MITIRO YA VAPOSTOLI

1 Ka matimu yo ranga, wena Teofilo, ndzi tsalile xungetano hi zvontlhe lezvi Jesu a nga sangula ku maha ni ku gondzisa+ 2 kala ka siku legi a nga tekiwa aya tilweni,+ andzhako ka ku nyika zvileletelo hi moya wo basa ka vapostoli lava a nga va hlawulile.+ 3 Andzhako ka ku xaniseka, i no woneka kabye makhati yo tala kasi va kholwa lezvaku hakunene wa hanya.+ Va no mu wona hi 40 wa masiku, a wulawula hi Mufumo wa Nungungulu.+ 4 Na a ha tlhangene navo, i no va laya, aku: “Mu nga suki Jerusalema,+ kanilezvi tshamani mu rindzela lezvi Papayi a zvi tsumbisileko,+ lezvi mu zvi zwileko ka mina, 5 hakuva Johani, hakunene, i bhabhatisile hi mati, kanilezvi n’wina mu ta bhabhatiswa hi moya wo basa+ andzhako ka masiku ma tsongwani.”

6 Laha va nga tlhangene kambe, va no mu wutisa, vaku: “Hosi, u ta tlhelisela a mufumo ka Izrayeli ka cikhati leci ke?”+ 7 Aku kabye: “A zvi lumbi n’wina a ku tiva zvikhati kutani tinguva leti Papayi a ti yimisileko hi ntamu wakwe.*+ 8 Kanilezvi, mu ta nyikiwa ntamu a cikhati leci a moya wo basa wu tota hehla ka n’wina;+ niku mu tava vakustumunyu+ va mina Jerusalema,+ ni Judhiya gontlhe, ni Samariya,+ kala magemeta-musi ya misava.”+ 9 Andzhako ka ku wula timhaka leti, i no tlakuselwa tilweni na va kari va mu cuwukela, ni refu gi no mu fihla va nga ha mu woni.+ 10 Na va ha cuwukile hehla, yena na a kari a famba, hi citshuketi ku no ta yima vavanuna vambiri kusuhani navo na va bohile tinguwo to basa,+ 11 vaku: “Vavanuna va le Galileya, hikuyini mu yimileko laha mu cuwuka tilweni? Jesu loyi a nga tekiwa ka n’wina a tlakukela tilweni i ta wuyisa zvalezvi mu nga mu wonisa zvona na aya tilweni.”

12 Andzhako ka lezvo, va no tlhela Jerusalema+ na va suka hi Citsungeni ca maOlivha, ci nga kusuhani ni Jerusalema, ka pfhuka wa ku famba hi sabhadho. 13 Loku va chikele, va no kandziha vaya saleni ya le hehla, lomu va nga kari va tshama kona. Ku wa hi na Pedro zvin’we na Johani, na Jakobe, na Andrewu, na Filipu, na Tomasi, na Bhartolomewu, na Matewu, na Jakobe, a n’wana wa Alfewu, na Simoni a mupinyami, na Judhasi, a n’wana wa Jakobe.+ 14 Hi mbilu yin’we, vontlhe va no simama ku khongela zvin’we ni vavasati vo kari,+ na Mariya a mamani wa Jesu, ni vamakabye va Jesu.+

15 Ka masiku lawo, Pedro i no suka a yima cikari ka vamakabye, (lava va nga hi laho va wa hi cipimo ca 120 wa vanhu) aku: 16 “Vamakabye, zvi wa laveka lezvaku a mutsalo wu tatiseka, ku nga lezvi a moya wo basa wu zvi phrofetileko hi nomu wa Dhavhidha xungetano hi Judhasi,+ loyi a ngava murangeli wa lava va nga khoma Jesu.+ 17 Hakuva i wa hlayilwe zvin’we na hina,+ ava ni ciavelo ntirweni lowu. 18 (Hikwalaho, a wanuna loyi i no xava a simu hi muholo wa kungalulami,+ laha a ngawa hi hloko, a miri wakwe wu no pandzeka* a marumbu yakwe wontlhe ma kubuka.+ 19 A mhaka leyi yi no tiviwa hi vahanyi vontlhe va Jerusalema. Hikwalaho, a petso lowo wu no vitaniwa ku i Akeldhama hi lirimi labye, zvi wulako ku: “Petso wa Nkhata.”) 20 Hakuva bhukwini ga Tisimu ku tsalilwe lezvi: ‘A muti wakwe wu wa mahe rumbi, ku ngavi ni munhu a tshamako ka wona’,+ niku ‘a cikhundla cakwe ca kuwonelela ci wa tekiwe hi mun’wani.’+ 21 Hikwalaho, ka vavanuna lava va nga kari va fambafamba na hina contlhe cikhati leci Hosi Jesu a nga maha mitiro yakwe* cikari ka hina, 22 kusukela loku a bhabhatisilwe hi Johani+ kala ka siku legi a nga tekiwa cikari ka hina aya tilweni,+ ku laveka lezvaku a mun’we wabye ava kustumunyu zvin’we na hina wa kuvhuka kakwe.”+

23 Hikwalaho, va no hlawula vambiri, ku nga Josefa loyi a vitaniwako ku hi Bharsabha, a nga vitaniwa kambe ku hi Justusi, na Matiyasi. 24 Hi kulandzela, va no khongela, vaku: “O, Jehovha,* wena loyi u tivako a timbilu ta vontlhe,+ komba ku hi mani u mu hlawulileko cikari ka vavanuna lava va vambiri 25 lezvaku a amukela ntiro ni cikhundla ca wupostoli, lezvi Judhasi a zvi tsikileko aya wutshan’wini gakwe.”+ 26 Hikwalaho, va no va bela tihlolo,+ a hlolo yi khoma Matiyasi. Makunu i no hlayiwa* zvin’we ni vapostoli lava va 11.

2 Laha a siku ga Mubuzo wa Pentekosta+ gi nga kari gi famba, vontlhe va wa hi zvin’we ka wutshamu gin’we. 2 Hi citshuketi, ku no zwala kuvhumavhuma na kuta hi le tilweni, ko khwatsi i moya wa hombe wu bako hi ntamu, ku tata yindlu yontlhe leyi va nga tshamile ka yona.+ 3 Va no wona tirimi to fana ni ndzilo ti phakana cikari kabye, ku tshama lin’we hehla ka mun’we ni mun’wani. 4 Vontlhe va no tala hi moya wo basa,+ va sangula ku wulawula hi tirimi to tsalangana, kota lezvi a moya wu nga va nyika ku wulawula.+

5 Ka cikhati leco, a vaJudha vo chava Nungungulu va matiko wontlhe ya lahasi ka tilo va wa hi Jerusalema.+ 6 A cikhati leci ku nga zwala guwa lego, a citshungu ci no hlengeletana, ci jujeka kupima, hakuva a mun’we ni mun’wani wabye i no vazwa na va wulawula hi lirimi lakwe. 7 Kunene, va no hlamala nguvhu, vaku: “Kasi vontlhe lava va wulawulako a hi vaGalileya ke?+ 8 Makunu zvi mahisa kuyini ku a mun’we ni mun’wani wa hina azwa a lirimi lakwe la mabeleko? 9 Cikari ka hina ku na ni vaPartiya, ni vaMedhi,+ ni vaElami,+ ni vahanyi va Mezopotamia, ni va Judhiya, ni va Kapadhokiya, ni va Pontu, ni va provhinsia ya Azia,+ 10 ni va Frijia, ni va Panfiliya, ni va Gibhite, ni va matlhelweni ya Libhia kusuhani ni Kirene, ni vapfhumba va kuta hi Roma, a vaJudha ni vaprozelite,*+ 11 ni vaKreta, ni vaArabhiya — hontlheni ha vazwa na va wulawula hi tirimi ta hina xungetano hi mitiro ya ntamu ya Nungungulu.” 12 Kunene, vontlhe va no hlamala nguvhu va jujeka kupima, va wutisana, vaku: “Zvi wula yini lezvi ke?” 13 Kanilezvi a van’wani va no va poyila, vaku: “Va popilwe hi dosi ga vhinyo.”

14 Kanilezvi Pedro i no suka a yima ni lava va 11,+ a kanela hi gezu ga hombe, aku: “Vavanuna va Judhiya na n’wina vahanyi va Jerusalema, ngha mu tiva lezvi, mu ingisela khwatsi a timhaka ta mina. 15 A vanhu lava a va popiwangi, a ku khwatsi hi lezvi mu zvi alakanyako, hakuva ka ha hi hora ya wunharu ya siku.* 16 Kanilezvi, lezvi hi lezvi zvi wulilweko hi muphrofeti Joyeli, aku: 17 ‘“Masikwini yo gumesa”, ku wula Nungungulu, “ndzi ta chulula a moya wo kari wa mina hehla ka nyama ya tixaka tontlhe, niku a vafana va n’wina ni vanhanyana va n’wina va ta phrofeta, a majaha ya n’wina ma ta wona miwoniso, ni zvikhosana zva n’wina zvi ta lora miloro,+ 18 hambu hehla ka zvitiri zva mina zva cinuna ni zvitiri zva mina zva cisati ndzi ta chulula a moya wo kari wa mina masikwini lawo, niku zvi ta phrofeta.+ 19 Ndzi ta maha zvihlamaliso le hehla tilweni ni zviwoniso lahasi misaveni: a nkhata, ni ndzilo, ni marefu ya musi. 20 A gambo gi ta cica giva munyama, ni hweti yiva nkhata na gi nga se chikela a siku ga hombe ni go ngangamela ga Jehovha.* 21 Ni wihi loyi a khongelako vitweni ga Jehovha* i ta ponisiwa.”’+

22 “Vavanuna va Izrayeli, zwanani a magezu lawa: Jesu wa le Nazareta ive munhu a nga kombisiwa ka n’wina kubaseni hi Nungungulu hi mitiro ya ntamu ni zvihlamaliso ni zviwoniso lezvi Nungungulu a zvi mahileko ha yena cikari ka n’wina,+ a ku khwatsi hi lezvi mu zvi tivako. 23 A wanuna loyi, loyi a nyikelweko hi kurandza* ku yimisilweko ni lezvi Nungungulu a nga sina a zvi tiva,+ mu mu belele mhandzeni hi mandla ya zvitlula-milayo, mu mu daya.+ 24 Kanilezvi Nungungulu i no mu vhuxa+ hi ku mu tlhatlhisa ka kubayisa ka* kufa, hakuva zvi wa nga koteki lezvaku a bohiwa hi kona.+ 25 Hakuva Dhavhidha i wula lezvi hi yena: ‘Ndzi veka Jehovha* mahlweni ka mina contlhe cikhati, hakuva i reveni ga mina ga cinene kasi ndzi nga tshuki ndzi tsekatsekiswa. 26 Hi kota ya lezvo, a mbilu ya mina ya xalala, ni lirimi la mina la tsaka nguvhu. Ndzi* ta hanya kutsumbeni; 27 hakuva u nga ta ndzi tsika* Cilahleni,* ne u nga ta tsika a tsumbekileko wa wena a wona kubola.+ 28 U ndzi tivisile a tindlela ta wutomi; u ta tata mbilu ya mina hi litsako la hombe mahlweni ka wena.’+

29 “Vavanuna, vamakabye, ndzi tsikeni ndzi wulawula hi kutiya mahlweni ka n’wina xungetano hi kokwani Dhavhidha, lezvaku i file a tlhela a lahliwa,+ niku a cilahla cakwe ca hi kona cikari ka hina kala nyamutlha. 30 Kota lezvi a nga hi muphrofeti, na a zvi tiva lezvaku Nungungulu i wa hlambanyile ka yena lezvaku i wa ta tshamisa a mun’we wa pswalo wakwe* citshan’wini cakwe ca wuhosi,+ 31 i no ranga a zvi wona ni ku wulawula hi kuvhuka ka Kristu, lezvaku a nga tsikiwangi Cilahleni* ne a nyama yakwe a yi wonangi kubola.*+ 32 Jesu loyi, Nungungulu i no mu vhuxa niku hina hontlhe hi vakustumunyu va lezvo.+ 33 Hikwalaho, kota lezvi a nga tlakusiwa a vekiwa reveni ga cinene ga Nungungulu,+ a amukela hi ka Papayi a moya wo basa lowu wu nga tsumbisilwe,+ i no chulula lezvi mu zvi wonako ni ku zvizwa. 34 Hakuva Dhavhidha a nga tlakukelangi matilweni, kanilezvi yena wutsumbu i ngalo: ‘Jehovha* i te ngalo ka Hosi ya mina: “Tshama reveni ga mina ga cinene 35 kala ndzi veka valala va wena kota cikhegetelo ca mikondzo ya wena.”’+ 36 Hikwalaho, a yindlu yontlhe ya ka Izrayeli yi wa zvi tive lezvaku hakunene Nungungulu i mu mahile Hosi+ ni Kristu, Jesu yaloyi n’wina mu nga mu daya mhandzeni.”+

37 Makunu laha va ngazwa lezvo, va no karateka nguvhu timbilwini, va wutisa Pedro ni vapostoli lava van’wani, vaku: “Vavanuna, vamakabye, hi maha yini?” 38 Pedro aku kabye: “Ti soleni,+ a mun’we ni mun’wani wa n’wina a bhabhatiswa+ vitweni ga Jesu Kristu kasi mu tsetselelwa zviwonho zva n’wina,+ mu amukela a cinyikiwo ca mahala ca moya wo basa. 39 Hakuva a citsumbiso+ leci ca n’wina ni vana va n’wina, ni vontlhe lava va nga kule, zvin’we ni vontlhe lava Jehovha,* a Nungungulu wa hina, a to va vitana vata kakwe.”+ 40 Hi magezu man’wani yo tala, i no va nyika wukustumunyu go mbhelela ni ku simama ku va tlharihisa, aku: “Ti poniseni ka cizukulwana leci co gombonyeka.”+ 41 Lava va nga amukela a mhaka yakwe hi kutsaka va no bhabhatiswa.+ Ka siku lego, ku no engeteleka kabye a cipimo ca 3000 wa vanhu.*+ 42 Va no simama ku ti tsitsirita kugondziseni ka vapostoli, ni ku tlhangana zvin’we,* ni kuga zvin’we,+ ni ku khongela.+

43 Kunene, vontlhe va no tala hi kuchava, ku sangula ku woneka zvihlamaliso ni zviwoniso zvo tala na zvi mahiwa hi vapostoli.+ 44 Vontlhe lava va nga kholwile va wa hi zvin’we va hlengela zvilo zvabye zvontlhe; 45 va wa xavisa zvilo zvabye+ ni mipetso, va avela mali ya kona ka vontlhe hi kuya hi kuvhumala ka mun’we ni mun’wani.+ 46 Va wa hi tempeleni contlhe cikhati, siku ni siku, na va hi ni kungo gin’we, va gelana zvakuga mitini yabye, ni ku avelana zvakuga zvabye na va tsakile nguvhu ni kuzvirandza kambe, 47 va dhumisa Nungungulu ni ku tsakelwa hi vanhu vontlhe. Ka cikhati caleco ca cin’we, Jehovha* i wa simama ku va engetelela siku ni siku lava va nga kari va ponisiwa.+

3 Pedro na Johani va wa kari va kandziha kuya tempeleni ka hora ya mukhongelo, yi nga hora ya wu 9.* 2 Ku wa rwalilwe wanuna a nga pswalilwe na a hi cilima loyi wontlhe masiku a nga vekiwa kusuhani ni nyangwa ya tempeli, leyi yi nga vitaniwa ku i Nyangwa yo Saseka, kasi a kombela zomola ka lava va nga nghena tempeleni. 3 Laha a nga wona Pedro na Johani na va kari va nghena tempeleni, i no va kombela zomola. 4 Kanilezvi Pedro na Johani va no mu cuwukisisa, Pedro aku: “Hi cuwuke.” 5 Hikwalaho, i no va cuwuka na a alakanya ku va ta mu nyika cokari. 6 Kanilezvi Pedro i te ngalo: “A ndzi na prata ne ouro, kanilezvi ndza ku nyika lezvi ndzi nga nazvo. Hi vito ga Jesu Kristu wa le Nazareta, suka u famba!”+ 7 Loku a wulile lezvo, i no mu khoma hi canja gakwe ga cinene a mu yimisa.+ Zvalezvo a mikondzo ni minenge yakwe zvi no tiya.+ 8 I no tlula a yima hi mikondzo+ a sangula ku famba, a nghena navo lomu tempeleni, a fambafamba ni ku tlulatlula na a dhumisa Nungungulu. 9 A vanhu vontlhe va no mu wona na a fambafamba ni ku dhumisa Nungungulu. 10 Laha va nga mu tiva lezvaku hi yena wanuna loyi a nga tshama laha Nyangweni yo Saseka ya tempeli+ a kombela zomola, va no hlamala nguvhu va vhumala ni co wula hi ku wona lezvi zvi nga mu mahekela.

11 A wanuna loyi na a ha khomile Pedro na Johani, a vanhu vontlhe va no tsutsumela kabye, vaya laha ku nga vitaniwa ku Ligumbagumba la Solomoni,+ na va hlamala nguvhu. 12 Laha Pedro a nga wona lezvo, i no byela vanhu, aku: “Vavanuna va ka Izrayeli, hikuyini mu hlamalako nguvhu hi lezvi? Hikuyini mu hi cuwukisisako ku khwatsi hi no mu maha a famba hi ntamu wa hina kutani hi kukhozela ka hina Nungungulu ke? 13 A Nungungulu wa Abrahama, ni wa Isaka, ni wa Jakobe,+ ni Nungungulu wa vakokwani va hina, i dhumisile Jesu,+ a Nandza gakwe,+ loyi n’wina mu nga mu nyikela+ ni ku mu ala mahlweni ka Pilatu hambu lezvi a nga lava ku mu tlhatlha. 14 Mu alile a munhu loyi wo basa ni wo lulama, mu kombela ku tlhatlhelwa wanuna loyi a nga hi mudayi,+ 15 mu daya a Hosana ya Hombe ya wutomi.+ Kanilezvi Nungungulu i no mu vhuxa hi ka vafileko; hina hi vakustumunyu va mhaka leyi.+ 16 Niku kuve hi vito gakwe, ni kukholwa ka hina vitweni gakwe, a wanuna loyi mu mu wonako ni ku mu tiva a nga tiya. Lezvi hi kholwako kakwe, a minenge ya wanuna loyi yi no tiyiswa mahlweni ka n’wina n’wentlhe. 17 Makunu vamakabye, ndza zvi tiva lezvaku mu zvi mahile hi kungativi,+ a ku khwatsi hi lezvi a tihosi ta n’wina ti nga mahawu.+ 18 Kanilezvi Nungungulu i no tatisa lezvi a nga sina a zvi wulile hi nomu wa vaphrofeti vontlhe, zvaku: Kristu wakwe i wa ta xaniseka.+

19 “Hikwalaho, ti soleni,+ mu hundzuluka+ kasi a zviwonho zva n’wina zvi fela ku vhinyetelwa,+ kasi Jehovha* a mu nyika zvikhati zva kuhumula,* 20 ni ku rumela Kristu loyi a yimiselweko n’wina, a nga Jesu, 21 loyi a tilo gi faneleko ku mu hlayisa ndzeni ka gona kala zvikhatini zva kutlheliselwa ka zvilo zvontlhe, lezvi Nungungulu a wulileko hi nomu wa vaphrofeti vakwe vo basa va kaleloko. 22 Kunene, Mosi i te ngalo: ‘Jehovha,* a Nungungulu wa n’wina, i ta mu yimisela muphrofeti wa ku fana na mina hi cikari ka vamakabye va n’wina.+ Ingisani ni cihi a to mu byela.+ 23 Kunene, ni wihi munhu* a nga ingisiko a Muphrofeti loye i ta lovisiwa hi kumbhelela cikari ka vanhu.’+ 24 A vaphrofeti vontlhe lava va nga wulawula kusukela ka Samuweli zviya mahlweni, vonawu va ma huwelele zviku dlunya a masiku lawa.+ 25 N’wina mu vana va vaphrofeti ni va civhumelwano leci Nungungulu a nga maha ni vakokwani va n’wina,+ a byela Abrahama, aku: ‘A mingango yontlhe ya laha misaveni yi ta katekiswa hi laha ka pswalo* wa wena.’+ 26 Andzhako ka loku Nungungulu a yimisile Nandza gakwe, i no gi rumela ka n’wina kuranga+ kasi ku ta mu katekisa hi ku hundzulusa a mun’we ni mun’wani wa n’wina mitirweni yakwe ya kubiha.”

4 Laha lava va vambiri va nga ha wulawula ni vanhu, a vapristi, ni hosana ya varindzeli va tempeli, ni vaSadhusi+ va nota kabye. 2 Va wa swirekile hi lezvi a vapostoli va nga kari va gondzisa vanhu ni ku kanela kubaseni hi kuvhuka ka Jesu hi ka vafileko.*+ 3 Hikwalaho, va no va khoma va va vhalela paxweni+ kala mandziko wa kona hakuva gi wa phumile. 4 Hambulezvo, a kutala ka lava va nga zwile a kanelo va no kholwa; a ntsengo wa vavanuna wu nova cipimo ca 5000.+

5 Hi mandziko wa kona, a vafumeli vabye, ni madhota, ni vatsali va no hlengeletana Jerusalema, 6 zvin’we na Anasi,+ a nga hi hosana ya vapristi, na Kayafasi,+ na Johani, na Alexandro, ni vontlhe lava va nga hi maxaka ya hosana ya vapristi. 7 Va no yimisa Pedro na Johani cikari kabye, va sangula ku va xuxisa, vaku: “I ntamu muni kutani i vito ga mani mu mahileko hi gona a zvilo lezvi ke?” 8 Makunu Pedro, na a tele hi moya wo basa,+ i te ngalo kabye:

“N’wina vafumeli va vanhu na n’wina madhota, 9 loku nyamutlha hi xuxisiwa hi kota ya ntiro wa wunene wu mahelweko a wanuna loyi a nga hi cilima,+ na mu lava ku tiva loyi a nga hanyisa wanuna loyi, 10 zvi tiveni n’wina n’wentlhe ni vanhu vontlhe va ka Izrayeli lezvaku kuve hi vito ga Jesu Kristu wa le Nazareta,+ loyi n’wina mu nga mu daya mhandzeni,+ kanilezvi Nungungulu a mu vhuxa hi ka vafileko,+ ina, hi kota ya yena a wanuna loyi i yimile laha mahlweni ka n’wina na a hanya khwatsi. 11 Hi yena a nga ‘ribye legi n’wina vaaki mu nga kala ku chela kota hi gona, legi gi ngava ribye ga laha khoneni ga lisima ka wontlhe.’*+ 12 Ahandle ka lezvo, a ku na kuhanyiswa hi ka mun’wani munhu, hakuva a ku na gin’wani vito+ lahasi ka tilo gi nga nyikwa vanhu legi hi nga hanyiswako hi gona.”+

13 Laha va nga wona a kutiya ka Pedro na Johani, na va tiva lezvaku a va gondzangi* niku vanhu va nyalidede,*+ va no hlamala. Makunu va no zvi pola lezvaku va wa hanyile zvin’we na Jesu.+ 14 Lezvi va nga kari va wona a wanuna loyi a nga hanyisilwe na a yimile navo,+ a va ci kumangi ni co wula.+ 15 Hikwalaho, va no va laya lezvaku va huma lomu saleni ya Tribhunali ya Hombe, va sangula ku wutisana, 16 vaku: “Hi ta maha yini hi vavanuna lava?+ Hakuva va mahile ciwoniso ca hombe ci nga woniwa hi vahanyi vontlhe va Jerusalema+ niku a hi na ku ci kaneta. 17 Kasi a mhaka leyi yi nga ha hangalaki cikari ka vanhu, a hi va dzukiseleni, hi va byela lezvaku va nga ha wulawuli kambe ni munhu hi vito legi.”+

18 Hikwalaho, va no va vitana va ta va laya lezvaku va nga wuli nchumu ne ku gondzisa hi vito ga Jesu. 19 Kanilezvi Pedro na Johani va no va hlamula, vaku: “Lamulani hi n’wece loku zvi lulamile ka Nungungulu a ku ingisa n’wina a ku hundza ku ingisa Nungungulu. 20 Kanilezvi hina, hi nga ta tsika ku wulawula hi zvilo lezvi hi zvi wonileko ni ku zvizwa.”+ 21 Hikwalaho, andzhako ka loku va va dzukisele kambe, va no va tlhatlha hi lezvi va nga vhumala cigelo ca ku va tsayisa hi cona ni hi kota ya vanhu,+ hakuva vontlhe va wa dhumisa Nungungulu hi kota ya lezvi zvi nga mahekile. 22 Hakuva a wanuna loyi a nga hanyisilwe hi cihlamaliso* i wa hi ni 40 wa malembe ni ku hundza.

