Nyika Kutsumba Ka Zisiwana
1 Jesu i wa khatalela zisiwana hi ndlela yo hlawuleka. Ku vile ni zikhati zo kari lezi a nyikileko xivuno hi tlhelo ga nyama hi ndlela yo hlamalisa a tlhela a hanyisa vababyi, kanilezi i wa veka nguvu kupima ka ku kanela “a mahungu yo saseka” ka zisiwana. (Mat. 11:5) A wutireli ga wuKristu inyamutlha ga ha simama ku vuna zisiwana zinwe ni vanhu vanwani. — Mat. 24:14; 28:19, 20.
2 A Kutsumba Ka Lisine: A vatireli va wuKristu ga mawunwa zikhati zo tala va tsumbisa a zisiwana lezaku zi ta humelela loku zi maha minyikelo chechini. Hambulezo, a Biblia gi gonzisa lezaku a Mufumo wa Nungungulu hi wona ntsena wu ta nga mbheta wusiwana wu tlhela wu lulamisa a zikarato zontlhe za vanhu. (Tis. 9:18; 145:16; Isa. 65:21-23) Hi ku komba a zisiwana lezi a Biblia gi zi gonzisako hakunene, hi zi nyika kutsumba hi tlhela hi zi vuna a ku enelisa xilaveko xa zona xa moya. — Mat. 5:3.
3 A vafarisi va le masikwini ya Jesu va wa veka hasi a zisiwana, hi ku zi chepeta, va wa zi vitana ‘am-ha·’aʹrets, kutani “vanhu va misava.” Hambulezo, Jesu i wa wona a “nkhata wabye” kutani wutomi gabye, na gihi ni “ntsengo.” (Tis. 72:13, 14) Ha zi kota ku pimanyisa Jesu ni ku ‘zwela wuxinji’ a zisiwana lezo hi ku zi kombisa wunene hi tlhela hi zi zwela wusiwana. (Mav. 14:31) Cima a hi lavi ku va wonela hasi lava va hanyako wusiwaneni kutani ku kanakana ku va nyika wukustumunyu. A kutala ka lava va amukelako mahungu ya Mufumo zisiwana.
4 Nyika Xivuno Zalezi: A ku gonzisa zisiwana a matshinya ya milayo ya Biblia lomu xipanzeni na konawu ku zi vuna a ku hungula wusiwana zalezi. Hi xikombiso, a Biblia gi kona a wudakwa, mihlakano ya tibedja, wulolo, ku tirisa fole, ni zimaho zinwani zi yisako wusiwaneni. (Mav. 6:10, 11; 23:21; 2 Kor. 7:1; Efe. 5:5) A Mitsalo yi kuca vanhu lezaku va tsumbeka ni ku tira “hi mbilu” yontlhe, ku nga matshamela lawa ma laviwako ka vatiri. (Kol. 3:22, 23; Maheb. 13:18) Hakunene, ka kukambisisa ko kari a vatholi vo tala va nyikile lisima a kutsumbeka kota tshamela gi va tsakisako nguvu ka vatiri.
5 Jehova wa khatala hi kuxaniseka ka zisiwana. Lokuloku, Jesu Kristu i ta hlanguta “a muvumali loyi a rilako.” (Tis. 72:12) Kala ku chikela xikhati lexo, hi na ni lungelo ga ku tiyisa vanwani, a ku patsa ni zisiwana, hi mahungu ya Biblia lawa ma nyikako kutsumba.