Hi lihi lisine xungetano hi Khisimuso?

A vanhu vo tala misaveni yontlhe vaga Khisimuso hi zigelo zo hambanahambana. A vokari va lonzowota mubuzo lowu kasi ku tshama ni vanghana ni maxaka. Ka vanwani xikhati xa ku ehleketa hi Nungungulu kutani ku tirisa xikhati xabye kasi ku vuna zisiwana. Handle ko kanakana a ku maha zilo lezo, zona ha zoce a zi bihangi. Hambulezo, a zilo lezo za zi nene zi tolovelako ku mahiwa xikhatini xa Khisimuso hi tlhelo go kari a hi zi nene.

Xo sangula, a votala va gako Khisimuso va kholwa lezaku a Khisimuso mubuzo wa ku tsakela siku ga kupswaliwa ka Jesu. Hambulezo, a vatsali vo tala va matimu va vumela kubaseni lezaku a siku ga kupswaliwa kakwe a gi tiveki. A bhuku The Christian Book of Why, gi wula lezaku “a maKristu yo sangula a ma vumelangi ku yimisa siku go kari kota legi Jesu a nga pswaliwa hi gona” hakuva va wa lava “ku ti humesa ka mikhuwo yontlhe ya wuhedeni.” Lexi xi hlamalisako hi lezaku, a Biblia a gi kombi lezaku Jesu i tshukile a maha mubuzo wa ku tsakela a siku ga kupswaliwa kakwe kutani ka munhu munwani. A kuhambana ni lezo, i layile a vapizani vakwe lezaku va alakanya a siku ga kufa kakwe. — Luka 22:19.

Xa wumbiri, a titlhari to tala ti vumelelana lezaku a zilo zo tala zi yelanako ni Khisimuso zi sukela ka mikhuwo ya wuhedeni ni ka yinwani yi nga hiko ya wuKristu. A mikhuwo leyo yi patsa Papai Noel, kutiriswa ka sinya va nge i visco, sinya ya Khisimuso, ku nyikana zinyikiwo, ku lumeka makhandlela, ku hisa zigodo za Khisimuso, kuhayeka zitsangi, ni ku yimbelela tisimu ta Khisimuso. Xungetano hi mikhuwo yo kari xikari ka leyi, a bhuku The Externals of the Catholic Church gi ngalo: “A xikhati lexi hi nyikelako kutani ku amukela zinyikiwo xikhatini xa Khisimuso, ni laha hi hayekako zitsangi lomu tindlwini ni lomu tichechini ta hina, vanhu vangani xikari ka hina lava va zi tivako a ku za koteka ku ngha na hi maha mikhuwo ya wuhedeni ke?”

Hambulezo, u nga ha ti wutisa a ku kasi hi xihi a xisolo laha ka ku lanzela a mikhuwo leyi yi nge khwatsi a yi bihangi ke? Wona a nchumu wa wunharu wu kalako wu nga hi wu nene ka zimaho lezo. A hlamulo wa kona hi wu kuma kwalaho. Nungungulu a nga xalali hi ku patsela a mikhuwo ya wuhedeni ni wukhozeli gi basileko. Hi ku tirisa a muprofeti wakwe Amosi, Jehova i byelile a vakhozeli vakwe va zitlula-milayo le Israeli wa kale aku: “Nza venga ni ku nyenya a mibuzo ya nwina.” Susani “a guwa ga tisimu ta nwina” laha ka mina. — Amosi 5:21, 23.

Hikuyini Jehova a wulileko magezu lawo yo binza? Wona lezi a vanhu va mufumo wa le Nwalungu wa Israeli wa kale va nga kari va zi maha. Jeroboamu, a hosi yabye yo sangula, i lo maha marole ya nzalama a ma veka madoropeni ya Dani ni Beteli, a kuca vanhu lezaku va ma khozela wutshanwini ga ku khozela Jehova Nungungulu hi ndlela yi faneleko lomu tempeleni le Jerusalema. A hosi yi lo mahisa mibuzo kambe yi tlhela yi yimisa a vapristi lezaku va vuna vanhu mibuzweni leyo. — 1 Tihosi 12:26-33.

Lezi a vaIsraeli va zi mahileko zi wa wonekisa ku khwatsi zi wa hi ni xigelo xo zwala. A handle ka lezo, kasi va wa nga mahi zontlhe lezo hi vito ga Nungungulu ni ku fela ku mu tsakisa ke? A magezu yo binza lawa Nungungulu a ma wulileko hi ku tirisa Amosi ni vaprofeti vanwani ma wa komba zi ku dlunya lezi Nungungulu a nga ti zwisa zona hi zilo lezo. Hi ku tirisa muprofeti Malaki, Nungungulu ite: Hi “mina Jehova a nzi hunzuki.” (Malaki 3:6) Xana lezo a zi hi kombi lezi Nungungulu a ti zwisako zona hi maKhisimuso yo tala lawa ma giwako inyamutlha?

Anzhako ka kuva va kambisisile a timhaka leti ta lisine xungetano hi Khisimuso, a vanhu vo tala va ti mahele xiboho xa ku ngagi. Wutshanwini ga lezo, va kuma litsako ni ku xalala ka lisine hi ku tshama zinwe va mbheta xikhati ni vanghana vabye ni maxaka, ni ku vuna zisiwana ni ka xihi xikhati va zi lavako nzeni ka lembe gontlhe.