XIGONZO 23

Xana a mabhuku ya hina ma tsaliswa kuyini ni ku hunzuluselwa?

Munhu a tirako Xipanzeni xa Wutsali le Estados Unidos — Xipanze xa Wutsali, E.U.A.

Ntlawa wa vahunzuluseli le Coreia do Sul — Coreia do Sul

Wanuna wa le Armênia a khomileko bhuku gi hunzuluselweko hi Timboni ta Jehova — Armênia

Nhanyana wa le Burundi a khomileko bhuku gi hunzuluselweko hi Timboni ta Jehova — Burundi

Wasati wa le Sri Lanka a khomileko marevista ma hunzuluselweko hi Timboni ta Jehova — Sri Lanka

Kasi ku maha zontlhe hi zi kotako lezaku hi xumayela a “ivangeli” ka “wontlhe matiko ni tixaka ni tirimi ni mifumo,” hi humesa mabhuku hi tirimi ta ku hunza 750. (Kuvululelwa 14:6) Hi zi kotisa kuyini ku maha ntiro lowo wo karata? Hi wu maha hi ku vuniwa hi vatsali va matiko yo hambanahambana ni ntlawa wa vahunzuluseli vo ti karata—va nga Timboni ta Jehova vontlhe.

A timhaka ta mabhuku ya hina ti ranga hi ku tsaliwa hi xiNgiza. A Hubye yi Fumako yi wonelela a ntiro wa Xipanze xa Wutsali le tsinza ka hina ka misava yontlhe. A xipanze lexi xi rangela a ziavelo za vatsali lava va tirako kwale tsinza ni ka maravi yo kari. A kuva ni vatsali vo hambanahambana zi hi vuna a ku wulawula hi timhaka ta midawuko yo hlaya, lezi zi mahako lezaku a mabhuku ya hina ma khumba vanhu va misava yontlhe.

A timhaka leto ti rumelwa ka vahunzuluseli. Anzhako ka kuva a bhuku gi tsalilwe gi tlhela gi pasiswa, gi rumelwa hi ku tirisa tikomputadori ka mitlawa ya wuhunzuluseli yi nga ka matlhelo yo hambanahambana ya misava, kasi ku hunzulusela, ku hlola, ni ku basisa a timhaka leto. Vona va ti karatela ku hlawula ‘a timhaka to lulama ta zinene’ leti ti to nyika a mongo wontlhe wa lezi zi tsalilweko hi xiNgiza ka lirimi leli zi hunzuluselwako ziya ka lona. — Mutshawuteli 12:10.

A ntiro wu hatlisiswa hi tikomputadori. A komputadori a yi zi koti ku valeta vanhu lava va tsalako ni ku hunzulusela. Hambulezo, va zi kota ku hatlisisa a ntiro wabye hi ku tirisa madisionario, magramatika, ni mabhuku ya ku hlola hi wona ma nga lomu ka tikomputadori. A Timboni ta Jehova ti vangile a Sistema Eletrônico de Fotocomposição Multilíngue (MEPS), ku nga longoloko wa lomu ka komputadori wu hi vumelelako ku tsala mahungu hi mazanazana ya tirimi ma tlhela ma patsiwa ni zithombe kasi ma wumba a mabhuku lawa ma to gandliwa.

Hikuyini hi mahako yontlhe mizamo leyi, hambu ka tirimi leti ti wulawulwako hi vanhu vatsongwani nguvu? Hi maha lezo hakuva kuranza ka Jehova lezaku a “vanhu vontlhe va hanyiswa, vava ni kutiva ka zinene.” — 1 Timote 2:3, 4.

Xana a mabhuku ya hina ma tsaliswa kuyini?
Hikuyini hi hunzuluselako mabhuku ya hina hi tirimi to tala nguvu?