EZRA

1 Hi lembe go sangula ga kufuma ka Khurusi,+ a hosi ya Persia, kasi ku tatiseka a mhaka ya Jehovha yi wulilweko hi Jeremiya,+ Jehovha i no vhuxa a moya wa Khurusi, a hosi ya Persia, lezvaku a huwelela mahungu mufun’weni wakwe wontlhe, lawa a nga tlhela a ma tsala,+ aku:

2 “Khurusi, a hosi ya Persia, i ngalo: ‘Jehovha, a Nungungulu wa matilo, i ndzi nyikile a mifumo yontlhe ya misava,+ niku i ndzi rumile ku ndzi mu akela yindlu le Jerusalema,+ tikweni ga ka Judha. 3 Ni wihi loyi a nga cikari ka n’wina na a lumba vanhu vakwe, ngha a Nungungulu wakwe ava zvin’we naye niku i wa kandzihe aya Jerusalema, tikweni ga ka Judha, a ya aketa a yindlu ya Jehovha, a Nungungulu wa Izrayeli — a Nungungulu wa lisine — loyi a yindlu yakwe yi nga hi le Jerusalema.* 4 Ni wihi loyi a hanyako kota muluveli,+ kova ni kwihi lomu a nga kona, a vaakelani vakwe* va wa mu vhune hi ku mu nyika prata, ni ouro, ni zvibya, ni zvifuyo, a ku patsa ni munyikelo wa kuzvirandza wa yindlu ya Nungungulu wa lisine,+ leyi yi nga hi le Jerusalema.’”

5 Hikwalaho, a tihloko ta tiyindlu ta vapapayi ta ka Judha ni ta ka Bhenjamini, ni vapristi, ni vaLevhi — vontlhe lava Nungungulu a nga kucile a moya wabye — va no ti longisela a ku kandziha va ya aketa a yindlu ya Jehovha leyi yi nga hi le Jerusalema. 6 Vontlhe lava va nga gamekene navo va no va vhuna* hi zvibya zva prata, ni zva ouro, ni titshomba to kari tabye, ni zvifuyo, ni zvilo zva lisima, ahandle ka zvontlhe lezvi va nga nyikela hi kurandza kabye.

7 Hosi Khurusi i no wuyisa a zvibya zva yindlu ya Jehovha lezvi Nebhukadnezare a nga tekile le Jerusalema a ya zvi veka lomu ndlwini ya nungungulu wakwe.+ 8 Khurusi, a hosi ya Persia, i no nyika Mitredhate, a muwoneleli wa tshomba, a ntiro wa ku wuyisa a zvibya lezvo; Mitredhate i no maha xaxameto wa zvontlhe, a zvi nyikela ka Xexbhazare,*+ a hosana ya ka Judha.

9 A xaxameto wa zvibya zvontlhe hi lowu: 30 wa zvibya zva ouro zvo fana ni zvindzala,* ni 1000 wa zvibya zva prata zvo fana ni zvindzala, ni 29 wa zvibya zvo vhaleta hi zvona, 10 ni 30 wa zvingelwana zva ouro, ni 410 wa zvingelwana zva prata, ni 1000 wa zvibya zvin’wani. 11 A ntsengo wa zvibya zvontlhe zva ouro ni zva prata wu wa hi 5400. Xexbhazare i no wuyisa a zvibya lezvo zvontlhe a cikhati leci lava va nga khomilwe+ va yisiwa Bhabhuloni va nga wuyisiwa Jerusalema.

2 Lava vave vanhu va provhinsia, va humileko hi wukhumbini,+ cikari ka lava Nebhukadnezare, a hosi ya Bhabhuloni, a nga va yisile wukhumbini le Bhabhuloni,+ va gumesa va tlhela Jerusalema ni Judha, a mun’we ni mun’wani a tlhelela dhoropeni gakwe,+ 2 lava va nga wuya na Zerubhabheli,+ na Jexuwa,+ na Nehemiya, na Seraya, na Reelaya, na Mordhekayi, na Bhilxani, na Mispare, na Bhigvhayi, na Rehuma, na Bhaana.

A ntsengo wa vavanuna va ka Izrayeli wu wa patsa:+ 3 a vana va Paroxi: 2172; 4 a vana va Xefatiya: 372; 5 a vana va Ara:+ 775; 6 a vana va Pahat-Mowabhi,+ va nga vana va Jexuwa ni va Jowabe: 2812; 7 a vana va Elami:+ 1254; 8 a vana va Zatu:+ 945; 9 a vana va Zakayi: 760; 10 a vana va Bhani: 642; 11 a vana va Bhebhayi: 623; 12 a vana va Azgadhi: 1222; 13 a vana va Adhonikamu: 666; 14 a vana va Bhigvhayi: 2056; 15 a vana va Adhina: 454; 16 a vana va Atera, va yindlu ya Hezekiya: 98; 17 a vana va Bhezayi: 323; 18 a vana va Jora: 112; 19 a vana va Haxuma:+ 223; 20 a vana va Gibhare: 95; 21 a vana va Bhetlehema: 123; 22 a vavanuna va le Netofa: 56; 23 a vavanuna va le Anatote:+ 128; 24 a vana va Azmavhete: 42; 25 a vana va Kiriyat-Jeyarime, ni Kefira, ni Bheerote: 743; 26 a vana va Rama+ ni Gebha:+ 621; 27 a vavanuna va le Mikmasi: 122; 28 a vavanuna va le Bheteli ni va le Ayi:+ 223; 29 a vana va Nebho:+ 52; 30 a vana va Magbhixa: 156; 31 a vana va Elami loyi mun’wani: 1254; 32 a vana va Harimu: 320; 33 a vana va Lodha, ni va Hadhidha, ni va Ono: 725; 34 a vana va Jeriko: 345; 35 ni vana va Senaya: 3630.

36 A vapristi:+ a vana va Jedhaya+ wa yindlu ya Jexuwa:+ 973; 37 a vana va Imera:+ 1052; 38 a vana va Paxuri:+ 1247; 39 ni vana va Harimu:+ 1017.

40 A vaLevhi:+ a vana va Jexuwa, ni va Kadmiyeli,+ va nga vana va Hodhavhiya: 74. 41 A vayimbeleli:+ a vana va Asafa:+ 128. 42 A vana va vagadhi va tinyangwa:+ a vana va Xaluma, ni vana va Atera, ni vana va Talmoni,+ ni vana va Akubha,+ ni vana va Hatita, ni vana va Xobhayi: vontlhe i 139.

43 A malandza ya tempeli* hi lawa:+ a vana va Ziha, ni vana va Hasufa, ni vana va Tabhayote, 44 ni vana va Kerosi, ni vana va Siyaha,* ni vana va Padhoni, 45 ni vana va Lebhana, ni vana va Hagabha, ni vana va Akubha, 46 ni vana va Hagabhe, ni vana va Salmayi, ni vana va Hanani, 47 ni vana va Gidheli, ni vana va Gahara, ni vana va Reyaya, 48 ni vana va Rezini, ni vana va Nekodha, ni vana va Gazama, 49 ni vana va Uza, ni vana va Paseya, ni vana va Bhesayi, 50 ni vana va Asna, ni vana va Mewunime, ni vana va Nefusima, 51 ni vana va Bhakbhuke, ni vana va Hakufa, ni vana va Harure, 52 ni vana va Bhazlute, ni vana va Mehidha, ni vana va Harxa, 53 ni vana va Bharkosi, ni vana va Sisera, ni vana va Tema, 54 ni vana va Neziya, ni vana va Hatifa.

55 A vana va malandza ya Solomoni: a vana va Sotayi, ni vana va Sofareti, ni vana va Perudha,+ 56 ni vana va Jaala, ni vana va Dharkoni, ni vana va Gidheli, 57 ni vana va Xefatiya, ni vana va Hatila, ni vana va Pokereti-Hazebhayime, ni vana va Ami.

