Rebheka,” hakuva i wa sasekile.+ 8 Loku ku hundzile cikhati co kari, Abhimeleki a hosi ya vaFilistiya, i no cuwuka le handle hi laha janeleni a wona Isaka na a mu kombisa lirandzo* Rebheka, a sati wakwe.+ 9 Zvalezvo, Abhimeleki i no vitana Isaka, a taku: “Kasi loyi i sati wa wena! Hikuyini u ngaku, ‘makabye wa mina’ ke?” Isaka a hlamula, aku: “Ndzi wulile lezvo hi ku chava ku ndzi nga dawa hi kota ya yena.”+ 10 Kanilezvi Abhimeleki i no engeta, aku: “Zvini u hi maheleko?+ Kutsongwani a wokari cikari ka vanhu na a etlele ni sati wa wena niku na u hi tisele nandzu!”+ 11 Andzhako ka lezvo, Abhimeleki i no laya a vanhu vontlhe, aku: “Ni wihi a to mu mahela zvakubiha a wanuna loyi ni sati wakwe i ta dawa!”

12 Isaka i no sangula ku rima masimu tikweni lego. Ka lembe galego i no tshovela hi ka 100 wa makhati lezvi a nga byalile, hakuva Jehovha i wa mu katekisa.+ 13 Isaka i no ganya, a simama ku andza kala a ganya nguvhu. 14 I no fuya mitlhambi ya tiyivhu, ni ya tihomu, ava ni malandza yo tala;+ a vaFilistiya va no sangula kuva ni matshoho.

15 Hikwalaho, a vaFilistiya va no setela a tihlowo tontlhe leti a malandza ya papayi wakwe ma nga kelile masikwini ya Abrahama.+ 16 Makunu Abhimeleki i no byela Isaka, aku: “Rura lomu ka hina hakuva u mahile wahombe nguvhu a ku hundza hina.” 17 Hikwalaho, Isaka i no rura laho a ya gova nkoveni wa Gerari,+ a sangula ku tshama kona. 18 Isaka i no kelisa a tihlowo leti ti nga kelilwe masikwini ya papayi wakwe, Abrahama, leti a vaFilistiya va nga setele andzhako ka kufa ka Abrahama;+ i no tlhela a ti vitana hi mavito yalawa a papayi wakwe a nga ti chulile.+

19 A cikhati leci a malandza ya Isaka ma nga kari ma kela le nkoveni, ma no kuma hlowo ya mati ya manene. 20 A varisi va le Gerari va no holovisana ni varisi va Isaka, vaku: “Lawa i mati ya hina!” Hikwalaho, i no chula a hlowo leyo ku Eseki,* hakuva va wa holovisene naye. 21 Va no sangula ku kela yin’wani hlowo; va no holovisana kambe hi kota ya yona. Hikwalaho, i no yi chula ku Sitna.* 22 Hi kufamba ka cikhati, i no suka laho a ya kela yin’wani hlowo kanilezvi a va ha holovangi hi kota ya yona. Hikwalaho, i no yi chula ku Rehobhote,* aku: “Hi ku Jehovha makunu i hi nyikile a wutshamu ga hombe a tlhela a hi maha hi andza lomu tikweni.”+

23 Andzhako ka lezvo, i no rura laho a kandziha aya Bherexebha.+ 24 Ka wusiku galego, Jehovha i no woneka kakwe, aku: “Hi mina Nungungulu wa Abrahama, a papayi wa wena.+ U nga chavi,+ hakuva ndzi na wena niku ndzi ta ku katekisa ndzi tlhela ndzi andzisa a pswalo* wa wena hi kota ya Abrahama, a nandza ga mina.”+ 25 Hikwalaho, i no aka alati laho a tlhela a khongela vitweni ga Jehovha.+ Isaka i no gwimba a tenda gakwe laho+ niku a malandza yakwe ma no kela hlowo kwalaho.

26 Hi ndzhako ka cikhati, Abhimeleki i nota kakwe na a sukela Gerari, na a hi na Ahuzatu, a sungukati gakwe, na Fikole, a hosana ya butho gakwe.+ 27 Isaka i no va wutisa, aku: “Mu tela yini laha ka mina, kuveni mu ndzi vengile mu tlhela mu ndzi hlongola kusuhani na n’wina ke?” 28 Vona vaku: “Hi zvi wonile zviku dlunya lezvaku Jehovha i zvin’we na wena.+ Hikwalaho, hi te ngalo: ‘Ngha kuva ni cihlambanyo cikari ka hina na wena, niku a hi mahe civhumelwano zvin’we na wena+ 29 ca lezvaku u nga ta hi mahela zvakubiha a ku khwatsi hi lezvi hina hi nga kala ku ku mahela zvakubiha, hakuva hi no ku mahela zvazvinene ntsena, hi ku ku hlongola hi kurula. Makunu zvezvi, Jehovha i ku katekisile.’” 30 Andzhako ka lezvo, Isaka i no va mahela mubuzo, vaga ni kunwa. 31 Va no vhuka ni mixo nguvhu, a mun’we ni mun’wani a hlambanya ka mun’wani.+ Hi kulandzela, Isaka i no salisana navo, va famba hi kurula.

32 Ka siku galego, a malandza ya Isaka ma noya ma ya mu nyika mubiko wa hlowo leyi ma nga kelile,+ maku kakwe: “Hi kumile mati!” 33 Hikwalaho, i no yi chula ku Xibha. Hi cigelo leco, a dhoropa lego gi vitaniwa ku Bherexebha+ kala ni nyamutlha lezvi.

34 A cikhati leci Esawu a nga hi ni 40 wa malembe, i no teka Judhiti, a nhanyana wa Bheri, a muHiti, na Bhasemati, a nhanyana wa Eloni, a muHiti,+ vava vasati vakwe. 35 A vavasati lava va wa mu vangela hlomulo wa hombe Isaka na Rebheka.+

27 A cikhati leci Isaka a nga khosahele, a mahlo yakwe na ma nga ha woni khwatsi, i no vitana Esawu,+ a n’wana wakwe loyi wa nhondzo, aku kakwe: “N’wananga!” A hlamula, aku: “Hi mina loyi!” 2 Isaka aku: “Makunu ndzi khosahele. A ndzi zvi tivi a ku ndzi tafa rini. 3 Makunu zvezvi, ndzi kombela lezvaku u teka matlhari ya wena — a cikhwama ca wena ca mipaxa ni wura ga wena — uya lomu khwatini u ya ndzi hlotela a nyama.+ 4 Andzhako ka lezvo, ndzi bhikele zvakuga zvo nandziha, lezvi ndzi zvi randzako, u ta ndzi nyika ndziga kasi ndzi ku katekisa na ndzi nga sefa.”

5 Hambulezvo, Rebheka i wo ingisela a cikhati leci Isaka a nga kari a bhula na Esawu, a n’wana wakwe. Esawu i noya lomu khwatini a ya hlota nyama kasi a wuya nayo.+ 6 Rebheka i no byela Jakobe, a n’wana wakwe,+ aku: “Ndzi zwile a papayi wa wena na a byela a makabye wa wena Esawu, aku: 7 ‘Ndzi nehele nyama, u ndzi bhikela zvakuga zvo nandziha ndzi taga kasi ndzi fela ku ku katekisa mahlweni ka Jehovha na ndzi nga sefa.’+ 8 N’wananga, ingisela khwatsi u tlhela u maha lezvi ndzi ku byelako.+ 9 Famba ntlhambini u ya ndzi tekela a zvimbutana zvimbiri lezvi zva zvinene kasi ndzi ta mu longiselela hi zvona a zvakuga zvo nandziha a papayi wa wena, ndzi zvi longiselisa lezvi a zvi lavisako zvona. 10 Andzhako ka lezvo, u ta heleketa ka papayi wa wena a yaga kasi a ku katekisa na a nga sefa.”

11 Jakobe i no byela a mamani wakwe Rebheka, aku: “Kanilezvi Esawu, a makabye wa mina, i na ni mawoya*+ kuveni mina a ndzi nawo. 12 Ahati loku papayi a ndzi ringetela ke?+ Zvi ta mahisa ku khwatsi ndzo mu moxa niku ndzi ta ti nehela ciruko wutshan’wini ga makatekwa.” 13 A mamani wakwe aku: “A ciruko leco ci wave hehla ka mina, n’wananga. Wena maha lezvi ndzi wulako, u famba u ya ndzi tekela zvona.”+ 14 Hikwalaho, i no famba a ya teka a zvimbutana a wuya nazvo ka mamani wakwe; a mamani wakwe i no longisela a zvakuga zvo nandziha, a zvi longiselisa lezvi Isaka, a papayi wakwe, a nga zvi lavisa zvona. 15 Andzhako ka lezvo, Rebheka i no teka a tinguwo ta tinene nguvhu ta Esawu, a n’wana wakwe wa nhondzo, leti Rebheka a nga hi nato lomu ndlwini, a bohisa Jakobe,+ a n’wana wakwe wa ndzisana. 16 Rebheka i no vekela a mabhebhe ya zvimbutana mandleni ya Jakobe ni lomu ka wutshamu go kala mawoya ga nhamu yakwe.+ 17 Andzhako ka lezvo, Rebheka i no nyika Jakobe,+ a n’wana wakwe, a zvakuga zvo nandziha ni pawa, lezvi a nga bhikile.

18 Makunu i noya a ya nghena lomu ku nga hi ni papayi wakwe, aku: “Papayi!” Yena aku: “Hi mina loyi! Hi wena mani, n’wananga?” 19 Jakobe i no hlamula papayi wakwe, aku: “Hi mina Esawu, a matewula ya wena.+ Ndzi mahile zvalezvi u nga ndzi byela. Ndzi kombela ku u vhuka u tshama uga nyama leyi ndzi hlotileko, kasi u ndzi katekisa.”+ 20 Zvalezvo Isaka i no wutisa n’wana wakwe, aku: “N’wananga, zvi mahisile kuyini a kuza u hatlisa u yi kuma?” Yena a hlamula, aku: “Hi Jehovha, a Nungungulu wa wena, a nga yi tisa ka mina.” 21 Hi kulandzela, Isaka i no byela Jakobe, aku: “N’wananga, tshinela ndzi ku ringetela kasi ndzi fela ku tiva ku hi wena n’wana wa mina Esawu futsi kutani a hi wena.”+ 22 Hikwalaho, Jakobe i no tshinela ka papayi wakwe Isaka, yena a mu ringetela, a gumesa aku: “A gezu i gezu ga Jakobe kanilezvi a mandla i mandla ya Esawu.”+ 23 Hambulezvo, a nga mu polangi hakuva a mandla yakwe ma wa hi ni mawoya a ku fana ni mandla ya makabye wakwe Esawu. Hikwalaho, i no mu katekisa.+

24 Andzhako ka lezvo, i no mu wutisa, aku: “Hakunene hi wena n’wana wa mina Esawu ke?” Yena a hlamula, aku: “Hi mina.” 25 Hi kulandzela, i te: “N’wananga, ndzi tisele a nyama leyi u hlotileko kasi ndziga, hi kona ndzi to ku katekisa.” Hikwalaho, Jakobe i no teka a mu nyika aga a tlhela a mu nyika ni vhinyo anwa. 26 Andzhako ka lezvo, Isaka, a papayi wakwe, i te: “Tshinela u ndzi pswopswa, n’wananga.”+ 27 Hikwalaho, i no tshinela a mu pswopswa; Isaka i nozwa a masema ya tinguwo takwe.+ I no mu katekisa, aku:

“Hi ngazwa! A masema ya n’wana wa mina ma fana ni masema ya khwati legi Jehovha a gi katekisileko. 28 A Nungungulu wa lisine i wa ku nyike a ndzhokati ya le matilweni,+ ni matshamu yo nona ya laha misaveni,+ ni timbewu to tala ni vhinyo yiswa.+ 29 A vanhu va wa ku tirele, ni matiko ma wa korame mahlweni ka wena. Maha hosi hehla ka vamakabye va wena. A vana va mamani wa wena va wa ti koramise ka wena.+ Vontlhe lava va ku rukako va wa rukiwe; ni vontlhe lava va ku katekisako va wa katekisiwe.”+

30 Makunu laha Isaka a nga mbhetile ku katekisa Jakobe, Jakobe i no tekela ku suka mahlweni ka Isaka, a papayi wakwe, Esawu na a wuya hi le kuhloteni.+ 31 Yenawu i no longisela zvakuga zvo nandziha a famba nazvo ka papayi wakwe. I no byela papayi wakwe, aku: “Papayi, vhuka uga a nyama leyi a n’wana wa wena a nga ku hlotela kasi u ndzi katekisa.” 32 Makunu a papayi wakwe, Isaka, i te ngalo: “Hi wena mani?” Yena aku: “Hi mina n’wana wa wena, a matewula ya wena, Esawu.”+ 33 Isaka i no dzuka, a rurumela nguvhu, aku: “Kasi himani loyi a nga ndzi hlotela nyama a ndzi tisela? Ndzi gile na u nga se chikela, niku ndzi mu katekisile — i ta katekiswa futsi!”

34 Laha Esawu a ngazwa magezu ya papayi wakwe, i no sangula kuba huwa, a rila hi gezu ga hombe na a bayisekile, a byela a papayi wakwe, aku: “Ndzi katekise, ndzi katekise minawu, papayi!”+ 35 Kanilezvi yena aku: “A makabye wa wena i tile a ta ndzi kanganyisa a fela ku kuma a makatekwa lawa ma nga hi ya wena.” 36 Esawu aku: “Hi caleci ci nga mu maha a chuliwa ku hi Jakobe,* hakuva i ndzi wutlele zva mina makhati mambiri!+ I sina a tekile a fanelo ya mina ya wutewula+ niku zvezvi i tekile ni cikatekiso ca mina!”+ A engeta aku: “A wu ndzi vekelangi a cikatekiso ke?” 37 Kanilezvi Isaka i no hlamula Esawu, aku: “Ndzi mu yimisile a kuva hosi hehla ka wena+ ndzi tlhela ndzi mu nyika a vamakabye vakwe vontlhe kasi vava malandza yakwe; ndzi mu nyikile a timbewu ni vhinyo yiswa kasi a hanya hi zvona.+ Ndzi nga ha ku mahela yini n’wananga?”

38 Esawu i no wutisa a papayi wakwe, aku: “Kasi papayi, wova ni cikatekiso cin’we basi? Papayi, ndzi katekise, ndzi katekise minawu!” Zvalezvo Esawu i no rila hi gezu ga hombe, a huma mihloti.+ 39 Hikwalaho, a papayi wakwe Isaka i no mu hlamula, aku:

“Wa zvizwa! U ta hanya lomu ka matshamu yo kala ku nona ya laha misaveni, u tlhela u tshama kule ni ndzhokati ya le hehla matilweni.+ 40 U ta hanya hi cipadha ca wena+ niku u ta tirela a makabye wa wena.+ Kanilezvi laha u to kala u nga ha gwenti,* u ta tshova a kanga wakwe nhan’wini ya wena.”+

41 Hambulezvo, Esawu i no mu vekela civiti Jakobe hi kota ya cikatekiso leci a papayi wakwe a nga mu nyikile.+ Esawu i wa tshama hi ku ti byela lezvi mbilwini yakwe: “A masiku ya ku rila papayi ma laha kusuhani.+ Loku ma hundzile ndzi ta daya Jakobe, a makabye wa mina.” 42 A cikhati leci Rebheka a nga byeliwa a magezu ya Esawu, a n’wana wakwe loyi wa nhondzo, i no tekela ku vitanisa Jakobe a taku kakwe: “A makabye wa wena Esawu i na ni makungo ya ku ti photela hi ku ku daya.* 43 Makunu n’wananga, maha lezvi ndzi wulako. Suka u tsutsuma uya ka makabye wa mina Labani, le Harani.+ 44 Tshama naye cikhatana kala a zanga ya makabye wa wena yi renga, 45 kala a zanga leyi a makabye wa wena a nga nayo hi wena yi bohla, a rivala lezvi u mu maheleko. Andzhako ka lezvo, ndzi ta ku rumelela gezu kasi u wuya. Hikuyini ndzi nga wa ta luza n’wentlhe va vambiri hi siku gin’we ke?”

46 Andzhako ka lezvo, Rebheka i wa tshamela ku byela Isaka, aku: “Ndzi na ni hlomulo wutomini ga mina hi kota ya vanhanyana va Heti.+ Loku Jakobe o tshuka a teka sati ka vanhanyana va Heti, va ku khwatsi vanhanyana lava va tiko legi, ndza ha hanyela yini ke?”+

28 Isaka i no vitana Jakobe a ta mu katekisa a tlhela a mu laya, aku: “U nga teki sati ka vanhanyana va vaKhanani.+ 2 Famba le Padhani-Aramu, a ndlwini ya Bhetuweli, a papayi wa mamani wa wena, u ya teka kona sati ka vanhanyana va Labani,+ a makabye wa mamani wa wena. 3 A Nungungulu wa Ntamu Wontlhe i ta ku katekisa, a ku nyika vana vo tala a tlhela a ku andzisa. Kunene u tava bandla ga matiko.+ 4 I ta ku nyika a makatekwa ya Abrahama,+ wena ni pswalo* wa wena, kasi u fumela a tiko legi u hanyako ka gona kota muluveli, legi Nungungulu a nyikileko Abrahama.”+

5 Hikwalaho, Isaka i no rumela Jakobe. Jakobe i no suka aya le Padhani-Aramu, ka Labani, a n’wana wa Bhetuweli, a muAramu,+ a makabye wa Rebheka,+ a mamani wa Jakobe na Esawu.

6 Esawu i no wona lezvaku Isaka i wa katekisile Jakobe a tlhela a mu rumela le Padhani-Aramu kasi a ya teka kona sati niku a cikhati leci a nga mu katekisa i no mu laya, aku: “U nga teki sati ka vanhanyana va vaKhanani”.+ 7 I no tlhela a wona lezvaku Jakobe i ingisile a papayi wakwe ni mamani wakwe, a suka aya le Padhani-Aramu.+ 8 Makunu Esawu i no zvi pola lezvaku a vanhanyana va vaKhanani va wa nga mu tsakisi a papayi wakwe, Isaka.+ 9 Hikwalaho, i noya ka Ixmayeli a ya teka Mahalate, a nhanyana wa Ixmayeli, a n’wana wa Abrahama, a makabye wa cisati wa Nebhayote, ava sati wakwe, zvin’we ni lava van’wani a nga sina a hi navo.+

10 Jakobe i no suka Bherexebha a famba a kongoma Harani.+ 11 Hi kufamba ka cikhati, i no chikela ka wutshamu go kari a gi longisela kasi ku etlela laho, hakuva a gambo gi wa pelile. Hikwalaho, i no teka ribye gin’we ga wutshamu lego a gi veka lahasi ka hloko yakwe, a etlela laho.+ 12 I no lora a cikadha ci nga yimisilwe laha misaveni; le hehla ka cona, ku wa chikela tilweni; ku wa hi ni tingilozi ta Nungungulu ti nga kandziha na ti chika hi cona.+ 13 Le hehla ka cona ku wa hi na Jehovha, niku i te ngalo:

“Hi mina Jehovha, a Nungungulu wa kokwani wa wena Abrahama ni Nungungulu wa Isaka.+ A tiko legi u etleleko ka gona ndzi ta nyika wena ni pswalo* wa wena.+ 14 A pswalo* wa wena wu ta tala a ku fana ni tindzhoho ta misava;+ u ta hangalaka uya mupela-gambo, ni mutsuwuka-gambo, ni n’walungu,* ni dzongeni* niku a mingango yontlhe ya laha misaveni yi ta katekisiwa hi laha ka wena ni pswalo* wa wena.+ 15 Ndzi na wena, ndzi ta ku vhikela ni kwihi lomu u toya kona, niku ndzi ta ku wuyisa tikweni legi.+ Ndzi nga ta ku tsika kala ndzi maha lezvi ndzi nga ku tsumbisa.”+

16 Andzhako ka lezvo, Jakobe i no khindlimuka wurongweni gakwe, aku: “Hakunene Jehovha i kona ka wutshamu legi; ndzi wa nga zvi tivi!” 17 I no chava nguvhu, a engeta aku: “A wutshamu legi a go ku chavisa! Gi ngova yindlu ya Nungungulu+ ntsena niku leyi i nyangwa ya matilo.”+ 18 Hikwalaho, Jakobe i no vhuka ni mixo nguvhu a teka a ribye legi a nga khigele a gi yimisa gi maha pilari, a chulula mafura hehla ka gona.+ 19 I no chula a wutshamu lego a ku Bheteli,* kanilezvi a kale a vito ga dhoropa lego ku wa hi Luza.+

20 Andzhako ka lezvo, Jakobe i no maha cifungo, aku: “Loku Nungungulu o simama na mina a ndzi vhikela lipfhumbeni la mina a tlhela a ndzi nyika zvakuga* ni tinguwo ta ku boha, 21 ndzi tlhela hi kurula ndlwini ya papayi wa mina, makunu Jehovha i tava a kombisile ku hakunene i Nungungulu wa mina. 22 A ribye legi ndzi gi yimisileko gi maha pilari gi tava yindlu ya Nungungulu+ niku ndzi ta ku nyika zva wukhume zva zvontlhe lezvi u to ndzi nyika.”

29 Andzhako ka lezvo, Jakobe i no tlhavinyeta lipfhumba lakwe aya tikweni ga vanhu va le mutsuwuka-gambo. 2 I no wona hlowo ya mati yi nga hi lomu fusini ni mitlhambi yinharu ya tiyivhu yi nga etlele kusuhani ka yona, hakuva va wa tolovela a ku nwisa mitlhambi ka hlowo leyo. Laha non’wini wa hlowo ku wa hi ni ribye ga hombe. 3 Loku va tlhanganisile a mitlhambi yontlhe, va wa wumbuluta a ribye va gi susa laha non’wini wa hlowo va nwisa a mitlhambi, va gumesa va tlhelisa a ribye wutshan’wini ga gona, laha non’wini wa hlowo.

4 Jakobe i no va wutisa, aku: “Vamakabye va mina, muta hi kwihi?” Va no hlamula, vaku: “Hita hi Harani.”+ 5 I no va wutisa, aku: “Ma mu tiva Labani,+ a zukulu wa Nahori?”+ Va no hlamula, vaku: “Ha mu tiva.” 6 Laha a ngazwa lezvo, i te ngalo kabye: “Wa hanya khwatsi ke?” Va no hlamula, vaku: “Wa hanya khwatsi. Hi gaya Rakeli,+ a nhanyana wakwe, a tako ni tiyivhu!” 7 Yena aku ngalo: “Ka ha hi hlikanhi. A hi cikhati ca ku tlhanganisa a mitlhambi. Ti nwiseni mati a tiyivhu mu gumesa mu ya ti risa.” 8 Laha va ngazwa lezvo, va no hlamula, vaku: “A hi vhumelelwi a ku maha lezvo kala a mitlhambi yontlhe yi tlhangana ni ribye gi wumbulutiwa gi suka laha non’wini wa hlowo. Ntsena andzhako ka lezvo, hi kona hi nwisako tiyivhu.”

