NEHEMIYA

1 Leti timhaka ta Nehemiya,*+ a n’wana wa Hakaliya: Hi hweti ya Kislevhi,* hi lembe ga wu 20, ndzi wa hi lomu khokholeni* ga Xuxani.*+ 2 Ka cikhati leco, Hanani,+ a mun’we wa vamakabye va mina, i no chikela ni van’wani vavanuna va le Judha. Ndzi no va wutisa hi misalela ya vaJudha leyi yi nga hulukile wukhumbini,+ ndzi tlhela ndzi va wutisa hi Jerusalema. 3 Va no hlamula, vaku: “Lava va seleko lomu provhinsia, va hulukileko wukhumbini, va xaniseka nguvhu niku va tinganeni.+ A muro wa Jerusalema wu khungumulilwe,+ a tinyangwa ta kona ti hisiwa hi ndzilo.”+

4 Zvalezvi ndzi ngazwa a magezu lawo, ndzi no tshama hasi ndzi sangula ku rila, ndzi tlhela ndzi maha cirilo hi masiku yo tala, ndzi pfhunga,*+ ndzi khongela ka Nungungulu wa matilo, 5 ndziku: “O Jehovha, Nungungulu wa matilo, Nungungulu wa hombe ni wo hlamalisa, loyi a hlayisako a civhumelwano cakwe ni ku kombisa lirandzo li nga mbheliko ka lava va mu randzako ni ku hlayisa a zvileletelo zvakwe,+ 6 ndza ku khongotela lezvaku u vhulula matihlo ya wena u demba ndleve uzwa mukhongelo wa nandza ga wena, lowu ndzi mahako nyamutlha, wusiku ni mumu,+ hi malandza ya wena, a vaIzrayeli, na ndzi kari ndzi wulela zviwonho lezvi a tiko ga Izrayeli gi ku wonheleko hi zvona. Mina ni va yindlu ya papayi wa mina hi wonhile.+ 7 Hakunene hi ku wonhele nguvhu+ hi ku nga ingisi a zvileletelo, ni milayo, ni zviboho zva kulamula, lezvi u nyikileko a nandza ga wena Mosi.+

8 “Ndza ku khongotela lezvaku u alakanya lezvi u nga leletela* a nandza ga wena Mosi, zvaku: ‘Loku mu nga tsumbeki, ndzi ta mu hangalasa cikari ka matiko.+ 9 Kanilezvi loku mu wuya ka mina, mu hlayisa a zvileletelo zva mina ni ku zvi ingisa, hambu loku a vanhu va n’wina va hangalakile kala magemeta-musi ya matilo, ndzi ta va hlengeleta+ hi kwaseyo ndzi va wuyisa ka wutshamu legi ndzi hlawulileko kasi a vito ga mina gi tshama ka gona.’+ 10 Vona malandza ya wena ni vanhu va wena, lava u nga va tlhatlhisa hi ntamu wa wena wa hombe ni canja ga wena ga ntamu.+ 11 O Jehovha, ndza ku khongotela lezvaku u demba ndleve uzwa mukhongelo wa nandza ga wena ni mukhongelo wa malandza ya wena lawa ma xalalako hi ku chava a vito ga wena. Katekisa a nandza ga wena nyamutlha kasi a wanuna loyi a ndzi mahela tipswalo.”+

Ka cikhati leco, ndzi wa hi mucheteli wa zvakunwa wa hosi.+

2 Hi hweti ya Nisani,* hi lembe ga wu 20+ ga kufuma ka hosi Artaxerxesi,+ ku no vekiwa vhinyo mahlweni kakwe. Makunu kota lezvi ndzi nga tolovela ku maha, ndzi no teka vhinyo leyo ndzi nyika hosi.+ Kanilezvi ndzi wa nga se tshuka ndzi tsuva mahlweni ka hosi. 2 Hikwalaho a hosi yi no ndzi wutisa, yiku: “Hikuyini u tsuvileko nguvhu na u nga babyi? Ndza zvi wona lezvaku kukarateka ka mbilu.” Laha ndzi ngazwa lezvo, ndzi no chava nguvhu.

3 Ndzi no hlamula hosi, ndziku: “Hosi, hanya kala kupindzuka! Ndzi nga kala ndzi nga tsuvi kuveni a dhoropa legi a vakokwani va mina va lahlilweko ka gona gi hahlulilwe, a tinyangwa ta gona ti hisiwa hi ndzilo ke?”+ 4 A hosi yiku ka mina: “Makunu u lava ku kombela yini?” Ndzi no tekela ku khongela ka Nungungulu wa matilo.+ 5 Ndzi no byela hosi, ndziku: “Loku zvi tsakisa hosi, ni loku a hosi yi xalala hi mina nandza ga yona, ndzi rumele le Judha, dhoropeni legi a vakokwani va mina va lahlilweko ka gona kasi ndzi ya gi vhuxisa.”+ 6 Na yi hi ni sati* wa yona a nga tshamile reveni ga yona, a hosi yi te ngalo ka mina: “A lipfhumba la wena li ta teka masiku mangani, kona u ta wuya rini?” Hikwalaho, zvi no xalalisa hosi a ku ndzi rumela,+ niku minawu ndzi no yi byela cikhati ndzi nga lava ku ci mbheta.+

7 Hi kulandzela, ndzi no byela hosi, ndziku: “Loku zvi tsakisa hosi, ndzi kombela ku nyikiwa mapapilo ya ku komba vagovhernadhori va le mupela-gambo wa congo wa Eufrate,*+ kasi va ndzi tsika ndzi hundza khwatsi kala ndzi chikela Judha, 8 ni papilo gi yako ka Asafa, a muhlayisi wa Parki ya Wuhosi,* kasi a ndzi nyika mapulango ya ku maha hi wona a tivhiga* ta tivati ta Khokhola+ ga Yindlu,* ni ta mimuro ya dhoropa,+ ni ta yindlu leyi ndzi to tshama ka yona.” A hosi yi no ndzi nyika a mapapilo lawo+ hakuva a canja ga Nungungulu wa mina gi wa hi hehla ka mina.+

9 Hi kugumesa, ndzi no chikela ka vagovhernadhori va le mupela-gambo wa congo wa Eufrate* ndzi va nyika a mapapilo ya hosi. A hosi yi wa ndzi rumele kambe ni varangeli va butho ni vakhileli va mahaxi. 10 A cikhati leci Sambalati,+ a muHoroni, na Tobhiya,+ a hosana* ya muAmoni,+ va ngazwa lezvo, va no swireka nguvhu hi lezvi ku nga tile munhu wa ku ta va mahela zvazvinene a vanhu va ka Izrayeli.

11 Ndzi no gumesa ndzi chikela Jerusalema, ndzi tshama masiku manharu. 12 Ndzi no vhuka ni wusiku, mina ni vavanuna va tsongwani, kanilezvi a ndzi byelangi munhu lezvi a Nungungulu wa mina a nga zvi chelile mbilwini ya mina kasi ku mahela Jerusalema. Ndzi wa nga hi na cihari cin’wani ahandle ka leci ndzi nga khilele. 13 Ndzi no huma ni wusiku hi Nyangwa ya Nkova,+ ndzi hundza hi laha phambeni ka Cibuka ca Nyoka ya Hombe kala Nyangweni ya Tinhulu ta Khuma,+ ndzi hlola a muro wa Jerusalema lowu wu nga khungumulilwe ni tinyangwa ta kona leti ti nga hisilwe hi ndzilo.+ 14 Ndzi no famba kala ndzi chikela Nyangweni ya Cibuka+ ni Tiveni ga Hosi, kanilezvi ku wa nga hi na wutshamu ga ku ringana ku hundza a cihari leci ndzi nga khilele. 15 Kanilezvi ndzi no simama ku famba hi nkova+ ni wusiku na ndzi hlola a muro. Andzhako ka lezvo ndzi no wuya ndzi ta nghena hi Nyangwa ya Nkova, ndzi gumesa ndzi tlhela.

16 A tihosana+ a ti ku tivangi lomu ndzi nga yile kona ne lezvi ndzi nga kari ndzi maha, hakuva ndzi wa nga se va byela nchumu a vaJudha, ni vapristi, ni varangeli, ni tihosana, ni vatiri lava van’wani. 17 Hi kugumesa ndzi no va byela, ndziku: “Ma zvi wona lezvaku hi le hlomulweni wa hombe ke? Jerusalema i hahlulilwe niku a tinyangwa ta kona ti hisilwe hi ndzilo. A hi sukeni hi vhuxisa a muro wa Jerusalema kasi hi mbheta tingana leti.” 18 Ndzi no va hlawutela lezvi a canja ga ginene ga Nungungulu wa mina gi nga hi hehla ka mina ha zvona+ ni timhaka leti a hosi yi nga ndzi byelile.+ Laha va ngazwa lezvo, va te: “A hi sukeni hi aka.” Hikwalaho, va no tiyisana* kasi va maha a ntiro lowu wa wunene.+

19 Makunu laha Sambalati, a muHoroni, na Tobhiya,+ a hosana* ya muAmoni,+ na Gexemi, a muArabhiya,+ va ngazwa lezvo, va no sangula a ku hi poyila+ ni ku hi chepeta, vaku: “Zvini mu mahako? Mo vhukela hosi ke?”+ 20 Kanilezvi ndzi no va hlamula, ndziku: “A Nungungulu wa matilo hi yena a to hi maha hi humelela,+ niku hina malandza yakwe hi ta suka hi aka; kanilezvi n’wina a mu na ciavelo, ne fanelo, ne hambu cialakanyiso lomu Jerusalema.”+

3 Eliyaxibha,+ a mupristi wa hombe, ni vamakabye vakwe va nga hi vapristi, va no suka va aka a Nyangwa ya Tiyivhu.+ Va no yi basisa*+ va yi chela tivati; va no yi basisa kala Likhokholeni* la Meya,+ zvi famba kala Likhokholeni la Hananeli.+ 2 Lava va nga va gamela ku aka kuve vavanuna va Jeriko;+ ku gamela Zakura, a n’wana wa Imri, a aka cipandze leci cin’wani.

3 A vana va Hasena va no aka a Nyangwa ya Tinjhanjhi,+ va yi belela mapulango,+ va yi chela tivati, ni zvikwinyaro, ni zvihingakanyiso. 4 A cipandze ci nga gamela ci lungisilwe hi Meremote,+ a n’wana wa Urija, a n’wana wa Hakoza; leci ci nga gamela ci lungisilwe hi Mexulamu,+ a n’wana wa Bherekiya, a n’wana wa Mexezabheli; leci ci nga landzela ci lungisilwe hi Zadhoki, a n’wana wa Bhaana. 5 Leci ci nga gamela ci lungisilwe hi vaTekowa,+ kanilezvi a vavanuna vabye lava va dhumileko a va vhumelangi ku ti koramisa va tira ni varangeli vabye.

6 Joyadha, a n’wana wa Paseya, na Mexulamu, a n’wana wa Bhesodheya va no lungisa a Nyangwa ya Dhoropa ga Kale.+ Va no yi belela mapulango va yi chela tivati, ni zvikwinyaro, ni zvihingakanyiso. 7 A cipandze ci nga gamela ci lungisilwe hi Melatiya, a muGibheyoni,+ na Jadhoni, a muMeronote, a vavanuna va le Gibheyoni ni va le Mizpa,+ va nga fumelwa hi* govhernadhori wa le mupela-gambo wa congo wa Eufrate.*+ 8 Leci ci nga gamela ci lungisilwe hi Uziyeli, a n’wana wa Harhaya, a mun’we wa vamahi va zvilo zva ouro; leci ci nga gamela ci lungisilwe hi Hananiya, a mun’we wa vamahi va mafura yo nuhela;* va no tlhela va bambatela Jerusalema* kala ka Muro wo Anama.+ 9 Leci ci nga gamela ci lungisilwe hi Refaya, a n’wana wa Hura, a hosana ya khihlanya ga dhistrito ya Jerusalema. 10 Ku no gamela Jedhaya, a n’wana wa Harumafu, a lungisa a cipandze ca laha phambeni ka yindlu yakwe; leci ci nga gamela ci lungisilwe hi Hatuxa, a n’wana wa Haxabneya.