58 Wontlhe a malandza ya tempeli* ni vana va malandza ya Solomoni va wa hi 392.

59 Lava va landzelako va kandzihile hi Tel-Mela, ni Tel-Harxa, ni Kerubhe, ni Adhoni, ni Imera, kanilezvi a va zvi kotangi ku komba a yindlu ya papayi wabye ni lixaka labye, ne ku tiyisa lezvaku va wa hi vaIzrayeli:+ 60 a vana va Dhelaya, ni vana va Tobhiya, ni vana va Nekodha: 652. 61 A vana va vapristi: a vana va Habhayiya, ni vana va Hakoza,+ ni vana va Bharzilayi, loyi a nga teka sati cikari ka vanhanyana va Bharzilayi,+ a muGileyadhe, a gumesa a vitaniwa hi vito gabye. 62 Vontlhe lava va no lavetela a matimu yabye mabhukwini kasi va tiva lixaka labye, kanilezvi a va ma kumangi. Hikwalaho, va no susiwa ka wupristi.*+ 63 Govhernadhori* i no va byela lezvaku va ngagi a zvilo zvo basabasa+ kala ku kumeka a mupristi wa ku wutisa a Urima ni Tumima.+

64 A ntsengo wa hlengeletano yontlhe wu wa hi 42 360,+ 65 na ku nga hlayiwi a tikhumbi tabye ta cinuna ni ta cisati, leti ti nga hi 7337; ku wa hi ni 200 wa vayimbeleli kambe, va cinuna ni va cisati. 66 Va wa hi ni 736 wa mahaxi, ni 245 wa mamula, 67 ni 435 wa makameli, ni 6720 wa timbongola.

68 Laha va nga chikela Jerusalema, ka wutshamu legi a yindlu ya Jehovha yi nga hi ka gona, a vokari va nga hi tihloko ta tiyindlu ta vapapayi va no nyikela minyikelo ya kuzvirandza+ ya yindlu ya Nungungulu wa lisine, kasi yi tiriselwa ku aketa yindlu leyo laha wutshan’wini ga yona.+ 69 Va no nyikela a 61 000 wa tidrakma* ta ouro, ni 5000 wa tipondo* ta prata,+ ni 100 wa tinguwo to leha ta vapristi tshombeni ya munyikelo wa ntiro, hi kuya hi makotela yabye. 70 A vapristi, ni vaLevhi, ni vanhu vo kari, ni vayimbeleli, ni vagadhi va tinyangwa, ni malandza ya tempeli,* va no tshama madhoropeni yabye, niku a vaIzrayeli vontlhe va no tshama lomu madhoropeni yabye.+

3 Laha ku nga chikela a hweti ya wu 7,+ a vaIzrayeli na va hi madhoropeni yabye, va no hlengeletana le Jerusalema na va hi ni kungo gin’we. 2 Jexuwa,+ a n’wana wa Jehozadhaki, ni vapristi-kulobye, na Zerubhabheli,+ a n’wana wa Salatiyeli,+ ni vamakabye vakwe va no aka a alati ga Nungungulu wa Izrayeli kasi va mahela ka gona a minyikelo ya kuhiswa, kota lezvi zvi tsalilweko Nayweni wa Mosi,+ a munhu wa Nungungulu wa lisine.

3 Hambu lezvi va nga chava a vanhu va matiko lawa va nga gamekene nawo,+ va no aka a alati laha gi nga akilwe kona legi ga kale, va sangula ku nyikela ka Jehovha a miphahlo ya kuhiswa laha ka alati lego, yi nga miphahlo ya kuhiswa ya ni mixo ni ya ni gambo.+ 4 Hi kulandzela, va no maha a Mubuzo wa Michacha hi ku landza lezvi zvi nga tsalilwe.+ Siku ni siku va wa nyikela miphahlo ya kuhiswa yo ringana a ntsengo lowu wu nga laveka siku ni siku.+ 5 Andzhako ka lezvo, va wa nyikela minyikelo ya kuhiswa+ yo khandzakanya ni minyikelo ya kuwoneka ka hweti,+ ni minyikelo yontlhe yi nga mahiwa ka mibuzo yontlhe yo basa+ ya Jehovha, a ku patsa ni leyi yi nga tisiwa hi vontlhe lava va nga nyikela minyikelo ya kuzvirandza+ mahlweni ka Jehovha. 6 Hi siku go ranga ka hweti ya wu 7,+ va no sangula ku nyikela ka Jehovha a miphahlo ya kuhiswa, hambu lezvi a ciseketelo ca tempeli ya Jehovha ci nga kala ci nga se zimiwa.

7 Va no va nyika mali a vatsemi va maribye+ ni vameseri,+ va teka a zvakuga, ni zvakunwa, ni mafura va nyika vaSidhoni ni vaTire hi kota ya lezvi va nga nehile a mapulango ya sedhare hi le Lebhanoni mata le Jopa hi bimbi,+ kota lezvi Khurusi, a hosi ya le Persia, a nga va chusile.+

8 Hi lembe ga wumbiri na va wuyile mutini wa Nungungulu wa lisine, a Jerusalema, hi hweti ya wumbiri, Zerubhabheli, a n’wana wa Salatiyeli, na Jexuwa, a n’wana wa Jehozadhaki, ni vamakabye vabye lava van’wani, va nga vapristi ni vaLevhi, ni vontlhe lava va nga wuyile Jerusalema hi wukhumbini,+ va no sangula ntiro; va no yimisa a vaLevhi va kusukela ka 20 wa malembe kuya hehla lezvaku va wonelela a ntiro wa ku aka a yindlu ya Jehovha. 9 Hikwalaho, Jexuwa, ni vana vakwe ni vamakabye vakwe, na Kadmiyeli ni vana vakwe, va nga hi vana va Judha, va no patsana kasi va wonelela lava va nga maha ntiro ka yindlu ya Nungungulu wa lisine, zvin’we ni vana va Henadhadhe,+ ni vana vabye, ni vamakabye vabye, va nga vaLevhi.

10 Laha a vaaki va nga zima a ciseketelo ca tempeli ya Jehovha,+ a vapristi va no yima laho na va bohile tinguwo tabye, na va welele mimpundzu,+ zvin’we ni vaLevhi, va nga vana va Asafa, na va hi ni tingomana, va dhumisa Jehovha hi ku landza a cileletelo ca Dhavhidha, a hosi ya Izrayeli.+ 11 Va no sangula ku yimbelela na va amuketana,+ va dhumisa ni ku bonga Jehovha, vaku: “Hakuva mu nene; a lirandzo lakwe li nga mbheliko hi Izrayeli li simama kala kupindzuka.”+ Hi kulandzela, a vanhu vontlhe va no yimbelela hi gezu go tlakuka va dhumisa Jehovha hi kota ya lezvi a ciseketelo ca yindlu ya Jehovha ci nga zimilwe. 12 A kutala ka vapristi, va nga vaLevhi, ni tihloko ta tiyindlu ta vapapayi, va nga vavanuna va khosaheleko lava va nga wonile a yindlu leyi ya kale,+ va no rila hi gezu ga hombe laha va nga wona a ciseketelo ca yindlu na ci zimiwa, kuveni a kutala ka lava van’wani va wo kanyuluka hi kutsaka kala a gezu gabye gi gumelwa.+ 13 Hikwalaho, a vanhu va wa nga zvi koti a ku hambanisa a guwa ga kutsaka ni ga kurila, hakuva a vanhu va wa banguleka nguvhu laha ka kuza a guwa gabye gi zwala kule.