9 Na a ha wulawula navo, ku no chikela Rakeli ni tiyivhu ta papayi wakwe, hakuva i wa hi murisi. 10 A cikhati leci Jakobe a nga wona Rakeli, a nhanyana wa Labani, a makabye wa mamani wakwe, ni tiyivhu ta Labani, Jakobe i no tekela ku tshinela a wumbuluta ribye gi suka laha non’wini wa hlowo, a nwisa a tiyivhu ta Labani, a makabye wa mamani wakwe. 11 Hi kulandzela, Jakobe i no pswopswa Rakeli, a tlakusa gezu gakwe a rila. 12 Jakobe i no byela Rakeli lezvaku i wa hi xaka* ga papayi wakwe ni lezvaku i wa hi n’wana wa Rebheka. Rakeli i no tsutsuma a ya byela a papayi wakwe.

13 Zvalezvi Labani+ a ngazwa mahungu lawo xungetano hi Jakobe, a n’wana wa makabye wakwe wa cisati, i no tsutsuma a mu khinga. I no mu bharasara, a mu pswopswa a gumesa a famba naye ndlwini yakwe. Jakobe i no hlawutela Labani zvontlhe lezvi zvi nga mu humelele. 14 Labani i te ngalo kakwe: “Hakunene wena u rambu ga mina ni nyama ya mina.”* Hikwalaho, i no tshama naye a hweti yontlhe.

15 Andzhako ka lezvo, Labani i no wutisa Jakobe, aku: “U ta ndzi tirela mahala hi lezvi u nga xaka* ga mina+ ke? Ndzi byele a ku u lava ku hola hi yini?”+ 16 Labani i wa hi ni vanhanyana vambiri. A vito ga loyi wa nhondzo ku wa hi Leya; loyi wa ndzisana ku wa hi Rakeli.+ 17 Kanilezvi a matihlo ya Leya ma wa nga phatimi kuveni Rakeli i wa hi wasati wo koka nguvhu mahlo niku i wa sasekile. 18 Jakobe i wofa hi Rakeli, hikwalaho i te: “Ndzi ti yimisele ku ku tirela 7 wa malembe hi kota ya Rakeli,+ a nhanyana wa wena wa ndzisana.” 19 Labani aku: “Ndzi zvi wona zvi hi chukwana a ku mu nyikela ka wena a ku hundza ku mu nyikela ka mun’wani wanuna. Simama ku tshama na mina.” 20 Jakobe i no tira 7 wa malembe hi kota ya Rakeli+ kanilezvi i wa ma wonisa a ku khwatsi masiku matsongwani hakuva i wa mu randza.

21 Andzhako ka lezvo, Jakobe i no byela Labani, aku: “Ndzi nyike a sati wa mina kasi ndzi hlengela naye masango, hakuva a masiku lawa hi nga bhula ma mbhelile.” 22 Hi kota ya lezvo, Labani i no ramba vanhu vontlhe va wutshamu lego a maha mubuzo. 23 Kanilezvi laha gi nga ku phum, i no teka a nhanyana wakwe, Leya, a mu nyikela ka Jakobe kasi a hlengela naye masango. 24 Labani i no teka na Zilpa, a nandza gakwe ga cisati, a mu nyikela ka Leya, a nhanyana wakwe, kasi ava nandza gakwe.+ 25 Ni mixo, Jakobe i no wona lezvaku ku wa hi Leya. Hikwalaho, i no wutisa Labani, aku: “Hikuyini u nga ndzi mahela lezvi? Kasi a ndzi ku tirelangi hi kota ya Rakeli ke? Hikuyini u nga ndzi kanganyisa?”+ 26 Labani a hlamula, aku: “Lomu ka hina a zvi mahiwi a ku nyikela a wasati loyi wa ndzisana na ka ha hi ni loyi wa nhondzo. 27 Kulungela a vhiki ga wasati loyi. Andzhako ka lezvo, u ta nyikiwa loyi mun’wani wasati, u ndzi tirela a man’wani malembe ya 7.”+ 28 Jakobe i no maha lezvo, a kulungela a vhiki ga wasati loye. Andzhako ka lezvo, Labani i no mu nyika Rakeli, a nhanyana wakwe, ava sati wakwe. 29 Ahandle ka lezvo, Labani i no nyikela Bhilha,+ a nandza gakwe ga cisati, ka nhanyana wakwe Rakeli, kasi ava nandza gakwe.+

30 Makunu Jakobe i no hlengela masango na Rakeli. Jakobe i wa mu randza nguvhu Rakeli a ku hundza Leya, niku i no tirela Labani a man’wani malembe ya 7.+ 31 Laha Jehovha a nga wona lezvaku Leya a nga randziwi,* i no mu vhulula marumbu a xura nyimba,+ kanilezvi Rakeli i wa hi ngon’wa.+ 32 Hikwalaho, Leya i no xura nyimba a pswala mufana a mu chula ku hi Rubheni,*+ hakuva i waku: “Hi ku Jehovha i wonile a kuxaniseka ka mina.+ Zvezvi a nuna wa mina i ta sangula ku ndzi randza.” 33 I no engeta a xura nyimba a pswala mufana, aku: “Hi ku Jehovha i ndzi zwile, hakuva a ndzi randziwi, a se ndzi nyika loyi kambe.” Hikwalaho, i no mu chula ku hi Simeyoni.*+ 34 I no xura yin’wani nyimba a pswala mufana, aku: “Makunu a nuna wa mina i ta namarela ka mina, hakuva ndzi mu pswalele vafana vanharu.” Hikwalaho, i no chuliwa ku hi Levhi.*+ 35 I no engeta kambe a xura nyimba a pswala mufana, aku: “Ka khati legi ndzi ta dhumisa Jehovha.” Hikwalaho, i no mu chula ku hi Judha.*+ Andzhako ka lezvo, i no nyima ku pswala.

30 Laha Rakeli a nga wona lezvaku a nga mu pswalelangi vana Jakobe, i no lusela makabye wakwe a tlhela a sangula ku byela Jakobe, aku: “Ndzi nyike vana minawu hakuva ndzi ngafa.” 2 Zvalezvo a zanga ya Jakobe yi no vhindlukela Rakeli, aku kakwe: “Kova mina Nungungulu loyi a ku vhaleleko ku pswala vana ke?”* 3 Hikwalaho, Rakeli i te: “Hi loyi Bhilha,+ a nandza ga mina. Hlengela naye masango a fela ku ndzi pswalela vana,* kasi minawu ndzi kuma vana hi laha kakwe.” 4 Zvalezvo, Rakeli i no nyikela Bhilha, a nandza gakwe, ka Jakobe ava sati wakwe. Jakobe i no hlengela naye masango.+ 5 Bhilha i no xura nyimba niku hi kufamba ka cikhati, i no mu pswalela mufana Jakobe. 6 Andzhako ka lezvo, Rakeli i te: “Nungungulu ive mulamuli wa mina a tlhela a ingisa a gezu ga mina a ndzi nyika n’wana wa mufana.” Hi kota ya lezvo, i no mu chula ku hi Dhani.*+ 7 Bhilha, a nandza ga Rakeli, i no tlhela a xura yin’wani nyimba niku hi kufamba ka cikhati i no mu pswalela mufana wa wumbiri Jakobe. 8 Andzhako ka lezvo, Rakeli i te: “Ndzi lwile a yimpi ya hombe ni makabye wa mina ndzi mu hlula!” Hikwalaho, i no mu chula ku hi Naftali.*+

9 Laha Leya a nga wona lezvaku i nyimile ku pswala, i no nyikela Zilpa, a nandza gakwe, ka Jakobe ava sati wakwe.+ 10 Zilpa, a nandza ga Leya, i no mu pswalela mufana Jakobe. 11 Leya aku: “A thomo ga kona!” Hikwalaho, i no mu chula ku hi Gadhi.*+ 12 Andzhako ka lezvo, Zilpa, a nandza ga Leya, i no mu pswalela mufana wa wumbiri Jakobe. 13 Leya aku: “A ndzi no ku tsaka! Hakuva a vanhanyana hakunene va ta ndzi wula loyi a tsakileko.”+ Hikwalaho, i no mu chula ku hi Axeri.*+

14 Laha Rubheni+ a nga kari a nyimanyima lomu masin’wini hi masiku ya ku tshovela trigo, i no kuma a mandragora.* Hikwalaho, i no wuya nawo ka mamani wakwe Leya. Makunu Rakeli i no byela Leya, aku: “Ndzi kombela a mandragora yo kari ya n’wana wa wena.” 15 Laha a ngazwa lezvo, Leya i te ngalo kakwe: “U alakanya ku zvitsongwani lezvi u nga ndzi tekela a nuna wa mina ke?+ Zvezvi u lava ku teka ni mandragora ya n’wana wa mina?” Rakeli a hlamula, aku: “Zvi lulamile, Jakobe i ta etlela na wena a wusiku legi a bhatala a mandragora ya n’wana wa wena.”

16 A cikhati leci Jakobe a nga kari a wuya hi lomu mafusini ni gambo, Leya i no huma a mu khinga a yaku kakwe: “U ta hlengela masango na mina, hakuva ndzi ku xavile hi mandragora ya n’wana wa mina.” Hikwalaho, i no etlela naye a wusiku lego. 17 Nungungulu i nozwa Leya a mu hlamula. Hikwalaho, Leya i no xura nyimba niku hi kufamba ka cikhati i no mu pswalela mufana wa wutlhanu Jakobe. 18 Andzhako ka lezvo, Leya i te: “Nungungulu i ndzi nyikile muholo wa mina* hi lezvi ndzi nga nyikela a nandza ga mina ka nuna wa mina.” Hikwalaho, i no mu chula ku hi Isakari.*+ 19 Leya i no engeta a xura yin’wani nyimba niku hi kufamba ka cikhati i no mu pswalela mufana wa wu 6 Jakobe.+ 20 Makunu Leya i te ngalo: “Nungungulu i ndzi nyikile a cinyikiwo, ina, a cinyikiwo ca cinene. Hi kugumesa, a nuna wa mina i ta ndzi timisela,+ hakuva ndzi mu pswalele a 6 wa vafana.”+ Hikwalaho, i no mu chula ku hi Zebhuloni.*+ 21 Hi kufamba ka cikhati, i no pswala nhanyana a mu chula ku hi Dhina.+

22 Hi kugumesa, Nungungulu i no alakanya Rakeli; Nungungulu i no muzwa a mu vhulula marumbu.+ 23 Rakeli i no xura nyimba a pswala mufana. Hi kulandzela, i te: “Nungungulu i susile a ciruko ca mina!+ 24 Hikwalaho, i no mu chula ku hi Josefa,*+ aku: “Jehovha i ndzi engetelele mun’wani mufana.”

25 Andzhako ka loku Rakeli a pswalile Josefa, Jakobe i no tekela ku byela Labani, aku: “Ndzi tlhatlhe ndzi tlhela wutshan’wini ga mina ni tikweni ga mina.+ 26 Ndzi nyike a vasati va mina ni vana va mina lava ndzi ku tireleko hi kota ya vona, kasi ndzi famba, hakuva wa zvi tiva khwatsi lezvi ndzi nga ku tirelisa zvona.”+ 27 Makunu Labani i no mu byela, aku: “Loku ndzi kumile thomo mahlweni ka wena, . . . a zvikombiso zvi ndzi mahile ndzi zwisisa lezvaku Jehovha wa ndzi katekisa hi kota ya wena.” 28 I no engeta aku: “Ndzi byele lezvi u lavako ku ndzi ku holisa hi zvona, ndzi ta ku nyika.”+ 29 Jakobe aku kakwe: “Wa zvi tiva lezvi ndzi nga ku tirelisa zvona ni lezvi a ntlhambi wa wena wu nga andzisa zvona mandleni ya mina.+ 30 Na ndzi nga seta, u wa hi ni zvitsongwani, kanilezvi a ntlhambi wa wena wu kulile wu tlhela wu pswalelana niku cima ndzi chikela, Jehovha wa ku katekisa. Makunu hi rini ndzi to tira zva ngango wa mina ke?”+

31 Hi kulandzela, Labani i te ngalo: “Ndzi ku nyika yini?” Jakobe a hlamula, aku: “U nga ndzi nyiki nchumu! Ndzi ta simama ku risa a ntlhambi wa wena ni ku wu khatalela,+ loku u ndzi mahela lezvi: 32 Nyamutlha ndzi ta nghena ntlhambini wa wena wontlhe. Hambanisa a tiyivhu tontlhe leti ta matlhakatlhaka kutani ta mivalavala, ni tiyivhana tontlhe ta ntima cikari ka tiyivhana ta vamatsune, ni timbuti ta mikati ta mivalavala, ni ta matlhakatlhaka. Kusukela zvezvi, lezvo zvi tava muholo wa mina.+ 33 A kululama* ka mina ku ta ndzi kustumunyela masikwini ma tako laha u tota u ta hlola a muholo wa mina. A timbuti tontlhe ta mikati ni tiyivhana tontlhe ta vamatsune to kala matlhakatlhaka ni mivalavala u to ti kuma na mina, ti tava ti no yiviwa.”

34 Labani aku: “Zvi lulamile! Zvi wa mahise zvezvi u nga wula.”+ 35 Makunu ka siku galego i no hambanisa a timhongo ta mindzhati-ndzhati, ni ta mivalavala, ni tontlhe a timbuti ta mikati ta matlhakatlhaka ni ta mivalavala, ni tontlhe leti ti nga hi ni ko basa ni tontlhe a tiyivhana ta vamatsune leti ti nga hi ni ka ntima, a ti nyikela ka vana vakwe kasi va ti hlayisa. 36 Andzhako ka lezvo, i no ya ti veka ka pfhuka wa ku famba masiku manharu cikari ka yena na Jakobe. Jakobe i wa risa a ntlhambi wa Labani lowu wu nga sele.

37 Andzhako ka lezvo, Jakobe i no tsema a zvinhongana zvo tsakama zva sihani, ni zva mendwa, ni zva ciwulane,* a vandlela makamba yo kari ku sala ku woneka a matlhakatlhaka yo basa ka zvona. 38 Andzhako ka lezvo, i no veka a zvinhongana lezvi a nga vandlele zviva mahlweni ka ntlhambi lomu zvigowolweni lezvi a mitlhambi yi nga nwela ka zvona mati kasi yi thomba mahlweni ka zvona a cikhati leci yi tako yi tanwa mati.

39 Hikwalaho, a mitlhambi yi wa ta landzana mahlweni ka zvinhongana, niku yi wa ta pswala leti ta mindzhati-ndzhati, ni ta matlhakatlhaka, ni ta mivalavala. 40 Andzhako ka lezvo, Jakobe i no hambanisa a tiyivhana ta vamatsune, a jikisa a mitlhambi ya Labani kasi yi cuwukana ni leti ta mindzhati-ndzhati ni tontlhe leti ta ntima. Hi kulandzela, i no hambanisa a mitlhambi yakwe, a nga yi patsi ni leyi ya Labani. 41 Ni ka cihi cikhati a zvifuyo lezvi zva ntamu zvi nga thomba, Jakobe i wa chela a zvinhongana lomu ka zvigowolo mahlweni ka zvifuyo kasi zvi landzana mahlweni ka zvinhongana. 42 Kanilezvi loku zvi hi zvifuyo zvo kala ntamu i wa nga cheli a zvinhongana lomu zvigowolweni. Hikwalaho, lezvi zvo kala ntamu zvi wa maha zva Labani, kanilezvi lezvi zva ntamu zvi wa maha zva Jakobe.+

43 Jakobe i no vhuvhuma nguvhu, ava ni mitlhambi ya hombe, ni malandza ya cinuna ni ya cisati, ni makameli, ni timbongola.+

31 Hi kufamba ka cikhati, Jakobe i nozwa lezvi a vafana va Labani va nga kari va wula, zvaku: “Jakobe i tekile zvontlhe lezvi zvi nga lumba a papayi wa hina; i hlengeletele a titshomba tontlhe leti hi ka lezvi zvi nga lumba a papayi wa hina.”+ 2 Laha Jakobe a nga cuwuka a nghohe ya Labani, i no wona lezvaku lezvi a nga mu cuwukisisa zvona zvi wa hambene ni zva masiku.+ 3 Hi kugumesa, Jehovha i no byela Jakobe, aku: “Tlhela tikweni ga vapswali va wena ni maxakeni ya wena,+ ndzi ta simama kuva zvin’we na wena.” 4 Makunu Jakobe i no vitanisa Rakeli na Leya vata wuriselweni, lomu ku nga hi ni mitlhambi yakwe, 5 a taku kabye:

“Ndza zvi wona ku lezvi a papayi wa n’wina a ndzi cuwukisisako zvona zvi cicile,+ kanilezvi a Nungungulu wa papayi wa mina i zvin’we na mina.+ 6 Hambu n’wina ma zvi tiva khwatsi lezvaku ndzi tirele a papayi wa n’wina hi ntamu wa mina wontlhe.+ 7 A papayi wa n’wina i zamile ku ndzi kalavela a tlhela a cica muholo wa mina 10 wa makhati; kanilezvi Nungungulu a nga mu vhumelelangi ku a ndzi mahela zvakubiha. 8 Loku hi tlhelo go kari, aku: ‘A zvifuyo lezvi zva matlhakatlhaka zvi tava muholo wa wena’, a ntlhambi wontlhe wu wa pswala lezvi zva matlhakatlhaka; kanilezvi hi gin’wani tlhelo, loku aku: ‘Lezvi zva mindzhati-ndzhati zvi tava muholo wa wena’, a ntlhambi wontlhe wu wa pswala zva mindzhati-ndzhati.+ 9 Hikwalaho, Nungungulu i wa tshamela ku teka a mitlhambi ya papayi wa n’wina a nyika mina. 10 Ka khati go kari, laha a zvifuyo zva ntlhambi lezvi zva mapswele zvi nga thombile, ndzi no tlakusa mahlo ya mina lomu norweni ndzi wona lezvaku a timhongo leti ti nga landza lomu ntlhambini ti wa hi ta mindzhati-ndzhati, ni ta matlhakatlhaka ni ta mivalavala.+ 11 Andzhako ka lezvo, a ngilozi ya Nungungulu wa lisine yi no ndzi vitana lomu norweni, yiku: ‘Jakobe!’ Ndziku: ‘Hi mina loyi.’ 12 Yi simama yiku: ‘Ndzi kombela ku u tlakusa mahlo ya wena u wona lezvaku tontlhe a timhongo leti ti landzako lomu ntlhambini hi leti ta mindzhati-ndzhati, ni ta matlhakatlhaka ni ta mivalavala, hakuva ndzi wonile zvontlhe lezvi Labani a ku mahelako.+ 13 Hi mina Nungungulu wa lisine wa Bheteli,+ lomu u totileko pilari ni lomu u mahileko kona cifungo ka mina.+ Makunu suka, u huma tikweni legi u tlhela tikweni ga wena ga mabeleko.’”+

14 Zvalezvo, Rakeli na Leya va no hlamula, vaku: “Ha ha ta kuma tshomba yo kari ka titshomba ta yindlu ya papayi wa hina ke? 15 A nga hi woni kota valuveli lezvi a nga hi xavisa a tlhela aga a mali yontlhe hi nga xavisiwa hi yona ke?+ 16 Tontlhe a titshomba leti Nungungulu a ti tekileko ka papayi wa hina ti lumba hina ni vana va hina.+ Hikwalaho, maha zvontlhe lezvi Nungungulu a ku byelileko ku maha.”+

17 Hi kulandzela, Jakobe i no suka a va khilelisa makameli a vana vakwe ni vasati vakwe,+ 18 a gula mitlhambi yakwe yontlhe ni titshomba tontlhe leti a nga hlengeletele, a zvifuyo lezvi a nga hi nazvo, lezvi a nga zvi hlengeletele+ le Padhani-Aramu, a tlhela ka papayi wakwe Isaka, tikweni ga Khanani.+

19 Laha Labani a nga yile a ya tsema a woya ga tiyivhu takwe, Rakeli i no yiva a zvifananiso zva terafime*+ zva papayi wakwe.+ 20 Ahandle ka lezvo, Jakobe i no kanganyisa Labani, a muAramu, hi ku nga mu byeli lezvaku wa famba. 21 I no nyemuka a tsemakanya Congo,*+ yena ni zvontlhe lezvi a nga hi nazvo. I no kongoma tikweni ga zvitsunga ga Gileyadhe.+ 22 Hi siku ga wunharu, Labani i no byeliwa lezvaku Jakobe i nyemukile. 23 Hikwalaho, i no teka vamakabye* vakwe va landza Jakobe; loku va fambile a pfhuka wa 7 wa masiku, va no mu kuma tikweni ga zvitsunga ga Gileyadhe. 24 Andzhako ka lezvo, Nungungulu i nota ka Labani, a muAramu,+ hi noro, ni wusiku,+ a taku kakwe: “Ti wonele ka lezvi u to byela Jakobe, kani zva zvinene kutani zvakubiha.”+

25 Hikwalaho, Labani i no tshinela ka Jakobe laha citsungeni, laha a nga gwimbile kona a tenda gakwe. Labani ni vamakabye vakwe va wa govile tikweni ga zvitsunga ga Gileyadhe. 26 Makunu Labani i no wutisa Jakobe, aku: “Zvini u nga maha? Hikuyini u nga ndzi kanganyisa u teka a vanhanyana va mina a ku khwatsi tikhumbi ti khomilweko hi cipadha? 27 Hikuyini u nga ndzi kanganyisa, u nyemuka u famba na u nga ndzi byelangi? Loku u wa no ndzi salisa, na ndzi ku heleketile hi kutsaka, ni tisimu, ni mutandanda, ni citende. 28 Kanilezvi a wu ndzi nyikangi a cikhati ca ku pswopswa a vazukulu* va mina ni vanhanyana va mina. U mahile wupumbu. 29 Ndzi na ni ntamu wa ku ku mahela zvakubiha, kanilezvi a Nungungulu wa papayi wa wena i wonekile ka mina matolo, aku: ‘Ti wonele ka lezvi u to byela Jakobe, kani zva zvinene kutani zvakubiha.’+ 30 Ndza zvi tiva ku u sukile hi lezvi u nga xuva ku tlhela ndlwini ya papayi wa wena, kanilezvi u wa va yivela yini a vanungungulu va mina ke?”+

