JONA
1 A mhaka ya Jehovha yi nota ka Jona,*+ a n’wana wa Amitayi, yi taku: 2 “Suka, uya Ninivha,+ a dhoropa legi ga hombe, u ya kanela kulamula hehla ka gona, hakuva a kubiha kabye ku chikele ka mina.”
3 Kanilezvi Jona i no suka a tsutsuma Jehovha aya Tarxixi; i no relela aya Jopa a ya kuma citimela* ca kuya Tarxixi. Hikwalaho, i no hakhela lipfhumba lakwe a nghena citimeleni kasi a famba navo Tarxixi, a tsutsuma Jehovha.
4 Hi kulandzela, Jehovha i no vhuxa a moya wa ntamu lomu bimbini, kuva ni bhubhutsa ga hombe nguvhu laha ka kuza a citimela ci lava ku pandzeka. 5 A vamarinyero va no chava nguvhu laha ka kuza a mun’we ni mun’wani a sangula ku kombela ku vhuniwa hi nungungulu wakwe. Va no sangula ku hoxetela a zvibya lomu bimbini zvi nga hi lomu citimeleni, kasi ci vevuka.+ Kanilezvi Jona i wa relele lomu cikari ka citimela, a ya ti lata, a etlela wurongo ga hombe. 6 A marinyero loyi wa hosana i no tshinela kakwe, aku: “Hikuyini u etlelako? Vhuka u kombela ka nungungulu wa wena! Kuzvilava a Nungungulu wa lisine i ta hi zwela wusiwana, hi nga lovi.”+
7 Hi kulandzela, va no byelana, vaku: “Tanani hi taba tihlolo+ kasi hi tiva ku hi mani a nga ni nandzu wa khombo legi.” Hikwalaho, va noba tihlolo, a hlolo yi se khoma Jona.+ 8 Vona vaku kakwe: “Hi kombela ku u hi byela, himani a nga ni nandzu wa khombo legi gi hi welako? U tira ntiro muni, kona uta hi kwihi? U wa tiko muni niku u wa lixaka muni?”
9 I no hlamula, aku: “Ndzi muHebheru a chavako* Jehovha, a Nungungulu wa matilo, Loyi a nga vanga bimbi ni misava.”
10 Hikwalaho, a vavanuna lavo va no engetela ku chava, va mu wutisa, vaku: “Zvini u nga maha?” (A vavanuna lavo va no zvi tiva lezvaku i wa tsutsuma Jehovha, hakuva i wa va byelile.) 11 Va tlhela vaku: “Hi ku maha yini kasi a bimbi gi rula?” Hakuva a bimbi gi wa engetela ku vhindluka. 12 I no hlamula, aku: “Ndzi tlakuleni mu ndzi hoxa lomu bimbini, a bimbi gi ta rula; hakuva ndza zvi tiva lezvaku mu vhukelwa hi bhubhutsa legi ga hombe hi kota ya mina.” 13 Hambulezvo, a vavanuna va no bondza makasiya hi ntamu kasi va tlhelisa citimela misaveni yo woma, kanilezvi a va zvi kotangi, hakuva a bimbi gi wo engetela ku vhindluka matlhelweni yabye.
14 Hi kota ya lezvo, va no kombela ka Jehovha, vaku: “O Jehovha, hi kombela ku u nga hi lovisi hi kota ya wanuna loyi!* O Jehovha, u nga hi nyiki nandzu wa nkhata wa munhu loyi a nga hava nandzu hakuva u mahile kurandza ka wena.” 15 Makunu va no tlakula Jona va mu hoxela lomu bimbini, ni bimbi gi no rula. 16 Laha va nga wona lezvo, a vavanuna lavo va no mu chava nguvhu Jehovha,+ va nyikela munyikelo ka Jehovha va tlhela va maha zvifungo.