4 Laha a valala va Judha ni va Bhenjamini+ va ngazwa lezvaku lava va wuyileko hi wukhumbini+ vo aketa a tempeli ya Jehovha, a Nungungulu wa Izrayeli, 2 va no tekela kuya ka Zerubhabheli ni ka tihloko ta tiyindlu ta vapapayi, va yaku kabye: “Hi tsikeni hi aka zvin’we na n’wina hakuva a ku fana na n’wina, hinawu hi khozela* a Nungungulu wa n’wina+ niku hi maha miphahlo kakwe kusukela masikwini ya Esar-Hadhoni,+ a hosi ya Asiriya, loyi a nga hi tisa laha.”+ 3 Hambulezvo, Zerubhabheli na Jexuwa, ni tihloko leti tin’wani ta tiyindlu ta vapapayi ta ka Izrayeli, va te ngalo kabye: “A hi nge hlengeli na n’wina kuakeni ka yindlu ya Nungungulu wa hina.+ Hi ta aka hoce a yindlu ya Jehovha, a Nungungulu wa Izrayeli, kota lezvi Khurusi, a hosi ya Persia, a nga hi laya.”+

4 A vanhu va matiko lawa va nga gamekene nawo, va wa simama ku va mbheta ntamu* a vanhu va ka Judha ni ku va dzukisela kasi va tsika ku aka.+ 5 Va no thola a masungukati kasi ma wonhetela a makungo yabye+ masikwini wontlhe ya Khurusi, a hosi ya Persia, kala kufumeni ka Dhariyusi,+ a hosi ya Persia. 6 A cikhati leci Ahasuwerusi a nga sangula ku fuma, va no tsala timhaka ta ku lumbeta a vahanyi va le Judha ni va le Jerusalema. 7 Masikwini ya Artaxerxesi, a hosi ya Persia, Bhixlamu, na Mitredhate, na Tabheeli, ni van’wani vanghana vakwe, va no tsala papilo giya ka hosi Artaxerxesi; va no gi hundzulusela giya ka ciAramaiko,+ va gi tsala hi maletra ya ciAramaiko.*

8 * Rehuma, a murangeli wa tihosana, na Ximxayi, a mutsali, va no tsala papilo ga ku vhukela Jerusalema, giya ka hosi Artaxerxesi, na gi hi ni timhaka leti: 9 (A papilo legi gi wata hi ka Rehuma, a murangeli wa tihosana, na Ximxayi, a mutsali, ni vanghana vabye lava van’wani, va nga valamuli, ni vagovhernadhori lava va vatsongwani, ni vamatsalani, ni vanhu va le Ereke,+ ni vaBhabhuloni, ni vahanyi va le Susa,+ va nga vaEIami,+ 10 ni vanhu va matiko man’wani lava Osnapera, loyi wa hombe ni wo dzundzeka, a nga va khoma vaya wukhumbini a ya va veka madhoropeni ya Samariya,+ a van’wani a va veka le mupela-gambo wa congo wa Eufrate.* Makunu 11 leyi i kopiya ya papilo legi va nga mu rumelela.)

“Hina malandza ya wena ya le mupela-gambo wa congo wa Eufrate ha ku tsalela wena hosi Artaxerxesi: Makunu 12 zvi tive wena hosi lezvaku a vaJudha lava va nga suka seyo vata lomu cipandzeni ca hina, va chikele Jerusalema. Vo aketa a dhoropa legi go kala ku ingisa ni go biha niku vo mbhetisa a ku aka muro+ ni ku aketa a zviseketelo. 13 Hikwalaho, zvi tive wena hosi lezvaku loku a dhoropa legi ni muro wa gona zvo mbhela ku aketwa, va nga ta ha hakhela khupo, ne ndzuvo,*+ hambu lisensa la ku famba laha ruweni.* Lezvo zvi ta maha ku lomu tshombeni ya tihosi ku nga ha ngheni nchumu. 14 Kota lezvi hi lungako hi munyu wa yindlu ya wuhosi* ni lezvi zvi nga hiko zvinene a ku wona hosi na yi kalavelwa hi miyela, ha rumela a papilo ka wena hosi hi ku tivisa zvilo lezvi, 15 kasi ku ku hloliwa lomu bhukwini ga matimu ya vakokwani va wena.+ Lomu bhukwini ga matimu, u ta kuma lezvaku legi i dhoropa go kala ku ingisa, gi vangelako mhango a tihosi ni maprovhinsia, niku kusukela kale ku na ni vanhu cikari ka gona va kucetelako a van’wani lezvaku va nga ingisi a mufumo. Hi zvalezvo zvi mahileko ku a dhoropa legi gi lovisiwa.+ 16 Makunu zvi tive wena hosi lezvaku loku a dhoropa legi ni muro wa gona zvo mbhela ku aketwa, u nga ta ha wonelela kambe le mupela-gambo wa Congo.”+

17 A hosi yi no rumela hlamulo ka Rehuma, a murangeli wa tihosana, na Ximxayi, a mutsali, ni vanghana vabye lava van’wani va nga tshama le Samariya ni lava van’wani va nga tshama le mupela-gambo wa congo wa Eufrate, yiku:

“Ndza mu losa! Makunu 18 a papilo legi mu ndzi rumeleleko gi lerilwe khwatsi* mahlweni ka mina. 19 Ndzi layile lezvaku a mhaka leyi yi hloliwa, ku ya kumeka lezvaku kusukela kale, a dhoropa legi gi vhukela tihosi, a gi ingisi niku ku mahekile zvitereka ka gona.+ 20 Ku wa hi ni tihosi ta ntamu Jerusalema, ti nga kari ti fumela kontlhe le mupela-gambo wa congo wa Eufrate niku ti wa hakhela khupo, ni ndzuvo,* ni lisensa la ku famba laha ruweni.* 21 Makunu byelani vanhu lavo lezvaku va nyima ku tira kasi a dhoropa gi nga aketiwi kala ndzi wula cokari. 22 Tlharihelani mhaka leyi, kasi a zvilo zva hosi zvi nga ha wonhetelwi kambe.”+

23 Andzhako ka loku Rehuma, na Ximxayi, a mutsali, ni vanghana vabye va zwile a timhaka ta papilo legi gi tileko hi le ka hosi Artaxerxesi, va no tekela ku yela vaJudha le Jerusalema va ya va nyimisa ku tira hi kani. 24 Kusukela ka cikhati caleco, a ntiro wa yindlu ya Nungungulu, leyi yi nga hi Jerusalema, wu no nyima, zvi tshamisa zvezvo kala hi lembe ga wumbiri ga kufuma ka Dhariyusi, a hosi ya Persia.+

5 Makunu muphrofeti Hagayi+ na muphrofeti Zakariya,+ a zukulu wa Idho,+ va no phrofeta ka vaJudha lava va nga hi le Judha ni Jerusalema, hi vito ga Nungungulu wa Izrayeli, loyi a nga hi zvin’we navo. 2 Kusukela ka cikhati caleco, Zerubhabheli,+ a n’wana wa Salatiyeli, na Jexuwa,+ a n’wana wa Jehozadhaki, va no tlhela va sangula ku aketa a yindlu ya Nungungulu,+ leyi yi nga hi Jerusalema. A vaphrofeti va Nungungulu va wa hi zvin’we navo va va seketela.+ 3 Ka cikhati caleco, Tatenayi, a govhernadhori wa le mupela-gambo wa congo wa Eufrate,* na Xetar-Bhozenayi zvin’we ni vanghana vabye, va noya kabye va ya va wutisa, vaku: “Himani a nga mu chusa ku aka a yindlu leyi ni ku mbhetisa ntiro* lowu ke?” 4 Va no va wutisa kambe, vaku: “Hi vamani a vavanuna lava va akako a yindlu leyi?” 5 Kanilezvi Nungungulu i wa cuwukela* madhota ya vaJudha,+ hikwalaho a va zvi kotangi ku va nyimisa kala a mubiko wu rumelwa ka Dhariyusi, ku tlhela ku wuyisiwa papilo ga hlamulo xungetano hi mhaka leyi.