11 Malkija, a n’wana wa Harimu,+ na Hasuba, a n’wana wa Pahat-Mowabhi,+ va no lungisa a cipandze leci cin’wani* ni Likhokhola* la Mindzhimbo.*+ 12 Leci ci nga gamela ci lungisilwe hi Xaluma, a n’wana wa Halohexi, a hosana ya khihlanya ga dhistrito ya Jerusalema, zvin’we ni vanhanyana vakwe.

13 Hanuna ni vahanyi va le Zanowa+ va no lungisa a Nyangwa ya Nkova;+ va no yi aka va yi chela tivati, ni zvikwinyaro, ni zvihingakanyiso, va tlhela va lungisa a 100 wa mikono* ya muro kala Nyangweni ya Tinhulu ta Khuma.+ 14 Malkija, a n’wana wa Rekabe, a hosana ya dhistrito ya Bhet-Hakeremu i no lungisa a Nyangwa ya Tinhulu ta Khuma;+ i no yi aka a yi chela tivati, ni zvikwinyaro, ni zvihingakanyiso.

15 Xaluna, a n’wana wa Kol-Hoze, a hosana ya dhistrito ya Mizpa+ i no lungisa a Nyangwa ya Cibuka;+ i no yi aka a yi phimela, a yi chela tivati, ni zvikwinyaro, ni zvihingakanyiso. I no tlhela a lungisa a muro wa Nonga wa Tiva,+ kusuhani ni Simu ga Hosi+ kala Cikadheni+ ci relelako hi Dhoropeni ga Dhavhidha.+

16 Andzhako kakwe, ku no gamela Nehemiya, a n’wana wa Azbhuka, a hosana ya khihlanya ga dhistrito ya Bhet-Zura,+ a lungisa a cipandze ci sukelako laha phambeni ka Wutshamu ga Zvilahla zva Dhavhidha+ kala tiveni+ gi nga mahilwe hi vanhu, zvi famba kala Ndlwini ya Tinhenha.

17 A cipandze ci nga landzela ci lungisilwe hi vaLevhi na va rangelwa hi Rehuma, a n’wana wa Bhani; ku gamela Haxabhiya, a hosana ya khihlanya ga dhistrito ya Keila,+ a lungisa a dhistrito yakwe. 18 A cipandze leci ci nga landzela ci lungisilwe hi vamakabye vabye na va rangelwa hi Bhavhayi, a n’wana wa Henadhadhe, a hosana ya khihlanya ga dhistrito ya Keila.

19 Ku no gamela Ezeri, a n’wana wa Jexuwa,+ a hosana ya Mizpa, a lungisa a cipandze leci cin’wani ci nga phambeni ka tsunga wu yako Ndlwini ya Matlhari, kusuhani ni Pilari ga Kuseketela.+

20 Andzhako kakwe, ku no gamela Bharuke, a n’wana wa Zabhayi,+ a tira hi kutitsitsirita a lungisa cipandze leci cin’wani, kusukela laha ka Pilari ga Kuseketela kala nyangweni ya yindlu ya Eliyaxibha,+ a mupristi wa hombe.

21 Andzhako kakwe, ku no gamela Meremote,+ a n’wana wa Urija, a n’wana wa Hakoza, a lungisa cipandze leci cin’wani, kusukela nyangweni ya yindlu ya Eliyaxibha kala magumo ka yona.

22 Andzhako kakwe, ku no gamela vapristi, a vavanuna va dhistrito ya Jordhani,*+ va lungisa a cipandze leci cin’wani. 23 Ku no gamela Bhenjamini na Hasuba, va lungisa cipandze leci ci nga phambeni ka yindlu yabye. Andzhako kabye, ku no gamela Azariya, a n’wana wa Maaseya, a n’wana wa Ananiya, a lungisa a cipandze ci nga kusuhani ni yindlu yakwe. 24 Andzhako kakwe, ku no gamela Bhinuyi, a n’wana wa Henadhadhe, a lungisa cipandze leci cin’wani, kusukela ka yindlu ya Azariya kala ka Pilari ga Kuseketela+ zvi famba kala laha khoneni.

25 Andzhako kakwe, ku no gamela Palala, a n’wana wa Uzayi, a lungisa laha phambeni ka Pilari ga Kuseketela ni likhokhola* li sukelako Ndlwini* ya Hosi,+ leli la le hehla, li nga laha ku tshamako Vagadhi.+ Andzhako kakwe, ku no gamela Pedhaya, a n’wana wa Paroxi.+

26 A malandza ya tempeli*+ lawa ma nga hanya le Ofeli+ ma no lungisa cipandze cin’wani kala phambeni ka Nyangwa ya Mati,+ hi tlhelo ga mutsuwuka-gambo, ni ka likhokhola* li humileko handle.

27 Andzhako kabye, ku no gamela vaTekowa,+ va lungisa cipandze leci cin’wani, kusukela phambeni ka likhokhola* la hombe li humileko handle kala ka muro wa Ofeli.

28 A vapristi va no lungisa a cipandze ca le hehla ca Nyangwa ya Mahaxi,+ a mun’we ni mun’wani a lungisa cipandze ca laha phambeni ka yindlu yakwe.

29 Andzhako kabye, ku no gamela Zadhoki,+ a n’wana wa Imera, a lungisa cipandze leci ci nga phambeni ka yindlu yakwe.

Ku no gamela Xemaya, a n’wana wa Xekaniya, a muhlayisi wa Nyangwa ya Mutsuwuka-gambo,+ a lungisa cipandze leci cin’wani.

30 Hananiya, a n’wana wa Xelemiya, na Hanuna, a n’wana wa wu 6 wa Zalafa, va no lungisa a cipandze leci cin’wani.

Ku no gamela Mexulamu,+ a n’wana wa Bherekiya, a lungisa a cipandze leci ci nga phambeni ka yindlu* yakwe.

31 Andzhako kakwe, ku no gamela Malkija, a mun’we wa vamahi va zvilo zva ouro, a lungisa cipandze leci cin’wani kala ndlwini ya malandza ya tempeli*+ ni vaxavisi, ni phambeni ka Nyangwa ya Kuhlola, zvi famba kala ndlwini ya le hehla ya laha khoneni ga muro.

32 A vamahi va zvilo zva ouro ni vaxavisi va lungisile laha cikari ka Nyangwa ya Tiyivhu+ ni yindlu ya le hehla ya laha khoneni ga muro.

4 Zvalezvi Sambalati+ a ngazwa lezvaku hi lomu ko vhuxisa a muro, i no kwata a zangara nguvhu, a sangula ku poyilela a vaJudha. 2 Na ku hi ni vamakabye vakwe ni masochwa ya Samariya, i te ngalo: “Zvini lezvi va mahako a vaJudha lava vo kala ntamu? Va alakanya ku va ta zvi kota voce a ku maha ntiro lowu? Va ta maha miphahlo? Va ta mbheta hi siku gin’we ke? Va ta zvi kota ku vhuxa maribye lawa ya kuswa ma mahileko tinhulu ta lithuri ke?”+

3 Makunu Tobhiya,+ a muAmoni+ loyi a nga yimile kusuhani kakwe, i te: “Hambu a linghowo* loku li wo kandziha ka muro wabye wa maribye lowu va akako li wa ta wu khungumula.”

4 O, Nungungulu wa hina, zwana hakuva ha poyiliwa;+ tlhelisa ciruko cabye hehla ka tihloko tabye,+ u tlhela u va nyikela kota muphango tikweni legi va to khomiwa va yisiwa ka gona kota tikhumbi. 5 U nga rivali a nandzu wabye, ne u nga vhinyi a ciwonho cabye mahlweni ka wena,+ hakuva va rukatele a vaaki.

6 Hi no simama ku aka muro hi vhaletela a mavanga wontlhe, hi wu vhuxisa kala wu chikela ka khihlanya ga wona kuya hehla. A vanhu va no simama ku ti tsitsirita ntirweni.

7 Zvalezvi Sambalati, na Tobhiya,+ ni vaArabhiya,+ ni vaAmoni, ni vaAxdhodhe+ va ngazwa lezvaku a ntiro wa ku vhuxisa a muro wa Jerusalema wu wa nga nyimi ni lezvaku a mavanga ma wo vhaletelwa, va no zangara nguvhu. 8 Va no xuxa cikungo ca kuta va talwa ni Jerusalema kasi va vanga gujeguje. 9 Kanilezvi hi no khongela ka Nungungulu wa hina, hi veka vagadhi kasi va rindzela wusiku ni mumu.

10 Hambulezvo a vanhu va Judha va waku: “A vatiri* va mbhelile ntamu kuveni a tinhulu ta chaka ti tele nguvhu; hi nga ta tshuka hi zvi kota ku aka muro.”

11 A valala va hina vonawu va wa tshamela ku: “Na va nga se zvi pola kutani ku hi wona, hi ta nghena cikari kabye hi va daya hi nyimisa ntiro.”

12 Contlhe cikhati ku ngata a vaJudha lava va nga tshama kusuhani navo, khati ni khati* va wa hi byela lezvi: “Va ta hi dhumela hi matlhelo wontlhe.”

13 Hikwalaho, ndzi no veka vagadhi lomu mindzhelelweni, hi le ndzhako ka muro ni ka matshamu ma nga kala ma nga vhikelwangi. Ndzi no va veka hi mingango na va hi ni zvipadha zvabye, ni matlhari yabye, ni mawura yabye. 14 Laha ndzi nga wona lezvaku va chava, ndzi no tekela ku suka ndzi byela a varangeli,+ ni tihosana, ni vanhu lava van’wani, ndziku: “Mu nga va chavi.+ Alakanyani Jehovha, loyi a nga wa hombe ni wo chavisa;+ lwelani vamakabye va n’wina, ni vafana va n’wina ni vanhanyana va n’wina, ni vasati va n’wina, ni miti ya n’wina.”

15 Andzhako ka loku a valala va hina va zvi zwile lezvaku hi zvi tivile lezvi va nga kari va maha, ni lezvaku a Nungungulu wa lisine i thindile a cikungo cabye, hontlheni hi no tlhela hi ya tira laha ka muro. 16 Kusukela ka siku lego, a khihlanya ga vanhu va mina gi wa tira,+ legi gin’wani gi khoma a matlhari, ni zvitlhangu, ni mawura, ni zvikatawu zva simbi. A tihosana+ ti wa hi le ndzhako ka yindlu yontlhe ya ka Judha, 17 leyi yi nga kari yi aka a muro. Lava va nga rwala mindzhwalo va wa tira hi woko gin’we, legi gin’wani na gi khomile tlhari. 18 A muaki mun’we ni mun’wani i wa aka na a hi ni tlhari laha ciwunwini cakwe. A mubi wa linanga*+ i wa tshama laha reveni ga mina.