17 Jehovha i no rumela a njhanjhi ya hombe kasi yi ya mita Jona; hikwalaho, Jona i no tshama masiku manharu ni wusiku ginharu lomu khwirini ga njhanjhi.+
2 Makunu Jona i no khongela ka Jehovha, a Nungungulu wakwe, na a hi lomu khwirini ga njhanjhi,+ 2 aku:
“Hlomulweni wa mina, ndzi no vitana Jehovha, yena a ndzi hlamula.+
Na ndzi hi kueteni* ka Cilahla,* ndzi no rila ndzi kombela ku vhuniwa.+
Wena u nozwa a gezu ga mina.
3 Laha u nga ndzi hoxa kueteni, mbilwini ya bimbi gi etileko,
A mati ma no ndzi mita.+
Wontlhe a mavingo* ya wena ya ntamu ma no hundza hi le hehla ka mina.+
4 Mina ndzi te: ‘Ndzi hlongolilwe ndzi suka kuwoneni ka wena!
Ndza ha ta yi cuwukisisa kuyini kambe a tempeli ya wena yo basa ke?’
A byanyi ga lomu bimbini gi tsondzele a hloko ya mina.
6 Ndzi mbombomele kala le hasi ka zvitsunga.
A zvikwinyaro zva misava zvi wa vhaleka hehla ka mina kala kupindzuka.
Kanilezvi wena Jehovha Nungungulu wa mina u humesile a wutomi ga mina lomu nkeleni.+
7 Laha a wutomi* ga mina gi ngaya gi mbhela, ndzi no alakanya Jehovha.+
A mukhongelo wa mina wu no chikela ka wena, lomu tempeleni ya wena yo basa.+
8 Lava va khozelako a zvifananiso zvi nga vhuniko nchumu, va tsika cibuka cabye ca lirandzo li nga mbheliko.*
9 Kanilezvi mina ndzi ta ku mahela miphahlo hi magezu ya kubonga.
Lezvi ndzi nga funga, ndzi ta zvi tatisa.+
A kuhanyisa kuta hi ka Jehovha.”+
10 Andzhako ka lezvo, Jehovha i no laya njhanjhi lezvaku yi ya hlata Jona misaveni yo woma.
3 A mhaka ya Jehovha yi nota ka Jona hi khati ga wumbiri, yi taku:+ 2 “Suka uya Ninivha,+ a dhoropa legi ga hombe, u ya kanela a mahungu lawa ndzi ku byelako.”
3 Hikwalaho, Jona i no suka aya Ninivha+ hi ku ingisa mhaka ya Jehovha.+ A Ninivha gi wa hi dhoropa ga hombe nguvhu,* gi wa fambiwa hi masiku manharu. 4 Jona i no nghena lomu dhoropeni, a famba pfhuka wa siku, na a kanela, aku: “Ndzeni ka 40 wa masiku basi Ninivha i ta lovisiwa.”
5 A vanhu va le Ninivha va no kholwa ka Nungungulu,+ va yimisa siku ga kupfhunga,* va boha tisakwa, kusukela ka loyi wahombe kala ka loyi wamutsongwani cikari kabye. 6 A cikhati leci a mahungu ma nga chikela ka hosi ya Ninivha, yi no suka citshan’wini ca yona ca wuhosi, yi tlhatlha a nguwo ya yona ya wuhosi yi boha tisakwa, yi tlhela yi tshama lomu khumeni. 7 Ahandle ka lezvo, yi no laya lezvaku kontlhe lomu Ninivha ku kanelwa a mahungu yaku:
“A hosi ni tihosana ta yona va laya lezvi: Ku ngavi na munhu kutani cihari, ntlhambi wa tihomu kutani wa tiyivhu wu gako nchumu. Ku nga giwi zvakuga ne hambu ku nwiwa mati. 8 Ngha va boha tisakwa, a vanhu ni zvihari, va khongela ka Nungungulu hi mbilu yontlhe, va tsika tindlela tabye ta kubiha ni tihanyi leti va mahako. 9 Himani a zvi tivako ku a Nungungulu wa lisine a nga ta hlolisisa* lezvi a lavako ku maha, a tsika a zanga yakwe yi vhurako, kasi hi nga lovi ke?”
