PAPILO GA PAWULE KA TITUSI

1 Pawule, a nandza ga Nungungulu ni mupostoli wa Jesu Kristu, hi kuya hi kukholwa ka vahlawulilweko va Nungungulu, ni wutivi ga lisine xungetano hi lisine leli li zwananako ni kukhozela Nungungulu 2 ku seketelwako ka kutsumba ka wutomi ga pindzukelwa+ legi Nungungulu, loyi a nga hembiko,+ a gi tsumbisileko kaleloko 3 — kanilezvi hi cikhati cakwe ci yimisilweko, i no tivisa a mhaka yakwe hi kuchumayela loku ndzi nyikilweko+ hi kulaya ka Muhanyisi wa hina, Nungungulu —, 4 ka Titusi, a n’wana wa lisine hi kuya hi kukholwa loku hi hlengelako:

Ngha uva ni tipswalo ni kurula zvi tako hi ka Nungungulu, a Papayi, ni ka Kristu Jesu, a Muhanyisi wa hina.

5 Ndzi ku siyile le Kreta kasi u lulamisa a zvilo lezvi zvi nga byekele ni ku yimisa madhota ka dhoropa gin’we ni gin’wani, kota lezvi ndzi ku leleteleko, ndziku: 6 A dhota gi fanele kuva wanuna a nga solekiko, na a hi nuna wa sati mun’we, a nga ni vana va kholwako, lava va nga soliwiko hi kota ya ku phungela* ni kuva vahluwuki.+ 7 Hakuva kota nandza ga Nungungulu, a muwoneleli a nga faneli ku soleka, ne kuva munhu wa kani,+ wa cizangazangani,+ ne kuva cidhakwa, ne kuva munhu wa tihanyi,* ne ku navela bhindzu go biha, 8 kanilezvi i fanele kuva wo amukela vapfhumba,+ a randza wunene, a hi ni kupima ku nene,+ a hi munhu wo lulama, wo tsumbeka,+ a zvi kotako ku ti khoma,+ 9 a khomako zvi tiya ka mhaka yi tsumbekileko* xungetano hi wumeseri gakwe ga kugondzisa,+ kasi a zvi kota ku tiyisa hi gondzo ya yinene*+ ni ku kawuka+ lava va kanetako.

10 Hakuva ku na ni vahluwuki vo tala, ni vanhu va wulawulako zvilo zvi nga vhuniko nchumu, ni vakanganyisi, nguvhunguvhu lava va namarelako ka wukwera.*+ 11 Zvi lava ku va vhaliwa minomu yabye, hakuva a vavanuna lavo va simama ku hohlota mingango yontlhe hi ku gondzisa zvilo zvi nga faneliko hi ku fela bhindzu go biha. 12 A mun’we wabye, a nga muphrofeti wabye, i te ngalo: “A vaKreta vahembi contlhe cikhati, zvihari zvo leva niku makhobomu ya malolo.”

13 A wukustumunyu legi lisine. Hi cigelo leco, simama ku va kawuka hi ntamu, kasi va fela ku hanya khwatsi kukholweni, 14 va nga ingiseli a mitsheketo ya vaJudha ni milayo ya vanhu lava va hambukako lisineni. 15 A zvilo zvontlhe zvi basile ka lava va basileko;+ kanilezvi ka lava va nyenyezileko ni vangakholwiko, ci hava ci basileko, hakuva a maalakanyo yabye ni tivhalo tabye zvi nyenyezile.+ 16 Va wula kubaseni lezvaku va mu tiva Nungungulu, kanilezvi va mu kaneta hi mitiro yabye,+ hakuva vanhu va manyala ni va nga ingisiko, niku a va vhuni nchumu mitirweni yontlhe ya yinene.

2 Kanilezvi wena, simama ku wulawula lezvi zvi zwananako ni gondzo ya yinene.*+ 2 Ngha a vavanuna va kulileko va tiva ku ti khoma ka zvontlhe va mahako, va nga randzi ku hlakana, vava ni kupima ku nene, va hanya khwatsi kukholweni, ni lirandzweni, ni kutimiseleni. 3 Ngha a vavasati va kulileko vonawu vava ni mahanyela ma dzundzekako, va nga hi na mahlevo, va nga ti mahi tikhumbi ta vhinyo, vava vagondzisi va zvazvinene, 4 kasi va laya* a vavasati lava va ha hiko vaswa lezvaku va randza vanuna vabye, ni ku randza vana vabye, 5 vava ni kupima ku nene, ni mahanyela ya kuhlazveka, va ti tsitsirita mitirweni ya laha kaya,* va hi vanene, va ti koramisa ka vanuna vabye+ kasi ku nga wulawuliwi zvahava hi mhaka ya Nungungulu.