19 Ndzi no byela varangeli, ni tihosana, ni vanhu lava van’wani, ndziku: “A ntiro wa hombe niku wu anamile; hi hangalakele ni muro hi tsawukana nguvhu. 20 Loku muzwa kuvhuma ka linanga,* tanani mu ta tlhangana laha hi nga kona. A Nungungulu wa hina i ta hi lwela.”+

21 Hikwalaho, hi no simama ku tira, a khihlanya legi gin’wani na gi khomile matlhari, kusukela kutsuwukeni ka gambo kala a tinyeleti ti woneka. 22 Ka cikhati leco, ndzi no byela vanhu, ndziku: “A wanuna mun’we ni mun’wani zvin’we ni nandza gakwe, va wa tshame lomu Jerusalema ni wusiku, kasi ni wusiku va hi wonelela, ni mumu va tira.” 23 Hikwalaho, mina ni vamakabye va mina ni malandza ya mina,+ ni vagadhi lava va nga ndzi landzela a hi zangi hi cica tinguwo ta hina; a mun’we ni mun’wani wa hina i wa khoma a tlhari gakwe hi canja gakwe ga cinene.

5 Hambulezvo, ku wa hi ni cirilo ca hombe ca vavanuna ni vasati vabye hi kota ya vamakabye vabye va vaJudha.+ 2 A vokari va waku: “Hina ni vafana va hina ni vanhanyana va hina hi tele. Hi lava zvakuga kasi higa hi hanya.” 3 A van’wani va waku: “Ha khomisa masimu ya hina, ni zvivhina* zva hina, ni tiyindlu ta hina kasi hi kuma zvakuga hi cikhati ca ndlala.” 4 Ni van’wani kambe va waku: “Hi pembile mali ya ku fela ku hakhela a ndzuvo* wa hosi, hi khomisa hi masimu ya hina ni zvivhina zva hina.+ 5 Hina ni vamakabye va hina hi nyama yin’we ni nkhata wun’we,* a vana va hina va fana ni vana vabye, hambulezvo zvi lava ku hina hi nyikela a vafana va hina ni vanhanyana va hina va maha tikhumbi, niku a vokari va vanhanyana va hina va sina va hi tikhumbi.+ Kanilezvi a hi na ca ku maha, hakuva a masimu ya hina ni zvivhina zva hina zvi lumba van’wani.”

6 Laha ndzi ngazwa kurila kabye ni magezu lawa, ndzi no zangara nguvhu. 7 Hikwalaho, ndzi no ehleketa hi mhaka leyi mbilwini ya mina, ndzi sangula ku kawuka a varangeli ni tihosana, ndziku: “A mun’we ni mun’wani wa n’wina i londza majuro ka makabye wakwe.”+

Ndzi no tlhela ndzi mahisa mutlhangano wa hombe hi kota yabye, 8 ndziku ka vona: “Hi tlhatlhisile a vamakabye va hina va vaJudha lava va nga xavisilwe ka vamatiko, kala laha hi nga zvi kota. Kanilezvi zvezvi mu lava ku xavisa a vamakabye va n’wina,+ kasi hi tlhela hi va tlhatlhisa kambe ke?” Laha va ngazwa lezvo, va no kaye, va vhumala ni co wula. 9 Mina ndziku: “Lezvi mu mahako a hi zvinene. A hi chukwana mu chava Nungungulu wa hina,+ kasi hi nga rukiwi hi vamatiko, va nga valala va hina ke? 10 Ahandle ka lezvo, mina ni vamakabye va mina ni malandza ya mina ha pembisa mali ni zvakuga.* Ndza mu khongotela: A hi tsikeni ku pembisa na hi hakhelisa majuro.+ 11 Mahani wuxinji mu tlhelisa nyamutlha a masimu yabye,+ ni zvivhina zvabye, ni miolivha yabye, ni tiyindlu tabye, zvin’we ni majuro* lawa mu va hakhelisako ya mali, ni ya zvakuga, ni ya vhinyo yiswa, ni ya mafura.”

12 Va no hlamula, vaku: “Hi ta va tlhelisela a zvilo lezvi, hi nga va hakhelisi nchumu. Hi ta maha zvalezvi u nga wula.” Hikwalaho, ndzi no vitanisa a vapristi ndzi ta hlambanyisa a vavanuna lava mahlweni kabye lezvaku va ta maha lezvi va nga tsumbisa. 13 Ndzi no tlhela ndzi zuza a cipetswa ca nguwo ya mina,* ndziku: “A Nungungulu wa lisine i wa mu zuzise lezvo lomu ndlwini yakwe ni lomu tshombeni yakwe ni wihi munhu loyi a to kala ku tatisa citsumbiso leci; i wa zuzisiwe lezvo a sala a hi phanga.” A hlengeletano yontlhe yi no hlamula, yiku: “Amen!”* yi dhumisa Jehovha. A vanhu va no maha lezvi va nga tsumbisile.

14 Ahandle ka lezvo, kusukela siku legi a hosi yi nga ndzi yimisa a kuva govhernadhori+ tikweni ga Judha, hi lembe ga wu 20+ kala hi lembe ga wu 32+ ga kufuma ka hosi Artaxerxesi,+ ma nga 12 wa malembe, mina ni vamakabye va mina a hi zangi higa a zvakuga zvi faneleko ku nyikiwa govhernadhori.+ 15 Kanilezvi a vagovhernadhori lava va nga ranga hi vona va fuma mahlweni ka mina va wa bindzisela vanhu. Siku ni siku va wa va tekela a 40 wa maxekeli* ya prata ya zvakuga ni vhinyo. A malandza yabye wonawu ma wa xanisa vanhu. Kanilezvi mina a ndzi mahangi lezvo+ hakuva ndzi wa chava Nungungulu.+

16 Ahandle ka lezvo, minawu ndzi no hlengela ntirweni wa ku aka a muro lowu niku a hi ti lavelangi a simu;+ a malandza ya mina wontlhe ma wa hi laha ntirweni. 17 Ku wa hi ni 150 wa vaJudha ni tihosana ti ngaga mezeni ya mina, ahandle ka lava va ngata hi ka matiko ma nga hi randzele. 18 Siku ni siku ndzi wa longiselwa* a homu yin’we, ni 6 wa tiyivhu ta tinene, ni zvinyanyani; khati gin’we ndzeni ka 10 wa masiku hi wa ti buza hi vhinyo yo tala ya tixaka tontlhe. Kanilezvi ka zvontlhe lezvo a ndzi zangi ndzi londza zvakuga zvi faneleko ku nyikiwa govhernadhori, hakuva a vanhu va wa sina va bindziwa hi ntiro. 19 O, Nungungulu wa mina, ndzi alakanye u ndzi katekisa, hi kota ya zvontlhe lezvi ndzi maheleko a vanhu lava.+

6 Zvalezvi Sambalati, na Tobhiya,+ na Gexemi, a muArabhiya,+ ni valala va hina lava van’wani va nga byeliwa lezvaku ndzi vhuxisile a muro,+ ni lezvaku ku wa nga ha salangi mavanga ka wona (hambu lezvi ka cikhati leco ndzi nga kala ndzi nga se chela tivati lomu tinyangweni),+ 2 Sambalati na Gexemi va no tekela ku ndzi rumelela a mahungu, vaku: “Tana, hi ta tlhangana ka cin’we ca zvidhoropana zva le Nkoveni wa Ono.”+ Kanilezvi va wa ndzi bohele cikungo ca ku ndzi maha zvahava. 3 Hikwalaho, ndzi no rumela zvirun’wa kabye, ndziku: “Ndzi lomu ka ntiro wa hombe, ndzi nga ta zvi kota ku relela ndzita seyo. Ndzi wa ta wu nyimisela yini ntiro hi kuta seyo mu nga kona?” 4 Va no ndzi rumelela a mahungu lawo a mune wa makhati, minawu ndzi va hlamula zvalezvi zva zvin’we khati ni khati.

5 Sambalati i no tlhela a ndzi rumelela a nandza gakwe ni mahungu yalawa ya man’we hi khati ga wutlhanu, na gi hi ni papilo gi vhulilweko canjeni ga gona. 6 Gi wa tsalilwe lezvi: “Zva zwala cikari ka matiko, na Gexemi+ kambe i wula zvalezvo, zvaku wena ni vaJudha mu boha cikungo ca ku vhukela hosi.+ Hi zvalezvo zvi mu mahako mu aka muro, niku hi kuya hi lezvi zvi zwalako, wena u lava ku maha hosi yabye. 7 U yimisile a vaphrofeti kambe kasi va huwelela hi wena lomu Jerusalema gontlhe, vaku: ‘Ku na ni hosi lomu Judha!’ A hosi yi ta byeliwa a zvilo lezvi. Makunu tana, hi ta bhula hi mhaka leyi.”

8 Kanilezvi ndzi no mu rumelela hlamulo, ndziku: “Zvontlhe lezvi u wulako a zvi mahekangi; wo zvi sukela u wula.”* 9 Hakuva vontlhe va wa zama ku hi chavisela, na vaku: “A mandla yabye ma ta rereka, a ntiro wu nga mbheli.”+ Kanilezvi ndza khongela ka wena Nungungulu, ndziku: “Tiyisa a mandla ya mina.”+

10 Ndzi noya ndlwini ya Xemaya, a n’wana wa Dhelaya, a n’wana wa Mehetabheli, lomu a nga ti vhalele kona. I te ngalo: “A hi tlhangane lomu ndlwini ya Nungungulu wa lisine, lomu tempeleni, hi vhala tivati ta tempeli hakuva vata va ta ku daya. Va tata ni wusiku va ta ku daya.” 11 Mina ndziku: “Zva ringana ku a munhu wo kota mina a tsutsuma ke? A munhu wo kota mina a nga nghena lomu tempeleni a simama a hanya ke?+ Ndzi nga taya!” 12 Ndzi no zvi pola lezvaku i wa nga rumiwangi hi Nungungulu, kanilezvi hi Tobhiya na Sambalati+ va nga mu xavile kasi ku wula a ciphrofeto leci co ndzi vhukela. 13 I wa xavilwe kasi a ndzi dzukisela ndzi wonha, va fela ku kuma ca ku chakisa hi cona a vito ga mina va ndzi wisa tingana.

14 O, Nungungulu wa mina, alakanya Tobhiya+ na Sambalati ni lezvi va nga maha, na Nowadhiya, a muphrofeti wa cisati, ni vaphrofeti lava van’wani va nga tshama hi ku ndzi dzukisela.

15 A muro wu no mbhela hi 52 wa masiku, hi siku ga 25, ka hweti ya Eluli.*

16 Zvalezvi a valala va hina vontlhe va nga zvizwa, ni laha a matiko wontlhe ma hi randzeleko ma nga zvi wona, va no tsakama hi tingana.+ Va no zvi tiva ku a Nungungulu wa hina hi yena a nga hi vhunile ku maha ntiro lowu. 17 Masikwini lawo, a varangeli+ va Judha va wa rumela a mapapilo yo tala ka Tobhiya, Tobhiya yenawu a va hlamula. 18 A vanhu vo tala le Judha va wa hlambanyile ku yima naye, hakuva i wa hi mwane wa Xekaniya, a n’wana wa Ara;+ ni mufana wakwe Jehohanani i wa chadhile ni nhanyana wa Mexulamu,+ a n’wana wa Bherekiya. 19 Ahandle ka lezvo, va wa tshama hi ku mu dzundza mahlweni ka mina, va gumesa va mu hlawutela lezvi minawu ndzi nga wula. Andzhako ka lezvo, Tobhiya i wa rumela mapapilo kasi a ndzi dzukisela.+

7 Zvalezvi a muro wu nga mbhela a ku aketwa,+ ndzi no wu chela tivati;+ hi kulandzela ndzi no yimisa a vagadhi va tinyangwa,+ ni vayimbeleli,+ ni vaLevhi.+ 2 Ndzi no yimisa Hanani,+ a makabye wa mina, kasi a wonelela Jerusalema, zvin’we na Hananiya, a murangeli wa Khokhola+ hakuva i wa hi yena wa kutsumbeka nguvhu a tlhela a chava a Nungungulu wa lisine+ a ku hundza votala. 3 Hikwalaho ndzi no va byela lezvi: “A tinyangwa ta Jerusalema ti nga vhululiwi kala a gambo gi hisa; a vagadhi va tinyangwa va fanele ku vhala tivati va tlhela va khotsa na va nga se chayisa. Yimisani a vaaki va Jerusalema lezvaku va maha vagadhi, a mun’we ni mun’wani a vekiwa wutshan’wini gakwe ga kugadha, ni van’wani kambe va vekiwa phambeni ka tiyindlu tabye.” 4 A dhoropa gi wa hi ga hombe gi tlhela gi anama, kanilezvi a vanhu va nga hi cikari ka gona va wa hi va tsongwani,+ niku a tiyindlu ti wa nga se vhuxiwa.