10 Laha a Nungungulu wa lisine a nga wona lezvi va nga maha, lezvaku va tsikile tindlela tabye ta kubiha,+ i no hlolisisa* khombo legi a nga wulile lezvaku i lava ku gi tisa hehla kabye, a nga ha gi tisi.+
4 Kanilezvi lezvo zvi no mu swira nguvhu Jona, a vila hi zanga. 2 Hikwalaho, i no khongela ka Jehovha, aku: “Ah, Jehovha, a hi zvalezvi zvi nga ndzi karata na ndza ha hi tikweni ga mina ke? Hi caleci ci nga ndzi maha ndzi zama ku tsutsuma ndziya Tarxixi+ ka khati go sangula; hakuva ndzi wa zvi tiva lezvaku u Nungungulu wa ku zwela wusiwana, ni wa wuxinji, a nonokako ku zangara, a teleko hi lirandzo li nga mbheliko,+ loyi a bayisekako nguvhu hi kota ya khombo. 3 O Jehovha, susa a wutomi* ga mina, hakuva a kufa i chukwana ka mina a ku hundza ku hanya.”+
4 Jehovha i no mu wutisa, aku: “Zvi nene ka wena a ku zangarisa lezvi ke?”
5 Jona i no huma lomu dhoropeni a ya tshama hi tlhelo ga mutsuwuka-gambo wa dhoropa. I no ti akela chacha seyo a tshama lomu ka ndzhuti kasi a wona ku zvini zvi nga wa ta humelela a dhoropa.+ 6 Andzhako ka lezvo, Jehovha Nungungulu i no milisa khungu* wu kula wuya hehla ka Jona, kasi wu maha ndzhuti hehla ka hloko yakwe wu tlhela wu mu tangalisa. Jona i no xalala nguvhu hi khungu lowo.
7 Kanilezvi ka siku gi nga landzela, na giya kuceni, a Nungungulu wa lisine i no rumela a pungwani wu yaga khungu, wu wuna. 8 Laha a gambo gi nga sangula ku tlhava, Nungungulu i no rumela moya wa kuhisa kambe wu ngata hi mutsuwuka-gambo, ni gambo gi no hisa a hloko ya Jona, ku kiyela kutsongwani kasi a titivala. I no simama ku kombela kufa,* a tina ku: “A kufa i chukwana ka mina a ku hundza ku hanya.”+
9 Nungungulu i no wutisa Jona, aku: “Zvi nene ka wena a ku zangarisa lezvi hi kota ya khungu ke?”+
Jona a hlamula, aku: “Ina, ndzi na ni cigelo ca ku zangara, ndzi zangara nguvhu laha ka kuza ndzi lava ni kufa.” 10 Kanilezvi Jehovha i te: “U tsetsa a khungu wa ku a wu wu tirelangi, ne a hi wena u nga wu kulisa; wu no ti kulela hi wusiku gin’we wu tlhela wufa hi wusiku gin’we. 11 Makunu mina ndzi wa nga faneli ku tsetsa a dhoropa ga hombe ga Ninivha,+ legi gi nga ni 120 000 wa vanhu ni ku hundza, lava va kalako va nga zvi tivi ku hambanisa zvazvinene ka zvakubiha,* a ku patsa ni zvihari zvabye zvo tala ke?”+
Zvi wulako ku: “Cipomba”.
Kutani: “paketi; navhiyo”.
Kutani: “khozelako”.
Kutani: “hi kota ya muhefemulo wa wanuna loyi!”
Hi kukongoma: “khwirini”.
Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
Kutani: “mabyandlati; mavimbi”.
Kutani: “ma ndzi talele kala ka muhefemulo wa mina”.
Kutani: “muhefemulo”.
Zvi nga maha na zvi wula ku: “va tsika kutsumbeka kabye”.
Hi kukongoma: “dhoropa ga hombe mahlweni ka Nungungulu”.
Kutani: “kujejuwara”.
Kutani: “a nga ta ti laya hi”.
Kutani: “i no ti laya hi”.
Kutani: “muhefemulo”.
Zvi nga maha na zvi wula ku: “hlafura”.
Kutani: “ku a muhefemulo wakwe wufa”.
Kutani: “a woko gabye ga cinene ka legi ga cibhabha”.