PAPILO GA PAWULE KA VA LE FILIPI

1 Pawule na Timote, a malandza ya Kristu Jesu, ka vobasa vontlhe va nga ka Kristu Jesu, lava va nga le Filipi,+ zvin’we ni vawoneleli ni malandza ya kuvhunetela:+

2 Ngha muva ni tipswalo ni kurula zvi tako hi ka Nungungulu tlhelo Papayi wa hina ni ka Hosi Jesu Kristu.

3 Ndzi bonga Nungungulu wa mina contlhe cikhati leci ndzi mu alakanyako 4 mikhongelweni ya mina yontlhe ya kukhongotela leyi ndzi yi mahelako n’wina n’wentlhe. Ndzi maha a mukhongelo wun’we ni wun’wani wa kukhongotela hi kutsaka,+ 5 hi kota ya civhuno ca n’wina* ka mahungu ya manene kusukela siku go sangula kala nyamutlha. 6 Hakuva ndza tsumba lezvaku loyi a nga sangula a ntiro lowu wa wunene cikari ka n’wina i ta wu mbhetisa+ kala sikwini ga Kristu Jesu.+ 7 Zva fanela a ku ndzi alakanya lezvo hi n’wina n’wentlhe, hakuva ndzi na n’wina mbilwini ya mina, n’wina hi hlengelako a tipswalo, ka machini lawa ndzi bohilweko+ hi wona ni ka ku lwela ni ku tiyisa hi nayo a mahungu ya manene.+

8 Hakuva Nungungulu i kustumunyu wa mina wa lezvaku ndza mu xuva nguvhu n’wina n’wentlhe hi lirandzo la hombe lo fana ni leli la Kristu Jesu. 9 Niku hi caleco ndzi simamako ku ci khongelela lezvaku a lirandzo la n’wina li simama ku andza nguvhu+ zvin’we ni wutivi+ ga lisine ni kupimisisa kontlhe,+ 10 mu tiva lezvi zvi nga zva lisima nguvhu+ kasi mu nga soleki ni ku nga khunguvanyisi van’wani+ kala sikwini ga Kristu, 11 ni lezvaku mu tala hi handzu wo lulama wu tako ha Jesu Kristu,+ kasi zviva wudzundzo ni kudhumiswa ka Nungungulu.

12 Makunu, vamakabye, ndzi lava ku mu zvi tiva lezvaku lezvi zvi nga ndzi humelela zvi vhunile ku vhuvhumisa a mahungu ya manene, 13 laha ka kuza a machini lawa ma ndzi bohileko+ hi kota ya Kristu ma woneka kubaseni+ ka masochwa wontlhe ya hosi ni ka vontlhe laha va yileko. 14 Makunu a kutala ka vamakabye Hosini va tiyile hi kota ya machini ya mina, niku va ha tiya nguvhu hlanha va wulawula a mhaka ya Nungungulu na va nga chavi nchumu.

15 Kunene, a vokari va chumayela Kristu hi matshoho ni mubango, kanilezvi a van’wani va zvi maha hi kuzvirandza. 16 Lava vo gumesa va kanela Kristu hi ku mu randza, hakuva va zvi tiva lezvaku ndzi yimiselwe a ku lwela a mahungu ya manene;+ 17 kanilezvi lava vo sangula va zvi maha hi mubango, a va zvi mahi hi timbilu ti basileko, hakuva va lava ku ndzi vangela zvikarato machinini lawa ndzi bohilweko hi wona. 18 Hi gihi a bhindzu ga kona? Ni ka gihi tshamela, kani hi wufarisi kutani hi lisine, Kristu wa chumayelwa niku ndza tsaka hi lezvo. Kunene, ndzi ta simama ku tsaka, 19 hakuva ndza zvi tiva lezvaku a magumo ya kona kuva ndzi ponisiwa hi kota ya mikhongelo ya n’wina+ ni ku vhuniwa hi moya wa Jesu Kristu.+ 20 Lezvi zvi longoloka ni kurindzela ka mina ka hombe ni kutsumba ka lezvaku ndzi nga tawa tingana ha nchumu. Kanilezvi hi kuva ndzi wulawula hi kutiya-hlanha, Kristu i ta dhumisiwa zvalezvi, kota lezvi a sinako a dhumisiwa mirini wa mina, kani hi kuhanya kutani hi kufa.+