5 Kanilezvi a Nungungulu wa mina i no chela maalakanyo mbilwini ya mina ya ku tlhanganisa varangeli, ni tihosana, ni vanhu, ndzi va xaxameta hi tixaka.+ Ndzi no kuma a bhuku gi nga xaxametile a tixaka ta lava va nga ranga va wuya, gi nga tsalilwe lezvi:

6 Lava vave vanhu va provhinsia, va humileko hi wukhumbini cikari ka lava Nebhukadnezare,+ a hosi ya Bhabhuloni, a nga va yisile wukhumbini,+ va gumesa va tlhela Jerusalema ni Judha, a mun’we ni mun’wani a tlhelela dhoropeni gakwe,+ 7 lava va nga wuya na Zerubhabheli,+ na Jexuwa,+ na Nehemiya, na Azariya, na Raamiya, na Nahamani, na Mordhekayi, na Bhilxani, na Mispereti, na Bhigvhayi, na Nehume, na Bhaana.

A ntsengo wa vavanuna va ka Izrayeli wu wa patsa:+ 8 a vana va Paroxi: 2172; 9 a vana va Xefatiya: 372; 10 a vana va Ara:+ 652; 11 a vana va Pahat-Mowabhi,+ va nga vana va Jexuwa na Jowabe:+ 2818; 12 a vana va Elami:+ 1254; 13 a vana va Zatu: 845; 14 a vana va Zakayi: 760; 15 a vana va Bhinuyi: 648; 16 a vana va Bhebhayi: 628; 17 a vana va Azgadhi: 2322; 18 a vana va Adhonikamu: 667; 19 a vana va Bhigvhayi: 2067; 20 a vana va Adhina: 655; 21 a vana va Atera, va yindlu ya Hezekiya: 98; 22 a vana va Haxuma: 328; 23 a vana va Bhezayi: 324; 24 a vana va Harifa: 112; 25 a vana va Gibheyoni:+ 95; 26 a vavanuna va Bhetlehema ni Netofa: 188; 27 a vavanuna va le Anatote:+ 128; 28 a vavanuna va Bhet-Azmavhete: 42; 29 a vavanuna va Kiriyat-Jeyarime,+ ni Kefira, ni Bheerote:+ 743; 30 a vavanuna va Rama ni Gebha:+ 621; 31 a vavanuna va le Mikmasi:+ 122; 32 a vavanuna va le Bheteli+ ni va le Ayi:+ 123; 33 a vavanuna va Nebho loyi mun’wani: 52; 34 a vana va Elami loyi mun’wani: 1254; 35 a vana va Harimu: 320; 36 a vana va Jeriko: 345; 37 a vana va Lodha, ni va Hadhidha, ni va Ono:+ 721; 38 ni vana va Senaya: 3930.

39 A vapristi hi lava:+ a vana va Jedhaya wa yindlu ya Jexuwa: 973; 40 a vana va Imera: 1052; 41 a vana va Paxuri:+ 1247; 42 ni vana va Harimu:+ 1017.

43 A vaLevhi+ hi lava: a vana va Jexuwa, va yindlu ya Kadmiyeli,+ va nga vana va Hodhevha: 74. 44 A vayimbeleli:+ a vana va Asafa:+ 148. 45 A vagadhi va tinyangwa:+ a vana va Xaluma, ni vana va Atera, ni vana va Talmoni, ni vana va Akubha,+ ni vana va Hatita, ni vana va Xobhayi: 138.

46 A malandza ya tempeli*+ hi lawa: a vana va Ziha, ni vana va Hasufa, ni vana va Tabhayote, 47 ni vana va Kerosi, ni vana va Siya, ni vana va Padhoni, 48 ni vana va Lebhana, ni vana va Hagabha, ni vana va Salmayi, 49 ni vana va Hanani, ni vana va Gidheli, ni vana va Gahara, 50 ni vana va Reyaya, ni vana va Rezini, ni vana va Nekodha, 51 ni vana va Gazama, ni vana va Uza, ni vana va Paseya, 52 ni vana va Bhesayi, ni vana va Mewunime, ni vana va Nefuxesima, 53 ni vana va Bhakbhuke, ni vana va Hakufa, ni vana va Harure, 54 ni vana va Bhazlite, ni vana va Mehidha, ni vana va Harxa, 55 ni vana va Bharkosi, ni vana va Sisera, ni vana va Tema, 56 ni vana va Neziya, ni vana va Hatifa.

57 A vana va malandza ya Solomoni+ hi lava: a vana va Sotayi, ni vana va Sofareti, ni vana va Peridha, 58 ni vana va Jaala, ni vana va Dharkoni, ni vana va Gidheli, 59 ni vana va Xefatiya, ni vana va Hatila, ni vana va Pokereti-Hazebhayime, ni vana va Amoni. 60 Wontlhe a malandza ya tempeli*+ ni vana va malandza ya Solomoni va wa hi 392.

61 Lava va landzelako va kandzihile hi Tel-Mela, ni Tel-Harxa, ni Kerubhe, ni Adhoni, ni Imera, kanilezvi a va zvi kotangi ku komba a yindlu ya papayi wabye ni lixaka labye, ne ku tiyisa lezvaku va wa hi vaIzrayeli:+ 62 a vana va Dhelaya, ni vana va Tobhiya, ni vana va Nekodha: 642. 63 Cikari ka vapristi: a vana va Habhayiya, ni vana va Hakoza,+ ni vana va Bharzilayi, loyi a nga teka sati cikari ka vanhanyana va Bharzilayi,+ a muGileyadhe, a gumesa a vitaniwa hi vito gabye. 64 Vontlhe lava va no lavetela a matimu yabye mabhukwini kasi va tiva lixaka labye, kanilezvi a va ma kumangi. Hikwalaho, va no susiwa ka wupristi.*+ 65 Govhernadhori*+ i no va byela lezvaku va ngagi a zvilo zvo basabasa+ kala ku kumeka a mupristi wa ku wutisa a Urima ni Tumima.+

66 A ntsengo wa hlengeletano yontlhe wu wa hi 42 360,+ 67 na ku nga hlayiwi a tikhumbi tabye ta cinuna ni ta cisati,+ leti ti nga hi 7337; ku wa hi ni 245 wa vayimbeleli kambe, va cinuna ni va cisati.+ 68 Va wa hi ni 736 wa mahaxi, ni 245 wa mamula, 69 ni 435 wa makameli, ni 6720 wa timbongola.

70 A vokari va nga hi tihloko ta tiyindlu ta vapapayi va no maha minyikelo ya ku fambisa ntiro.+ Govhernadhori i no nyikela hi 1000 wa tidrakma* ta ouro, ni 50 wa mingelo, ni 530 wa tinguwo to leha ta vapristi.+ 71 A tihloko to kari ta tiyindlu ta vapapayi ti no nyikela tshombeni ya ntiro a 20 000 wa tidrakma ta ouro, ni 2200 wa tipondo* ta prata. 72 A vanhu lava van’wani va no nyikela 20 000 wa tidrakma ta ouro, ni 2000 wa tipondo ta prata, ni 67 wa tinguwo to leha ta vapristi.

73 A vapristi, ni vaLevhi, ni vagadhi va tinyangwa, ni vayimbeleli,+ ni van’wani vanhu, ni malandza ya tempeli,* ni vaIzrayeli vontlhe, va no tshama lomu madhoropeni yabye.+ Ku chikele a hweti ya wu 7+ a vaIzrayeli na va tshama lomu madhoropeni yabye.+

8 A vanhu vontlhe va no hlengeletana hi mbilu yin’we laha prasa* yi nga phambeni ka Nyangwa ya Mati,+ va byela Ezra,+ a mukopiyi,* lezvaku a neha a bhuku ga Nayo wa Mosi,+ lowu Jehovha a nga layile vaIzrayeli.+ 2 Hikwalaho, hi siku go sangula ga hweti ya wu 7,+ mupristi Ezra i no neha bhuku ga Nayo mahlweni ka bandla+ ga vavanuna, ni vavasati, ni vontlhe lava va nga zvi kota ku zwisisa lezvi zvi nga wuliwa. 3 I no wu lera hi gezu ga hombe+ mahlweni ka prasa* yi nga phambeni ka Nyangwa ya Mati, kusukela ni mixo kala ni mumu, a lerela vavanuna, ni vavasati, ni vontlhe lava va nga zvi kota ku zwisisa lezvi zvi nga wuliwa. A vanhu va no demba ndleve+ ka bhuku ga Nayo. 4 Ezra, a mukopiyi,* i wa yimile laha ciluvelweni* ca mapulango ci nga mahelwe mutlhangano lowo; laha kusuhani kakwe, hi tlhelo gakwe ga cinene ku wa yimile Matitiya, na Xema, na Anaya, na Uriya, na Hilkiya, na Maaseya; hi tlhelo gakwe ga cibhabha ku wa yimile Pedhaya, na Mixayeli, na Malkija,+ na Haxuma, na Haxbhadhana, na Zakariya, na Mexulamu.

5 Ezra i no vhulula a bhuku mahlweni ka vanhu vontlhe, hakuva i wa yimile ka wutshamu go tlakuka a ku hundza vontlhe. A cikhati leci a nga gi vhulula, a vanhu vontlhe va no suka va yima. 6 Andzhako ka lezvo, Ezra i no dhumisa Jehovha, a Nungungulu wa lisine, Loyi a nga wahombe; a vanhu vontlhe va no hlamula, vaku: “Amen!* Amen!”+ va tlhela va tlakusa a mandla yabye. Va no korama va khizamela Jehovha, a tinghohe tabye na ti cuwukile lahasi. 7 Makunu Jexuwa, na Bhani, na Xerebhiya,+ na Jamina, na Akubha, na Xabhetayi, na Hodhiya, na Maaseya, na Kelita, na Azariya, na Jozabhadha,+ na Hanani, na Pelaya, lava va nga hi vaLevhi, va no va tlhamusela a Nayo a vanhu,+ a vanhu vontlhe na va yimile. 8 Va no simama ku lera bhuku hi gezu ga hombe, a Nayo wa Nungungulu wa lisine, va wu tlhamusela wuku dlunya ni ku wu maha wu zwisiseka; hikwalaho, va no vhuna vanhu a ku zwisisa lezvi zvi nga kari zvi leriwa.+

9 Nehemiya, loyi a nga hi govhernadhori, na Ezra,+ a mupristi tlhelo mukopiyi,* ni vaLevhi lava va nga kari va gondzisa vanhu, va no byela a vanhu vontlhe, vaku: “A siku legi i siku go basa ka Jehovha, a Nungungulu wa n’wina.+ Mu nga karatekeni kutani ku rila.” Hakuva vontlhe a vanhu a vo rila laha va nga kari vazwa a timhaka ta Nayo. 10 I no va byela, aku: “Fambani mu yaga a zvilo zvi nonileko, munwa a zvilo zva kutsombela, mu tlhela mu va rumelela a zvakuga+ lava va kalako va nga longiselangi nchumu; hakuva legi i siku gi basileko ka Hosi ya hina. Mu nga bayiseki hakuva a litsako la Jehovha i ntamu* wa n’wina.” 11 A vaLevhi va no khongotela a vanhu vontlhe, vaku: “Mu nga rili! hakuva a siku legi i siku go basa, ne mu nga bayiseki.” 12 Hikwalaho, a vanhu vontlhe va no famba va yaga ni kunwa va tlhela va rumelelana zvakuga, va tsaka nguvhu+ hakuva va wa ti zwisisile a timhaka leti va nga byelilwe.+

13 Hi siku ga wumbiri, a tihloko ta tiyindlu ta vapapayi ta vanhu vontlhe, ni vapristi, ni vaLevhi, va no hlengeletana ka Ezra, a mukopiyi,* kasi va wu zwisisa khwatsi a Nayo. 14 Va no kuma ku lomu ka Nayo lowu Jehovha a nga layile a vaIzrayeli hi ku tirisa Mosi, ku wa tsalilwe lezvaku a vaIzrayeli va fanele ku tshama lomu michacheni loku va maha a mubuzo wa hweti ya wu 7,+ 15 ni lezvaku va fanele ku huwelela+ va tivisa madhoropeni yabye wontlhe ni kontlhe lomu Jerusalema, vaku: “Humani muya zvitsungeni mu ya tshova madhavi ya miolivha, ni ya pinyeiro, ni ya mirta, ni ya micindzu, ni madhavi ya tisinya tin’wani kasi mu aka a michacha, khwatsi hi lezvi zvi tsalilweko.”

