Xingheniso

Mugonzi A Ranzekako:

“Ngona u nzi lanzela.” (Marku 10:21) Hi magezu lawa, Jesu Kristu hi lisine la kona i khongotela hina lezaku hi mu lanzela. Xana wa xi vumela a xirambo xakwe? A ku maha lezo zi ta khumba nguvu a wutomi ga wena. Hikuyini?

Jehova i rumele a N’wana wakwe a belekilweko yece lezaku ata misaveni a ta nyika a wutomi gakwe kota nzhiho. (Johani 3:16) Ahandle ka ku hi fela, a N’wana loye i hi kombile a ndlela ya ku hanya. Ka zontlhe lezi a zi mahileko, i hlayisile kutsumbeka a tlhela a neha litsako mbilwini ya Dadani wakwe. Jesu kambe i hi kombile a ndlela ya kuva hi fanana ni Dadani wakwe. A tindlela ni kuranza ka Dadani zi kombisilwe hi kumbhelela ka magezu ni ka mitiro ya N’wana. — Johani 14:9.

Jesu “xikombiso,” hi kuwula ka Biblia, “kasi [hi] fela ku lanzela a nkonzo wakwe.” (1 Pedro 2:21) Loku hi lava ku tshinela ka Jehova, loku hi lava kuva ni wutomi legi hakunene gi nyawulako zalezi, ni loku hi lava ku simama ndleleni yi yako wutomini ga pinzukelwa, hi fanele ku lanzela khwatsi a nkonzo wa Kristu.

Kasi ku sangula a pfhumba legi, hi fanele ku tiva khwatsi a wutomi ga Jesu laha misaveni. Hikwalaho, a matimu ya Jesu ma hlayisilweko lomu ka Biblia ma fanele ku gonziwa hi hina hi kuchela-kota. A ku ehleketa hi zilo lezi Jesu a zi wulileko ni ku zi maha ni ku tlhela hi alakanyela lezi hi nga mu pimanyisisako zona hi magezu ni mitiro zi ta hi vuna a ku wona khwatsi lezi hi to mu lanzelisa zona.

Ngha a bhuku legi gi ku vuna a ku kula liranzweni ha Jesu na Jehova. Niku ngha a liranzo lelo li ku kuca a ku lanzela khwatsi a nkonzo wa Jesu, kasi ku tsakisa mbilu ya Jehova zalezi ni kala kupinzuka.