6 Leyi i kopiya ya papilo legi Tatenayi, a govhernadhori wa le mupela-gambo wa congo wa Eufrate, na Xetar-Bhozenayi ni vanghana vakwe, va nga vagovhernadhori lava va vatsongwani va le mupela-gambo wa congo wa Eufrate, va nga rumelela hosi Dhariyusi. 7 Va no mu rumelela mubiko wu nga tsalilwe lezvi:

“Ka hosi Dhariyusi:

“A kurula kontlhe a kuve na wena! 8 Wena hosi, zvi tive lezvaku hi yile ka provhinsia ya Judha, a mutini wa Nungungulu wa hombe; wu lomu ka ku aketwa hi maribye ya hombe niku vo gongondzela mapulango laha ka muro. A vanhu va tira hi zvigingi, hi kota ya lezvo, a ntiro a wu nyimi. 9 Hi kulandzela, hi no wutisa madhota yabye, hiku: ‘Himani a nga mu chusa ku aka a yindlu leyi ni ku mbhetisa ntiro* lowu ke?’+ 10 Hi tlhelile hi va wutisa mavito yabye kasi hi ku tsalela hi ku tivisa a mavito ya vavanuna lava va rangelako.

11 “Va no hi hlamula vaku: ‘Hina hi malandza ya Nungungulu wa matilo ni misava. Ho aketa yindlu leyi yi nga sina yi akilwe ka malembe yo tala ma hundzileko, leyi yi nga akilwe yi mbhela hi hosi ya hombe ya Izrayeli.+ 12 Kanilezvi hi kota ya lezvi a vapapayi va hina va nga zangarisa a Nungungulu wa matilo,+ i no va nyikela mandleni ya Nebhukadnezare,+ a hosi ya Bhabhuloni, a muKaldheya, loyi a nga hahlula a yindlu leyi,+ a teka vanhu a va yisa wukhumbini Bhabhuloni.+ 13 Hambulezvo, hi lembe go sangula ga kufuma ka Khurusi, a hosi ya Bhabhuloni, hosi Khurusi i no yimisa cileletelo ca lezvaku a yindlu leyi ya Nungungulu yi aketwa.+ 14 Ahandle ka lezvo, hosi Khurusi i no humesa a zvibya zva ouro ni zva prata zva yindlu ya Nungungulu lezvi zvi nga hi lomu tempeleni ya le Bhabhuloni, lezvi Nebhukadnezare a nga zvi tekile lomu tempeleni ya Jerusalema a ya zvi veka lomu tempeleni ya le Bhabhuloni.+ Zvi no nyikelwa ka Xexbhazare,*+ loyi Khurusi a nga mu yimisile kota govhernadhori.+ 15 Khurusi i no mu byela, aku: “Teka zvibya lezvi u famba nazvo u ya zvi veka lomu tempeleni le Jerusalema, niku a yindlu ya Nungungulu yi wa aketiwe wutshan’wini ga yona.”+ 16 Makunu Xexbhazare i nota a ta zima ciseketelo ca yindlu ya Nungungulu+ laha Jerusalema. Kusukela ka cikhati leco kala lezvi, a yindlu ya Nungungulu yo aketwa kanilezvi a yi se mbhela.’+

17 Loku zvi woneka na zvi hi zvinene ka wena hosi, ku wa hloliwe lomu tshombeni ya wuhosi ya seyo Bhabhuloni, kasi ku tiva ku hosi Khurusi hakunene i yimisile cileletelo ca lezvaku a yindlu ya Nungungulu yi aketwa le Jerusalema ke;+ makunu lezvi a hosi yi to zvi boha hi mhaka leyi, zvi wa rumelwe ka hina.”

6 Ka cikhati caleco, hosi Dhariyusi i no yimisa cileletelo, ku hloliwa lomu ndlwini leyi ku nga vekiwa mabhuku, lomu yi nga hlayisiwa kona a tshomba ya Bhabhuloni. 2 Makunu khokholeni ga Ekbhatana, provhinsia ya Medhi, ku no kumiwa bhuku go songiwa* gi nga tsalilwe mahungu lawa:

3 “Hi lembe go sangula ga kufuma ka hosi Khurusi, hosi Khurusi i no yimisa cileletelo xungetano hi yindlu ya Nungungulu le Jerusalema, caku:+ ‘Ku wa aketwe a yindlu leyi va to mahela kona miphahlo, niku ku wa zimiwe a zviseketelo zva kona; a kutlakuka ka yona ku tava 60 wa mikono,* ni kuanama ka yona kuva 60 wa mikono;+ 4 yi tava ni makamadha manharu ya maribye ya hombe ni kamadha gin’we ga mapulango.+ A mali ya ku hakhela a zvilo lezvi yi ta huma hi ndlwini ya hosi.+ 5 Ahandle ka lezvo, a zvibya zva ouro ni zva prata, zva yindlu ya Nungungulu, lezvi Nebhukadnezare a zvi tekileko lomu tempeleni leyi yi nga hi Jerusalema a zvi yisa Bhabhuloni,+ zvi wa tlhelisiwe kasi zvi ya vekiwa wutshan’wini ga zvona lomu tempeleni Jerusalema ni ku hlayisiwa ndlwini ya Nungungulu.’+

6 “Makunu wena Tatenayi, a govhernadhori wa tlhelo ga mupela-gambo wa congo wa Eufrate,* na wena Xetar-Bhozenayi zvin’we ni vanghana va n’wina, va nga vagovhernadhori lava va vatsongwani va tlhelo ga mupela-gambo wa congo wa Eufrate,+ fambelani kule ni wutshamu lego. 7 Mu nga ngheneli ntiro wa ku aka a yindlu leyo ya Nungungulu. A govhernadhori wa vaJudha ni madhota ya vaJudha va ta aketa a yindlu leyo ya Nungungulu laha wutshan’wini ga yona. 8 Ahandle ka lezvo, ndza yimisa cileletelo ca lezvi mu faneleko ku mahela madhota lawo ya vaJudha kasi ma aketa a yindlu ya Nungungulu, ndziku: A mali leyi yi nga lomu tshombeni ya wuhosi,+ leyi yi tako hi ka mikhupo leyi yi mahiwako le mupela-gambo wa congo wa Eufrate, yi wa tekele ku nyikiwa a vavanuna lavo kasi a ntiro wu nga nyimi.+ 9 Ni cihi va to ci lava siku ni siku va wa nyikiwe, niku zvi nga tsandzi — ku ngava zvidhunana zva tihomu,+ ni tiyivhu ta hombe ta vamatsune,+ ni tiyivhana,+ kasi va nyikela minyikelo ya kuhiswa ka Nungungulu wa le tilweni, hambu a trigo,+ ni munyu,+ ni vhinyo,+ ni mafura,+ hi kuya hi lezvi zvi to wuliwa hi vapristi lava va nga le Jerusalema, 10 kasi va simama ku nyikela minyikelo leyi yi tsakisako a Nungungulu wa matilo ni ku khongelela wutomi ga hosi ni vana va yona.+ 11 Ndzi yimisa cileletelo kambe ca ku ni wihi a to hambunyeta a cileletelo leci, ku wa susiwe a mhandze laha ndlwini yakwe yi kelelwa, a gumesa a hayekiwa* ka yona. Hi kota ya nandzu lowu, a yindlu ya munhu loye yi ta maha cikoti* ca citshungu. 12 A Nungungulu loyi a mahileko lezvaku a vito gakwe gi tshama laho,+ i wa lovise ni yihi hosi kutani vanhu lava va tlakusako a canja gabye va hambunyeta a cileletelo leci ni ku hahlula a yindlu ya Nungungulu leyi yi nga le Jerusalema. Hi mina Dhariyusi ndzi layako lezvo. Zvi wa tekele ku mahiwa zvalezvi.”

13 Tatenayi, a govhernadhori wa tlhelo ga mupela-gambo wa congo wa Eufrate, na Xetar-Bhozenayi+ zvin’we ni vanghana vabye, va no tekela ku maha zvontlhe lezvi hosi Dhariyusi a nga layile. 14 A madhota ya vaJudha ma simamile ku aka, a ntiro wuya mahlweni,+ na ma kuciwa hi kuphrofeta ka Hagayi+ na Zakariya,+ a zukulu wa Idho; va no aka va mbheta hi ku landza a cileletelo ca Nungungulu wa Izrayeli+ ni ca Khurusi,+ na Dhariyusi,+ na Artaxerxesi,+ a hosi ya Persia. 15 Va mbhetisile a yindlu hi siku ga wunharu ka hweti ya Adhare,* hi lembe ga wu 6 ga kufuma ka hosi Dhariyusi.