16 Hikwalaho, a vanhu va no famba va ya tshova madhavi va wuya nawo va ta ti mahela michacha, a mun’we ni mun’we a aka hehla ka yindlu yakwe, ni lomu mitini yabye, ni laha ndlwini ya Nungungulu wa lisine,+ ni laha prasa* ya Nyangwa ya Mati,+ ni laha prasa ya Nyangwa ya Efrayime.+ 17 Makunu a vanhu vontlhe lava va nga wuyile hi wukhumbini va no maha michacha va tshama ka yona. Kusukela masikwini ya Joxuwa,+ a n’wana wa Nuni, kala ka siku lego, a vaIzrayeli va wa nga se tshuka va maha a mubuzo wo kota lowo, hikwalaho ku nova ni kutsaka ka hombe nguvhu.+ 18 Siku ni siku, kusukela ka siku go sangula kala ka siku go gumesa, ku wa leriwa a bhuku ga Nayo wa Nungungulu wa lisine.+ Va no maha mubuzo hi 7 wa masiku; hi siku ga wu 8 va no maha mutlhangano wo basa, kota lezvi a Nayo wu wulako.+

9 Hi siku ga wu 24 ga hweti ya wu 7, a vaIzrayeli va no tlhangana, va pfhunga* na va bohile a tisakwa, va tlhela va ti chetela lithuri.+ 2 Lava va pswalo wa ka Izrayeli va no ti hambanisa ni vontlhe vamatiko,+ va suka va yima va wulela a zviwonho zvabye, ni zvihoxo zva vapapayi vabye.+ 3 Va no mbheta tihora tinharu* na va yimile matshan’wini yabye, na ku leriwa a bhuku ga Nayo+ wa Jehovha, a Nungungulu wabye, hi gezu ga hombe; a tihora leti tin’wani ta tinharu va no ti mbheta na va wulela zviwonho ni ku khizama mahlweni ka Jehovha, a Nungungulu wabye.

4 Jexuwa, na Bhani, na Kadmiyeli, na Xebhaniya, na Bhuni, na Xerebhiya,+ na Bhani, na Kenani, va no yima laha ciluvelweni ci tlakukileko+ ca vaLevhi, va khongela ka Jehovha, a Nungungulu wabye, hi gezu ga hombe. 5 Jexuwa, na Kadmiyeli, na Bhani, na Haxabneya, na Xerebhiya, na Hodhiya, na Xebhaniya, na Petahiya, lava va nga hi vaLevhi, va te: “Sukani mu yima, mu dhumisa Jehovha, a Nungungulu wa n’wina, kusukela kupindzukeni kala kupindzuka.*+ A va dhumise a vito ga wena go dzundzeka, legi gi tlakukileko ku hundza a makatekwa wontlhe ni wudzundzo.

6 “Hi wena wece u nga Jehovha;+ hi wena u nga maha matilo, ina, a matilo ya matilo ni butho gontlhe ga wona, ni misava, ni zvontlhe zvi nga ka yona, ni mabimbi, ni zvontlhe zvi nga ka wona. U hlayisa zvontlhe zvi simama ku hanya. A butho ga matilo ga ku khizamela. 7 Hi wena Jehovha, a Nungungulu wa lisine, loyi a nga hlawula Abrama+ a mu humesa Ure+ wa vaKaldheya, a gumesa a mu chula ku hi Abrahama.+ 8 U wonile ku a mbilu yakwe yi tsumbekile mahlweni ka wena,+ hikwalaho, u no maha civhumelwano naye ca ku mu nyika tiko ga vaKhanani, ni vaHiti, ni vaAmori, ni vaPerezi, ni vaJebhusi, ni vaGirgaxi, yena ni pswalo* wakwe;+ u tatisile zvitsumbiso zva wena hakuva u lulamile.

9 “Hikwalaho, u wonile a kuxaniseka ka vakokwani va hina le Gibhite,+ u tlhela uzwa a kurila kabye le Bimbini go Pswhuka. 10 U no maha zviwoniso ni zvihlamaliso kasi ku tsayisa Faro ni malandza yakwe wontlhe, ni vanhu vontlhe va tiko gakwe,+ hakuva u wa zvi tiva lezvaku va xanisa a vanhu va wena hi kota ya matshandza.+ U ti mahele vito gi simamako kala nyamutlha.+ 11 U avanyisile bimbi kuwoneni kabye, kasi va tsemakanya bimbi na va famba ka misava yo woma,+ u va hoxa lomu kueteni lava va nga va hlongolisela, a ku fana ni ribye gi hoxiwako lomu matini ma vhindlukileko.+ 12 Ni hlikanhi u wa va rangela hi refu, ni wusiku u va rangela hi ndzilo kasi u va woningela ndleleni leyi va nga fanele ku famba hi yona.+ 13 Ahandle ka lezvo, u no relela Citsungeni ca Sinayi+ u wulawula navo na u hi le tilweni+ u va nyika a kulamula ko lulama, ni milayo yo tsumbeka,* ni milayo ya yinene ni zvileletelo zva zvinene.+ 14 U va tivisile a sabhadho ga wena go basa,+ u va nyika zvileletelo, ni milayo, ni nayo, hi ku tirisa a nandza ga wena Mosi. 15 U va nyikile a pawa ya le tilweni a cikhati leci va ngazwa ndlala,+ niku laha va ngazwa tora u va humesele mati hi lomu ka ribye,+ u tlhela u va byela va nghena va teka a tiko legi u nga hlambanyile a ku va nyika gona kasi giva tshomba yabye.

16 “Kanilezvi a vakokwani va hina va no ti kulisa,+ va nonohisa tinhamu tabye,+ va nga ingisi a zvileletelo zva wena. 17 Va no ala ku ingisa,+ va nga alakanyi a mitiro yo hlamalisa leyi u yi mahileko cikari kabye, va nonohisa tinhamu tabye, va yimisa a murangeli kasi va tlhela wukhumbini gabye le Gibhite.+ Kanilezvi wena u Nungungulu a longileko ku tsetselela, wa ku zwela wusiwana, wa wuxinji, a nonokako ku zangara, a teleko hi lirandzo li nga mbheliko,+ niku a wu va tsikangi.+ 18 Hambu a cikhati leci va nga ti mahela a cifananiso ca cihon’wana,* vaku: ‘Loyi hi yena Nungungulu wa wena loyi a ku humesileko tikweni ga Gibhite’,+ va tlhela va maha zvilo zva hombe zvi nga kombisiko cichavo, 19 hambulezvo, hi kota ya wuxinji ga wena ga hombe, a wu va tsikangi lomu ciwuleni.+ Ni hlikanhi a refu legi gi nga va rangela ndleleni a gi sukangi kabye, ne hambu a ndzilo lowu wu nga va woningela ni wusiku kasi ku va komba ndlela leyi va nga fanele ku famba hi yona, a wu sukangi kabye.+ 20 U va nyikile a moya wa wena wa wunene kasi wu va nyika wutlhari,+ a wu va tsonangi a mana,+ niku u va nyikile mati a cikhati va ngazwa tora.+ 21 Hi 40 wa malembe, u no va nyika a zvakuga lomu ciwuleni.+ A va vhumalangi nchumu. A tinguwo tabye a ti hlakalangi,+ ni mikondzo yabye a yi vhimbangi.

22 “U va nyikile mifumo ni matiko, u va avela hi zvipandze.+ Hikwalaho, va no teka a tiko ga Sihoni,+ ku nga tiko ga hosi ya Hexbhoni,+ ni tiko ga Ogi,+ a hosi ya Bhaxani, mava tshomba yabye. 23 U andzisile a vana vabye va tala a ku khwatsi tinyeleti ta matilo.+ Hi kulandzela, u no va neha tikweni legi u nga tsumbisile a vakokwani vabye lezvaku va ta nghena va gi teka.+ 24 Hikwalaho, a vana vabye va no nghena va teka tiko lego.+ U no hlongola vaKhanani mahlweni kabye,+ lava va nga hanya lomu tikweni, u nyikela tihosi tabye ni vahanyi va tiko mandleni yabye, kasi va tira kurandza hi vona. 25 Va no teka madhoropa ya makhokhola+ ni tiko go nona,*+ va teka ni tiyindlu ti nga tele hi zvilo zvontlhe zva zvinene, ni tihlowo, ni zvivhina,* ni miolivha,+ ni tisinya ta mihandzu hi kutala ka tona. Hikwalaho, va noga va xura va kuluka, va ti buza hi wunene ga wena ga hombe.