31 Jakobe i no hlamula Labani, aku: “Ndzi wo chava, hakuva ndzi waku: ‘U nga ndzi wutlela a vanhanyana va wena hi kani.’ 32 Ni wihi loyi u to mu kuma na a hi ni vanungungulu va wena a nga ta hanya. Hlola lezvi ndzi nga nazvo mahlweni ka vamakabye va hina, u teka lezvi zvi nga zva wena.” Kanilezvi Jakobe i wa nga zvi tivi ku Rakeli i wa va yivile. 33 Hikwalaho, Labani i no nghena lomu tendeni ga Jakobe, ni lomu tendeni ga Leya, ni lomu tendeni ga tikhumbi timbiri ta cisati,+ kanilezvi a nga va kumangi. Andzhako ka lezvo, i no huma lomu tendeni ga Leya a ya nghena lomu tendeni ga Rakeli. 34 Ka cikhati leco, Rakeli i wa tekile a zvifananiso zva terafime a zvi fihla lomu ka ndzhava wa vavasati wu nga hi laha ka cigabhatsa ca kameli, a tshamela. Hikwalaho, Labani i no lavetela kontlhe lomu tendeni a zvi vhumala. 35 Makunu Rakeli i no byela a papayi wakwe, aku: “Hosi yanga, u nga zangari hi lezvi ndzi kalako ku suka ndzi yima mahlweni ka wena, hi lezvaku ndzi lomu ka ku wona masiku.”+ Hikwalaho, Labani i no lavetela khwatsi kanilezvi a nga zvi kumangi a zvifananiso zva terafime.+

36 Zvalezvo, Jakobe i no zangara a sangula ku sola Labani. Andzhako ka lezvo, Jakobe i no wutisa Labani, aku: “Hi wihi a nandzu wa mina? Ndzi no wonha yini a kuza u ndzi landza na u zangarile? 37 Makunu lezvi u nga handzela a titshomba ta mina tontlhe, cini u nga ci kuma ca yindlu ya wena? Ci veke laha mahlweni ka vamakabye va mina ni vamakabye va wena kasi va fela ku lamula cikari ka hina va vambiri. 38 Ka 20 wa malembe lawa ndzi nga hi na wena, a tiyivhu ta wena ni timbuti ta wena a ti tshukangi ti handla+ ne a ndzi gangi tiyivhu ta vamatsune ta ntlhambi wa wena. 39 A ndzi tshukangi ndzi ku nehela ni cin’we ci delweko hi zvivandza,+ ndzi wo riha. Hambu loku a cifuyo ci yiviwa ni mumu kutani ni wusiku, u wa londza ku ndzi riha. 40 Ni hlikanhi, ndzi wa pswhumuliwa hi mumu, ni wusiku ndzi biwa hi cirami niku ndzi wa nga kumi wurongo.+ 41 Ndzi hanyile 20 wa malembe na wena. Ndzi ku tirele a 14 wa malembe hi kota ya vanhanyana va wena, ni 6 wa malembe hi kota ya ntlhambi wa wena, niku u cicile a muholo wa mina 10 wa makhati.+ 42 Loku a Nungungulu wa papayi wa mina,+ a Nungungulu wa Abrahama, Loyi a chaviwako hi Isaka,*+ i wa nga hi tlhelweni ga mina, na u ndzi hlongolile ndzi famba hi mandla. Kanilezvi Nungungulu i wonile a kuxaniseka ka mina ni ntiro wo bindza wa mandla ya mina; hi caleci ci nga maha ku a ku kawuka matolo.”+

43 Andzhako ka lezvo, Labani i no hlamula Jakobe, aku: “A vanhanyana lava vanhanyana va mina; a vana i vana va mina; ni ntlhambi i ntlhambi wa mina; zvontlhe lezvi u zvi wonako zva mina ni vanhanyana va mina. Ndzi nga maha yini ca ku vhukela a vanhanyana lava ni vana lava va nga pswala ke? 44 Makunu tana hi ta maha civhumelwano, mina na wena, kasi civa kustumunyu cikari ka hina.” 45 Hikwalaho, Jakobe i no teka ribye a gi yimisa gi maha pilari.+ 46 Hi kulandzela, Jakobe i no byela a vamakabye vakwe, aku: “Rolelani maribye!” Va no rolela maribye va ma wungeletela ma maha nhulu. Andzhako ka lezvo, va noga kwalaho ka nhulu ya maribye. 47 Labani i no yi chula ku Jegar-Sahadhuta* kanilezvi Jakobe i no yi chula ku Galeedhi.*

48 Labani i te ngalo: “A nhulu leyi ya maribye i kustumunyu cikari ka mina na wena nyamutlha.” Hi cigelo leco, i no yi chula ku Galeedhi,+ 49 ni Likhokhola la Murindzeli,* hakuva i waku: “Jehovha i wa hi cuwukele laha a mun’we ni mun’wani wa hina a tova kule ni mun’wani. 50 Loku wo xanisa a vanhanyana va mina ni loku wo teka vasati u ta va patsa ni vanhanyana va mina, hambu loku zvi nga woniwi hi mun’we wa hina hi nga laha, alakanya lezvaku Nungungulu i tava kustumunyu cikari ka mina na wena.” 51 Labani i no engeta a byela Jakobe, aku: “Laha ku na ni nhulu leyi ya maribye, ni pilari legi ndzi gi yimisileko cikari ka mina na wena. 52 A nhulu leyi ya maribye i kustumunyu, ni pilari legi i nchumu wu nyikako wukustumunyu+ ga lezvaku ndzi nga ta tsemakanya a nhulu leyi ya maribye ni pilari legi ndzi ta ku mahela zvahava ni lezvaku wenawu u nga ta tsemakanya a nhulu leyi ya maribye ni pilari legi u ta ndzi mahela zvahava. 53 A Nungungulu wa Abrahama+ ni Nungungulu wa Nahori, a Nungungulu wa papayi wabye, i wa lamule cikari ka hina.” Na Jakobe i no hlambanya hi Loyi Isaka, a papayi wakwe, a nga mu chava.*+

54 Andzhako ka lezvo, Jakobe i no nyikela muphahlo laha citsungeni a gumesa a vitana a vamakabye vakwe va taga pawa. Hikwalaho, va noga va gumesa va etlela laha citsungeni. 55 Hambulezvo, Labani i no vhuka ni mixo nguvhu a pswopswa a vazukulu* vakwe+ ni vanhanyana vakwe, a tlhela a va katekisa.+ Andzhako ka lezvo, Labani i no suka a tlhela kaya.+

32 Andzhako ka lezvo, Jakobe i no ti fambela, ni tingilozi ta Nungungulu ti no tlhangana naye. 2 Zvalezvi Jakobe a nga ti wona, i te: “Legi wugovelo ga Nungungulu!” Hikwalaho, a wutshamu lego i no gi chula ku Mahanayime.*

3 Hi kulandzela, Jakobe i no ruma zvirun’wa zvi ranga mahlweni kakwe zviya ka Esawu, a makabye wakwe, tikweni ga Seyire,+ le tikweni ga Edhomi.+ 4 I no zvi laya, aku: “Mu ta byela a hosi ya mina Esawu, muku: ‘A nandza ga wena, Jakobe, gi ngalo: “Ndzi tshamile* cikhati co leha na Labani kala lezvi.+ 5 Ndzi kumile a tihomu, ni timbongola, ni tiyivhu niku ndzi na ni malandza ya cinuna ni ya cisati.+ Ndzi rumela a mahungu lawa kasi ndzi tivisa a hosi ya mina, ndzi fela ku kuma thomo mahlweni ka wena.”’”

6 Hi kufamba ka cikhati, a zvirun’wa zvi no wuya ka Jakobe, zvi taku: “Hi kumene naye a makabye wa wena, Esawu. Zvezvi i lomu ndleleni ya kuta a ta kumana na wena niku i na ni 400 wa vavanuna.”+ 7 Jakobe i no chava nguvhu ni ku karateka.+ Hikwalaho, i no avanyisa a vanhu lava a nga hi navo hi mitlawa yimbiri, a avanyisa ni mitlhambi, ni tihomu, ni makameli. 8 I te ngalo: “Loku Esawu a dhumela ntlawa wun’we, lowu wun’wani wu ta pona.”

9 Andzhako ka lezvo, Jakobe i no khongela, aku: “O Nungungulu wa kokwani wa mina Abrahama, ni Nungungulu wa papayi wa mina Isaka, wena Jehovha, wena u ndzi byelako ku ngalo: ‘Tlhela tikweni ga wena ni maxakeni ya wena, ndzi ta ku khatalela khwatsi’,+ 10 a ndzi ringanelwi hi lirandzo lontlhe li nga mbheliko ni kutsumbeka kontlhe loku u kombisileko a nandza ga wena,+ hakuva ndzi tsemakanyile a Jordhani na ndzova ni nhonga basi kanilezvi zvezvi ndzi wuya na ndzi hi mitlawa yimbiri.+ 11 Ndza ku kombela,+ ndzi ponise canjeni ga makabye wa mina Esawu, hakuva ndzi chava ku i tata a ta ndzi dhumela,+ mina, ni vamamani ni vana vabye. 12 Hi wena u ngaku: ‘Ndza tiyisa lezvaku ndzi ta ku khatalela khwatsi niku a pswalo* wa wena ndzi ta wu maha wu tala a ku fana ni tindzhoho ta misava ya bimbi, leti ti nga hiko na ku hlayiwa hi kutala ka tona.’”+

13 I no etlela kwalaho. Ka lezvi a nga hi nazvo, i no pambula zvokari kota cinyikiwo ka Esawu, a makabye wakwe:+ 14 200 wa timbuti ta mikati, ni 20 wa timhongo, ni 200 wa tiyivhu ta mikati, ni 20 wa tiyivhu ta vamatsune, 15 ni 30 wa makameli ma nga an’wisa zvikamelana zva wona, ni 40 wa tihomu ta mikati, ni 10 wa madhuna ya tihomu, ni 20 wa timbongola ta mikati, ni 10 wa timbongola ta hombe ta vamatsune.+

16 I no zvi nyikela ka malandza yakwe; a ntlhambi wun’we wu landzela wun’wani, a tlhela a byela malandza yakwe, aku: “Rangani mahlweni ka mina niku mu fanele ku tsawukanisa a ntlhambi wun’we ni lowu wu landzelako.” 17 I no tlhela a laya a nandza go sangula, aku: “Loku u kumana ni makabye wa mina Esawu a ku wutisa ku: ‘U nandza ga mani, kona uya kwihi, niku lezvi zvi nga mahlweni ka wena zva mani?’, 18 mu hlamule, uku: ‘Ndzi lumba a nandza ga wena Jakobe. Leci cinyikiwo ci rumelweko ka hosi ya mina Esawu.+ Yenawu wata hi lendzhako ka hina.’” 19 Jakobe i no laya ni nandza legi ga wumbiri ni legi ga wunharu zvin’we ni malandza wontlhe lawa ma nga kari ma gula mitlhambi, aku: “Mu ta wula zvalezvo ka Esawu a cikhati leci mu to kumana naye. 20 Mu ta wula kambe, muku: ‘Jakobe, a nandza ga wena, wata hi le ndzhako ka hina.’” Hakuva i waku: ‘Loku ndzi mu bhabha hi ku mu rumelela cinyikiwo ci ranga mahlweni ka mina,+ kuzvilava i ta ndzi amukela khwatsi loku ndzi ta tlhangana naye.’ 21 Hikwalaho, a cinyikiwo ci no ranga mahlweni kakwe, kanilezvi yena i no sala a etlela laha wugovelweni.

22 Hi ndzhako ka cikhati, ka wusiku galego, i no vhuka a teka a vasati vakwe va vambiri,+ ni malandza yakwe ya mambiri ya cisati,+ ni vanana vakwe va 11, va tsemakanya hi laha va tlhatukako hi kona Jabhoke.+ 23 Hikwalaho, i no va teka a va tlhatukisa a congo, a tlhatukisa ni zvontlhe lezvi a nga hi nazvo.

24 Hi kugumesa, Jakobe i no sala yece. Makunu a wanuna wo kari i no sangula ku pfinyana naye kala gi ku n’we.+ 25 Laha a nga wona lezvaku i wa nga zvi kotangi ku hlula Jakobe, i no mu henya laha a marambu ya nyonga ma tlhanganako kona. A nyonga ya Jakobe yi no khuyuka a cikhati leci va nga kari va pfinyana.+ 26 Andzhako ka lezvo, a wanuna i te ngalo: “Ndzi tsike ndzi famba, hakuva gaca.” Yena aku: “Ndzi nga ta ku tsika u famba kala u ndzi katekisa.”+ 27 Hikwalaho, i no mu wutisa, aku: “Hi wena mani?” Yena aku: “Hi mina Jakobe.” 28 Hi kulandzela, a wanuna i te ngalo: “A vito ga wena gi nga ta hava Jakobe, kanilezvi gi tava Izrayeli,*+ hakuva u lwile na Nungungulu+ ni vanhu, u gumesa u hlula.” 29 Jakobe yenawu aku: “Ndzi byele a vito ga wena.” Hambulezvo, a wanuna loye, i te: “Hikuyini u wutisako a vito ga mina?”+ Makunu i no mu katekisa kwalaho. 30 Hikwalaho, Jakobe i no chula a wutshamu lego ku Peniyeli,*+ hakuva i waku: “Ndzi wonile Nungungulu nghohe ni nghohe, hambulezvo a wutomi* ga mina gi ponile.”+

31 Zvalezvi a nga hundza le Penuweli,* a gambo gi no tsuwuka kanilezvi i wa kari a khwita hi kota ya nyonga yakwe.+ 32 Hi cigelo leco, a vana va Izrayeli a va toloveli kuga a siha wa laha ka thanga lowu wu nga laha ku tlhanganako marambu ya laha nyongeni kala ni nyamutlha lezvi, hakuva a wanuna loye i henyile laha ku tlhanganako a marambu ya nyonga ya Jakobe hi laha ka siha wa thanga.

33 Jakobe i no tlakusa mahlo a wona Esawu na ata ni 400 wa vavanuna.+ Hikwalaho, i no nyikela vanana ka Leya, na Rakeli, ni ka malandza mambiri ya cisati.+ 2 I no rangisa malandza ya cisati ni vanana va wona,+ ma landzelwa hi Leya ni vana vakwe,+ a gumesa hi Rakeli+ na Josefa. 3 Andzhako ka lezvo, i no ranga mahlweni kabye a ya korama a 7 wa makhati lahasi a cikhati leci a nga kari a tshinela ka makabye wakwe.

4 Kanilezvi Esawu i no tsutsuma a mu khinga; i no mu bharasara, a mu pswopswa, va rila. 5 Laha Esawu a nga tlakusa mahlo a wona vavasati ni vanana, i no mu wutisa, aku: “Hi vamani lava u nga navo?” Jakobe aku: “I vana lava Nungungulu, hi wuxinji gakwe, a nyikileko nandza ga wena.”+ 6 Zvalezvo, a malandza ya cisati ma no tshinela ni vana va wona ma ta korama lahasi; 7 Leya yenawu i no tshinela ni vana vakwe va ta korama lahasi. Andzhako ka lezvo, ku no tshinela Josefa na Rakeli va ta koramawu.+

8 Esawu i no wutisa, aku: “Hikuyini u nga ndzi rumelela a citshungu leci contlhe ca vaendzi ndzi nga kumana naco?”+ I no hlamula, aku: “Ndzi fela ku kuma thomo mahlweni ka hosi ya mina.”+ 9 Esawu aku: “Makabye wa mina, mina ndzi na ni titshomba to tala.+ Tshama ni zva wena.” 10 Kanilezvi Jakobe i te: “Ahihi. Loku ndzi kumile thomo mahlweni ka wena, amukela a cinyikiwo ca mina hi canjeni ga mina, hakuva ndzi ci nehile kasi ndzi kota ku wona a nghohe ya wena. Ndzi wonile nghohe ya wena a ku khwatsi ndzo wona a nghohe ya Nungungulu hi lezvi u ndzi amukeleko hi kutsaka.+ 11 Ndzi kombela ku u amukela a cinyikiwo leci u nehelweko,*+ hakuva Nungungulu i ndzi mahele wunene niku ndzi na ni zvontlhe ndzi zvi lavako.”+ I no simama ku mu khongotela kala a teka.

12 Hi ndzhako ka cikhati, Esawu i te: “A hi suke hi famba, mina ndzi ta ranga mahlweni ka wena.” 13 Kanilezvi Jakobe i te: “A hosi ya mina ya zvi tiva lezvaku a vanana va ha hi vatsongwani+ niku ndzi na ni tiyivhu ni tihomu ta mapswele ti an’wisako. Loku zvi guliwa hi kuhatlisa hi siku gin’we, a ntlhambi wontlhe wu tafa. 14 Ndzi kombela lezvaku a hosi ya mina yi ranga mahlweni ka nandza ga yona, kanilezvi mina ndzi ta sala ndzi hletela a zvifuyo zva mina ni vanana kala ndzi chikela ka hosi ya mina, le Seyire.”+ 15 Andzhako ka lezvo, Esawu i te: “Makunu sala ni vavanuna vo kari va mina.” Jakobe aku: “A zvizi zvi lava lezvo. Lezvi ndzi nga kuma thomo mahlweni ka hosi ya mina zvi ringene!” 16 Hikwalaho, Esawu i no tlhela Seyire ka siku galego.

17 Jakobe i noya Sukote+ a ya ti akela yindlu ni maranga ya ntlhambi wakwe. Hi cigelo leco, a wutshamu lego i no gi vitana ku Sukote.*

18 Andzhako ka loku Jakobe a sukile Padhani-Aramu,+ i no chikela dhoropeni ga Xekemi,+ tikweni ga Khanani,+ na a hlayisekile. I no maha wugovelo gakwe kusuhani ni dhoropa. 19 I no xava cipandze co kari ca simu ka vana va Hamori, a papayi wa Xekemi, hi 100 wa zvipandze zva mali,*+ a gwimba kona a tenda gakwe. 20 I no aka alati ka wutshamu lego a gi vitana ku Nungungulu, a Nungungulu wa Izrayeli.+

34 Makunu Dhina, a nhanyana wa Jakobe loyi a pswalelweko hi Leya,+ i wa tolovela a ku huma a ya hlakana ni* vanhanyana va tiko.+ 2 A cikhati leci Xekemi, a mufana wa Hamori, a muHivi,+ a hosana ya tiko, a nga mu wona, i no mu khoma a etlela naye, a mu xakela. 3 I* no namarela nguvhu ka Dhina, a nhanyana wa Jakobe; i nofa hi yena a tlhela a zama ku mu gangisa hi magezu.* 4 Hi kugumesa, Xekemi i no byela Hamori,+ a papayi wakwe, aku: “Ndzi tekele a nhanyana loyi ava sati wa mina.”

5 A cikhati leci Jakobe a ngazwa lezvaku Xekemi i nyenyezisile a nhanyana wakwe, Dhina, a vafana vakwe va wa hi mafusini na va risa mitlhambi. Hikwalaho, i no miyela kala va wuya. 6 Andzhako ka cikhati, Hamori, a papayi wa Xekemi, i noya a ya wulawula na Jakobe. 7 Kanilezvi a vafana va Jakobe va no zvizwa va tekela ku wuya hi mafusini. Va wa swirekile va tlhela va zangara nguvhu hi kota ya lezvi Xekemi a nga mu wisile tingana Izrayeli hi ku etlela ni nhanyana wa Jakobe,+ wu nga nchumu wu nga kala wu nga faneli ku mahiwa.+

8 Hamori i no wulawula navo, aku: “A mufana wa mina Xekemi ofa hi* nhanyana wa n’wina. Ndza mu kombela, mu nyikeni ava sati wakwe 9 niku mahani a wuxaka ga kutekana na hina.* Hi nyikeni a vanhanyana va n’wina, n’winawu mu teka a vanhanyana va hina.+ 10 Mu nga tshama na hina, ni tiko gi tava mahlweni ka n’wina. Tshamani, mu maha mabhindzu ka gona mu tlhela mu aka ka gona.” 11 Xekemi i no byela a papayi wa Dhina ni vamakabye vakwe, aku: “Loku ndzo kuma thomo mahlweni ka n’wina ndzi ta mu nyika ni cihi mu to ci lava. 12 Mu nga wula a ntsengo wa hombe nguvhu wa lowolo ni cinyikiwo.+ Ndzi longile ku mu nyika ni cihi mu to ci lava. Leci ntsena ndzi ci lavako ku mu ndzi nyika a nhanyana loyi ava sati wa mina.”

13 A vafana va Jakobe va no hlamula Xekemi ni papayi wakwe Hamori hi kukhohlisa, hakuva i wa nyenyezisile Dhina, a makabye wabye. 14 Va te ngalo kabye: “A hi nge tshuki hi maha lezvo; a hi nge nyikeli a makabye wa hina ka wanuna a nga mahiwangiko wukwera,*+ hakuva lezvo tingana ka hina. 15 Hi ngo mu nyikela kakwe ntsena loku mu vhumela ku maha nchumu wun’we: Mu fana na hina, mu va maha wukwera* vontlhe a vavanuna va n’wina.+ 16 Andzhako ka lezvo, hi ta mu nyika a vanhanyana va hina, hinawu hi teka a vanhanyana va n’wina. Hi ta tshama na n’wina, hiva vanhu van’we. 17 Kanilezvi loku mu nga hi ingisi, mu ala ku maha wukwera,* hi ta teka a nhanyana wa hina hi famba naye.”

18 A magezu yabye ma no tsakisa Hamori+ na Xekemi, a mufana wa Hamori.+ 19 Xekemi i no tekela ku maha lezvi va nga kombele,+ hakuva i wafa hi n’waJakobe. Xekemi hi yena a nga kombisiwa nguvhu cichavo ndlwini yontlhe ya papayi wakwe.

20 Hikwalaho, Hamori ni mufana wakwe Xekemi va noya nyangweni ya dhoropa va ya byela a vavanuna va dhoropa gabye,+ vaku: 21 “A vavanuna lava va xuva kuva ni kurula na hina. Va wa tshame lomu tikweni, va maha mabhindzu ka gona, hakuva a tiko ga hombe niku ga enela kasi va tshama. Hi nga teka vanhanyana vabye vava vasati va hina, hinawu hi va nyika a vanhanyana va hina.+ 22 Ntsena ku a vavanuna lava va ngo vhumela ku tshama na hina kasi hiva vanhu van’we loku hi maha nchumu wun’we: A vavanuna vontlhe cikari ka hina va mahiwa wukwera,* a ku khwatsi hi lezvi vona va mahilweko wukwera.+ 23 Xana a zvilo zvabye, ni titshomba tabye, ni mitlhambi yabye zvi nga tava zva hina ke? Hikwalaho, a hi vhumeleni kasi va tshama na hina.” 24 Vontlhe lava va nga huma hi nyangwa ya dhoropa gakwe va no ingisa Hamori ni mufana wakwe Xekemi. A vavanuna vontlhe va no mahiwa wukwera,* vontlhe lava va nga huma hi nyangwa ya dhoropa.