16 A vaIzrayeli, ni vapristi, ni vaLevhi,+ ni vontlhe lava va wuyileko hi wukhumbini va no kangula a yindlu leyi ya Nungungulu hi kutsaka. 17 Va nota ni 100 wa madhuna ya tihomu, ni 200 wa tiyivhu ta vamatsune, ni 400 wa tiyivhana kasi ku ta kangula a yindlu leyi ya Nungungulu, ni 12 wa timhongo kasi tiva munyikelo wa ciwonho, wu nga ntsengo wa tixaka ta ka Izrayeli.+ 18 Va no yimisa vapristi mitlaweni yabye ni vaLevhi mitlaweni yabye, kasi va maha a ntiro wa Nungungulu le Jerusalema+ hi kuya hi lezvi zvi tsalilweko bhukwini ga Mosi.+

19 Lava va wuyileko hi wukhumbini va no maha Phasika hi siku ga wu 14 ka hweti yo sangula.+ 20 A vapristi ni vaLevhi va no ti basisa; a ku salangi ne mun’we,+ hikwalaho vontlhe va wa basile. Va no daya a zvihari zva Phasika va mahela vontlhe lava va wuyileko hi wukhumbini, ni vapristi-kulobye, na vona venyi. 21 Andzhako ka lezvo, a vaIzrayeli lava va nga wuyile hi wukhumbini va noga zvin’we ni vontlhe lava va nga ti patsile navo, lava va nga ti hambanisile ni kungahlazveki ka matiko va ta khozela* Jehovha, a Nungungulu wa Izrayeli.+ 22 Va no maha ni Mubuzo wa Tipawa to kala Comelo hi kutsaka+ a 7 wa masiku, hakuva Jehovha i mahile ku va tsaka, a tlhela a maha lezvaku a mbilu ya hosi ya Asiriya yi tsaka hi vona+ laha ka kuza yi va seketela* ka ntiro wa ku aka yindlu ya Nungungulu wa lisine, a Nungungulu wa Izrayeli.

7 Andzhako ka zvilo lezvi, kufumeni ka Artaxerxesi,+ a hosi ya Persia, Ezra*+ i no tlhela. Ezra i wa hi n’wana wa Seraya,+ a n’wana wa Azariya, a n’wana wa Hilkiya,+ 2 a n’wana wa Xaluma, a n’wana wa Zadhoki, a n’wana wa Ahitubha, 3 a n’wana wa Amariya, a n’wana wa Azariya,+ a n’wana wa Merayote, 4 a n’wana wa Zerahiya, a n’wana wa Uzi, a n’wana wa Bhuki, 5 a n’wana wa Abhixuwa, a n’wana wa Finiyasi,+ a n’wana wa Eleyazari,+ a n’wana wa Aroni,+ a hosana ya vapristi. 6 Ezra i no suka Bhabhuloni. I wa hi mukopiyi* a nga wu tiva khwatsi a* Nayo wa Mosi,+ lowu wu nyikilweko hi Jehovha, a Nungungulu wa Izrayeli. A hosi yi no nyika Ezra zvontlhe lezvi a nga kombele, hakuva a canja ga Jehovha, a Nungungulu wakwe, gi wa hi hehla kakwe.

7 A vaIzrayeli vo kari, ni vapristi, ni vaLevhi,+ ni vayimbeleli,+ ni vagadhi va tinyangwa,+ ni malandza ya tempeli,*+ va no kwela vaya Jerusalema hi lembe ga wu 7 ga kufuma ka hosi Artaxerxesi. 8 Ezra i no chikela Jerusalema hi hweti ya wutlhanu, ka lembe ga wu 7 ga kufuma ka hosi. 9 I no sangula a liendzo lo suka hi Bhabhuloni hi siku go sangula ka hweti yo sangula, a ya chikela Jerusalema hi siku go sangula ka hweti ya wutlhanu, hakuva a Nungungulu wakwe i wa mu vhunetela.+ 10 Ezra i wa longisele mbilu* yakwe kasi ku hlota Nayo wa Jehovha ni ku wu landzela,+ ni ku gondzisa zvileletelo zva wona ni kulamula ka wona ka vaIzrayeli.+

11 Leyi i kopiya ya papilo legi hosi Artaxerxesi a nga nyika Ezra, a mupristi tlhelo mukopiyi,* a tlhari ya ku tiva* ta milayo ya Jehovha ni zvileletelo zvakwe ka vaIzrayeli:

12 * “Artaxerxesi,+ a hosi ya tihosi, ka Ezra, a mupristi tlhelo mukopiyi* wa Nayo wa Nungungulu wa matilo: Ngha a kurula ko mbhelela kuva na wena. Makunu 13 ndzi layile lezvaku vontlhe a vaIzrayeli, ni vapristi va kona, ni vaLevhi va nga mufun’weni wa mina, va famba na wena le Jerusalema, loku va zvi lava.+ 14 Hakuva u rumiwa hi hosi ni masungukati ya yona ya 7 lezvaku u ya hlola u tiva ku a Nayo wa Nungungulu wa wena, lowu u nga nawo, wa landzelwa le Judha ni le Jerusalema ke, 15 ni ku teka a prata ni ouro, leyi a hosi ni masungukati ya yona va nyikeleko hi kuzvirandza ka Nungungulu wa Izrayeli, loyi a yindlu yakwe yi nga le Jerusalema, 16 zvin’we ni prata yontlhe ni ouro yontlhe leyi u to amukela* ka maprovhinsia wontlhe ya Bhabhuloni, a ku patsa ni zvinyikiwo lezvi a vanhu ni vapristi va to nyikela hi kuzvirandza a ndlwini ya Nungungulu wabye, leyi yi nga le Jerusalema.+ 17 A mali leyi u ta xava hi yona a madhuna ya tihomu,+ ni tiyivhu ta vamatsune,+ ni tiyivhana,+ ni tindzhoho ta kona ta minyikelo+ ni zvakunwa zva kona zva minyikelo.+ U ta zvi nyikela laha alatini ga yindlu ya Nungungulu wa wena le Jerusalema.

18 “A prata ni ouro leyi yi to sala, mu nga maha hi yona ni cihi leci wena ni vamakabye va wena mu to ci wona na ci hi cinene hi kuya hi kurandza ka Nungungulu wa n’wina. 19 A zvibya zvontlhe lezvi u nyikiwako kasi ku zvi tirisa lomu ndlwini ya Nungungulu wa wena, u ta zvi nyikela mahlweni ka Nungungulu le Jerusalema.+ 20 A zvilo zvin’wani lezvi zvi lavekako ndlwini ya Nungungulu wa wena lezvi u faneleko ku nyikela, u ta zvi teka tshombeni ya wuhosi.+

21 “Mina, hosi Artaxerxesi, ndzi laya vontlhe a vahlayisi va tshomba va le mupela-gambo wa congo wa Eufrate* lezvaku zvontlhe lezvi Ezra,+ a mupristi tlhelo mukopiyi* wa Nayo wa Nungungulu wa matilo, a to zvi kombela ka n’wina, tekelani ku mu nyika, 22 kala 100 wa titalenta* ta prata, ni 100 wa makore* ya trigo, ni 100 wa mabhatu* ya vhinyo,+ ni 100 wa mabhatu ya mafura+ ni munyu+ wo kala lipimo. 23 Zvontlhe lezvi a Nungungulu wa matilo a layako zvi wa mahiwe hi kutitsitsirita zvi mahelwa a yindlu ya Nungungulu wa matilo+ kasi a nga zangareli a mufumo wa hosi ni vana va yona.+ 24 Tivani kambe lezvaku a zvi vhumeletwi a ku londza khupo, ne ndzuvo,*+ hambu lisensa la ku famba laha ruweni* ka vapristi ni vaLevhi, ni ka vayimbeleli,+ ni ka vagadhi va tinyangwa, ni ka malandza ya tempeli,*+ ni ka lava va tirako ka yindlu leyi ya Nungungulu.