23 Andzhako ka loku va tlhatlhilwe, va no tlhela ka vapizani lava van’wani* va ya hlawutela lezvi a vapristi lava va tihosana ni madhota va nga va byelile. 24 Laha va ngazwa lezvo, va no tlakusa magezu yabye ka Nungungulu hi mbilu yin’we, vaku:

“Hosi ya Hombe, hi wena Loyi u nga maha tilo ni misava ni bimbi ni zvontlhe lezvi zvi nga ka zvona,+ 25 niku hi wena u nga wula hi moya wo basa hi nomu wa kokwani wa hina Dhavhidha,+ a nandza ga wena, uku: ‘Hikuyini a matiko ma mahako gujeguje,* ni mifumo yi pimisako zvilo zvi nga vhuniko nchumu ke? 26 A tihosi ta misava ti sukile ti yima, ni vafumeli va bohene va vhukela Jehovha* ni a totilweko* wakwe.’+ 27 Kunene, Herodhi na Pontiyu Pilatu+ va wa tlhangene ni vavanuna va matiko ni vanhu va ka Izrayeli dhoropeni legi kasi ku vhukela Jesu, a nandza ga wena gi basileko, loyi u mu totileko,+ 28 kasi ku maha leci a canja ga wena ni kurandza* ka wena zvi nga sina zvi ci yimisile kasi ci maheka.+ 29 Makunu Jehovha,* chela kota hi kudzukisela kabye, u vhuna a malandza ya wena a ku simama ma kanela a mhaka ya wena hi kutiya kontlhe, 30 na u nawuluta a canja ga wena kasi ku hanyisa, na ku maheka zviwoniso ni zvihlamaliso+ hi vito ga Jesu, a nandza ga wena gi basileko.”+

31 Andzhako ka loku va khongele hi kutikisa, a wutshamu legi va nga hi ka gona gi no tsekatseka, vontlhe va tala hi moya wo basa+ va sangula ku kanela mhaka ya Nungungulu hi kutiya.+

32 Ahandle ka lezvo, a citshungu ca lava va nga kholwa ci no bohana hi mbilu yin’we ni muhefemulo* wun’we. I hava ni mun’we cikari kabye a nga wula lezvaku lezvi a nga nazvo zva yena yece, kanilezvi va wa hlengela zvilo zvontlhe.+ 33 A vapostoli va no simama ku kustumunya hi ntamu wa hombe hi kuvhuka ka Hosi Jesu;+ ni tipswalo ta Nungungulu ti wa tele nguvhu hehla ka vona vontlhe. 34 Kunene, i hava a nga vhumala nchumu,+ hakuva vontlhe lava va nga hi ni mipetso kutani tiyindlu va wo xavisa va tisa mali ya lezvi va nga xavisile 35 va ta yi veka mikondzweni ya vapostoli.+ Andzhako ka lezvo va wa avela a mali leyo ka mun’we ni mun’wani hi kuya hi kuvhumala kakwe.+ 36 Makunu Josefa, loyi a vapostoli va nga mu vitana kambe ku hi Bharnabhasi+ (lezvi loku zvi hundzuluselwa zvi wulako ku: “N’wana wa Kuchavelela”), a muLevhi, a pswalelweko Kupero, 37 i wa hi ni petso. I no wu xavisa a tisa mali ya kona a ta yi veka mikondzweni ya vapostoli.+

5 Kanilezvi, a wanuna wo kari a vitaniwako ku hi Ananiyasi, ni sati wakwe Safira, i no xavisa petso. 2 Hambulezvo, i no pambula mali yo kari a fihla na zvi tiviwa hi sati wakwe, a tisa ntsena a cipandze ca mali leyo a ta yi veka mikondzweni ya vapostoli.+ 3 Kanilezvi Pedro i te ngalo kakwe: “Ananiyasi, hikuyini u tsikileko Sathani a ku kucetela, u tiya u hembela+ moya wo basa,+ u pambula a mali ya petso u fihla? 4 Kasi a petso lowo wu wa nga hi wa wena na u nga se wu xavisa ke? Andzhako ka loku wu xavisilwe, a mali ya kona yi wa nga hi ya wena ke? Hikuyini u lukileko mano mbilwini ya wena ya ku maha lezvi? U hembele Nungungulu, a wu hembelangi vanhu.” 5 Laha a ngazwa magezu lawo, Ananiyasi i nowa, afa. Vontlhe lava va nga zvizwa va no chava nguvhu. 6 Ku no suka majaha ma mu phutsela ka tinguwo, ma huma naye ma ya mu lahla.

7 Loku ku hundzile cipimo ca tihora tinharu, a sati wakwe i no nghena na a nga zvi tivi lezvi zvi nga mahekile. 8 Pedro aku kakwe: “Hi nga ndzi byela, hi yona yontlhe a mali leyi n’wina va vambiri mu nga xavisa hi yona a petso?” Safira aku: “Ina, hi yona yontlhe.” 9 Pedro aku kakwe: “Hikuyini n’wina va vambiri mu vhumeleneko a ku ringa moya wa Jehovha* ke? Lava va nga lahla nuna wa wena va laha nyangweni. Wenawu va ta ku rwala va huma na wena.” 10 Zvalezvo, Safira i nowa mikondzweni ya Pedro, afa. A cikhati leci a majaha ma nga nghena, ma no ta mu kuma na a file, ma se mu rwala ma ya mu lahla tlhelweni ga nuna wakwe. 11 Hikwalaho, a bandla gontlhe ni vontlhe lava va nga zvizwa va no chava nguvhu.

12 Ahandle ka lezvo, a vapostoli va no simama ku maha zviwoniso ni zvihlamaliso zvo tala cikari ka vanhu;+ niku vontlhe va wa tlhangana Ligumbagumbeni la Solomoni.+ 13 Kunene, ku wa nga hi na mun’wani munhu a nga tiya ku ti patsa navo; hambulezvo a vanhu va wa va dzundza. 14 Ahandle ka lezvo, lava va nga kholwa ka Hosi va no simama ku engeteleka, a ntsengo wa hombe wa vavanuna ni wa vavasati.+ 15 Va waza va tisa a vababyi maruweni ya hombe va ta va lata masangweni kasi loku Pedro a hundza hi laho a ndzhuti wakwe wu fela kuva hehla ka vokari.+ 16 Ku wa simama kuta zvitshungu kambe hi ka madhoropa ya laha kusuhani ni Jerusalema na zvi rwele lava va nga babya ni lava va nga hi ni mimoya ya kubiha, va ta hanyiswa vontlhe.

17 Kanilezvi a mupristi wa hombe ni vontlhe lava a nga hi navo, va nga hi valandzeli va tigondzo ta vaSadhusi, va no suka va yima na va tele hi ciluse, 18 va khoma vapostoli va va vhalela paxweni.+ 19 Kanilezvi cikari ka wusiku, a ngilozi ya Jehovha* yi no vhulula a tivati ta paxo+ yi va humesa lahandle, yiku: 20 “Fambani mu ya yima tempeleni, mu simama ku byela vanhu a timhaka tontlhe ta wutomi legi.” 21 Andzhako ka kuzwa lezvo, va no nghena tempeleni ni mixo va sangula ku gondzisa.

Makunu laha a mupristi wa hombe ni lava a nga hi navo va nga chikela, va no tlhanganisa a Tribhunali ya Hombe ni hubye yontlhe ya madhota ya vana va ka Izrayeli, va rumela gezu paxweni ga lezvaku a vapostoli va tisiwa mahlweni kabye. 22 Kanilezvi a cikhati leci a varindzeli va nga chikela, a va va kumangi lomu paxweni. Hikwalaho, va no wuya va ta bika, 23 vaku: “Hi kumile paxo na gi khotsilwe khwatsi, a varindzeli na va yimile tinyangweni, kanilezvi laha hi nga vhulula a hi kumangi munhu.” 24 A cikhati leci a hosana ya varindzeli va tempeli ni vapristi lava va tihosana va ngazwa a magezu lawo, va no jujeka kupima, va ti wutisa ku zvini zvi nga wa ta maheka hi kulandzela. 25 Kanilezvi ku nota wokari, a taku: “A vavanuna lava mu nga va vhalele paxweni va lomu tempeleni va gondzisa vanhu.” 26 A hosana ya varindzeli yi no suka ni varindzeli va yona va ya va teka, kanilezvi na va nga va holovisi, hakuva va wa chava ku gandliwa hi maribye hi vanhu.+

27 Hikwalaho, va no wuya navo va ta va yimisa mahlweni ka Tribhunali ya Hombe. A mupristi wa hombe i no va xuxisa, 28 aku: “Hi mu layile nguvhu lezvaku mu nga ha gondzisi hi vito legi,+ hambulezvo mu tatile Jerusalema hi gondzo ya n’wina niku mu bhejile ku neha nkhata wa wanuna loyi hehla ka hina.”+ 29 Pedro ni vapostoli lava van’wani va no hlamula, vaku: “Hi fanele ku ingisa Nungungulu kota hosi a ku hundza ku ingisa vanhu.+ 30 A Nungungulu wa vakokwani va hina i vhuxile Jesu, loyi n’wina mu nga mu daya, mu mu hayeka mhandzeni.*+ 31 Hi yaloyi Nungungulu a nga mu tlakusa kota Hosana ya Hombe+ ni Muhanyisi+ reveni gakwe ga cinene,+ kasi Izrayeli a ti sola, a tsetselelwa zviwonho zvakwe.+ 32 Hina hi vakustumunyu va timhaka leti,+ ni moya wo basa wonawu,+ lowu Nungungulu a nyikako lava va mu ingisako kota hosi.”

33 A cikhati leci va ngazwa lezvo va no zangara,* va lava ku va daya. 34 Kanilezvi, a muFarisi a vitaniwako ku hi Gamaliyeli,+ a mugondzisi wa Nayo, a nga dzundziwa hi vanhu vontlhe, i no suka a yima lomu Tribhunali ya Hombe, a laya lezvaku a vapostoli va humesiwa lahandle zva cikhatana. 35 Andzhako ka lezvo, i te ngalo kabye: “Vavanuna va ka Izrayeli, ti woneleni ka lezvi mu lavako ku maha ka vavanuna lava. 36 Hi cikombiso, masikwini ma hundzileko, ku humelele Tewudhasi, a ti wula ku hi manyani, niku a cipimo ca 400 wa vavanuna va no ti patsa naye. Kanilezvi i no dawa; vontlhe lava va nga kari va mu landzela va no hangalaka va mbhela. 37 Andzhako kakwe, ku no humelela Judhasi wa le Galileya masikwini ya citsalela, a kucetela vanhu lezvaku va mu landzela. A wanuna loye yenawu i lovile, ni vontlhe lava va nga kari va mu landzela va hangalakile. 38 Hikwalaho, hi kuya hi lezvi a zvilo zvi nga tshamisa zvona zvezvi, ndza mu byela, ndziku: Mu nga juwungeli a vavanuna lava, va tsikeni. Hakuva loku a kungo legi kutani ntiro lowu wu hi wa vanhu, wu ta fuviswa; 39 kanilezvi loku wu hi wa Nungungulu, mu nga ta zvi kota ku va lovisa.+ Loku mu va vhukela, mu ta tshuka mu kumiwa na mu kari mulwa na Nungungulu.”+ 40 Hikwalaho, va no ingisa a wusungukati gakwe, va vitana vapostoli va ta va kwapa,*+ va va laya lezvaku va nga ha wulawuli hi vito ga Jesu, va gumesa va va tsika va famba.

41 Hikwalaho, va no huma hi lomu Tribhunali ya Hombe na va tsakile+ hi lezvi va hlayelweko lava va faneleko a ku xaniseka hi kota ya vito gakwe. 42 Wontlhe masiku, lomu tempeleni ni hi muti ni muti,+ va no simama va nga tsiki ku gondzisa ni ku kanela a mahungu ya manene xungetano hi Kristu Jesu.+

6 Masikwini lawo, laha a vapizani va nga kari va engeteleka, a vaJudha lava vo wulawula ciGreki va no sangula ku khala ka vaJudha lava vo wulawula ciHebheru, hakuva a tinoni* tabye ti wa tsoniwa zvakuga lezvi zvi nga avelwa siku ni siku.+ 2 Hikwalaho, lava va 12 va no tsombanisa a citshungu ca vapizani, va taku: “A zvi faneli* a ku hina hi tsika ku gondzisa a mhaka ya Nungungulu hi avela zvakuga timezeni.+ 3 Hikwalaho, vamakabye, hlawulani a 7 wa vavanuna vo tsumbeka*+ cikari ka n’wina, va teleko hi moya ni wutlhari,+ kasi hi va yimisa lezvaku va maha ntiro lowu;+ 4 kanilezvi hina hi ta simama ku ti tsitsirita kukhongeleni ni ntirweni wa ku gondzisa a mhaka.” 5 Lezvi va nga wula zvi no tsakisa citshungu contlhe, va se hlawula Stefani, a wanuna wo tala hi kukholwa ni moya wo basa, na Filipu,+ na Prokoro, na Nikanori, na Timoni, na Permenasi, na Nikolasi, a muprozelite* wa le Antiyokiya, 6 va va neha ka vapostoli. Andzhako ka ku khongela, va no va tlhateka mandla.+

7 Hikwalaho, a mhaka ya Nungungulu yi no simama ku hangalaka,+ a ntsengo wa vapizani wu simama ku andza nguvhu+ Jerusalema; ni citshungu ca hombe ca vapristi ci no kholwa.+

8 Makunu Stefani, na a tele hi tipswalo ta Nungungulu ni ntamu, i no maha zvihlamaliso ni zviwoniso zva hombe cikari ka vanhu. 9 Kanilezvi ku nota vavanuna vo kari va le sinagogeni gi vitaniwako ku i Sinagoga ga Vatlhatlhisilweko, zvin’we ni vokari va le Kirene ni Alekzandriya, ni van’wani va le Kilikiya ni Azia, kasi ku ta kanetisana na Stefani. 10 Kanilezvi a va zvi kotangi a ku kaneta wutlhari ni moya lowu a nga wulawula hi wona.+ 11 Va no xengetela vanhu cihundleni kasi vaku: “Hi mu zwile na a wulawula tihlamba hi Mosi na Nungungulu.” 12 Va no kucetela vanhu, ni madhota, ni vatsali. Loku va chikele kakwe hi citshuketi, va no mu khoma hi kani va famba naye Tribhunali ya Hombe. 13 Va no neha vakustumunyu va mawunwa, va taku: “A wanuna loyi a nga tsiki ku wulawula a timhaka to vhukela a wutshamu legi go basa ni Nayo. 14 Hi mu zwile na a ku Jesu loyi wa le Nazareta i ta hahlula wutshamu legi, a cica mikhuwo leyi Mosi a hi nyikileko.”

15 Laha vontlhe lava va nga tshamile lomu Tribhunali ya Hombe va nga mu cuwukisisa, va no wona lezvaku a nghohe yakwe yi wa ku khwatsi i nghohe ya ngilozi.

7 Kanilezvi a mupristi wa hombe i no wutisa, aku: “A zvilo lezvi lisine ke?” 2 Stefani i no hlamula, aku: “Vavanuna, n’wina vamakabye, na n’wina vapapayi, ndzi ingiseleni. A Nungungulu wa kungangamela i no woneka ka kokwani wa hina Abrahama na a ha hi Mezopotamia, na a nga se ya tshama Harani,+ 3 aku kakwe: ‘Suka tikweni ga wena ni maxakeni ya wena, uya ka tiko legi ndzi to ku komba.’+ 4 I no suka tikweni ga vaKaldheya a ya tshama Harani. Andzhako ka loku a papayi wakwe a file laho,+ Nungungulu i no mu rurisa, a mu tisa tikweni legi n’wina mu hanyako ka gona nyamutlha.+ 5 Hambulezvo, a nga mu nyikangi tshomba ka gona, ne hambu ka ku veka kona nkondzo; kanilezvi i no mu tsumbisa ku mu nyika gona giva gakwe ni ga pswalo* wakwe andzhako kakwe,+ hambu lezvi a nga kala a nga seva ni n’wana. 6 Nungungulu i no engeta a mu byela lezvaku a pswalo* wakwe wu wa tava valuveli tikweni gi nga hiko gabye niku a vanhu va wa ta va maha tikhumbi va tlhela va va xanisa a 400 wa malembe.+ 7 ‘Ni tiko legi gi to va maha tikhumbi ndzi ta gi lamula’,+ ku wula Nungungulu, ‘niku andzhako ka zvilo lezvi va ta huma va ta ndzi tirela ka wutshamu legi’.+

8 “I no tlhela a maha naye civhumelwano ca wukwera.*+ Andzhako ka lezvo, Abrahama i no pswala Isaka,+ a mu mahisa wukwera hi siku ga wu 8.+ Isaka i no pswala* Jakobe, Jakobe a pswala 12 wa vana lava va nga maha 12 wa tixaka.* 9 A vana va Jakobe va no lusela Josefa,+ va mu xavisa aya Gibhite.+ Kanilezvi Nungungulu i wa hi zvin’we naye,+ 10 a mu tlhatlhisa kuxanisekeni kakwe kontlhe, a mu nyika thomo ni wutlhari mahlweni ka Faro, a hosi ya Gibhite. Makunu Faro i no mu yimisa a kuva mufumeli wa Gibhite ni yindlu yakwe yontlhe.+ 11 Kanilezvi ku no humelela ndlala tikweni gontlhe ga Gibhite ni ga Khanani, kuva ni kuxaniseka ka hombe, a vakokwani va hina va vhumala ni ca kuga.+ 12 Kanilezvi laha Jakobe a ngazwa lezvaku ku na ni zvakuga le Gibhite, i no rumela vakokwani va hina hi khati go sangula.+ 13 Ka khati ga wumbiri, Josefa i no ti tivekisa ka vamakabye vakwe, na Faro i no tiva a ngango wa Josefa.+ 14 Hikwalaho, Josefa i no rumela mahungu ya ku vitanisa Jakobe, a papayi wakwe, ni wontlhe maxaka yakwe hi ka wutshamu lego;+ vontlhe va wa hi 75 wa vanhu.*+ 15 Makunu Jakobe i no relela aya Gibhite,+ lomu a nga ya fela kona,+ yena ni vakokwani va hina.+ 16 Va no rwaliwa vaya Xekemi, va ya lahliwa cilahleni leci Abrahama a nga xava hi mali ya prata ka vana va Hamori le Xekemi.+

17 “Kota lezvi ci nga tshinela a cikhati ca ku tatisa a citsumbiso leci Nungungulu a nga tivisile Abrahama, a vanhu va no andza ni ku pswalelana le Gibhite, 18 kala ku huma yin’wani hosi Gibhite, leyi yi nga kala yi nga tivi nchumu hi Josefa.+ 19 A hosi leyo yi no khoma a vanhu va lixaka la hina hi mano, yi xanisa vapapayi va hina, yi va kurumeta a ku tsika tinyamani* tabye kasi ti nga ha simami ti hanya.+ 20 Cikhatini leco, ku no pswaliwa Mosi na a sasekile nguvhu.* I no wundliwa tihweti tinharu mutini wa papayi wakwe.+ 21 Kanilezvi laha a nga tsikiwa,*+ a nhanyana wa Faro i no mu teka a mu wundla kota n’wana wakwe.+ 22 Hikwalaho, Mosi i no gondzisiwa a wutlhari gontlhe ga vaGibhite. Kunene, i wa hi ni ntamu kuwulawuleni kakwe ni mitirweni yakwe.+

23 “Makunu laha a nga hi ni 40 wa malembe, i no xuva mbilwini yakwe* a ku endzela* vamakabye vakwe, a vanana va ka Izrayeli.+ 24 A cikhati leci a nga wona a mun’we wabye na a xanisiwa, i no mu vhikela a photela loyi a nga kari a xanisiwa, a daya muGibhite. 25 I wa alakanya ku a vamakabye vakwe va ta zvi pola lezvaku Nungungulu o va tlhatlhisa hi canja gakwe, kanilezvi a va zvi polangi. 26 Hi mandziko wa kona, i noya kabye na va kari valwa, a zama ku va lamula, aku: ‘Hevasa, n’wina mu vamakabye. Hikuyini mu xanisanako?’ 27 Kanilezvi loyi a nga kari a xanisa muakelani wakwe i no nikinya Mosi, aku: ‘Himani a nga ku yimisa a kuva mufumeli ni mulamuli hehla ka hina? 28 U lava ku ndzi daya, a ku khwatsi hi lezvi a tolo u nga daya muGibhite, a hi zvona ke?’ 29 Laha Mosi a ngazwa lezvo, i no tsutsuma a ya hanya kota muluveli tikweni ga Midhiyani, laha a nga pswala kona vafana vambiri.+

30 “Andzhako ka 40 wa malembe, a ngilozi yi no woneka kakwe ciwuleni ca Citsunga ca Sinayi lomu ka langavi ga ndzilo khuhweni ga mimizwa gi nga kari gi vhura.+ 31 Laha Mosi a nga zvi wona, i no hlamala. Kanilezvi, a cikhati leci a nga kari a tshinela kasi a zvi wona khwatsi, ku no zwala a gezu ga Jehovha,* giku: 32 ‘Hi mina Nungungulu wa vakokwani va wena, a Nungungulu wa Abrahama, ni wa Isaka, ni wa Jakobe.’+ Mosi i no sangula ku rurumela, a nga ha kumi hlanha wa ku zvi cuwuka kambe. 33 Jehovha* aku kakwe: ‘Tlhatlha masandalia mikondzweni ya wena, hakuva a wutshamu legi u yimileko ka gona wutshamu go basa. 34 Hakunene ndzi wonile a kuxaniseka ka vanhu va mina lava va nga le Gibhite, niku ndzi zwile a kuketa kabye,+ hikwalaho ndzi no relela kasi ndzi ta va tlhatlhisa. Makunu tana ndzi ta ku ruma uya Gibhite.’ 35 Mosi loyi va nga mu ala, vaku: ‘Himani a nga ku yimisa a kuva mufumeli ni mulamuli?’,+ hi yaloyi Nungungulu a mu rumeleko+ kota hosi ni mutlhatlhisi hi ku tirisa ngilozi leyi yi nga woneka kakwe khuhweni ga mimizwa. 36 A wanuna loyi hi yena a nga va humesa,+ a maha zvihlamaliso ni zviwoniso le Gibhite,+ ni le Bimbini go Pswhuka+ ni le ciwuleni a 40 wa malembe.+

37 “Mosi loyi, hi yaloyi a nga byela vanana va ka Izrayeli, aku: ‘Nungungulu i ta mu yimisela muphrofeti wa ku fana na mina hi cikari ka vamakabye va n’wina.’+ 38 Hi yaloyi a nga hi cikari ka bandla le ciwuleni na a hi zvin’we ni ngilozi+ leyi yi nga wulawula naye+ Citsungeni ca Sinayi, zvin’we ni vakokwani va hina. Hi yena a nga amukela a timhaka ta kuhanya ni to basa, a hi nyika.+ 39 Kanilezvi a vakokwani va hina va no ala ku mu ingisa, va mu fularela+ ni ku xuva timbilwini tabye a ku tlhela Gibhite,+ 40 vaku ka Aroni: ‘Hi mahele a vanungungulu va fela ku hi rangela. Hakuva a hi zvi tivi ku zvini zvi humeleleko inaloyi Mosi, loyi a hi humesileko tikweni ga Gibhite.’+ 41 Hikwalaho, va no maha role masikwini lawo, va tisa muphahlo ka cifananiso va sangula ku tsakela mitiro ya mandla yabye.+ 42 Hikwalaho, Nungungulu i no tsawukana navo a va nyikela lezvaku va khozela butho ga tilo,+ kota lezvi zvi tsalilweko bhukwini ga Vaphrofeti, zvaku: ‘Kasi kova mina mu nga ndzi mahela minyikelo ni miphahlo ka 40 wa malembe ciwuleni ke, n’wina va yindlu ya ka Izrayeli? 43 A mu mahelangi mina. Kanilezvi mu no tlakusa tenda ga Moloki+ ni nyeleti ya nungungulu Refani, ku nga zvifananiso lezvi mu zvi mahileko kasi ku zvi khozela. Hikwalaho, ndzi ta mu yisa kule ko hundza Bhabhuloni.’+

44 “A vakokwani va hina va wa hi ni tenda ga wukustumunyu le ciwuleni, kota lezvi Nungungulu a nga leletele Mosi a cikhati leci a nga mu byela lezvaku i fanele ku gi maha, na a landzela a mufananiso lowu a nga wu wonile.+ 45 Makunu a vakokwani va hina va no gi amukela ka vapapayi vabye, va gi neha na va hi na Joxuwa va nghena nago tikweni legi gi nga lumba vamatiko,+ lava Nungungulu a va hlongolileko mahlweni ka vakokwani va hina.+ Gi no tshama laho kala masikwini ya Dhavhidha. 46 Dhavhidha i no kuma thomo mahlweni ka Nungungulu, a kombela ku mu akela yindlu a Nungungulu wa Jakobe.+ 47 Kanilezvi kuve Solomoni a nga mu akela yindlu.+ 48 Hambulezvo, Loyi a Tlakukileko ku Hundza Vontlhe a nga tshami tindlwini ti akilweko hi mandla,+ kota lezvi a muphrofeti a wulako, aku: 49 ‘“A tilo citshamu ca mina ca wuhosi,+ ni misava cikhegetelo ca mikondzo ya mina.+ I yindlu muni mu to ndzi akela?”, ku wula Jehovha.* “Kona gi kwihi a wutshamu ga mina ga ku humula ka gona? 50 A hi canja ga mina gi nga maha zvontlhe a zvilo lezvi ke?”’+

51 “N’wina va tinhamu to nonoha, vo kala ku mahiwa wukwera* timbilwini ni tindleveni ta n’wina, contlhe cikhati mu ala moya wo basa, a ku khwatsi hi lezvi a vakokwani va n’wina va nga maha.+ 52 Hi wihi a muphrofeti loyi a vakokwani va n’wina va nga kala ku mu xanisa ke?+ Va dele lava va nga ranga va kanela hi kuta ka wakululama,+ loyi n’wina makunu mu nga mu tokometa ni ku mu daya,+ 53 n’wina lava mu nga amukela a Nayo lowu wu nyikilweko n’wina hi tingilozi,+ kanilezvi mu nga wu hlayisi.”

54 Laha va ngazwa a zvilo lezvi, va no zangara* timbilwini tabye, va sangula ku mu getselela matino. 55 Kanilezvi, Stefani, na a tele hi moya wo basa, i no cuwuka tilweni a wona kungangamela ka Nungungulu, na Jesu na a yimile reveni ga cinene ga Nungungulu,+ 56 aku: “Ndzi wona a matilo na ma vhululekile ni N’wana wa munhu+ na a yimile reveni ga cinene ga Nungungulu.”+ 57 Hi kota ya lezvo, va no tlakusa magezu yabye va banguleka va ti vhala tindleve hi mandla va mu yela khatigin’we hi civiti. 58 Andzhako ka loku va mu hoxile lahandle ka dhoropa, va no sangula ku mu gandla hi maribye.+ A vakustumunyu+ va no veka tinguwo tabye mikondzweni ya jaha gi vitaniwako ku hi Sawule.+ 59 Laha va nga kari va gandla Stefani hi maribye, i no kombela, aku: “Hosi Jesu, amukela a moya* wa mina.” 60 Hi kulandzela, i no khizama, a banguleka hi gezu ga hombe, aku: “Jehovha,* u nga va rwexi nandzu wa ciwonho leci.”+ Andzhako ka ku wula lezvo, i no etlela kufeni.

