U WA ZI TIVA?

Xana a tempeli ya Jerusalema yi wa tsukile yi aketwa anzhako ka 70 Nguveni ya Hina?

JESU i wulile lezaku ku hava ni ribye ginwe ga tempeli ya Jehova legi gi nga wa ta siyiwa hehla ka ginwani — a xiprofeto lexi xi tatisekile a xikhati lexi a masochwa ya Roma, lawa ma nga rangelwa hi Titusi ma nga hahlula Jerusalema hi 70 Nguveni ya Hina. (Mat. 24:2) Hi nzhako ka xikhati, Juliano, a Hosi, i lo maha makungo ya ku aketa a tempeli.

Juliano i vitanwa kota hosi ya muhedeni yo gumesa ya mufumo wa Roma. A zukulu loyi wa Constantino wa Hombe i gonzile lezi zi nga vitaniwa kota gonziselelo ya wuKristu. Hambulezo, laha a nga yimiswa kota hosi hi 361 Nguveni ya Hina, i lo kaneta a gonziselelo leyi kubaseni zinwe ni mahanyela yo biha ya wuKristu ga masikwini yakwe zonake a lanzela wuhedeni. A mabhuku ya matimu ma mu kumbuka kota “a Muhluwuki.”

Juliano i lo venga wuKristu. A xinwe xa zigelo ku ngava lezi a nga wonileko a vayimeli va gona na va daya raru wakwe ni xaka gakwe a xikhati lexi a nga hi ni ntlhanu wa malembe ni ginwe. Hi kuya hi vatsali va matimu ya chechi, Juliano i byelile vaJuda lezaku va aketa a tempeli yabye, na a alakanya lezaku lezo zi wa ta komba lezaku Jesu i wa hi muprofeti wa mawunwa.a

Lezaku Juliano i wa mahile makungo ya ku aketa tempeli, a zi kanakanisi. A vatsali va matimu va bhulisana hi mhaka ya ku lava ku tiva lezaku hakunene i yi sangulile ni ku a nga yi sangulangi, niku xini xi nyimisileko a ntiro lowo. Hambulezo, a nchumu wo tiya hi lowu: Juliano i delwe loku ku hunzile malembe mambiri na a sangulile ku fuma, niku a makungo yakwe ma file zinwe naye.