26 “Kanilezvi va no tsika ku ingisa, va ku hluwukela,+ va fularela a Nayo* wa wena. Va no daya a vaphrofeti lava va nga va tlharihisa kasi va wuya ka wena, va tlhela va maha zvilo zvi nga komba ku a va ku chavi.+ 27 Hi kota ya lezvo, u no va nyikela canjeni ga valala vabye+ va va xanisa.+ Kanilezvi loku va hi zvikaratweni va wa ku rilela, u vazwa na u hi matilweni; hi kota ya wuxinji ga wena ga hombe u wa va nyika vahanyisi kasi va va tlhatlhisa canjeni ga valala vabye.+

28 “Kanilezvi neti u va tlhatlhisa, va wa tlhela kambe va maha zvilo zvo biha mahlweni ka wena.+ Hikwalaho, u wa va tsika canjeni ga valala vabye va va fumela.*+ Makunu va wa wuya ka wena va ta ku rilela va kombela ku vhuniwa,+ u vazwa na u hi matilweni; khati ni khati u wa va tlhatlhisa hi kota ya wuxinji ga wena ga hombe.+ 29 Hambu lezvi u nga va tlharihisa kasi va wuya Nayweni wa wena, va no ti kulisa va ala ku ingisa a zvileletelo zva wena, va hambunyeta a milayo ya wena,+ leyi yaku loku a munhu a yi hlayisa a to hanya hi kota ya yona.+ Va no ku fularela, va nonohisa a tinhamu tabye, va ala ku ingisa. 30 Uve ni lihlazva-mbilu hi vona+ a malembe yo tala u tlhela u simama a ku va tlharihisa hi moya wa wena na u tirisa vaphrofeti va wena, kanilezvi va no ala ku ingisa. Hi kugumesa, u no va nyikela canjeni ga vanhu va matiko.+ 31 Hambulezvo, hi kota ya wuxinji ga wena ga hombe, a wu va lovisangi+ ne hambu ku va tsika, hakuva wena u Nungungulu wa ku zwela wusiwana ni wa wuxinji.+

32 “Makunu Nungungulu wa hina, wena Nungungulu wa hombe, wa ntamu, a hlamalisako, loyi a hlayisako a civhumelwano cakwe, ni ku kombisa lirandzo li nga mbheliko,+ chela kota hi tixanisa tontlhe leti ti hi weleko hina, ni tihosi ta hina, ni tihosana ta hina,+ ni vapristi va hina,+ ni vaphrofeti va hina,+ ni vakokwani va hina, ni vanhu vontlhe va wena, kusukela masikwini ya tihosi ta Asiriya+ kala nyamutlha. 33 Wena u hi mahele kululama ka zvontlhe lezvi zvi hi humeleleko, hakuva u tsumbekile, kanilezvi hina hi hina hi nga maha kubiha.+ 34 A tihosi ta hina, ni tihosana ta hina, ni vapristi va hina, ni vakokwani va hina, a va hlayisangi a nayo wa wena, ne a va dembangi ndleve ka zvileletelo zva wena ni ka zvitlharihiso lezvi u nga va tlharihisa hi zvona. 35 Hambu a cikhati leci va nga hi mufun’weni wabye, va ti buza hi wunene ga wena ga hombe legi u va maheleko, va tlhela va hanya tikweni ga hombe go nona* legi u va nyikileko, a va ku tirelangi+ ne hambu ku tsika a mitiro yabye yo biha. 36 Hi nga wona nyamutlha lezvi, hi tikhumbi,+ ina, hi tikhumbi tikweni legi u nga nyika a vakokwani va hina kasi vaga a mihandzu ya gona ni zvilo zva gona zva zvinene. 37 A pfuno wa hombe wa tiko wu lumba a tihosi leti u nga ti yimisa kasi ti hi fumela hi kota ya zviwonho zva hina.+ Ti tira kurandza hi mimiri ya hina ni zvifuyo zva hina, niku ha xaniseka nguvhu.

38 “Hikwalaho, ka zvontlhe lezvi, ha maha civhumelwano co tiya+ ca kuya hi kutsaliwa ci tlhela ci tiyiswa hi cifungo ca tihosana ta hina, ni vaLevhi va hina, ni vapristi va hina.”+

10 Lava va tiyisileko a civhumelwano+ hi cifungo cabye, hi lava:

9 Ni vaLevhi: Jexuwa, a n’wana wa Azaniya, na Bhinuyi wa vana va Henadhadhe, na Kadmiyeli,+ 10 ni vamakabye vabye Xebhaniya, na Hodhiya, na Kelita, na Pelaya, na Hanani, 11 na Mika, na Rehobha, na Haxabhiya, 12 na Zakura, na Xerebhiya,+ na Xebhaniya, 13 na Hodhiya, na Bhani, na Bheninu.

14 A tihloko ta vanhu: Paroxi, na Pahat-Mowabhi,+ na Elami, na Zatu, na Bhani, 15 na Bhuni, na Azgadhi, na Bhebhayi, 16 na Adhonija, na Bhigvhayi, na Adhina, 17 na Atera, na Hezekiya, na Azuri, 18 na Hodhiya, na Haxuma, na Bhezayi, 19 na Harifa, na Anatote, na Nebhayi, 20 na Magpiyaxi, na Mexulamu, na Hezire, 21 na Mexezabheli, na Zadhoki, na Jadhuwa, 22 na Pelatiya, na Hanani, na Anaya, 23 na Hoxeya, na Hananiya, na Hasuba, 24 na Halohexi, na Piliha, na Xobheka, 25 na Rehuma, na Haxabna, na Maaseya, 26 na Ahija, na Hanani, na Anani, 27 na Maluku, na Harimu na Bhaana.

28 A vanhu lava van’wani — a vapristi, ni vaLevhi, ni vagadhi va tinyangwa, ni vayimbeleli, ni malandza ya tempeli,* ni vontlhe lava va nga ti hambanisile ni vamatiko kasi ku landzela a Nayo wa Nungungulu wa lisine,+ zvin’we ni vasati vabye, ni vafana vabye, ni vanhanyana vabye, vontlhe lava va nga hi ni wutivi ni kuzwisisa,* —, 29 va no ti patsa ni vamakabye vabye, a vavanuna va nduma, va ti boha hi kuhlambanya* vaku va ta famba Nayweni wa Nungungulu wa lisine, wu nyikilweko hi Mosi, a nandza ga Nungungulu wa lisine, ni lezvaku va ta hlayisa a zvileletelo zvontlhe zva Jehovha, a Hosi ya hina, ni kulamula kakwe ni milayo yakwe. 30 Hi nga ta nyikela vanhanyana va hina ka vamatiko, hambu ku tekela vafana va hina a vanhanyana vabye.+

31 Loku a vamatiko va neha zvilo zvabye ni tixaka tontlhe ta timbewu kasi ku xavisa hi siku ga sabhadho, hi nga ta xava nchumu kabye hi siku ga sabhadho+ kutani hi siku go basa.+ Hi nga ta tshovela a masimu ya hina hi lembe ga wu 7,+ niku hi ta tsetselela vontlhe va hi dhevhako.+

32 Ahandle ka lezvo, a mun’we ni mun’wani wa hina i bohile ku nyikela a cipandze ca wunharu ca xekeli* lembe ni lembe kasi ku vhunetela a ntiro wa yindlu* ya Nungungulu wa hina,+ 33 ka tipawa ta munyikelo,+ ni munyikelo wa tindzhoho+ wu mahiwako siku ni siku, ni munyikelo wa kuhiswa wu mahiwako contlhe cikhati hi masabhadho+ ni ka hweti yiswa,+ ni ka mibuzo yi yimisilweko,+ ni ka zvilo zvo basa, ni ka minyikelo ya zviwonho+ ya kutsetselelwa ka vaIzrayeli, ni ka ntiro wontlhe wa yindlu ya Nungungulu wa hina.

34 Hi noba tihlolo xungetano hi tihunyi leti a vapristi, ni vaLevhi, ni vanhu va faneleko ku neha ndlwini ya Nungungulu wa hina hi kuya hi tiyindlu ta vapapayi va hina hi zvikhati zvi yimisilweko, lembe ni lembe, kasi ku ti hisa laha alatini ga Jehovha, a Nungungulu wa hina, kota lezvi zvi tsalilweko Nayweni.+ 35 Lembe ni lembe, hi ta tlhela hi neha lomu ndlwini ya Jehovha a mihandzu yo sangula yi buvhileko ya tiko ga hina ni mihandzu yo sangula yi buvhileko ya tisinya tontlhe ta mihandzu,+ 36 ni matewula ya vana va hina ni ya zvifuyo zva hina,+ kota lezvi zvi tsalilweko Nayweni, ni matewula ya tihomu, ni tiyivhu, ni timbuti ta hina. Hi ta zvi neha ndlwini ya Nungungulu wa hina, ka vapristi lava va tirako ndlwini ya Nungungulu wa hina.+ 37 A mihandzu ya hina yo sangula ya mapa ya tindzhoho,+ ni minyikelo ya hina, ni mihandzu ya tisinya tontlhe,+ ni vhinyo yiswa, ni mafura,+ hi ta zvi neha ka vapristi, lomu tikwartwini ta ku veketela kona zvilo* ta yindlu ya Nungungulu wa hina,+ zvin’we ni zvawukhume zva tiko ga hina lezvi zvi yako ka vaLevhi.+ Hakuva a vaLevhi hi vona va hlengeletelako a zva wukhume lomu madhoropeni wontlhe ya hina lawa ma nga ni masimu.

38 A mupristi, a n’wana wa Aroni, i tava zvin’we ni vaLevhi a cikhati leci a vaLevhi va hlengeletelako zvawukhume; cikari ka zvawukhume lezvi va zvi amukeleko, a vaLevhi va ta nyikela zvawukhume ndlwini ya Nungungulu wa hina,+ lomu tikwartwini ta ku veketela kona zvilo.* 39 Hakuva a vaIzrayeli ni vana va Levhi va fanele ku neha hlengo+ wa timbewu, ni vhinyo yiswa, ni mafura+ lomu tikwartwini ta ku veketela kona zvilo,* ku nga kwalomu ku tshamako a zvibya zva wutshamu go basa, ni vapristi lava va nga ntirweni, ni vagadhi va tinyangwa, ni vayimbeleli. Hina hi nga ta tsika a yindlu ya Nungungulu wa hina.+

11 A tihosana ta vanhu ti wa tshama le Jerusalema;+ a vanhu lava van’wani va noba tihlolo+ kasi va hlawula munhu mun’we cikari ka 10 wa vanhu lezvaku a ya hanya le Jerusalema, dhoropeni go basa, lava van’wani va 9 va simama ku hanya lomu madhoropeni lawa man’wani. 2 A ku hundza lezvo, a vanhu va tiko va no katekisa a vanhu vontlhe lava va nga ti nyikele hi kuzvirandza kasi va ya hanya Jerusalema.

3 Leti hi tihosana ta provhinsia leti ti nga hanya le Jerusalema. (A vaIzrayeli lava van’wani, ni vapristi, ni vaLevhi, ni malandza ya tempeli,*+ ni vana va malandza ya Solomoni,+ va wa hanya madhoropeni lawa man’wani ya Judha, a mun’we ni mun’wani tshombeni yakwe, lomu dhoropeni gakwe.+

4 Le Jerusalema ku wa hanya kambe a vanhu vo kari va ka Judha ni va ka Bhenjamini.) A va ka Judha ku wa hi Ataya, a n’wana wa Uziya, a n’wana wa Zakariya, a n’wana wa Amariya, a n’wana wa Xefatiya, a n’wana wa Mahalaleli, wa vana va Perezi;+ 5 na Maaseya, a n’wana wa Bharuke, a n’wana wa Kol-Hoze, a n’wana wa Hazaya, a n’wana wa Adhaya, a n’wana wa Joyaribha, a n’wana wa Zakariya, a n’wana wa muXela. 6 Vontlhe a vana va Perezi lava va nga hanya Jerusalema va wa hi 468 wa vavanuna va tinhenha.

7 A va ka Bhenjamini ku wa hi lava: Salu,+ a n’wana wa Mexulamu, a n’wana wa Joyedha, a n’wana wa Pedhaya, a n’wana wa Kolaya, a n’wana wa Maaseya, a n’wana wa ltiyeli, a n’wana wa Jexaya, 8 ku gamela Gabhayi na Salayi: 928; 9 a muwoneleli wabye ku wa hi Joyeli, a n’wana wa Zikri; Judha, a n’wana wa Hasenuwa, i wa hi wa wumbiri hi wuhosi lomu dhoropeni.

10 Ka vapristi: Jedhaya, a n’wana wa Joyaribha; na Jakina;+ 11 na Seraya, a n’wana wa Hilkiya, a n’wana wa Mexulamu, a n’wana wa Zadhoki, a n’wana wa Merayote, a n’wana wa Ahitubha,+ a murangeli wa yindlu* ya Nungungulu wa lisine, 12 ni vamakabye vabye lava va nga tira lomu ndlwini: 822; na Adhaya, a n’wana wa Jerohamu, a n’wana wa Pelaliya, a n’wana wa Amzi, a n’wana wa Zakariya, a n’wana wa Paxuri,+ a n’wana wa Malkija, 13 ni vamakabye vakwe va nga hi tihosana ta tiyindlu: 242; na Amaxayi, a n’wana wa Azareli, a n’wana wa Azayi, a n’wana wa Mexilemote, a n’wana wa Imera; 14 ni vamakabye vabye, a vavanuna va tinhenha vo tiya hlanha: 128. A muwoneleli wabye ku wa hi Zabdhiyeli, wa ngango wu dhumileko.