25 Hambulezvo, hi siku ga wunharu, laha a vavanuna va nga hazwa kubayisa, a vafana vambiri va Jakobe, Simeyoni na Levhi, a vamakabye va Dhina,+ a mun’we ni mun’we wabye i no teka a cipadha cakwe va nghena dhoropeni na gi nga tivi nchumu, va daya a vavanuna vontlhe.+ 26 Va no daya Hamori ni mufana wakwe Xekemi hi cipadha, va teka Dhina ndlwini ya Xekemi va famba. 27 A vafana lava van’wani va Jakobe va noya va ya kuma a zvirumbi zva vavanuna lava va nga delwe, va phanga a dhoropa, hakuva va wa nyenyezisile a makabye wabye wa cisati.+ 28 Va no teka a tiyivhu tabye, ni timbuti tabye, ni tihomu tabye, ni timbongola tabye, ni zvontlhe lezvi zvi nga hi lomu dhoropeni ni le handle ka dhoropa. 29 Va no teka ni tontlhe a titshomba tabye, va khoma zvontlhe a zvivanana zvabye ni vasati vabye va tlhela va phanga zvontlhe lezvi zvi nga hi lomu tindlwini.

30 Hi kota ya lezvo, Jakobe i no byela Simeyoni na Levhi,+ aku: “Mu ndzi nehele hlomulo wa hombe, mu ndzi maha masema yo nuha ka vanhu va tiko legi, a vaKhanani, ni vaPerezi. Lezvi hi nga va tsongwani, va ta hlengeletana va ndzi dhumela, va ndzi hihirita, mina ni yindlu ya mina.” 31 Kanilezvi va no mu wutisa, vaku: “Saseka ku a makabye wa hina a mahiwa cibhayi hi munhu ke?”

35 Andzhako ka lezvo, Nungungulu i no byela Jakobe, aku: “Suka u kandziha uya Bheteli+ u ya tshama kona u tlhela u aka alati ga Nungungulu wa lisine, loyi a wonekileko ka wena a cikhati leci u nga tsutsuma Esawu, a makabye wa wena.”+

2 Makunu Jakobe i no byela a ngango wakwe ni vontlhe lava a nga hi navo, aku: “Ti tlhatlhiseni ka vanungungulu va matiko lava va nga cikari ka n’wina,+ mu ti basisa mu tlhela mu cica a tinguwo ta n’wina, 3 hi suka hi kandziha hiya Bheteli. Kwaseyo ndzi ta aka alati ga Nungungulu wa lisine, loyi a ndzi hlamulileko ka siku legi ndzi nga hi kukaratekeni a tlhela ava na mina ni kwihi lomu ndzi ngaya kona.”+ 4 Hikwalaho, va no nyikela ka Jakobe vontlhe a vanungungulu va matiko lava va nga hi navo ni tiphera ta tindleve* leti va nga bohile, Jakobe a zvi kelela* lahasi ka sinya ya hombe leyi yi nga hi kusuhani ni le Xekemi.

5 A cikhati leci va nga kari va famba, a vanhu va madhoropa lawa ma nga hi kusuhani navo va no khon’wa hi kuchava Nungungulu, hikwalaho, a va hlongoliselangi a vana va Jakobe. 6 Hi kugumesa, Jakobe ni vontlhe lava a nga hi navo va no chikela Luza,+ ku nga Bheteli, tikweni ga Khanani. 7 I no aka alati kwalaho, a chula a wutshamu lego ku El-Bheteli,* hakuva hi kwalaho a Nungungulu wa lisine a nga ti wonekelisile kona kakwe a cikhati leci a nga kari a tsutsuma makabye wakwe.+ 8 Hi ndzhako ka cikhati, Dhebhora,+ a yayi ya Rebheka, i nofa a lahliwa le ndzhelelweni wa Bheteli, lahasi ka tule. Hikwalaho, Jakobe i no wu chula ku Aloni-Bhakuti.*

9 Nungungulu i no woneka kambe ka Jakobe a cikhati leci Jakobe a nga kari a wuya hi le Padhani-Aramu, a mu katekisa. 10 Nungungulu i te ngalo kakwe: “A vito ga wena hi wena Jakobe.+ U nga ta ha vitaniwa ku Jakobe kanilezvi u ta vitaniwa ku Izrayeli.” Nungungulu i no sangula ku mu vitana ku Izrayeli.+ 11 Nungungulu i no engeta a mu byela, aku: “Hi mina Nungungulu wa Ntamu Wontlhe.+ Pswala vana vo tala, mu andza. A matiko ni bandla ga matiko zvi ta huma hi ka wena,+ ni tihosi ti ta huma hi ka wena.*+ 12 A tiko legi ndzi nyikileko Abrahama na Isaka, ndzi ta nyika wena, ndzi nyika ni pswalo* wa wena andzhako ka wena.”+ 13 Andzhako ka lezvo, Nungungulu i no suka ka wutshamu legi a nga wulawulile naye ka gona.

14 Hikwalaho, Jakobe i no yimisa pilari ka wutshamu legi Nungungulu a nga wulawulile naye ka gona, gi nga pilari ga ribye, a chulula munyikelo wa zvakunwa hehla ka gona a tlhela a chulula mafura hehla ka gona.+ 15 Jakobe i no simama ku vitana a wutshamu legi Nungungulu a nga wulawulile naye ka gona aku i Bheteli.+

16 Andzhako ka lezvo, va no suka Bheteli. Na ka ha kiyela a pfhuka wo kari kasi va chikela le Efrata, Rakeli i no sangula ku lun’wa, hambulezvo, a ku phuluka zvi wa mu karatela nguvhu. 17 Kanilezvi na a ha zama ku humesa n’wana, a singalakati* gi te ngalo kakwe: “U nga chavi, hakuva a n’wana loyi yenawu u ta mu ganya.”+ 18 Ka cikhati co gumesa ca wutomi gakwe* (hakuva i wofa), i no mu chula ku hi Bhen-Oni,* kanilezvi a papayi wakwe i no mu chula ku hi Bhenjamini.*+ 19 Hi ndlela leyo, Rakeli i nofa, a lahliwa ndleleni ya kuya Efrata, ku nga le Bhetlehema.+ 20 Jakobe i no yimisa pilari hehla ka cilahla cakwe. Legi i pilari ga cilahla ca Rakeli kala ni nyamutlha lezvi.

21 Andzhako ka lezvo, Izrayeli i no suka a famba, a ya gwimba tenda gakwe na a hundzile a likhokhola* la Edhera. 22 Ka khati go kari, Izrayeli na a ha tshama tikweni lego, Rubheni i no etlela na Bhilha, a sati wa mutsongwani* wa papayi wakwe, niku Izrayeli i no zvi tiva.+

Jakobe i wa hi ni 12 wa vafana. 23 A vafana lava Jakobe a nga pswalelwa hi Leya, a matewula hi Rubheni,+ ku gamela Simeyoni, na Levhi, na Judha, na Isakari na Zebhuloni. 24 A vafana lava a nga pswalelwa hi Rakeli hi Josefa na Bhenjamini. 25 A vafana lava a nga pswalelwa hi Bhilha, a nandza ga Rakeli, hi Dhani na Naftali. 26 A vafana lava a nga pswalelwa hi Zilpa, a nandza ga Leya, hi Gadhi na Axeri. Lava vafana va Jakobe lava a nga pswalelwa le Padhani-Aramu.

27 Hi kugumesa, Jakobe i no chikela Mamre+ lomu ku nga hi na Isaka, a papayi wakwe, le Kiriyat-Arbha, ku nga le Hebroni, lomu Abrahama zvin’we na Isaka va hanyileko kona kota valuveli.+ 28 Isaka i no hanya 180 wa malembe.+ 29 Andzhako ka lezvo, Isaka i no hefemula hi khati go gumesa, afa; i no hlengeletwa ka vanhu vakwe* na a hanyile wutomi go leha ni go tsakisa.* A vafana vakwe, Esawu na Jakobe, va no mu lahla.+

36 Lawa matimu ya Esawu, ku nga Edhomi.+

2 Esawu i no teka a vanhanyana va vaKhanani vava vasati vakwe, ku nga Adha,+ a nhanyana wa Eloni, a muHiti;+ na Oholibhama,+ a nhanyana wa Ana, a zukulu wa cisati wa Zibheyoni, a muHivi; 3 na Bhasemati,+ a nhanyana wa Ixmayeli tlhelo makabye wa cisati wa Nebhayote.+

Lava i vana lava Esawu a nga pswalelwa le tikweni ga Khanani. 6 Andzhako ka lezvo, Esawu i no teka a vasati vakwe, ni vafana vakwe, ni vanhanyana vakwe, zvi nga zviro zvontlhe zva ngango wakwe, ni ntlhambi wakwe, ni zvifuyo zvakwe lezvi zvin’wani, ni tontlhe a titshomba leti a nga hlengeletele+ tikweni ga Khanani, a suka aya ka tiko gin’wani ga le kule, a tsawukana na Jakobe, a makabye wakwe,+ 7 hakuva a titshomba tabye ti wa tele nguvhu laha ka ku zvi wa nga koteki lezvaku va tshama zvin’we niku a tiko legi va nga kari va hanya ka gona* gi wa nga va eneli hi kota ya mitlhambi yabye. 8 Hikwalaho, Esawu i noya a ya tshama tikweni ga zvitsunga ga Seyire.+ Esawu hi Edhomi.+

9 Lawa matimu ya Esawu, a papayi wa vaEdhomi le tikweni ga zvitsunga ga Seyire.+

10 A mavito ya vana va Esawu hi lawa: Elifaze, a n’wana wa Adha, a sati wa Esawu; na Reweli, a n’wana wa Bhasemati, a sati wa Esawu.+

11 A vana va Elifaze hi Temane,+ na Omari, na Zefo, na Gatama na Kenazi.+ 12 Timna i nova sati wa mutsongwani* wa Elifaze, a mufana wa Esawu. Hi kufamba ka cikhati, Timna i no pswala Amaleki,+ a pswalela Elifaze. Lava i vana va Adha, a sati wa Esawu.

13 A vana va Reweli hi lava: Nahata, na Zera, na Xama na Miza. Lava i vana va Bhasemati,+ a sati wa Esawu.

14 A vana va Oholibhama, a nhanyana wa Ana, a zukulu wa cisati wa Zibheyoni, a sati wa Esawu, lava a nga pswalela Esawu hi lava: Jewuxa, na Jalama na Kora.

15 A tihosana ta tixaka ta vana va Esawu+ hi leti: A vana va Elifaze, a matewula ya Esawu, hi lava: Hosana Temane, na hosana Omari, na hosana Zefo, na hosana Kenazi,+ 16 na hosana Kora, na hosana Gatama, na hosana Amaleki. Leti tihosana ta tixaka ti humileko hi ka Elifaze,+ le tikweni ga Edhomi. Lava i vana va Adha.

17 A vana va Reweli, a mufana wa Esawu hi lava: Hosana Nahata, na hosana Zera, na hosana Xama, na hosana Miza. Leti tihosana ta tixaka ti humileko hi ka Reweli, le tikweni ga ka Edhomi.+ Lava i vana va Bhasemati, a sati wa Esawu.

18 Hi kugumesa, a vana va Oholibhama, a sati wa Esawu, hi lava: Hosana Jewuxa, na hosana Jalama, na hosana Kora. Leti tihosana ta tixaka ti humileko hi ka Oholibhama, a nhanyana wa Ana, a sati wa Esawu.

19 Lava i vana va Esawu, ku nga Edhomi,+ niku leti tihosana tabye.

20 A vana va Seyire, a muHori, a vaaki va tiko,+ hi lava: Lotani, na Xobhali, na Zibheyoni, na Ana,+ 21 na Dhixoni, na Ezeri na Dhixani.+ Leti tihosana ta tixaka ta vaHori, a vana va Seyire, le tikweni ga Edhomi.

22 A vana va Lotani hi Hori na Hemami. A makabye wa Lotani wa cisati ku wa hi Timna.+

23 A vana va Xobhali hi lava: Alvhani, na Manahate, na Ebhale, na Xefo na Oname.

24 A vana va Zibheyoni+ hi lava: Aya na Ana. Ana loyi hi yaloyi a nga kuma a zvibuka zva mati yo hisa le ciwuleni na a kari a wonelela a timbongola ta papayi wakwe.

25 A vana va Ana hi lava: Dhixoni na Oholibhama, a nhanyana wa Ana.

26 A vana va Dhixoni hi lava: Hemdhani, na Exbhani, na Itrani, na Kerani.+

27 A vana va Ezeri hi lava: Bhilhani, na Zavhani, na Akana.

28 A vana va Dhixani hi lava: Uza na Arana.+

29 A tihosana ta tixaka ta vaHori hi leti: Hosana Lotani, na hosana Xobhali, na hosana Zibheyoni, na hosana Ana, 30 na hosana Dhixoni, na hosana Ezeri, na hosana Dhixani.+ Leti tihosana ta tixaka ta vaHori hi kuya hi tihosana tabye le tikweni ga Seyire.

31 Makunu a tihosi leti ti nga fumela a tiko ga Edhomi,+ na ku nga seva ni hosi yi nga fumela vaIzrayeli,* hi leti:+ 32 Bhela, a n’wana wa Bheyori, i no fumela Edhomi niku a vito ga dhoropa gakwe ku wa hi Dhinhaba. 33 A cikhati leci Bhela a ngafa, Jobhabhe, a n’wana wa Zera, wa le Bhozra, i no sangula ku fuma cikhundleni cakwe. 34 A cikhati leci Jobhabhe a ngafa, Huxamu, wa le tikweni ga vaTemane, i no sangula ku fuma cikhundleni cakwe. 35 A cikhati leci Huxamu a ngafa, Hadhadhe, a n’wana wa Bhedhadhi, loyi a nga hlula a vaMidhiyani+ cipandzeni* ca Mowabhi, i no sangula ku fuma cikhundleni cakwe, ni vito ga dhoropa gakwe gi wa hi Avhiti. 36 A cikhati leci Hadhadhe a ngafa, Samla, wa le Masreka, i no sangula ku fuma cikhundleni cakwe. 37 A cikhati leci Samla a ngafa, Xawule, wa le Rehobhote, kusuhani ni congo, i no sangula ku fuma cikhundleni cakwe. 38 A cikhati leci Xawule a ngafa, Bhaali-Hanani, a n’wana wa Akbhori, i no sangula ku fuma cikhundleni cakwe. 39 A cikhati leci Bhaali-Hanani, a n’wana wa Akbhori, a ngafa, Hadhari, i no sangula ku fuma cikhundleni cakwe. A vito ga dhoropa gakwe ku wa hi Pawu, niku a sati wakwe ku wa hi Mehetabheli, a nhanyana wa Matredhi, a nhanyana wa Mezahabha.

40 A mavito ya tihosana ta tixaka ti humako hi ka Esawu hi mingango ya tona, ni matshamu ya tona, ni mavito ya tona, hi lawa: Hosana Timna, na hosana Alivha, na hosana Jetete,+ 41 na hosana Oholibhama, na hosana Ela, na hosana Pinoni, 42 na hosana Kenazi, na hosana Temane, na hosana Mibzare, 43 na hosana Magdhiyeli, na hosana Iramu. Leti tihosana ta tixaka ti humako hi ka Edhomi hi kuya hi lomu ti nga tshamile kona tikweni ga tshomba yabye.+ Loyi hi Esawu, a papayi wa vaEdhomi.+

37 Jakobe i no simama ku hanya Khanani, lomu a papayi wakwe a nga luvele kona.+

2 A matimu ya Jakobe hi lawa:

Laha Josefa+ a nga hi ni 17 wa malembe, i wa risa ntlhambi+ ni vafana va Bhilha,+ ni vafana va Zilpa,+ a vasati va papayi wakwe. Josefa i noya a ya va wuleta ka papayi wabye. 3 Izrayeli i wa mu randza nguvhu Josefa a ku hundza vontlhe a vafana vakwe lava van’wani+ hakuva i wa hi n’wana wa wukhosana gakwe. I no mu rungisela a nghanju yo hlawuleka.* 4 A cikhati leci a vamakabye vakwe va nga wona lezvaku wa randziwa nguvhu hi papayi wabye a ku hundza vontlhe a vamakabye vakwe, va no sangula ku mu venga, va nga ha wulawuli naye hi kurula.

5 Hi ndzhako ka cikhati, Josefa i nova ni noro, niku i no hlawutela a vamakabye vakwe;+ hikwalaho, va no kuma cin’wani cigelo ca ku va mu venga. 6 I te ngalo kabye: “Hi nga ingiselani lezvi ndzi nga lora. 7 Hi wa kari hi bohelela tinyandza lomu masin’wini; makunu a nyandza ya mina yi no suka yi yima yi ku pswhe, a tinyandza ta n’wina ti randzela ti tlhela ti khizamela a nyandza ya mina.”+ 8 A vamakabye vakwe va te ngalo kakwe: “U lava ku ti maha hosi hehla ka hina u hi fumela ke?”+ Hikwalaho, va no kuma cin’wani cigelo ca ku mu venga hi kota ya miloro yakwe ni lezvi a nga wula.

9 Andzhako ka lezvo, i no tlhela ava ni wun’wani noro a ya hlawutela a vamakabye vakwe, aku: “Ndzi lorile zvin’wani. Ka khati legi ndzi lorile a gambo, ni hweti, ni 11 wa tinyeleti na zvi ndzi khizamela.”+ 10 Andzhako ka lezvo, i no hlawutela a papayi wakwe ni vamakabye vakwe; a papayi wakwe i no mu kana, aku: “Wu wula yini a noro walowo u nga lora? Zvi wula ku mina, ni mamani wa wena, ni vamakabye va wena hi tata hi ta korama lahasi mahlweni ka wena ke?” 11 A vamakabye vakwe va no mu lusela+ kanilezvi a papayi wakwe i no hlayisa a timhaka leto maalakanyweni yakwe.

12 A vamakabye vakwe va no suka va ya risa ntlhambi wa papayi wabye kusuhani ni Xekemi.+ 13 Hi ndzhako ka cikhati, Izrayeli i no byela Josefa, aku: “A vamakabye va wena vo risa mitlhambi kusuhani ni Xekemi. Tana ndzi ta ku ruma uya kabye.” Zvalezvo Josefa i te: “Ndzi rume!” 14 Hikwalaho, Izrayeli i te ngalo ka Josefa: “Famba u ya wona ku a vamakabye va wena va vhukisa kuyini. Cuwuka ni ntlhambi, u wuya u ta ndzi byela.” Makunu i no mu ruma a suka hi nkoveni wa Hebroni+ a famba a kongoma Xekemi. 15 Hi ndzhako ka cikhati, Josefa i no kumiwa hi wanuna na a rendzelekela lomu mafusini. A wanuna loye i no mu wutisa, aku: “U famba u lava yini?” 16 Yena aku: “Ndzi famba ndzi lava a vamakabye va mina. Ndzi kombela ku u ndzi leletela lomu va risako kona mitlhambi.” 17 A wanuna loye i no simama, aku: “Va sukile laha; ndzi va zwile na vaku: ‘A hi yeni Dhotani.’” Hikwalaho, Josefa i no landza a vamakabye vakwe a ya va kuma Dhotani.

18 Va no mu wona na a hata hi le kule. Na a nga se chikela laha va nga hi kona, va no xuxa cikungo ca ku mu daya. 19 Hikwalaho, va no byelana, vaku: “Hi loyi, wata nyamilorwani.+ 20 Makunu tanani hi ta mu daya, hi mu hoxa lomu hloweni; hi taya hi yaku i khadamulilwe hi civandza ca khwati; hi ta wona lezvaku a miloro yakwe yi ta kuyini.” 21 Laha Rubheni+ a ngazwa lezvo, i no zama ku mu tlhatlhisa mandleni yabye, aku: “Hi nga susi wutomi* gakwe.”+ 22 A engeta, aku: “Mu nga halati nkhata.+ Mu hoxeni lomu hloweni leyi ya lomu ciwuleni kanilezvi mu nga mu bayisi.”+ Rubheni i wa xuva a ku mu tlhatlhisa mandleni yabye a fela ku mu tlhelisa ka papayi wakwe.

23 Hikwalaho, zvalezvi Josefa a nga chikela laha ka vamakabye vakwe, va no mu tlhatlha a nghanju yakwe yo hlawuleka leyi a nga bohile,+ 24 va mu khoma va mu hoxa lomu hloweni. Ka cikhati leco, a hlowo yi wa womile, yi wa nga hi na mati.

25 Andzhako ka lezvo, va no tshama, vaga. Laha va nga ku tlaku mahlo, va no wona a ntlawa wa vaxavisi wa vaIxmayeli+ wu ngata hi Gileyadhe. A makameli yabye ma wa rwele a hlakati ya ladhano,* ni bhalsamu, ni mahati ya hlakati,+ na va relela vaya Gibhite. 26 Judha i no wutisa a vamakabye vakwe, aku: “Hi wa ta vhuneka hi yini loku a ho daya a makabye wa hina hi setela a nkhata wakwe ke?+ 27 A hi mu xaviseni+ ka vaIxmayeli; a mandla ya hina ma ngavi hehla kakwe. Ahandle ka lezvo, yena makabye wa hina, i nyama ya hina.” Hikwalaho, va no ingisa lezvi zvi nga wuliwa hi makabye wabye. 28 Makunu laha a vaxavisi va vaMidhiyani+ va nga kari va hundza, va no humesa Josefa lomu hloweni va mu xavisa ka vaIxmayeli hi 20 wa zvingerengere zva prata.+ A vavanuna lavo va no teka Josefa va famba naye Gibhite.

29 Hi ndzhako ka cikhati, laha Rubheni a nga tlhela hloweni a ya kuma lezvaku Josefa a nga kona lomu hloweni, i no handzula tinguwo takwe. 30 I no wuya ka vamakabye vakwe, a taku: “A n’wanana a nga ha hi kona! Ndzi ta kuyini mina?”

31 Hikwalaho, va no daya a mhongo, va teka a nghanju ya Josefa va yi dun’weka lomu ka nkhata wa kona. 32 Andzhako ka lezvo, va no rumela a nghanju leyo yo hlawuleka ka papayi wabye, vaku: “Hi kumile leci. Ci hlole kasi u wona ku hi yona a nghanju ya n’wana wa wena ke.”+ 33 A papayi wabye i no yi hlola, aku: “Mayo! I nghanju ya n’wana wa mina. Zvi nga maha na a khadamulilwe hi civandza ca khwati. Hakunene Josefa i phatlulelwe!” 34 Zvalezvo, Jakobe i no handzula tinguwo takwe, a boha tisakwa ciwunwini cakwe, a rila n’wana wakwe hi masiku yo tala. 35 Vontlhe a vafana vakwe ni vanhanyana vakwe va wa zama ku mu chavelela kanilezvi i wa ala ku chavelelwa, aku: “Ndzi ta relela Cilahleni*+ na ndzi rila n’wana wa mina!” A papayi wakwe i no simama ku mu rila.

36 A vaMidhiyani va noya va ya mu xavisa Gibhite ka Potifare, a mutiri wa le wuhosini ga Faro+ tlhelo hosana ya vagadhi.+

38 Ka cikhati leco, Judha i no siya a vamakabye vakwe a ya gwimba a tenda gakwe kusuhani na Hira, a muAdhulamu. 2 Kwaseyo, Judha i no wona a nhanyana wa muKhanani+ wo kari wa ku hi Xuwa. Hikwalaho, i no mu teka a hlengela naye masango, 3 a se xura nyimba. Hi kufamba ka cikhati, i no pswala mufana, Judha a mu chula ku hi Ere.+ 4 I no tlhela a xura nyimba a pswala mufana, a mu chula ku hi Onani. 5 I no tlhela a pswala mun’wani mufana, a mu chula ku hi Xela. Yena* i wa hi le Akzibha+ a cikhati leci a wasati a nga pswala.