21 Hakuva ka mina, a ku hanya hi Kristu,+ ni kufa kubhindzula.+ 22 Kanilezvi loku zvi lava ku ndzi simama ndzi hanya nyameni, i handzu wa ntiro wa mina; hambulezvo, ndzi nga ta wula a ku ndzi hlawula yini. 23 Ndza kokiwa hi zvilo lezvi zva zvimbiri, hakuva ndza zvi xuva ku tlhatlhisiwa ni kuva zvin’we na Kristu,+ lezvi hakunene zvi nga zvona zva zvinene nguvhu.+ 24 Hambulezvo, zva laveka nguvhu lezvaku ndzi simama nyameni hi kota ya n’wina. 25 Hikwalaho, na ndzi nga kanakani mhakeni leyi, ndza zvi tiva lezvaku ndza ha ta tshama ni ku simama na n’wina n’wentlhe kasi mu kula ni ku tsaka kukholweni, 26 lezvaku a litsako la n’wina li fela ku tala li halakela ka Kristu Jesu hi kota ya mina, a cikhati ndzi tova na n’wina kambe.

27 Ntsena ku hanyani hi ndlela yi faneleko a mahungu ya manene xungetano hi Kristu,+ kasi ku kani ndzata ndzi ta mu wona kutani ndzi hava, ndzizwa mahungu ya n’wina ndzi tlhela ndzi zvi tiva lezvaku mu yimile mu tiya moyeni wun’we hi muhefemulo wun’we,*+ na mu lwela a kukholwa ka n’wina ka mahungu ya manene hi mbilu yin’we, 28 ni ku nga vhumeli ku dzukisiwa hi valala va n’wina. A mhaka leyi cikombiso kabye ca kuloviswa,+ kanilezvi ka n’wina, cikombiso ca kuhanyiswa;+ lezvo zvita hi ka Nungungulu. 29 Hakuva mu nyikilwe thomo hi kota ya Kristu, na ku nga hi ga ku mu kholwa kakwe ntsena, kanilezvi ni ku xaniseka kambe hi kota ya yena.+ 30 Hakuva mulwa a yimpi yo fana ni leyi mu ndzi wonileko na ndzilwa,+ yi nga yaleyi mu zwako lezvaku ndza halwa.

2 Makunu, loku ku hi kona kutiyiswa hi ka Kristu, loku ku hi kona a kuchavelelana ka lirandzo, loku ku hi kona a kupangalatana* hi ka moya, ni loku ku hi ni lirandzo ni kuzwela-wusiwana, 2 mbhelelisani a kutsaka ka mina hi kuva ni kupima kun’we, ni lirandzo lin’we, mu bohana hi kumbhelela, muva ni maalakanyo man’we.+ 3 Mu nga mahi nchumu hi kubangana+ kutani hi matshandza,+ kanilezvi hi kutikoramisa, wonani van’wani kota va chukwana ku hundza n’wina,+ 4 na mu nga khataleli zva n’wina ntsena,+ kanilezvi mu khatalela ni zva van’wani.+

5 Simamani kuva ni kupima ko fana ni loku Kristu Jesu a nga hi nako,+ 6 loyi, hambu lezvi a nga hi ka ciyimo ca Nungungulu,+ a nga kala ku tshuka ava ni maalakanyo ya ku zama ku fana na Nungungulu.+ 7 Kanilezvi i no tsika zvontlhe,* a teka ciyimo ca wunandza,+ ava munhu.*+ 8 A ku hundza lezvo, a cikhati leci a ngata kota munhu,* i no ti koramisa a ingisa kala kufeni,+ ina, afa laha mhandzeni ya hlomulo.*+ 9 Hi kota ya zvalezvo, Nungungulu i no mu tlakusa ava ka cikhundla co tlakuka+ niku hi matsenya, i no mu nyika vito gi nga hehla ka mavito wontlhe,+ 10 kasi vitweni ga Jesu, a madzolo wontlhe ma khizama — a ya lava va nga le tilweni ni ya lava va nga laha misaveni ni lahasi ka misava+ — 11 ni tirimi tontlhe ti vhumela kubaseni lezvaku Jesu Kristu i Hosi,+ kasi ku dhumisiwa Nungungulu, a Papayi.