15 Ka vaLevhi: Xemaya,+ a n’wana wa Hasuba, a n’wana wa Azrikamu, a n’wana wa Haxabhiya, a n’wana wa Bhuni; 16 na Xabhetayi+ na Jozabhadha,+ a tihosana ta vaLevhi, lava va nga wonelela a ntiro wu nga mahiwa le handle ka yindlu ya Nungungulu wa lisine; 17 na Mataniya,+ a n’wana wa Mika, a n’wana wa Zabdhi, a n’wana wa Asafa,+ a nga hi murangeli kuyimbeleleni, loyi a nga rangela kudhumiseni ka Nungungulu hi cikhati ca mukhongelo;+ na Bhakbhukiya, a wa wumbiri ka vamakabye vakwe; na Abdha, a n’wana wa Xamuwa, a n’wana wa Galala, a n’wana wa Jedhutuni.+ 18 Vontlhe a vaLevhi lava va nga hi dhoropeni go basa va wa hi 284.

19 A vagadhi va tinyangwa ku wa hi Akubha, na Talmoni,+ ni vamakabye vabye lava va nga gadha lomu tinyangweni: 172 wa vona.

20 A vaIzrayeli lava van’wani, ni vapristi, ni vaLevhi, va wa hanya madhoropeni wontlhe lawa man’wani ya Judha, a mun’we ni mun’we tshombeni yakwe. 21 A malandza ya tempeli*+ ma wa hanya le Ofeli;+ Ziha na Gixpa va wa hi vawoneleli va malandza ya tempeli.*

22 A muwoneleli wa vaLevhi lomu Jerusalema ku wa hi Uzi, a n’wana wa Bhani, a n’wana wa Haxabhiya, a n’wana wa Mataniya,+ a n’wana wa Mika, wa vana va Asafa, a vayimbeleli; hi yena a nga wonelela a ntiro wa yindlu ya Nungungulu wa lisine. 23 Hakuva a hosi yi wa yimisile a nayo kasi ku va vhuna,+ niku a vayimbeleli va wa nyikiwa lezvi zvi nga laveka siku ni siku. 24 Petahiya, a n’wana wa Mexezabheli, wa vana va Zera, a n’wana wa Judha, i wa hi sungukati ga hosi ka timhaka tontlhe ta vanhu.

25 Xungetano hi zvidhoropana zvabye ni masimu yabye, a vokari va ka Judha va wa tshama Kiriyat-Arbha+ ni zvidhoropaneni zva kona, ni Dhibhoni ni zvidhoropaneni zva kona, ni Jekabzeeli+ ni zvidhoropaneni zva kona, 26 ni le Jexuwa, ni le Moladha,+ ni le Bhet-Peleti,+ 27 ni le Hazar-Xuwale,+ ni le Bherexebha ni zvidhoropaneni zva kona, 28 ni le Ziklagi,+ ni le Mekona ni zvidhoropaneni zva kona, 29 ni le En-Rimoni,+ ni le Zora,+ ni le Jarmute, 30 ni le Zanowa,+ ni le Adhulamu ni zvidhoropaneni zva kona, ni le Lakixe+ ni masin’wini ya kona, ni le Azeka+ ni zvidhoropaneni zva kona. Va no aka* kusukela Bherexebha kala Nkoveni wa Hinome.+

31 A va ka Bhenjamini va wa tshama le Gebha,+ ni le Mikmaxe, ni le Ayija, ni le Bheteli+ ni zvidhoropaneni zva kona, 32 ni le Anatote,+ ni le Nobhe,+ ni le Ananiya, 33 ni le Hazori, ni le Rama,+ ni le Gitayime, 34 ni le Hadhidha, ni le Zebhoyime, ni le Nebhalati, 35 ni le Lodha, ni le Ono,+ le nkoveni wa vameseri. 36 A mitlawa yo kari ya vaLevhi yi nga tshama le Judha yi avelwe ku ya tshama ka cipandze ca va ka Bhenjamini.

12 A vapristi ni vaLevhi lava va nga famba na Zerubhabheli,+ a n’wana wa Salatiyeli,+ na Jexuwa+ hi lava: Seraya, na Jeremiya, na Ezra, 2 na Amariya, na Maluku, na Hatuxa, 3 na Xekaniya, na Rehuma, na Meremote, 4 na Idho, na Ginetoyi, na Abhija, 5 na Mijamini, na Madhiya, na Bhilga, 6 na Xemaya, na Joyaribha, na Jedhaya, 7 na Salu, na Amoka, na Hilkiya, na Jedhaya. Leti tive tihloko ta vapristi ni ta vamakabye vabye masikwini ya Jexuwa.

8 A vaLevhi kuve Jexuwa, na Bhinuyi, na Kadmiyeli,+ na Xerebhiya, na Judha, na Mataniya,+ loyi a nga rangela ka tisimu ta kubonga, zvin’we ni vamakabye vakwe. 9 Bhakbhukiya na Uni, a vamakabye vabye, va wa yima mahlweni kabye kota varindzeli.* 10 Jexuwa i nova papayi wa Joyakimu, Joyakimu ava papayi wa Eliyaxibha,+ na Eliyaxibha i nova papayi wa Joyadha.+ 11 Joyadha i nova papayi wa Jonatani, Jonatani ava papayi wa Jadhuwa.

12 Masikwini ya Joyakimu, lava va wa hi vapristi, a tihloko ta tiyindlu ta vapapayi: Meraya, wa yindlu ya Seraya;+ na Hananiya, wa yindlu ya Jeremiya, 13 na Mexulamu, wa yindlu ya Ezra;+ na Jehohanani, wa yindlu ya Amariya; 14 na Jonatani, wa yindlu ya Maluki; na Josefa, wa yindlu ya Xebhaniya; 15 na Adna, wa yindlu ya Harimu;+ na Helkayi, wa yindlu ya Merayote; 16 na Zakariya, wa yindlu ya Idho; na Mexulamu, wa yindlu ya Ginetoni; 17 na Zikri, wa yindlu ya Abhija,+ na . . . ,* wa yindlu ya Miniyamini; na Piltayi, wa yindlu ya Mowadhiya; 18 na Xamuwa, wa yindlu ya Bhilga;+ na Jehonatani, wa yindlu ya Xemaya; 19 na Matenayi, wa yindlu ya Joyaribha; na Uzi, wa yindlu ya Jedhaya;+ 20 na Kalayi, wa yindlu ya Salayi; na Ebheri, wa yindlu ya Amoka; 21 na Haxabhiya, wa yindlu ya Hilkiya; na Netaneli, wa yindlu ya Jedhaya.

22 A tihloko ta tiyindlu ta vapapayi ta vaLevhi ni ta vapristi ti no tsalelwa masikwini ya Eliyaxibha, na Joyadha, na Johanani, na Jadhuwa+ kala cikhatini ca kufuma ka Dhariyusi, a muPersia.

23 A vaLevhi lava va nga hi tihloko ta tiyindlu ta vapapayi va no tsalelwa lomu bhukwini ga matimu kala masikwini ya Johanani, a n’wana wa Eliyaxibha. 24 A tihloko ta vaLevhi kuve Haxabhiya, na Xerebhiya na Jexuwa,+ a n’wana wa Kadmiyeli;+ ni vamakabye vabye va wa yima mahlweni kabye va dhumisa ni ku bonga na va landza a zvileletelo zva Dhavhidha,+ a munhu wa Nungungulu wa lisine, a ntlawa wun’we wa vagadhi na wu hi tlhelweni ga wun’wani ntlawa wa vagadhi. 25 Mataniya,+ na Bhakbhukiya, na Obhadhiya, na Mexulamu, na Talmoni na Akubha+ va wa yima va rindzela kota vagadhi va tinyangwa,+ va wonelela a tikwartu ta ku veketela kona zvilo ti nga hi kusuhani ni tinyangwa. 26 Va tirile masikwini ya Joyakimu, a n’wana wa Jexuwa,+ a n’wana wa Jozadhaki, ni masikwini ya Nehemiya, a govhernadhori, na Ezra,+ a mupristi tlhelo mukopiyi.*

27 Cikhatini ca kukanguliwa ka muro wa Jerusalema, va no lavetela a vaLevhi kontlhe lomu va nga tshama kona va va neha Jerusalema kasi va ta kulungela a kukanguliwa ka muro hi kutsaka, ni tisimu ta kubonga,+ ni tingomana, ni zvichaya-chaya zva tingoti, ni zvitende. 28 A vana va vayimbeleli* va no hlengeletana, na vata hi dhistrito,* ni matlhelweni wontlhe ya Jerusalema, ni ka zvidhoropana zva vaNetofate,+ 29 kusukela Bhet-Gilgali,+ ni masin’wini ya Gebha+ ni Azmavhete,+ hakuva a vayimbeleli va wa ti akele zvidhoropana zvabye matlhelweni wontlhe ya Jerusalema. 30 A vapristi ni vaLevhi va no ti basisa, va tlhela va basisa vanhu,+ ni tinyangwa,+ ni muro.+

31 Makunu ndzi no laya a tihosana ta ka Judha lezvaku ti kandziha hehla ka muro. Ahandle ka lezvo, ndzi no yimisa a mitlawa yimbiri ya hombe ya ku yimbelela a tisimu ta kubonga, ni mitlawa leyi yi nga va landzela hi le ndzhako. A wun’we wu no famba hi tlhelo ga cinene le hehla ka muro wu cuwuka Nyangweni ya Tinhulu ta Khuma.+ 32 Hoxaya ni khihlanya ga tihosana ta ka Judha va no va landzela, 33 zvin’we na Azariya, na Ezra, na Mexulamu, 34 na Judha, na Bhenjamini, na Xemaya na Jeremiya. 35 Va wa hi zvin’we kambe ni vana vo kari va vapristi va nga hi ni mimpundzu:+ Zakariya, a n’wana wa Jonatani, a n’wana wa Xemaya, a n’wana wa Mataniya, a n’wana wa Mikaya, a n’wana wa Zakura, a n’wana wa Asafa,+ 36 ni vamakabye vakwe Xemaya, na Azareli, na Milalayi, na Gilalayi, na Maayi, na Netaneli, na Judha, na Hanani, na va hi ni zvibya zva ku chaya hi zvona muzka zva Dhavhidha,+ a munhu wa Nungungulu wa lisine; niku Ezra,+ a mukopiyi,* i no ranga mahlweni kabye. 37 Hi laha Nyangweni ya Cibuka,+ va no kwela hi tsunga wa muro, va hundza hi le hehla ka Cikadha+ ca Dhoropa ga Dhavhidha+ ni le hehla ka Muti wa Dhavhidha, va famba kala Nyangweni ya Mati+ hi tlhelo ga mutsuwuka-gambo.

38 A wun’wani ntlawa wa vayimbeleli va tisimu ta kubonga wu no famba hi tlhelo legi gin’wani,* mina ndzi wu landzela ni khihlanya ga vanhu, hi le hehla ka muro, wu hundza hi Likhokholeni* la Mindzhimbo*+ kala Murweni wo Anama,+ 39 wu famba kala Nyangweni ya Efrayime,+ ni Nyangweni ya Dhoropa ga Kale,+ ni Nyangweni ya Tinjhanjhi,+ ni Likhokholeni* la Hananeli,+ ni Likhokholeni la Meya, ni Nyangweni ya Tiyivhu,+ wu ya nyima Nyangweni ya Vagadhi.

