Cingheniso

KUNGO GA BHUKU LEGI

Jehovha Nungungulu i kuca vanhu vakwe lezvaku va tshama hi “ku hlota” wutlhari ni kupimisisa a ku khwatsi hi loku va lavetela a “tshomba yi fihlilweko”. (Mav. 2:1-5) Lezvo zvi wula lezvaku hi fanele ku ti karata ku lava mihlamulo ya zvilo hi kalako hi nga zvi zwisisi lomu ka Bhibhiliya ni ku kuma civhuno ka lezvi zvi hi karatako wutomini ga hina. A Bhuku go kambisisa hi gona ga Vakustumunyu va Jehovha gi mahelwe ku ku vhuna ku kambisisa.

Legi a hi bhuku gi nga ni xaxameto wa tindzima tontlhe ti humesilweko ka mabhuku ya hina leti ti wulawulako hi mhaka yo kari u nga yi lavako. Hambulezvo, ka mhaka yin’we ni yin’wani yi nga kona, ku xaxametilwe tindzima ti nga ni mahungu ya lisima ni ya maswa ma humesilweko hi ciTshwa, kusukela hi 1997 kuya mahlweni.

NDLELA YA KU KAMBISISA

Cuwuka laha ka Lezvi zvi nga ndzeni, ku nga pajina legi gi landzelako, u hlawula a hloko ya mhaka u wonako lezvaku kuzvilava yi na ni mahungu ma yelanako ni lezvi u zvi lavako. Kuzvilava u nga ha lavetela lomu ka tihloko ta mhaka to hambanahambana kasi kuza u kuma mhaka u yi lavako. A zvihlokwana zva mhaka zvi nga lahasi ka hloko ya mhaka yin’we ni yin’wani zvi ta ku vhuna ku hatlisa u kuma lezvi u zvi lavako.

Hi kulandzela, vhulula laha ka pajina legi gi kombiswako zvonake u ta ya kuma hloko ya mhaka ni cihlokwana ca mhaka leci u ci hlawulileko. Ka tihloko ta mhaka ni zvipimo zvi xaxametilweko laho, hlawula leyi u lavako ku kambisisa ka yona. Loku a mabhuku lawo u hi nawo laha kaya, lomu ka muchini, kutani bhibhiliyoteka ya lomu Salawini ya Mufumo, lavetela ndzima kutani cipimo leci ci kumbukilweko. Hambu loku a hloko ya mhaka ya ndzima yo kari yi wonekisa ku khwatsi a yi zwanani ni mhaka leyi u yi hlawulileko, tiva lezvaku a ndzima leyo yi na ni mahungu ma yelanako ni mhaka leyo. Ahandle ka cipandze ca Lezvi zvi nga ndzeni, u ta kuma timhaka ti xaxametilweko hi mabhesedhi le ndzhako ka bhuku legi.

Loku u lava tlhamuselo wa vhesi go kari ga Bhibhiliya, vhulula a cipandze leci ci nge “Mitsalo yi tlhamuselweko.” A mavhesi ma tako ka xaxameto lowo hi lawa ku tlhamuselwako zvokari hi wona.

U nga rivali lezvaku wo hlota “tshomba yi fihlilweko.” Kasi ku yi kuma, zvi lava cikhati ni kutikarata. Hikwalaho, vana ni lihlazva-mbilu laha u hlotako a hlamulo kutani wurangeli go kari. Laha u yako u gi tirisa nguvhu a Bhuku go kambisisa hi gona, zvi taya zvi olova zvi tlhela zvi ku tsakisa a ku kuma mahungu yo kari u ma lavako. Jehovha i ta chachazela a kutikarata ka wena niku i ta ku vhuna ku kuma wutlhari ni kupimisisa. — Mav. 2:6; 4:⁠5.

TLHAMUSELO WA ZVIFUNGO:

❐ = Xaxameto wa tindzima ta bhuku go kari

§ = Cihlokwana ca mhaka kutani cipandze

¶ = Ndzimana kutani tindzimana

cip. = Cipimo

xip. = Xipimo

p. kutani pp. = Pajina kutani mapajina

N.° = Numero

12/2004 = Hweti/Lembe

1/2/2010 = Siku/Hweti/ Lembe

A bhuku legi gi landzelako gi na ni índice ya gona:

Hi xaxametilwe kasi ku maha kuranza ka Jehova