12 Hikwalaho, varandzekako va mina, a ku khwatsi hi lezvi contlhe cikhati mu ingisako, na ku nga hi loku ndzi hi kona basi, kanilezvi nguvhunguvhu makunu lezvi ndzi nga hava, simamani ku tirela a kuhanyiswa ka n’wina hi kuchava ni kururumela. 13 Hakuva Nungungulu hi yena loyi, hi kuzvirandza kakwe, a tirako ka n’wina, a mu nyika a kuxuva ni ntamu wa ku zvi maha. 14 Simamani ku maha zvontlhe na mu nga nguranguri+ ne kukanetisana,+ 15 kasi mu fela ku nga soleki ne kuva ni nandzu, muva vana va Nungungulu+ va nga hava noda cikari ka cizukulwana leci co biha ni co gombonyeka,+ leci mu woningako cikari ka cona kota kuwonekela tikweni,+ 16 na mu khomile zvi tiya ka mhaka ya wutomi.+ Makunu ndzi tava ni cigelo ca ku tsaka sikwini ga Kristu, na ndzi tiva lezvaku a ndzi tsutsumangi mahala ne ku ti tsitsirita mahala. 17 Kanilezvi, hambu loku ndzi chululiwa a ku khwatsi ndzi munyikelo wa zvakunwa+ hehla ka muphahlo+ ni ntiro wo basa wu tako hi kukholwa ka n’wina, ndza tsaka ndzi nengela na n’wina n’wentlhe. 18 Hi kufanana, n’winawu tsakani mu nengela zvin’we na mina.

19 Makunu ndzi na ni kutsumba ka Hosi Jesu ka lezvaku ndzi ta mu rumelela Timote+ zvezvanyana, kasi ndzi fela ku tiyisiwa a cikhati leci ndzi to kuma mahungu ya n’wina. 20 Hakuva a ndzi na mun’wani a nga ni moya wo fana ni lowu wakwe, loyi a to khatalela a timhaka ta n’wina hi mbilu yontlhe. 21 Hakuva vontlhe lava van’wani va ti lavela zvabye wutsumbu, na ku nga hi lezvi zva Jesu Kristu. 22 Kanilezvi ma ku tiva kutsumbeka kakwe, lezvaku i tirile zvin’we na mina kuhangalaseni ka mahungu ya manene, a ku khwatsi i n’wana+ ni papayi. 23 Hikwalaho, hi yena ndzi alakanyako ku mu rumela neti ndzi wona lezvi a mhaka ya mina yi to fambisa zvona. 24 Kunene, ndza tsumba ka Hosi lezvaku minawu ndzi tata lokuloku.+

25 Kanilezvi ka cikhati leci, ndzi zvi wona na zvi hi chukwana a ku mu rumelela Epafrodhitusi, a makabye wa mina ni mutiri-kulori tlhelo musochwa-kulori, loyi n’wina mu nga mu rumela a ta ndzi tirela,+ 26 hakuva i xuva ku mu wona n’wina n’wentlhe, niku wa karateka nguvhu hi lezvi mu ngazwa lezvaku i wa babya. 27 Hakunene, i babyile zva mahati, kanilezvi Nungungulu i mu mahele wuxinji, kunene, na ku nga hi yena yece, kanilezvi na minawu kasi ndzi nga engetelwi hlomulo hehla ka wun’wani hlomulo. 28 Hikwalaho, ndza mu rumela hi kuhatlisa, kasi loku mu mu wona, mu fela ku tsaka kambe, na minawu ndzi nga ha karateki nguvhu. 29 Mu amukeleni kota lezvi zvi tolovelekileko Hosini hi kutsaka kontlhe, niku simamani ku randza a vanhu va tshamela legi,+ 30 hakuva i wa hi kusuhani ni kufa hi kota ya ntiro wa Kristu,* a veka wutomi* gakwe mhangweni kasi a mu vhaleta lezvi mu nga hiko kona laha kasi mu ndzi tirela.+

3 Hi kugumesa, vamakabye va mina, simamani ku tsaka Hosini.+ A zvi ndzi karateli a ku mu tsalela timhaka taleti ta tin’we, niku zvi fela ku mu vhikela.

2 Ti woneleni ka timbyana; ti woneleni ka lava va wonhetelako; ti woneleni ka lava va lamatako nyama.+ 3 Hakuva hina, hi hina lava hi nga ni wukwera* ga lisine,+ hina lava hi mahako ntiro wo basa hi moya wa Nungungulu ni ku ti dzundza ka Kristu Jesu,+ na hina lava hi nga vekiko a kutsumba ka hina nyameni, 4 hambu lezvi mina ndzi nga ni zvigelo zva kuva ni kutsumba nyameni a ku hundza vontlhe.

