PAPILO GA WUMBIRI GA PAWULE KA TIMOTE

1 Pawule, a mupostoli wa Kristu Jesu hi kurandza ka Nungungulu hi kuya hi citsumbiso ca wutomi legi gi tako ha Kristu Jesu,+ 2 ka Timote, a n’wana a randzekako:+

Ngha uva ni tipswalo, ni wuxinji, ni kurula zvi tako hi ka Nungungulu tlhelo Papayi ni ka Kristu Jesu a Hosi ya hina.

3 Ndza bonga Nungungulu, loyi ndzi mu mahelako a ntiro wo basa hi livhalo li basileko a ku fana ni lezvi a vakokwani va mina va mahileko, na ndzi nga tsiki ku ku alakanya mikhongelweni ya mina ya kukhongotela, wusiku ni mumu. 4 Laha ndzi alakanyako a mihloti ya wena, ndzi xuva nguvhu ku ku wona kasi ndzi fela ku tala hi kutsaka. 5 Hakuva ndza alakanya a kukholwa ka wena ku nga hiko ko fayelisela,+ loku a kusangula ku nga hi ka kokwani wa wena Loyisi ni mamani wa wena Eunike, loku ndzi kholwako lezvaku ku kona ni ka wenawu.

6 Hi cigelo leco, ndza ku alakanyisa lezvaku u hlanganyeta, a ku khwatsi i ndzilo, a cinyikiwo ca Nungungulu leci u ci kumileko hi lezvi ndzi nga ku tlhateka mandla.+ 7 Hakuva Nungungulu a nga hi nyikangi a moya wa wutoya,+ kanilezvi wa ntamu,+ ni wa lirandzo, ni wa kupima ku nene. 8 Hikwalaho, u ngavi ni tingana hi wukustumunyu ga Hosi ya hina,+ ne hi mina ndzi nga cibochwa hi kota ya yona. Hi ka tlhelo ga wena, hlengela kutimiseleni ka tixanisa+ hi kota ya mahungu ya manene na u tsumba a ntamu wa Nungungulu.+ 9 I hi ponisile ni ku hi vitana hi kuvitana ko basa,+ na ku nga hi hi kota ya mitiro ya hina, kanilezvi hi kota ya kungo gakwe ni tipswalo takwe.+ I no hi kombisa tona ka Kristu Jesu mahlweni ka zvikhati zva kaleloko, 10 kanilezvi, makunu ti kombisilwe tiku dlunya hi kuwonekeliswa ka Muhanyisi wa hina, Kristu Jesu,+ loyi a fuvisileko kufa,+ a woningela wutomi+ ni kungaboli+ hi mahungu ya manene,+ 11 lawa ndzi yimisilweko a kuva mukaneli, ni mupostoli, ni mugondzisi wa wona.+

12 Hi caleco ci mahako ku minawu ndzi xaniseka a zvilo lezvi,+ kanilezvi a ndzi na tingana.+ Hakuva ndza mu tiva Loyi ndzi kholwako kakwe, niku a ndzi kanakani lezvaku i na ni ntamu wa ku hlayisa lezvi ndzi zvi vekileko mandleni yakwe kala sikwini lego.+ 13 Khoma zvi tiya ka cikombiso* ca timhaka ti nene,*+ leti u ti zwileko ka mina hi kukholwa ni lirandzo leli li nga ka Kristu Jesu. 14 A cilo leci ca cinene u khomisilweko, ci hlayise hi moya wo basa lowu wu tshamako ka hina.+

15 Wena wa zvi tiva lezvaku vontlhe le provhinsia ya Azia+ va ndzi tsikile, a ku patsa na Figelusi na Hermogenesi. 16 Ngha a Hosi yi wu mahela wuxinji a ngango wa Oniseferusi,+ hakuva yena i ndzi tangalisile makhati yo tala, niku a nga vangi ni tingana hi machini lawa ma ndzi bohileko. 17 Wutshan’wini ga lezvo, a cikhati leci a nga hi le Roma, i no ndzi lavetela yi nga chayi kala a ndzi kuma. 18 Ngha a Hosi yi mu vhumelela lezvaku a kuma wuxinji hi ka Jehovha* sikwini lego. Wenawu wa yi tiva khwatsi a mitiro yontlhe leyi a nga maha le Efesusi.