8 Sawule i wa sekela a kudawa kakwe.+

Ka siku lego, a bandla legi gi nga hi Jerusalema gi no sangula ku xanisiwa nguvhu, vontlhe va hangalaka matlhelweni wontlhe ya Judhiya ni Samariya, ku sala vapostoli voce.+ 2 Kanilezvi a vavanuna vo kari va chavako Nungungulu va no rwala Stefani va ya mu lahla, va mu mahela cirilo ca hombe. 3 Hambulezvo, Sawule i no sangula ku hlasela bandla. I wa dhumela miti, a kokovisa vavanuna ni vavasati, a va vhalela paxweni.+

4 Kanilezvi, lava va nga hangalakile matikweni lawo va no famba na va chumayela mahungu ya manene ya mhaka.+ 5 Filipu i no relela aya dhoropeni* ga Samariya+ a ya sangula ku va chumayela ha Kristu. 6 Hi mbilu yin’we, a zvitshungu zvi no chela kota ka lezvi Filipu a nga kari a wula na zvi ingisela ni ku wona a zviwoniso lezvi a nga kari a maha. 7 Hakuva a votala va wa hi ni mimoya ya kubiha; yona yi waba huwa yi huma.+ Ahandle ka lezvo, a votala va nga womile zviro, ni zvilima, va no hanyiswa. 8 Hikwalaho, ku nova ni litsako la hombe dhoropeni lego.

9 Ka dhoropa lego, ku wa hi ni wanuna a nga vitaniwa ku hi Simoni, loyi a kale a nga tira zva masalamuso, a hlamalisa a tiko ga Samariya, na a ti wula lezvaku munhu wa hombe. 10 Vontlhe va wa chela kota kakwe, kusukela ka loyi wa mutsongwani kala ka loyi wahombe, vaku: “A wanuna loyi i na ni ntamu wa hombe wa Nungungulu.” 11 Va wa chela kota kakwe hi lezvi ku nga hi ni cikhati co leha na a va hlamalisa hi mitiro yakwe ya masalamuso. 12 Kanilezvi, laha va nga kholwa ka Filipu, loyi a nga chumayela a mahungu ya manene ya Mufumo wa Nungungulu,+ ni vito ga Jesu Kristu, a vavanuna ni vavasati va no bhabhatiswa.+ 13 Simoni yenawu i no kholwa. Andzhako ka loku a bhabhatisilwe, i no simama na Filipu;+ i wa hlamalisiwa hi ku wona zviwoniso ni mitiro ya hombe ya ntamu yi nga kari yi maheka.

14 Laha a vapostoli le Jerusalema va ngazwa lezvaku a vaSamariya va amukele a mhaka ya Nungungulu,+ va no va rumelela Pedro na Johani. 15 Vona va no relela vaya va khongelela lezvaku va amukela moya wo basa.+ 16 Hakuva i hava ni mun’we wabye a nga wu amukele; va wa no bhabhatiswa basi vitweni ga Hosi Jesu.+ 17 Laha va nga va tlhateka mandla,+ va no sangula ku amukela moya wo basa.

18 A cikhati leci Simoni a nga wona lezvaku a moya wu amukelwa loku a vapostoli va tlhateka mandla, i no va nyika mali, 19 aku: “Minawu ndzi nyikeni a ntamu lowu, kasi ni wihi loyi ndzi to mu tlhateka mandla a amukela moya wo basa.” 20 Kanilezvi Pedro i te ngalo kakwe: “A prata ya wena yi wa love zvin’we na wena, hakuva u alakanyile lezvaku u nga xava cinyikiwo ca mahala ca Nungungulu hi mali.+ 21 A wu na cipandze ne ciavelo mhakeni leyi, hakuva a mbilu ya wena a yi lulamangi mahlweni ka Nungungulu. 22 Hikwalaho, ti sole kubiheni ka wena, u khongotela Jehovha* lezvaku, loku zvi koteka, a ku tsetselela ka mixuvo yo biha ya mbilu ya wena; 23 hakuva ndza zvi wona lezvaku u vhenene yo bava* ni khumbi ya lezvi zvi nga lulamangiko.” 24 Simoni i no va hlamula, aku: “Khongotelani Jehovha* hi mina kasi ni cin’we ca lezvi mu nga zvi wula ci nga ndzi weli.”

25 Hikwalaho, andzhako ka ku nyika wukustumunyu go mbhelela ni ku kanela a mhaka ya Jehovha,* va no tlhela Jerusalema na va kari va chumayela mahungu ya manene zvidhoropaneni zvo tala zva vaSamariya.+

26 Hambulezvo, a ngilozi ya Jehovha*+ yi no byela Filipu, yiku: “Suka uya dzongeni,* ka ruwa gi relelako hi Jerusalema giya Gaza.” (A ruwa legi hi legi ga ciwula.) 27 Hi kota ya lezvo, Filipu i no suka a famba. Makunu i no wona a thenwa* wa muEtiopia, a nga hi hosana yi nga fumelwa hi Kandake, a muzindza* wa vaEtiopia, loyi a nga wonelela a tshomba yontlhe ya Kandake. I wa yile Jerusalema a ya khozela.+ 28 Makunu laha a nga kari a tlhela kaya, i no tshama kareteni yakwe a lera muphrofeti Isaya hi gezu ga hombe. 29 Hikwalaho, a moya wu no byela Filipu, wuku: “Famba, u tshinelela a kareta liyani.” 30 Filipu i no tsutsuma hi laha reveni ga kareta, a muzwa na a lera muphrofeti Isaya, aku kakwe: “Wa zvi zwisisa lezvi u lerako?” 31 Yena aku: “Ndzi nga zvi zwisisisa kuyini na ndzi nga hi na wo ndzi rangela ke?” Hikwalaho, i no kombela Filipu lezvaku a khilela a tshama naye. 32 A mutsalo lowu a nga kari a lera hi lowu waku: “A ku khwatsi i yivhu, i gulelwe kudaweni, niku a ku khwatsi i yivhana leyi yi miyelako mahlweni ka vatsemi va woya ga yona, yenawu a nga vhululi nomu wakwe.+ 33 Cikhatini leci a nga wisiwa tingana, va no mu alela nongameto.+ Himani a to hlawutela a matimu ya cizukulwana cakwe ke? Hakuva a wutomi gakwe gi susilwe misaveni.”+

34 A thenwa wu te ngalo ka Filipu: “Hi nga ndzi byela, kasi a muphrofeti i wula mani? I wula yena wutsumbu kutani i wula mun’wani munhu?” 35 Filipu i no vhulula nomu wakwe, a sangula hi mutsalo lowu, a mu gondzisa mahungu ya manene xungetano hi Jesu. 36 Laha va nga kari va famba, va no chikela ka wutshamu ku nga hi ni mati, a thenwa wuku: “A mati hi lawa, cini ci ndzi vhalelako a ku bhabhatiswa?” 37 *—— 38 Zvalezvo i no laya a kareta lezvaku yi nyima. Filipu ni thenwa va no chika vaya matini a ya mu bhabhatisa. 39 Laha va nga huma hi lomu matini, a moya wa Jehovha* wu no susa Filipu laho hi kuhatlisa; a thenwa a wa ha mu wonangi kambe, kanilezvi wu no simama ku famba na wu tsakile. 40 Hambulezvo, Filipu i no ya humelela le Axdhodhe. I no fambafamba cipandzeni leco a kanela mahungu ya manene zvidhoropaneni zvontlhe kala Khezariya.+

9 Kanilezvi Sawule, na a ha kukutela hi zanga kasi ku dzukisa ni ku daya a vapizani va Hosi,+ i noya ka mupristi wa hombe 2 a ya mu kombela mapapilo ya kuya hi wona masinagogeni ya le Dhamasku, lezvaku a ya khoma vontlhe lava va lumbako A Ndlela,+ a vavanuna ni vavasati, a famba navo Jerusalema na va bohilwe.

3 Laha a nga kari a famba, na a tshinela Dhamasku, hi citshuketi ku no woneka a kuhatima hi le tilweni ku woninga hehla kakwe.+ 4 I nowa lahasi, azwa gezu giku kakwe: “Sawule, Sawule, u ndzi xanisela yini?” 5 I no wutisa, aku: “Hi wena mani bava?” Aku: “Hi mina Jesu+ loyi u mu xanisako.+ 6 Kanilezvi suka u nghena dhoropeni, u ta ya byeliwa lezvi u faneleko ku maha.” 7 A vavanuna lava va nga famba naye va no nyima va vhumala ni co wula; a gezu va gi zwile kanilezvi a va wonangi munhu.+ 8 Sawule i no suka a yima. Hambu lezvi a nga vhululile matihlo i wa nga zvi koti ku wona nchumu. Hikwalaho, va no mu khometela hi woko va nghena naye Dhamasku. 9 I no tshama masiku manharu na a nga zvi koti ku wona,+ na a ngagi, ne kunwa.

10 Le Dhamasku, ku wa hi ni mupizani a nga vitaniwa ku hi Ananiyasi.+ A Hosi yi no mu vitana lomu muwonisweni, yiku: “Ananiyasi!” Yena aku: “Hi mina loyi, Hosi.” 11 A Hosi yiku kakwe: “Suka uya ruweni gi vitaniwako ku Go Lulama, u ya lava wanuna a vitaniwako ku hi Sawule wa le Tarsusi,+ mutini wa Judhasi, hakuva ka cikhati leci o khongela, 12 niku lomu muwonisweni i wonile wanuna a vitaniwako ku hi Ananiyasi na ata kakwe a ta mu tlhateka mandla kasi a tlheliselwa kuwona.”+ 13 Kanilezvi Ananiyasi i no hlamula, aku: “Hosi, ndzi zwile votala na va wulawula hi wanuna loyi, xungetano hi kubiha kontlhe loku a ku maheleko vobasa va wena le Jerusalema. 14 Ni kwalaha i nyikilwe ntamu hi vapristi lava va tihosana kasi ku khoma* vontlhe lava va khongelako vitweni ga wena.”+ 15 Kanilezvi a Hosi yi te ngalo kakwe: “Famba, hakuva ka mina, a wanuna loyi cibya ci hlawulilweko+ kasi ku yisa vito ga mina ka matiko,+ ni ka tihosi,+ ni ka vana va ka Izrayeli. 16 Hakuva ndzi ta mu komba khwatsi a tixanisa to tala leti a to kumana nato hi kota ya vito ga mina.”+

17 Hikwalaho, Ananiyasi i no ya nghena mutini, a mu tlhateka mandla, aku kakwe: “Sawule, makabye, Hosi Jesu loyi a wonekileko ka wena ruweni legi u ngata hi gona i ndzi rumile kasi u tlheliselwa kuwona, u tlhela u tala hi moya wo basa.”+ 18 Zvalezvo, ku nowa zvilo zvo khwatsi magwaru hi matihlweni yakwe, a se tlhela a wona. I no suka a bhabhatiswa, 19 aga zvakuga, a kuma ntamu.

I no tshama masiku yo kari ni vapizani le Dhamasku,+ 20 a tekela ku sangula ku chumayela hi Jesu lomu masinagogeni, lezvaku i N’wana wa Nungungulu. 21 Kanilezvi vontlhe lava va nga muzwa va no hlamala, vaku: “A hi yena a wanuna loyi a nga hlasela lava va nga hi le Jerusalema, va nga khongela vitweni legi ke?+ A nga tangi seno kasi ku ta va khoma a famba navo* ka vapristi lava va tihosana?”+ 22 Kanilezvi Sawule i no simama ku endzeleka hi ntamu, niku a vaJudha lava va nga hanya Dhamasku va no vhumala ni co wula hi lezvi a nga va komba zviku dlunya lezvaku Jesu hi Kristu.+

23 Laha ku nga hundzile masiku yo tala, a vaJudha va no xuxa cikungo kasi ku mu daya.+ 24 Hambulezvo, Sawule i no zvi tiva lezvaku va mu xuxele cikungo. Va wa rindzela a tinyangwa kambe, mumu ni wusiku, kasi va mu daya. 25 Hikwalaho, a vapizani vakwe va no mu teka ni wusiku va mu relelisa hi cindzala* hi laha ka mbovo ya khurisi.+

26 A cikhati leci a nga chikela Jerusalema,+ i no lava ku ti patsa ni vapizani, kanilezvi vontlhe va no mu chava hakuva va wa nga kholwi lezvaku mupizani. 27 Hikwalaho, Bharnabhasi+ i nota a ta mu vhuna, a famba naye ka vapostoli a ya va hlawutela zviku dlunya lezvi a nga yi wonisa zvona Hosi laha ruweni,+ ni lezvi a Hosi yi nga wulawulisa zvona naye, ni lezvi le Dhamasku a nga wulawulisa zvona hi kutiya hi vito ga Jesu.+ 28 Hikwalaho, i no tshama navo, a fambafamba hi kutlhatlheka* le Jerusalema na a wulawula hi kutiya vitweni ga Hosi. 29 I wa wulawula ni ku kanetisana ni vaJudha va wulawulako ciGreki, kanilezvi vona va no hlota tindlela ta ku mu daya.+ 30 Laha a vamakabye va nga tiva mhaka leyi, va no relela naye kala Khezariya va gumesa va mu rumela Tarsusi.+

31 A bandla tikweni gontlhe ga Judhiya, ni Galileya, ni Samariya+ gi nova ni kurula, gi tiyiswa; niku kota lezvi gi nga chava Jehovha* na gi tangaliswa hi moya wo basa,+ gi no simama ku andza.

32 Laha Pedro a nga fambafamba matlhelweni wontlhe, i no relela kala a chikela ni ka vobasa lava va nga hanya Lidha.+ 33 I no ya kuma wanuna a nga vitaniwa ku hi Eneyasi, loyi hi 8 wa malembe a nga tshama na a etlele mubhedhini wakwe hakuva i wa womile zviro. 34 Pedro i te ngalo kakwe: “Eneyasi, Jesu Kristu wa ku hanyisa.+ Suka u longisela a mubhedhi wa wena.”+ Zvalezvo i no suka a yima. 35 Laha vontlhe lava va nga hanya le Lidha ni le Xaroni va nga mu wona, va no kholwa ka Hosi.

36 Le Jopa ku wa hi ni mupizani a nga vitaniwa ku hi Tabhita, lezvi loku zvi hundzuluselwa zvi wulako ku: “Dhorkasi.”* I wa maha mitiro yo tala ya yinene ni ku vhuna zvisiwana. 37 Kanilezvi masikwini lawo, i no babya, afa. Hikwalaho, va no mu hlambisa va ya mu lata kwartwini ya le hehla. 38 Kota lezvi le Lidha ku nga gamekene ni Jopa, a cikhati leci a vapizani va ngazwa lezvaku Pedro i wa hi dhoropeni lego, va no ruma vavanuna vambiri va ya mu kombela, vaku: “Hatlisa uta seno ka hina.” 39 Zvalezvo, Pedro i no suka a famba navo. Laha a nga chikela, va no kandziha naye vaya kwartwini ya le hehla; a tinoni* tontlhe ti nota kakwe na ti rila, ti ta mu komba a tinguwo ni mabhaji lawa Dhorkasi a nga rungile na a ha hanya. 40 Pedro i no humesa vontlhe lahandle,+ a khizama a khongela. I no hundzuluka a cuwuka cirumbi, aku: “Tabhita, vhuka!” Laha a nga vhulula matihlo a wona Pedro, i no vhuka a tshama.+ 41 Pedro i no mu khoma hi canja a mu yimisa, a vitana vobasa ni tinoni* a ta mu nyikela kabye na a hanya.+ 42 A mhaka leyi yi no hangalaka tikweni gontlhe ga Jopa, niku a votala va no kholwa ka Hosi.+ 43 Pedro i no tshama masiku yo tala le Jopa zvin’we ni mufuki wa mabhebhe a vitaniwako ku hi Simoni.+

10 Le Khezariya ku wa hi ni wanuna a vitaniwako ku hi Korneliyu, a nga hi hosana ya masochwa* ya ntlawa wu nga vitaniwa ku i butho* ga Italia. 2 I wa hi munhu wo pinyama, a nga chava Nungungulu, yena ni vontlhe va ngango wakwe. I wa vhuna nguvhu zvisiwana, niku i wa khongela ka Nungungulu a nga tsiki. 3 Ka siku go kari, kwalomu ka hora ya wu 9 ya siku,*+ i no wona muwoniso wa ngilozi ya Nungungulu yi ngata kakwe, yi taku: “Korneliyu!” 4 Korneliyu i no yi cuwukisisa, na a rurumela hi kuchava, a wutisa aku: “Zvini Hosi?” A ngilozi yiku kakwe: “A mikhongelo ya wena ni kuhana ka wena zvi chikele ka Nungungulu, niku i zvi hlayisile maalakanyweni yakwe.+ 5 Hikwalaho, ruma vavanuna vaya le Jopa va ya vitana Simoni loyi a vitaniwako ku hi Pedro. 6 A wanuna loyi i endzele mutini wa Simoni, a mufuki wa mabhebhe, wu nga mbhirini ya bimbi.” 7 Zvalezvi a ngilozi leyi yi nga wulawula naye yi nga famba, Korneliyu i no vitana malandza yakwe ya mambiri ni musochwa wo chava Nungungulu cikari ka lava va nga mu tirela, 8 a ta va hlawutela zvontlhe a gumesa a va ruma vaya Jopa.

9 Hi mandziko wa kona, na va ha hi lomu ndleleni, na va tshinela dhoropeni, Pedro i no kandziha hehla ka yindlu kwalomu ka hora ya wu 6* kasi ku ya khongela. 10 Kanilezvi i nozwa ndlala ya hombe a lava zvakuga. Na va ha longisela zvakuga, i no mahisa ku khwatsi o lora+ 11 a wona tilo na gi vhululekile, ku relela nchumu* wo fana ni nguwo ya hombe ya wukene* wuta misaveni, na wu chisiwa hi mune wa tichoka;* 12 ka nguwo leyo ku wa hi ni tixaka tontlhe ta zvihari zva mune wa minenge ni zvikokakoka* zva misava ni zvinyanyani zva tilo. 13 Ku no zwala gezu, giku kakwe: “Pedro, vhuka u daya uga!” 14 Kanilezvi Pedro aku: “Ahihi Hosi yanga, hakuva cima a ndzi sega cilo co nyenyeza ni co kala ku hlazveka.”+ 15 A gezu gi no engeta, giku kakwe hi khati ga wumbiri: “Tsika ku wula ku zvi nyenyezile a zvilo lezvi Nungungulu a zvi basisileko.” 16 A zvilo lezvi zvi no maheka kambe hi khati ga wunharu. Zvalezvo a nguwo* leyo yi no kokelwa tilweni.

17 Laha Pedro a nga ha jujekile kupima hi lezvaku wu wula yini a muwoniso lowu a wu wonileko, a vavanuna lava va nga rumilwe hi Korneliyu va no wutisa ku wu kwihi muti wa Simoni, va yima laha nyangweni.+ 18 Va no vitana wokari mutini lowo va mu wutisa lezvaku Simoni loyi a vitaniwako ku hi Pedro i endzele laho ke. 19 Pedro na a ha gayela muwoniso lowo, a moya+ wu te ngalo: “Ku na ni vavanuna vanharu va ku lavako. 20 Hikwalaho, suka, u chika, u famba navo na u nga kanakani, hakuva hi mina ndzi nga va ruma.” 21 Pedro i no chika aya ka vavanuna lavo, a yaku ngalo: “Hi mina a wanuna loyi mu mu lavako. I mhaka muni mu tisako?” 22 Vaku: “Korneliyu,+ a hosana ya masochwa, a nga munhu wo lulama ni wo chava Nungungulu, loyi a dzundziwako hi vaJudha vontlhe, i nyikilwe zvileletelo zva Nungungulu hi ngilozi yo basa zva ku ku vitanisa mutini wakwe kasi a tazwa lezvi u lavako ku wula.” 23 Makunu i no va byela va nghena a va amukela kota vapfhumba vakwe.

Loku gi cile, i no suka a famba navo. A vamakabye vo kari va le Jopa va no famba zvin’we naye. 24 Hi mandziko wa kona, i no chikela Khezariya. Kunene, Korneliyu i wa va rindzele na a rambile maxaka yakwe ni vanghana lava a nga va randza nguvhu. 25 Laha Pedro a nga nghena, Korneliyu i no mu khinga a yawa mikondzweni yakwe, a mu khizamela. 26 Kanilezvi Pedro i no mu vhuxa, aku: “Suka u yima; minawu ndzi munhu wo kota wena.”+ 27 Laha Pedro a nga kari a wulawula naye, i no nghena a kuma vanhu vo tala na va hlengeletene. 28 I te ngalo kabye: “Ma zvi tiva khwatsi lezvaku a zvi vhumelelwi ku a muJudha a gelana ni wamatiko kutani ku tshinela kakwe,+ hambulezvo Nungungulu i ndzi kombile lezvaku a ndzi faneli ku wula munhu lezvaku i nyenyezile kutani a nga hlazvekangi.+ 29 Hikwalaho, laha ndzi nga vitaniwa, ndzi nota na ndzi nga kanakani. Makunu, ndza wutisa ku mu ndzi vitanela yini.”

30 Korneliyu aku: “Ka mune wa masiku ma hundzileko, hi cikhati caleci ca hora ya wu 9,* ndzi wa kari ndzi khongela lomu ndlwini ya mina. Hi citshuketi, ku no yima wanuna mahlweni ka mina a nga bohile tinguwo to ngangamela, 31 aku: ‘Korneliyu, a mukhongelo wa wena wu zwilwe, ni kuhana ka wena ku maalakanyweni ya Nungungulu. 32 Hikwalaho, rumela vanhu le Jopa va ya vitana Simoni, loyi a gin’wani vito a nga Pedro. A wanuna loye i le mutini wa Simoni, a mufuki wa mabhebhe, wu nga mbhirini ya bimbi.’+ 33 Makunu ndzi no tekela ku ku vitanisa niku u mahile khwatsi hi lezvi u tileko. Hontlheni hi kona laha mahlweni ka Nungungulu kasi kuzwa zvontlhe lezvi Jehovha* a ku layileko a kuva u zvi wula.”

34 Hikwalaho, Pedro i no vhulula nomu wakwe, aku: “Makunu ndza zvi wona lezvaku hakunene Nungungulu a nga na cihlawulela,+ 35 kanilezvi, ka tixaka tontlhe, loyi a mu chavako ni ku maha zvakululama wa amukeleka kakwe.+ 36 I no rumela mhaka ka vana va ka Izrayeli hi ku kanela kabye a mahungu ya manene ya kurula+ ha Jesu Kristu, loyi a nga Hosi ya vontlhe.+ 37 N’wina ma yi tiva a mhaka leyi ku wulawulilweko hi yona Judhiya gontlhe, kusukela Galileya+ andzhako ka kubhabhatisa loku Johani a ku chumayeleko, yaku: 38 Nungungulu i no tota Jesu wa le Nazareta hi moya wo basa+ ni ntamu, a fambafamba lomu tikweni a maha zvilo zva zvinene ni ku hanyisa vontlhe lava va nga xanisiwa hi Dhiyabho,+ hakuva Nungungulu i wa hi zvin’we naye.+ 39 Hina hi vakustumunyu va zvontlhe lezvi a zvi mahileko tikweni ga vaJudha ni le Jerusalema; kanilezvi va no mu daya hi ku mu hayeka mhandzeni.* 40 Kanilezvi Nungungulu i no mu vhuxa hi siku ga wunharu+ a mu tsika a woneka, 41 na ku nga hi ka vanhu vontlhe, kanilezvi ka vakustumunyu lava Nungungulu a sinako a va yimisile, ku nga hina, lava hi gileko ni kunwa zvin’we naye andzhako ka loku a vhuxilwe hi ka vafileko.+ 42 Ahandle ka lezvo, i no hi laya lezvaku hi chumayela vanhu ni ku nyika wukustumunyu go mbhelela+ ga lezvaku hi yena a yimisilweko hi Nungungulu a kuva mulamuli wa vahanyako ni vafileko.+ 43 Hi yena loyi a vaphrofeti vontlhe va mu mahelako wukustumunyu+ ga lezvaku ni wihi loyi a kholwako kakwe i ta tsetselelwa zviwonho vitweni gakwe.”+

44 Pedro na a ha wulawula timhaka leti, a moya wo basa wu no relela hehla ka vontlhe lava va nga kari vazwa mhaka.+ 45 A makholwa* ma mahilweko wukwera* lawa ma nga tile na Pedro ma no hlamala hi lezvi a vamatiko vonawu va nga chululelwa a cinyikiwo ca mahala ca moya wo basa. 46 Hakuva va no vazwa na va wulawula hi tirimi timbe, va dhumisa Nungungulu.+ Pedro i no hlamula, aku: 47 “I kona wa ku a nga va betela mati a vanhu lava lezvaku va nga bhabhatisiwi, lava va amukeleko a moya wo basa a ku fana na hina?”+ 48 Hikwalaho, i no laya lezvaku va bhabhatiswa vitweni ga Jesu Kristu.+ Andzhako ka lezvo, va no mu kombela lezvaku a tshama navo masiku yo kari.