6 Hi kufanana, simama ku kuca majaha lezvaku mava ni kupima ku nene;+ 7 uva cikombiso ca mitiro ya yinene hi tindlela tontlhe. Gondzisa lezvi zvi basileko hi kuchela-kota kontlhe,+ 8 na u wulawula magezu ya manene* ma nga solekiko,+ kasi a vakaneti va fela kuwa tingana, va vhumala ca ku biha ca ku hi sola hi cona.+ 9 Ngha a tikhumbi ti ti koramisa ka venyi va tona zvilweni zvontlhe,+ ti ti karatela ku va tsakisa, ti nga va hlamuli zvakubiha, 10 ti nga va yiveli,+ kanilezvi ti tsumbeka zvilweni zvontlhe, kasi ni ka gihi tshamela ti fela ku sasekisa a gondzo ya Muhanyisi wa hina, Nungungulu.+

11 Hakuva a tipswalo ta Nungungulu ti wonekelisilwe na ti neha a kuhanyiswa ka vanhu va tixaka tontlhe.+ 12 Ta hi gondzisa ku ala a mahanyela ma nga dzundziko Nungungulu, ni kunavela ka tiko,+ kanilezvi hi hanya na hi hi ni kupima ku nene, ni kululama, ni ku chava Nungungulu tikweni legi,*+ 13 na hi kari hi rindzela a kutsumba ko tsakisa+ ni kuwonekeliswa ko ngangamela ka Nungungulu wa hombe ni ka Muhanyisi wa hina, Jesu Kristu, 14 loyi a ti nyikeleko hi kota ya hina+ kasi ku hi tlhatlhisa+ ka tixaka tontlhe ta ku hambunyeta nayo, a ti basisela vanhu lava va nga tshomba yakwe yo hlawuleka, va ti tsitsiritako mitirweni ya yinene.+

15 Simama ku wulawula hi zvilo lezvi, u tiyisa ni ku kawuka hi ntamu wontlhe.+ U nga tsiki munhu a ku kanyisa.

3 Simama ku va alakanyisa lezvaku va ti koramisa ni ku ingisa a wuhosi ni mifumo,+ ni ku tshama na va longile ku maha mitiro yontlhe ya yinene, 2 va nga wulawuli kubiha hi munhu, va ngavi vanhu va maguwa, kanilezvi vava vo olova,+ va kombisa kurula kontlhe ka vanhu vontlhe.+ 3 Hakuva a kale hinawu hi wa hi zvipumbu, hi wa nga ingisi, hi wa hambukisilwe, hi wa hi tikhumbi ta kunavela ni kutitsakisa ko hambanahambana, hi wa hi vanhu va kubiha ni va matshoho, va ku nyenyiwa, na hi vengana.

4 Hambulezvo, a cikhati leci a tipswalo ta Muhanyisi wa hina, Nungungulu,+ ni lirandzo lakwe hi vanhu zvi nga wonekeliswa 5 i no hi hanyisa (na ku nga hi hi kota ya mitiro yo lulama hi yi mahileko,+ kanilezvi hi kota ya wuxinji gakwe)+ hi kuhlamba loku ku hi tisileko wutomini+ ni ku hi maha vaswa hi moya wo basa.+ 6 I no hi chululela a moya lowu hi mpimo wa hombe* hi ku tirisa Jesu Kristu, a Muhanyisi wa hina,+ 7 kasi ku, andzhako ka ku hlayelwa kululama hi kota ya tipswalo takwe,+ hiva vagi va tshomba+ mayelano ni kutsumba ka wutomi ga pindzukelwa.+

8 A timhaka leti ti tsumbekile, niku ndzi lava lezvaku u simama ku khanyisa a zvilo lezvi, kasi lava va kholwako ka Nungungulu va veka kupima kumaheni ka mitiro ya yinene. A zvilo lezvi zvi nene niku zva vhuna ka vanhu.

9 Kanilezvi wena, fularela timhaka ta wupumbu ni matimu ya tixaka, ni kukanetisana ni kulwa hi kota ya Nayo, hakuva lezvo a zvi na bhindzu ne a zvi vhuni nchumu.+ 10 Xungetano hi loyi a vhuvhumisako zvitlawatlawana,+ mu ale+ andzhako ka kuva u mu lulekile* a khati go sangula ni ga wumbiri,+ 11 na u tiva lezvaku a munhu loye i hambukile ndleleni, wa wonha, niku i ti konile ha yece.

12 A cikhati leci ndzi to rumela Artemasi kutani Tikikusi+ ka wena, maha zvontlhe zvi nga ntan’wini wa wena kasi uta ka mina le Nikopolisi, hakuva ndzi xuva ku ya tshama laho hi nguva ya cirami. 13 Nyika Zenasi, a nga tlhari ya Nayo, na Apolosi zvontlhe lezvi va to zvi lava kasi va nga vhumali nchumu lipfhumbeni labye.+ 14 Kanilezvi ngha a va ka hina vonawu va gondza ku maha mitiro ya yinene, va fela ku zvi kota ku vhunetela loku ku tshuka ku humelela zva cihatla,+ kasi va nga tsiki ku pswala mihandzu.+

15 Vontlhe lava va nga na mina va ku rungula. Rungula lava va hi randzako kukholweni.

Ngha a tipswalo tiva zvin’we na n’wina n’wentlhe.