2 Hikwalaho, wena n’wananga,+ simama ku kuma ntamu tipswalweni leti ti nga ka Kristu Jesu. 2 A zvilo lezvi u zvi zwileko ka mina, zvi tiyisilweko hi vakustumunyu vo tala,+ zvi gondzise a vavanuna vo tsumbeka, lava vonawu va to ringanelwa khwatsi hi ku gondzisa van’wani. 3 Kota musochwa wa munene+ wa Kristu Jesu, hlengela kutimiseleni ka tixanisa.+ 4 A ku na munhu a nga wusochweni a mahako* mabhindzu* ya loku kuhanya, hakuva i lava ku tsakisa loyi a mu vitanileko wusochweni. 5 Hambu lomu ka mihlakano, loyi a nga ka mapalisana a nga bohisiwi cidlodlo* ahandle ka loku a mahile mapalisana hi ku landza zvileletelo.+ 6 A murimi loyi a tirako hi kutikarata hi yena a faneleko ku ranga aga a mihandzu ya kona. 7 Contlhe cikhati, ehleketa hi lezvi ndzi ku byelako; a Hosi yi ta ku nyika kuzwisisa zvilweni zvontlhe.

8 Alakanya lezvaku Jesu Kristu i vhuxilwe hi ka vafileko+ niku i wa hi wa pswalo wa Dhavhidha,*+ hi kuya hi mahungu ya manene lawa ndzi ma chumayelako,+ 9 lawa ndzi xanisekako ni ku bohiwa a ku khwatsi ndzova cigevenga hi kota ya wona.+ Hambulezvo, a mhaka ya Nungungulu a yi bohiwangi.+ 10 Hi cigelo leco, ndza simama a ku timisela zvilo zvontlhe hi kota ya vahlawulilweko,+ kasi vonawu va fela ku kuma kuhanyiswa loku ku tako ha Kristu Jesu, zvin’we ni kungangamela ka pindzukelwa. 11 A mhaka leyi yi tsumbekile: Loku hi file zvin’we naye, hakunene hi ta tlhela hi hanya zvin’we naye;+ 12 loku hi simama ku timisela, hi ta fuma naye kota tihosi;+ loku hi mu ala, yenawu i ta hi ala;+ 13 loku hina hi nga tsumbeki, yena i simama ku tsumbeka, hakuva a nga zvi koti ku ti ala.

14 Simama ku va alakanyisa a zvilo lezvi, u va gondzisa* mahlweni ka Nungungulu lezvaku va ngalwi hi kota ya magezu, zvi nga zvilo zvi nga vhuniko nchumu hakuva zvi hohlota* lava va zvi zwako. 15 Maha zvontlhe zvi nga ntan’wini wa wena kasi u amukeleka ka Nungungulu, u hi mutiri a nga hava nchumu wu mu wisako tingana, loyi a tirisako khwatsi a mhaka ya lisine.+ 16 Kanilezvi ala a kuwulawula ku nga vhuniko nchumu loku ku nyenyezisako lezvi zvi basileko,+ hakuva ku ta yisa ka kungakholwi ku yako ku endzeleka, 17 ni magezu yabye ma ta hangalaka a ku fana ni cilondza ci simamako ku kula ci nga holi. A vokari vabye hi Himenewusi na Filetusi.+ 18 A vavanuna lava va hambukile lisineni, va wula lezvaku a kuvhuka ka vafileko ku sina ku mahekile,+ niku va kari va hohlota a kukholwa ka vokari. 19 Hambulezvo, a ciseketelo co tiya ca Nungungulu ci simama ci yimile, na ci hi ni cifungo leci: “Jehovha* wa va tiva lava va nga vakwe”,+ niku: “Ni wihi a vitanako a vito ga Jehovha*+ i wa tsike kungalulami”.

20 Lomu ndlwini ya hombe a ku na zvibya zva ouro ni zva prata basi, kanilezvi ku na ni zvo vatliwa ni zva wumba. A zvokari zvi na ni mitiro yo dzundzeka kanilezvi a zvin’wani zvi na ni mitiro yo kala yi nga dzundzeki. 21 Hikwalaho, loku a munhu a tsawukana ni zvibya lezvi zvo gumesa, i tava cibya ca ntiro wo dzundzeka, leci ci basisilweko, ci tirelako a n’winyi wa cona, ci longiselweko mitiro yontlhe ya yinene. 22 Hi cigelo leco, tsutsuma a kunavela ka lava vaswa, u hlota kululama, ni kukholwa, ni lirandzo, ni kurula, zvin’we ni lava va vitanako Hosi hi mbilu yi basileko.

