WA HA ZI ALAKANYA KE?

U gonzile zi buva a marevista A Murinzeli ma ha hi ku hunzako? Loku zi hi tano, zama ku hlamula a ziwutiso lezi zi lanzelako:

Hi 14 ka Nisani, a yivana ya Pasika yi wa fanele ku tlhabyiwa hi xikhati muni ke?

A vahunzuluseli vo kari va Biblia ve ngalo yi wa fanele ku tlhabyiwa “xikari ka wusikwana gimbiri,” lezi zi wulako xikhati gi nge nzire kutani gi nge phum — a gambo na gi pelile kanilezi na gi nga seva wusiku khwatsi. (Ekso. 12:6) — 15/12, maphajina 18-19.

Matshinya muni ya milayo ya Biblia lawa a vaswa va nga ma tirisako kasi ku maha ziboho za wutlhari?

A manharu hi lawa: (1) A kuranga lava a Mufumo wa Nungungulu ni kululama kakwe. (Mat. 6:19-34.) (2) Kuma litsako hi ku tirela vanwani. (Miti. 20:35.) (3) Ti buze hi ku tirela Jehova wusweni ga wena. (Mutsh. 12:1.) — 15/1, maphajina 19-20.

Vakhileli muni va mune va mahaxi va mahako ntiro wabye kusukela 1914?

Jesu kota mukhileli wa haxi go basa, i hlongolile Satani ni madimoni yakwe le tilweni. A mukhileli wa haxi go pswhuka i kombisa tiyimpi leti ti xanisako vanhu. A mukhileli wa haxi ga ntima i yimela tindlala. A mukhileli wa haxi go balala i neha kufa ka timiliyoni ta vanhu hi ntungu. (Kuv. 6:2-8) — 1/2, maphajina 6-7.

Xana a “muchado wa Yivana” wu maheka rini? (Kuv. 19:7)

A “muchado wa Yivana” wu maheka anzhako ka loku a Hosi, Jesu Kristu, yi mbhetisile a kuhlula ka yona, lezi zi wulako ku anzhako ka kuloviswa ka Babuloni loyi wa hombe ni ku lwiwa ka yimpi ya Har–Magedoni. — 15/2, phajina 10.

Hikuyini a vaJuda masikwini ya Jesu va nga rinzela Messia? (Luka 3:15)

A hi nge tiyiseki lezaku a vaJuda va zana ga malembe go sangula va wa xi zwisisa a xiprofeto xa Danieli xungetano hi Messia, a ku fana na hina. (Dan. 9:24-27) Hambulezo, za koteka ku ngha va zwile a xitiviso lexi a ngelosi yi nga xi maha ka varisi vo kari kutani lezi muprofeti Ana a nga wula a xikhati a nga wona Jesu le tempeleni. Ahandle ka lezo, ku tile titlhari to kari na ti lavetela “a hosi ya vaJuda leyi yi belekilweko.” (Mat. 2:1, 2) Hi nzhako ka xikhati, Johani Mubapatizi i lo komba lezaku Messia i wa ta chikela lokuloku. — 15/2, maphajina 26-27.

Hi nga potsisa kuyini ku teka Ina wa hina hi mu maha Ahihi ke? (2 Kor. 1:18)

Lisine lezaku hi nga tshuka hi tsanzeka ku tatisa lezi hi zi tsumbisileko hi kota ya ziyimo zo kari hi nga hiko na ntamu wa ku zi vala. Kanilezi, loku hi tsumbisa zokari kutani ku maha makungo, hi fanele ku maha zontlhe zi nga ntanwini wa hina kasi ku zi tatisa. — 15/3, phajina 32.

Hi nga hlulisa kuyini a xiringo xa ku hlalela a zithombe za masango?

A zilo zinharu zi nga hi vunako hi lezi: (1) Ku tekela ku cuwuka reveni loku hi wona zithombe za masango. (2) Ku vikela maalakanyo ya hina hi ku veka kupima ka zilo za zi nene ni ku khongela ka Nungungulu. (3) Cuwuka lomu u yako hi ku potsa mafilimu ni tisite ti nga ni zithombe za masango. — 1/4, maphajina 10-12.

I wuyelo muni gi nga rinzelwangiko legi gi nga vako kona loku a muKristu a siya ngango wakwe kasi ku ya tira ka tiko ginwani?

Loku a vapswali va nga hanyi zinwe kota ngango, a vana va nga ha xaniseka moyeni wabye ni ku wela ka mahanyela yo biha. Va nga ha tlhela va sola a mupswali loyi a hanyako kule. Niku loku a nuna ni sati va nga hanyi zinwe va nga ha ringwa ku maha wubhayi. — 15/4, maphajina 19-20.

Hikuyini a zigevenga lezi zi nga dawa timhanzeni zi nga tshoviwa milenge?

A vaRoma va wa daya a zigevenga zo kari timhanzeni. A vaJuda va lo kombela lezaku a zigevenga lezi nga dawa zinwe na Jesu zi tshoviwa milenge. Lezo zi wa ta maha ku zi va karateka ku hefemula kasi va hatlisa kufa. Hi ndlela leyo, va wa nga ta tshama wusiku gontlhe laha sinyeni. (Deut. 21:22, 23) — 1/5, phajina 11.

Ziwutiso muni za mune hi faneleko ku zi alakanya a xikhati lexi hi bhulako ni vanhu wutirelini ga hina?

Mbamani nzi wulawulako navo? Hi kwihi laha nzi wulawulako navo? Hi xihi xikhati xi nene xa ku wulawula ni vanhu? Xana nzi fanele ku wulawulisa kuyini navo? — 15/5, maphajina 12-15.

Xana a ku dzaha zi daya kuya chikela kwihi?

Ka zana ga malembe gi hunzileko, ku dele 100.000.000 ta vanhu. Zalezi, ku daya xipimo xa 6.000.000 ta vanhu hi lembe. — 1/6, phajina 3.