25 “Niku wena, Ezra, hi kuya hi wutlhari legi wena Ezra u nyikilweko hi Nungungulu wa wena,* yimisa tihosana ni valamuli kasi va lamula a vanhu vontlhe va le mupela-gambo wa congo wa Eufrate, vontlhe lava va tivako a milayo ya Nungungulu wa wena niku u fanele ku gondzisa ni wihi a kalako a nga yi tivi.+ 26 Ni wihi a kalako a nga ingisi a Nayo wa Nungungulu wa wena ni nayo wa hosi, i fanele ku tekela ku lamuliwa, ku ngava hi kudawa, ku hlongoliwa, ku hakheliswa multa kutani ku vhalelwa paxweni.”

27 I wa dhumiswe Jehovha, a Nungungulu wa vakokwani va hina, loyi a nga chela maalakanyo mbilwini ya hosi ya ku sasekisa a yindlu ya Jehovha le Jerusalema!+ 28 Hi kota ya lirandzo lakwe li nga mbheliko hi mina, Nungungulu i ndzi mahile ndzi kuma thomo mahlweni ka hosi,+ ni ka masungukati ya yona,+ ni ka tihosana ta yona tontlhe ta ntamu. Hikwalaho, ndzi no tiya hlanha* hakuva a canja ga Jehovha, a Nungungulu wa mina, gi wa hi hehla ka mina. Ndzi no hlengeleta a varangeli va ka Izrayeli kasi va kwela na mina.

8 A tihloko ta tiyindlu ta vapapayi vabye ni lava va tsalelweko hi mingango yabye, lava va nga suka na mina hi Bhabhuloni cikhatini ca kufuma ka hosi Artaxerxesi, hi lava:+ 2 ka vana va Finiyasi:+ Gerxomi; ka vana va Itamare:+ Dhaniyeli; ka vana va Dhavhidha: Hatuxa; 3 ka vana va Xekaniya, wa vana va Paroxi: Zakariya zvin’we ni 150 wa vavanuna va tsalelweko; 4 ka vana va Pahat-Mowabhi:+ Eliyehowenayi, a n’wana wa Zerahiya, zvin’we ni 200 wa vavanuna; 5 ka vana va Zatu:+ Xekaniya, a n’wana wa Jahaziyeli, zvin’we ni 300 wa vavanuna; 6 ka vana va Adhina:+ Ebhedhi, a n’wana wa Jonatani, zvin’we ni 50 wa vavanuna; 7 ka vana va Elami:+ Jexaya, a n’wana wa Ataliya, zvin’we ni 70 wa vavanuna; 8 ka vana va Xefatiya:+ Zebhadhiya, a n’wana wa Mikayeli, zvin’we ni 80 wa vavanuna; 9 ka vana va Jowabe: Obhadhiya, a n’wana wa Jehiyeli, zvin’we ni 218 wa vavanuna; 10 ka vana va Bhani: Xelomite, a n’wana wa Josefiya, zvin’we ni 160 wa vavanuna; 11 ka vana va Bhebhayi:+ Zakariya, a n’wana wa Bhebhayi, zvin’we ni 28 wa vavanuna; 12 ka vana va Azgadhi:+ Johanani, a n’wana wa Hakatani, zvin’we ni 110 wa vavanuna; 13 ka vana va Adhonikamu,+ lava va nga hi vona vo gumesa, a mavito yabye ku wa hi lawa: Elifelete, na Jeyeli, na Xemaya, zvin’we ni 60 wa vavanuna; 14 ka vana va Bhigvhayi:+ Utayi na Zabhudha, zvin’we ni 70 wa vavanuna.

15 Ndzi no va hlengeleta congweni wu yako Ahavha,+ laha hi nga gova kona masiku manharu. Kanilezvi a cikhati leci ndzi nga hlola a vanhu ni vapristi, a ndzi kumangi ne muLevhi mun’we laho. 16 Hikwalaho, ndzi no vitanisa Eliyezeri, na Ariyeli, na Xemaya, na Elnatani, na Jaribha, na Elnatani, na Natani, na Zakariya, na Mexulamu, va nga hi varangeli, na Joyaribha na Elnatani, va nga hi vagondzisi. 17 Makunu ndzi no va rumela ka Idho, a murangeli wa wutshamu gi vitaniwako ku Kasifiya. Ndzi no va leletela lezvaku va byela Idho ni vamakabye vakwe, a malandza ya tempeli,* lava va nga hi Kasifiya kasi va neha vatiri va ku ta tira ndlwini ya Nungungulu wa hina. 18 Kota lezvi a canja ga ginene ga Nungungulu wa hina gi nga hi hehla ka hina, va no hi nehela a wanuna wo tlhariha, wa vana va Mali,+ a zukulu wa Levhi, a n’wana wa Izrayeli, ku nga Xerebhiya,+ ni vana vakwe ni vamakabye vakwe, 18 wa vavanuna; 19 na Haxabhiya, zvin’we na Jexaya, wa va ka Merari,+ ni vamakabye vakwe ni vana vabye, 20 wa vavanuna. 20 Ku wa hi ni 220 wa malandza ya tempeli,* lawa Dhavhidha ni tihosana va nga ma nyikele kasi ku vhuna a vaLevhi ntirweni wabye; wontlhe ma wa xaxametilwe hi mavito.

21 Ndzi no laya lezvaku ku pfhungiwa* na ha ha hi congweni wa Ahavha, hi ti koramisa mahlweni ka Nungungulu wa hina, hi mu kombela lezvaku a hi rangela liendzweni la hina, ni vana va hina, ni titshomba ta hina tontlhe. 22 Ndzi nova ni tingana ta ku kombela hosi lezvaku yi hi nyika masochwa ni vakhileli va mahaxi kasi va hi vhikela ka valala lomu ndleleni, hakuva hi wa byelile hosi, hiku: “A canja ga Nungungulu wa hina gi hehla ka vontlhe lava va mu hlotako,+ kanilezvi a ntamu wakwe ni zanga yakwe zvi vhukela vontlhe lava va mu tsikako.”+ 23 Hikwalaho, hi no pfhunga hi tlhela hi kombela ka Nungungulu wa hina xungetano hi mhaka leyi niku yena i nozwa mikhongelo ya hina ya kukhongotela.+

24 Makunu ndzi no hlawula a 12 wa tihosana ta vapristi, ku nga Xerebhiya na Haxabhiya,+ zvin’we ni 10 wa vamakabye vabye. 25 Ndzi no va pezela a prata, ni ouro, ni zvibya — ku nga hlengo lowu a hosi zvin’we ni masungukati ya yona, ni tihosana ta yona, ni vaIzrayeli vontlhe lava va nga hi laho va nga hlengile kasi ku nyikela ndlwini ya Nungungulu wa hina.+ 26 Hikwalaho, ndzi no peza a 650 wa titalenta* ta prata ndzi va nyika, ni 100 wa zvibya zva prata zvo ringana a titalenta timbiri, ni 100 wa titalenta ta ouro, 27 ni 20 wa zvingelwana zva ouro zvo ringana 1000 wa tidharike,* ni zvibya zvimbiri zva kobre ya yinene yo hatima, zva lisima a ku khwatsi i ouro.

28 Makunu ndzi te ngalo kabye: “N’wina mu basile mahlweni ka Jehovha,+ ni zvibya zvi basile; a prata ni ouro munyikelo wa kuzvirandza ka Jehovha, a Nungungulu wa vakokwani va n’wina. 29 Zvi hlayiseni khwatsi kala mu ya zvi peza mahlweni ka tihosana ta vapristi, ni vaLevhi, ni tihosana ta tiyindlu ta vapapayi ta ka Izrayeli le Jerusalema,+ lomu tisaleni* ta yindlu ya Jehovha.” 30 A vapristi ni vaLevhi va no teka a prata, ni ouro, ni zvibya lezvi va nga pezelwe kasi va famba nazvo le Jerusalema, a ndlwini ya Nungungulu wa hina.

