Kuvuxeta Ka Xikola Xa Wutireli Ga Nungungulu

A ziwutiso zi lanzelako zi ta kambisiswa ka Xikola Xa Wutireli Ga Nungungulu ka viki gi sangulako hi 31 ka Dezembro wa 2007. Hi 30 wa timeneti, a muwoneleli wa xikola i ta fambisa a kuvuxeta ku seketelwako ka timhaka ti gonzilweko ka ziavelo za maviki ya 5 ka Novembro kala 31 ka Dezembro wa 2007.

MATSHAMELA YA WUKANELI

1. Hi tihi timhaka leti hi faneleko ku ti alakanya kasi ku tiyiseka lezaku a magumo ya kanelo wa hina ma humelela? [be p. 220 nzi. 4–p. 221 nzi. 3] A kugumesa ku fanele ku yelana khwatsi ni hloko ya mhaka ya kanelo. Hi fanele ku tlhamusela ka lava va nga kona lezi va faneleko ku zi maha ni ku va kuca ku maha lezo. A timhaka ta hina to gumesa ti fanele ku zwala kuva ta magumo ni ku wuliwa hi kutsumba ni kutiyiseka.

2. Xana hi nga tiyisekisa kuyini lezaku lezi hi zi wulako wutirelini ga simu za lisine? [be p. 223 tinz. 2-4] Na hi nga seya wutirelini, hi fanele ku tolovelana ni timhaka leti hi lavako ku wulawula ha tona. Hi fanele ku alakanyela a ziwutiso lezi kuzilava zi nga mahiwako, hi tlhela hi ti longiselela ku nyika a mihlamulo yi seketelwako lomu ka Biblia. Loku hi mahiwa xiwutiso lexi hi nga ti longiselangiko ku hlamula, hi fanele ku ala a nzhingo wa ku dumba. Wutshanwini ga lezo, hi fanele ku kambisisa a timhaka hi guma hi tlhelela. (Mav. 15:28)

3. Ka tikanelo ta hina lomu mitlhanganwini ya bandla, xana hi nga zi kombisisa kuyini lezaku ha wu zwisisa a ntiro wa bandla kota “mhanze ni xiseketelo xa zinene”? (1 Tim. 3:15) [be p. 224 tinz. 1-4] Kasi ku yimela zinene, za lisima a ku zwisisa a mongo wa mitsalo leyi hi alakanyelako ku yi tirisa. Hi fanele ku khatalela a mongo ni khungo ga yona. Hi ku tirisa khwatsi a zivuno lezi zi nyikiwako hi ntlawa wa nanza gi tsumbekileko ni go tlhariha, hi nga zi kota kutiyiseka lezaku a tikanelo ta hina ti seketelwa ka “xikombiso xa timhaka ti nene” ti kombisiwako ka Mitsalo yontlhe ya zinene. (2 Tim. 1:​13, Tradução do Novo Mundo)

4. Hikuyini zihi za lisima a ku kambisisa a kutsumbeka ka mahungu ya hina, niku xana hi nga zi mahisa kuyini? [be p. 225 tinz. 1-2] A magezu ma nga hiko na lisine ni mibiko yi hunzeletilweko yi yelanako ni mitsengo, lipimo, kutani kubinza ka mhaka yo kari, ka vuxa ku kanakana xungetano hi kutsumbeka ka wena. Za koteka a ku a magezu ma nga hiko na lisine ma phindiwa hi vanwani, zi engetela a xihoxo. A ndlela yinwe ya ku tiyiseka hi kutsumbeka ka mitsengo, zilo za ha hi ku mahekako, michumu ya yiswa, kutani matshango hi ku zi teka lomu ka mabhuko ma tsumbekako.

5. A xikhati lexi hi gonzisako, xana hi nga zi kotisa kuyini a ku maha lezaku a timhaka ta hina ti olovela vanwani a ku ti zwisisa? [be p. 226 nzi. 3–p. 227 nzi. 1] Hi fanele a ku zwisisa khwatsi a mhaka ya hina a ku sangula kasi ha kota ku yi maha yi zwisiseka ka vanwani. Zi nene nguvu a ku nga binziseli a vaingiseli va hina hi mitlhamuselo yi nga lavekiko. Hi fanele kambe a ku ti nyika xikhati xa ku gonza ni ku tlhamusela mitsalo-tshinya wutshanwini ga ku hatlisela kuhunza ka mutsalo wunwe hiya ka wunwani.