23 Ahandle ka lezvo, ala a kukanetisana ka wupumbu ni ku nga vhuniko nchumu,+ na u tiva lezvaku ku vanga kulwa. 24 Hakuva a nandza ga Hosi a gi faneli kulwa, kanilezvi gi fanele ku rula* ka vontlhe,+ gi zvi tiva ku gondzisa, na gi zvi kota ku ti khoma loku gi wonhelwa,+ 25 ni ku zvi kota ku gondzisa hi kurula lava va kanetako.+ Kuzvilava Nungungulu i ta va nyika a kutisola* loku ku yisako ka wutivi ga lisine,+ 26 ni lezvaku va ti laya va chukula ntlhan’wini wa Dhiyabho, kota lezvi a nga va phasa na va ha hanya kasi va maha kurandza kakwe.+

3 Kanilezvi tiva lezvi, lezvaku masikwini ya kugumesa,+ ku tava ni zvikhati zva zvikarato, zvo nonoha a ku zvi timisela. 2 Hakuva a vanhu va ta ti randza wutsumbu, vava varandzi va mali, va ti gwirisa, va ti kulisa, va hi va tihlamba, va nga ingisiko vapswali, va nga bongiko, va nga tsumbekiko, 3 va nga randziko maxaka yabye, va nga ti yimiselangiko ku vhumelelana ni van’wani, va hi valumbeti, va nga ti khomiko, va hi vo leva, va nga randziko zvazvinene, 4 va hi vatokometi, va cikanikani, va teleko hi matshandza, va randzako ku ti tsakisa wutshan’wini ga ku randza Nungungulu, 5 va wonekisako ku khwatsi va khozela Nungungulu kanilezvi na va kaneta a ntamu wa kona.+ Fularela a vanhu va matshamela lawo. 6 Cikari kabye, ku huma vavanuna lava va nyanimelako va nghena mingangweni va kanganyisa a vavasati lava va nga ni gome va bindziwako hi zviwonho, na va susumetiwa hi kunavela ko tala, 7 va gondzako contlhe cikhati, kanilezvi va nga tshukiko vakha a wutivi ga lisine xungetano hi lisine.

8 A ku fana ni lezvi Janesi na Jambresi va nga vhukela Mosi, hi zvalezvo ni lava kambe, va simama ku vhukela a lisine. A vavanuna lava va wonhekile hi kumbhelela kupimeni kabye, a va vhuni nchumu kukholweni. 9 Hambulezvo, va nga taya kule, hakuva a wupumbu gabye gi ta woneka giku dlunya ka vanhu vontlhe, a ku fana ni lezvi zvi nga maheka ka vavanuna lavo va vambiri.+ 10 Kanilezvi wena u landzele khwatsi a gondzo ya mina, ni mahanyela ya mina,+ ni kungo ga mina, ni kukholwa ka mina, ni lihlazva-mbilu la mina, ni lirandzo la mina, ni kutimisela ka mina, 11 ni kuxaniswa, ni kuxaniseka ko khwatsi hi loku ndzi nga kumana nako Antiyokiya,+ ni Ikoniyume,+ ni Listra.+ Ndzi no timisela a tixanisa leto niku a Hosi yi no ndzi tlhatlhisa ka tona tontlhe.+ 12 Kunene, vontlhe lava va xuvako ku hanya hi kukholwa loku ku nga ka Kristu Jesu, vonawu va ta xanisiwa.+ 13 Kanilezvi a vakubiha ni vakanganyisi va taya mahlweni va endzeleka kubiheni, va kanganyisa ni ku kanganyisiwa.+

14 Hambulezvo, wena simama zvilweni lezvi u gondzileko ni ku tlhamuselwa kala u zvi kholwa,+ hakuva wa va tiva lava u gondzileko ka vona, 15 niku kusukela wun’wananeni*+ u tivile a mitsalo yo basa,+ leyi yi nga ni ntamu wa ku ku maha u tlhariha kasi u hanyiswa hi ku kholwa ka Kristu Jesu.+ 16 A Mitsalo yontlhe yi pimisilwe hi Nungungulu+ niku ya vhuna kugondziseni,+ ni kukawukeni, ni kululameteni* ka zvilo, ni kulayeni hi zva kululama,+ 17 kasi a munhu wa Nungungulu a fela ku mbhelela, na a longiselelwe khwatsi kasi ku maha a mitiro yontlhe ya yinene.