6 Hi kufamba ka cikhati, Judha i no mu tekela sati Ere, a matewula yakwe. A vito gakwe ku wa hi Tamari.+ 7 Kanilezvi Ere, a matewula ya Judha, i wa bihile mahlweni ka Jehovha; hikwalaho, Jehovha i no mu daya. 8 Hi kota ya lezvo, Judha i no byela Onani, aku: “Hlengela masango ni sati wa makabye wa wena, u mu hlambela, kasi u mu vhuxela pswalo a makabye wa wena.”+ 9 Kanilezvi Onani i wa zvi tiva lezvaku a vana va kona va nga ta wuliwa ku i pswalo wakwe.+ Hikwalaho, a cikhati leci a nga kari a hlengela masango ni sati wa makabye wakwe i wa halata a mbewu yakwe ya wununa lahasi kasi a nga mu nyiki pswalo a makabye wakwe.+ 10 Lezvi a nga kari a maha zvi wa bihile mahlweni ka Jehovha; hikwalaho, i no mu dayawu.+ 11 Judha i no byela a katamwane wakwe Tamari, aku: “Tlhela u ya tshama kaya ka papayi wa wena kota noni* kala a n’wana wa mina Xela a kula”, hakuva i wa alakanya ku: ‘Yenawu i tafa a ku khwatsi vamakabye vakwe.’+ Hikwalaho, Tamari i no tlhela a ya tshama kaya ka papayi wakwe.

12 Andzhako ka cikhati co kari, ku nofa a sati wa Judha, a nhanyana wa Xuwa.+ Judha i no tshama kala ku mbhela masiku ya cirilo; andzhako ka lezvo, i noya le Timna+ lomu ku nga hi ni vatsemi va woya ga tiyivhu takwe na a hi ni munghana wakwe Hira, a muAdhulamu.+ 13 Tamari i no byeliwa lezvi: “A n’wingi wa wena wa cinuna iya Timna a ya tsema a woya ga tiyivhu takwe.” 14 Hi kota ya lezvo, i no tlhatlha a tinguwo takwe ta wunoni, a ti fenengeta nghohe hi vhewu, a ti fenengeta nguwo,* a ya tshama nyangweni ya Enayime, leyi yi nga ndleleni ya kuya Timna, hakuva i wa zvi wonile lezvaku Xela i kulile hambulezvo, i wa nga se nyikelwa ka Xela kasi ava sati wakwe.+

15 Laha Judha a nga mu wona, i no tekela ku alakanya ku cibhayi, hakuva i wa ti fenengetile a nghohe yakwe. 16 Hikwalaho, i no hambuka a mu yela le mbhirini ya ruwa, a yaku: “Ndzi kombela ku hlengela masango na wena”, hakuva i wa nga zvi tivi lezvaku i katamwane wakwe.+ Hambulezvo, Tamari i no mu wutisa, aku: “U ta ndzi nyika yini kasi u hlengela masango na mina ke?” 17 Judha aku: “Ndzi ta ku rumelela a cimbutana ca lomu ntlhambini wa mina.” Kanilezvi Tamari i no mu wutisa, aku: “U ta ndzi khomisa cokari kala u rumela ke?” 18 Judha i no engeta, aku: “U lava ku ndzi ku khomisa yini?” Tamari aku: “Ndzi lava a phera ya wena ya karimbo,+ ni kordhawu ga wena, ni nhonga leyi yi nga canjeni ga wena.” I no mu nyika a zvilo lezvo a gumesa a hlengela naye masango, Tamari a se xura nyimba. 19 Andzhako ka lezvo, i no suka a ti fambela a ya tlhatlha a nguwo,* a boha a tinguwo takwe ta wunoni.

20 Judha i no rumela a cimbutana hi canja ga munghana wakwe, a muAdhulamu,+ kasi a ya tekisa lezvi a nga khomisile Tamari, kanilezvi a nga mu kumangi. 21 I no wutisa vanhu va wutshamu lego, aku: “Ci kwihi a cibhayi ca tempeli leci ci nga tolovela ku tshama Enayime, mbhirini ya ruwa?” Kanilezvi va no hlamula, vaku: “Lomu a ku se tshuka kuva ni cibhayi ca tempeli.” 22 I no gumesa a tlhela ka Judha, a yaku: “A ndzi mu kumangi niku a vanhu va wutshamu legiyani va te: ‘Lomu a ku se tshuka kuva ni cibhayi ca tempeli.’” 23 Hikwalaho, Judha i te: “Mu tsike a teka zvi maha zvakwe kasi hi nga hlekiwi. Mina a cimbutana ndzi rumele, kanilezvi wena u no kala ku mu kuma.”

24 Kanilezvi andzhako ka tihweti tinharu, Judha i no byeliwa ku: “A katamwane wa wena Tamari i ti mahile cibhayi, a xura nyimba ya wubhayi.” Judha aku: “Mu humeseni lahandle kasi a hisiwa.”+ 25 Na a kari a humesiwa, i no rumela gezu ka n’wingi wakwe wa cinuna, gaku: “Loyi a nga ndzi xurisa nyimba i n’winyi wa zvilo lezvi.” A engeta aku: “Ndzi kombela lezvaku u hlola ku a phera leyi ya karimbo, ni kordhawu, ni nhonga leyi zva mani.”+ 26 Makunu Judha i no zvi hlola, aku: “Yena i lulamile nguvhu a ku hundza mina, hakuva a ndzi mu nyikelangi ka Xela, a mufana wa mina.”+ Andzhako ka lezvo, a nga ha hlengelangi naye masango.

27 Laha ku nga chikela cikhati ca lezvaku a pswala, ku wa hi ni mahahla lomu khwirini gakwe. 28 A cikhati leci a nga kari a pswala, a n’wana mun’we i no humesa ciwokwana, a singalakati* gi tekela ku boha lihindza lo pswhuka laha ka ciwokwana, giku: “Loyi hi yena a nga ranga a huma.” 29 Kanilezvi zvalezvi a n’wanana a nga tlhelisa ciwokwana, a makabye wakwe i no tekela ku huma. A singalakati* giku: “A wu no ku fohla!” Hikwalaho, i no chuliwa ku hi Perezi.*+ 30 Andzhako ka lezvo, ku no huma a makabye wa kona, loyi a nga bohilwe a lihindza lo pswhuka laha ka ciwokwana, a chuliwa ku hi Zera.+

39 Josefa i no yisiwa Gibhite,+ makunu a muGibhite wo kari wa ku hi Potifare,+ a nga hi mutiri wa le wuhosini ga Faro tlhelo hosana ya vagadhi, i no mu xava ka vaIxmayeli+ lava va nga mu yisile seyo. 2 Kanilezvi Jehovha i wa hi zvin’we na Josefa.+ Hikwalaho, Josefa i no vhuvhuma a yimisiwa hehla ka yindlu ya n’winyi wakwe, a muGibhite. 3 A n’winyi wakwe i no zvi wona lezvaku Jehovha i wa hi zvin’we na Josefa niku Jehovha i wa vhuvhumisa zvontlhe lezvi a nga kari a maha.

4 Josefa i no simama ku kuma thomo mahlweni ka n’winyi wakwe niku i nova nandza gakwe legi a nga gi tsumba. Hikwalaho, i no mu yimisa kasi ava muhlayisi wa yindlu yakwe a tlhela a wonelela zvontlhe a zvilo zvakwe. 5 Kusukela ka cikhati leci a nga mu yimisa kasi ava muhlayisi wa yindlu yakwe a tlhela a wonelela zvontlhe a zvilo zvakwe, Jehovha i no simama ku katekisa a yindlu ya muGibhite loye hi kota ya Josefa. A makatekwa ya Jehovha ma nova hehla ka zvontlhe lezvi a nga hi nazvo lomu ndlwini ni masin’wini.+ 6 Hi kugumesa, Potifare i no veka zvilo zvakwe zvontlhe mandleni ya Josefa; i wa nga ha karateki hi nchumu ahandle ka zvakuga lezvi a gako. A ku tsika lezvo, Josefa i no kula ava jaha go saseka nguvhu.

7 Andzhako ka zvontlhe lezvo, a sati wa n’winyi wakwe i no sangula ku navela Josefa, aku: “Etlela na mina.” 8 Kanilezvi Josefa i no ala, a byela a sati wa n’winyi wakwe, aku: “A n’winyi wa mina ne a nga zvi tivi lezvi zvi nga na mina lomu ndlwini. Zvontlhe lezvi a nga nazvo i zvi vekile mandleni ya mina. 9 I hava wahombe a ku hundza mina ka yindlu leyi, niku a n’winyi wa mina a nga ndzi beteli nchumu, ahandle ka wena hakuva u sati wakwe. Makunu ndzi wa ta ku mahela yini a kubiha loku ka hombe, ndzi wonhela Nungungulu ke?”+

10 Siku ni siku, i wa wulawula na Josefa kanilezvi Josefa a nga zangi a vhumela ku etlela naye kutani ku tshama naye. 11 Kanilezvi ka siku go kari, laha Josefa a nga nghena lomu ndlwini kasi ku maha mitiro yakwe, a malandza lawa man’wani ma wa nga hi kona lomu ndlwini. 12 A sati wa n’winyi wakwe i no mu khoma hi nguwo, aku: “Etlela na mina!” Kanilezvi Josefa i no siya nguwo yakwe canjeni gakwe a tsutsuma a huma handle. 13 Zvalezvi a nga wona ku Josefa i siyile a nguwo yakwe canjeni gakwe a tsutsuma a huma handle, 14 i no sangula kuba tinyandha, a vitana vanhu va laha mutini wakwe, a taku: “Hi nga wonani! I hi nehele a muHebheru loyi kasi a ta hi maha cihlekiso. I tile laha ka mina a taku a hi etlele hontlhe, kanilezvi ndzi no sangula kuba tinyandha hi gezu ga mina gontlhe. 15 Zvalezvi a nga ndzizwa na ndziba tinyandha, i no siya nguwo yakwe reveni ga mina a tsutsuma a huma handle.” 16 Andzhako ka lezvo, i no tshama ni nguwo ya Josefa reveni gakwe kala a n’winyi wakwe a wuya.

17 I no mu hlawutela zvalezvo, aku: “A nandza ga muHebheru legi u nga hi nehela gi tile gi ta lava ku ndzi maha cihlekiso. 18 Kanilezvi zvalezvi ndzi nga sangula kuba tinyandha, gi no siya nguwo ya gona reveni ga mina gi tsutsuma gi huma handle.” 19 Zvalezvi a n’winyi wakwe a ngazwa lezvi a sati wakwe a nga mu byela, zvaku: “A nandza ga wena gi ndzi mahile lezvi ni lezvi”, i no vila hi zanga. 20 Hikwalaho, a n’winyi wa Josefa i no mu khoma a mu vhalela paxweni, lomu a zvibochwa zva hosi zvi nga vhalelwa kona, a tshama kwalomo paxweni.+

21 Kanilezvi Jehovha i no simama kuva na Josefa, a simama ku mu kombisa lirandzo li nga mbheliko, a mu maha a kuma thomo ka hosana ya paxo.+ 22 Hikwalaho, a hosana ya paxo yi no yimisa Josefa lezvaku a wonelela a zvibochwa zvontlhe zvi nga hi lomu paxweni, niku hi yena a nga wonelela zvontlhe zvi nga mahiwa lomo.+ 23 A hosana ya paxo yi wa nga ha karateki hi nchumu wu nga hi canjeni ga Josefa, hakuva Jehovha i wa hi zvin’we na Josefa niku Jehovha i wa vhuvhumisa zvontlhe lezvi a nga maha.+

40 Andzhako ka zvilo lezvi, a hosana ya vacheteli va zvakunwa+ zva hosi ya Gibhite ni hosana ya vamahi va tipawa va no wonhela a n’winyi wabye, a hosi ya Gibhite. 2 Hikwalaho, Faro i no zangarela a tihosana takwe ta timbiri, a hosana ya vacheteli va zvakunwa ni hosana ya vamahi va tipawa,+ 3 a va vhalela paxweni, ndlwini ya hosana ya vagadhi,+ ku nga kwalomu Josefa a nga vhalelwe kona.+ 4 A hosana ya vagadhi yi no yimisa Josefa lezvaku a tshama navo a va hlayisa.+ Va no tshama masiku yo kari lomu paxweni.

5 A mucheteli wa zvakunwa ni mumahi wa tipawa ta hosi ya Gibhite, lava va nga vhalelwe lomu paxweni, a mun’we ni mun’we wabye i nova ni noro ka wusiku galegi ga gin’we niku a noro wun’we ni wun’wani wu wa hi ni tlhamuselo wa wona. 6 Ni mixo yi nga landzela, laha Josefa a nga nghena a va wona, i no pola lezvaku va xukuvalile. 7 Hikwalaho, i no wutisa a tihosana ta Faro leti ti nga vhalelwe zvin’we naye ndlwini ya n’winyi wakwe, aku: “Hikuyini mu tsuvileko nyamutlha?” 8 Va no hlamula, vaku kakwe: “A mun’we ni mun’we wa hina ive ni noro kanilezvi a hi na mutlhamuseli.” Josefa aku kabye: “A mitlhamuselo a yiti hi ka Nungungulu ke?+ Ndzi hlawuteleni.”

9 Hikwalaho, a hosana ya vacheteli va zvakunwa yi no hlawutela a noro wa yona ka Josefa, yiku: “Ndzi lorile vhina* na wu hi mahlweni ka mina. 10 Le hehla ka vhina ku wa hi ni zvidhavana zvinharu. Laha wu nga kari wu hluka, wu no pfepfa niku a zvitata zva wona zvi nova ni mauvha yo buvha. 11 A kopo ya Faro yi wa hi canjeni ga mina. Ndzi no teka a mauvha ndzi kamela lomu ka kopo ya Faro. Andzhako ka lezvo, ndzi no nyikela kopo canjeni ga Faro.” 12 Josefa aku kakwe: “A tlhamuselo wa kona hi lowu: A zvidhavana zvinharu zvi wula masiku manharu. 13 Andzhako ka masiku manharu kusukela nyamutlha, Faro i ta ku humesa* a ku tlhelisa cikhundleni ca wena;+ u ta nyikela kopo ya Faro canjeni gakwe a ku khwatsi hi lezvi u nga kari u maha a cikhati leci u nga hi mucheteli wakwe wa zvakunwa.+ 14 Kanilezvi, laha a zva wena zvi to lulama, ndzi alakanye. Maha wuxinji u ndzi komba lirandzo li nga mbheliko, u ndzi kumbuka ka Faro kasi a fela ku ndzi humesa ka wutshamu legi. 15 Hi lisine ndzi no yiviwa tikweni ga vaHebheru,+ ni kwalaha a ndzi wonhangi nchumu wo kala va ndzi vhalela paxweni.”*+

16 A cikhati leci a hosana ya vamahi va tipawa yi nga wona lezvaku Josefa i tlhamusele zvilo zva zvinene, yi no mu byela lezvi: “Minawu ndzi lorile; ka noro wa mina ndzi wa rwele zvindzala* zvinharu zva tipawa to basa; 17 lomu ka cindzala* leci ci nga hi le hehla, ku wa hi ni tixaka tontlhe ta zvilo zvi wocilweko zva Faro. Ku nota zvinyanyani zvi taga lezvi zvi nga hi lomu ka cindzala* leci ci nga hi le hehla ka hloko ya mina.” 18 Josefa i no mu hlamula, aku: “A tlhamuselo wa kona hi lowu: A zvindzala* zvinharu zvi wula masiku manharu. 19 Andzhako ka masiku manharu kusukela nyamutlha, Faro i ta ku tsema hloko* a ku hayeka laha mhandzeni, ni zvinyanyani zvi taga a nyama ya wena.”+

20 Makunu a siku ga wunharu gi wa hi siku ga ku tlhanganisa malembe ya kupswaliwa ka Faro.+ Hikwalaho, i no ma mahela mubuzo a malandza yakwe wontlhe, a humesa a* hosana ya vacheteli va zvakunwa ni hosana ya vamahi va tipawa mahlweni ka malandza yakwe. 21 I no tlhelisela a hosana ya vacheteli va zvakunwa ntirweni wa yona wa ku chetela zvakunwa, yi simama ku nyikela kopo ka Faro. 22 Kanilezvi i no hayeka a hosana ya vamahi va tipawa, kota lezvi Josefa a nga va tlhamusele.+ 23 Hambulezvo, a hosana ya vacheteli va zvakunwa a yi mu alakanyangi Josefa; yi no mu rivala.+

41 Kumbheleni ka malembe mambiri, Faro i no lora+ na a yimile mbhirini ya Congo wa Nilo. 2 I no wona 7 wa mapswele ya tihomu to saseka, to kuluka, na ti huma hi lomu congweni, tiga a byanyi ga Nilo.+ 3 Andzhako ka tona, ku no huma man’wani mapswele yo swara, ya mikotso, hi lomu Nilo, ma yima laha mbhirini ya Nilo tlhelweni ga lawa yo kuluka. 4 A mapswele ya tihomu leti to swara, ta mikotso ma no sangula kuga a mapswele lawa ya 7 yo saseka, yo kuluka. Zvalezvo Faro i no khindlimuka.

5 I no tlhela a etlela a lora kambe. I no lora 7 wa mipon’wani yo nyuka na yi chelile khwatsi+ na yi huma ka lihlanga lin’we. 6 Andzhako ka yona ku no huma yin’wani mipon’wani ya 7 yo wuna, na yi swile hi moya wa cikobani.* 7 Makunu a mipon’wani leyi yo wuna yi no sangula ku mita a 7 wa mipon’wani leyi yo nyuka yi nga chelile khwatsi. Zvalezvo Faro i no khindlimuka a pola lezvaku i wo lora.

8 Kanilezvi ni mixo, a moya wakwe wu no karateka. Hikwalaho, i no vitanisa a vapristi vontlhe va masalamuso ni tontlhe a titlhari ta Gibhite a ta va hlawutela a miloro yakwe, kanilezvi i hava a nga zvi kota ku mu tlhamusela.

9 Zvalezvo, a hosana ya vacheteli va zvakunwa yi no byela Faro, yiku: “Nyamutlha ndza wulela a zviwonho zva mina. 10 Faro i no zangarela malandza yakwe. Hikwalaho, i no ndzi vhalela paxweni, ndlwini ya hosana ya vagadhi, mina ni hosana ya vamahi va tipawa.+ 11 Andzhako ka lezvo, a mun’we ni mun’wani wa hina i nova ni noro ka wusiku galegi ga gin’we. A mun’we ni mun’wani wa hina ive ni noro wu nga hi ni tlhamuselo wa wona.+ 12 Lomu hi nga hi kona hi wa hi zvin’we ni jaha ga muHebheru, a nandza ga hosana ya vagadhi.+ Laha hi nga mu hlawutela a miloro ya hina,+ i no hi byela tlhamuselo wa noro wun’we ni wun’wani. 13 Zvi no mahekisa zvalezvi a nga hi tlhamuselisa zvona. Mina ndzi no tlhelisiwa cikhundleni ca mina kanilezvi a wanuna loyi mun’wani i no hayekiwa.”+

14 Hikwalaho, Faro i no vitanisa Josefa,+ va mu neha hi cihatla hi le paxweni.*+ Josefa i no tsemeta, a cica tinguwo takwe aya ka Faro. 15 Faro i no byela Josefa, aku: “Ndzive ni noro, kanilezvi a ku na wa ku wu tlhamusela. Makunu ndzi zwile lezvaku loku wena uzwa a noro, wa zvi kota ku wu tlhamusela.”+ 16 Josefa i no hlamula Faro, aku: “Ndzova mina mani! Nungungulu hi yena a to tlhamusela a mahungu ya manene ka Faro.”+

17 Faro i no engeta a byela Josefa, aku: “Ndzi lorile na ndzi yimile mbhirini ya Congo wa Nilo. 18 Ndzi no wona 7 wa mapswele ya tihomu to saseka, to kuluka, na ti huma hi lomu Nilo, ti sangula kuga a byanyi ga Nilo.+ 19 Andzhako ka tona, ku no huma man’wani mapswele ya 7 yo wondza, yo nyenyeza nguvhu, ya mikotso. A ndzi se tshuka ndzi wona a mapswele ya tihomu to nyenyeza a ku khwatsi hi tona tikweni gontlhe ga Gibhite. 20 A mapswele ya tihomu leti ta mikotso, to swara, ma no sangula kuga a mapswele lawa yo sangula yo kuluka ya 7. 21 Kanilezvi laha ti nga mbhetile kuga zvi wa nga ti kombi a ku ti gile nchumu hakuva ma no simama na ma hi mikotso a ku khwatsi hi kusanguleni. Zvalezvo, ndzi no khindlimuka.

22 “Andzhako ka lezvo, ndzi no lora a 7 wa mipon’wani yo nyuka na yi chelile khwatsi+ yi nga hi laha ka lihlanga lin’we. 23 Andzhako ka yona, ku no huma yin’wani mipon’wani ya 7 yo puva, yo wuna, na yi swile hi moya wa cikobani.* 24 A mipon’wani leyi ya ku wuna yi no mita a mipon’wani leyi yo nyuka ya 7. Makunu ndzi no hlawutela a vapristi va masalamuso+ kanilezvi a nga kona a nga zvi kota ku ndzi tlhamusela.”+

25 Makunu Josefa i no byela Faro, aku: “A tlhamuselo wa miloro ya Faro hi walowu wa wun’we. A Nungungulu wa lisine i byelile Faro lezvi Yena a to maha.+ 26 A 7 wa mapswele ya tihomu ta tinene i 7 wa malembe. Hi kufanana, a 7 wa mipon’wani ya yinene i 7 wa malembe. A tlhamuselo wa miloro ya Faro hi walowu wa wun’we. 27 A 7 wa mapswele ya tihomu to wondza na ti swarile, leti ti nga huma andzhako ka leti ta tinene, i 7 wa malembe ya ndlala; ni 7 wa mipon’wani yo kala nchumu, yi swileko hi moya wa cikobani,* i 7 wa malembe ya ndlala. 28 Hi zvalezvi ndzi nga zvi wula ka Faro: A Nungungulu wa lisine i kombile Faro lezvi Yena a to maha.

29 “Ku tava ni 7 wa malembe ku to pfuniwa nguvhu tikweni gontlhe ga Gibhite. 30 Kanilezvi andzhako ka lezvo, ku tava ni 7 wa malembe ya ndlala. A pfuno wontlhe wa lomu tikweni ga Gibhite wu ta rivaliwa. A ndlala yi ta swiyela tiko.+ 31 A pfuno wa hombe lowu wu vileko kona wu nga ta ha alakanyiwa hi kota ya ndlala leyi yi to landzela, hakuva yi tava ya hombe nguvhu. 32 Faro i lorile a noro lowu kumbiri, hakuva a mhaka leyi yi tiyisilwe hi Nungungulu wa lisine niku a Nungungulu wa lisine i ta yi maha hi cihatla.

