“Nguva yo hlawuleka nguvu”

HI 1870 a ntlawana wo kari le Pittsburgh (Allegheny), Pensilvânia, Estados Unidos, wu lo sangula ku hlota Mitsalo. Na va rangelwa hi Charles Taze Russell, va lo gonza a mhaka ya nzhiho wa Kristu, va tekela ku zwisisa a xipanze xa wona xa hombe kungweni ga Jehova. A va no ku tsaka hi ku tiva lezaku a nzhiho wu vulula ndlela ya kuhanyiswa, hambu ka lava va nga kala va nga sezwa nchumu hi Jesu! Hi kubonga, va lo kuceka ku maha xialakanyiso xa kufa ka Jesu lembe ni lembe kasi ku mu alakanya. — 1 Kor. 11:23-26.

Makabye Russell i lo humesa a Zion’s Watch Tower (A Murinzeli wa Zioni), loyi a nga seketela a gonzo ya nzhiho kota xikombiso xa hombe ka zontlhe xa liranzo la Nungungulu. A Watch Tower i wa vitana a nguva ya Xialakanyiso lezaku i “nguva yo hlawuleka nguvu” a tlhela a kuca vagonzi lezaku va xi maha le Pittsburgh kutani ka mitlawa yabye ka matshamu manwani. “Hambu loku kova vambiri kutani vanharu va nga ni kukholwa loko ko saseka” — kutani munwe basi — va wa tava “ni kubohana ka mbilu ni Hosi.”

Lembe ni lembe, ku wa engeteleka vanhu va kuta Pittsburgh kasi ku ta wona Xialakanyiso. A xirambo xi waku: “Mu ta ta kuma timbilu ta liranzo leti ti to mu maha mu tizwa na mu hi kaya.” Kunene, a Zigonzani za Biblia za le Pittsburgh zi wa rurela vamakabye va zona va moya hi kuziranza ni ku va nyika zakuga. Hi 1886 ku lo mahiwa “Mutlhangano wa Hombe” hi masiku yo tala nguveni ya Xialakanyiso. A Watch Tower i waku: “Tana ni mbilu ti teleko hi liranzo hi Hosi ni vamakabye va yona zinwe ni lisine la yona.”

Hi malembe yo tala, a Zigonzani za Biblia le Pittsburgh zi lo ma mahela migotsovanyano a makholwa ya nzhiho lawa ma ngata Xialakanyisweni. Laha a Zigonzani za Biblia zi ngaya zi tala, a ntsengo wa mitlawa ni wa vanhu va nga maha Xialakanyiso misaveni yontlhe wonawu wu waya wu kula. Ray Bopp wa bandla ga Chicago ecclesia i wula lezaku ka Xialakanyiso xa 1910, zi tekile tihora to tala a ku fambisa zikombiso za Xialakanyiso ka mazanazana ya vanhu lava va nga hi kona hakuva a kutala ka vona va waga xibaba ni kunwa vinya.

Zini va nga zi tirisa kota zikombiso? Hambu lezi va nga zi tiva lezaku Jesu i tirisile vinya Xilalelweni xa Hosi, hi xikhati xo kari a Watch Tower i lo kuca ku tirisa sumu ya mauva yo tsakama kutani mauva yo woma yo khoniwa wutshanwini ga vinya, kasi ku nga ringi “lava va nga ni gome nyameni.” Hambulezo, lava va nga alakanya lezaku “ku fanele ku tiriswa vinya gi vilileko” va wa nyikwa vinya. Hi kufamba ka xikhati, a Zigonzani za Biblia zi lo zi zwisisa lezaku a vinya go pswhuka gi nga xanganyelwangiko hi gona gi yimelako khwatsi a nkhata wa Jesu.

A ku alakanya a kufa ka Jesu zi wa va nyika lungelo ga ku ehleketisisa. Kanilezi, ka mabandla yo kari va wa maha ku khwatsi xirilo, niku kumbheleni ka longoloko, a nga kona a nga wulawula. Hambulezo, a bhuku Jehova ga 1935 gi lo wula lezaku a Xialakanyiso a xi fanelangi ku mahiwa kota “xirilo” xa kufa ko bayisa ka Jesu, kanilezi kota ximaho xa “kutsaka” hi kufuma kakwe kota Hosi kusukela 1914.

A lembe ga 1935 gi lova ni kucica ka hombe ku nga khumba a Xialakanyiso ka malembe ma nga hata, hakuva ku lo nyikwa tlhamuselo wa “xidlemo xa tsanza-vahlayi” xi kumbukiwako ka Kuvululelwa 7:9. A malanza ya Jehova ma wata na ma wona a ntlawa lowo kota maKristu ma ti hendleletileko lawa ma kalako ma nga hiseki. Makunu a xidlemo lexo xa tsanza-vahlayi xi lo tivekiswa kota vakhozeli vo tsumbeka lava va nga ni kutsumba ka ku hanya paradiseni kwalaha misaveni. Anzhako ka kuzwa kuvululelwa loko ni ku ti hlola khwatsi, Russell Poggensee i lo wula lezi: “Jehova i wa nga nzi vuxelangi kutsumba loko hi moya wakwe wa ku basa.” Makabye Poggensee — ni vatsumbekileko vanwani vo tala vo kota yena — va lo nyima ku kuga ni kunwa zikombiso, kanilezi va lo simama kuya xialakanyisweni.

Ka nguva leyo “yo hlawuleka nguvu,” ku wa mahiwa matsima yo hlawuleka yo xumayela ma nga vulula ndlela ya ku vontlhe va kombisa ku bonga a nzhiho. A Bulletin ga 1932 gi lo kuca maKristu lezaku ma nga mahi “vakubasa va Xialakanyiso,” lava va gako ni kunwa zikombiso kanilezi na va nga hi “vatiri va lisine,” lava va xumayelako a mahungu ya lisine. Hi 1934, a Bulletin gi lo kombela “vavuneteli” giku: “Va ta kumeka a 1.000 wa vona vo ti tsalela xikhatini xa Xialakanyiso ke?” Xungetano hi vatotilweko, a Informante i te ngalo: “A litsako labye li enela ntsena loku va nyikela wukustumunyu ga Mufumo.” Hi kufamba ka xikhati, ku wa tava zalezo kambe hi lava va nga ni kutsumba ko hanya laha misaveni.a

Ka vanhu vontlhe va Jehova, a wusiku ga Xialakanyiso hi gona go basa nguvu lomu ka lembe. Va maha Xialakanyiso hambu loku va hi ka ziyimo zo nonoha. Hi 1930, Pearl English ni makabye wakwe wa xisati Ora, va lo famba xipimo xa 80 wa tikilometro hi mikonzo kasi ku ya wona a Xialakanyiso. Na a valelwe ka wutshamu ga yena yece paxweni le China, murumiwa Harold King i lo tsala magezu yo sasekiselwa ni tisimu xungetano hi Xialakanyiso a tlhela a maha vinya ni xibaba hi mauva yo woma ni maroxa. Kusukela Mutsuwuka-gambo wa Europa kuya Amerika Central kala Afrika, a maKristu yo tiya hlana ma ti boha ziwunu zikhatini za yimpi kutani za kubeletelwa ma maha Xialakanyiso xa kufa ka Jesu. Ni kwihi hi nga kona, ni ka xihi xiyimo, hi tlhangana hi dumisa Jehova na Jesu Kristu nguveni yo hlawuleka ya Xialakanyiso.