4 Ndza ku laya mahlweni ka Nungungulu ni ka Kristu Jesu, loyi a to lamula+ a vahanyako ni vafileko,+ hi kuwonekeliswa kakwe+ ni Mufumo wakwe,+ ndziku: 2 Chumayela a mhaka,+ u maha lezvo hi cihatla ka zvikhati zva zvinene ni ka zvikhati zvo nonoha; kawuka,+ u laya, u khongotela hi lihlazva-mbilu lontlhe ni wumeseri ga kugondzisa.+ 3 Hakuva ku ta chikela a cikhati leci va to kala va nga ha lavi kuzwa a gondzo ya yinene,*+ kanilezvi hi kota ya kunavela kabye, va ta ti lavela vagondzisi va ku va nyangalatela tindleve* kasi va va randzela.+ 4 Va ta tsika a ku ingisela lisine va demba ndleve ka zvitoriya zva mawunwa. 5 Kanilezvi, wena veka kupima ka wena zvilweni zvontlhe, u timisela zviyimo zvo nonoha,+ u maha ntiro wa muvhangeli,* u maha ntiro wa wena hi kumbhelela.+

6 Hakuva ndzi sina ndzi chululiwa a ku khwatsi ndzi munyikelo wa zvakunwa,+ niku a cikhati ca kutlhatlhiswa ka mina+ ci laha kusuhani. 7 Ndzi lwile a yimpi ya yinene,+ ndzi tsutsumile kala magumo,+ ndzi hlayisile a kukholwa. 8 Kusukela lezvi, ndzi vekelwe a cidlodlo* ca kululama,+ leci a Hosi, a mulamuli wo lulama,+ yi to ndzi nyika kota nchachazelo sikwini lego,+ na ku nga hi mina ndzoce, kanilezvi ni vontlhe lava va randzako a kuwonekeliswa kakwe.

9 Maha zvontlhe u zvi kotako kasi uta ka mina zvezvi. 10 Hakuva Dhemasi+ i ndzi tsikile hi kota ya ku randza tiko legi,* i yile Tesalonika; Kreseke i yile Galatiya, niku Titusi i yile Dhalmatiya. 11 Hi Luka yece a nga na mina. Tana na Marku, hakuva wa ndzi vhuna nguvhu ntirweni. 12 Kanilezvi Tikikusi+ ndzi mu rumele Efesusi. 13 A cikhati leci u tota seno, tana ni bhaji* legi ndzi gi siyileko na Karpusi le Trowasi, ni mabhuku yo songiwa, nguvhunguvhu lawa ya mabhebhe.

14 Alexandro, loyi wa munyekisi wa kobre, i ndzi wonhele nguvhu. Jehovha* i ta mu tlhelisela hi kuya hi mitiro yakwe.+ 15 Wenawu ti wonele ka inaloye, hakuva i kanetile nguvhu a mahungu ya hina.

16 Laha ndzi nga ti yimela hi khati go sangula i hava a nga ta yima na mina, kanilezvi vontlhe va no ndzi tsika — hambulezvo, va nga hlayelwi nandzu hi kota ya lezvo. 17 Kanilezvi a Hosi yi no yima kusuhani na mina yi ndzi nyika ntamu, kasi a ntiro wa kuchumayela wu mahiwa hi kumbhelela ha mina, ni lezvaku a matiko wontlhe ma wuzwa;+ ndzi no tlhatlhisiwa non’wini wa nghala.+ 18 A Hosi yi ta ndzi tlhatlhisa ka mitiro yontlhe yo biha, niku yi ta ndzi ponisa kasi ndzi nghena ka Mufumo wa yona wa matilo.+ A wudzundzo a give ka yena kala kupindzuka ni kupindzuka. Amen.

19 Rungula Priska na Akwila+ ni va ngango wa Oniseferusi.+

20 Erastusi+ i sele Korinte, kanilezvi Trofimusi+ ndzi mu siyile na a kari a babya le Miletu. 21 Maha zvontlhe u zvi kotako kasi uta na yi nga se sangula a nguva ya cirami.

Ewubhulusi wa ku rungula, na Pudhensi, na Linusi, na Klaudhia ni vamakabye vontlhe.

22 A Hosi a yive zvin’we ni moya lowu u wu kombisako. Ngha a tipswalo takwe tiva na n’wina.