33 “Hikwalaho, Faro i wa lavetele a wanuna wo tlhariha a nga ni wutivi a mu yimisa hehla ka tiko ga Gibhite. 34 Faro i wa mahe cokari, a yimisa vawoneleli lomu tikweni, a hlengeleta zva wutlhanu zva pfuno wa tiko ga Gibhite ndzeni ka 7 wa malembe lawa ya pfuno.+ 35 Va wa hlengelete a zvakuga zvontlhe ndzeni ka malembe lawa ma tako ya manene, va hlengeleta timbewu lomu matshaleni ya Faro, ti veketelwa lomu madhoropeni, ti hlayisiwa lomo kasi tiva zvakuga.+ 36 A zvakuga lezvo zvi tava mbuva ya ku gisa tiko ka 7 wa malembe lawa ku tova ni ndlala lomu tikweni ga Gibhite, kasi a tiko gi nga lovi hi ndlala.”+

37 A mawonela lawo ma no tsakisa Faro ni wontlhe a malandza yakwe. 38 Hikwalaho, Faro i no wutisa malandza yakwe, aku: “Ina ku nga kumiwa mun’wani wanuna wo fana ni wanuna loyi, a nga ni moya wa Nungungulu ke?” 39 Faro i no byela Josefa, aku: “Kota lezvi Nungungulu a ku tivisileko zvontlhe lezvi, a ku na mun’wani wo tlhariha a nga ni wutivi a ku fana na wena. 40 Hi wena u to yimisiwa hehla ka yindlu ya mina niku vontlhe a vanhu va mina va ta ku ingisa ka zvontlhe.+ Ntsena lezvaku ndzi tava wa hombe a ku hundza wena hi cikhundla ca mina kota hosi.” 41 Faro i no engeta a byela Josefa, aku: “Ndza ku yimisa hehla ka tiko gontlhe ga Gibhite.”+ 42 Faro i no tlhatlha a phera yakwe ya karimbo canjeni gakwe a bohisa Josefa, a mu bohisa a tinguwo ta wukene* ga ginene a tlhela a mu bohisa a kordhawu ga ouro nhan’wini yakwe. 43 Ahandle ka lezvo, Faro i no mu khilelisa a kareta yakwe ya wumbiri ya wudzundzo leyi a nga hi nayo, va huwelela mahlweni kakwe, vaku: “Avrékh!”* Hi ndlela leyo, Faro i no mu yimisa hehla ka tiko gontlhe ga Gibhite.

44 Faro i no engeta a byela Josefa, aku: “Hi mina Faro, kanilezvi ahandle ka ku vhumelelwa hi wena, i hava a zvi kotako ku maha nchumu ne wun’we* tikweni gontlhe ga Gibhite.”+ 45 Andzhako ka lezvo, Faro i no chula Josefa a ku hi Zafenati-Paneya a tlhela a mu nyika Asenate,+ a nhanyana wa Potifera, a mupristi wa le Oni,* ava sati wakwe. Josefa i no sangula ku wonelela a tiko ga Gibhite.+ 46 Josefa i wa hi ni 30 wa malembe+ a cikhati leci a nga yima mahlweni ka* Faro, a hosi ya Gibhite.

Andzhako ka lezvo, Josefa i no suka mahlweni ka Faro a fambafamba tikweni gontlhe ga Gibhite. 47 Ndzeni ka 7 wa malembe ya pfuno, a tiko gi no pfuna nguvhu. 48 Ka malembe lawo ya 7, Josefa i no simama ku hlengeletela zvakuga zvontlhe lomu tikweni ga Gibhite, a hlengeletela zvakuga zvo tala lomu madhoropeni. Ka dhoropa gin’we ni gin’wani, i wa hlengeletela zvakuga zvi nga huma hi lomu masin’wini lawa ma nga gi randzele. 49 Josefa i no simama ku hlengeletela a timbewu to tala nguvhu, a ku fana ni misava ya bimbi, laha ka kuza va tsika ni ku pimelela hakuva ti wa tsandza ni vahlayi.

50 Na gi nga se chikela a lembe ga ndlala, Josefa i no pswalelwa a vafana vambiri+ hi Asenate, a nhanyana wa Potifera, a mupristi wa le Oni.* 51 Josefa i no chula loyi wa matewula aku hi Manase,*+ hakuva i waku: “Nungungulu i ndzi mahile ndzi rivala a zvikarato zva mina zvontlhe ni yindlu yontlhe ya papayi wa mina.” 52 Loyi wa ndzisana i no mu chula ku hi Efrayime,*+ hakuva i waku: “Nungungulu i ndzi andzisile lomu tikweni ga kuxaniseka ka mina.”+

53 Makunu a 7 wa malembe ya pfuno le Gibhite ma no mbhela,+ 54 ku sangula a 7 wa malembe ya ndlala, kota lezvi Josefa a nga wulile.+ A ndlala yi no andza matikweni wontlhe kanilezvi lomu tikweni gontlhe ga Gibhite ku wa hi ni zvakuga.*+ 55 Hi kugumesa, a tiko gontlhe ga Gibhite gi no xaniseka hi ndlala. A vanhu va no sangula ku rilela Faro na va lava zvakuga.*+ Faro i no byela a vaGibhite vontlhe, aku: “Fambani ka Josefa; mahani ni cihi a to mu byela.”+ 56 A ndlala yi no simama kuva kona misaveni yontlhe.+ Makunu Josefa i no sangula ku vhulula a matshala wontlhe ma nga hi cikari kabye a va xavisela zvakuga a vaGibhite,+ kota lezvi a ndlala yi nga tshingile lomu tikweni ga Gibhite. 57 A ku tsika lezvo, a vanhu va misava yontlhe va waya Gibhite va ya xava zvakuga ka Josefa, hakuva a ndlala yi wa hi ya hombe misaveni yontlhe.+

42 A cikhati leci Jakobe a nga tiva lezvaku ku wa hi ni zvakuga* le Gibhite,+ i no wutisa a vana vakwe, aku: “Hikuyini mu tshamako mu cuwukana?” 2 A engeta aku: “Ndzi zwile lezvaku ku na ni zvakuga le Gibhite. Relelani mu ya hi xavela kasi hi simama ku hanya hi ngafi.”+ 3 Hikwalaho, a 10 wa vamakabye va Josefa+ va no relela vaya Gibhite kasi va ya xava zvakuga. 4 Kanilezvi Jakobe a nga rumelangi Bhenjamini,+ a makabye wa Josefa, a famba ni vamakabye vakwe lava van’wani, hakuva i waku: “A nga famba a welwa hi mhango afa.”+

5 Hikwalaho, a vafana va Izrayeli va no longoloka ni van’wani vanhu va ngaya va ya xava zvakuga, hakuva a ndlala yi wa chikele ni le tikweni ga Khanani.+ 6 Josefa hi yena a nga kari a rangela lomu tikweni;+ hi yena kambe a nga va xavisela zvakuga a vanhu vontlhe va laha misaveni.+ Hikwalaho, a vamakabye va Josefa va no chikela va khizama, va korama lahasi hi tinghohe tabye mahlweni kakwe.+ 7 Laha Josefa a nga wona vamakabye vakwe, i no tekela ku va tiva kanilezvi i no va fihlela ku hi yena mani.+ Hikwalaho, i no wulawula navo hi mona, aku: “Muta hi kwihi?” Vona vaku: “Hita hi le tikweni ga Khanani kasi hi ta xava zvakuga.”+

8 Hi ndlela leyo, Josefa i no tiva vamakabye vakwe kanilezvi vona a va mu tivangi. 9 Josefa i no tekela ku alakanya lezvi a nga lorile xungetano hi vona,+ aku ngalo kabye: “N’wina mu zvipiyawu! Mu tela ku ta piyara tiko kasi mu wona laha mu to gi dhumela hi kona!” 10 Vona vaku kakwe: “Ahihi, hosi yanga, a malandza ya wena ma tela ku ta xava zvakuga. 11 Hontlheni hi vana va munhu mun’we. Hi vanhu vo lulama. A malandza ya wena a hi zvipiyawu.” 12 Kanilezvi i no va hlamula, aku: “Ma hemba! Mu tela ku ta wona lomu mu nga gi dhumelako hi kona tiko legi!” 13 Vona vaku: “Hina malandza ya wena hi 12 wa vakamakabye.+ Hi vana va wanuna mun’we+ wa le tikweni ga Khanani; loyi wa ndzisana i sele ni papayi wa hina+ kanilezvi loyi mun’wani a nga ha hi kona.”+

14 Kanilezvi Josefa i te ngalo kabye: “Hi zvalezvi ndzi nga mu byela: ‘N’wina mu zvipiyawu!’ 15 Mu ta ringiswa lezvi: A ku khwatsi hi lezvi Faro a hanyako, mu nga ta suka ka wutshamu legi kala a ndzisana ya n’wina yita.+ 16 Rumani a mun’we wa n’wina a ya teka a ndzisana ya n’wina, n’wina van’wani mu sala mu vhalelwa. Makunu zvi ta ti komba a ku lezvi mu wulako lisine ke. Loku zvi nga hi lezvo, a ku khwatsi hi lezvi Faro a hanyako, n’wina mu zvipiyawu.” 17 I no va vhalela ka wutshamu gin’we hi masiku manharu.

18 Hi siku ga wunharu, Josefa i te ngalo kabye: “Kota lezvi ndzi chavako Nungungulu, kasi mu hanya mahani lezvi: 19 Loku mu hi vanhu vo lulama, a mun’we wa n’wina i wa sale ndlwini leyi mu vhalelweko ka yona, kanilezvi n’wina van’wani rwalani zvakuga mu famba mu ya hanyisa a mingango ya n’wina yi xokako hi ndlala.+ 20 Andzhako ka lezvo, wuyani ni ndzisana ya n’wina seno ka mina kasi zvi ti komba ku lezvi mu wulako lisine, kasi mu ngafi.” Va no maha zvalezvo.

21 Va no wulawula, hi ca ka vona, vaku: “Phela ho tsayisiwa hi kota ya makabye wa hina,+ hakuva hi wonile a kuxaniseka kakwe* laha a nga hi khongotela lezvaku hi mu zwela wusiwana, kanilezvi hina hi ala. Hi welwa hi khombo legi hi kota ya lezvo.” 22 Rubheni i no va hlamula, aku: “A ndzi mu byelangi, ndziku: ‘Mu nga mu mahi zvakubiha a n’wanana’? Kanilezvi a mu ndzi ingisangi.+ Makunu i nkhata wakwe wu londziwako.”+ 23 Kanilezvi va wa nga zvi tivi lezvaku Josefa wa zvizwa, hakuva i wa wulawula navo hi ku tirisa mutlhamuseli. 24 Hikwalaho, Josefa i no suka laha va nga hi kona a ya rila.+ A cikhati leci a nga wuya a ta wulawula navo kambe i no khoma Simeyoni+ a mu boha mahlweni kabye.+ 25 Andzhako ka lezvo, Josefa i no laya a malandza yakwe lezvaku ma tata tisakwa tabye hi zvakuga, ma tlhela ma tlhelisa a mali ya mun’we ni mun’wani wabye sakweni yakwe ni lezvaku ma va nyika timbuva ta kuga hi ndlela. Va no va mahela zvalezvo.

26 Hikwalaho, va no teka a tisakwa tabye ta zvakuga va rwexa timbongola tabye va suka va ti fambela. 27 A cikhati leci a mun’we wabye a nga vhulula a sakwa yakwe kasi a yi nyika zvakuga a mbongola yakwe ka wutshamu legi va nga wa ta etlela ka gona, i no wona lezvaku a mali yakwe yi wa hi non’wini wa sakwa yakwe. 28 Zvalezvo, i no byela a vamakabye vakwe, aku: “Va ndzi tlhelisele a mali ya mina, hi leyi lomu sakweni!” A timbilu tabye ti no nyeka; makunu na va kari va rurumela, va no cuwukana, vaku: “Kasi zvini zvezvi Nungungulu a hi mahelako?”

29 A cikhati leci va nga chikela ka papayi wabye Jakobe, tikweni ga Khanani, va no mu hlawutela a zvilo zvontlhe lezvi zvi nga va humelela, vaku: 30 “A wanuna loyi a nga hosi ya tiko i wulawulile na hina hi mona+ a hi lumbeta lezvaku hi yela ku ya piyara tiko. 31 Kanilezvi hina hi mu byelile, hiku: ‘Hi vanhu vo lulama; a hi zvipiyawu.+ 32 Hi 12 wa vakamakabye,+ na hi hi vana va papayi mun’we. A mun’we a nga ha hi kona.+ Loyi wa ndzisana i sele ni papayi wa hina tikweni ga Khanani.’+ 33 Kanilezvi a wanuna loyi a nga hosi ya tiko i te ngalo: ‘Ndzi ta zvi tiva lezvaku mu lulamile loku mu maha lezvi: Siyani a makabye mun’we wa n’wina na mina+ mu teka zvakuga mu famba mu ya hanyisa a mingango ya n’wina yi xokako hi ndlala.+ 34 Ndzi wuyeleni ni ndzisana ya n’wina kasi ndzi ta kholwa lezvaku a mu zvipiyawu kanilezvi mu vanhu vo lulama. Andzhako ka lezvo, ndzi ta mu nyika a makabye wa n’wina niku mu nga simama kuta mu ta xava lezvi mu zvi lavako lomu tikweni.’”

35 Laha va nga kari va chulula lezvi zvi nga hi lomu ka tisakwa tabye, va no kuma a mali ya mun’we ni mun’wani lomu sakweni yakwe. Laha vona ni papayi wabye va nga wona a zvipachi zvabye zva mali, va no chava. 36 A papayi wabye Jakobe i te ngalo kabye: “Vakahina, ma ndzi mbhetela vana!+ Josefa a nga ha hi kona;+ Simeyoni yenawu a nga ha hi kona;+ lezvi kambe mu lava ku teka na Bhenjamini. Zvontlhe lezvi zvi wela mina!” 37 Kanilezvi Rubheni i te ngalo ka papayi wakwe: “U ta daya a vana va mina va vambiri loku ndzi nga wuyi naye.+ Mu hendlelete ka mina, ndzi ta wuya naye ndzi ta ku nyika.”+ 38 Kanilezvi Jakobe i te ngalo: “Mu nga ta famba ni n’wana wa mina, hakuva a makabye wakwe i file, hi yena yece a seleko.+ Loku a famba a welwa hi mhango lomu ndleleni afa, hakunene mu ta relelisa a wuvhu ga mina Cilahleni*+ hi hlomulo.”+

43 Makunu a ndlala yi wa tshingile lomu tikweni.+ 2 Laha va nga mbhetile kuga a zvakuga lezvi va nga wuyile nazvo hi Gibhite,+ a papayi wabye i te ngalo kabye: “Tlhelani mu ya hi xavela zvakuga zvitsongwani.” 3 Judha aku kakwe: “A wanuna loye i hi byelile zviku dlunya, aku: ‘Mu nga ha wuyi kambe ka mina ahandle ka loku mu hi ni makabye wa n’wina.’+ 4 Loku u vhumela ku hi famba ni makabye wa hina, hi taya hi ya ku xavela zvakuga. 5 Kanilezvi loku u nga vhumeli a ku hi famba naye hi nga taya, hakuva a wanuna loye i hi byelile ku: ‘Mu nga ha wuyi kambe ka mina ahandle ka loku mu hi ni makabye wa n’wina’.”+ 6 Izrayeli+ a wutisa, aku: “Hikuyini mu ndzi neheleko a cikarato leci hi ku byela a wanuna loye lezvaku mu na ni mun’wani makabye?” 7 Va mu hlamula, vaku: “A wanuna loye i no hi wutisela a mahungu xungetano hi hina ni maxaka ya hina, aku: ‘Wa ha hanya a papayi wa n’wina ke? Kona mu na ni mun’wani makabye ke?’ Hikwalaho, hi no mu byela a timhaka leti.+ Na hi zvi tivisile kuyini a ku i taku: ‘Tanani ni makabye wa n’wina’?”+

8 Judha i no khongotela Izrayeli, a papayi wakwe, aku: “Rumela a mufana na mina,+ u hi tsika hi famba, kasi hi simama ku hanya hi ngafi+ — hina, na wena ni vana va hina.+ 9 Mina ndzi ti bohile lezvaku ndzi ta mu wonelela.+ Loku a tshuka a humelelwa hi cokari, tsayisa mina. Ni loku ndzi nga wuyi naye ndzi ta mu nyikela ka wena, ndzi tava ndzi ku wonhele wutomini ga mina gontlhe. 10 Loku hi wa nga hlwelangi, na hi tlhelile makhati mambiri hi tlhela hi wuya.”

11 Hikwalaho, a papayi wabye Izrayeli i te ngalo kabye: “Loku zvi hi lezvo, mahani lezvi: Tekani a bhalsamu yi tsongwani,+ ni wulombe gi tsongwani, ni ladhano, ni mahati ya hlakati,+ ni timanga ta pistaxiyo,* ni maalmondi — zvi nga zvilo zva zvinene zva lomu tikweni — mu chela lomu tisakweni ta n’wina mu ya nyika a wanuna loye kota cinyikiwo.+ 12 Tekani a mali yi wuyetilweko kumbiri; tlhelani ni mali leyi yi nga tlhelisiwa minon’wini ya tisakwa ta n’wina.+ Kuzvilava zvi no phazamisa. 13 Tekani a makabye wa n’wina mu famba, mu tlhela ka wanuna loye. 14 A Nungungulu wa Ntamu Wontlhe i wa mahe lezvaku a wanuna loye a mu zwela wusiwana, a mu tlhatlhela a makabye wa n’wina loyi mun’wani na Bhenjamini. Kanilezvi loku zvi lava ku ndzi sala na ndzi nga hi na vana, ndzi ta sala na ndzi nga hi na vana!”+

15 Hikwalaho, a vavanuna va no teka a cinyikiwo, ni mali yi wuyetilweko kumbiri, na Bhenjamini, va suka va relela vaya Gibhite va ya yima kambe mahlweni ka Josefa.+ 16 A cikhati leci Josefa a nga wona Bhenjamini na a hi navo, i no tekela ku byela a wanuna loyi a nga kari a wonelela a yindlu yakwe, aku: “Teka a vavanuna lava u famba navo le kaya u ya daya zvihari u longisela zvakuga, hakuva ndzi taga navo ni hlikanhi.” 17 A wanuna loye i no tekela ku maha lezvi Josefa a nga wulile,+ a va teka a famba navo mutini wa Josefa. 18 Kanilezvi a vavanuna lavo va no chava a cikhati leci va nga kari va yisiwa mutini wa Josefa, vaku: “Hiza hi yisiwa seno hi kota ya mali leyi yi nga tlhelisiwa tisakweni ta hina ka khati go gumesa hi nga tile laha. Makunu va ta hi dhumela, va hi khoma va hi maha tikhumbi va tlhela va teka timbongola ta hina!”+

19 Hikwalaho, va no tshinela ka wanuna loyi a nga kari a wonelela a yindlu ya Josefa va wulawula naye laha nyangweni ya yindlu. 20 Va te ngalo kakwe: “Hi tsetselele, hosi yanga! Hi wa rangile hita hi ta xava zvakuga.+ 21 Kanilezvi a cikhati leci hi nga chikela ka wutshamu go etlela ka gona hi sangula ku tlhatlha a tisakwa ta hina, a mali ya mun’we ni mun’wani yi wa hi non’wini wa sakwa yakwe, a ntsengo wontlhe wa mali ya hina.+ Makunu ha tlhelisa ha hoce. 22 Hi tile ni yin’wani mali kasi ku ta xava zvakuga. A hi zvi tivi a ku hi mani a nga chela a mali ya hina lomu ka tisakwa ta hina.”+ 23 Yena aku: “Zvi lulamile. Mu nga chavi! A Nungungulu wa n’wina ni Nungungulu wa papayi wa n’wina i chelile tshomba lomu ka tisakwa ta n’wina. A mali ya n’wina yi rangile hi kuta ka mina.” Andzhako ka lezvo, i no humesa Simeyoni a mu yisa kabye.+

24 A wanuna loye i no va nghenisa lomu ndlwini ya Josefa, a va nyika mati kasi va hlamba mikondzo a tlhela a ti nyika zvakuga a timbongola tabye. 25 Va no longisela a cinyikiwo+ kasi ku nyika Josefa laha a nga wa ta wuya ni hlikanhi, hakuva va wa zwile lezvaku va ta gela laho a zvakuga.+ 26 A cikhati leci Josefa a nga nghena lomu ndlwini, va no mu tisela cinyikiwo kwalomo ndlwini, va khizama mahlweni kakwe.+ 27 Andzhako ka lezvo, i no va wutisa a kuvhuka kabye, aku: “O yini a papayi wa n’wina wa cikhosana loyi mu nga mu wula? Wa ha hanya ke?”+ 28 Va no hlamula, vaku: “A nandza ga wena, a papayi wa hina, wa vhuka. Wa ha hanya.” Va no korama, va khizama.+

29 Laha Josefa a nga tlakusa mahlo a wona a makabye wakwe Bhenjamini, a n’wana wa mamani wakwe,+ i te: “Hi yaleyi a ndzisana ya n’wina leyi mu nga yi wula ke?”+ A engeta aku: “Nungungulu i wa ku katekise, n’wananga.” 30 Josefa i no huma hi kuhatlisa a ya lava wutshamu ga ku rilela kona hakuva i wa nga ha zvi koti ku ti khoma hi kota ya makabye wakwe. Hikwalaho, i noya a ya nghena ka yin’wani yindlu na a hi yece, a sangula ku rila.+ 31 Andzhako ka lezvo, i no hlamba nghohe a gumesa a huma kota lezvi makunu a nga kari a zvi kota ku ti khoma, a taku: “Phamelani zvakuga.” 32 Va no chelela Josefa hi tlhelo, ni vamakabye vakwe hi tlhelo, ni vaGibhite lava va nga hi naye va noga hi tlhelo, hakuva a vaGibhite va wa nga faneli kuga zvakuga ni vaHebheru kota lezvi wu nga hi nchumu wo nyenyeza ka vaGibhite.+

33 A vamakabye va Josefa va wa tshamile mahlweni kakwe kusukela ka loyi wa matewula hi kuya hi fanelo yakwe ya wutewula+ kala ka loyi wa ndzisana. Va no simama ku cuwukana na va hlamala. 34 I no simama ku rumela zvakuga zva laha mezeni yakwe zviya mezeni yabye, kanilezvi i wa engetela a zvakuga zva Bhenjamini hi ntlhanu wa zvikhati a ku hundza vontlhe.+ Hikwalaho, va no simama kuga ni kunwa na Josefa kala va xura.