11 A vapostoli ni vamakabye lava va nga hi Judhiya va nozwa lezvaku a vamatiko vonawu va amukele a mhaka ya Nungungulu. 2 Hikwalaho, a cikhati leci Pedro a nga kandziha aya Jerusalema, lava va nga seketela wukwera*+ va no sangula ku mu holovisa, 3 vaku: “U nghenile mutini wa vavanuna vo kala ku mahiwa wukwera,* uga navo.” 4 Laha a ngazwa lezvo, Pedro i no va tlhatlhela mhaka yontlhe, aku:

5 “Na ndzi hi dhoropeni ga Jopa, na ndzi kari ndzi khongela, zvi no mahisa ku khwatsi ndzo lora, ndzi wona muwoniso wa nchumu* wo fana ni nguwo ya hombe ya wukene* na wu relela hi le tilweni hi mune wa tichoka* wuta ka mina.+ 6 Laha ndzi nga wu cuwukisisa, ndzi no wona a zvihari zva mune wa minenge zva laha misaveni, ni zvihari zva khwati, ni zvikokakoka,* ni zvinyanyani zva tilo. 7 Ndzi nozwa gezu kambe, giku ka mina: ‘Pedro, vhuka u daya uga!’ 8 Kanilezvi ndzi no hlamula, ndziku: ‘Ahihi Hosi, hakuva cima a ku se nghena cilo co nyenyeza kutani co kala ku hlazveka non’wini wa mina.’ 9 A gezu legi gi ngata hi le tilweni, gi no engeta hi khati ga wumbiri, giku: ‘Tsika ku wula ku zvi nyenyezile a zvilo lezvi Nungungulu a zvi basisileko.’ 10 A zvilo lezvi zvi no maheka kambe hi khati ga wunharu, andzhako ka lezvo, zvontlhe zvi no kokelwa tilweni. 11 Hi cikhati caleco, ku no ta yima vavanuna vanharu mutini lowu hi nga hi ka wona va nga rumelwe ka mina hi le Khezariya.+ 12 A moya wu no ndzi byela ku ndzi famba navo na ndzi nga kanakani. Makunu a vamakabye lava va 6 vonawu va no famba zvin’we na mina, hi ya nghena mutini wa wanuna loye.

13 “Yena i no hi hlawutela ku i wonile ngilozi na yi yimile mutini wakwe, yiku: ‘Rumela vanhu le Jopa va ya vitana Simoni loyi a vitaniwako ku hi Pedro,+ 14 i ta ku byela timhaka leti u to hanyiswa hi tona, wena ni vontlhe va ngango wa wena.’ 15 Kanilezvi, laha ndzi nga sangula ku wulawula, a moya wo basa wu no relela hehla kabye a ku khwatsi hi lezvi wu nga mahisa zvona ka hina kusanguleni.+ 16 Laha ndzi nga wona lezvo, ndzi no alakanya a magezu lawa a Hosi yi nga tolovela ku wula, yiku: ‘Johani i bhabhatisile hi mati,+ kanilezvi n’wina mu ta bhabhatiswa hi moya wo basa.’+ 17 Makunu loku Nungungulu a va nyikile a cinyikiwo ca mahala caleci a nga nyika hina lava hi nga kholwa ka Hosi Jesu Kristu, ndzi wa hi mani mina wo kala ndzi betela* Nungungulu ke?”+

18 A cikhati leci va ngazwa a timhaka leti, va no tsika ku mu holovisa,* va dhumisa Nungungulu, vaku: “Nungungulu i nyikile ni vamatiko a kutisola loku ku yisako wutomini.”+

19 Lava va nga hangalakile+ hi kota ya kuxaniseka ku vhukileko hi kota ya Stefani, va no famba kala Fenikiya, ni Kupero, ni Antiyokiya, kanilezvi va wo kanela mhaka ka vaJudha basi.+ 20 Hambulezvo, a vavanuna vo kari cikari kabye va nga hi va le Kupero ni Kirene va no chikela Antiyokiya, va sangula ku wulawula ni vaGreki, va kanela a mahungu ya manene ya Hosi Jesu. 21 Ahandle ka lezvo, a canja ga Jehovha* gi wa hi zvin’we navo, niku a vanhu vo tala va no kholwa, va hundzulukela ka Hosi.+

22 A mhaka leyi yi no zwala tindleveni ta bandla le Jerusalema, va se ruma Bharnabhasi+ aya Antiyokiya. 23 Laha a nga chikela a wona tipswalo ta Nungungulu, i no tsaka a kuca vontlhe lezvaku va simama ku ingisa Hosi hi mbilu yontlhe;+ 24 hakuva i wa hi munhu wa mu nene a nga tele hi moya wo basa ni kukholwa. Ni citshungu ca hombe ci no kholwa ka Hosi.+ 25 Hikwalaho, i noya Tarsusi a ya lavetela Sawule kala a mu kuma.+ 26 Loku a mu kumile, i no wuya naye Antiyokiya. Va no tshama laho a lembe gontlhe na va tlhangana ni bandla, va gondzisa citshungu ca hombe. Kuve le Antiyokiya laha a vapizani va nga sangula ku vitaniwa ku maKristu, hi kuleletela ka Nungungulu.+

27 Masikwini lawo, ku no relela vaphrofeti+ hi Jerusalema vata Antiyokiya. 28 A mun’we wabye a vitaniwako ku hi Agabhusi,+ i no suka a yima a phrofeta hi moya lezvaku kata ndlala ya hombe misaveni yontlhe,+ leyi hakunene yi tileko masikwini ya Klaudhio. 29 Hikwalaho, a vapizani va no vhumelelana lezvaku va ta rumela a zvo vhuna*+ vamakabye lava va hanyako le Judhiya, a mun’we ni mun’wani a nyika lezvi zvi nga ntan’wini wakwe;+ 30 va no maha lezvo, va zvi rumela ka madhota hi canja ga Bharnabhasi na Sawule.+

12 Hi cikhati caleco, hosi Herodhi i no sangula ku xanisa vokari lomu bandleni.+ 2 I no daya Jakobe, a makabye wa Johani,+ hi cipadha.+ 3 Laha a nga wona lezvaku a vaJudha va wa tsaka hi zvona, i no khoma na Pedro. (Lezvo zvi mahekile hi masiku ya Tipawa to kala Comelo.)+ 4 I no mu khoma a mu vhalela paxweni,+ a mu nyikela ka mune wa mitlawa yi nga hi ni mune wa masochwa kadha ntlawa, lezvaku yi mu gadha na a lava ku mu humesa* mahlweni ka vanhu andzhako ka Phasika. 5 Hikwalaho, Pedro i no vhalelwa paxweni, kanilezvi a bandla gi wa mu khongelela ka Nungungulu hi kutikisa.+

6 Laha Herodhi a nga ha lava ku humesa Pedro hi mandziko wa kona, ka wusiku galego Pedro i wa etlele cikari ka masochwa mambiri na a bohilwe hi machini mambiri, ni varindzeli va wa yimile laha nyangweni va lavelela paxo. 7 Kanilezvi, ku no woneka a ngilozi ya Jehovha,*+ kuva ni kuwonekela lomu Pedro a nga hi kona. Yi no mu dhukunya laha reveni yi mu vhuxa, yiku: “Hatlisa u suka!” Zvalezvo, a machini ma nowa hi mandleni yakwe.+ 8 A ngilozi yiku kakwe: “Boha tinguwo, u boha masandalia ya wena.” I no maha lezvo. Hi kugumesa, yi no mu byela, yiku: “Boha a bhaji ga wena u ndzi landza.” 9 I no huma a yi landzela na a nga zvi tivi lezvaku lezvi zvi nga kari zvi mahiwa hi ngilozi zvi wa hi zvilo zva lisine; i wa alakanya ku o wona muwoniso. 10 Laha va nga hundza a ntlawa wo sangula wa varindzeli ni wa wumbiri, va no chikela laha livatini la simbi li kongomako dhoropeni, li se vhululeka ha loce. Loku va humile, va sangula ku relela hi ruwa, a ngilozi yi no nyamalala hi citshuketi. 11 Laha Pedro a nga zwisisa lezvi zvi nga kari zvi maheka, i te ngalo: “Makunu ndza zvi wona lezvaku hakunene Jehovha* i rumele ngilozi yakwe a ndzi tlhatlhisa mandleni ya Herodhi, ni ka zvontlhe lezvi a vaJudha va nga lava ku zvi maheka.”+

12 Laha a nga zwisisa lezvo, i noya mutini wa Mariya a mamani wa Johani, a nga vitaniwa ku hi Marku,+ laha ku nga tlhangene vapizani vo tala na va khongela. 13 A cikhati leci a nga gongondza a livati la nyangwa, ku nota citiri ca nhanyana ci vitaniwako ku hi Rodha kasi ku ta tiva ku hi mani. 14 Laha a nga mu tiva hi gezu a ku hi Pedro, a nhanyana loye i no tsaka nguvhu laha ka kuza a tsika ni ku vhulula livati, a tlhela hi kutsutsuma a ya va byela lezvaku Pedro i yimile laha nyangweni. 15 Vaku kakwe: “Wo hlanya?” Kanilezvi i no simama ku tiyisa lezvaku hakunene hi Pedro. Vaku ngalo: “I ngilozi yakwe.” 16 Kanilezvi Pedro i no simama laho, a gongondza. A cikhati leci va nga vhulula livati va no mu wona va hlamala nguvhu. 17 Kanilezvi Pedro i no va byela hi woko lezvaku va miyela, a sangula ku va tlhatlhela zvontlhe lezvi Jehovha* a nga mu humesisa zvona paxweni, a gumesa aku: “Bikani timhaka leti ka Jakobe+ ni ka vamakabye.” Andzhako ka lezvo, i no suka laho aya ka gin’wani wutshamu.

18 Laha gi ngaca, ku nova ni gujeguje ya hombe cikari ka masochwa na ma lava ku tiva ku Pedro i kwihi. 19 Herodhi i no mu lavetela kontlhe; makunu kota lezvi a nga mu vhumala, i no xuxisa varindzeli a gumesa a laya lezvaku va tsayisiwa.+ Andzhako ka lezvo, i no relela hi Judhiya aya Khezariya a ya tshama cikhati co kari seyo.

20 Herodhi i wa zangarele* vanhu va le Tire ni Sidhoni. Hikwalaho, andzhako ka loku va kholwisile Blastu, a muwoneleli wa zva muti wa hosi,* va nota ka Herodhi hi kungo gin’we va ta kombela kurula, hakuva a tiko gabye gi wa kuma zvakuga tikweni ga hosi. 21 Hi siku gi yimisilweko, Herodhi i no boha tinguwo takwe ta wuhosi a tshama citshan’wini ca kulamula, a sangula ku kanela mahlweni ka vanhu. 22 Makunu a vanhu lava va nga hlengeletene va no tlakusa magezu, vaku: “I gezu ga nungungulu, a hi ga munhu!” 23 Hi citshuketi, a ngilozi ya Jehovha* yi no muba, hakuva a nga dzundzangi Nungungulu; i no giwa hi zviwungwani afa.

24 Kanilezvi a mhaka ya Jehovha* yi no andza yi hangalaka.+

25 Laha Bharnabhasi+ na Sawule va nga mbhetile ku vhunetela vamakabye le Jerusalema,+ va no tlhela Antiyokiya, va famba na Johani,+ loyi a gin’wani vito a nga Marku.

13 Le bandleni ga Antiyokiya ku wa hi ni vaphrofeti ni vagondzisi, va nga lava:+ Bharnabhasi, na Simeyoni a nga vitaniwa ku hi Nijeri, na Lukiyusi wa le Kirene, na Manayeni a nga gondzile na Herodhi, a adhimistradhori wa dhistrito, na Sawule. 2 Laha va nga kari va tirela Jehovha* na va pfhunga,* a moya wo basa wu no va byela, wuku: “Ndzi hlawuleleni Bharnabhasi na Sawule+ kasi va maha a ntiro lowu ndzi va vitaneleko wona.”+ 3 Andzhako ka ku pfhunga* ni ku khongela, va no va tlhateka mandla va va tsika va famba.

4 Hikwalaho, a vavanuna lava, na va rumiwa hi moya wo basa, va no relela vaya Selukiya, va suka hi seyo vaya Kupero hi ngalava. 5 Laha va nga chikela Salami, va no sangula ku kanela a mhaka ya Nungungulu masinagogeni ya vaJudha. Johani i wa hi zvin’we navo a va vhunetela.+

6 Laha va nga tsemakanyile cihlale* contlhe kala Pafosi, va no kumana ni muJudha a vitaniwako ku hi Bhar-Jesu, a nga hi muloyi ni muphrofeti wa mawunwa. 7 I wa hi na govhernadhori Serjiu Pawulusi, a munhu wo tlhariha. Serjiu Pawulusi i no vitana Bharnabhasi na Sawule hakuva i wa zvi lava nguvhu kuzwa a mhaka ya Nungungulu. 8 Kanilezvi Elima, a muloyi (hakuva hi zvalezvo a vito gakwe gi hundzuluseliswako zvona), i no sangula ku va vhukela, a zama ku hambukisa govhernadhori kukholweni. 9 Makunu Sawule, loyi a gin’wani vito a nga Pawule, i no tala hi moya wo basa a mu cuwukisisa khwatsi, 10 aku kakwe: “Wena u teleko hi tixaka tontlhe ta kukanganyisa ni kubiha kontlhe, n’wana wa Dhiyabho,+ wena nala wa zvontlhe zva kululama, u nga ta tsika ku gombonyekisa a tindlela to lulama ta Jehovha* ke? 11 A canja ga Jehovha* gi hehla ka wena, u tafa matihlo, u nga woni gambo hi cikhati co kari.” Zvalezvo, i no welwa hi hunguva ya hombe ni munyama, a sangula ku rendzelekela na a lava wa ku mu khoma hi canja. 12 A cikhati leci govhernadhori a nga zvi wona, i no kholwa hakuva i wa hlamaliswa nguvhu hi tigondzo ta Jehovha.*

13 Pawule ni vanghana vakwe va no suka Pafosi hi ngalava vaya Perga wa Panfiliya. Kanilezvi Johani+ i no va siya a tlhela Jerusalema.+ 14 Hambulezvo, va no suka Perga vaya Antiyokiya wa Pizidhia. Va no nghena sinagogeni+ hi siku ga sabhadho va tshama. 15 Andzhako ka kuleriwa ka Nayo+ ni Vaphrofeti, a varangeli va sinagoga va no va nyiketa gezu, vaku: “Vavanuna, vamakabye, loku mu hi ni gezu ga ku tiyisa vanhu, wulani.” 16 Hikwalaho, Pawule i no suka a yima, a va miyeta hi woko, aku:

“Vavanuna, vaIzrayeli na n’wina lava mu chavako Nungungulu, ndzi ingiseleni. 17 A Nungungulu wa va ka Izrayeli i hlawulile vakokwani va hina, a va tlakusa na va ha hanya kota valuveli tikweni ga Gibhite, a tlhela a va humesa ka gona hi woko gakwe ga ntamu.+ 18 I no timisela ha vona lomu ciwuleni a 40 wa malembe.+ 19 Andzhako ka loku a lovisile a 7 wa tixaka tikweni ga Khanani, i no va nyika tiko lego lezvaku giva tshomba yabye.+ 20 Zvontlhe lezvi zvi mahekile ndzeni ka 450 wa malembe.

“Andzhako ka lezvo, i no va nyika valamuli kala ka muphrofeti Samuweli.+ 21 Kanilezvi hi ndzhako ka cikhati, va no londza hosi,+ hikwalaho Nungungulu i no va nyika Sawule, a n’wana wa Kixi wa lixaka la ka Bhenjamini,+ a va fumela a 40 wa malembe. 22 Andzhako ka ku mu susa, i no va yimisela Dhavhidha kota hosi,+ loyi Nungungulu a nga mu kustumunyela, aku: ‘Ndzi kumile Dhavhidha, a n’wana wa Jese,+ a munhu a tsakisako mbilu ya mina;+ yena i ta maha zvontlhe lezvi ndzi zvi lavako.’ 23 Hi kuya hi citsumbiso cakwe, hi ka pswalo* wa wanuna loyi, Nungungulu i no humesela Izrayeli a muhanyisi, a nga Jesu.+ 24 Na a nga se chikela a muhanyisi loye, Johani i no chumayela vanhu vontlhe va ka Izrayeli xungetano hi kubhabhatiswa kota cikombiso ca kutisola.+ 25 Kanilezvi laha Johani a nga kari a mbhetisa ntiro wakwe, i waku: ‘Mu alakanya ku hi mina mani? A hi mina loyi mu mu alakanyako. Kanilezvi ku na ni Loyi a tako andzhako ka mina, wa ku ne a ndzi ringani a ku tlhatlha tingoti ta masandalia yakwe.’+

26 “Vavanuna, vamakabye, n’wina vana va ngango wa Abrahama, na n’wina lava mu chavako Nungungulu, a mhaka ya kuhanyisa loku yi rumelwe ka hina.+ 27 Hakuva a vahanyi va Jerusalema ni tihosi tabye a va mu vhumelangi,* kanilezvi a cikhati leci va nga mu lamula va no tatisa lezvi zvi nga wulilwe hi Vaphrofeti,+ zvi nga zvalezvi zvi gondziwako ka masabhadho wontlhe. 28 Hambu lezvi va nga vhumala nandzu wu ringanako ku a dawa,+ va no kurumeta Pilatu lezvaku a laya ku a dawa.+ 29 Laha va nga tatisile zvontlhe lezvi zvi tsalilweko xungetano hi yena, va no mu chisa laha mhandzeni* va mu lata cilahleni.+ 30 Kanilezvi Nungungulu i no mu vhuxa hi ka vafileko,+ 31 a woneka masiku yo tala ka lava va nga sukile naye hi Galileya kala Jerusalema. Lava hi vona makunu va mu mahelako wukustumunyu cikari ka vanhu.+

32 “Hikwalaho, ha kanela ka n’wina a mahungu ya manene ya citsumbiso leci ci mahilweko ka vakokwani. 33 Nungungulu i ci tatisile hi kumbhelela ka hina vana vabye hi ku vhuxa Jesu,+ kota lezvi zvi tsalilweko ka lisimu la wumbiri, zvaku: ‘Wena u n’wana wa mina; nyamutlha ndzi mahile papayi wa wena.’+ 34 A mhaka leyi ya ku Nungungulu i mu vhuxile hi ka vafileko kasi a nga ha tshuki a bola kambe, i yi wulisile lezvi: ‘Ndzi ta mu nyika a zvikombiso zva lirandzo li nga mbheliko lezvi zvi tsumbisilweko Dhavhidha.’+ 35 Ka lin’wani lisimu, ku tsalilwe lezvi: ‘U nga ta tsika a tsumbekileko wa wena a wona kubola.’+ 36 Makunu Dhavhidha i no tirela Nungungulu* cizukulwaneni cakwe, a etlela kufeni a tlhela a lahliwa zvin’we ni vakokwani vakwe, a gumesa a bola.*+ 37 Kanilezvi loyi Nungungulu a nga mu vhuxa hi ka vafileko a nga wonangi kubola.+

38 “Hikwalaho, zvi tiveni, vamakabye, lezvaku hi ka wanuna loyi, a kutsetselelwa ka zviwonho ka kanelwa ka n’wina,+ 39 ni lezvaku hi ka wanuna loyi, ni wihi loyi a kholwako i wuliwa ku a nga na nandzu ka zvontlhe lezvi a nga wa ta kala ku wuliwa ku a nga na nandzu+ hi ka Nayo wa Mosi.+ 40 Hikwalaho, ti woneleni kasi lezvi zvi wuliwako lomu ka Vaphrofeti zvi nga maheki ka n’wina: 41 ‘N’wina vatseketseli, cuwukani mu hlamala mu tlhela mu lova, hakuva ndzi maha ntiro masikwini ya n’wina, a ntiro wa ku mu nga ta tshuka mu kholwa hambu loku mu byeliwa zvontlhe.’”+

42 Laha va nga kari va huma, a vanhu va no va khongotela lezvaku va wuya kambe hi sabhadho gi nga landzela va ta kanela timhaka leti. 43 Hikwalaho, a cikhati leci a mutlhangano wu nga mbhela lomu sinagogeni, a vaJudha vo tala ni vaprozelite* lava va nga khozela Nungungulu, va no landzela Pawule na Bharnabhasi, lava a cikhati leci va nga wulawula navo, va nga va khongotela lezvaku va simama tipswalweni ta Nungungulu.+

44 Ka sabhadho gi nga landzela, zvi woya hi ku khwatsi a dhoropa gontlhe gi no hlengeletana kasi kuzwa a mhaka ya Jehovha.* 45 A cikhati leci a vaJudha va nga wona zvitshungu lezvo, va no tala hi ciluse va kaneta lezvi Pawule a nga kari a wula, na va rukatela.+ 46 Hikwalaho, Pawule na Bharnabhasi va no va byela hi kutiya, vaku: “Zvi wa laveka lezvaku a mhaka ya Nungungulu yi kanelwa ka n’wina kuranga.+ Kanilezvi kota lezvi mu yi alako, hi taya ka vamatiko, hakuva mu komba lezvaku a mu ringanelwi hi wutomi ga pindzukelwa.+ 47 Hakuva Jehovha* i hi layile, aku: ‘Ndzi ku yimisile kota kuwonekela ka matiko, kasi u yisa kuhanyisa kala magemeta-musi ya misava.’”+

48 A cikhati leci a vamatiko va ngazwa lezvo, va no tsaka va dhumisa a mhaka ya Jehovha;* vontlhe lava hakunene a timbilu tabye ti nga longile ku amukela a wutomi ga pindzukelwa va no kholwa. 49 Ahandle ka lezvo, a mhaka ya Jehovha* yi no hangalaka tikweni gontlhe. 50 Kanilezvi a vaJudha va no kucetela vavasati va dhumileko vo chava Nungungulu ni tihosana ta dhoropa lezvaku va vhukela+ Pawule na Bharnabhasi, va va hlongola tikweni gabye. 51 Hikwalaho, va no phuhunha lithuri mikondzweni yabye mahlweni kabye va suka laho vaya Ikoniyume.+ 52 A vapizani va no simama ku tala hi kutsaka+ ni moya wo basa.

14 Le Ikoniyume, Pawule na Bharnabhasi va no nghena sinagogeni ga vaJudha va kanela khwatsi laha ka kuza a citshungu ca hombe ca vaJudha ni vaGreki ci kholwa. 2 Kanilezvi a vaJudha lava va nga kala ku kholwa va no kucetela a vanhu* va matiko lezvaku va vhukela vamakabye.+ 3 Hikwalaho, va no tshama cikhati co leha seyo na va kanela hi kutiya kota lezvi Jehovha* a nga va nyika ntamu. I no va nyika ntamu wa ku maha zviwoniso ni zvihlamaliso kasi ku komba lezvaku a mahungu ya tipswalo takwe lawa va nga kari va chumayela ma wata hi kakwe.+ 4 Kanilezvi a citshungu ca dhoropa ci wa hambene kupima; a vokari va wa yima ni vaJudha, kanilezvi a van’wani va wa yima ni vapostoli. 5 A vamatiko ni vaJudha zvin’we ni tihosi tabye va no hlota tindlela ta ku va xanisa ni ku va gandla hi maribye.+ 6 Laha Pawule na Bharnabhasi va nga zvi tiva, va no tsutsuma vaya Listra ni Dherbhe, ma nga madhoropa ya Likawoniya, ni ka matshamu ya lomu kusuhani.+ 7 Seyo va no simama ku chumayela mahungu ya manene.

8 Le Listra ku wa hi ni wanuna a nga limalile minenge. I wa hi cilima kusukela kupswaliweni, niku i wa nga se tshuka a famba. 9 A wanuna loye i wa tshamile a ingisela Pawule na a kanela. Laha Pawule a nga mu cuwukisisa, a wona lezvaku i na ni kukholwa ku ringanako ku a hanyiswa,+ 10 i no tlakusa gezu, aku: “Suka u yima hi minenge ya wena.” A wanuna loye i no tlula, a sangula ku famba.+ 11 A cikhati leci a zvitshungu zvi nga wona lezvi Pawule a nga maha, zvi no banguleka hi ciLikawoniya zviku: “A vanungungulu va relele ka hina na va ku khwatsi vanhu!”+ 12 Hikwalaho, va no chula Bharnabhasi ku hi Zewusi,* Pawule va mu chula ku hi Hermesi,* hakuva hi yena a nga rangela kuwulawuleni. 13 A mupristi wa tempeli ya Zewusi,* leyi yi nga hi laha phambeni ka dhoropa, i nota ni tihomu ni tisimbo ta zvitsangi laha nyangweni ya dhoropa, a ta ti patsa ni zvitshungu kasi va nyikela miphahlo ka Pawule na Bharnabhasi.

14 Kanilezvi a cikhati leci mupostoli Bharnabhasi na mupostoli Pawule va nga zvizwa, va no handzula tinguwo tabye va nghena cikari ka citshungu, va banguleka, vaku: 15 “Vavanuna, mu zvi mahela yini lezvi? Hinawu hi vanhu vo fana na n’wina.+ Hi laha kasi ku mu chumayela a mahungu ya manene lezvaku mu tsika ku khozela zvilo lezvi zvi nga vhuniko nchumu kanilezvi mu khozela Nungungulu a hanyako, loyi a nga maha tilo ni misava ni bimbi ni zvontlhe zvi nga ka zvona.+ 16 Ka zvizukulwana zvi hundzileko, i no tsika matiko wontlhe ma maha kurandza ka wona.+ 17 Hambulezvo, a nga ti fihlangi ku hi yena mani,+ hakuva i no mu mahela zvazvinene hi ku mu nisela tivhula hi le tilweni ni ku mu nyika tinguva ta mihandzu,+ ni zvakuga zvo tala, a tata timbilu ta n’wina hi kutsaka.”+ 18 Hambu lezvi va nga wula lezvo, kutsongwani va wa lava ku tsandzeka ku betela zvitshungu lezvaku zvi nga va maheli miphahlo.