Loku a mun’wani munhu a alakanya lezvaku i na ni zvigelo zva kuva ni kutsumba nyameni, mina ndza mu hundza: 5 ndzi mahilwe wukwera* hi siku ga wu 8,+ niku ndzi wa tiko ga Izrayeli, wa lixaka la ka Bhenjamini, a muHebheru a pswalilweko hi vaHebheru;+ hi tlhelo ga nayo ndzi muFarisi;+ 6 hi tlhelo ga kutitsitsirita, ndzi wa xanisa bandla;+ xungetano hi kululama loku ku seketelwako nayweni, ndzi wa nga soleki. 7 Hambulezvo, a zvilo lezvi zvi nga hi bhindzu ka mina, ndzi no zvi wona kota kulahlekelwa* hi kota ya Kristu.+ 8 A ku hundza lezvo, hakunene ndzi wona a zvilo zvontlhe na zvi hi kulahlekelwa hi kota ya lisima la hombe la wutivi ga Kristu Jesu a Hosi ya mina. Hi kota ya yena, ndzi no vhumela ku luza a zvilo zvontlhe niku ndzi zvi wona kota nhulu ya chaka, kasi ndzi fela ku kuma Kristu 9 ndzi tlhela ndzi kumiwa ka yena, na ku nga hi hi kota ya kululama ka mina loku ku tako hi ku landzela Nayo, kanilezvi hi kota ya kululama loku ku tako hi ku kholwa+ ka Kristu,+ a kululama ku tako hi ka Nungungulu loku ku seketelwako ka kukholwa.+ 10 A kungo ga mina ku tiva yena ni ntamu wa kuvhuka kakwe+ ni ku hlengela ka tixanisa takwe,+ ni ku vhumela a fela go fana ni legi gakwe,+ 11 kasi hi ndlela yo kari, ndzi zvi kota ku kuma a kuvhuxiwa ko ranga cikari ka vafileko.+

12 A hi lezvaku ndzo sina ndzi wu kumile, kutani ku ndzo sina ndzi mbhelele, kanilezvi ndza ti tsitsirita+ kasi minawu ndzi wona ku ndzi ta zvi kuma lezvi Kristu Jesu a ndzi hlawuleleko zvona ke.+ 13 Vamakabye, a ndzi ti wonisi ku khwatsi ndzi sina ndzi wu kumile, kanilezvi a co tiya hi leci: Ndzi rivala zvilo zva lendzhako+ ndzi ti gwimba kasi ndzi kuma zva le mahlweni,+ 14 ndzi ti tsitsiritela ku tatisa a kungo ga mina, ga ku kuma a nchachazelo+ wa kuvitaniwa tilweni+ hi Nungungulu ha Kristu Jesu. 15 Hikwalaho, hina lava hi buvhileko,+ ngha hiva ni kupima loku, kanilezvi loku hi ndlela yo kari mu byekelele kupimeni kun’wani, Nungungulu i ta mu vhululela a kupima loku ku lavekako. 16 Ni ka gihi tshamela, kani hi buvhile kala kwihi, a hi simameni ku famba hi kufaneleko ndleleni yaleyi.

17 Vamakabye, mahani vapimanyisi va mina+ hi mbilu yin’we, na mu simama ku cuwukisa lava va landzako a cikombiso leci hi nga mu siyela. 18 Hakuva ku na ni votala — ndzi nga tala ku va kumbuka, kanilezvi zvezvi ndzi va kumbuka hi mihloti — va fambako kota valala va mhandze ya hlomulo* ya Kristu. 19 A magumo yabye ku lovisiwa, a nungungulu wabye i khwiri, va ti dzundza hi zvilo lezvi va nga fanele kuwa tingana hi zvona, niku va veka kupima kabye ka zvilo zva laha misaveni.+ 20 Kanilezvi a wusumbulwa ga hina+ gi le matilweni,+ niku hi kwaseyo hi rindzelako a muhanyisi hi kuxuva ka hombe, yena Hosi Jesu Kristu,+ 21 loyi a to hundzulusa a miri wa hina wu nga nyawuliko wu fana ni miri wakwe wo ngangamela+ hi ntamu wakwe wa hombe, lowu a zvi kotako ku veka ha wona a zvilo zvontlhe lahasi kakwe.+

4 Hikwalaho, vamakabye va mina ndzi mu randzako ni ku mu xuva, n’wina litsako la mina ni cidlodlo* ca mina,+ tiyisani lezvo mu ku nde+ Hosini, varandzekako va mina.