44 Hi kufamba ka cikhati, Josefa i no laya a wanuna loyi a nga kari a wonelela yindlu yakwe, aku: “Tata tisakwa ta vavanuna lava hi zvakuga kala laha va to zvi kota ku rwala u tlhela u tlhelisa a mali ya mun’we ni mun’wani wabye non’wini wa sakwa yakwe.+ 2 Kanilezvi chela a kopo ya mina, a kopo liyani ya prata, non’wini wa sakwa ya loyi wa ndzisana zvin’we ni mali yakwe ya ku ta xava zvakuga.” Hikwalaho, i no maha zvalezvi Josefa a nga mu byelile.

3 Ni mixo, laha makunu ku nga kari ku wonekela, a vavanuna va no tsikiwa va famba ni timbongola tabye. 4 Na va ha hi ku huma lomu dhoropeni, na va nga seya kule, Josefa i no byela a wanuna loyi a nga wonelela yindlu yakwe, aku: “Suka u landza a vavanuna lavaya! A cikhati leci u to va kuma, va wutise, uku: ‘Hikuyini mu tlheliselako a wunene hi kubiha? 5 Hikuyini mu nga teka a kopo leyi a n’winyi wa mina a nwako hi yona ni ku yi tirisela ku tiva zvilo zva ha tako? Mu mahile zvilo zvo biha.’”

6 Hikwalaho, i no va landza a va kuma a va byela timhaka leti. 7 Vona vaku kakwe: “Hikuyini a hosi ya hina yi wulako lezvo? A zvive kule ni malandza ya wena a ku maha a zvilo zva tshamela lego! 8 Phela hambu a mali leyi hi yi kumileko minon’wini ya tisakwa ta hina hi wuyisile ka wena kusukela le tikweni ga Khanani.+ Makunu hi wa ta yi yivela yini a prata kutani ouro ya yindlu ya n’winyi wa wena ke? 9 Loku yi kumeka ni yin’we ya tikhumbi ta wena, i wa dawe niku hina van’wani hi ta maha tikhumbi ta n’winyi wa wena.” 10 Hikwalaho, yena i te: “Zvi wa mahise zvezvo: Loyi a to kumiwa ni kopo i tava khumbi ya mina kanilezvi n’wina van’wani mu nga tava ni nandzu.” 11 Hi kota ya lezvo, a mun’we ni mun’wani wabye i no hatla a rula sakwa yakwe a tlhatlha. 12 A wanuna loye i no lavetela khwatsi, a sangula hi ka sakwa ya loyi wa nhondzo kala ka leyi ya loyi wa ndzisana. Hi kugumesa, a kopo yi no kumiwa ka sakwa ya Bhenjamini.+

13 Zvalezvo, va no handzula a tinguwo tabye; a mun’we ni mun’wani wabye i no teka a sakwa yakwe a rwexa a mbongola yakwe va tlhela dhoropeni. 14 Laha Judha+ ni vamakabye vakwe va nga nghena lomu ndlwini ya Josefa, Josefa i wa ha hi kwalomo ndlwini; va nowa lahasi mahlweni kakwe.+ 15 Josefa aku: “Zvini zvezvi mu nga maha? Mu wa nga zvi tivi lezvaku a munhu wo fana na mina a nga zvi kota ku tiva zvilo zva ha tako ke?”+ 16 Judha a hlamula, aku: “Hi nga mu byela yini a n’winyi wa mina? Kona hi nga wula yini? Hi nga zvi tiyisisa kuyini lezvaku hi vanhu vo lulama ke? A Nungungulu wa lisine i polile a cigoho ca tikhumbi ta wena.+ Zvezvi hi tikhumbi ta n’winyi wa mina, hina zvin’we ni loyi a kopo yi kumilweko canjeni gakwe!” 17 Kanilezvi Josefa i te: “A zvive kule na mina a ku maha lezvo! A wanuna loyi a kopo yi kumilweko canjeni gakwe hi yena a to maha khumbi ya mina.+ Kanilezvi n’wina van’wani kandzihani hi kurula muya ka papayi wa n’wina.”

18 Makunu Judha i no mu tshinelela, aku: “Ndza ku khongotela, n’winyi wa mina, ndzi kombela lezvaku a khumbi ya wena yi wula gezu tindleveni ta n’winyi wa mina niku u nga zangareli a khumbi ya wena hakuva wena u fana na Faro wutsumbu.+ 19 A n’winyi wa mina i wutisile a tikhumbi takwe, aku: ‘Mu na ni papayi kutani makabye ke?’ 20 Hikwalaho, hi no hlamula n’winyi wa mina, hiku: ‘Hi naye papayi wo khosahala ni n’wana wa wukhosana gakwe, wa ndzisana.+ Kanilezvi a makabye wakwe i file,+ ku no sala yena yece ka vana va mamani wakwe+ niku a papayi wakwe wa mu randza nguvhu.’ 21 Andzhako ka lezvo, u no byela a tikhumbi ta wena, uku: ‘Tanani naye seno ka mina kasi ndzi ta mu wona.’+ 22 Kanilezvi hi no byela a n’winyi wa hina, hiku: ‘A zvi ringani ku a mufana a suka a siya papayi wakwe. Loku o suka a mu siya, a papayi wakwe hakunene i tafa.’+ 23 Makunu wena, hosi, u no byela a tikhumbi ta wena, uku: ‘Loku mu nga wuyi ni ndzisana ya n’wina mu nga ha wuyi kambe laha ka mina.’+

24 “Hikwalaho, hi no kandziha hiya ka khumbi ya wena, a papayi wa hina, hi ya mu hlawutela a magezu ya n’winyi wa mina. 25 Hi ndzhako ka cikhati, a papayi wa hina i te: ‘Tlhelani mu ya hi xavela a zvakuga zvi tsongwani.’+ 26 Kanilezvi hina hi te ngalo: ‘Hi nga taya. Loku hi hi ni ndzisana ya hina hi kona hi to famba, hakuva a hi nge woni a nghohe ya wanuna loye na hi nga hi na ndzisana ya hina.’+ 27 A khumbi ya wena, a papayi wa hina, i te ngalo ka hina: ‘N’wina ma zvi tiva khwatsi lezvaku a sati wa mina i no ndzi pswalela vana vambiri basi.+ 28 Kanilezvi a mun’we wabye i ndzi siyile, ndzi se: “Hakunene zva koteka ku ngha a phatlulelwe!”+ Niku a ndzi se mu wona kala lezvi. 29 Loku mo teka loyi kambe ndzi nga ha mu woni, a famba a welwa hi mhango, hakunene a mu ta relelisa wuvhu ga mina Cilahleni*+ hi kukarateka.’+

30 “Makunu loku ndzo tlhela ka khumbi ya wena, a papayi wa mina, na hi nga hi naye a mufana loyi, lezvi a wutomi* ga papayi wa hina gi boheneko ni wutomi* ga mufana loyi, 31 zvalezvi a to wona ku a mufana a hi naye, i tafa. Makunu a tikhumbi ta wena ti ta maha lezvaku a wuvhu ga khumbi ya wena, a papayi wa hina, gi relela Cilahleni* hi kukarateka. 32 Mina khumbi ya wena ndzi ti bohile ka papayi wa mina hi kota ya mufana loyi, ndziku: ‘Loku ndzi nga wuyi naye ka wena, ndzi tava ndzi ku wonhele kala kupindzuka.’+ 33 Makunu ndzi kombela lezvaku a khumbi ya wena yi sala yi maha khumbi ya n’winyi wa mina wutshan’wini ga mufana loyi, kasi a mufana a tlhela ni vamakabye vakwe. 34 Ndzi ta tlhelisa kuyini ka papayi wa mina na ndzi nga hi naye a mufana loyi ke? Ndzi nga ta tiya ku wona a papayi wa mina na a welwa hi khombo legi!”

45 Makunu Josefa i wa nga ha zvi koti ku ti khoma mahlweni ka wontlhe a malandza yakwe.+ Hikwalaho, Josefa i no banguleka, aku: “Byelani vontlhe va huma!” A ku na mun’wani a nga sele na Josefa a cikhati leci a nga ti tivekisa ka vamakabye vakwe.+

2 I no sangula ku rila hi gezu go tlakuka nguvhu laha ka kuza zvi zwiwa hi vaGibhite ni yindlu yontlhe ya Faro. 3 Hi kugumesa, Josefa i no byela a vamakabye vakwe, aku: “Hi mina Josefa. A papayi wa mina wa ha hanya ke?” Kanilezvi a vamakabye vakwe va no tsandzeka ku mu hlamula, hakuva va wa hlamala nguvhu hi kota ya yena. 4 Hikwalaho, Josefa i no byela a vamakabye vakwe, aku: “Tshinelani laha ka mina.” Va no tshinela kakwe.

Aku kabye: “Hi mina Josefa, a makabye wa n’wina, loyi mu nga mu xavisa a tisiwa Gibhite.+ 5 Kanilezvi mu nga bayiseki ne mu nga komamisani hi kota ya lezvi mu nga ndzi xavisa ndzita laha, hakuva hi Nungungulu a ndzi rumeleko mahlweni ka n’wina kasi ku ponisa a wutomi.+ 6 Legi i lembe ga wumbiri ga ndlala lomu tikweni+ niku ka ha sele a ntlhanu wa malembe lawa ku to kala kutshovelwa kutani ku rimiwa. 7 Kanilezvi Nungungulu i ndzi rumele mahlweni ka n’wina kasi ndzi fela ku mu hlayisela a misalela+ laha misaveni* ni ku mu maha mu simama mu hanya hi kutlhatlhisa ka hombe. 8 Hikwalaho, a hi n’wina mu nga ndzi rumela seno kanilezvi a Nungungulu wa lisine hi yena a nga ndzi rumela seno kasi a ta ndzi yimisa a kuva sungukati ga hombe* ga Faro tlhelo hosi ya yindlu yakwe yontlhe ni mufumeli wa tiko gontlhe ga Gibhite.+

9 “Hatlisani mu tlhela ka papayi wa mina mu yaku kakwe: ‘A n’wana wa wena Josefa i te ngalo: “Nungungulu i ndzi yimisile a kuva hosi ya tiko gontlhe ga Gibhite.+ Relela uta seno ka mina. U nga hlweli.+ 10 U ta tshama le tikweni ga Goxeni,+ uva kusuhani na mina — wena, ni vana va wena, ni vazukulu va wena, ni yontlhe a mitlhambi ya wena, ni zvontlhe lezvi u nga nazvo. 11 Ndzi ta ku hlayisa na u hi kwaseyo, hakuva ka ha sele a ntlhanu wa malembe ya ndlala.+ Loku zvi nga hi lezvo, wena ni yindlu ya wena mu tava wusiwaneni niku zvontlhe lezvi u nga nazvo zvi ta lova.”’ 12 N’wina ni makabye wa mina Bhenjamini ma zvi wona hi mahlo ya n’wina lezvaku hi mina hakunene ndzi wulawulako na n’wina.+ 13 Hikwalaho, mu fanele ku hlawutela a papayi wa mina a wudzundzo ga mina gontlhe ga lomu Gibhite ni zvontlhe lezvi mu zvi wonileko. Hatlisani mu ya teka a papayi wa mina mu wuya naye seno.”

14 Josefa i no bharasara* Bhenjamini, a makabye wakwe, a sangula ku rila; na Bhenjamini i no rila na a mu bharasarile.*+ 15 Josefa i no pswopswa vontlhe a vamakabye vakwe a rila na a va bharasarile. Andzhako ka lezvo, a vamakabye vakwe va no wulawula naye.

16 Ku no chikela mahungu ndlwini ya Faro, yaku: “Ku tile a vamakabye va Josefa!” Lezvo zvi no tsakisa Faro ni malandza yakwe. 17 Hikwalaho, Faro i no byela Josefa, aku: “Byela a vamakabye va wena uku: ‘Mahani lezvi: Rwexani a zvifuyo zva n’wina mu tlhela tikweni ga Khanani, 18 mu ya teka a papayi wa n’wina ni mingango ya n’wina mu wuya seno ka mina. Ndzi ta mu nyika a zvilo zva zvinene zva tiko ga Gibhite niku mu taga* zvilo zvo nona* zva tiko.’+ 19 Va byele uku:+ ‘Mahani lezvi: Tekani tikareta+ ta lomu tikweni ga Gibhite mu ya khileta a vana va n’wina ni vasati va n’wina, mu khileta ni papayi wa n’wina ka yin’we ya tona ata seno.+ 20 Mu nga karateki hi titshomba ta n’wina,+ hakuva a zvilo zva wuchukwana zva tiko gontlhe ga Gibhite zva n’wina.’”

21 A vana va Izrayeli va no maha lezvo. Josefa i no va nyika tikareta kota lezvi Faro a nga layile a tlhela a va nyika timbuva ta ku vaga hi ndlela. 22 A mun’we ni mun’wani wabye i no mu nyika nguwo yin’we ya ku a ta cica kanilezvi Bhenjamini i no mu nyika 300 wa zvingerengere zva prata ni ntlhanu wa tinguwo ta ku a ta cica.+ 23 Lezvi a nga rumelela papayi wakwe hi lezvi: 10 wa timbongola ti nga rwele a zvilo zva zvinene zva Gibhite, ni 10 wa mapswele ya timbongola ma nga rwele timbewu ni zvakuga,* ni timbuva ta ku a papayi wakwe aga hi ndlela. 24 Josefa i no salisana ni vamakabye vakwe niku laha va nga kari va suka, i no va byela lezvi: “Mu nga zangarisani lomu ndleleni.”+

25 Hikwalaho, va no suka Gibhite va kandziha va tlhela ka papayi wabye Jakobe tikweni ga Khanani. 26 Va no mu byela lezvi: “Josefa wa ha hanya niku hi yena a fumelako a tiko gontlhe ga Gibhite!”+ Kanilezvi a mbilu ya Jakobe yi no mbhela ntamu hakuva i wa nga kholwi lezvi va nga mu byela.+ 27 A cikhati leci va nga mu hlawutela zvontlhe lezvi Josefa a nga va byelile ni laha a nga wona a tikareta leti Josefa a nga ti rumele kasi ku ta mu teka, a moya wa Jakobe, a papayi wabye, wu no sangula ku kuma ntamu. 28 Izrayeli i no ti phofula, aku: “Mu nga ha wuli zvin’wani! A n’wana wa mina Josefa wa ha hanya! Ndza ha famba ndzi ya mu wona na ndzi nga sefa!”+

46 Hikwalaho, Izrayeli i no teka zvontlhe lezvi a nga hi nazvo,* a suka. A cikhati leci a nga chikela le Bherexebha,+ i no nyikela miphahlo ka Nungungulu wa papayi wakwe Isaka.+ 2 Nungungulu i no wulawula na Izrayeli hi muwoniso ni wusiku, aku: “Jakobe, Jakobe!” Yena aku: “Hi mina loyi!” 3 Nungungulu aku: “Hi mina Nungungulu wa lisine, a Nungungulu wa papayi wa wena.+ U nga chavi a ku relela uya Gibhite, hakuva kwaseyo ndzi ta ku maha uva tiko ga hombe.+ 4 Mina ndzi ta relela na wena le Gibhite ndzi tlhela ndzi ku wuyisa hi leyo+ niku Josefa i ta tlhateka canja gakwe matihlweni ya wena.”*+

5 Andzhako ka lezvo, Jakobe i no suka le Bherexebha niku a vana va Izrayeli va no khileta Jakobe, a papayi wabye, ni vana vabye, ni vasati vabye lomu ka tikareta leti Faro a nga rumele kasi ku ya va teka hi tona. 6 Va no famba ni mitlhambi yabye ni titshomba tabye leti va nga hlengeletele tikweni ga Khanani. Hikwalaho, Jakobe i no nghena lomu Gibhite ni pswalo wakwe wontlhe. 7 I no nghena ni vafana vakwe, ni vazukulu vakwe va vafana, ni vanhanyana vakwe, ni vazukulu vakwe va vanhanyana — a pswalo wakwe wontlhe.

8 A mavito ya vafana va Izrayeli, ku nga Jakobe, lava va nga nghena Gibhite hi lawa:+ A matewula ya Jakobe hi Rubheni.+

9 A vana va Rubheni kuve Hanoke, na Palu, na Hezroni, na Karmi.+

10 A vana va Simeyoni+ kuve Jemuweli, na Jamina, na Ohadhe, na Jakina, na Zohare na Xawule,+ a n’wana wa wasati wa muKhanani.

11 A vana va Levhi+ kuve Gerxoni, na Kohate na Merari.+

12 A vana va Judha+ kuve Ere, na Onani, na Xela,+ na Perezi,+ na Zera.+ Kanilezvi Ere na Onani va fele tikweni ga Khanani.+

A vana va Perezi kuve Hezroni na Hamula.+

13 A vana va Isakari kuve Tola, na Puvha, na Iyobha, na Ximroni.+

14 A vana va Zebhuloni+ kuve Seredhe, na Eloni, na Jahleeli.+

15 Lava vafana lava Leya a nga pswalela Jakobe le Padhani-Aramu. A nhanyana ku wa hi Dhina.+ Vontlhe a vafana vakwe ni vanhanyana vakwe* va wa hi 33.

16 A vana va Gadhi+ kuve Zifoni, na Hagi, na Xuni, na Ezbhoni, na Eri, na Arodhi, na Areli.+

17 A vana va Axeri+ kuve Imna, na Ixvha, na Ixvhi, na Bheriya. A makabye wabye wa cisati kuve Sera.

A vana va Bheriya kuve Hebhere na Malkiyeli.+

18 Lava i vana va Zilpa,+ loyi Labani a nga mu nyikela ka nhanyana wakwe Leya. Zilpa i no mu pswalela vana lavo Jakobe. Vontlhe va wa hi 16 wa vanhu.*

19 A vana va Rakeli, a sati wa Jakobe, kuve Josefa+ na Bhenjamini.+

20 Le Gibhite Josefa i no pswalelwa Manase+ na Efrayime+ hi Asenate,+ a nhanyana wa Potifera, a mupristi wa le Oni.*

21 A vana va Bhenjamini+ kuve Bhela, na Bhekera, na Axbheli, na Gera,+ na Namani, na Ehi, na Roxa, na Mupima, na Hupima,+ na Ardha.+

22 Lava i vana lava Rakeli a nga pswalela Jakobe. Vontlhe va wa hi 14 wa vanhu.*

23 A n’wana* wa Dhani+ kuve Huximu.+

24 A vana va Naftali+ kuve Jahzeeli, na Guni, na Jezera, na Xilemi.+

25 Lava i vana va Bhilha, loyi Labani a nga mu nyikela ka nhanyana wakwe Rakeli. Bhilha i no mu pswalela vana lavo Jakobe. Vontlhe va wa hi 7 wa vanhu.*

26 Vontlhe lava va humileko hi ka Jakobe, lava va fambileko naye Gibhite, na ku nga hlayiwi a vasati va vafana va Jakobe, va wa hi 66.+ 27 A vafana va Josefa lava a nga pswalelwa Gibhite va wa hi vambiri.* Vontlhe a vanhu va yindlu ya Jakobe lava va ngaya Gibhite va wa hi 70.+

28 Jakobe i no rumela Judha+ mahlweni kakwe kasi a ya byela Josefa lezvaku i wa hi lomu ndleleni ya kuya Goxeni. A cikhati leci va nga chikela le tikweni ga Goxeni,+ 29 Josefa i no laya lezvaku ku longiselwa a kareta yakwe a kandziha a ya tlhangana na Izrayeli, a papayi wakwe, le Goxeni. Laha a nga chikela kakwe, i no mu bharasara* a rila hi cikhati co leha.* 30 Izrayeli i no byela Josefa, aku: “Makunu ndzi ngafa; ndzi yi wonile a nghohe ya wena niku ndza zvi tiva lezvaku wa ha hanya.”

31 Josefa i no byela vamakabye vakwe ni ngango wa papayi wakwe, aku: “Ndza ha kandziha ndzi ya byela Faro,+ ndziku: ‘A vamakabye va mina ni ngango wa papayi wa mina, lava va nga hi le tikweni ga Khanani, va tile seno ka mina.+ 32 A vanhu lavo varisi+ niku va fuya mitlhambi.+ Va tile ni mitlhambi yabye ni zvontlhe lezvi va nga nazvo.’+ 33 A cikhati leci Faro a to mu vitana a ta mu wutisa ku: ‘Hi wihi a ntiro wa n’wina?’ 34 Hlamulani muku: ‘Hina malandza ya wena hi varisi kusukela wun’wananeni ga hina, hina ni vakokwani va hina’,+ kasi mu fela ku tshama lomu tikweni ga Goxeni,+ hakuva a vafuyi va tiyivhu cinyenyeko ka vaGibhite.”+

47 Hikwalaho, Josefa i noya a ya hlawutela Faro,+ aku: “A papayi wa mina ni vamakabye va mina va tile hi le tikweni ga Khanani ni tiyivhu tabye, ni tihomu tabye, ni zvontlhe lezvi va nga nazvo, niku va le tikweni ga Goxeni.”+ 2 Josefa i no hlawula ntlhanu wa vamakabye vakwe a ya va kombekisa ka Faro.+

3 Faro i no wutisa a vamakabye va Josefa, aku: “Hi wihi a ntiro wa n’wina?” Va no mu hlamula, vaku: “A malandza ya wena varisi va tiyivhu, hina ni vakokwani va hina.”+ 4 Va no engeta va byela Faro, vaku: “Hi tile seno kota valuveli lomu tikweni,+ hakuva a malandza ya wena a ma na wuriselo ga mitlhambi hakuva a ndlala ya hombe tikweni ga Khanani.+ Hikwalaho, hi kombela lezvaku u tsika malandza ya wena ma tshama le tikweni ga Goxeni.”+ 5 Zvalezvo Faro i no byela Josefa, aku: “A papayi wa wena ni vamakabye va wena va tile leno ka wena. 6 A tiko ga Gibhite gi mandleni ya n’wina. Teka a papayi wa wena ni vamakabye va wena u va veka ka wutshamu ga ginene nguvhu ga tiko.+ Va wa tshame tikweni ga Goxeni. Loku u tiva vavanuna vo kari va nga ni wutlhari cikari kabye, va yimise kota vawoneleli va zvifuyo zva mina.”

7 Hi kulandzela, Josefa i no teka Jakobe, a papayi wakwe, a ya mu kombekisa ka Faro; Jakobe i no katekisa Faro. 8 Faro i no wutisa Jakobe, aku: “Malembe mangani u nga nawo?” 9 Jakobe i no hlamula Faro, aku: “A malembe ya kupepetseka ka mina* i 130. A malembe ya wutomi ga mina ma tsongwani niku ma tele hi kukarateka;+ a ma talangi a ku fana ni malembe ya wutomi ga vakokwani va mina kupepetsekeni kabye.”*+ 10 Andzhako ka lezvo, Jakobe i no katekisa Faro a gumesa a suka mahlweni kakwe.

11 Makunu Josefa i no veka a papayi wakwe ni vamakabye vakwe tikweni ga Gibhite, a va nyika tshomba ka cipandze leci ca cinene nguvhu ca tiko, tikweni ga Ramesese+ kota lezvi Faro a nga layile. 12 Josefa i no simama ku hlayisa a papayi wakwe, ni vamakabye vakwe, ni ngango wontlhe wa papayi wakwe hi ku va nyika zvakuga* hi kuya hi ntsengo wa vanana vabye.