XIAVELO N.° 1

6. Xini xi kombako lezaku a tlhatlhambuto wa Jona ngwa lisine? [bsi07 p. 18 nzi. 3] Jesu i kumbukile Jona kota munhu wa lisine a tlhela a nyika tlhamuselo wu pimisilweko wa zilo zimbiri za wuprofeti zi mahekeleko Jona, a komba hi ndlela leyo lezaku a bhuku legi gi na ni wuprofeti ga lisine. (Mat. 12:39-​41; 16:4; Luka 11:29-​32) Xikhati xontlhe a vaJuda va veka Jona xikari ka xaxameto wa mabhuku yabye niku va gi wona na gi hi ga matimu. A kutsumbeka ka Jona wutsumbu konawu ku maha lezaku a matimu lawa mava ya lisine.

7. Hi xihi a xiprofeto xa Mika xi yelanako ni kufuma ka Mufumo wa Nungungulu hi ku tirisa Jesu? [bsi07 p. 21 nzi. 18] A kupswalwa ka Jesu le Betlehema, kota kutatiseka ka xiprofeto xa Mika 5:2, ku woningela a mhaka ya vesi legi kota xiprofeto xa kuta ka Mufumo wa Nungungulu. Jesu hi loyi a humako hi le Betlehema (Yindlu ya Xibaba) na a hi ni mabhinzu ma nyikako wutomi ka vontlhe lava va kholwako muphahlelweni wakwe. Hi yena ‘a gisako a tlhambi hi ntamu wa Jehova’ ni loyi a mahako wahombe a tlhela a yisa kurula magemeta-musi ya misava. (Mika. 5:4; Joh. 6:​33-​40)

8. Xini lexi xi kombako lezaku a bhuku ga Habakuka gi pimiselwe hi Nungungulu? [bsi07 p. 23 nzi. 4] Mupostoli Paule i kombile ku vumela a wuprofeti legi kota xipanze xa Mitsalo yi pimisilweko a xikhati lexi a nga tshaha Habakuka 1:5 a tlhela a gi kumbuka kota nchumu wu wulilweko hi “vaprofeti.” (Miti. 13: 40, 41) Paule kambe i kumbukile nguvu a bhuku legi mapapilweni yakwe. (Rom. 1:​17; Gal. 3:​11; Maheb. 10:38) Hi kuengetelekileko, a kutatiseka ka magezu ya kukona ya Habakuka xungetano hi Juda na Babuloni hakunene ku maha Habakuka ava muprofeti wa lisine wa Jehova, loyi a wulawulileko hi vito ni wudzunzo gakwe.

9. Hikuyini ku nga wuliwako lezaku hi 520 Mahlweni ka Nguva ya Hina a vaJuda va wa nga se tatisa a khungo ga ku wuya ka vona hi le wukhumbini? (Hag. 1:4) [bsi07 p. 27 nzi. 3] Kwalomu ka 17 wa malembe anzhako ka ku wuya ka vona hi le wukhumbini ga le Babuloni, a vaJuda va tsikile ku mbhetisa a ntiro wa ku lulamisa tempeli. A malembe wontlhe lawo vona va vumelele lezaku a kukaneta ka valala ni kungakhatali ka vona wutsumbu ni kutinyiketela ka vona titshombeni zi va tsanzekisa a ku aketa tempeli niku hi ku maha lezo va tatisa a khungo ga kuwuya kabye.

10. I siku muni gi dzunzekako legi Zakaria a gi kumbukako hi kuphindaphinda? [bsi07 p. 30 nzi. 26] A muprofeti i phinda a magezu “hi siku lego” 20 wa makhati. A kukambisiswa ka ndlela leyi Zakaria a tirisako ha yona a magezu lawa ku komba lezaku wona ma wula a siku legi Jehova a to fuvisa a mavito ya zifananiso a tlhela a mbheta a vaprofeti va mawunwa. (Zak. 13:​2, 4) I siku legi Jehova a lwako ni matiko ni ku vuxa gujeguje xikari ka mabutho yabye a xikhati lexi a ma hlaselako a tlhela a nyika ‘minzhelelo ya zitsunga zakwe’ kota wuchavelo ka vanhu vakwe. (Zak. 12:​8, 9; 14:​1-5, 13)