31 Hi no gumesa hi suka le congweni wa Ahavha+ hi siku ga wu 12 ka hweti yo sangula+ hiya Jerusalema. A canja ga Nungungulu wa hina gi wa hi hehla ka hina niku i no hi vhikela ka valala ni ka zvigevenga lomu ndleleni. 32 Hikwalaho, hi no chikela Jerusalema+ hi tshama masiku manharu. 33 Hi siku ga wumune hi no peza a prata, ni ouro, ni zvibya lomu ndlwini ya Nungungulu wa hina,+ hi zvi nyikela ka mupristi Meremote,+ a n’wana wa Urija, na a hi na Eleyazari, a n’wana wa Finiyasi, ni vaLevhi, ku nga Jozabhadha,+ a n’wana wa Jexuwa, na Nowadhiya, a n’wana wa Bhinuyi.+ 34 Zvontlhe zvi no hlayiwa zvi tlhela zvi peziwa niku a pezo ya zvontlhe yi no tsaliwa. 35 Lava va nga wuya hi wukhumbini va no maha miphahlo ya kuhiswa va mahela a Nungungulu wa Izrayeli; va no maha muphahlo wa vontlhe a vaIzrayeli hi 12 wa madhuna ya tihomu,+ ni 96 wa tiyivhu ta vamatsune,+ ni 77 wa tiyivhana. Va no nyikela ni 12 wa timhongo+ kota munyikelo wa ciwonho; zvontlhe lezvi zvi no nyikelwa ka Jehovha kota munyikelo wa kuhiswa.+

36 Andzhako ka lezvo, hi no nyika a zvileletelo zva hosi+ ka vafumeli va maprovhinsia* va hosi ni ka vagovhernadhori va le mupela-gambo wa congo wa Eufrate,*+ hikwalaho, va no seketela a vanhu ni yindlu ya Nungungulu wa lisine.+

9 Andzhako ka lezvo, a tihosana ti no ndzi tshinelela, ti taku: “A vanhu va ka Izrayeli, ni vapristi, ni vaLevhi, a va se ti hambanisa ni vanhu va matiko ni mitiro yabye yo nyenyeza,+ ku nga mitiro ya vaKhanani, ni vaHiti, ni vaPerezi, ni vaJebhusi, ni vaAmoni, ni vaMowabhi, ni vaGibhite,+ ni vaAmori.+ 2 Va tekile a vanhanyana va tixaka leto vava vasati vabye ni va vafana vabye.+ Makunu vona, va nga pswalo* wu basileko,+ va ti tlhanganisile ni vanhu va matiko.+ A tihosana ni vafumeli hi vona vo ranga ku kala ku tsumbeka mhakeni leyi.”

3 Neti ndzi ngazwa lezvo, ndzi no handzula nguwo ya mina ni nghanju ya mina yo kala mawoko, ndzi hlurula misisi yo kari ya hloko ya mina ni malevhu yo kari, ndzi tshama lahasi hi kukarateka. 4 Na ndza ha karatekile hi kota ya kungatsumbeki ka lava va nga yile wukhumbini, ku nota vontlhe lava va nga hi ni cichavo* hi timhaka ta Nungungulu wa Izrayeli va ta hlengeletana laha ndzi nga tshamile kona, va ndzi randzela. Ndzi tshamile laho kala hi cikhati ca munyikelo wa tindzhoho wa ni gambo.+

5 Makunu hi cikhati ca munyikelo wa tindzhoho wa ni gambo,+ ndzi no suka ndzi yima tinganeni ta mina, a nguwo ya mina ni nghanju ya mina yo kala mawoko na zvi handzukile. Ndzi no khizama, ndzi tlakusa a mandla ya mina ka Jehovha, a Nungungulu wa mina, 6 ndziku: “O Nungungulu wa mina, ndzawa tingana. Hikwalaho, ndzi alakanya ku a ndzi ringanelwi hi ku ku tshinelela hi mukhongelo hakuva a zviwonho zva hina zvi tele nguvhu hehla ka tihloko ta hina niku a nandzu wa hina wu tlhatekelene kala le matilweni.+ 7 Kusukela masikwini ya vakokwani va hina kala nyamutlha, a nandzu wa hina wu kulile nguvhu.+ Hina, ni tihosi ta hina, ni vapristi va hina, hi no nyikelwa mandleni ya tihosi ta matiko, hi dawa hi cipadha,+ hi yisiwa wukhumbini,+ hi phangiwa,+ hi tlhela hi wisiwa tingana, kota lezvi zvi nga tshamisa zvona nyamutlha.+ 8 Kanilezvi wena Jehovha, Nungungulu wa hina, u hi mahele wuxinji hi cikhatanyana hi ku tsika misalela yi pona ni ku hi nyika a wuchavelo wutshan’wini ga wena go basa,+ kasi hi tsaka ni ku hi tlhatlhisa wukhumbini ga hina, O Nungungulu wa hina. 9 Hakuva hambu lezvi hi nga tikhumbi,+ a Nungungulu wa hina a nga hi tsikangi wukhumbini ga hina; kanilezvi hi kota ya lirandzo lakwe li nga mbheliko hi hina, i no hi maha hi kuma thomo mahlweni ka tihosi ta Persia,+ lezvaku hi humutwa kasi hi aketa a yindlu ya Nungungulu wa hina+ ni ku vhuxeta a marumbi ya yona, ni ku hi vhikela* lomu Judha ni Jerusalema.

10 “O Nungungulu wa hina, makunu ha ha ta kuyini, andzhako ka lezvi zvi mahekileko ke? Hakuva hi tsikile ku ingisa a zvileletelo zva wena 11 lezvi u hi nyikileko hi ku tirisa a malandza ya wena, ku nga vaphrofeti, uku: ‘A tiko legi mu yako mu ya gi fumela, i tiko gi nga hlazvekangiko hakuva a vanhu va kona a va hlazvekangi hi kota ya mitiro yabye yo nyenyeza. Va tatile matlhelo wontlhe ya tiko hi kungahlazveki kabye.+ 12 Hikwalaho, mu nga nyikeli a vanhanyana va n’wina ka vafana vabye, hambu ku vhumela ku a vanhanyana vabye va tekiwa hi vafana va n’wina;+ mu nga tshuki mu va vhuna ku kuma kurula ni kuhumelela,+ kasi muva ni ntamu, muga a zvazvinene zva tiko mu tlhela mu gi nyikela ka vana va n’wina kota tshomba ya kala kupindzuka.’ 13 Andzhako ka zvontlhe lezvi zvi hi humeleleko hi kota ya mitiro ya hina ya kubiha, ni nandzu wa hina wa hombe — wena Nungungulu wa hina a wu hi tlheliselangi hi kuya hi zviwonho zva hina+ kanilezvi u vhumelele hina hi nga laha lezvaku hi pona+ — 14 xana ha ha ta tlhela hi hambunyeta a zvileletelo zva wena, hi maha wuxaka ga kutekana* ni vamatiko lava va mahako zvilo lezvo zvo nyenyeza ke?+ U wa nga ta hi zangarela laha ka kuza u hi hihirita hi ku bhi, ku nga sali ne mun’we wa ku pona ke? 15 O Jehovha, Nungungulu wa Izrayeli, wena u lulamile,+ hakuva hina hi ponile kota misalela kala nyamutlha. Makunu hi le mahlweni ka wena ni nandzu wa hina, hambu lezvi zvi kalako zvi nga koteki a ku yima mahlweni ka wena hi kota ya ciyimo ca hina.”+

10 Laha Ezra a nga kari a khongela+ na a wulela a zviwonho zva vanhu vakwe, ni ku rila na a baramile mahlweni ka yindlu ya Nungungulu wa lisine, ku no hlengeletana a citshungu ca hombe ca vavanuna, ni vavasati, ni vanana va ka Izrayeli ci mu randzela, hakuva a vanhu va wa kari va rila nguvhu. 2 Hi kulandzela, Xekaniya, a n’wana wa Jehiyeli,+ wa vana va Elami,+ i no byela Ezra, aku: “A hi tsumbekangi ka Nungungulu wa hina, hi ku chadha ni vavasati va matiko lawa hi nga gamakana nawo.+ Hambulezvo, a vaIzrayeli va ha hi ni kutsumba. 3 Makunu a hi maheni civhumelwano ni Nungungulu wa hina+ ca ku hlongola a vasati vontlhe ni vana vabye, hi ku landza cileletelo ca Jehovha ni ca lava va chavako* nayo wa Nungungulu wa hina.+ A hi maheni lezvi a Nayo wu wulako. 4 Suka u yima, hakuva a mhaka leyi yi mandleni ya wena. Hina hi ta ku seketela. Tiya hlanha u khoma ntiro.”

