HLOKO YA MHAKA YA KAPA | XANA NUNGUNGULU WA LAVEKA WUTOMINI GA HINA?

Hikuyini ku vukako a xiwutiso lexi xi nga laha ka kapa?

“A vanhu vo tala a va na mhaka na Nungungulu. Wena ke?” Lawa magezu ma tsalilweko ka kwadru go kari ga ku haxa mahungu hi ntlawa wa vanhu va nga kholwiko ka Nungungulu. Va tizwa na va nga hi na xilaveko xa Nungungulu wutomini gabye.

Hi tlhelo ginwani, lava va nge va kholwa ka Nungungulu, va maha ziboho zo khwatsi hi loku a nga hi kona. Salvatore Fisichella, a Bixopo wa hombe wa chechi ya Katolika, i wulile lezi xungetano hi ziro za chechi yakwe: “Inyamutlha, zi wonekisa ku khwatsi a ku na munhu a nga wa ta zi tiva ku hi maKristu hi ku cuwuka mahanyela ya hina ntsena, hakuva ma fana ni ya lava va nga kholwiko.”

A vokari va khomekile nguvu laha ka kuza va vumala ni xikhati xo ehleketa hi Nungungulu. Va alakanya ku i le kule nguvu kutani lezaku a nga tshineleleki, hikwalaho va mu wona na a nga hi wa lisima wutomini gabye. Loku a vanhu lavo va tshuka va alakanya Nungungulu, va mu alakanya ntsena loku va hi zikaratweni kutani loku va lava zo kari — a ku khwatsi i nanza gi tirelako ku maha ni xihi va xi lavako.

Hi ndlela yo kari, a vanwani a va hanyi hi lezi va gonziswako tichechini tabye hakuva va zi wona na zi nga vuni nchumu. Kasi ku nyika xikombiso xinwe ntsena, a 76 wa tipursento ta vaKatolika le Alemanha ti kholwa lezaku a zi bihangi a kuva a wanuna ni wasati va hanya zinwe na va nga chadangi — ku nga nchumu wo hambana nguvu ni lezi zi gonzisiwako hi chechi yabye ni Biblia. (1 Va Le Korinte 6:18; Maheberu 13:4) Kunene, a hi vaKatolika voce va wonako kuhambana xikari ka mahanyela yabye ni lezi va gonziswako. A varangeli va wukhongeli go tala va karateka hi ku wona lezaku a tiyivu tabye ti hanyisa ku khwatsi “vanhu va nga kholwiko.”

A zikombiso lezi zi vuxa xiwutiso lexi: Nungungulu wa laveka wutomini ga hina hakunene ke? A mhaka leyi a hi ya nyamutlha; ya kale nguvu. Yi sangulile ku woneka hi khati go ranga lomu ka zipimo zo sangula za Biblia. Kasi hi kuma a hlamulo wa xiwutiso lexi, a hi kambisiseni timhaka to kari ti kumbukiwako lomu ka bhuku ga Genesisi.