Xigonzo 12

Ku Komba Xichawo Ka Wutomi Ni Ka Nkhata

Xana hi fanele ku va ni mawonela muni hi wutomi? (1) ahati a ku bhoxa nyimba? (1)

Xana a maKristu ma kombekisa kuyini lezaku ma khatalela a kuhlayiseka? (2)

Zi bihile a ku daya zihari? (3)

Hi yihi a mikhuwo yi kalaku ku komba xichawo hi wutomi? (4)

Hi wihi a nayo wa Nungungulu xungetano hi nkhata? (5)

Xana a kucheliwa nkhata ku patsiwa kwalaho ke? (6)

1. Jehova hi yena Xibuka xa wutomi. Zontlhe zilo lezi zi hanyako zi nyikwa wutomi hi Nungungulu. (Tisimu 36:9) A wutomi gi basile ka Nungungulu. Hambu a wutomi ga xinwanana, xi nga lomu nzeni ka nyine, xa ha yaku kupswaliweni, gi nani lisima ka Jehova. A ku daya xinwanana lexo, xa ha kulako, ha womu, zi bihile le mahlweni ya Nungungulu. — Eksodusi 21:22, 23; Tisimu 127:3.

2. A maKristu ya lisine ma khatalela a kuhlayiseka. Ma ti wonela khwatsi lezaku a mimoveni ni mitini yabye ku nga humeleli timhango. (Deuteronome 22:8) A malanza ya Nungungulu a ma hlakani hi wutomi, handle ka fanelo, ntsena hi ku fela kuzwa litsako kutani a ku ti xalalisanyana. Hikwalaho a ma ti ngheniseli ka mihlakano yi nga ni timholova, laha kubayisiwako vanhu ha womu. Ma potsa a mihlakano leyi yi kucetelako a timholova. — Tisimu 11:5; Johani 13:35.

3. A wutomi ga zihari na gonawu gi basile ka Muvangi wa gona. A muKristu a nga daya zihari kasi ku a kuma zakuga ni tinguwo, kutani kasi ku a ti vikela ka mababyi ni ka timhango. (Genesisi 3:21; 9:3; Eksodusi 21:28) Kanilezi zi bihile a ku xanisa zihari kutani a ku zi daya, ntsena hi ku fela ku hungata kutani a ku ti tsakisa. — Mavingu 12:10.

4. A kudzaha, a ku cakunya noz-de-betele, ni ku tirisa a mimuri yo lahlisa mapimo hi ku fela kuzwa kunanziha, a zi faneli a maKristu. A mikhuwo yo kari yi bihile hakuva (1) yi hi yisa wukhumbini, (2) yi bayisa miri wa hina ni ku (3) yi nyenyezile. (Va Le Roma 6:19; 12:1; 2 Va Le Korinte 7:1) Zi nga dzuka zi karata nguvu a ku fularela a mikhuwo yo kari. Kanilezi ku laveka ku hi maha zalezo kasi ku hi tsakisa Jehova.

5. A nkhata nawonawu wu basile le mahlweni ya Nungungulu. Nungungulu i ngalo a muhefemulo, kutani a wutomi, wu lomu ka nkhata. Hi kota ya lezo, zi bihile a kuga nkhata. Nazonawu zi bihile a kuga nyama ya xihari xo kala xi nga humeselwangi khwatsi nkhata. A nyama ya xihari xoya hi ku tlimbiwa kutani xi nga fela ntlhanwini yi fanele yi nga giwi. Loku xi delwe hi tlhari kutani hi xibhamu, ku laveka ku xi humeselwa nkhata hi xihatla, loku ku hi ku a nyama ya kona yi kongoma kugiweni. — Genesisi 9:3, 4; Levi 17:13, 14; Mitiro 15:28, 29.

6. Xana zi bihile a ku vumela kucheliwa nkhata ke? Alakanya ku Jehova i lava lezaku hi tsika nkhata. Lezo zi wula ku, lomu mirini wa hina, hi nga dzuki hi amukela a nkhata wa vanhu vanwani kutani nkhata wa hina venyi wu hlengeletelweko tlhelweni. (Mitiro 21:25) Hikwalaho, a maKristu ya lisine a ma vumeli a kucheliwa nkhata. Ma vumela tixaka tinwani ta ku chuma, to fana ni kucheliwa mimuri yo kala yi nga sukeli ka nkhata. Ma zi lava a ku hanya, kanilezi ma nga ta zama a ku ponisa a wutomi hi ku tshova milayo ya Nungungulu. — Mateu 16:25.

[Mifota ka phajina 25]

Kasi ku hi tsakisa Nungungulu, hi fanele hi potsa a kucheliwa nkhata, mikhuwo yi nga hlazekangiko, ni timhango to kala xigelo