Fambani Khwatsi Hi Vanhu Va Tlharihileko
1 A xikhati lexi Jesu a nga ramba a mune wa vakukuti lezaku va maha valanzeli vakwe, vona a va hlwelangi ku maha a xiboho xabye kanilezi “zalezo va lo . . . mu lanzela.” (Mat. 4:18-22) Laha Saule wa le Tarsusi a nga hunzuluka a guma a tlheliselwa a kuwona kakwe, yenawu a nga hlwelangi kanilezi “zalezo i loba hungu hi Jesu lomu masinagogeni.” (Miti. 9:20) A xikhati xi simama kuya mahlweni; loku xi hunza, xi hunzele magumo. Hi kota ya lezo, za lisima ka hina a ‘ku famba khwatsi hi vanhu va tlharihileko’ xungetano hi lezi hi xi tirisisako zona a xikhati xa hina. — Efe. 5:15, 16.
2 Loku Zi Dzuka Zi Hi Humela: A zikhati lezi hi nga nazo nyamutlha za kuva hi tirela Jehova zi nga ha nyamalala manziko. (Jak. 4:14) A ku na munhu a ti phendlako ka lezi ‘zi dzukako zi hi humela.’ (Mutsh. 9:11) Ahandle ka lezo, hina hontlheni hiya kukhosahaleni, niku a “masiku ya kubiha” lawa ma fambelanako ni wukhosana lawa ma hi hungulelako lezi hi zi kotako ku maha ntirweni wa Jehova a ma potseki mafambiseleni lawa ya zilo. (Mutsh. 12:1) Hikwalaho, a hi wutlhari a ku hlwela ku ti hendleleta ka Nungungulu kutani a ku rinzela ziyimo zi faneleko na hi nga se engetela a wutireli ga hina kala laha zi kotekako ha kona masikwini lawa. (Luka 9:59-62) Abrahama i kumile kurula malembeni yakwe yo gumesa, afa “na a khosahele, na a hi ni malembe ya kutala” hakuva i wa tirisile wutomi gakwe hi wutlhari, a gi tirisela ka Jehova hi kumbhelela. — Gen. 25:8.
3 A Xikhati Xi Komile: Hi lava kambe ku tirisa a xikhati xa hina hi wutlhari hakuva ‘a xikhati xi seleko xi komile.’ (1 Kor. 7:29-31, Tradução do Novo Mundo) Lokuloku a mafambisela lawa ya kale ya zilo ma ta fuva. A xikhati xa ku hlengela kuhlengeletweni ka hombe ka vanhu va fanako ni tiyivu xikhatini xa ‘ku tshovela a mavele ya misava’ xi ta gumesa. (Kuv. 14:15) Hi fanele ku ti wonela lezaku hi nga vumeleli a kukaratekela za wutomi ni zilo zi pengisako mapimo a kuva zi hi tekela a xikhati lexi xi nga wa ta tiriselwa khwatsi wutirelini. (Luka 21:34, 35) Hakunene zi ta hi tsakisa nguvu a ku cuwuka nzhako na hi tiva lezaku hi vile ni kuhlengela ka hombe kutshoveleni!
4 Hi fanele ku tshama na hi ti wonela lezaku hi nga luzi a malungelo yo tsakisa ya ku nghenela ntiro lowu wu zi kotako ku kumeka. Ngha hi ti yimisela a ku maha zontlhe hi zi kotako kasi ku tirela Jehova “loku ka ha wuliwa ku ngalo: Nyamutlha.” (Maheb. 3:13) Hi ku maha lezo, hi ta ti komba na hi tlharihile hakunene, hakuva “loyi a mahako kuranza ka Nungungulu i ta tshama kala kupinzuka.” — 1 Joh. 2:17.