A ku tirela Nungungulu hi wona a muri wakwe!

A xikhati lexi a maphayona mambiri ma nga vumelelwa ku nghena ka muti wo kari le Quénia ma lo dzuka hi ku wona a munhu wa mutsongwani nguvu na a etlele laha mubhedini. I wa hi ni muzimba wa wutsongwani nguvu ni mawoko yo komana. Laha va nga bhula naye hi xitsumbiso xa Nungungulu xa lezaku “a zilema zi ta tlula khwatsi i hlangu,” a wanuna loyi i lo tsaka nguvu. — Isa. 35:6.

A maphayona ma lo tiva lezaku Onesmus, loyi ka xikhati lexi a nga kusuhani ni ku tlhanganyisa a 40 wa malembe, i pswalilwe na a hi ni wubabyi legi va nge i osteogenesis imperfeita, kutani mababyi ya marambu yo kala ku tiyela. A marambu yakwe ma wa tshamisile ku khwatsi ziharu za manza — laha kaku hi ku mu manyanyana kutsongwani mu wo tshoveka. Kota lezi a mababyi lawa ma nga hiko na muri ge hambu ku chumiwa ma mbhela, Onesmus i wa alakanya lezaku i ta hanya wutomi gakwe gontlhe na azwa kubayisa ni ku tshama ka xitulo xa maroda a nga suki.

Onesmus i lo vumela ku gonzelwa a Biblia. Hambulezo, a mamani wakwe i lo mu beletela kuya mitlhanganweni, a wula lezaku loku aya mitlhanganweni i ta pfotloka marambu ni ku engetelwa kubayisa. Hikwalaho, a vamakabye va lo gravara tikanelo mitlhanganweni va nyika Onesmus lezaku a ti ingisela laha kaya. Anzhako ka ku gonza hi xipimo xa ntlhanu wa tihweti, Onesmus i lo ti mahela xiboho xaku i chukwana kuya mitlhanganweni ya bandla hambu loku ko humelela yini.

Xana a kuya mitlhanganweni zi engetele a kubayisa loku Onesmus a nga kuzwa? Ne ni kuvala. Onesmus i ngalo: “A kubayisa loku nzi nga kuzwa xontlhe xikhati ku wo khwatsi ku hunguka loku nzi hi mitlhanganweni.” I alakanya lezaku a kutsumba kakwe ka kuswa loku a ku kumileko hi kona ku nga mu maha a tizwa na a chukwata. A mamani wa Onesmus i lo wona a kucica loku a n’wana wakwe a nga ku kombisa a tlhela a tsaka laha ka kuza yenawu a vumela ku gonza a Biblia. Za koteka ku ngha mbilwini yakwe a wulile ku “a ku tirela Nungungulu hi wona a muri wa n’wana wa mina.”

Zalezo, Onesmus i lo maha muhuweleli a nga bapatizwangiko. Hi kufamba ka xikhati i lo bapatiziwa niku zalezi i nanza ga wutireli. Hambu lezi a nga zi kotiko ku tirisa milenge yakwe ni ginwe ga mawoko yakwe, Onesmus i wa xuva ku maha zontlhe a zi kotako ntirweni wa Jehova. I wa xuva ku maha phayona go vunetela kanilezi i wa kanakana ku maha xikombelo. Hikuyini? Hakuva i wa zi tiva lezaku i wa fanele ku khegela ka munhu munwani kasi a chova a xitulo xakwe xa maroda xontlhe xikhati. Laha a nga bhula ni maKristu-kulobye xungetano hi xikarato lexi, ma lo mu tsumbisa lezaku ma ta mu vuna. Kunene, ma lo tatisa xitsumbiso xabye, ma vuna Onesmus lezaku a tira kota phayona go vunetela.

Onesmus i lo xuva kuva phayona ga xikhati xontlhe, kanilezi i wa karateka hi kota ya mhaka leyi kambe. Hambulezo, ka siku go kari, i lo tiyiswa hlana hi mutsalo wa siku. A mutsalo lowo wu wa hi Tisimu 34:8, wu nge ngalo: “Ringani mu wona lezaku Jehova i nene.” Anzhako ka ku ehleketa hi mutsalo lowu, Onesmus i lo ti mahela xiboho xa kuva phayona ga xikhati xontlhe. Ka xikhati lexi, i xumayela a mune wa masiku hi viki niku i na ni zigonzo zo tala za Biblia lezi zi kombisako ku kula hi tlhelo ga moya. Hi 2010, i lo gonza Xikola xa Ntiro wa Wuphayona. Hi nga wona lezi Onesmus a nga tsakisa zona hi ku wona lezaku a munwe wa vagonzisi wabye ku’ve munwe wa vamakabye vambiri lava va nga mu enzela hi khati go sangula!

A vapswali va Onesmus makunu va file, kanilezi a vamakabye va xinuna ni va xisati laha bandleni va mu hlayisa. Wa bonga nguvu hi kota ya makatekwa lawa a ti buzako hi wona ka xikhati lexi, niku i xuva nguvu a ku wona kutatiseka ka mutsalo lowu waku: “A ku na muaki ni munwe a ta ngaku: Nza babya!” — Isa. 33:24.