19 Kanilezvi ku nota vaJudha hi le Antiyokiya ni Ikoniyume va ta kucetela zvitshungu.+ Makunu va no gandla Pawule hi maribye, va mu kokovisa va ya mu tsika le handle ka dhoropa na va alakanya ku i file.+ 20 Kanilezvi a cikhati leci a vapizani va nga mu randzela, i no vhuka a nghena dhoropeni. Hi mandziko wa kona, i no suka na Bharnabhasi vaya Dherbhe.+ 21 Andzhako ka ku chumayela mahungu ya manene dhoropeni lego ni ku maha vapizani vo tala, va no tlhela Listra, ni Ikoniyume, ni Antiyokiya. 22 Va no tiyisa vapizani*+ ni ku va kuca lezvaku va simama kukholweni, vaku: “Hi fanele ku nghena Mufun’weni wa Nungungulu na hi hundzile hi ka zvikarato zvo tala.”+ 23 Ahandle ka lezvo, va no va yimisela madhota ka bandla ni bandla,+ na va khongela ni ku pfhunga,*+ va tlhela va va hendleleta ka Jehovha,* loyi va nga kholwile kakwe.

24 Va no tsemakanya hi Pizidhia vaya Panfiliya.+ 25 Andzhako ka ku kanela mhaka le Perga, va no relela vaya Ataliya. 26 Va no suka hi laho va khilela ngalava va tlhela Antiyokiya, ku nga laha va nga nyikelwe kona tipswalweni ta Nungungulu kasi va maha ntiro lowu makunu va nga mbhetile.+

27 Loku va chikele, va no tlhanganisa bandla, va hlawutela zvontlhe lezvi Nungungulu a zvi mahileko hi mandla yabye, ni lezvaku i vhululele a vamatiko a nyangwa ya ku vonawu va kholwa.+ 28 Hikwalaho, va no tshama cikhati co leha ni vapizani.

15 Ku no relela vavanuna vo kari hi le Judhiya va ta sangula ku gondzisa vamakabye, vaku: “Loku mu nga mahiwi wukwera* kota mukhuwo wa Mosi,+ mu nga ta hanyisiwa.” 2 Kanilezvi, laha Pawule na Bharnabhasi va nga phikizene ni ku kanetisana nguvhu navo, a vamakabye va no hlawula Pawule na Bharnabhasi ni van’wani lezvaku va yisa mhaka leyi ka vapostoli ni madhota le Jerusalema.+

3 Andzhako ka loku a bandla gi va heleketile kutsongwani, va no tsemakanya hi Fenikiya ni Samariya na va hlawutela zvontlhe lezvi a vanhu va matiko va nga hundzulukisa zvona, va neha litsako la hombe ka vamakabye vontlhe. 4 Laha va nga chikela Jerusalema, a bandla ni vapostoli ni madhota va no va amukela khwatsi, va hlawutela a zvilo zvo tala lezvi Nungungulu a zvi mahileko hi ku tirisa vona. 5 Kanilezvi a makholwa lawa a kale ma nga hi vaFarisi ma no suka ma yima, maku: “Ku laveka ku va mahiwa wukwera* va tlhela va layiwa lezvaku va ingisa a Nayo wa Mosi.”+

6 Hikwalaho, a vapostoli ni madhota va no tlhangana kasi ku hlola mhaka leyi. 7 Andzhako ka kuva va phikizene nguvhu hi mhaka leyi, Pedro i no suka a yima, aku kabye: “Vavanuna, vamakabye, ma zvi tiva khwatsi lezvaku Nungungulu i ndzi hlawulile kale cikari ka n’wina, kasi a vanhu va matiko vazwa a mahungu ya manene hi nomu wa mina, va kholwa.+ 8 Nungungulu, loyi a tivako timbilu,+ i nyikile wukustumunyu hi ku va nyika moya wo basa+ a ku khwatsi hi lezvi a mahileko ka hinawu. 9 A nga hambanisangi nchumu cikari ka hina na vona+ kanilezvi i no basisa timbilu tabye hi kukholwa.+ 10 Makunu hikuyini n’wina mu ringako Nungungulu hi ku tlhateka kanga tinhan’wini ta vapizani,+ lowu a vakokwani va hina ne hambu hina hi nga kala ku zvi kota ku wu rwala ke?+ 11 Kanilezvi hina ha kholwa lezvaku hi hanyiswa hi tipswalo ta Hosi Jesu+ a ku fana na vona.”+

12 Laha va ngazwa lezvo, a ntlawa wontlhe wu no miyela wu ingisela Bharnabhasi na Pawule na va hlawutela a zviwoniso ni zvihlamaliso zvo tala lezvi Nungungulu a zvi mahileko ka matiko hi ku tirisa vona. 13 Laha va nga mbheta a ku wulawula, Jakobe i te: “Vavanuna, vamakabye, ndzi ingiseleni. 14 Simeyoni+ i hlawutele hi kumbhelela lezvi Nungungulu, hi khati go sangula, a nga yisisa zvona kupima ka matiko, a hlawula vanhu cikari ka wona lava va to vitaniwa hi vito gakwe.+ 15 A timhaka ta Vaphrofeti ta vhumelelana ni lezvo, a ku khwatsi hi lezvi ku tsalilweko ku: 16 ‘Andzhako ka zvilo lezvi, ndzi ta wuya ndzi ta vhuxa a tenda* ga Dhavhidha legi gi wileko; ndzi ta aketa a marumbi ya gona, ndzi gi vhuxa, 17 kasi a vanhu lava va seleko va fela ku hlota Jehovha* hi kutitsitsirita zvin’we ni vanhu va matiko wontlhe, a vanhu lava va vitaniwako hi vito ga mina, ku wula Jehovha,* loyi a mahako zvilo lezvi+ 18 zvi tivekako kusukela kale.’+ 19 Hikwalaho, mina ndzi wona ku i chukwana hi nga bindziseli a vamatiko lava va lavako ku tirela Nungungulu,+ 20 kanilezvi, hi va tsalela lezvaku va tsika lezvi zvi phahlelweko zvifananiso,+ ni wubhayi,*+ ni lezvi zvi fileko hi ku tlimbiwa,* ni nkhata.+ 21 Hakuva kusukela kaleloko, Mosi i na ni lava va mu kanelako ka dhoropa ni dhoropa, hakuva wa leriwa hi gezu ga hombe masinagogeni hi masabhadho wontlhe.”+

22 Makunu a vapostoli ni madhota zvin’we ni bandla gontlhe va no boha ku ruma vavanuna va hlawulilweko cikari kabye vaya Antiyokiya, zvin’we na Pawule na Bharnabhasi; va no rumela Judhasi, loyi a gin’wani vito a nga hi Bharsabha, na Silasi,+ lava va nga rangela cikari ka vamakabye. 23 Va no tsala papilo va va nyiketa, gi nga wula lezvi:

“A vapostoli ni madhota, a vamakabye va n’wina, va mu losa n’wina vamakabye va matiko mu nga le Antiyokiya,+ ni Siriya, ni Kilikiya. 24 Hi zwile lezvaku ku sukile vanhu cikari ka hina va ta wulawula zvilo zvi nga mu juwungela,+ na va zama ku mu hehla* kuveni a hi va leletelangi nchumu. 25 Hi cigelo leco, hi bohile hi mbilu yin’we a ku hlawula vavanuna hi va rumela ka n’wina zvin’we ni vamakabye va hina vo randzeka Bharnabhasi na Pawule, 26 va nga vavanuna va nyikeleko wutomi gabye* hi kota ya vito ga Hosi ya hina Jesu Kristu.+ 27 Ha mu rumelela Judhasi na Silasi kambe, kasi vonawu va ta hlawutela a zvilo zvalezvi zva zvin’we hi nomu.+ 28 Hakuva zvi wonekile ka moya wo basa+ ni ka hina wutsumbu lezvaku i chukwana hi nga mu rwexi a wun’wani ndzhwalo ahandle ka zvilo lezvi zvi lavekako: 29 ku nga lezvaku mu simama ku tsika lezvi zvi phahlelweko zvifananiso,+ ni nkhata,+ ni lezvi zvi fileko hi ku tlimbiwa,*+ ni wubhayi.*+ Loku mu ti wonela ka zvilo lezvi, mu ta humelela. Hanyani khwatsi!”*

30 Hikwalaho, andzhako ka loku a vavanuna lava va chusilwe, va no relela vaya Antiyokiya va ya tlhanganisa a ntlawa wontlhe va va nyika papilo. 31 Andzhako ka kuva va lerile, va no tsaka hi kutiyisa ka gona. 32 Lezvi Judhasi na Silasi va nga hi vaphrofeti, va no kuca vamakabye kambe ni ku va tiyisa hi tikanelo to tala.+ 33 Andzhako ka ku tshama seyo cikhati co kari, a vamakabye va no va tlhelisa hi kurula ka lava va nga va rumele. 34 *—— 35 Kanilezvi Pawule na Bharnabhasi va no simama Antiyokiya va gondzisa ni ku kanela a mahungu ya manene ya mhaka ya Jehovha,* zvin’we ni van’wani vo tala.

36 Andzhako ka masiku yo kari, Pawule i no byela Bharnabhasi, aku: “A hi tlhele hi ya wona lezvaku va vhukisa kuyini a vamakabye madhoropeni wontlhe lawa hi nga kanela a mhaka ya Jehovha.”*+ 37 Bharnabhasi i wa lava lezvaku va famba na Johani, loyi a vitaniwako ku hi Marku.+ 38 Kanilezvi Pawule i wa nga zvi lavi ku va famba naye hakuva i wa va siyile le Panfiliya, a nga fambi navo ntirweni.+ 39 Hi kota ya lezvo, va no holova nguvhu laha ka kuza va hambana; Bharnabhasi+ i no teka Marku aya Kupero hi ngalava. 40 Pawule i no hlawula Silasi a suka a famba andzhako ka loku a vamakabye va va nyikele tipswalweni ta Jehovha.*+ 41 I no tsemakanya Siriya ni Kilikiya, a tiyisa mabandla.

16 Hikwalaho, i no chikela Dherbhe ni le Listra.+ Kwalaho ku wa hi ni mupizani a vitaniwako ku hi Timote,+ loyi a mamani wakwe a nga hi muJudha a kholwileko, kanilezvi a papayi wakwe i wa hi muGreki. 2 I wa dzundziwa hi vamakabye va le Listra ni va le Ikoniyume. 3 Pawule i wa lava ku famba na Timote, hikwalaho i no mu teka a mu mahisa wukwera* hi kota ya vaJudha va nga hi ka matshamu lawo,+ hakuva vontlhe va wa zvi tiva lezvaku a papayi wakwe muGreki. 4 Laha va nga kari va famba va tsemakanya madhoropa, va wa nyika vamakabye a zvileletelo lezvi zvi nga yimisilwe hi vapostoli ni madhota le Jerusalema kasi va zvi hlayisa.+ 5 Hikwalaho, a mabandla ma no simama ku tiya kukholweni ma tlhela ma kula siku ni siku.

6 Va no tsemakanya hi Frijiya ni Galatiya+ hakuva a moya wo basa wu wa va betele ku kanela mhaka le provhinsia ya Azia. 7 Ahandle ka lezvo, laha va nga relela vaya Misiya, va no zama kuya Bhituniya,+ kanilezvi a moya wa Jesu a wu va vhumelelangi. 8 Hikwalaho, va no hundza hi le* Misiya, va relela vaya Trowasi. 9 Makunu ni wusiku Pawule i no wona muwoniso wa wanuna wa le Makedhoniya na a yimile mahlweni kakwe a mu khongotela, aku: “Tana seno Makedhoniya u ta hi vhuna.” 10 Zvalezvi a nga wona muwoniso lowo, hi no tekela ku suka hi famba Makedhoniya, na hi alakanya ku Nungungulu i hi vitanile kasi hi ya va chumayela mahungu ya manene.

11 Hikwalaho, hi no suka Trowasi hi ngalava hi kongoma Samotrake, kanilezvi hi mandziko wa kona, hi noya Neyapoli. 12 Hi no suka hi laho hiya Filipi,+ gi nga koloniya ga vaRoma ni dhoropa ga lisima nguvhu ga dhistrito ya Makedhoniya. Hi noxwa masiku yo kari dhoropeni lego. 13 Hi siku ga sabhadho, hi no huma lomu dhoropeni hiya congweni, laha hi nga alakanya lezvaku ku na ni wutshamu ga ku khongela, hi ya tshama hi wulawula ni vavasati lava va nga tlhangene laho. 14 Kwalaho ku wa hi ni wasati a nga kari a ingisela, a vito gakwe ku wa hi Lidhia, a muxavisi wa tinguwo to pswhuka, wa le dhoropeni ga Tiyatira,+ a nga khozela Nungungulu. Jehovha* i no vhulula mbilu yakwe yi ku ha kasi a demba ndleve ka lezvi Pawule a nga kari a kanela. 15 A cikhati leci yena ni va laha kaya kakwe va nga bhabhatiswa,+ i no hi khongotela, aku: “Loku mu vhumela lezvaku hakunene ndzi tsumbekile ka Jehovha,* a hi fambeni mu ya tshama kaya ka mina.” I no hi kurumeta kala hi vhumela.

16 Ku te laha hi nga kari hiya ka wutshamu ga kukhongela, hi no kumana ni citiri ca nhanyana ci nga hi ni moya, gi nga dhimoni ga kuvhumba.*+ Ci wa va bhindzulela nguvhu a venyi va cona hi ntiro wa cona wa kuvhumba. 17 A nhanyana loye i wa landzelela Pawule na hina na a banguleka, aku: “A vavanuna lava malandza ya Nungungulu a Tlakukileko ku Hundza Vontlhe,+ niku vo mu gondzisa a ndlela ya kuhanyiswa.” 18 I no simama ku maha lezvo hi masiku yo tala. Hi kugumesa, Pawule i no kolwa hi zvona a se hundzuluka a byela a moya lowo, aku: “Hi vito ga Jesu Kristu ndza ku laya: Huma ka yena.” A moya wu no huma ka cikhati caleco.+

19 Laha a venyi vakwe va nga wona lezvaku a nga ta ha va bhindzulela nchumu,+ va no khoma Pawule na Silasi va va kokovisela kala prasa* va ya va nyikela ka vafumeli.+ 20 Va no famba navo ka tihosana ta dhoropa, va yaku: “A vavanuna lava va vhuxa vhilinganya ya hombe lomu dhoropeni ga hina.+ Vona vaJudha, 21 niku va gondzisa mikhuwo ya ku a hi faneli ku yi vhumela ne ku yi landzela, hakuva hina hi vaRoma.” 22 A citshungu contlhe ci no va vhukela, ni tihosana ta dhoropa ti no va tlhatlhela tinguwo, ti laya lezvaku va biwa hi tinhonga.+ 23 Andzhako ka loku va va bile nguvhu, va no va peta paxweni, va laya a mugadhi wa paxo lezvaku a va gadha khwatsi.+ 24 Hi kota ya lezvi a nga byeliwa, i no va vhalela paxweni ga lomu cikari, a tlhela a va fasa minenge hi makhotso.

25 Kanilezvi laha cikari ka wusiku, Pawule na Silasi va wa kari va khongela ni ku dhumisa Nungungulu hi tisimu+ na va zwiwa hi zvibochwa lezvi zvin’wani. 26 Hi citshuketi, ku nova ni kutsekatseka ka hombe ka misava laha ka kuza ku tsekatseka ni zviseketelo zva paxo. Ka cikhati caleco, a tivati tontlhe ta paxo ti no vhululeka, ni machini ya vontlhe va nga bohilwe ma tlhatlheka.+ 27 A cikhati leci a mugadhi wa paxo a nga khindlimuka a wona lezvaku a tinyangwa ta paxo ti vhululekile, i no hlomula cipadha cakwe a lava ku ti daya na a alakanya ku a zvibochwa zvi tsutsumile.+ 28 Kanilezvi Pawule i no banguleka, aku: “U nga ti bayisi, hakuva hontlheni hi kona!” 29 I no vitanisa tikandiya, a tsutsuma a nghena paxweni na a rurumela a yawa mahlweni ka Pawule na Silasi. 30 I no va humesa handle a va wutisa, aku: “Vabava, zvini ndzi faneleko ku maha kasi ndzi hanyiswa?” 31 Vaku kakwe: “Kholwa ka Hosi Jesu u ta hanyiswa, wena ni ngango wa wena.”+ 32 Va no kanela a mhaka ya Jehovha* ka yena ni ka vontlhe va ngango wakwe. 33 I no va teka hi cikhati leco ca wusiku a famba navo a ya va hlazva zvilondza. Andzhako ka lezvo, yena ni vontlhe va ngango wakwe va no tekela ku bhabhatiswa.+ 34 I no famba navo kaya kakwe a ya va nyika zvakuga, a tsaka nguvhu ni vontlhe va ngango wakwe hi lezvi a nga kholwile ka Nungungulu.

35 Laha gi ngaca, a tihosana ta dhoropa ti no rumela a vagadhi, va yaku: “Tlhatlha a vavanuna lavo.” 36 A mugadhi wa paxo i noya ka Pawule a ya mu byela a timhaka leti, aku: “A tihosana ta dhoropa ti ndzi rumile ku ta mu tlhatlha n’wina va vambiri. Hikwalaho, humani zvezvi, mu famba hi kurula.” 37 Kanilezvi Pawule i te ngalo kabye: “Va hi bile na hi woniwa hi vanhu na va nga hi thethisangi kuveni hi vaRoma,+ va tlhela va hi vhalela paxweni. Makunu lezvi va hi humesa cihundleni? A zvi tiri lezvo! A vate laha va ta hi humesa ha voce.” 38 A vaghadhi va no tlhela ka tihosana ta dhoropa va ya ti byela mhaka leyi. Ti no chava laha ti ngazwa lezvaku a vavanuna lavo va wa hi vaRoma.+ 39 Ti nota ti ta kombela kutsetselelwa, ti va humesa paxweni, ti gumesa ti va kombela lezvaku va huma lomu dhoropeni. 40 Kanilezvi, va no huma lomu paxweni vaya kaya ka Lidhia; laha va nga wonana ni vamakabye va no va tiyisa+ va gumesa va suka va ti fambela.

17 Makunu loku va hundzile Anfipoli ni Apoloniya va no chikela Tesalonika,+ laha ku nga hi ni sinagoga ga vaJudha. 2 Kota lezvi Pawule a nga tolovela ku maha,+ i no nghena sinagogeni gabye, a wulawulisana navo hi Mitsalo hi masabhadho manharu,+ 3 a va tlhamusela ni ku va komba hi mitsalo lezvaku zvi wa laveka ku Kristu a xaniseka+ a tlhela a vhuxiwa hi ka vafileko,+ aku: “Jesu loyi ndzi mu kanelako ka n’wina, hi yena Kristu.” 4 Hi kota ya lezvo, a vokari va no kholwa va ti patsa na Pawule na Silasi,+ ni citshungu ca hombe ca vaGreki lava va nga khozela Nungungulu ci no maha zvalezvo, zvin’we ni vavasati vo tala va dhumileko.

5 Kanilezvi a vaJudha va nova ni ciluse.+ Hikwalaho, va no hlengeleta vavanuna vo kari vo biha va nga tshama prasa* kasi va vhuxa gujeguje lomu dhoropeni. Va no dhumela a muti wa Jasoni na va lava Pawule na Silasi kasi va va humesa vata citshungwini. 6 Loku va va vhumalile, va no kokovisa Jasoni ni vamakabye van’wani va va yisa ka tihosi ta dhoropa, na va banguleka, vaku: “A vavanuna lava va vangisako gujeguje misaveni yontlhe va chikele ni seno kambe,+ 7 niku va amukelwe hi Jasoni. Vontlhe vavanuna lava valwa ni milayo ya Khezari, vaku ku na ni hosi yin’wani, ku nga Jesu.”+ 8 Laha a citshungu ni tihosi ta dhoropa va ngazwa lezvo, va no karateka. 9 Andzhako ka loku va amukele ntsengo* lowu wu nga gemilwe ka Jasoni ni lava van’wani, va no va tsika va famba.

10 Zvalezvo gi nga phuma, a vamakabye va no rumela Pawule na Silasi le Bhereya. Loku va chikele seyo, va no nghena sinagogeni ga vaJudha. 11 Vona va wa tlharihile* a ku hundza lava va le Tesalonika hakuva va amukele a mhaka hi kutsaka ka hombe; va wa hlola khwatsi Mitsalo siku ni siku kasi ku wona lezvaku lezvi va nga kari va zvizwa lisine ke. 12 Hikwalaho, a kutala ka vona va no kholwa, a ku patsa ni vavasati vo tala va dhumileko va vaGreki zvin’we ni vavanuna vo kari. 13 Kanilezvi laha a vaJudha va le Tesalonika va ngazwa lezvaku Pawule i wa kari a kanela a mhaka ya Nungungulu le Bhereya, va nota va ta kucetela ni ku vhindlukisa zvitshungu.+ 14 A vamakabye va no tekela ku rumela Pawule bimbini,+ kanilezvi Silasi na Timote va no sala. 15 Hambulezvo, lava va nga heleketa Pawule va no famba naye kala Atensi, va guma va tlhela andzhako ka ku nyikiwa zvileletelo zva ku Silasi na Timote+ va fanele kuya ka Pawule hi kuhatlisa.

16 Laha Pawule a nga ha va rindzela le Atensi, a moya wakwe wu no swireka hi ku wona lezvaku a dhoropa gi tele hi zvifananiso. 17 Hikwalaho, i no sangula ku wulawulisana ni vaJudha zvin’we ni van’wani vanhu va nga khozela Nungungulu lomu sinagogeni, niku siku ni siku i wa wulawulisana ni lava a nga va kuma laha prasa.* 18 Kanilezvi a titlhari to kari ta filozofiya ta vaEpikure ni ta vaStoyike ti no sangula ku kanetisana naye. A vokari va waku: “Kasi inaloyi wa ku phuraphura i lava ku hi byela yini?” A van’wani vaku: “Ko khwatsi mukaneli wa vanungungulu va vamatiko.” Va wulile lezvo hakuva i wa kanela mahungu ya manene ya Jesu ni kuvhuka ka vafileko.+ 19 Hikwalaho, va no mu teka va famba naye Areyopagu, vaku: “Hi kombela ku u hi tlhamusela a gondzo leyi ya yiswa u kanelako. 20 Hakuva u wulawula zvilo zva ku a hi se tshuka hi zvizwa, makunu hi lava ku tiva ku zvi wula yini.” 21 Kunene, vontlhe a vaAtensi ni valuveli va nga hanya* seyo va wa nga tirisi a cikhati cabye ca kuhumula ka zvin’wani zvilo, ahandle ka ku hlawutelana kutani ku ingisela ya maswa. 22 Pawule i no yima cikari ka Areyopagu,+ aku:

“Vavanuna va Atensi, ndza zvi wona lezvaku zvilweni zvontlhe, n’wina mu wonekisa ku khwatsi ma va chava nguvhu vanungungulu* a ku hundza van’wani.+ 23 Hi cikombiso, laha ndzi nga kari ndzi hundza, ndzi cuwuka khwatsi lezvi mu zvi khozelako, ndzi no kuma alati gi tsalilweko ku: ‘Ga Nungungulu hi nga mu tiviko’. Hikwalaho, loyi mu mu khozelako na mu nga mu tivi, hi yaloyi ndzi mu kanelako ka n’wina. 24 A Nungungulu loyi a mahileko tiko ni zvilo zvontlhe zvi nga ka gona, a Hosi ya tilo ni misava,+ a nga tshami titempeleni ti mahilweko hi mandla;+ 25 ne a nga lavi ku tirelwa hi mandla ya vanhu a ku khwatsi o vhumala nchumu,+ hakuva hi yena a nyikako wutomi ka vanhu vontlhe ni kuhefemula+ ni zvilo zvontlhe. 26 Hi ka munhu mun’we, i no maha+ tixaka tontlhe ta vanhu kasi va hanya misaveni yontlhe,+ a veka ni zvikhati zvi yimisilweko a tlhela a yimisa mimbhingano ya lomu a vanhu va to hanya kona,+ 27 kasi va hlota Nungungulu, va phiphitela na va lavetela yena kala hakunene va mu kuma+ hambu lezvi, hi lisine, a kalako a nga hi kule ka mun’we ni mun’wani wa hina. 28 Hakuva ha yena, ha hanya, ha fambafamba, hi kona, a ku khwatsi hi lezvi va nga wula a vatsali vo kari va n’wina va tisimu, vaku: ‘Hinawu hi vana vakwe.’

29 “Hikwalaho, kota lezvi hi nga vana va Nungungulu,+ a hi faneli ku alakanya lezvaku Nungungulu i fana ni ouro, kutani prata, kutani ribye, kutani nchumu wun’wani wu vatlilweko hi munhu.+ 30 Lisine lezvaku Nungungulu a nga chelangi kota hi zvikhati zva kungativi loko;+ kanilezvi zvezvi i kari a kanela ka vanhu vontlhe matshan’wini wontlhe lezvaku va fanele ku ti sola. 31 Hakuva i vekile siku legi a to lamula hi gona+ a tiko hi kululama hi ku tirisa wanuna loyi a mu yimisileko. I no nyika a citiyisekiso ca lezvo ka vanhu vontlhe hi ku mu vhuxa hi ka vafileko.”+

32 Laha va ngazwa hi kuvhuka ka vafileko, a vokari va no sangula ku poyilela,+ a van’wani vaku: “Hi ta tlhela hi kuzwa kambe na u wulawula hi mahungu lawa.” 33 Hikwalaho Pawule i no suka a famba, 34 kanilezvi a vokari va no patsana naye va kholwa. Cikari ka vanhu lavo, ku wa hi na Dhiyonisi, a mulamuli wa le Areyopagu, ni wasati a vitaniwako ku hi Dhamari, ni van’wani vanhu.

18 Andzhako ka lezvo, Pawule i no suka Atensi aya Korinte. 2 Seyo i no kumana ni muJudha a vitaniwako ku hi Akwila+ a pswalelweko Pontu a nga ha hi ku chikela hi Italia zvin’we ni sati wakwe Prisila, hakuva Klaudhio i wa layile a vaJudha vontlhe lezvaku va huma Roma. Hikwalaho, Pawule i noya mutini wabye. 3 Kota lezvi va nga tiva ntiro walowu wa wun’we, i no tshama navo mutini wabye va tira zvin’we,+ hakuva vontlhe va wa hi vamahi va matenda. 4 Wontlhe masabhadho+ i waya sinagogeni a ya veka kanelo,*+ a kholwisa vaJudha ni vaGreki.