KUGONZA KA BIBLIA KA VIKI NI VIKI

11. Xana a xiprofeto xa Joeli xungetano hi kudumela ka humbi xi tatisekisile kuyini ka zana go sangula, niku xana xi tatisekisa kuyini inyamutlha? (Joeli 2:1-10, 28) [w07 1/10 “A Palavra de Jeová É Viva —  Destaques dos livros de Joel e Amós”] Hi Pentekosta wa 33 Nguveni ya Hina, mupostoli Pedro i tshahile ka xiprofeto xa Joeli a tlhela a xi tirisela ka maKristu ma totilweko lawa ma sangulileko ku wulawula hi tirimi xungetano hi wukulu ga zilo za Nungungulu. (Miti. 2:​11, 16-​20) A ntiro wabye wa ku xumayela ka zana ga malembe go sangula wu xanisile a varangeli va mawunwa va wukhongeli. (Miti. 5:​17, 27-​29) Hi kufanana, a ntiro wa hina wa ku xumayela, lowu wu patsako a ku paluxa wukhongeli ga mawunwa, wu fana ni ntungu ka varangeli va mawunwa va wukhongeli.

12. Xana a ‘xirunzu xi teleko hi mihanzu yi buvileko’ xi wa tlhamusela yini? (Amosi 8:1, 2) [w07 1/10 “A Palavra de Jeová É Viva —  Destaques dos livros de Joel e Amós”] A ‘xirunzu xi teleko hi mihanzu yi buvileko’ xi wa tlhamusela lezaku a kugumesa ka mufumo wa Israeli wa khume ga tixaka ku wa hi kusuhani, kota lezi a mihanzu yi buvileko yi khayiwako kusuhani ka kugumesa ka nguva ya kutshovela. A kugumesa ku chikele hi 740 Mahlweni ka Nguva ya Hina a xikhati lexi Samaria a nga hluliwa hi vaAssiria, na ku nga se hunza lembe na Amosi na a pimiselwe a ku profeta.

13. Xana Jehova i ‘hunzulukile [“i ti layile,” NM] a tlhelisa a khombo legi a nga wulile lezaku i ta rumela a vaNiniva’ hi ndlela muni, niku xana lezo zi hi khumbisa kuyini? (Jona 3:10) [w03 15/7 pp. 17-18] Jehova “i lo hunzuluka” hi ndlela yaku i cicile lezi a nga va khomisa zona a vaNiniva hakuva va wa hunzulile a mahanyela yabye. A milayo ya Nungungulu ya mahanyela a yi cicangi, kanilezi Jehova i lo cica xiboho xakwe hakuva i wonile lezaku a vaNiniva va wa hunzulukile. (Jona 4:​11) Jehova wa ha khatala hi lava va kalako va nga se sangula ku mu tirela niku wa va nyika xikhati xa lezaku va hunzuluka niku hi ku maha lezo va potsa a mhango leyi yi tako kukombisweni ka kulamula kakwe. Hi fanele ku khatalela ku va tlharihisa, a kufana ni lezi Jona a tlharihisileko a vaNiniva.

14. Xana zi wula yini a ku famba vitweni ga Jehova? (Mika. 4:5) [w03 15/8 p. 17 nzi. 19] A ku famba vitweni ga Jehova a hi ku wula ntsena lezaku Jehova i Nungungulu wa hina. Zona kambe zi hunza a kuhlengela ka hina mitlhanganwini ya wuKristu ni ntirweni wa kuxumayela a Mufumo, hambulezi a mitiro leyo yi nga ya lisima. Loku hi famba vitweni ga Jehova, hi ti hendleletile ka yena niku hi ti karatela a ku mu tirela hi kutsumbeka hakuva ha mu ranza hi mbilu yontlhe.

15. Hi rini niku hi ndlela muni Jehova a tako “tempeleni” yakwe kasi ku ta lamula xikhatini xa hina? (Mala. 3:1-3) [re p. 32 kwadru; jd p. 179 nzi. 3–p. 181 nzi. 6] Kota lezi Jesu, malembe manharu ni khihlanya anzhako ka kuva a totilwe kota Hosi yi Hlawulilweko, a tileko tempeleni ya xiviri hi 33 Nguveni ya Hina a tlhela a hlongola lava va nga yi maha bako ga vaphangi, hi kufanana yena kota muyimeli wa Jehova i tile tempeleni ya moya hi 1918, malembe manharu ni khihlanya anzhako ka kuva a yimisilwe Mufunweni wa le tilweni. A varangeli va wukhongeli, lava va nga hi xipanze xa fambisela ga wukhongeli ga mawunwa ni kuva ni nanzu wa kuhalatwa ka nkhata ni wubhayi ga moya, va alilwe. Xikhatini xwalexo, Jehova i sangulile ku hluta a maKristu ya lisine hi ku basisa a wukhozeli gabye, zimaho, ni tigonzo tabye.