5 Ezra i no suka a yima a byela a tihosana ta vapristi, ni vaLevhi, ni vontlhe a vaIzrayeli lezvaku va hlambanya a ku va ta maha lezvi zvi nga wulilwe.+ Hikwalaho va no hlambanya. 6 Makunu Ezra i no suka a yima mahlweni ka yindlu ya Nungungulu wa lisine, aya saleni* ya Jehohanani, a n’wana wa Eliyaxibha. Hambu lezvi a yileko saleni leyo, a nga gangi zvakuga ne kunwa mati hakuva i wa swirekile hi kota ya kungatsumbeki ka vanhu lava va nga wuyile hi wukhumbini.+

7 Andzhako ka lezvo, va no huwelela tikweni gontlhe ga Judha ni Jerusalema lezvaku vontlhe lava va nga wuyile hi wukhumbini va wa hlengeletane Jerusalema. 8 A tihosana ni madhota va no boha lezvaku ni wihi loyi a nga wa ta kala kuta ndzeni ka masiku manharu, i wa ta tekelwa a titshomba takwe tontlhe a tlhela a hlongolwa lomu hlengeletanweni ya vanhu lava va nga wuyile hi wukhumbini.+ 9 Hikwalaho, a vavanuna vontlhe va ka Judha ni va ka Bhenjamini va no hlengeletana le Jerusalema ndzeni ka masiku manharu, hi siku ga wu 20 ka hweti ya wu 9. A vanhu vontlhe va wa tshamile tsendzeleni* wa yindlu ya Nungungulu wa lisine, na va rurumela hi kota ya mhaka leyi va nga lava ku lulamisa ni lezvi ku nga kari kuna vhula ya hombe.

10 Andzhako ka lezvo, mupristi Ezra i no suka a yima, aku kabye: “A mu tsumbekangi hi lezvi mu nga chadha ni vavasati va matiko man’wani,+ hikwalaho mu engetele a nandzu wa Izrayeli. 11 Makunu wulelani a zviwonho zva n’wina ka Jehovha, a Nungungulu wa vakokwani va n’wina, mu maha a kurandza kakwe. Ti hambaniseni ni vanhu va matiko, mu tlhela mu tsika a vasati lava vamatiko.”+ 12 Hikwalaho, a hlengeletano yontlhe yi no hlamula hi gezu ga hombe, yiku: “I fanelo ya hina a ku maha lezvi u nga wula. 13 Hambulezvo, ku na ni vanhu vo tala, niku i nguva ya tivhula. A zvi koteki a ku tshama lahandle, niku a mhaka leyi yi nga ta teka siku gin’we kutani mambiri, hakuva hi hluwukile nguvhu mhakeni leyi. 14 Hikwalaho, hi kombela lezvaku a tihosana ta hina ti yimela a hlengeletano yontlhe,+ ni lezvaku vontlhe lava va nga lomu ka madhoropa ya hina, lava va chadhileko ni vavasati va matiko man’wani, vata hi cikhati ci yimisilweko zvin’we ni madhota ni valamuli va dhoropa gin’we ni gin’wani, kala hi bohlisa a zanga yi vhurako ya Nungungulu wa hina xungetano hi zvilo lezvi zvo biha hi mahileko.”

15 Hambulezvo Jonatani, a n’wana wa Asaheli, na Jazeya, a n’wana wa Tikvha, va no ala a mhaka leyi; Mexulamu na Xabhetayi,+ a vaLevhi, va no yima navo. 16 Kanilezvi lava va nga wuyile hi wukhumbini va no maha lezvi zvi nga wulilwe; Ezra, a mupristi, ni tihloko ta tiyindlu ta vapapayi vabye, vontlhe lava va yimisilweko hi mavito, va no tlhangana voce hi siku go sangula ga hweti ya wu 10 kasi ku hlola a mhaka leyi. 17 Hi siku go sangula ga hweti yo sangula, va no mbheta ku lulamisa a mhaka ya vavanuna vontlhe lava va nga chadhile ni vavasati vamatiko. 18 Ku no poliwa lezvaku a vafana vo kari va nga hi vana va vapristi va wa chadhile ni vavasati vamatiko;+ ka vana va Jexuwa,+ a n’wana wa Jehozadhaki ni vamakabye vakwe: Maaseya, na Eliyezeri, na Jaribha, na Gedhaliya. 19 Hambulezvo, va no tsumbisa lezvaku va ta hlongola a vasati vabye niku kota lezvi va nga hi ni nandzu, va wa ta nyikela a yivhu ya matsune ya lomu ntlhambini hi kota ya nandzu wabye.+

20 Ka vana va Imera,+ ku wa hi na Hanani na Zebhadhiya. 21 Ka vana va Harimu:+ Maaseya, na Elija, na Xemaya, na Jehiyeli, na Uziya. 22 Ka vana va Paxuri:+ Eliyowenayi, na Maaseya, na Ixmayeli, na Netaneli, na Jozabhadha na Eleyasa. 23 Ka vaLevhi, ku wa hi na Jozabhadha, na Ximeyi, na Kelaya (ku nga Kelita), na Petahiya, na Judha, na Eliyezeri; 24 ka vayimbeleli: Eliyaxibha; ni ka vagadhi va tinyangwa: Xaluma, na Telema, na Uri.

25 Ni ka vaIzrayeli, ka vana va Paroxi,+ ku wa hi na Ramiya, na Iziya, na Malkija, na Mijamini, na Eleyazari, na Malkija na Bhenaya; 26 ka vana va Elami:+ Mataniya, na Zakariya, na Jehiyeli,+ na Abdhi, na Jeremote, na Elija; 27 ka vana va Zatu:+ Eliyowenayi, na Eliyaxibha, na Mataniya, na Jeremote, na Zabhadha, na Aziza; 28 ka vana va Bhebhayi:+ Jehohanani, na Hananiya, na Zabhayi, na Atlayi; 29 ka vana va Bhani: Mexulamu, na Maluku, na Adhaya, na Jaxubha, na Xeyali, na Jeremote; 30 ka vana va Pahat-Mowabhi:+ Adna, na Kelali, na Bhenaya, na Maaseya, na Mataniya, na Bhezaleli, na Bhinuyi, na Manase; 31 ka vana va Harimu:+ Eliyezeri, na Ixija, na Malkija,+ na Xemaya, na Ximeyoni, 32 na Bhenjamini, na Maluku, na Xemariya; 33 ka vana va Haxuma:+ Matenayi, na Matata, na Zabhadha, na Elifelete, na Jeremayi, na Manase, na Ximeyi; 34 ka vana va Bhani: Maadhayi, na Amramu, na Uweli, 35 na Bhenaya, na Bhedheya, na Keluhi, 36 na Vhaniya, na Meremote, na Eliyaxibha, 37 na Mataniya, na Matenayi, na Jasu; 38 ka vana va Bhinuyi: Ximeyi, 39 na Xelemiya, na Natani, na Adhaya, 40 na Maknadhebhayi, na Xaxayi, na Xarayi, 41 na Azareli, na Xelemiya, na Xemariya, 42 na Xaluma, na Amariya, na Josefa; 43 ni ka vana va Nebho: Jeyeli, na Matitiya, na Zabhadha, na Zebhina, na Jadhayi, na Joyeli, na Bhenaya. 44 Vontlhe lava va wa tekile a vasati vamatiko+ niku va no hlongola a vasati vabye zvin’we ni vana vabye.+