5 A cikhati leci Silasi+ na Timote+ va nga relela hi Makedhoniya, Pawule i no sangula ku ti tsitsirita nguvhu kugondziseni ka mhaka, a kustumunya ka vaJudha a va komba lezvaku Jesu hi Kristu.+ 6 Kanilezvi, kota lezvi va nga simama ku mu kaneta ni ku mu rukatela, i no zuza tinguwo takwe,+ aku kabye: “A nkhata wa n’wina a wuve hehla ka tihloko ta n’wina.+ Mina ndzi basile.+ Kusukela lezvi ndzi taya ka vanhu va matiko.”+ 7 Hikwalaho, i no suka laho* aya mutini wa wanuna a vitaniwako ku hi Titusi Justusi, a nga khozela Nungungulu, loyi a muti wakwe wu nga gamekene ni sinagoga. 8 Kanilezvi Krispusi,+ a murangeli wa sinagoga, i no kholwa ka Hosi, zvin’we ni vontlhe va ngango wakwe. A vaKorinte vo tala lava va nga muzwa, vonawu va no kholwa va bhabhatiswa. 9 Ahandle ka lezvo, a Hosi yi no byela Pawule lomu ka muwoniso ni wusiku, yiku: “U nga chavi, kanilezvi simama ku wulawula u nga miyeli, 10 hakuva ndzi na wena+ niku i hava a to ku vhukela laha ka kuza a ku bayisa. Hakuva ndzi na ni vanhu vo tala dhoropeni legi.” 11 Hikwalaho, i no tshama laho a lembe ni 6 wa tihweti na a gondzisa a mhaka ya Nungungulu cikari kabye.

12 A cikhati leci Galio a nga hi govhernadhori wa Akaya, a vaJudha va no bohana va vhukela Pawule va mu yisa tribhunali, 13 vaku: “A wanuna loyi i kucetela vanhu lezvaku va khozela Nungungulu hi makhozelela ma hambunyetako nayo.” 14 Kanilezvi Pawule na a ha lava ku vhulula nomu, Galio i no byela vaJudha, aku: “N’wina vaJudha, loku hakunene ci wa hi cigoho kutani nandzu wa hombe, ndzi wa ta mu ingisela. 15 Kanilezvi loku ku hi kukanetisana hi timhaka ni mavito ni nayo wa n’wina,+ xuxani ha n’wece. A ndzi lavi kuva mulamuli wa zvilo lezvi.” 16 Makunu i no va hlongola laha tribhunali. 17 Hikwalaho, vontlhe va no khoma Sostene,+ a murangeli wa sinagoga, va sangula ku muba kwalaha tribhunali. Kanilezvi Galio i wa nga lavi ku zvi nghenela.

18 Hambulezvo, andzhako ka kuva a tshamile masiku yo tala, Pawule i no salisana ni vamakabye a khilela ngalava aya Siriya na a heleketiwa hi Prisila na Akwila. I no tsemeta misisi le Kenkreya,+ hakuva i wa mahile cifungo. 19 Loku va chikele Efesusi, i no va siya laho, a nghena sinagogeni a wulawulisana ni vaJudha.+ 20 Hambu lezvi va nga mu khongotela lezvaku a tshama navo cikhati co leha, a nga vhumelangi 21 kanilezvi i no va salisa a gumesa aku: “Ndzi ta tlhela ndzi wuya ka n’wina, loku Jehovha* a zvi randza.” I no suka Efesusi hi ngalava 22 a relela aya Khezariya. I no kandziha* a ya losa bandla a gumesa a relela aya Antiyokiya.+

23 Andzhako ka loku a tshamile laho a cikhati co kari, i no suka a fambafamba tikweni gontlhe ga Galatiya ni Frijiya,+ a tiyisa vapizani vontlhe.+

24 Makunu a muJudha wa ku hi Apolosi,+ wa cipswalwa ca Alekzandriya, i no chikela Efesusi. I wa hi ni cinyikiwo ca kuwulawula niku i wa yi tiva khwatsi Mitsalo. 25 A wanuna loye i wa gondzisilwe ndleleni ya Jehovha,* niku a moya wu wa mu vhuna ku chivirika. I wa kanela ni ku gondzisa lisine xungetano hi Jesu, kanilezvi i wo tiva kubhabhatisa ka Johani basi. 26 I no sangula ku kanela hi kutiya lomu sinagogeni. Makunu laha Prisila na Akwila+ va nga muzwa, va no mu koka hi tlhelo va ya mu tlhamusela khwatsi a ndlela ya Nungungulu. 27 Kota lezvi a nga lava ku tsemakanya aya Akaya, a vamakabye va no tsalela vapizani va nga hi seyo, va va kuca lezvaku va mu amukela khwatsi. Loku a chikele, i no va vhuna nguvhu lava va nga kholwile hi kota ya tipswalo ta Nungungulu; 28 hakuva mahlweni ka vanhu, hi kuchivirika ka hombe, i wa kona a vaJudha hi kumbhelela, a va komba hi Mitsalo lezvaku Jesu hi Kristu.+

19 A cikhati leci Apolosi+ a nga hi le Korinte, Pawule i no tsemakanya matiko ya le kule ni bimbi kala Efesusi.+ I no ya kuma vapizani vo kari seyo, 2 aku kabye: “A cikhati leci mu nga kholwa, mu amukele a moya wo basa ke?”+ Va no mu hlamula, vaku: “Ne hi wa nga se tshuka hizwa lezvaku ku na ni moya wo basa.” 3 Pawule aku kabye: “Mu bhabhatisilwe hi kubhabhatisa ka mani?” Vaku: “Hi kubhabhatisa ka Johani.”+ 4 Pawule aku: “Johani i bhabhatisile kota cikombiso ca kutisola,+ a byela vanhu lezvaku va kholwa ka loyi a nga hata hi lendzhako kakwe,+ ku nga Jesu.” 5 Laha va ngazwa lezvo, va no bhabhatiswa hi vito ga Hosi Jesu. 6 A cikhati leci Pawule a nga va tlhateka mandla, va no amukela moya wo basa+ va sangula ku wulawula hi tirimi timbe ni ku phrofeta.+ 7 Vontlhe va wa hi cipimo ca 12 wa vavanuna.

8 Hi tihweti tinharu, Pawule i no nghena sinagogeni+ a wulawula hi kutiya na a kanela ni ku wulawulisana navo xungetano hi Mufumo wa Nungungulu.+ 9 Kanilezvi, a cikhati leci a vokari va nga ti nonohisa va ala ku kholwa,* va tlhela va wulawula kubiha xungetano hi Ndlela+ mahlweni ka citshungu, i no suka kabye+ zvin’we ni vapizani a ya kanela cikoleni ca Tirano siku ni siku. 10 I mbhetile malembe mambiri na a maha lezvo, kala a vaJudha ni vaGreki vontlhe va nga hanya provhinsia ya Azia vazwa a mhaka ya Hosi.

11 Nungungulu i no simama ku maha mitiro yo hlamalisa ya ntamu hi mandla ya Pawule,+ 12 laha ka ku hambu tinguwo ni tilesu leti ti nga henya miri wakwe, loku va ti yisa ka vababyi,+ a mababyi ma wo va tsika, ni mimoya ya kubiha yi wo huma kabye.+ 13 Kanilezvi a vaJudha vo kari lava va nga fambafamba va hlongola madhimoni vonawu va no zama ku tirisa vito ga Hosi Jesu ka lava va nga hi ni mimoya ya kubiha; va waku: “Ndza mu laya hi vito ga Jesu, loyi Pawule a kanelako ha yena, lezvaku mu huma.”+ 14 Ku wa hi ni 7 wa vana va muJudha a nga hi hosana ya vapristi, a vitaniwako ku hi Skevha, va nga kari va maha lezvo. 15 Kanilezvi a moya wa kubiha wu no va hlamula, wuku: “Jesu ndza mu tiva,+ Pawule yenawu ndza mu tiva;+ kanilezvi n’wina, hi n’wina vamani?” 16 Zvalezvo a wanuna loyi a nga hi ni moya wa kubiha i no va tlulela, a va tlatlalata hi mun’we mun’we, a va hlula. Hikwalaho, va no huma lomu ndlwini hi kutsutsuma na va nga bohangi nchumu, lezvo na va bayisilwe. 17 A mhaka leyi yi no tiviwa hi vaJudha ni vaGreki vontlhe lava va nga hanya Efesusi; vontlhe va no chava nguvhu, niku a vito ga Hosi Jesu gi no simama ku dhumiswa. 18 A kutala ka lava va nga kholwile va wata va ta wulela ni ku hlawutela mitiro yabye kubaseni. 19 Kunene, ni vanhu vo tala va nga tirile zva masalamuso va no neha mabhuku yabye va ta ma hisa kuwoneni ka vanhu vontlhe.+ A mabhuku lawo ma wa ringana a 50 000 wa zvingerengere zva prata. 20 Hikwalaho, hi ndlela ya ntamu, a mhaka ya Jehovha* yi no simama ku andza ni ku hlula.+

21 Andzhako ka loku ku mahekile a zvilo lezvi, Pawule i no boha moyeni wakwe lezvaku loku a hundzile hi Makedhoniya+ ni Akaya i taya Jerusalema,+ aku: “Loku ndzi yile seyo ndzi fanele kuya Roma kambe.”+ 22 Hikwalaho, i no ruma vavhuneteli vakwe va vambiri vaya Makedhoniya, ku nga Timote+ na Erastusi,+ yena a salanyana le provhinsia ya Azia.

23 Ka cikhati leco, ku no vhuka woyonga ya hombe+ hi kota ya Ndlela.+ 24 Hakuva a wanuna wo kari a vitaniwako ku hi Dhemetriyusi, loyi a nga nyekisa a prata a maha zvitempelana zva Artemisi i wa ganyisa nguvhu a vameseri.+ 25 I no tlhanganisa vavanuna lavo ni van’wani va nga maha ntiro lowo, aku kabye: “Vavanuna, ma zvi tiva khwatsi lezvaku a bhindzu legi hi gona gi hi ganyisako. 26 Makunu ma zvi wona ni ku zvizwa lezvaku Pawule i kholwisile citshungu ca hombe, na ku nga hi lomu Efesusi koce,+ kanilezvi ni provhinsia yontlhe ya Azia, a ci hambukisa, aku: A vanungungulu lava va mahilweko hi mandla a hi vanungungulu.+ 27 Ahandle ka lezvo, a bhindzu ga hina gi le mhangweni ya ku nga ha randziwi, na ku nga hi gona goce kanilezvi ni tempeli ya nungungulu wa hombe Artemisi va taku a hi ya nchumu, niku loyi a khozelwako lomu provhinsia yontlhe ya Azia ni misaveni yontlhe i ta mbhelelwa hi wudzundzo.” 28 Laha a vavanuna lavo va ngazwa lezvo, va no zangara nguvhu va banguleka, vaku: “Wa hombe Artemisi wa vaEfesusi!”

29 Hikwalaho, ku no vhuka gujeguje ya hombe lomu dhoropeni. Makunu a vanhu vontlhe va no tsutsuma vaya teyatro na va kokovisela Gayusi na Aristarkusi,+ a vatiri-kulobye va Pawule, lava va ngata hi Makedhoniya. 30 Pawule i wa zvi lava ku nghena cikari ka citshungu kanilezvi a vapizani a va mu vhumelelangi. 31 Hambu a varangeli vo kari va mibuzo ni mihlakano lava va nga tivana na Pawule va rumele gezu kakwe, va mu khongotela lezvaku a nga phazami a nghena lomu teyatro. 32 Kunene, a vokari va wa banguleka va wula lezvi, a van’wani va wula lezviyani, hakuva a citshungu ci wa hi ka woyonga niku a kutala kabye va wa nga zvi tivi ne ku va tlhanganele yini. 33 Va no humesa Alexandro cikari ka citshungu, a vaJudha va mu chovha aya phambeni. Makunu Alexandro i no tlakusa woko na a lava ku tlhamusela mhaka mahlweni ka vanhu. 34 Kanilezvi a cikhati leci va nga zvi pola lezvaku muJudha, vontlhe va no banguleka khati gin’we hi tihora timbiri, vaku: “Wa hombe Artemisi wa vaEfesusi!”

35 Laha a matsalani wa dhoropa a nga zvi kotile ku miyeta citshungu, i te: “Vavanuna va Efesusi, himani laha misaveni a kalako a nga zvi tivi lezvaku a dhoropa ga Efesusi hi gona muhlayisi wa tempeli ya Artemisi wa hombe ni wa cifananiso leci ci wileko hi le tilweni ke? 36 Kota lezvi a zvilo lezvi zvi nga hiko na ku kanetiwa, n’wina rulani; mu nga mahi matloti. 37 Hakuva a vavanuna lava mu tileko navo laha, a hi vaphangi va titempeli ne a va rukateli a nungungulu wa hina. 38 Hikwalaho, loku Dhemetriyusi+ ni lava a tirako navo va hi ni mhaka ni munhu, ma kona masiku ya ku xuxa timhaka, ni vagovhernadhori kambe va kona, a va fambe va ya kecarana seyo. 39 Kanilezvi loku mu lava zvo hundza lezvi, ti ta tsemiwa hubyeni yi yimisilweko. 40 Hakuva hakunene hi le mhangweni ya ku wuliwa lezvaku hi vhukele mufumo hi kota ya woyonga ya nyamutlha, hakuva a hi na cigelo co zwala ca kuva a citshungu ci hlengeletene laha ci maha woyonga.” 41 Andzhako ka ku wula lezvo, i no hangalasa citshungu.

20 Laha a woyonga yi nga mbhela, Pawule i no vitanisa vapizani a ta va tiyisa a gumesa a va salisa. Andzhako ka lezvo, i no sangula lipfhumba lakwe la kuya Makedhoniya. 2 Andzhako ka ku fambafamba matikweni lawo a wula magezu yo tala ya ku tiyisa lava va nga hi seyo, i no chikela Grekiya. 3 I no tshama laho tihweti tinharu, kanilezvi kota lezvi a vaJudha va nga mu xuxela cikungo+ ca ku mu daya a cikhati leci a nga lava kuya Siriya hi ngalava, i no zvi wona na zvi hi chukwana ku tlhela hi Makedhoniya. 4 I wa hi na Sopateri, a n’wana wa Pirusi wa le Bhereya, na Aristarkusi+ na Sekundo va le Tesalonika, na Gayusi wa le Dherbhe, na Timote,+ na Tikikusi+ na Trofimusi+ va le provhinsia ya Azia. 5 A vavanuna lava va no ranga va ya hi nyimela le Trowasi; 6 kanilezvi hi no suka Filipi hi ngalava andzhako ka masiku ya Tipawa to kala Comelo,+ niku ndzeni ka ntlhanu wa masiku, hi no chikela kabye le Trowasi, hi tshama laho a 7 wa masiku.

7 Ka siku go sangula ga vhiki, a cikhati leci hi nga tlhanganile kasi kuga zvakuga, Pawule i no sangula ku kanela kabye. Kota lezvi a nga lava ku suka hi mandziko wa kona, i no lehisa kanelo yakwe kala cikari ka wusiku. 8 Ku wa hi ni tikandiya to tala lomu saleni ya le hehla lomu hi nga tlhanganile kona. 9 A jaha go kari gi nga vitaniwa ku hi Etikusi gi nga tshamile laha janeleni gi no khomiwa hi wurongo ga hombe Pawule na a kari a kanela. Gi no hluliwa hi wurongo giwa hi le ka andari ya wumbiri va ta gi tlakula na gi file. 10 Kanilezvi Pawule i no relela, a ya barama hehla ka gona, a gi angarela,+ aku: “Nyimani ku maha tsanga-tsanga, hakuva wa hanya.”*+ 11 Makunu Pawule i no kandziha, a ya khema pawa aga. I no simama ku bhula navo hi cikhati co leha kala gica a gumesa a suka a famba. 12 Hikwalaho, va no teka jaha lego va famba nago na gi hanya, na va nga ti koti hi kutsaka.

13 Hi no nghena citimela* hi ranga hiya Asosi, laha hi nga xuva ku ya khileta Pawule, hakuva i wa hi leletele a ku maha lezvo, yena wutsumbu na a xuva kuya seyo hi minenge. 14 A cikhati leci a nga ta hi kuma le Asosi, hi no mu khileta hiya Mitilene. 15 Loku hi sukile hi laho ka siku gi nga landzela, hi no hundza hi kusuhani ni Kiyosi, kanilezvi hi mandziko wa kona hi no nyimanyana le Samosi, hi chikela Miletu hi siku gi nga landzela. 16 Pawule i wa bohile ku nga hundzi hi Efesusi+ kasi a nga hlweli lomu provhinsia ya Azia, hakuva i wa tsutsumela ku chikela Jerusalema+ hi siku ga Mubuzo wa Pentekosta, loku zvi koteka.

17 Kanilezvi, na a hi Miletu, i no vitanisa madhota ya bandla ga Efesusi. 18 Laha va nga chikela, i te ngalo kabye: “N’wina ma zvi tiva khwatsi lezvi ndzi nga hanyisa zvona cikari ka n’wina kusukela siku legi ndzi nga chikela lomu provhinsia ya Azia,+ 19 lezvaku ndzi tirele Hosi hi kutikoramisa kontlhe+ ni mihloti, na ndzi hi zvikaratweni hi kota ya zvikungo zva vaJudha. 20 A ndzi mu fihlelangi timhaka ti mu vhunako, ne a ndzi tsikangi ku mu gondzisa kubaseni+ ni hi muti ni muti.+ 21 Kanilezvi ndzi no nyika wukustumunyu go mbhelela ka vaJudha ni vaGreki xungetano hi kutisola+ mahlweni ka Nungungulu ni kukholwa ka Hosi ya hina Jesu.+ 22 Makunu, na ndzi susumetiwa* hi moya, ndziya Jerusalema, hambu lezvi ndzi kalako ndzi nga zvi tivi lezvi zvi to ndzi humelela seyo. 23 Leci ndzi ci tivako hi lezvaku ka dhoropa ni dhoropa a moya wo basa wa ndzi kustumunyela hi kuphindaphinda lezvaku a mapaxo ni tixanisa zvi ndzi rindzele.+ 24 Hambulezvo, a ndzi woni wutomi* ga mina kota ga lisima ka mina. Leci ndzi ci lwelako ku tsutsuma kala magumo,+ ni ku mbheta ntiro lowu ndzi wu amukeleko hi ka Hosi Jesu, wa ku nyika wukustumunyu go mbhelela ga mahungu ya manene ya tipswalo ta Nungungulu.

25 “Makunu ndza zvi tiva lezvaku n’wina n’wentlhe ndzi nga mu chumayela a Mufumo wa Nungungulu, mu nga ta ha yi wona kambe a nghohe ya mina. 26 Hikwalaho, ndzi mu vitanile kasi mu ta kustumunya nyamutlha lezvaku a ndzi na nandzu nkhateni wa vanhu vontlhe,+ 27 hakuva a ndzi mu fihlelangi a kungo* gontlhe ga Nungungulu.+ 28 Chelani kota ka n’wina wutsumbu+ ni ka ntlhambi wontlhe lowu a moya wo basa wu mu yimisileko kota vawoneleli va wona,+ kasi mu risa a bandla ga Nungungulu+ legi a gi xavileko hi nkhata wa N’wana wakwe.+ 29 Ndza zvi tiva lezvaku loku ndzi fambile ku ta sala ku nghena mahlolwa ma lambileko cikari ka n’wina,+ niku ma ta xanisa a ntlhambi, 30 niku cikari ka n’wina, ku ta humelela vanhu va to wulawula zvilo zvi gombonyekileko kasi va ti kokela vapizani.+

31 “Hikwalaho, tshamani na mu khindlimukile, na mu alakanya lezvaku hi malembe manharu,+ wusiku ni mumu, a ndzi tsikangi ku luleka a mun’we ni mun’wani wa n’wina hi mihloti. 32 Makunu ndza mu nyikela mandleni ya Nungungulu ni ka mhaka ya tipswalo takwe, ku nga mhaka leyi yi zvi kotako ku mu aka, ni ku mu nyika tshomba cikari ka va basisilweko vontlhe.+ 33 A ndzi navelangi prata, kutani ouro, ne tinguwo ta munhu.+ 34 Ma zvi tiva lezvaku ndzi no tira hi mandla ya mina kasi ndzi ti hlayisa+ ndzi tlhela ndzi hlayisa lava va nga hi na mina. 35 Zvilweni zvontlhe, ndzi no mu komba lezvaku hi ku ti tsitsiritisa lezvi,+ mu fanele ku vhunetela lava va nga ni gome, ni ku alakanya magezu ya Hosi Jesu, lawa yena wutsumbu a nga wula, aku: ‘Loyi a nyikako wa tsaka nguvhu+ a ku hundza loyi a amukelako.’”

36 Loku a mbhetile ku wula timhaka leti, i no khizama navo vontlhe a khongela. 37 Kunene, vontlhe va no rila nguvhu, va bharasara Pawule* va tlhela va mu pswopswa, 38 hakuva zvi wa va pandza timbilu nguvhunguvhu lezvi a nga va byelile, zvaku va nga ta ha yi wona kambe a nghohe yakwe.+ Va no mu heleketa kala citimeleni.

21 Laha hi kugumesa hi nga zvi kota ku hambana navo, hi no nghena citimeleni* hi famba hi kongoma Kose; hi mandziko wa kona hi noya Rodhe, hi suka hi laho hiya Patara. 2 A cikhati leci hi nga kuma citimela ci ngaya Fenikiya, hi no khilela hi famba. 3 Laha hi nga wona a cihlale* ca Kupero, hi no ci bela cibhabheni hi simama kuya Siriya hi gumesa hi ya nyima Tire, hakuva a citimela ci wa lava ku chisa a ndzhwalo laho. 4 Hi no lavetela vapizani hi va kuma hi tshama laho a 7 wa masiku. Kanilezvi na va tivisilwe hi moya, a vapizani va no byela Pawule hi kuphindaphinda lezvaku a nga kandziheli Jerusalema.+ 5 Hikwalaho, laha a cikhati ca hina ca ku tshama laho ci nga mbhela, hi no suka hi khoma ndlela. Vontlhe, a ku patsa ni vavasati ni vanana, va no hi heleketa kala hi huma dhoropeni. Makunu hi no khizama mbhirini ya bimbi hi khongela, 6 hi gumesa hi salisana navo. Hina hi no nghena citimeleni, vona va tlhela mitini yabye.

7 Hi no suka hi Tire hi famba kala Ptolemais. Loku hi chikele seyo, hi no losa vamakabye hi tshama navo siku gin’we. 8 Ka siku gi nga landzela, hi no suka hiya Khezariya hi ya nghena mutini wa muvhangeli Filipu, a nga hi mun’we wa lava va 7,+ hi tshama naye. 9 A wanuna loye i wa hi ni mune wa vanhwana* va nga kari va phrofeta.+ 10 Kanilezvi, na hi tshamile laho a masiku yo tala, a muphrofeti wo kari wa ku hi Agabhusi+ i no relela hi Judhiya. 11 I nota ka hina, a ta teka libhandi la Pawule a ti boha minenge ni mawoko, aku: “A moya wo basa wu ngalo: ‘A n’winyi wa libhandi leli i ta bohisiwa lezvi hi vaJudha le Jerusalema,+ va mu nyikela mandleni ya vanhu va matiko.’”+ 12 Makunu loku hi zwile lezvo, hina ni lava va nga hi laho, hi no mu khongotela lezvaku a ngayi Jerusalema. 13 Pawule i no hlamula, aku: “Zvini mu mahako hi ku rila ni ku zama ku ndzi mbheta ntamu? Zvi tiveni lezvaku, mina a ndzi longangi a ku ya bohiwa basi, kanilezvi ndzi longile hambu ni ku yafa le Jerusalema hi kota ya vito ga Hosi Jesu.”+ 14 Laha hi nga wona ku a nga vhumeli, hi no mu tsika,* hiku: “A kurandza ka Jehovha* a ku maheke.”

15 Andzhako ka lezvo, hi no longisela lipfhumba hi khoma ndlela hiya Jerusalema. 16 A vapizani vo kari va le Khezariya va no famba na hina, va hi heleketa ka Mnasoni wa le Kupero, a nga hi mun’we wa lava vo sangula ku kholwa, kasi hi ya tshama kaya kakwe. 17 A cikhati leci hi nga chikela Jerusalema, a vamakabye va no hi amukela hi kutsaka. 18 Hi mandziko wa kona, Pawule i no famba na hina ka Jakobe+ laha ku nga tlhangene a madhota wontlhe. 19 I no va losa a sangula ku va hlawutela zvontlhe lezvi Nungungulu a mahileko cikari ka matiko hi ntiro wakwe wa kuchumayela.

20 Loku va zwile lezvo va no dhumisa Nungungulu, kanilezvi va te ngalo kakwe: “Makabye, wa zvi tiva lezvaku ku na ni vaJudha va makume ya mazana va kholwileko niku vontlhe va pinyamela ku landzela Nayo.+ 21 Kanilezvi va zwile ku wena u gondzisile vaJudha vontlhe va hanyako cikari ka matiko lezvaku va tsika ku landzela Nayo wa Mosi, hi ku va byela lezvaku va nga va mahisi wukwera* a vana vabye ne va nga landzeli a mikhuwo.+ 22 Makunu hi ta kuyini hi mhaka leyi? Hakuva va ta zvizwa a ku u chikele. 23 Maha lezvi hi to ku byela: Laha, hi na ni mune wa vavanuna va ti bohileko hi cifungo. 24 Teka vavanuna lava u ya ti basisa zvin’we navo hi kuya hi nayo, u va hakhelela kasi va haluliwa tihloko. Makunu vontlhe va ta zvi tiva lezvaku lezvi va zvi zwako hi wena a hi lisine kanilezvi u famba hi fanelo ni lezvaku wenawu wa ingisa Nayo.+ 25 Kanilezvi, xungetano hi makholwa ma humako hi cikari ka matiko, hi va tsalele lezvaku va tsika lezvi zvi phahlelweko zvifananiso,+ ni nkhata,+ ni lezvi zvi fileko hi ku tlimbiwa,*+ ni wubhayi.”*+

26 Ka siku gi nga landzela, Pawule i no teka vavanuna lavo a ya ti basisa zvin’we navo hi kuya hi nayo,+ a gumesa a nghena tempeleni a tivisa siku legi a kubasiswa ku to gumesa hi gona ni cikhati ca ku nyikela a munyikelo wa mun’we ni mun’wani wabye.