13 Ku wa nga hi na zvakuga* tikweni gontlhe, hakuva a ndlala yi wa tshingile nguvhu. A tiko ga Gibhite ni tiko ga Khanani ma no xoka hi ndlala.+ 14 Josefa i wa hlengeletela a mali yontlhe leyi yi nga kumiwa tikweni ga Gibhite ni ga Khanani leyi a vanhu va nga xava hi yona a timbewu.+ Josefa i wa simama ku yisa mali leyo ndlwini ya Faro. 15 Hi kufamba ka cikhati, a mali ya tiko ga Gibhite ni ga Khanani yi no mbhela. A vaGibhite vontlhe va no sangula kuya ka Josefa, va yaku: “Hi nyike zvakuga! U ta hi tsika hifa na u hi wona hi ko ku hi mbhelelwe hi mali ke?” 16 Josefa aku: “Loku a mali ya n’wina yi mbhelile nyikelani a zvifuyo zva n’wina. Loku mu nyikela a zvifuyo zva n’wina, mina ndzi ta mu nyika zvakuga.” 17 Hikwalaho, va no sangula ku neha a zvifuyo zvabye ka Josefa, Josefa a simama ku va nyika zvakuga na va cicisa hi mahaxi yabye, ni timbuti, ni tiyivhu, ni tihomu, ni timbongola. Ka lembe lego, Josefa i no simama ku va nyika zvakuga na va cicisa hi zvifuyo zvabye zvontlhe.

18 Laha a lembe lego gi nga mbhela, va no sangula kuya ka Josefa ka lembe gi nga landzela, va yaku: “Hi nga ta fihlela a hosi ya hina lezvaku hi sina hi yi nyikile a mali ya hina ni zvifuyo zva hina. A ha ha salangi ni nchumu kasi ku nyika a hosi ya hina; hi no sala ni mimiri ya hina ni mipetso ya hina basi. 19 U ta hi tsika hifa na u hi wona, hina ni tiko ga hina ke? Hi xave, hina ni tiko ga hina, u hi nyika zvakuga. Hina ni tiko ga hina hi tava tikhumbi ta Faro. Hi nyike timbewu kasi hi hanya, hi ngafi ni lezvaku a tiko ga hina gi ngavi ciwula.” 20 Josefa i no xava a tiko gontlhe ka vaGibhite gi maha ga Faro, hakuva a muGibhite mun’we ni mun’wani i no xavisa simu gakwe hi kota ya lezvi a ndlala yi nga tshingile. A tiko gi nova ga Faro.

21 Andzhako ka lezvo, i no rurisa vanhu va ya lomu madhoropeni, kusukela ka mbhiri yin’we ya tiko ga Gibhite kala ka yin’wani mbhiri.+ 22 I tiko ga vapristi goce a nga kala ku xava,+ hakuva a zvakuga zva vapristi zvi wata hi ka Faro; va wa hanya hi zvakuga lezvi Faro a nga kari a va nyika. Hi cigelo leco, a va xavisangi a tiko gabye. 23 Josefa i no byela vanhu, aku: “Ma zvi wona! Nyamutlha ndzi xavile n’wina ni mipetso ya n’wina ndzi xavela Faro. Tekani mbewu leyi mu byala lomu tikweni. 24 Laha mu to tshovela, nyikelani a cipandze ca wutlhanu ca pfuno ka Faro,+ kanilezvi a mune wa zvipandze zvi tava zva n’wina kasi mu maha hi zvona mbewu mu tlhela muga, n’wina, ni va laha ngangweni wa n’wina, ni vana va n’wina.” 25 Va hlamula vaku: “U ponisile wutomi ga hina.+ Loku u vhumela, hi tava tikhumbi ta Faro.”+ 26 Josefa i no zvi yimisa kota cileletelo, leci ci tirako kala nyamutlha a tikweni gontlhe ga Gibhite, ca lezvaku a cipandze ca wutlhanu ca pfuno ci lumba Faro. A tiko ga vapristi hi gona goce gi nga kala kuva ga Faro.+

27 A vaIzrayeli va no simama ku tshama tikweni ga Gibhite, le Goxeni.+ Va no aka kona, va pswalelana va tala nguvhu.+ 28 Jakobe i no hanya 17 wa malembe lomu tikweni ga Gibhite. Hikwalaho, a masiku ya kuhanya ka Jakobe ma nova 147 wa malembe.+

29 Laha a cikhati ca kufa ka Izrayeli ci nga kari ci tshinela,+ i no vitana a n’wana wakwe Josefa, aku kakwe: “Loku ndzi kumile thomo mahlweni ka wena, ndzi kombela ku u vekela a canja ga wena lahasi ka thanga ga mina u ndzi komba ku u na ni lirandzo li nga mbheliko niku u tsumbekile ka mina. Ndzi kombela ku u nga ndzi lahli lomu Gibhite.+ 30 A cikhati leci ndzi tofa* ndzi rwale u huma na mina lomu Gibhite, u ya ndzi lahla cilahleni ca vakokwani va mina.”+ Josefa i no vhumela, aku: “Ndzi ta maha zvalezvi u wulako.” 31 Jakobe aku: “Hlambanya.” Hikwalaho, Josefa i no hlambanya kakwe.+ Zvalezvo Izrayeli i no korama laha tihlokweni ta mubhedhi wakwe.+

48 Andzhako ka lezvo, Josefa i no byeliwa lezvi: “A papayi wa wena wa mbhela ntamu.” Zvalezvo i no teka a vafana vakwe va vambiri, Manase na Efrayime, a famba navo kakwe.+ 2 Makunu Jakobe i no byeliwa lezvi: “A n’wana wa wena Josefa i tile kasi a ta ku wona.” Hikwalaho, Izrayeli i no ti tiyiseta a vhuka a tshama laha mubhedhini wakwe. 3 Jakobe i no byela Josefa, aku:

“A Nungungulu wa Ntamu Wontlhe i wonekile ka mina le Luza, a tikweni ga Khanani, a ndzi katekisa.+ 4 I te ngalo ka mina: ‘Ndzi ta ku maha uva ni vana vo tala, ndzi ku andzisa; ndzi ta ku maha bandla ga matiko,+ ndzi nyikela a tiko legi ka pswalo* wa wena andzhako ka wena kota tshomba ya kala kupindzuka.’+ 5 Makunu a vafana va wena va vambiri lava u pswalelweko lomu Gibhite na ndzi nga seta, va mina.+ Efrayime na Manase va tava va mina a ku fana ni lezvi Rubheni na Simeyoni va nga va mina.+ 6 Kanilezvi a vana lava u to pswalelwa andzhako kabye va tava va wena. Va ta vitaniwa hi vito ga vamakabye vabye tshombeni yabye.+ 7 Na ndzi kari ndzi wuya hi le Padhani, ndzi no felwa hi Rakeli+ tikweni ga Khanani na ka ha sele pfhuka kasi ku chikela le Efrata.+ Hikwalaho, ndzi no mu lahla ndleleni ya kuya Efrata, ku nga le Bhetlehema.”+

8 Makunu Izrayeli i no wona vana va Josefa, a wutisa, aku: “Hi vamani lava?” 9 Josefa a hlamula papayi wakwe, aku: “I vana va mina lava Nungungulu a ndzi nyikileko tikweni legi.”+ Yena aku: “Va tise seno ndzi ta va katekisa.”+ 10 Makunu a mahlo ya Izrayeli ma wa firimela hi kota ya kukhosahala, ma wa nga ha woni khwatsi. Hikwalaho, Josefa i no va tshineta ka papayi wakwe, a va pswopswa a tlhela a va bharasara. 11 Izrayeli i no byela Josefa, aku: “Ndzi wa nga alakanyi ku ndzi nga wona a nghohe ya wena,+ kanilezvi Nungungulu i ndzi mahile ndzi wona ni pswalo* wa wena.” 12 Josefa i no va susa laha madzolweni ya Izrayeli, a korama lahasi hi nghohe.

13 Hi kulandzela, Josefa i no va khoma hi wumbiri gabye: Efrayime+ hi canja gakwe ga cinene a mu yisa canjeni ga cibhabha ga Izrayeli, Manase+ hi canja gakwe ga cibhabha a mu yisa canjeni ga cinene ga Izrayeli, a va tshineta kakwe. 14 Hambulezvo, Izrayeli i no tlhateka canja gakwe ga cinene hlokweni ya Efrayime kuveni i ndzisana, legi ga cibhabha a gi tlhateka hlokweni ya Manase. A mandla yakwe i ma tlhatekisile lezvo ha womu, hambu lezvi Manase a nga hi matewula.+ 15 I no katekisa Josefa, aku:+

17 A cikhati leci Josefa a nga wona lezvaku a papayi wakwe a nga susi a canja gakwe ga cinene laha hlokweni ya Efrayime, zvi no mu swira. I no zama ku khoma a woko ga papayi wakwe kasi a gi susa hlokweni ya Efrayime a gi tlhateka hlokweni ya Manase. 18 Josefa i no byela papayi wakwe, aku: “U nga mahisi lezvo, papayi, hakuva a matewula hi loyi.+ Tlhateka a canja ga wena ga cinene hlokweni yakwe.” 19 Kanilezvi a papayi wakwe i no simama ku ala, aku: “Ndza zvi tiva, n’wananga, ndza zvi tiva! Yenawu i tava tiko niku i tava wa hombe. Kanilezvi a ndzisana yakwe yi tava ya hombe nguvhu a ku hundza yena,+ ni pswalo* wa Efrayime wu ta tala wu maha matiko.”+ 20 Hikwalaho, i no simama ku va katekisa ka siku lego,+ aku:

Hi ndlela leyo, i no simama ku rangisa Efrayime mahlweni ka Manase.

21 Izrayeli i no byela Josefa, aku: “Ndzofa,+ kanilezvi Nungungulu i ta simama zvin’we na wena niku i ta ku tlhelisa tikweni ga vakokwani va wena.+ 22 Makunu mina ndza ku nyika a cipandze ca hombe ca tiko a ku hundza a vamakabye va wena leci ndzi wutlileko canjeni ga vaAmori hi cipadha ca mina ni wura ga mina.”

49 Jakobe i no vitana vana vakwe, aku: “Tlhanganani kasi ndzi ta mu byela lezvi zvi to mu mahekela masikwini yo gumesa. 2 Tlhanganani mu ingisela, n’wina vana va Jakobe, ina, ingiselani Izrayeli, a papayi wa n’wina.

3 “Rubheni,+ wena u matewula ya mina,+ a ntamu wa mina ni masangulo ya ntamu wa mina wa kupswala; u wa pala vontlhe hi wudzundzo ni ntamu. 4 Kanilezvi hi kota ya ku phungela a ku fana ni mati ma vhindlukileko, u nga ta humelela, hakuva u nomile a mubhedhi wa papayi wa wena.+ Ka cikhati leco, u nyenyezisile* a mubhedhi wa mina. Kunene i nomile a mubhedhi wa mina!

5 “Simeyoni na Levhi vakamakabye.+ Va tirisa a matlhari yabye kasi ku maha tihanyi.+ 6 O, muhefemulo* wa mina, u nga ti patsi navo. O, wudzundzo* ga mina, u nga hlengeli navo mutlhanganweni wabye, hakuva zangeni yabye, va no daya vanhu+ va tlhela va tsemelela misiha ya minenge ya tihomu hi ku fela ku ti tsakisa. 7 A zanga yabye yi wa rukiwe hakuva yi bihile, ni khulo gabye hakuva gi na ni tihanyi.+ Ndzi ta va hangalasa lomu tikweni ga Jakobe, ndzi va xwanya lomu Izrayeli.+

8 “Xungetano hi wena Judha,+ a vamakabye va wena va ta ku dzundza.+ A canja ga wena gi tava nhan’wini ya valala va wena.+ A vana va papayi wa wena va ta khizama mahlweni ka wena.+ 9 Judha i role ga nghala.+ U ta tlakuka na u gile nyama, n’wananga. I cuculukile a ti nawuluta a ku khwatsi i nghala, niku a ku khwatsi i nghala, hi mani wa ku a nga xinyata a mu vhuxa ke? 10 A nhonga ya wuhosi yi nga ta suka ka Judha,+ hambu a nhonga ya komandante yi nga ta suka cikari ka mikondzo yakwe, kala kuta Xilo;*+ a matiko wontlhe ma ta mu ingisa.+ 11 I boha mbongola yakwe laha vhineni, ni cimbongolana cakwe laha vhineni wa wunene nguvhu. I ta hlazva nguwo yakwe hi vhinyo, ni nghanju yakwe hi nkhata wa mauvha. 12 A matihlo yakwe ma pswhukisile ku zvu hi kota ya vhinyo, ni matino yakwe ma te xwe hi kota ya masi.

13 “Zebhuloni+ i ta hanya mbhirini ya bimbi laha a zvitimela* zvi nyimisiwako kona.+ A mbhingano wakwe wu tava kusuhani ni Sidhoni.+

14 “Isakari+ i mbongola ya marambu yo tiya leyi yi etlelako cikari ka mindzhwalo yimbiri.* 15 I ta wona lezvaku a wutshamu ga ku humula gi nene ni lezvaku a tiko ga tsakisa. I ta releta katla gakwe kasi ku rwala ndzhwalo niku i ta ti nyikela kasi ku maha mitiro ya cikurumeta.

16 “Dhani+ i ta lamula vanhu vakwe kota lin’we la tixaka ta ka Izrayeli.+ 17 Dhani i tava nyoka yi tshamako laha mbhirini ya ruwa, a nyoka ya timhondzo laha mbhirini ya ndlela, leyi yi lumako a zvirendze zva haxi kasi a mukhileli wa gona awa hi le ndzhako.+ 18 O, Jehovha, ndzi ta rindzela a kuhanyiswa ku tako hi ka wena.

19 “Gadhi+ i ta dhumelwa hi ntlawa wa zvigevenga, kanilezvi yena i ta dhumela zvirendze zvabye.+

20 “A zvakuga* zva Axeri+ zvi ta tala* niku i ta humesa zvakuga zvi ringanako ku giwa hi hosi.+

21 “Naftali+ i mbavala* yo hlongana niku i wulawula magezu yo tsakisa.+

22 “Josefa+ i dhavi ga sinya yi pswalako mihandzu, ina, a sinya yi pswalako mihandzu yi nga mbhirini ya congo, leyi a madhavi ya yona ma navako hehla ka muro. 23 Kanilezvi a vaphandi va mipaxa va no simama ku mu dhumela, va mu fula va tlhela va mu vekela civiti.+ 24 Hambulezvo, a wura gakwe gi simamile wutshan’wini ga gona,+ ni mandla yakwe ma simamile ma tiyile ni ku olova.+ Lezvi zvi tile hi mandleni ya nyamintamu wa Jakobe, hi ka murisi, a ribye ga Izrayeli. 25 Yena* ita hi ka Nungungulu wa papayi wa wena, niku i ta ku vhuna. I zvin’we ni Loyi wa Ntamu Wontlhe niku i ta mu katekisa hi makatekwa ya le hehla matilweni, ni makatekwa ya lomu hasi ko eta,+ ni makatekwa ya mavele ni ya nyimba. 26 A makatekwa ya papayi wa wena ma tava ya hombe a ku hundza a makatekwa ya zvitsunga zva pindzukelwa ni ku hundza a zvilo zvo naveleka zva zvitsungana zva pindzukelwa.+ Ma ta simama hehla ka hloko ya Josefa, ina, hehla ka cidlodlo* ca hloko ya loyi a hlawulilweko cikari ka vamakabye vakwe.+

27 “Bhenjamini+ i ta simama ku pfhemula a ku fana ni hlolwa.+ Ni mixo i taga nyama, ni gambo a avanyisa muphango.”+

28 Vontlhe lava hi vona a 12 wa tixaka ta ka Izrayeli niku lezvi hi lezvi a papayi wabye a nga va byela a cikhati leci a nga va katekisa. A mun’we ni mun’wani wabye i no mu nyika a makatekwa ma mu ringanako.+

29 Andzhako ka lezvo, i no va nyika a cileletelo leci: “Lokuloku ndzi ta hlengeletwa ka vanhu va mina.*+ Ndzi lahleni ni vapapayi va mina le mhakweni leyi yi nga le sin’wini ga Efroni, a muHiti,+ 30 a mhako leyi yi nga le sin’wini ga Makapela, mahlweni ka Mamre, tikweni ga Khanani, a simu legi Abrahama a xavileko ka Efroni, a muHiti, kota tshomba kasi yiva cilahla. 31 Hi kwalaho ku nga lahliwa Abrahama ni sati wakwe Sara.+ Hi kwalaho ku nga lahliwa Isaka+ ni sati wakwe Rebheka niku hi kwalaho kambe ndzi nga mu lahla kona Leya. 32 A simu lego ni mhako leyi yi nga ka gona zvi xavilwe ka vana va Heti.”+

33 Jakobe i no mbheta ku va nyika zvileletelo lezvi a vana vakwe. Andzhako ka lezvo, i no tlhateka a minenge laha mubhedhini, a hefemula hi khati go gumesa, a hlengeletwa ka vanhu vakwe.*+

50 Josefa i no ti wisela laha ka papayi wakwe,+ a rila a tlhela a mu pswopswa. 2 Andzhako ka lezvo, Josefa i no laya a malandza yakwe, a vadhokodhela, lezvaku va longisela a cirumbi+ ca papayi wakwe. Hikwalaho, a vadhokodhela va no longisela cirumbi ca Izrayeli; 3 va no mbheta 40 wa masiku na va mu longisela, hakuva lawo hi wona masiku ma lavekako kasi ku longisela cirumbi. A vaGibhite va no simama ku mu rila hi 70 wa masiku.

4 Laha a masiku ya cirilo ma nga hundzile, Josefa i no byela a ngango wa Faro, aku: “Loku ndzi kumile thomo mahlweni ka n’wina, byelani Faro, muku: 5 ‘Papayi i ndzi hlambanyisile,+ aku: “Wa zvi wona! Ndzofa.+ U ta ndzi lahla cilahleni ca mina+ leci ndzi ci kehlileko tikweni ga Khanani.”+ Makunu ndzi kombela lezvaku u ndzi tsika ndzi ya lahla a papayi wa mina; ndzi ta wuya.’” 6 Faro i no hlamula, aku: “Famba u ya lahla papayi wa wena kota lezvi a ku hlambanyisileko.”+

7 Hikwalaho, Josefa i no kandziha a ya lahla papayi wakwe; i no famba ni wontlhe a malandza ya Faro, a madhota+ ya le wuhosini gakwe ni wontlhe a madhota ya lomu tikweni ga Gibhite, 8 ni vontlhe va laha ngangweni wa Josefa, ni vamakabye vakwe, ni va laha ngangweni wa papayi wakwe.+ Ku no sala ntsena a zvivanana zvabye, ni zvifuyo zvabye, ni mitlhambi yabye le tikweni ga Goxeni. 9 Ku no famba tikareta+ ni vakhileli va mahaxi zvin’we naye; a ntlawa lowo wu wa hi wa hombe nguvhu. 10 Makunu va no chikela ka wutshamu go hulela kona timbewu ga Atadhe, gi nga tikweni ga Jordhani. Kwalaho va no maha cirilo ca hombe, vaba mikosi. Josefa i no simama ku rila papayi wakwe hi 7 wa masiku. 11 A vahanyi va wutshamu lego, a vaKhanani, va no wona a cirilo leco laha wutshan’wini go hulela kona timbewu ga Atadhe, va se hlamala, vaku: “Leci cirilo ca hombe ca vaGibhite!” Hi caleco ci nga maha ku a wutshamu lego gi chuliwa ku i Abhel-Mizrayime,* gi kumekako cipandzeni ca Jordhani.

12 A vana va Jakobe va no mu mahela zvalezvi a nga va layile.+ 13 A vana vakwe va no mu teka va famba naye tikweni ga Khanani va ya mu lahla lomu mhakweni yi nga sin’wini ga Makapela, gi nga simu legi gi nga mahlweni ka Mamre, legi Abrahama a gi xavileko ka Efroni, a muHiti, kasi gi maha cilahla.+ 14 Andzhako ka loku Josefa a lahlile a papayi wakwe, i no tlhela Gibhite ni vamakabye vakwe, zvin’we ni vontlhe lava a nga fambile navo kulahleni ka papayi wakwe.

15 Laha a vamakabye va Josefa va nga wona lezvaku a papayi wabye i file, va te ngalo: “Kuzvilava Josefa i hi vekele civiti niku i ta hi tlhelisela kubiha kontlhe loku hi mu maheleko.”+ 16 Hikwalaho, va no rumela mahungu ka Josefa, yaku: “Na a nga sefa, a papayi wa wena i layile lezvi: 17 ‘Mu ta byela Josefa, muku: “Ndza ku khongotela, ndzi kombela lezvaku u tsetselela cihambunyeto ca vamakabye va wena ni ciwonho leci va ku maheleko hi ku ku mahela kubiha.”’ Makunu tsetselela a cihambunyeto ca malandza ya Nungungulu wa papayi wa wena.” Josefa i no rila a cikhati leci va nga wulawula naye. 18 A vamakabye vakwe vonawu va nota va tawa mahlweni kakwe, vaku: “Hi hina lava, hi tikhumbi ta wena!”+ 19 Josefa aku kabye: “Mu nga chavi. Ndzova mina Nungungulu ke? 20 Hambu lezvi mu nga lava ku ndzi mahela zvahava,+ Nungungulu i lavile lezvaku a magumo ya kona mava ya manene ni ku ponisa a wutomi ga vanhu vo tala, zvi nga zvalezvi a zvi mahako nyamutlha.+ 21 Makunu mu nga chavi. Ndzi ta simama ku mu nyika zvakuga, n’wina ni vana va n’wina.”+ Hi ndlela leyo, i no va chavelela a tlhela a va tiyisa hi magezu.

22 Josefa i no simama ku hanya Gibhite, yena ni ngango wa papayi wakwe; i no hanya 110 wa malembe. 23 I no wona a cizukulwana ca wunharu ca vana va Efrayime,+ ni vana va Makira,+ a n’wana wa Manase. Va no pswalelwa madzolweni ya Josefa.* 24 Hi kugumesa, i no byela a vamakabye vakwe, aku: “Ndzofa lezvi, kanilezvi hakunene Nungungulu i ta mu alakanya,+ a mu humesa tikweni legi, muya ka tiko legi a hlambanyileko a ku nyika Abrahama, na Isaka, na Jakobe.”+ 25 Hikwalaho, Josefa i no hlambanyisa a vana va Izrayeli, aku: “Hakunene Nungungulu i ta mu alakanya. Hikwalaho, tekani a marambu ya mina mu huma nawo lomu.”+ 26 Josefa i nofa na a hi ni 110 wa malembe. Va no longisela a cirumbi cakwe+ va ci chela lomu ka kaxawu kwale Gibhite.