2 Ndza khongotela Evhodhia ndzi tlhela ndzi khongotela Sintike lezvaku vava ni kupima kun’we Hosini.+ 3 Ina, ndzi khongotela na wenawu, kota mutiri-kulori wa lisine, lezvaku u simama ku vhuna vavasati lava va tirileko* hi kutikarata zvin’we na mina hi kota ya mahungu ya manene, na Klemente zvin’we ni van’wani vatiri-kulori, lava a mavito yabye ma nga bhukwini ga wutomi.+

4 Tsakani contlhe cikhati Hosini. Ndza engeta, ndziku: Tsakani!+ 5 Ngha a kuringanisela* ka n’wina+ ku tiviwa hi vanhu vontlhe. A Hosi yi laha kusuhani. 6 Mu nga karateki hi nchumu,+ kanilezvi zvilweni zvontlhe, hi kukhongela ni kukhongotela na mu kari mu bonga, tivisani Nungungulu zvontlhe lezvi zvi mu karatako;+ 7 a kurula+ ka Nungungulu, loku ku hundzako a kupima kontlhe, ku ta hlayisa a timbilu ta n’wina+ ni maalakanyo ya n’wina ha Kristu Jesu.

8 Hi kugumesa, vamakabye, ni zvihi lezvi zvi nga lisine, ni zvihi lezvi zvi nga zva lisima, ni zvihi lezvi zvi lulamileko, ni zvihi lezvi zvi basileko, ni zvihi lezvi zvi randzekako, ni zvihi lezvi ku wulawuliwako khwatsi hi zvona, ni zvihi lezvi zvi nga zvinene, ni zvihi lezvi zvi dzundziwako, simamani ku alakanya* zvilo lezvo.+ 9 A zvilo lezvi mu nga zvi gondza ka mina mu zvi amukela, ni lezvi mu nga zvizwa ni ku zvi wona na ndzi maha, zvi maheni;+ a Nungungulu wa kurula i tava na n’wina.

10 Ndza tsaka nguvhu Hosini hi lezvi makunu mu ngaza mu vhuxetela ku ndzi karatekela.+ Hambu lezvi mu nga ndzi karatekela, mu wa nga kumi mole wa ku zvi kombisa. 11 A ndzi wuli lezvo a ku khwatsi ndzo vhumala, hakuva ndzi gondzile ku enelelwa* ni ka gihi tshamela ndzi nga ka gona.+ 12 Ndza zvi tiva ku hanya na ndzi hi ni zvitsongwani+ ni ku hanya na ndzi hi ni zvotala. Zvilweni zvontlhe, ni ka gihi tshamela, ndzi gondzile cihundla ca ku hanya na ndzi xure ni ku hanya ni ndlala, a ku hanya na ndzi hi ni zvotala ni ku hanya na ndzi nga hi na nchumu. 13 Zvilweni zvontlhe ndzi na ni ntamu hi kota ya loyi a ndzi nyikako ntamu.+

14 Hambulezvo, mu mahile khwatsi lezvi mu nga hlengela na mina kuxanisekeni ka mina. 15 Kunene, n’wina va le Filipi ma zvi tiva kambe lezvaku andzhako ka loku mu zwile mahungu ya manene hi khati go sangula, a cikhati leci ndzi nga suka hi Makedhoniya, gi hava bandla gin’wani gi nga hlengela na mina mhakeni ya ku nyika ni ku amukela, saseka n’wina n’wece;+ 16 hakuva na ndza ha hi Tesalonika, mu ndzi rumelele zvokari kasi ku ndzi vhuna ka lezvi ndzi nga zvi vhumala, na ku nga hi khati gin’we, kanilezvi makhati mambiri. 17 A hi ku khwatsi ndzo lava ku nyikiwa zvilo, kanilezvi ndzi lava mihandzu leyi yi to mu bhindzulela nguvhu n’wina. 18 Hambulezvo, ndzi na ni zvontlhe ndzi zvi lavako ni ku hundza. A ndza ha vileli nchumu, kota lezvi ndzi amukeleko lezvi mu nga rumela na Epafrodhitusi,+ a muphahlo wo amukeleka wa masema yo nuhela,+ wu xalalisako Nungungulu. 19 A Nungungulu wa mina yenawu i ta mu nyika ha Kristu Jesu zvontlhe lezvi mu zvi vhumalako+ hi kuya hi titshomba takwe ta kungangamela. 20 Makunu a wudzundzo a giye ka Nungungulu wa hina tlhelo Papayi kala kupindzuka ni kupindzuka. Amen.

21 Rungulani a vobasa vontlhe va nga ka Kristu Jesu. A vamakabye lava va nga na mina va mu rungula. 22 A vobasa vontlhe, nguvhunguvhu a va le ngangweni wa Khezari,+ va mu rungula.

23 A tipswalo ta Hosi Jesu Kristu a tive zvin’we ni moya lowu mu wu kombisako.