40 Hi kugumesa, a mitlawa leyi ya yimbiri ya vayimbeleli va tisimu ta kubonga yi no yima mahlweni ka yindlu ya Nungungulu wa lisine; minawu ndzi no yima ni khihlanya ga tihosana leti ti nga hi na mina, 41 ni vapristi Eliyakimu, na Maaseya, na Miniyamini, na Mikaya, na Eliyowenayi, na Zakariya, na Hananiya, va nga hi ni mimpundzu, 42 zvin’we na Maaseya, na Xemaya, na Eleyazari, na Uzi, na Jehohanani, na Malkija, na Elami na Ezeri. A vayimbeleli va no yimbelela hi gezu ga hombe na va rangelwa hi Izrahiya.

43 Ka siku lego, va no maha miphahlo ya hombe va tsaka,+ hakuva a Nungungulu wa lisine i wa va tatile hi litsako la hombe. A vavasati ni vanana vonawu va no tsaka+ laha ka kuza a litsako la Jerusalema li zwala kule.+

44 Ka siku lego, ku no yimiswa a vavanuna kasi va wonelela a tikwartu+ ta minyikelo,+ ni mihandzu yo sangula,+ ni zvawukhume.+ Va wa fanele ku hlengeletela lezvi zvi ngata hi lomu masin’wini ya madhoropa kota zvipandze lezvi zvi londziwako hi Nayo+ zva vapristi ni vaLevhi,+ hakuva ku wa hi ni litsako Judha hi kota ya vapristi ni vaLevhi lava va nga tira. 45 Va no sangula ku maha mitiro ya Nungungulu wabye ni ntiro wa kubasisa. A vayimbeleli ni vagadhi va tinyangwa vonawu va no maha lezvo, na va landzela a zvileletelo zva Dhavhidha ni zva n’wana wakwe Solomoni. 46 Hakuva a kaleloko, masikwini ya Dhavhidha na Asafa, ku wa hi ni varangeli* va vayimbeleli ni va tisimu ta kudhumisa ni ta ku bonga Nungungulu.+ 47 Masikwini ya Zerubhabheli+ ni masikwini ya Nehemiya, a vaIzrayeli vontlhe va wa maha mihlengo ya vayimbeleli+ ni ya vagadhi va tinyangwa,+ hi kuya hi lezvi zvi nga laveka kabye siku ni siku. Va wa pambula a ciavelo ca vaLevhi;+ a vaLevhi va wa pambula a ciavelo ca vana va Aroni.

13 Hi siku lego, ku no leriwa a bhuku ga Mosi na zvi zwiwa hi vanhu.+ Lomu bhukwini va no kuma laha ku nga tsalilwe ku a vaAmoni ni vaMowabhi+ va nga tshuki va nghena lomu bandleni ga Nungungulu wa lisine,+ 2 hakuva a va khingangi a vaIzrayeli ni tipawa ni mati, kanilezvi va no xava Bhalami lezvaku a neha ciruko hehla ka vona.+ Hambulezvo a Nungungulu wa hina i no cica a ciruko leco civa cikatekiso.+ 3 Zvalezvi va ngazwa Nayo, va no sangula ku hambanisa vaIzrayeli ni vontlhe lava va nga hi vamatiko.*+

4 Na zvi nga se maheka lezvo, a mupristi loyi a nga wonelela a tikwartu ta ku veketela kona zvilo* lomu ndlwini* ya Nungungulu wa hina+ ku wa hi Eliyaxibha,+ a xaka ga Tobhiya.+ 5 I wa nyikile Tobhiya a kwartu ya hombe ya ku veketela kona zvilo,* lomu a kale ku nga vekiwa kona a munyikelo wa tindzhoho, ni hlakati yo nuhela, ni zvibya, ni zvawukhume zva timbewu, ni zva vhinyo yiswa, ni zva mafura,+ lezvi zvi nga fanele ku nyikiwa a vaLevhi,+ ni vayimbeleli, ni vagadhi va tinyangwa, zvin’we ni munyikelo wa vapristi.+

6 Ka cikhati contlhe leco, ndzi wa nga hi kona Jerusalema, hakuva ndzi wa yile ka hosi hi lembe ga wu 32+ ga kufuma ka Artaxerxesi,+ a hosi ya Bhabhuloni. Andzhako ka cikhati co kari, ndzi no kombela a hosi lezvaku ndzi suka. 7 Ndzi no chikela Jerusalema ndzi wona mihumbo leyi Eliyaxibha+ a nga yi mahile hi ku nyika Tobhiya+ a kwartu yi nga hi ya ku veketela kona zvilo, ndlwini ya Nungungulu wa lisine. 8 Ndzi no bayiseka nguvhu hi zvona, ndzi se humesa a zvibya zvontlhe zva Tobhiya lomu kwartwini ya ku veketela kona zvilo,* ndzi zvi hoxa handle. 9 Andzhako ka lezvo, ndzi no laya lezvaku va basisa a tikwartu ta ku veketela kona zvilo,* ndzi gumesa ndzi tlhelisela zvibya zva yindlu ya Nungungulu wa lisine,+ ni munyikelo wa tindzhoho, ni hlakati yo nuhela.+

10 Ndzi no tiva kambe lezvaku a vaLevhi+ a va ha nyikiwi mihlengo yabye;+ hikwalaho, a vaLevhi ni vayimbeleli lava va nga maha ntiro va wa hangalakile, a mun’we ni mun’wani a ti yela masin’wini yakwe.+ 11 Makunu ndzi no kawuka a tihosana,+ ndziku: “Hikuyini mu tsikileko a yindlu ya Nungungulu wa lisine yi nga khatalelwi?”+ Ndzi no va tlhanganisa ndzi va tlhelisa lomu va nga tira kona. 12 Vontlhe a va ka Judha va no neha zvawukhume+ zva timbewu, ni zva vhinyo yiswa, ni zva mafura lomu kwartwini ya ku veketela zvilo.+ 13 Ndzi no yimisa Xelemiya, a mupristi, na Zadhoki, a mukopiyi,* na Pedhaya, a muLevhi, kasi va wonelela tikwartu ta ku veketela zvilo, na Hanani, a n’wana wa Zakura, a n’wana wa Mataniya, kasi a va vhunetela, hakuva a vavanuna lava va wa tsumbekile. A ntiro wabye ku wa hi ku avela a minyikelo ka vamakabye vabye.

14 O, Nungungulu wa mina, ndzi alakanye+ hi kota ya lezvo; u nga rivali a mitiro ya mina ya lirandzo li nga mbheliko leyi ndzi yi maheleko a yindlu ya Nungungulu wa mina ni mitiro leyi yi mahiwako ka yona.*+

15 Masikwini lawo, ndzi no wona vanhu le Judha na va kandzihetela a mauvha lomu zvigowolweni zva vhinyo hi sabhadho,+ va wungeletela a tinyandza ta timbewu va rwexa a timbongola, va neha vhinyo, ni mauvha, ni makuwu, ni tixaka tontlhe ta mindzhwalo lomu Jerusalema hi siku ga sabhadho.+ Hikwalaho, ndzi no va tlharihisa lezvaku va nga xavisi zvilo hi siku lego.* 16 A vanhu va le Tire lava va nga hanya lomu dhoropeni va wa neha tinjhanjhi, ni zvilo zva tixaka tontlhe zva ku xavisa, va ta zvi xavisela a vaJudha le Jerusalema hi sabhadho.+ 17 Hikwalaho, ndzi no kawuka a varangeli va Judha, ndziku: “Mu ku mahela yini a kubiha loku, mu nyenyezisa a siku ga sabhadho ke? 18 A hi zvalezvi va nga maha a vakokwani va n’wina, aza Nungungulu wa hina a neha a khombo legi gontlhe hehla ka hina ni ka dhoropa legi ke? Kanilezvi n’wina a mu tsayi a ku kokela Izrayeli yin’wani zanga hi ku nyenyezisa a sabhadho.”+

19 Zvalezvi a mindzhuti yi nga sangula ku fenengeta a tinyangwa ta Jerusalema, a sabhadho na gi nga se sangula, ndzi no laya lezvaku a tinyangwa ti vhaliwa. Ndzi no tlhela ndzi laya lezvaku va nga vhululi tivati kala ku hundza a sabhadho, ndzi veka a malandza yo kari ya mina lomu tinyangweni kasi ku nga nehiwi mindzhwalo hi siku ga sabhadho. 20 Hikwalaho, a vamahi va mabhindzu ni vaxavisi va zvilo zva tixaka tontlhe va etlele lahandle ka Jerusalema khati gin’we kutani mambiri. 21 Ndzi no va tlharihisa, ndziku: “Hikuyini mu etlelako laha phambeni ka muro? Loku mo phinda, ndzi ta mu hlongola hi kani.” Kusukela siku lego, a va ha tangi kambe hi sabhadho.

22 Ndzi no byela vaLevhi lezvaku va fanele ku tshama hi ku ti basisa, vata va ta gadha a tinyangwa kasi a siku ga sabhadho gi tshama gi basile.+ O, Nungungulu wa mina, ndzi alakanye ka lezvi ndzi nga maha, u ndzi zwela wusiwana hi kota ya lirandzo la wena la hombe li nga mbheliko.+

23 Masikwini lawo, ndzi no tlhela ndzi wona vaJudha va nga chadhile ni vavasati+ va vaAxdhodhe,+ ni vaAmoni, ni vaMowabhi.+ 24 A khihlanya ga vana vabye va wa wulawula a ciAxdhodhe, a gin’wani khihlanya gi wulawula a tirimi ta matiko man’wani, kanilezvi i hava ni mun’we wabye a nga zvi kota ku wulawula a lirimi la vaJudha. 25 Hikwalaho, ndzi no va kawuka, ndzi va ruka, ndziba a vokari vabye,+ a van’wani ndzi va tsuwulela a misisi ndzi tlhela ndzi va hlambanyisa hi Nungungulu, ndziku: “Mu nga nyikeli vanhanyana va n’wina ka vafana vabye, hambu ku teka a vanhanyana vabye mu nyika a vafana va n’wina, ne n’wina mu nga ti tekeli vona.+ 26 Kasi a hi zvalezvi zvi nga wonhisa Solomoni, a hosi ya Izrayeli ke? Cikari ka matiko yo tala ku wa nga hi na hosi yo fana naye.+ I wa randziwa hi Nungungulu wakwe,+ hikwalaho, Nungungulu i no mu maha hosi hehla ka tiko gontlhe ga Izrayeli. Kanilezvi hambu yena i noza a wonha hi kota ya vasati va matiko.+ 27 Mu xinyatisile kuyini mu maha a kubiha ka tshisela legi, mu nga tsumbeki ka Nungungulu wa hina hi ku chadha ni vavasati va matiko ke?”+

28 A mun’we wa vafana va Joyadha,+ a n’wana wa Eliyaxibha,+ a mupristi wa hombe, i wa hi mwane wa Sambalati,+ a muHoroni. Hikwalaho, ndzi no mu hlongola a suka ka mina.

29 O, Nungungulu wa mina, va alakanye hakuva va nyenyezisile a wupristi ni civhumelwano ca wupristi+ ni ca vaLevhi.+

30 Ndzi no va basisa ka kunyenyeza kontlhe ka vamatiko, ndzi avela mitiro ka vapristi ni vaLevhi, a mun’we ni mun’we ntirweni wakwe,+ 31 ndzi tlhela ndzi leletela lezvaku ku nehiwa tihunyi+ hi cikhati ci yimisilweko ni mihandzu yo sangula yo buvha.

O, Nungungulu wa mina, ndzi alakanye u ndzi katekisa.+