27 Laha a 7 wa masiku ma nga lava ku mbhela, a vaJudha va le Azia va no mu wona tempeleni, va se kucetela citshungu contlhe, va mu khoma, 28 va banguleka, vaku: “Vavanuna va ka Izrayeli, hi vhuneni! A wanuna loyi hi loyi a gondzisako vanhu vontlhe matshan’wini wontlhe lezvaku va vhukela vanhu va hina, ni Nayo wa hina, ni wutshamu legi. Ahandle ka lezvo, i zile a neha vaGreki lomu tempeleni, a nyenyezisa wutshamu legi go basa.”+ 29 Hakuva va wa wonile Pawule le dhoropeni na a hi na Trofimusi+ wa le Efesusi, va se alakanya lezvaku i mu nghenisile lomu tempeleni. 30 Ku no vhuka woyonga dhoropeni gontlhe, a vanhu vata khatigin’we va ta khoma Pawule va mu kokovisa, va huma naye lomu tempeleni; zvalezvo ku no vhaliwa a tivati ta tempeli. 31 Na va ha lava ku mu daya, a mhaka ya lezvaku a dhoropa gontlhe ga Jerusalema gi lomu ka woyonga yi no chikela tindleveni ta komandante wa masochwa. 32 I no tekela ku teka masochwa ni tihosana ta wona va tsutsuma vaya leyo. A cikhati leci va nga wona komandante ni masochwa, va no nyima kuba Pawule.

33 A komandante wa masochwa i no ta mu khoma, a laya lezvaku a bohiwa hi machini mambiri,+ a wutisa ku hi yena mani niku cini a nga goha. 34 Kanilezvi a vokari cikari ka citshungu va wa banguleka va wula lezvi, a van’wani va wula lezviyani. Makunu lezvi a nga vhumala a hloko ya lezvi va nga kari va wula hi kota ya guwa, i no laya lezvaku va famba naye kwarteli. 35 Kanilezvi a cikhati leci Pawule a nga chikela laha zvikadheni, a masochwa ma noya hi ku mu tlakula hi kota ya lezvi a citshungu ci nga mu lambele, 36 hakuva a citshungu ci wa va landza na ci banguleka, ciku: “Dayani loye!”

37 Laha Pawule a nga lava ku nghenisiwa lomu kwarteli, i no byela komandante wa masochwa, aku: “Ndza vhumelelwa ku wula nchumu ka wena?” Aku kakwe: “Wa ci tiva ciGreki? 38 Kona a hi wena muGibhite loyi a nga kucetela vanhu masikwini ma hundzileko lezvaku va vhukela mufumo, a yisa a 4000 wa zvigevenga ciwuleni?” 39 Pawule aku: “Mina ndzi muJudha+ wa le Tarsusi,+ gi nga dhoropa gi dhumileko ga Kilikiya. Hikwalaho, ndza ku khongotela lezvaku u ndzi tsika ndzi wulawula ni vanhu.” 40 Laha a nga mu vhumelela, Pawule i no yima laha zvikadheni, a miyeta vanhu hi woko; a cikhati leci va nga miyela, i no wulawula navo hi ciHebheru,+ aku:

22 “Vavanuna, vamakabye, na n’wina vapapayi, zvezvi ndzi ingiseleni na ndzi ti yimela mahlweni ka n’wina.”+ 2 A cikhati leci va ngazwa lezvaku i wulawula navo hi ciHebheru, va no miyela vaku kape, Pawule aku: 3 “Mina ndzi muJudha+ a pswalilweko le Tarsusi wa Kilikiya,+ kanilezvi ndzi gondzisilwe dhoropeni galegi mikondzweni ya Gamaliyeli,+ ndzi gondzisiwa a ku wu tiva khwatsi a Nayo wa vakokwani va hina,+ na ndzi tirela Nungungulu hi kutitsitsirita a ku fana ni lezvi n’wina n’wentlhe mu mahako nyamutlha.+ 4 Ndzi wa va xanisa kala kufeni lava va nga landzela a Ndlela leyi, ndzi boha vavanuna ni vavasati ndzi va vhalela paxweni;+ 5 hambu a mupristi wa hombe ni hubye yontlhe ya madhota va zvi tiva lezvo. Hi vona kambe va nga ndzi nyika mapapilo ya kuya khoma vamakabye le Dhamasku. Ndzi no suka ndzi famba kasi ndzi ya boha lava va nga hi leyo ndzi wuya navo Jerusalema, kasi va ta tsayisiwa.

6 “Kanilezvi laha ndzi nga kari ndzi famba, na ndzi tshinela Dhamasku, hi citshuketi ku no woneka a kuhatima ka hombe hi le tilweni hi cikhati ca ni mumu, ku woninga hehla ka mina.+ 7 Ndzi nowa lahasi, ndzizwa gezu giku ka mina: ‘Sawule, Sawule, u ndzi xanisela yini?’ 8 Ndzi no hlamula, ndziku: ‘Hi wena mani bava?’ Aku ka mina: ‘Hi mina Jesu wa le Nazareta loyi u mu xanisako.’ 9 A vavanuna lava va nga hi na mina va ku wonile a kuhatima loko, kanilezvi a gezu ga loyi a nga wulawula na mina a va gi zwangi. 10 Makunu ndzi no wutisa, ndziku: ‘Hosi, ndzi kuyini?’ A Hosi yiku ka mina: ‘Suka, u nghena Dhamasku, u ta ya byeliwa zvontlhe lezvi u faneleko ku maha.’+ 11 Kanilezvi kota lezvi ndzi nga kala ndzi nga woni nchumu hi kota ya kungangamela ka kuhatima, lava ndzi nga hi navo va no ndzi khometela hi woko kala ndzi chikela Dhamasku.

12 “Makunu Ananiyasi, a wanuna wo chava Nungungulu a nga ti karatela ku landzela Nayo, loyi a dzundziwako hi vaJudha vontlhe va hanyako seyo, 13 i nota ka mina, a ta yima reveni ga mina, aku: ‘Sawule, makabye, tlhela u wona!’ Zvalezvo a matihlo ya mina ma no vhululeka* ndzi mu wona.+ 14 Aku ka mina: ‘Nungungulu wa vakokwani va hina i ku hlawulile kasi u tiva a kurandza kakwe, u wona loyi wakululama,+ ni kuzwa a gezu ga nomu wakwe, 15 hakuva u ta kustumunya ha yena ka vanhu vontlhe hi zvilo lezvi u nga zvi wona ni ku zvizwa.+ 16 Makunu u hlwelela yini? Suka u bhabhatiswa, u hlazva zviwonho zva wena+ hi ku khongela vitweni gakwe.’+

17 “Kanilezvi laha ndzi nga tlhelile Jerusalema,+ na ndzi hi lomu tempeleni ndzi khongela, ndzi no mahisa ku khwatsi ndzo lora 18 ndzi mu wona na aku ka mina: ‘Hatlisa u huma lomu Jerusalema zvezvi, hakuva va nga ta kholwa a wukustumunyu legi u to va nyika hi mina.’+ 19 Mina ndziku kakwe: ‘Hosi, va zvi tiva khwatsi lezvaku ndzi wa nghena masinagogeni wontlhe ndzi khoma ni kuba lava va kholwako ka wena;+ 20 ni lezvaku a cikhati leci ku nga halatiwa a nkhata wa Stefani, a kustumunyu wa wena, ndzi wa hi laho ndzi zvi sekela ndzi tlhela ndzi hlayisa tinguwo ta lava va nga mu daya.’+ 21 Hambulezvo, i te ngalo ka mina: ‘Famba, hakuva ndzi ta ku rumela matikweni ya le kule.’”+

22 Va no miyela va mu ingisela kala laha. Andzhako ka lezvo, va no banguleka, vaku: “Fuvisani a wanuna loye laha misaveni, hakuva a nga ringani ku hanya!” 23 Kota lezvi va nga banguleka, va tlhatlhelela a mabhaji va hoxa, va palatela ntshuri le hehla,+ 24 a komandante wa masochwa i no laya lezvaku Pawule a nghenisiwa kwarteli a ya xuxisiwa na a biwa, kasi a tiva leci hakunene ci mahako vanhu va vhukela Pawule hi ndlela leyo. 25 Kanilezvi a cikhati leci va nga mu boha kasi va muba, Pawule i no wutisa a hosana ya masochwa yi nga yimile laho, aku: “A nayo wa mu vhumelela lezvaku muba a muRoma* wo kala a nga koniwangi* ke?”+ 26 A cikhati leci a hosana ya masochwa yi ngazwa lezvo, yi noya ka komandante, yi yaku: “Zvini u lavako ku maha? Phela a wanuna loyi muRoma.” 27 A komandante i noya ka Pawule, a yaku: “Hi nga ndzi byela, u muRoma ke?” Pawule aku: “Ina.” 28 A komandante wa masochwa i no hlamula, aku: “A tifanelo leti ta wusumbulwa ndzi ti xavile hi mali yo tala.” Pawule aku: “Kanilezvi mina ndzi pswalilwe nato.”+

29 Lava va nga lava ku mu xuxisa na va muba va no suka kakwe hi cihatla. A komandante wa masochwa yenawu i no chava laha a nga tiva lezvaku Pawule muRoma, ni lezvi a nga mu bohile hi machini.+

30 Kanilezvi hi mandziko wa kona, na a lava ku tiva lisine la ku hikuyini a vaJudha va lumbetako Pawule, i no mu tlhatlha, a laya lezvaku a vapristi lava va tihosana ni yontlhe a Tribhunali ya Hombe va tlhangana. Makunu i no relela na Pawule a ta mu yimisa cikari kabye.+

23 Pawule i no cuwukisisa a Tribhunali ya Hombe, aku ngalo: “Vavanuna, vamakabye, ndzi hanyile mahlweni ka Nungungulu na ndzi hi ni livhalo li basileko+ hi kumbhelela kala nyamutlha.” 2 A cikhati leci Ananiyasi, a mupristi wa hombe, a ngazwa lezvo, i no laya lava va nga hi kusuhani na Pawule lezvaku va muba nomu. 3 Pawule aku kakwe: “Nungungulu i ta kuba, wena khurisi ndziwena u pendilweko hi mhemba.* Hikuyini wena loyi u tshamileko laha kasi ku ndzi lamula hi Nayo u hambunyetako Nayo hi ku laya lezvaku ndzi biwa?” 4 Lava va nga yimile kusuhani naye, va te: “Wo ruka mupristi wa hombe wa Nungungulu?” 5 Pawule aku: “Vamakabye, ndzi wa nga zvi tivi lezvaku mupristi wa hombe. Hakuva ku tsalilwe ku: ‘U nga wulawuli kubiha hi hosi ya vanhu va wena.’”+

6 Makunu Pawule na a tiva lezvaku a vokari vabye vaSadhusi kanilezvi a van’wani vaFarisi, i no tlakusa gezu lomu Tribhunali ya Hombe, aku: “Vamakabye, mina ndzi muFarisi,+ a n’wana wa vaFarisi. Ndzi xuxisiwa hi kota ya kutsumba ka kuvhuka ka vafileko.” 7 Laha a nga wula lezvo, a vaFarisi ni vaSadhusi va no sangula ku kanetisana, a hubye yi avana. 8 Hakuva a vaSadhusi ve a ku na kuvhuka ka vafileko, a ku na ngilozi, ne moya, kanilezvi a vaFarisi va vhumela* a zvilo lezvo zvontlhe.+ 9 Hikwalaho, ku no vhuka guwa ga hombe, niku a vatsali vo kari va ntlawa wa vaFarisi va no suka va yima va sangula ku kanetisana nguvhu, vaku: “A hi woni zvahava ka wanuna loyi, kanilezvi loku a wulawulile ni moya kutani ngilozi+ . . .” 10 Kota lezvi va nga simama ku kanetisana nguvhu va nga nyimi, a komandante wa masochwa i no chava ku Pawule i ta phatlulelwa. Hikwalaho, i no ruma masochwa lezvaku ma famba ma ya mu wutla cikari kabye ma wuya naye kwarteli.

11 Kanilezvi ni wusiku ga kona, a Hosi yi no yima reveni gakwe, yiku: “Tiya hlanha!+ Hakuva a ku khwatsi hi lezvi u nyikako wukustumunyu go mbhelela xungetano hi mina Jerusalema, u ta ya nyika wukustumunyu kambe ni le Roma.”+

12 Loku gi cile, a vaJudha va no xuxa cikungo, va ti boha hi cihlambanyo,* vaku va nga taga ne kunwa kala va daya Pawule. 13 A vavanuna lava va nga hlambanyile ku maha lezvo va wa hi 40 ni ku hundza. 14 A vavanuna lava va noya ka vapristi lava va tihosana ni ka madhota, va yaku: “Hi hlambanyile lezvaku hi nga taga nchumu kala hi daya Pawule. 15 Makunu n’wina ni Tribhunali ya Hombe byelani a komandante wa masochwa lezvaku a neha Pawule seno ka n’wina, a ku khwatsi hi loku mu lava ku hlolisisa khwatsi a mhaka yakwe. Kanilezvi na a nga se tshinela kusuhani, hina hi tava hi longile ku mu daya.”

16 Kanilezvi a n’wana wa makabye wa cisati wa Pawule i nozwa a cikungo leci va nga maha, hikwalaho i no nghena kwarteli a hlawutela Pawule. 17 Makunu Pawule i no vitana a yin’we ya tihosana ta masochwa, a taku: “Heleketa mufana loyi ka komandante, hakuva zvi kona a lavako ku mu byela.” 18 Hikwalaho, i no mu teka a famba naye ka komandante, a yaku: “Pawule loyi wa cibochwa i ndzi vitanile, a ndzi kombela lezvaku ndzita ni mufana loyi ka wena hakuva zvi kona a lavako ku ku byela.” 19 A komandante wa masochwa i no mu khoma hi woko, a mu koka hi tlhelo, a ya mu wutisa, aku: “Zvini u lavako ku ndzi byela?” 20 A mufana aku: “A vaJudha va zwanene a ku ta ku kombela lezvaku mandziko u neha Pawule Tribhunali ya Hombe, a ku khwatsi vo lava ku hlolisisa khwatsi a mhaka yakwe.+ 21 Kanilezvi u nga vhumeli, hakuva ku na ni 40 wa vavanuna ni ku hundza va tshamileko va mu lavelela, niku va ti bohile hi cihlambanyo lezvaku va nga taga ne kunwa kala va mu daya.+ Va longile, vo rindzela ku u va vhumelela basi.” 22 A komandante wa masochwa i no mu laya, aku: “U nga byeli munhu lezvaku u ndzi byelile a timhaka leti”. I no gumesa a mu tsika a famba.

23 I no vitanisa a tihosana timbiri ta masochwa, a taku: “Longiselani a 200 wa masochwa, ni 70 wa vakhileli va mahaxi, ni 200 wa vakhomi va matlhari, kasi vaya Khezariya hi hora ya wunharu ya wusiku.* 24 A cin’wani kambe, longiselani ni mahaxi ya ku khilelisa Pawule kasi a chikela khwatsi ka govhernadhori Felisi.” 25 I no tsala papilo gi nga hi ni magezu lawa:

26 “Klaudhio Lisiya, ka Govhernadhori Felisi a Dhumileko, ndza ku losa: Xewe! 27 A wanuna loyi i khomilwe hi vaJudha niku ku wa kiyela kutsongwani kasi va mu daya, kanilezvi mina ni masochwa ya mina hi no hatla hi ya mu tlhatlhisa,+ hakuva ndzi tivile lezvaku muRoma.+ 28 Na ndzi lava ku tiva leci a nga goha a kuza va mu kecara, ndzi no famba naye Tribhunali yabye ya Hombe.+ 29 Ndzi no kuma lezvaku va mu lumbeta zvilo zvi yelanako ni Nayo wabye,+ hambulezvo a nga gohangi nchumu wu ringanako ku a dawa kutani ku vhalelwa paxweni. 30 Kanilezvi laha ndzi nga byeliwa lezvaku va mu xuxele cikungo ca ku mu daya,+ ndzi no hatla ndzi mu rumela ka wena, ndzi laya lava va mu lumbetako lezvaku va ta zvi wula ka wena.”

31 Hikwalaho, a masochwa ma no maha lezvi ma nga byeliwa, ma teka Pawule+ ma famba naye Antipatri ni wusiku. 32 Ka siku gi nga landzela, ma no mu tsika a famba ni vakhileli va mahaxi, wona ma tlhela kwarteli. 33 A vakhileli va mahaxi va no chikela Khezariya va nyikela papilo ka govhernadhori, va tlhela va mu hendleleta Pawule. 34 I no teka papilo a lera, a wutisa ku Pawule ita hi ka provhinsia muni. Laha a nga tiva lezvaku wa le Kilikiya,+ 35 i te ngalo kakwe: “Ndzi ta ingisela mhaka ya wena yontlhe a cikhati leci va to chikela lava va ku kecarako.”+ Andzhako ka lezvo, i no laya lezvaku a vhalelwa ndlwini ya wuhosi ya Herodhi.

24 Andzhako ka ntlhanu wa masiku, Ananiyasi, a mupristi wa hombe,+ i no relela ni madhota yo kari ni mukaneli* a vitaniwako ku hi Tertuli, va ya kecara Pawule ka govhernadhori.+ 2 A cikhati leci a nga vitaniwa, Tertuli i no sangula ku kecara Pawule, aku:

“Hi hanya kuruleni ka hombe hi kota ya wena ni lezvi u lulamisako zvilo hi wutlhari tikweni legi; 3 ka zvikhati zvontlhe ni matshan’wini wontlhe ha zvi tiva lezvo, Felisi, a Dhumileko, hi kubonga ka hombe. 4 Kanilezvi, kasi ndzi nga ha ku geli cikhati, ndza ku khongotela lezvaku, hi wuxinji ga wena, u hizwa zva cikhatanyana. 5 Hakuva hi polile lezvaku a wanuna loyi i ntungu;*+ i kucetela vaJudha vontlhe va akileko misaveni yontlhe lezvaku va vhukela mufumo,+ niku hi yena murangeli wa hombe wa wukhongeli ga vaNazareta.+ 6 I tlhelile a zama ku nyenyezisa tempeli, hikwalaho hi no mu khoma.+ 7 *—— 8 A cikhati leci u to mu hlola ha wece, u ta zvi kuma zvontlhe lezvi hi mu kecarako hi zvona.”

9 A vaJudha va no mu sekela, va ku lezvo lisine. 10 A cikhati leci govhernadhori a nga kombeta Pawule lezvaku a wulawula, i no hlamula, aku:

“Lezvi ndzi zvi tivako lezvaku a tiko legi gi na ni malembe yo tala na gi lamuliwa hi wena, ndza wulawula mahlweni ka wena ndzi ti yimela na ndzi xalele.+ 11 Kota lezvi u nga zvi hlolako ha wece u zvi kuma, a ku hundzi 12 wa masiku na ndzi yile Jerusalema ndzi ya khozela;+ 12 a va ndzi kumangi na ndzi kanetisana ni munhu lomu tempeleni, ne ku vhuxa woyonga masinagogeni, ne hambu lomu dhoropeni. 13 Ne a va nge tiyisi lezvaku lezvi va ndzi kecarako hi zvona zvezvi lisine. 14 Kanilezvi ndza vhumela ka wena lezvaku ndzi khozela Nungungulu wa vakokwani va mina hi ndlela leyi a vavanuna lava va nge wukhongeli giswa,+ na ndzi kholwa zvontlhe lezvi zvi tsalilweko Nayweni ni ka Vaphrofeti.+ 15 Ndzi na ni kutsumba ka Nungungulu, loku a vavanuna lava vonawu va nga nako, ka lezvaku ku tava kona a kuvhuka+ ka valulamileko ni vangalulamangiko.+ 16 Hi kota ya lezvo, contlhe cikhati ndzi ti karatela ku hlayisa livhalo li basileko* mahlweni ka Nungungulu ni ka vanhu.+ 17 Loku ku hundzile malembe yo tala, ndzi nota na ndzi neha zvinyikiwo ka vanhu va mina,+ ni ku ta maha minyikelo. 18 Na ndza ha maha zvilo lezvo, va no ta ndzi kuma lomu tempeleni na ndzi ti basisile hi kuya hi nayo,+ na ndzi nga hi na citshungu ne ku vanga woyonga. Kanilezvi ku wa hi ni vaJudha vo kari va ngata hi provhinsia ya Azia, 19 lava va nga fanele ku ngha va hi mahlweni ka wena va ndzi kecara loku hakunene a vova ni timhaka na mina.+ 20 Kutani a vavanuna lava laha va wa wule ha voce lezvaku kubiha muni va nga ku kuma a cikhati leci ndzi nga hi mahlweni ka Tribhunali ya Hombe, 21 a ku tsika lezvi ndzi nga wula a cikhati leci ndzi nga yimile cikari kabye, ndziku: ‘Ndzi xuxisiwa mahlweni ka n’wina yamutlha hi kota ya kuvhuka ka vafileko!’”+

22 Kanilezvi, kota lezvi Felisi a nga ti tiva khwatsi a timhaka xungetano hi Ndlela leyi,+ i no va tlhelisa, aku: “A cikhati leci komandante Lisiya a to relela ata seno, ndzi ta tsema a mhaka ya n’wina.” 23 I no laya hosana ya masochwa lezvaku yi vhalela Pawule, kanilezvi yi mu vhumelela ku ti mahela zvakwe, ni ku tsika vanhu vakwe va mu hlayisa.

24 Andzhako ka masiku yo kari, ku nota Felisi ni sati wakwe Drusila, a nga hi muJudha, a ta vitanisa Pawule kasi ku mu ingisela na a wulawula hi kukholwa ka Kristu Jesu.+ 25 Kanilezvi laha Pawule a nga wulawula hi kululama ni kutikhoma ni kulamula loku ku tako,+ Felisi i no chava, aku: “Nghana u tlhela, ndzi ta ku vitana kambe loku ndzi kuma cikhati ca cinene.” 26 Ka cikhati caleco i wa tsumba ku Pawule i ta mu nyika mali. Hi kota ya lezvo, i no mu vitanisa makhati yo tala a ta bhula naye. 27 Kanilezvi loku ku hundzile malembe mambiri, Felisi i no vhaletwa hi Porkiyu Festu. Kota lezvi Felisi a nga lava ku dzundziwa hi vaJudha,+ i no tsika Pawule paxweni.

25 Hikwalaho, andzhako ka loku a chikele provhinsia a amukela wuhosi, Festu+ i no tshama masiku manharu Khezariya a gumesa a kandziha aya Jerusalema. 2 Makunu a vapristi lava va tihosana ni tihosana ta vaJudha va no kecara Pawule mahlweni kakwe.+ Hikwalaho, va no khongotela Festu 3 lezvaku a va mahela wuxinji a vitanisa Pawule Jerusalema. Kanilezvi va wa mahile cikungo ca ku tshama va lavelela Pawule laha ndleleni kasi va mu daya.+ 4 Festu i no hlamula lezvaku Pawule i fanele ku tshama Khezariya, niku yenawu i wa ta tlhela seyo ndzeni ka cikhatana. 5 I no engeta, aku: “Tsikani vahombe va n’wina va relela na mina kasi va ya mu kecara loku hakunene ci hi kona a nga goha.”+

6 Hikwalaho, na a tshamile a cipimo ca 8 kutani 10 wa masiku cikari kabye, i no relela a tlhela Khezariya. Hi mandziko wa kona, i no tshama citshan’wini ca kulamula a laya lezvaku Pawule a tisiwa kakwe. 7 A cikhati leci a nga nghena, a vaJudha lava va nga relele hi Jerusalema va no yima va mu randzela, va sangula ku mu kecara hi minandzu yo tala ya hombe, ya ku ne va wa nga zvi koti ku yi tiyisa.+

8 Kanilezvi Pawule i no ti yimela, aku: “A ndzi gohelangi Nayo wa vaJudha, ne tempeli, ne hambu Khezari.”+ 9 Kanilezvi Festu, na a lava ku tsakelwa hi vaJudha,+ i no wutisa Pawule, aku: “Wa zvi lava kuya Jerusalema u ya lamuliwa seyo mahlweni ka mina hi kota ya timhaka leti ke?” 10 Pawule i no hlamula, aku: “Ndzi yimile mahlweni ka citshamu ca kulamula ca Khezari, hi kona ndzi faneleko ku lamuliwa kona. A ndzi gohangi nchumu ka vaJudha, kota lezvi wenawu u zvi wonako. 11 Loku hakunene ndzi hi mugohi ni loku ndzi wonhile nchumu wu ringanako ku ndzifa,+ a ndzi ali kufa; kanilezvi loku ci nga hi kona ci tiyisako lezvi a vavanuna lava va ndzi lumbetako, a ku na munhu a to ndzi nyikela kabye hi ku fela ku va tsakisa. Ndzi kombela ku yisa mhaka ya mina ka Khezari!”+ 12 Andzhako ka loku Festu a bhulisene ni madhota yakwe, i no hlamula, aku: “U kombele ku yisa mhaka ya wena ka Khezari; u taya ka Khezari.”

