Jehova ‘i rwala minzhwalo ya mina wontlhe masiku’
Hambu lezi nzi lwako ni mababyi ya ku khwatsi nzi nga ta hlula, nza zi wona lezaku a Dadani wa hina wa le tilweni wa liranzo wa nzi vuna wutomini ga mina gontlhe. Niku hi ku hunza 20 wa malembe, nza tsaka nguvu hi ku tirela Jehova kota phayona.
Nzi pswalilwe hi 1956 na nzi hi ni mababyi ma vangiwako hi ku nga valeki khwatsi ka madingo ya longo. A siha lowu wu nga onheka wu nzi vangela a wukhurubu ni mababyi manwani yo bayisa nguvu.
Na nzi nga se pswaliwa, a Timboni ta Jehova ti nga hi varumiwa ti lo sangula ku gonza a Biblia ni vapswali va mina. Na nza ha hi nwanana, ku wova ni vahuweleli vatsongwani ntsena va nga tsawukene nguvu doropeni ga hina ga Usakos le Namíbia. Hikwalaho, a timhaka leti hi nga fanele kuya ti gonza mitlhanganweni ya bandla, hina hi wa ti gonza kota ngango. A xikhati lexi nzi nga hi ni 7 wa malembe, nzi lo mahiwa a operasawu kasi va bhoxa a wutshamu ginwani ga kuva nzi xixita hi gona. Laha nzi nga hi ni 14 wa malembe, nzi lo sangula ku babya hi nyokani. Kota lezi a xikola sekundaria xi nga hi kule ni laha kaya, ni lezi nzi nga fanele ku khatalelwa hi vapswali va mina xontlhe xikhati, nzi lo tsika xikola na nzi nga mbhetangi.
Hambulezo, nzi lo zama ku tiyisa a kuzwanana ka mina na Jehova. Ka xikhati lexo, a kutala ka mabhuku ya hina ya wuKristu ma wa nga hi kona hi lirimi la mina la mabeleko la xiAfrikhaans. Hikwalaho, nzi lo gonza xiNgiza kasi nzi zi kota ku gonza mabhuku ya hina. Nzi lova muhuweleli wa Mufumo zonake nzi bapatizwa na nzi hi ni 19 wa malembe. Ka mune wa malembe lawa ma nga lanzela, nzi lova ni mababyi yo tala ni ku tshama na nzi nga tsakangi. Tlhatakumbiri, kota lezi ka doropa ga hina a vanhu va nga hanya hi kuzwanana ka hombe, nzi wa nga zi koti a ku tira sinwini hi kuhiseka hakuva nzi wa va chava.
Na nza ha hi kusanguleni ka malembe ya wu 20, hi lo rura Namíbia hiya Afrika Dzonga. Seyo hi kona nzi nga hlengela ni bandla hi khati go sangula. Lowo ku’ve nchumu wo saseka nguvu ka mina! Hambulezo, nzi wa fanele ku mahiwa operasawu kambe.
Anzhako ka xikhatanyana xo kari, nzi lozwa muwoneleli wa xipanze na a wulawula hi ntiro wa wuphayona. Lezi a nga wula zi lo nzi khumba nguvu. Nzi wa zi tiva lezaku a wutomi ga mina a gi nyawuli, kanilezi nzi wa zi wonile lezi Jehova a nzi hlayisisileko zona nzeni ka zikarato za mina zo tala. Hikwalaho, nzi lo maha xikombelo xa kuva phayona ga xikhati xontlhe. Kanilezi, hi kota ya mababyi ya mina, a madota ma lo kanakana ku vumela xikombelo xa mina.
Hambulezo, nzi lo ti karatela ku maha zontlhe nzi zi kotako ntirweni wa kuxumayela. Hi ku vuniwa hi mamani ni vanwani, nzi lo tira tihora ti tiriwako hi phayona hi xipimo xa ntlhanu wa tihweti ni yinwe. Lezo zi kombile a kutiyimisela ka mina ka ku lava ku maha phayona ni lezaku a mababyi ya mina ma wa nga nzi tsanzekisi ku maha lezo. Nzi lo maha xinwani xikombelo, ka khati legi nzi lo vumelelwa. Hi 1 ka Setembro wa 1988, nzi lo maha phayona ga xikhati xontlhe.
Kota phayona, nza xi wona xivuno xa Jehova xontlhe xikhati. A ku gonzisa lisine ka vanhu va vaswa wutshanwini ga ku tshama na nzi alakanya a zikarato za mina za nzi vikela, zi nzi wundla, zi tlhela zi nzi vuna ku kula hi tlhelo ga moya. Nzi na ni litsako la hombe hi ku vuna vanhu vo tala lezaku va ti hendleleta ni ku bapatizwa.
A wutomi ga mina ga ha tshamisile zalezo za ku khwatsi nzi nga ta hlula. Kanilezi Jehova ‘i rwala minzhwalo ya mina wontlhe masiku.’ (Tis. 68:19) A nga nzi vuni ku timisela ntsena, kanilezi i maha lezaku a ku hanya zi nanziha hambu lezi nzi babyako!