4 wa vafana va nga ingisa Jehovha

A cikhati leci Nebhukadnezare a nga khoma vafana va yindlu ya wuhosi vaya Bhabhuloni, i no hlawula wanuna wa ku hi Axpenaze, a nga tira le ndlwini ya wuhosi, kasi a va khatalela. Cikari ka vafana lava va nga khomilwe, Nebhukadnezare i no byela Axpenaze lezvaku a hlawula lava vo kala va nga tshameli ku babya lezvo na va tlharihile nguvhu ka vontlhe. A vafana lavo va wa ta gondzisiwa hi malembe manharu. Lezvi va nga wa ta gondzisiwa zvi wa ta va longisela kuva tihosana ta lisima lomu Bhabhuloni. A vafana lavo va wa ta gondzisiwa ku lera, ku tsala ni ku wulawula ciAkadhiyani, li nga lirimi li nga wulawuliwa Bhabhuloni. Va wa fanele kuga zvakuga zvo fana ni lezvi zvi nga giwa hi hosi ni vontlhe lava va nga tira lomu ndlwini ya wuhosi. Cikari ka vafana lavo, ku wa hi na Dhaniyeli, Hananiya, Mixayeli na Azariya. Axpenaze i no va cica mavito, a va nyika mavito ya ciBhabhuloni aku hi Bheltexazari, Xadrake, Mexake, na Abhed-Nego. Xana lezvi va nga wa ta gondza zvi wa ta va maha va tsika ku tirela Jehovha?

A vafana lava va 4 va wa ti yimisele ku ingisa Jehovha. Va wa zvi tiva lezvaku a va faneli kuga zvakuga lezvo zva hosi hakuva a zvin’wani zvi wa nga basangi hi kuya hi Nayo wa Jehovha. Hikwalaho, va no byela Axpenaze, vaku: ‘Hi kombela ku hi ngagi zvakuga zva hosi’. Axpenaze aku: ‘Loku mu ngagi zvakuga lezvi, a hosi yi mu wona na mu wonekisa ku khwatsi mo babya, yi ta ndzi daya’!

Dhaniyeli i nova ni mawonela. I no byela loyi a nga kari a va khatalela, aku: ‘Hi kombela ku u hi nyika matsawu ni mati basi hi cipimo ca 10 wa masiku, u gumesa u hi fananisa ni lava va gako zvakuga zva hosi’. Loyi a nga va khatalela i no vhumela.

Loku ma mbhelile masiku lawo ya 10, Dhaniyeli ni vanghana vakwe va 3, va no woneka na va hanya khwatsi a ku hundza vafana vontlhe lava van’wani. Jehovha i no tsaka hi lezvi va nga mu ingisa. I no tlhela a nyika Dhaniyeli a wutlhari ga ku zwisisa miwoniso ni miloro.

A cikhati leci va nga mbheta ku gondza, Axpenaze i no teka vafana vontlhe vaya ka Nebhukadnezare. Hosi Nebhukadnezare i no wulawula navo a wona lezvaku Dhaniyeli, Hananiya, Mixayeli na Azariya va wa tiva nguvhu niku va wa tlharihile a ku hundza vafana vontlhe. I no hlawula lava va 4 kasi va tira lomu ndlwini yakwe ya wuhosi. A hosi yi wa tala ku va kombela wusungukati loku yi lava ku maha zvilo zva lisima. Jehovha i wa va nyikile wutlhari ga hombe a ku hundza titlhari tontlhe ta hosi ni vasalamusi vakwe.

Hambu lezvi va nga hi tikweni ga le kule, Dhaniyeli, Hananiya, Mixayeli na Azariya a va rivalangi lezvaku va wa hi vanhu va Jehovha. Wenawu u ta mu alakanya Jehovha contlhe cikhati, hambu loku mamani na papayi va hi kule?