13 Andzhako ka loku ku hundzile masiku yo kari, hosi Agripa na Bhernike va noya Khezariya va ya losa Festu. 14 Kota lezvi va nga tshama laho a masiku yo tala, Festu i no hlawutela hosi a mhaka ya Pawule, aku:

“Ku na ni munhu laha a nga siyiwa paxweni hi Felisi, 15 loyi a vapristi lava va tihosana ni madhota ya vaJudha va nga mu kecara+ ka mina a cikhati leci ndzi nga hi Jerusalema, va kombela lezvaku a koniwa. 16 Kanilezvi ndzi no hlamula, ndziku: A nayo wa vaRoma a wu vhumeli ku tsayisa munhu na a nga se wonana ni lava va mu kecarako, kasi a kuma cikhati ca ku ti yimela ka mhaka leyi a kecariwako.+ 17 Hikwalaho, loku va chikele laha, ndzi no hatlisa ndzi tshama citshan’wini ca kulamula hi siku gi nga landzela, ndzi laya lezvaku ku tisiwa a wanuna loye. 18 A cikhati leci lava va nga mu kecara va nga suka va yima, a va mu lumbetangi ne cilo cin’we co biha ka lezvi ndzi nga alakanya ku hi zvona a nga goha.+ 19 Va wo kanetisana hi timhaka ta wukhongeli gabye basi,+ ni hi munhu loyi a fileko, a vitaniwako ku hi Jesu, loyi Pawule a tiyisako aku wa hanya.+ 20 Makunu laha ndzi nga tsandzeka ku xuxa a mhaka leyi, ndzi no mu wutisa lezvaku wa zvi lava kuya Jerusalema a ya lamuliwa seyo hi kota ya timhaka leti ke.+ 21 Kanilezvi a cikhati leci Pawule a nga kombela ku simama paxweni kasi a mhaka yakwe yi tsemiwa hi Augustu* wo Sangula,+ ndzi no laya lezvaku a vhalelwa kala ndzi mu yisa ka Khezari.”

22 Agripa i no byela Festu, aku: “Ndza zvi lava ku muzwa wanuna loye.”+ Festu aku: “U ta muzwa mandziko.” 23 Hikwalaho, hi mandziko wa kona, Agripa na Bhernike va nota hi wukosi ga hombe, va ta nghena saleni ya mitlhangano na va hi ni vakomandante va masochwa zvin’we ni vahombe va lomu dhoropeni. Festu i no laya lezvaku Pawule a tisiwa, 24 a gumesa aku: “Hosi Agripa na n’wina n’wentlhe mu nga na hina laha, ma mu wona a wanuna loyi, hi loyi a citshungu contlhe ca vaJudha ci nga mu kecara ka mina le Jerusalema ni kwalaha kambe, ci banguleka ciku a nga ha faneli ku hanya.+ 25 Kanilezvi ndzi wonile lezvaku a nga mahangi nchumu wu ringanako ku a dawa.+ Hikwalaho, a cikhati leci a nga kombela ku yisa mhaka yakwe ka Augustu wo Sangula, ndzi no vhumela. 26 Kanilezvi a ndzi na mhaka yo tiya yo tsalela a Hosi ya mina xungetano hi yena. Hikwalaho, ndzi mu tisile mahlweni ka n’wina n’wentlhe, nguvhunguvhu ka wena hosi Agripa, kasi loku a xuxisilwe ndzi ta kuma co tsala. 27 Hakuva ka mina a zvi zwali a ku rumela cibochwa na ndzi nga wuli lezvi ci kecariwako hi zvona.”

26 Agripa+ i te ngalo ka Pawule: “Wa vhumelelwa a ku wulawula kasi u ti yimela.” Pawule i no nawuluta canja, a sangula ku ti yimela, aku:

2 “Xungetano hi zvontlhe lezvi a vaJudha va ndzi kecarako ha zvona,+ hosi Agripa, ndza tsaka hi ku yima mahlweni ka wena nyamutlha kasi ndzi ti yimela, 3 nguvhunguvhu lezvi u yi tivako khwatsi a mikhuwo yontlhe ya vaJudha ni timhaka leti va kanetisanako hi tona. Hikwalaho, ndza ku khongotela lezvaku u ndzi ingisela hi lihlazva-mbilu.

4 “Kunene, xungetano hi lezvi ndzi hanyisileko zvona kusukela loku ndza ha hi jaha, cikari ka va ka hina ni le Jerusalema, zva tiviwa khwatsi hi vaJudha vontlhe+ 5 lava va ndzi tivileko kale — va nga kustumunya loku va zvi lava — lezvaku ndzi hanyile kota muFarisi+ ni lezvaku a wukhongeli ga hina gi wa hi ni milayo yo bindza nguvhu a ku hundza gontlhe.+ 6 Kanilezvi, zvezvi ndzi laha kulamulweni hi kota ya ku kholwa citsumbiso leci Nungungulu a ci mahileko ka vakokwani va hina;+ 7 ku nga citsumbiso caleci a 12 wa tixaka ta hina ti rindzelako ku wona kutatiseka ka cona hi ku ti tsitsirita ntirweni wa Nungungulu wusiku ni mumu. Makunu wena hosi, a vaJudha va ndzi kecara hi kota ya kutsumba loku.+

8 “Hikuyini n’wina mu kalako mu nga kholwi lezvaku Nungungulu wa vhuxa vafileko? 9 Phela minawu ndzi wa kholwa ku ndzi fanele ku vhukela a vito ga Jesu wa le Nazareta hi tindlela tontlhe. 10 Hi zvalezvo ndzi nga maha le Jerusalema. Ndzi no khotsela vobasa vo tala mapaxweni+ hakuva ndzi wa nyikilwe ntamu hi vapristi lava va tihosana;+ niku a cikhati leci va nga lava ku dawa ndzi wa sekela, ndziku: Va wa dawe. 11 Ndzi no zama ku va tsikisa kukholwa hi ku va xanisa makhati yo tala masinagogeni wontlhe. Ndzi noza ndziya ni madhoropeni ya le kule ndzi ya va xanisa hi kota ya lezvi ndzi nga va zangarele nguvhu.

12 “Hi zvalezvo ndzi nga yela zvona Dhamasku na ndzi rumilwe ni ku nyikiwa ntamu hi vapristi lava va tihosana. 13 Na ndzi hi laha ndleleni ni mumu, wena hosi, ndzi no wona kuhatima ko ngangamela ko hundza ni loku ka gambo na kuta hi le tilweni, ku woninga hehla ka mina ni ka lava ndzi nga famba navo.+ 14 Makunu laha hontlheni hi nga wile lahasi, ndzi nozwa gezu na gi wulawula na mina hi ciHebheru, giku: ‘Sawule, Sawule, u ndzi xanisela yini? U ta ti bayisa hi ku tshamela ku khavetela tlonga.’* 15 Kanilezvi mina ndzi te ngalo: ‘Hi wena mani bava?’ A Hosi yiku: ‘Hi mina Jesu loyi u mu xanisako. 16 Kanilezvi suka u yima hi minenge ya wena. Hakuva ndzi wonekile ka wena kasi ndzi ku hlawula lezvaku uva nandza ga mina ni kustumunyu wa zvilo lezvi u zvi wonileko ni lezvi ndza ha lavako ku ku komba xungetano hi mina.+ 17 Ndzi ta ku tlhatlhisa ka vanhu lava, ni ka matiko lawa ndzi to ku rumela ka wona,+ 18 kasi u vhulula matihlo yabye,+ u va humesa munyameni+ vata kuwonekeleni,+ ni ku va tlhatlhisa ntan’wini wa Sathani+ vata ka Nungungulu kasi va tsetselelwa zviwonho,+ vava ni tshomba cikari ka lava va basisilweko hi ku kholwa ka mina.’

19 “Hikwalaho, hosi Agripa, a ndzi wu kanyisangi a muwoniso lowo wa le tilweni, 20 kanilezvi a kuranga ndzi no kanela ka va le Dhamasku,+ ni le Jerusalema,+ ni le tikweni gontlhe ga Judhiya, ni ka matiko, ndziku va wa hundzuluke va tlhelela ka Nungungulu, va maha mitiro yi kombako lezvaku va ti sola.+ 21 Hi caleco ci nga maha ku a vaJudha va ndzi khoma le tempeleni va zama ku ndzi daya.+ 22 Kanilezvi kota lezvi Nungungulu a ndzi vhunako, ndza ha nyika wukustumunyu kala nyamutlha, ka vatsongwani ni vahombe, ndzi hlawutela zvalezvi a Vaphrofeti na Mosi va wulileko lezvaku zvi ta maheka+ . . . 23 lezvaku Kristu i wa ta xaniseka,+ niku kota wo sangula a ku vhuxiwa hi ka vafileko,+ i wa ta chumayela a kuwonekela ka vanhu lava ni ka matiko.”+

24 Pawule na a ha wula zvilo lezvi kasi ku ti yimela, Festu i te ngalo kakwe hi gezu ga hombe: “Pawule, wa sangula ku hlanya! A ku gondza nguvhu zva ku hlanyisa!” 25 Pawule aku ngalo: “Festu a Dhumileko, mina a ndzi hlanyi, kanilezvi ndzi wulawula lisine a tipeni ta mina na ti enela. 26 Wena hosi wa ti tiva khwatsi a timhaka leti ndzi wulawulako hi tona hi kutlhatlheka, niku ndza tsumba lezvaku yi hava ni yin’we ya tona u kalako u nga yi tivi, hakuva yi hava yi mahilweko kufihlaleni.+ 27 Hosi Agripa, wa kholwa ka Vaphrofeti ke? Ndza zvi tiva lezvaku wa kholwa.” 28 Agripa aku ka Pawule: “Hi cikhati ci tsongwani u wa ta ndzi kholwisa ndzi hundzuluka ndzi maha muKristu.” 29 Pawule aku: “Ndza kombela ka Nungungulu lezvaku kani hi cikhati ci tsongwani kutani co leha, ku ngavi wena wece, kanilezvi vontlhe lava va ndzi zwako nyamutlha va fana na mina, hambulezvo na va nga hi ka machini lawa ma ndzi bohileko.”

30 Hosi Agripa i no suka a yima; a govhernadhori, na Bhernike, ni lava va nga tshamile navo, vonawu va no suka va yima. 31 A cikhati va nga huma, va wa kari va bhula, vaku: “A wanuna loyi a nga mahi nchumu wu ringanako ku a dawa ne ku vhalelwa.”+ 32 Makunu Agripa i te ngalo ka Festu: “Loku a wanuna loyi i wa nga kombelangi ku yisa mhaka yakwe ka Khezari, na a tlhatlhilwe.”+

27 Kota lezvi ku nga bohilwe lezvaku hi fanele ku khilela citimela* hiya Italia,+ va no nyikela Pawule ni zvibochwa zvin’wani ka Julio, a hosana ya masochwa, a nga rangela a ntlawa wu vitaniwako ku i butho ga Augustu. 2 Hi no khilela citimela ca le Adramita, leci ci nga lava kuya matlhelweni ya provhinsia ya Azia hi suka hi famba na hi hi na Aristarkusi+ wa le Tesalonika, le Makedhoniya. 3 Ka siku gi nga landzela, hi no chikela Sidhoni; Julio i no mu khoma khwatsi Pawule, a mu vhumelela ku ya wona vanghana vakwe ni lezvaku va mu vhunetela.

4 Hi no suka hi laho hi famba hi mbhiri ya cihlale* ca Kupero, hakuva a moya wu waba wuya ko hambana ni lomu hi ngaya kona. 5 Hi no tsemakanya bimbi hi hundza hi tlhelweni ga Kilikiya ni Panfiliya hi ya nyima Mira wa le Likiya. 6 Kwaseyo, a hosana ya masochwa yi no kuma citimela ca le Alekzandriya ci ngaya Italia yi hi nghenisa ka cona. 7 Andzhako ka masiku yo tala na hi famba hi kukasa, hi no chikela Nidhusi hi kukarateka. Kota lezvi a moya wu nga hi tsandzekisa ku kongoma lomu hi ngaya kona, hi no famba hi mbhiri ya cihlale ca Kreta kusuhani ni Salmone. 8 Hi no simama ku famba hi mbhiri ya bimbi hi kukarateka kala hi chikela ka wutshamu legi gi vitaniwako ku Tiporto* Tinene gi nga kusuhani ni dhoropa ga Laseya.

9 Makunu ku wa hundzile cikhati co leha, niku zvi wa hi mhango a ku famba hi bimbi, hakuva hambu a siku ga kupfhunga*+ makunu gi wa hundzile. Hikwalaho, Pawule i no va tlharihisa, 10 aku: “Vavanuna, ndza zvi wona lezvaku a lipfhumba leli li tava ni mhango niku hi ta luza zvilo zvo tala, na ku nga hi ndzhwalo ni citimela basi, kanilezvi ni wutomi* ga hina gonawu.” 11 Hambulezvo, a hosana ya masochwa yi no ingisa a mufambisi wa citimela ni n’winyi wa cona yi tsika lezvi Pawule a nga wula. 12 Kota lezvi a porto* leyo yi nga kala yi nga hi yi nene a ku tshama ka yona hi nguva ya cirami, a votala va no nyika mawonela ya lezvaku hi suka laho hi zama kuya Fenike, yi nga porto ya le Kreta, leyi yi cuwukeneko ni mutsuwuka-gambo hi tlhelo ga n’walungu* ni tlhelo ga le dzongeni,* hi ya tshama kona hi nguva ya cirami.

13 A cikhati leci ku ngaba zvimoyana zva zvinene zva le dzongeni, va no alakanya lezvaku a kungo gabye gi tatisekile. Zvalezvo va no simula cirikhiso* hi sangula ku famba hi tlhelo ga Kreta, kusuhani ni mbhiri ya bimbi. 14 Kanilezvi na hi nga seya kule, ku no sangula kuba moya wa hombe wu vitaniwako ku i Erakwilo,* wu ngata hi le cihlaleni, 15 wu koka citimela laha ka kuza ci nga ha zvi koti ku cuwukana nawo. Hikwalaho hi no tsika moya wu hi kukuleta. 16 Hi no kukuletwa kala ka cihlale ca citsongwani ci vitaniwako ku i Kaudha. Hambulezvo zvi hi karatele nguvhu a ku kokela cingalavana* leci ci nga kokiwa hi citimela. 17 Loku va tlakusile a cingalavana va ci boha laha ka citimela, va no boha citimela hi lahasi. Kota lezvi va nga chava ku njhibela le Sirtisi,* va no chisa matanga, va tsika citimela ci kukuletwa hi moya. 18 Kota lezvi hi nga biwa nguvhu hi bhubhutsa, va no sangula ku hungula a ndzhwalo wa citimela ka siku gi nga landzela. 19 Hi siku ga wunharu, va no hoxa zvigotso zvo kari zva citimela hi mandla yabye.

20 Laha ne gambo ne tinyeleti zvi nga kala zvi nga woneki hi masiku yo tala, na hi biwa hi bhubhutsa ga hombe, hontlheni hi no mbhelelwa hi kutsumba ka lezvaku hi ta pona. 21 Andzhako ka ku mbheta cikhati co leha na va ngagi nchumu, Pawule i no suka a yima cikari kabye, aku: “Vavanuna, loku hakunene mu wa zwile a wusungukati ga mina, mu nga suki le Kreta, na hi nga kumanangi ni mhango leyi ni kulahlekelwa loku.+ 22 Hambulezvo, makunu ndza mu khongotela, ndziku: Tiyani hlanha hakuva i hava ni mun’we wa n’wina a to lova, sine citimela coce. 23 Hakuva a ngilozi+ ya Nungungulu loyi ndzi mu khozelako ni ku mu tirela, yi wonekile ka mina matolo, 24 yiku: ‘Pawule, u nga chavi. U fanele ku ya yima mahlweni ka Khezari.+ Ahandle ka lezvo, Nungungulu i ku nyikile vontlhe lava u endzako navo.’ 25 Hikwalaho, tiyani hlanha, vavanuna, hakuva ndza kholwa ka Nungungulu lezvaku zvi ta mahekisa zvalezvi ndzi nga byelisiwa zvona. 26 Hambulezvo, hi ta ya hlatiwa ka cihlale co kari.”+

27 Andzhako ka 14 wa masiku na hi kukuletwa hi moya, wusiku ni mumu, Bimbini ga Adriya, cikari ka wusiku a vamarinyero va no zvi wonisa ku khwatsi va wa hi kusuhani ni ku chikela ka tiko go kari. 28 Va no pima kueta ka mati va kuma a 20 wa mabrasa,* hikwalaho va no fambanyana kutsongwani va ya pima kambe va kuma a 15 wa mabrasa.* 29 Na va chava lezvaku a citimela ci nga tshuka ci khwekela lomu ka maribye, va no rikhisa a mune wa zvirikhiso* hi lendzhako ka cona, va rindzela ku gica. 30 Kanilezvi a cikhati leci a vamarinyero va nga zama ku nyemuka lomu citimeleni, va releta cingalavana bimbini na vaku va mahela ku rikhisa zvirikhiso hi le nhovhini* ya citimela, 31 Pawule i no byela hosana ya masochwa ni masochwa, aku: “Loku a vavanuna lava vo huma lomu citimeleni, mu nga ta pona.”+ 32 Zvalezvo a masochwa ma no tsema a tingoti ta cingalavana, ma ci tsika ci wela lomu bimbini.

33 Laha gi ngaya kuceni, Pawule i no khongotela vontlhe lezvaku vaga, aku: “Nyamutlha i siku ga wu 14 na ma ha rindzela, niku cima a mu sega nchumu. 34 Hikwalaho, ndza mu khongotela lezvaku muga zvakuga kasi zvi mu vhuna, hakuva ku nga ta lova hambu ni sisi wun’we wa tihloko ta n’wina.” 35 Andzhako ka ku wula lezvo, i no teka pawa, a bonga Nungungulu mahlweni ka vontlhe, a khema a sangula kuga. 36 Vontlhe va no tiya hlanha va sangula kuga na vonawu. 37 Hontlheni hi wa hi 276 wa vanhu* lomu citimeleni. 38 Loku va gile va xura, va no hungula ndzhwalo wa citimela hi ku hoxetela trigo lomu bimbini.+

39 Laha gi ngaca, a va zvi tivangi ku va wa hi ka tiko muni+ kanilezvi va no wona yipswha* yi nga hi ni pswhani,* va boha ku, loku va zvi kota, va wa ta ya nyimisa citimela seyo. 40 Hikwalaho, va no tsema tingoti ta zvirikhiso va ti tsika ti wela bimbini, lezvo na va tlhatlha a tingoti ta tilemi.* Loku va gwimbile a tanga ga le mahlweni gi kangatela moya, va no kongoma pswhani.* 41 A cikhati leci va ngaba a cidhunyo* ca misava ci nga biwa hi bimbi seno ni seno, a citimela ci no ya njhibela hi nhovhu ci nyima ci nga ha suki. Kanilezvi ci no sangula ku biwa hi mavingo* ya hombe hi lendzhako ci phatlukela.+ 42 Hikwalaho, a masochwa ma no lava ku daya zvibochwa kasi ne cin’we ci nga hlambeli ci tsutsuma. 43 Kanilezvi a hosana ya masochwa yi wa ti yimisele ku ponisa Pawule niku yi no va betela a ku tatisa a cikungo cabye. Yi no laya lava va zvi kotako ku hlambela lezvaku va tlula va bhun’wala lomu matini va ranga va huma, 44 lava van’wani va landzela: a vokari va huma hi mapulangu, ni van’wani hi zvipalavati zva citimela. Hikwalaho, hontlheni hi no pona hi huma handle.+

28 Laha hi nga ponile, hi kona hi nga zvi tiva lezvaku a vito ga cihlale* leco ku wa hi Melita.+ 2 A vanhu va wutshamu lego* va hi mahele a wunene ga hombe nguvhu. Va no dzivela ndzilo, va hi amukela hontlheni, hakuva ku wa hi ni vhula ni cirami. 3 Laha Pawule a nga wungeletela mahlahla a ma chela ndzilweni, ku no huma phiri hi kuzwa kuhisa gi mu namarela canjeni gakwe. 4 Laha a vanhu va wutshamu lego va nga wona a nyoka leyo ya wuxungu na yi ku ciki-ciki canjeni gakwe, va no byelana, vaku: “Hakunene a wanuna loyi mudayi. Hambu lezvi a nga pona lomu bimbini, a Kululama* a ku zvi lavi ku mu tsika a hanya.” 5 Hambulezvo, i no n’watseka nyoka laha ndzilweni na yi nga mu bayisangi. 6 Va wa alakanya ku i ta vhimba kutani ku tekela kuwa afa. Kanilezvi loku va mu cuwukele hi cikhati co leha va wona lezvaku a nga humelelwi hi nchumu wo biha, va no cica maalakanyo va sangula ku wula lezvaku Pawule i nungungulu.

7 Kusuhani ni laha hi nga hi kona, ku wa hi ni mipetso ya hosana ya cihlale* leco; a vito gakwe i wa hi Publiu. I no hi amukela hi tshama naye masiku manharu. 8 Kanilezvi a papayi wa Publiu i wa etlele hi kuzwa feveri ni cikuna. Hikwalaho, Pawule i noya a ya mu khongelela, a mu tlhateka mandla, a mu hanyisa.+ 9 Loku ku mahekile lezvo, vontlhe lava va nga babya ka cihlale* leco va nota, va ta hanyiswa.+ 10 Va no hi bonga hi zvinyikiwo zvo tala; laha hi nga lava ku suka, va no hi nyika zvontlhe hi nga zvi lava.

11 Andzhako ka tihweti tinharu hi no suka hi famba hi citimela ca le Alekzandriya leci ci nga tshamile laha cihlaleni* hi nguva ya cirami. A citimela leco ci wa hi ni cifananiso ca “Vana va Zewusi” hi le nhovhini.* 12 Loku hi chikele Sirakuse, hi no tshama laho masiku manharu; 13 hi suka hi laho hi famba kala Regiyume. Andzhako ka siku gin’we ku noba moya wa le dzongeni,* hi chikela Puteyoli hi siku gi nga landzela. 14 Hi no kuma vamakabye laho va hi khongotela ku tshama navo a 7 wa masiku; andzhako ka lezvo, hi no suka hi kongoma Roma. 15 A cikhati leci a vamakabye va seyo va ngazwa a mahungu hi hina, va no famba kala Prasa* ya Apiyu ni le Mahotela Manharu kasi va ta kumana na hina. Laha Pawule a nga va wona, i no bonga Nungungulu, a tiya hlanha.+ 16 Laha hi kugumesa hi nga chikela Roma, Pawule i no vhumelelwa ku tshama yece na a gadhiwa hi musochwa.

17 Andzhako ka masiku manharu, i no vitanisa madhota ya vaJudha; loku va tlhangene i no va byela, aku: “Hambu lezvi ndzi nga kala ku maha nchumu wo vhukela vanhu kutani mikhuwo ya vakokwani va hina,+ ndzi no khon’wa le Jerusalema ndzi nyikelwa mandleni ya vaRoma.+ 18 Andzhako ka ku ndzi hlola,+ va no lava ku ndzi tlhatlha hakuva ku wa nga hi na cigelo ca ku ndzi konelwa ku dawa.+ 19 Kanilezvi laha a vaJudha va nga ala, ndzi no kurumeteka ku yisa mhaka ya mina ka Khezari,+ na ku nga hi lezvaku ndzova ni mhaka ya ku vhukela tiko ga hina. 20 Hikwalaho, ndzi mu vitanile lezvaku ndzi ta mu wona ni ku wulawula na n’wina; hakuva ndzi bohilwe hi machini lawa hi kota ya kutsumba ka Izrayeli.”+ 21 Vaku kakwe: “A hi amukelangi mapapilo hi le Judhiya ma wulawulako hi wena; hambu a vamakabye lava va tileko hi seyo, i hava a nga bika kutani ku wulawula zvahava hi wena. 22 Hambulezvo, hi zvi wona na zvi hi zvinene a kuzwa hi wena lezvi u zvi alakanyako, hakuva va wulawula kubiha hi wukhongeli legi+ matlhelweni wontlhe.”+

23 Va no boha siku ga ku ta tlhangana naye, vata na va tele nguvhu laha a nga tshama kona. I no sukela ni mixo kala gi phuma, a va tlhamusela mhaka hi ku va nyika wukustumunyu go mbhelela hi Mufumo wa Nungungulu, a va kholwisa xungetano hi Jesu+ hi lezvi zvi tsalilweko Nayweni wa Mosi+ ni ka Vaphrofeti.+ 24 A vokari va no kholwa lezvi a nga kari a wula, a van’wani a va kholwangi. 25 Lezvi va nga kala ku zwanana, va no sangula ku suka va famba; makunu Pawule i no wula magezu lawa:

“A moya wo basa wu wa wula vakokwani va n’wina a cikhati leci Isaya a nga phrofeta, 26 aku: ‘Famba ka vanhu lava u yaku: “A kuzwa mu ta zvizwa kanilezvi mu nga ta zvi zwisisa. A ku cuwuka mu ta cuwuka kanilezvi mu nga ta zvi wona.+ 27 Hakuva a timbilu ta vanhu lava ti tlanyele; hi tindleve tabye vazwa kanilezvi a va mahi nchumu, va tsimbile kasi va nga tshuki va wona ne kuzwa hi tindleve tabye ne hambu ku zvi zwisisa hi timbilu tabye kasi va hundzuluka ndzi va hanyisa.”’+ 28 Hikwalaho, zvi tiveni lezvaku a kuhanyisa loku ka Nungungulu ku rumelwe ka matiko,+ niku hakunene ma ta ingisa.”+ 29 *——

30 I no tshama laho malembe mambiri yo tala ndlwini leyi a nga ti lugarele,+ na a va amukela khwatsi vontlhe lava va ngata kakwe, 31 a va chumayela xungetano hi Mufumo wa Nungungulu ni ku va gondzisa hi Hosi Jesu Kristu hi kutiya ka hombe nguvhu,+ na a nga vhalelwi hi nchumu.